౧. విభఙ్గవారో

హేతుపచ్చయో

౬౯. దస్సనేన పహాతబ్బో ధమ్మో దస్సనేన పహాతబ్బస్స ధమ్మస్స హేతుపచ్చయేన పచ్చయో – దస్సనేన పహాతబ్బా హేతూ సమ్పయుత్తకానం ఖన్ధానం హేతుపచ్చయేన పచ్చయో. (౧)

దస్సనేన పహాతబ్బో ధమ్మో నేవదస్సనేన నభావనాయ పహాతబ్బస్స ధమ్మస్స హేతుపచ్చయేన పచ్చయో – దస్సనేన పహాతబ్బా హేతూ చిత్తసముట్ఠానానం రూపానం హేతుపచ్చయేన పచ్చయో. (౨)

దస్సనేన పహాతబ్బో ధమ్మో దస్సనేన పహాతబ్బస్స చ నేవదస్సనేన నభావనాయ పహాతబ్బస్స చ ధమ్మస్స హేతుపచ్చయేన పచ్చయో – దస్సనేన పహాతబ్బా హేతూ సమ్పయుత్తకానం ఖన్ధానం చిత్తసముట్ఠానానఞ్చ రూపానం హేతుపచ్చయేన పచ్చయో. (౩)

౭౦. భావనాయ పహాతబ్బో ధమ్మో…పే… ధమ్మస్స హేతుపచ్చయేన పచ్చయో – భావనాయ పహాతబ్బా హేతూ సమ్పయుత్తకానం ఖన్ధానం హేతుపచ్చయేన పచ్చయో. (౧)

భావనాయ పహాతబ్బో ధమ్మో నేవదస్సనేన నభావనాయ పహాతబ్బస్స…పే… భావనాయ పహాతబ్బా హేతూ చిత్తసముట్ఠానానం రూపానం హేతుపచ్చయేన పచ్చయో. (౨)

భావనాయ పహాతబ్బో ధమ్మో భావనాయ పహాతబ్బస్స చ నేవదస్సనేన నభావనాయ పహాతబ్బస్స చ ధమ్మస్స…పే… భావనాయ పహాతబ్బా హేతూ సమ్పయుత్తకానం ఖన్ధానం చిత్తసముట్ఠానానఞ్చ రూపానం హేతుపచ్చయేన పచ్చయో. (౩)

నేవదస్సనేన నభావనాయ పహాతబ్బో ధమ్మో నేవదస్సనేన నభావనాయ పహాతబ్బస్స ధమ్మస్స…పే… నేవదస్సనేన నభావనాయ పహాతబ్బా హేతూ సమ్పయుత్తకానం ఖన్ధానం చిత్తసముట్ఠానానఞ్చ రూపానం హేతుపచ్చయేన పచ్చయో. పటిసన్ధిక్ఖణే నేవదస్సనేన నభావనాయ పహాతబ్బా హేతూ సమ్పయుత్తకానం ఖన్ధానం కటత్తా చ రూపానం హేతుపచ్చయేన పచ్చయో. (౧)

ఆరమ్మణపచ్చయో

౭౧. దస్సనేన పహాతబ్బో ధమ్మో దస్సనేన పహాతబ్బస్స ధమ్మస్స ఆరమ్మణపచ్చయేన పచ్చయో – దస్సనేన పహాతబ్బం రాగం అస్సాదేతి అభినన్దతి, తం ఆరబ్భ దస్సనేన పహాతబ్బో రాగో ఉప్పజ్జతి, దిట్ఠి ఉప్పజ్జతి, విచికిచ్ఛా ఉప్పజ్జతి. దస్సనేన పహాతబ్బం దోమనస్సం ఉప్పజ్జతి, దిట్ఠిం అస్సాదేతి అభినన్దతి, తం ఆరబ్భ దస్సనేన పహాతబ్బో రాగో ఉప్పజ్జతి, దిట్ఠి ఉప్పజ్జతి, విచికిచ్ఛా ఉప్పజ్జతి. దస్సనేన పహాతబ్బం దోమనస్సం ఉప్పజ్జతి, విచికిచ్ఛం ఆరబ్భ విచికిచ్ఛా ఉప్పజ్జతి, దిట్ఠి ఉప్పజ్జతి, దస్సనేన పహాతబ్బం దోమనస్సం ఉప్పజ్జతి. దస్సనేన పహాతబ్బం దోమనస్సం ఆరబ్భ దస్సనేన పహాతబ్బం దోమనస్సం ఉప్పజ్జతి, దిట్ఠి ఉప్పజ్జతి, విచికిచ్ఛా ఉప్పజ్జతి. (౧)

దస్సనేన పహాతబ్బో ధమ్మో నేవదస్సనేన నభావనాయ పహాతబ్బస్స ధమ్మస్స ఆరమ్మణపచ్చయేన పచ్చయో – అరియా దస్సనేన పహాతబ్బే పహీనే కిలేసే పచ్చవేక్ఖన్తి, పుబ్బే సముదాచిణ్ణే కిలేసే జానన్తి. దస్సనేన పహాతబ్బే ఖన్ధే అనిచ్చతో దుక్ఖతో అనత్తతో విపస్సన్తి. చేతోపరియఞాణేన దస్సనేన పహాతబ్బచిత్తసమఙ్గిస్స చిత్తం జానన్తి. దస్సనేన పహాతబ్బా ఖన్ధా చేతోపరియఞాణస్స, పుబ్బేనివాసానుస్సతిఞాణస్స, యథాకమ్మూపగఞాణస్స, అనాగతంసఞాణస్స, ఆవజ్జనాయ ఆరమ్మణపచ్చయేన పచ్చయో. (౨)

౭౨. భావనాయ పహాతబ్బో ధమ్మో భావనాయ పహాతబ్బస్స ధమ్మస్స ఆరమ్మణపచ్చయేన పచ్చయో – భావనాయ పహాతబ్బం రాగం అస్సాదేతి అభినన్దతి, తం ఆరబ్భ భావనాయ పహాతబ్బో రాగో ఉప్పజ్జతి, ఉద్ధచ్చం ఉప్పజ్జతి. భావనాయ పహాతబ్బం దోమనస్సం ఉప్పజ్జతి, ఉద్ధచ్చం ఆరబ్భ ఉద్ధచ్చం ఉప్పజ్జతి. భావనాయ పహాతబ్బం దోమనస్సం ఉప్పజ్జతి, భావనాయ పహాతబ్బం దోమనస్సం ఆరబ్భ భావనాయ పహాతబ్బం దోమనస్సం ఉప్పజ్జతి, ఉద్ధచ్చం ఉప్పజ్జతి. (౧)

భావనాయ పహాతబ్బో ధమ్మో దస్సనేన పహాతబ్బస్స ధమ్మస్స ఆరమ్మణపచ్చయేన పచ్చయో – భావనాయ పహాతబ్బం రాగం అస్సాదేతి అభినన్దతి, తం ఆరబ్భ దస్సనేన పహాతబ్బో రాగో ఉప్పజ్జతి, దిట్ఠి ఉప్పజ్జతి, విచికిచ్ఛా ఉప్పజ్జతి, దస్సనేన పహాతబ్బం దోమనస్సం ఉప్పజ్జతి. ఉద్ధచ్చం ఆరబ్భ దిట్ఠి ఉప్పజ్జతి, విచికిచ్ఛా ఉప్పజ్జతి, దస్సనేన పహాతబ్బం దోమనస్సం ఉప్పజ్జతి. భావనాయ పహాతబ్బం దోమనస్సం ఆరబ్భ దస్సనేన పహాతబ్బం దోమనస్సం ఉప్పజ్జతి, దిట్ఠి ఉప్పజ్జతి, విచికిచ్ఛా ఉప్పజ్జతి. (౨)

భావనాయ పహాతబ్బో ధమ్మో నేవదస్సనేన నభావనాయ పహాతబ్బస్స ధమ్మస్స ఆరమ్మణపచ్చయేన పచ్చయో – అరియా భావనాయ పహాతబ్బే పహీనే కిలేసే పచ్చవేక్ఖన్తి, విక్ఖమ్భితే కిలేసే పచ్చవేక్ఖన్తి, పుబ్బే సముదాచిణ్ణే కిలేసే జానన్తి. భావనాయ పహాతబ్బే ఖన్ధే అనిచ్చతో దుక్ఖతో అనత్తతో విపస్సన్తి, చేతోపరియఞాణేన భావనాయ పహాతబ్బచిత్తసమఙ్గిస్స చిత్తం జానన్తి. భావనాయ పహాతబ్బా ఖన్ధా చేతోపరియఞాణస్స, పుబ్బేనివాసానుస్సతిఞాణస్స, యథాకమ్మూపగఞాణస్స, అనాగతంసఞాణస్స, ఆవజ్జనాయ ఆరమ్మణపచ్చయేన పచ్చయో. (౩)

౭౩. నేవదస్సనేన నభావనాయ పహాతబ్బో ధమ్మో నేవదస్సనేన నభావనాయ పహాతబ్బస్స ధమ్మస్స ఆరమ్మణపచ్చయేన పచ్చయో – దానం దత్వా సీలం సమాదియిత్వా ఉపోసథకమ్మం కత్వా తం పచ్చవేక్ఖతి, పుబ్బే సుచిణ్ణాని పచ్చవేక్ఖతి, ఝానా వుట్ఠహిత్వా ఝానం పచ్చవేక్ఖతి. అరియా మగ్గా వుట్ఠహిత్వా మగ్గం పచ్చవేక్ఖన్తి, ఫలం పచ్చవేక్ఖన్తి, నిబ్బానం పచ్చవేక్ఖన్తి; నిబ్బానం గోత్రభుస్స, వోదానస్స, మగ్గస్స, ఫలస్స, ఆవజ్జనాయ ఆరమ్మణపచ్చయేన పచ్చయో. చక్ఖుం అనిచ్చతో దుక్ఖతో అనత్తతో విపస్సతి; సోతం… ఘానం… జివ్హం… కాయం… రూపే… సద్దే… గన్ధే… రసే… ఫోట్ఠబ్బే… వత్థుం… నేవదస్సనేన నభావనాయ పహాతబ్బే ఖన్ధే అనిచ్చతో దుక్ఖతో అనత్తతో విపస్సతి; దిబ్బేన చక్ఖునా రూపం పస్సతి, దిబ్బాయ సోతధాతుయా సద్దం సుణాతి, చేతోపరియఞాణేన నేవదస్సనేన నభావనాయ పహాతబ్బచిత్తసమఙ్గిస్స చిత్తం జానన్తి, ఆకాసానఞ్చాయతనం విఞ్ఞాణఞ్చాయతనస్స…పే… ఆకిఞ్చఞ్ఞాయతనం నేవసఞ్ఞానాసఞ్ఞాయతనస్స…పే… రూపాయతనం చక్ఖువిఞ్ఞాణస్స ఆరమ్మణపచ్చయేన పచ్చయో…పే… ఫోట్ఠబ్బాయతనం కాయవిఞ్ఞాణస్స ఆరమ్మణపచ్చయేన పచ్చయో…పే… నేవదస్సనేన నభావనాయ పహాతబ్బా ఖన్ధా ఇద్ధివిధఞాణస్స, చేతోపరియఞాణస్స, పుబ్బేనివాసానుస్సతిఞాణస్స, యథాకమ్మూపగఞాణస్స, అనాగతంసఞాణస్స, ఆవజ్జనాయ ఆరమ్మణపచ్చయేన పచ్చయో. (౧)

నేవదస్సనేన నభావనాయ పహాతబ్బో ధమ్మో దస్సనేన పహాతబ్బస్స ధమ్మస్స ఆరమ్మణపచ్చయేన పచ్చయో – దానం దత్వా సీలం సమాదియిత్వా ఉపోసథకమ్మం కత్వా తం అస్సాదేతి అభినన్దతి, తం ఆరబ్భ దస్సనేన పహాతబ్బో రాగో ఉప్పజ్జతి, దిట్ఠి ఉప్పజ్జతి, విచికిచ్ఛా ఉప్పజ్జతి, దస్సనేన పహాతబ్బం దోమనస్సం ఉప్పజ్జతి. పుబ్బే సుచిణ్ణాని అస్సాదేతి అభినన్దతి…పే… ఝానా వుట్ఠహిత్వా ఝానం అస్సాదేతి అభినన్దతి, తం ఆరబ్భ దస్సనేన పహాతబ్బో రాగో…పే… దిట్ఠి…పే… విచికిచ్ఛా…పే… ఝానే పరిహీనే విప్పటిసారిస్స దస్సనేన పహాతబ్బం దోమనస్సం ఉప్పజ్జతి. చక్ఖుం అస్సాదేతి అభినన్దతి…పే… సోతం… ఘానం… జివ్హం… కాయం… రూపే… సద్దే… గన్ధే… రసే… ఫోట్ఠబ్బే… వత్థుం… నేవదస్సనేన నభావనాయ పహాతబ్బే ఖన్ధే అస్సాదేతి అభినన్దతి, తం ఆరబ్భ దస్సనేన పహాతబ్బో రాగో…పే… దిట్ఠి…పే… విచికిచ్ఛా…పే… దస్సనేన పహాతబ్బం దోమనస్సం ఉప్పజ్జతి. (౨)

నేవదస్సనేన నభావనాయ పహాతబ్బో ధమ్మో భావనాయ పహాతబ్బస్స ధమ్మస్స ఆరమ్మణపచ్చయేన పచ్చయో – దానం దత్వా సీలం సమాదియిత్వా ఉపోసథకమ్మం కత్వా తం అస్సాదేతి అభినన్దతి, తం ఆరబ్భ భావనాయ పహాతబ్బో రాగో ఉప్పజ్జతి, ఉద్ధచ్చం ఉప్పజ్జతి, భావనాయ పహాతబ్బం దోమనస్సం ఉప్పజ్జతి. పుబ్బే సుచిణ్ణాని…పే… ఝానా వుట్ఠహిత్వా…పే… చక్ఖుం…పే… వత్థుం… నేవదస్సనేన నభావనాయ పహాతబ్బే ఖన్ధే అస్సాదేతి…పే… తం ఆరబ్భ భావనాయ పహాతబ్బో రాగో ఉప్పజ్జతి, ఉద్ధచ్చం ఉప్పజ్జతి, భావనాయ పహాతబ్బం దోమనస్సం ఉప్పజ్జతి. (౩)

అధిపతిపచ్చయో

౭౪. దస్సనేన పహాతబ్బో ధమ్మో దస్సనేన పహాతబ్బస్స ధమ్మస్స అధిపతిపచ్చయేన పచ్చయో – ఆరమ్మణాధిపతి, సహజాతాధిపతి. ఆరమ్మణాధిపతి – దస్సనేన పహాతబ్బం రాగం గరుం కత్వా అస్సాదేతి అభినన్దతి, తం గరుం కత్వా దస్సనేన పహాతబ్బో రాగో ఉప్పజ్జతి, దిట్ఠి ఉప్పజ్జతి; దిట్ఠిం గరుం కత్వా అస్సాదేతి అభినన్దతి, తం గరుం కత్వా దస్సనేన పహాతబ్బో రాగో ఉప్పజ్జతి, దిట్ఠి ఉప్పజ్జతి. సహజాతాధిపతి – దస్సనేన పహాతబ్బాధిపతి సమ్పయుత్తకానం ఖన్ధానం అధిపతిపచ్చయేన పచ్చయో. (౧)

దస్సనేన పహాతబ్బో ధమ్మో నేవదస్సనేన నభావనాయ పహాతబ్బస్స ధమ్మస్స అధిపతిపచ్చయేన పచ్చయో. సహజాతాధిపతి – దస్సనేన పహాతబ్బాధిపతి చిత్తసముట్ఠానానం రూపానం అధిపతిపచ్చయేన పచ్చయో. (౨)

దస్సనేన పహాతబ్బో ధమ్మో దస్సనేన పహాతబ్బస్స చ నేవదస్సనేన నభావనాయ పహాతబ్బస్స చ ధమ్మస్స అధిపతిపచ్చయేన పచ్చయో. సహజాతాధిపతి – దస్సనేన పహాతబ్బాధిపతి సమ్పయుత్తకానం ఖన్ధానం చిత్తసముట్ఠానానఞ్చ రూపానం అధిపతిపచ్చయేన పచ్చయో. (౩)

౭౫. భావనాయ పహాతబ్బో ధమ్మో భావనాయ పహాతబ్బస్స ధమ్మస్స అధిపతిపచ్చయేన పచ్చయో – ఆరమ్మణాధిపతి, సహజాతాధిపతి. ఆరమ్మణాధిపతి – భావనాయ పహాతబ్బం రాగం గరుం కత్వా అస్సాదేతి అభినన్దతి, తం గరుం కత్వా భావనాయ పహాతబ్బో రాగో ఉప్పజ్జతి. సహజాతాధిపతి – భావనాయ పహాతబ్బాధిపతి సమ్పయుత్తకానం ఖన్ధానం అధిపతిపచ్చయేన పచ్చయో. (౧)

భావనాయ పహాతబ్బో ధమ్మో దస్సనేన పహాతబ్బస్స ధమ్మస్స అధిపతిపచ్చయేన పచ్చయో. ఆరమ్మణాధిపతి – భావనాయ పహాతబ్బం రాగం గరుం కత్వా అస్సాదేతి అభినన్దతి, తం గరుం కత్వా దస్సనేన పహాతబ్బో రాగో ఉప్పజ్జతి, దిట్ఠి ఉప్పజ్జతి. (౨)

భావనాయ పహాతబ్బో ధమ్మో నేవదస్సనేన నభావనాయ పహాతబ్బస్స ధమ్మస్స అధిపతిపచ్చయేన పచ్చయో. సహజాతాధిపతి – భావనాయ పహాతబ్బాధిపతి చిత్తసముట్ఠానానం రూపానం అధిపతిపచ్చయేన పచ్చయో. (౩)

భావనాయ పహాతబ్బో ధమ్మో భావనాయ పహాతబ్బస్స చ నేవదస్సనేన నభావనాయ పహాతబ్బస్స చ ధమ్మస్స అధిపతిపచ్చయేన పచ్చయో. సహజాతాధిపతి – భావనాయ పహాతబ్బాధిపతి సమ్పయుత్తకానం ఖన్ధానం చిత్తసముట్ఠానానఞ్చ రూపానం అధిపతిపచ్చయేన పచ్చయో. (౪)

౭౬. నేవదస్సనేన నభావనాయ పహాతబ్బో ధమ్మో నేవదస్సనేన నభావనాయ పహాతబ్బస్స ధమ్మస్స అధిపతిపచ్చయేన పచ్చయో – ఆరమ్మణాధిపతి, సహజాతాధిపతి. ఆరమ్మణాధిపతి – దానం దత్వా సీలం సమాదియిత్వా ఉపోసథకమ్మం కత్వా తం గరుం కత్వా పచ్చవేక్ఖతి, పుబ్బే సుచిణ్ణాని…పే… ఝానా వుట్ఠహిత్వా ఝానం గరుం కత్వా పచ్చవేక్ఖతి, అరియా మగ్గా వుట్ఠహిత్వా మగ్గం గరుం కత్వా పచ్చవేక్ఖన్తి, ఫలం గరుం కత్వా పచ్చవేక్ఖన్తి, నిబ్బానం గరుం కత్వా పచ్చవేక్ఖన్తి; నిబ్బానం గోత్రభుస్స, వోదానస్స, మగ్గస్స, ఫలస్స అధిపతిపచ్చయేన పచ్చయో. సహజాతాధిపతి – నేవదస్సనేన నభావనాయ పహాతబ్బాధిపతి సమ్పయుత్తకానం ఖన్ధానం చిత్తసముట్ఠానానఞ్చ రూపానం అధిపతిపచ్చయేన పచ్చయో. (౧)

నేవదస్సనేన నభావనాయ పహాతబ్బో ధమ్మో దస్సనేన పహాతబ్బస్స ధమ్మస్స అధిపతిపచ్చయేన పచ్చయో. ఆరమ్మణాధిపతి – దానం దత్వా సీలం సమాదియిత్వా ఉపోసథకమ్మం కత్వా తం గరుం కత్వా అస్సాదేతి అభినన్దతి, తం గరుం కత్వా దస్సనేన పహాతబ్బో రాగో ఉప్పజ్జతి, దిట్ఠి ఉప్పజ్జతి. పుబ్బే సుచిణ్ణాని గరుం కత్వా…పే… ఝానా వుట్ఠహిత్వా ఝానం గరుం కత్వా…పే… చక్ఖుం…పే… వత్థుం… నేవదస్సనేన నభావనాయ పహాతబ్బే ఖన్ధే గరుం కత్వా అస్సాదేతి అభినన్దతి, తం గరుం కత్వా దస్సనేన పహాతబ్బో రాగో ఉప్పజ్జతి, దిట్ఠి ఉప్పజ్జతి. (౨)

నేవదస్సనేన నభావనాయ పహాతబ్బో ధమ్మో భావనాయ పహాతబ్బస్స ధమ్మస్స అధిపతిపచ్చయేన పచ్చయో. ఆరమ్మణాధిపతి – దానం దత్వా సీలం సమాదియిత్వా ఉపోసథకమ్మం కత్వా తం గరుం కత్వా అస్సాదేతి అభినన్దతి, తం గరుం కత్వా భావనాయ పహాతబ్బో రాగో ఉప్పజ్జతి. పుబ్బే…పే… నేవదస్సనేన నభావనాయ పహాతబ్బే ఖన్ధే గరుం కత్వా అస్సాదేతి అభినన్దతి, తం గరుం కత్వా భావనాయ పహాతబ్బో రాగో ఉప్పజ్జతి. (౩)

అనన్తరపచ్చయో

౭౭. దస్సనేన పహాతబ్బో ధమ్మో దస్సనేన పహాతబ్బస్స ధమ్మస్స అనన్తరపచ్చయేన పచ్చయో – పురిమా పురిమా దస్సనేన పహాతబ్బా ఖన్ధా పచ్ఛిమానం పచ్ఛిమానం దస్సనేన పహాతబ్బానం ఖన్ధానం అనన్తరపచ్చయేన పచ్చయో.

దస్సనేన పహాతబ్బో ధమ్మో నేవదస్సనేన నభావనాయ పహాతబ్బస్స ధమ్మస్స అనన్తరపచ్చయేన పచ్చయో – దస్సనేన పహాతబ్బా ఖన్ధా వుట్ఠానస్స అనన్తరపచ్చయేన పచ్చయో. (౨)

భావనాయ పహాతబ్బో ధమ్మో భావనాయ పహాతబ్బస్స ధమ్మస్స అనన్తరపచ్చయేన పచ్చయో – పురిమా పురిమా భావనాయ పహాతబ్బా ఖన్ధా పచ్ఛిమానం పచ్ఛిమానం భావనాయ పహాతబ్బానం ఖన్ధానం అనన్తరపచ్చయేన పచ్చయో. (౧)

భావనాయ పహాతబ్బో ధమ్మో నేవదస్సనేన నభావనాయ పహాతబ్బస్స ధమ్మస్స అనన్తరపచ్చయేన పచ్చయో – భావనాయ పహాతబ్బా ఖన్ధా వుట్ఠానస్స అనన్తరపచ్చయేన పచ్చయో. (౨)

నేవదస్సనేన నభావనాయ పహాతబ్బో ధమ్మో నేవదస్సనేన నభావనాయ పహాతబ్బస్స ధమ్మస్స అనన్తరపచ్చయేన పచ్చయో – పురిమా పురిమా నేవదస్సనేన నభావనాయ పహాతబ్బా ఖన్ధా పచ్ఛిమానం పచ్ఛిమానం నేవదస్సనేన నభావనాయ పహాతబ్బానం ఖన్ధానం అనన్తరపచ్చయేన పచ్చయో. అనులోమం గోత్రభుస్స… అనులోమం వోదానస్స… గోత్రభు మగ్గస్స… వోదానం మగ్గస్స… మగ్గో ఫలస్స… ఫలం ఫలస్స… అనులోమం ఫలసమాపత్తియా… నిరోధా వుట్ఠహన్తస్స నేవసఞ్ఞానాసఞ్ఞాయతనం ఫలసమాపత్తియా అనన్తరపచ్చయేన పచ్చయో. (౧)

నేవదస్సనేన నభావనాయ పహాతబ్బో ధమ్మో దస్సనేన పహాతబ్బస్స ధమ్మస్స…పే… ఆవజ్జనా దస్సనేన పహాతబ్బానం ఖన్ధానం అనన్తరపచ్చయేన పచ్చయో. (౨)

నేవదస్సనేన నభావనాయ పహాతబ్బో ధమ్మో భావనాయ పహాతబ్బస్స ధమ్మస్స అనన్తరపచ్చయేన పచ్చయో – ఆవజ్జనా భావనాయ పహాతబ్బానం ఖన్ధానం అనన్తరపచ్చయేన పచ్చయో. (౩)

సమనన్తరపచ్చయో

౭౮. దస్సనేన పహాతబ్బో ధమ్మో దస్సనేన పహాతబ్బస్స ధమ్మస్స సమనన్తరపచ్చయేన పచ్చయో (అనన్తరసదిసం).

సహజాతపచ్చయో

౭౯. దస్సనేన పహాతబ్బో ధమ్మో దస్సనేన పహాతబ్బస్స ధమ్మస్స సహజాతపచ్చయేన పచ్చయో… తీణి.

భావనాయ పహాతబ్బో ధమ్మో భావనాయ పహాతబ్బస్స ధమ్మస్స… తీణి.

నేవదస్సనేన నభావనాయ పహాతబ్బో ధమ్మో నేవదస్సనేన నభావనాయ పహాతబ్బస్స ధమ్మస్స సహజాతపచ్చయేన పచ్చయో – నేవదస్సనేన నభావనాయ పహాతబ్బో ఏకో ఖన్ధో తిణ్ణన్నం ఖన్ధానం చిత్తసముట్ఠానానఞ్చ రూపానం సహజాతపచ్చయేన పచ్చయో…పే… ద్వే ఖన్ధా…పే… పటిసన్ధిక్ఖణే…పే… ఖన్ధా వత్థుస్స సహజాతపచ్చయేన పచ్చయో. వత్థు ఖన్ధానం…పే… ఏకం మహాభూతం తిణ్ణన్నం మహాభూతానం…పే… మహాభూతా చిత్తసముట్ఠానానం రూపానం…పే… బాహిరం… ఆహారసముట్ఠానం… ఉతుసముట్ఠానం… అసఞ్ఞసత్తానం…పే…. (౧)

దస్సనేన పహాతబ్బో చ నేవదస్సనేన నభావనాయ పహాతబ్బో చ ధమ్మా నేవదస్సనేన నభావనాయ పహాతబ్బస్స ధమ్మస్స సహజాతపచ్చయేన పచ్చయో – దస్సనేన పహాతబ్బా ఖన్ధా చ మహాభూతా చ చిత్తసముట్ఠానానం రూపానం సహజాతపచ్చయేన పచ్చయో. (౧)

భావనాయ పహాతబ్బో చ నేవదస్సనేన నభావనాయ పహాతబ్బో చ ధమ్మా నేవదస్సనేన నభావనాయ పహాతబ్బస్స ధమ్మస్స సహజాతపచ్చయేన పచ్చయో – భావనాయ పహాతబ్బా ఖన్ధా చ మహాభూతా చ చిత్తసముట్ఠానానం రూపానం సహజాతపచ్చయేన పచ్చయో. (౧)

అఞ్ఞమఞ్ఞపచ్చయో

౮౦. దస్సనేన పహాతబ్బో ధమ్మో దస్సనేన పహాతబ్బస్స ధమ్మస్స అఞ్ఞమఞ్ఞపచ్చయేన పచ్చయో – దస్సనేన పహాతబ్బో ఏకో ఖన్ధో తిణ్ణన్నం ఖన్ధానం…పే…. (౧)

భావనాయ పహాతబ్బో ధమ్మో భావనాయ పహాతబ్బస్స ధమ్మస్స…పే… భావనాయ పహాతబ్బో ఏకో ఖన్ధో తిణ్ణన్నం ఖన్ధానం…పే…. (౧)

నేవదస్సనేన నభావనాయ పహాతబ్బో ధమ్మో నేవదస్సనేన నభావనాయ పహాతబ్బస్స ధమ్మస్స…పే… నేవదస్సనేన నభావనాయ పహాతబ్బో ఏకో ఖన్ధో తిణ్ణన్నం ఖన్ధానం అఞ్ఞమఞ్ఞపచ్చయేన పచ్చయో…పే… ద్వే ఖన్ధా…పే… పటిసన్ధిక్ఖణే నేవదస్సనేన నభావనాయ పహాతబ్బో ఏకో ఖన్ధో తిణ్ణన్నం ఖన్ధానం వత్థుస్స చ అఞ్ఞమఞ్ఞపచ్చయేన పచ్చయో…పే… ద్వే ఖన్ధా…పే… ఖన్ధా వత్థుస్స…పే… వత్థు ఖన్ధానం…పే… ఏకం మహాభూతం తిణ్ణన్నం మహాభూతానం అఞ్ఞమఞ్ఞపచ్చయేన పచ్చయో…పే… అసఞ్ఞసత్తానం…పే…. (౧)

నిస్సయపచ్చయో

౮౧. దస్సనేన పహాతబ్బో ధమ్మో దస్సనేన పహాతబ్బస్స ధమ్మస్స నిస్సయపచ్చయేన పచ్చయో… తీణి.

భావనాయ పహాతబ్బో ధమ్మో భావనాయ పహాతబ్బస్స ధమ్మస్స… తీణి.

నేవదస్సనేన నభావనాయ పహాతబ్బో ధమ్మో నేవదస్సనేన నభావనాయ పహాతబ్బస్స ధమ్మస్స నిస్సయపచ్చయేన పచ్చయో – నేవదస్సనేన నభావనాయ పహాతబ్బో ఏకో ఖన్ధో తిణ్ణన్నం ఖన్ధానం చిత్తసముట్ఠానానఞ్చ రూపానం…పే… ద్వే ఖన్ధా…పే… పటిసన్ధిక్ఖణే…పే… ఖన్ధా వత్థుస్స…పే… వత్థు ఖన్ధానం…పే… ఏకం మహాభూతం…పే… అసఞ్ఞసత్తానం…పే… చక్ఖాయతనం చక్ఖువిఞ్ఞాణస్స…పే… కాయాయతనం కాయవిఞ్ఞాణస్స…పే… వత్థు…పే…. (౧)

నేవదస్సనేన నభావనాయ పహాతబ్బో ధమ్మో దస్సనేన పహాతబ్బస్స ధమ్మస్స నిస్సయపచ్చయేన పచ్చయో – వత్థు దస్సనేన పహాతబ్బానం ఖన్ధానం నిస్సయపచ్చయేన పచ్చయో. (౨)

నేవదస్సనేన నభావనాయ పహాతబ్బో ధమ్మో భావనాయ పహాతబ్బస్స ధమ్మస్స నిస్సయపచ్చయేన పచ్చయో – వత్థు భావనాయ పహాతబ్బానం ఖన్ధానం నిస్సయపచ్చయేన పచ్చయో. (౩)

౮౨. దస్సనేన పహాతబ్బో చ నేవదస్సనేన నభావనాయ పహాతబ్బో చ ధమ్మా దస్సనేన పహాతబ్బస్స ధమ్మస్స నిస్సయపచ్చయేన పచ్చయో – దస్సనేన పహాతబ్బో ఏకో ఖన్ధో చ వత్థు చ తిణ్ణన్నం ఖన్ధానం నిస్సయపచ్చయేన పచ్చయో…పే… ద్వే ఖన్ధా…పే…. (౧)

దస్సనేన పహాతబ్బో చ నేవదస్సనేన నభావనాయ పహాతబ్బో చ ధమ్మా నేవదస్సనేన నభావనాయ పహాతబ్బస్స ధమ్మస్స నిస్సయపచ్చయేన పచ్చయో – దస్సనేన పహాతబ్బా ఖన్ధా చ మహాభూతా చ చిత్తసముట్ఠానానం రూపానం నిస్సయపచ్చయేన పచ్చయో. (౨)

భావనాయ పహాతబ్బో చ నేవదస్సనేన నభావనాయ పహాతబ్బో చ ధమ్మా భావనాయ పహాతబ్బస్స ధమ్మస్స నిస్సయపచ్చయేన పచ్చయో – భావనాయ పహాతబ్బో ఏకో ఖన్ధో చ వత్థు చ తిణ్ణన్నం ఖన్ధానం నిస్సయపచ్చయేన పచ్చయో…పే… ద్వే ఖన్ధా…పే…. (౧)

భావనాయ పహాతబ్బో చ నేవదస్సనేన నభావనాయ పహాతబ్బో చ ధమ్మా నేవదస్సనేన నభావనాయ పహాతబ్బస్స ధమ్మస్స నిస్సయపచ్చయేన పచ్చయో – భావనాయ పహాతబ్బా ఖన్ధా చ మహాభూతా చ చిత్తసముట్ఠానానం రూపానం నిస్సయపచ్చయేన పచ్చయో. (౨)

ఉపనిస్సయపచ్చయో

౮౩. దస్సనేన పహాతబ్బో ధమ్మో దస్సనేన పహాతబ్బస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – దస్సనేన పహాతబ్బం రాగం ఉపనిస్సాయ పాణం హనతి, అదిన్నం ఆదియతి…పే… సఙ్ఘం భిన్దతి. దస్సనేన పహాతబ్బం దోసం… మోహం… దిట్ఠిం… పత్థనం ఉపనిస్సాయ పాణం హనతి…పే… సఙ్ఘం భిన్దతి. దస్సనేన పహాతబ్బో రాగో… దోసో… మోహో… దిట్ఠి… పత్థనా దస్సనేన పహాతబ్బస్స రాగస్స.. దోసస్స… మోహస్స… దిట్ఠియా… పత్థనాయ ఉపనిస్సయపచ్చయేన పచ్చయో. (౧)

దస్సనేన పహాతబ్బో ధమ్మో నేవదస్సనేన నభావనాయ పహాతబ్బస్స ధమ్మస్స ఉపనిస్సయపచ్చయేన పచ్చయో – అనన్తరూపనిస్సయో, పకతూపనిస్సయో…పే…. పకతూపనిస్సయో – దస్సనేన పహాతబ్బం రాగం ఉపనిస్సాయ దానం దేతి, సీలం సమాదియతి, ఉపోసథకమ్మం కరోతి…పే… సమాపత్తిం ఉప్పాదేతి. దస్సనేన పహాతబ్బం దోసం…పే… పత్థనం ఉపనిస్సాయ దానం దేతి…పే… సమాపత్తిం ఉప్పాదేతి. దస్సనేన పహాతబ్బో రాగో… దోసో… మోహో… దిట్ఠి… పత్థనా సద్ధాయ…పే… పఞ్ఞాయ కాయికస్స సుఖస్స, కాయికస్స దుక్ఖస్స ఫలసమాపత్తియా ఉపనిస్సయపచ్చయేన పచ్చయో. (౨)

౮౪. భావనాయ పహాతబ్బో ధమ్మో భావనాయ పహాతబ్బస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – భావనాయ పహాతబ్బో రాగో… దోసో… మోహో… మానో… పత్థనా భావనాయ పహాతబ్బస్స రాగస్స… దోసస్స… మోహస్స… మానస్స… పత్థనాయ ఉపనిస్సయపచ్చయేన పచ్చయో. (౧)

భావనాయ పహాతబ్బో ధమ్మో దస్సనేన పహాతబ్బస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, పకతూపనిస్సయో…పే…. పకతూపనిస్సయో – భావనాయ పహాతబ్బం రాగం ఉపనిస్సాయ పాణం హనతి…పే… సఙ్ఘం భిన్దతి. భావనాయ పహాతబ్బం దోసం… మోహం… మానం… పత్థనం ఉపనిస్సాయ పాణం హనతి…పే… సఙ్ఘం భిన్దతి. భావనాయ పహాతబ్బో రాగో… దోసో… మోహో… మానో… పత్థనా దస్సనేన పహాతబ్బస్స రాగస్స… దోసస్స… మోహస్స… దిట్ఠియా… పత్థనాయ ఉపనిస్సయపచ్చయేన పచ్చయో. సకభణ్డే ఛన్దరాగో పరభణ్డే ఛన్దరాగస్స ఉపనిస్సయపచ్చయేన పచ్చయో. సకపరిగ్గహే ఛన్దరాగో పరపరిగ్గహే ఛన్దరాగస్స ఉపనిస్సయపచ్చయేన పచ్చయో. (౨)

భావనాయ పహాతబ్బో ధమ్మో నేవదస్సనేన నభావనాయ పహాతబ్బస్స ధమ్మస్స ఉపనిస్సయపచ్చయేన పచ్చయో – అనన్తరూపనిస్సయో, పకతూపనిస్సయో…పే…. పకతూపనిస్సయో – భావనాయ పహాతబ్బం రాగం ఉపనిస్సాయ దానం దేతి…పే… సమాపత్తిం ఉప్పాదేతి. భావనాయ పహాతబ్బం దోసం… మోహం… మానం… పత్థనం ఉపనిస్సాయ దానం దేతి…పే… సమాపత్తిం ఉప్పాదేతి. భావనాయ పహాతబ్బో రాగో… దోసో… మోహో… మానో… పత్థనా సద్ధాయ…పే… ఫలసమాపత్తియా ఉపనిస్సయపచ్చయేన పచ్చయో. (౩)

౮౫. నేవదస్సనేన నభావనాయ పహాతబ్బో ధమ్మో నేవదస్సనేన నభావనాయ పహాతబ్బస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – సద్ధం ఉపనిస్సాయ దానం దేతి…పే… సమాపత్తిం ఉప్పాదేతి. సీలం… సుతం… చాగం… పఞ్ఞం… కాయికం… సుఖం… కాయికం దుక్ఖం… ఉతుం… భోజనం… సేనాసనం… ఉపనిస్సాయ దానం దేతి…పే… సమాపత్తిం ఉప్పాదేతి. సద్ధా… సీలం… సుతం… చాగో … పఞ్ఞా… కాయికం సుఖం… కాయికం దుక్ఖం… ఉతు… భోజనం… సేనాసనం… సద్ధాయ…పే… పఞ్ఞాయ కాయికస్స సుఖస్స, కాయికస్స దుక్ఖస్స ఫలసమాపత్తియా ఉపనిస్సయపచ్చయేన పచ్చయో. (౧)

నేవదస్సనేన నభావనాయ పహాతబ్బో ధమ్మో దస్సనేన పహాతబ్బస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – సద్ధం ఉపనిస్సాయ దిట్ఠిం గణ్హాతి. సీలం…పే… సేనాసనం ఉపనిస్సాయ పాణం హనతి…పే… సఙ్ఘం భిన్దతి. సద్ధా…పే… సేనాసనం దస్సనేన పహాతబ్బస్స రాగస్స… దోసస్స… మోహస్స… దిట్ఠియా… పత్థనాయ ఉపనిస్సయపచ్చయేన పచ్చయో. (౨)

నేవదస్సనేన నభావనాయ పహాతబ్బో ధమ్మో భావనాయ పహాతబ్బస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – సద్ధం ఉపనిస్సాయ మానం జప్పేతి. సీలం…పే… పఞ్ఞం… కాయికం సుఖం… కాయికం దుక్ఖం… ఉతుం… భోజనం… సేనాసనం… ఉపనిస్సాయ మానం జప్పేతి. సద్ధా…పే… పఞ్ఞా… కాయికం సుఖం… కాయికం దుక్ఖం… ఉతు… భోజనం… సేనాసనం భావనాయ పహాతబ్బస్స రాగస్స… దోసస్స… మోహస్స… మానస్స… పత్థనాయ ఉపనిస్సయపచ్చయేన పచ్చయో. (౩)

పురేజాతపచ్చయో

౮౬. నేవదస్సనేన నభావనాయ పహాతబ్బో ధమ్మో నేవదస్సనేన నభావనాయ పహాతబ్బస్స ధమ్మస్స పురేజాతపచ్చయేన పచ్చయో – ఆరమ్మణపురేజాతం, వత్థుపురేజాతం. ఆరమ్మణపురేజాతం – చక్ఖుం అనిచ్చతో దుక్ఖతో అనత్తతో విపస్సతి, సోతం… ఘానం… జివ్హం… కాయం… రూపే… సద్దే… గన్ధే… రసే… ఫోట్ఠబ్బే… వత్థుం…పే… దిబ్బేన చక్ఖునా రూపం పస్సతి, దిబ్బాయ సోతధాతుయా సద్దం సుణాతి. రూపాయతనం చక్ఖువిఞ్ఞాణస్స…పే… ఫోట్ఠబ్బాయతనం కాయవిఞ్ఞాణస్స పురేజాతపచ్చయేన పచ్చయో. వత్థుపురేజాతం – చక్ఖాయతనం చక్ఖువిఞ్ఞాణస్స…పే… కాయాయతనం కాయవిఞ్ఞాణస్స…పే… వత్థు నేవదస్సనేన నభావనాయ పహాతబ్బానం ఖన్ధానం పురేజాతపచ్చయేన పచ్చయో. (౧)

నేవదస్సనేన నభావనాయ పహాతబ్బో ధమ్మో దస్సనేన పహాతబ్బస్స ధమ్మస్స పురేజాతపచ్చయేన పచ్చయో – ఆరమ్మణపురేజాతం, వత్థుపురేజాతం. ఆరమ్మణపురేజాతం – చక్ఖుం అస్సాదేతి అభినన్దతి; తం ఆరబ్భ దస్సనేన పహాతబ్బో రాగో ఉప్పజ్జతి, దిట్ఠి ఉప్పజ్జతి, విచికిచ్ఛా ఉప్పజ్జతి, దస్సనేన పహాతబ్బం దోమనస్సం ఉప్పజ్జతి…పే… వత్థుం అస్సాదేతి అభినన్దతి; తం ఆరబ్భ దస్సనేన పహాతబ్బో రాగో ఉప్పజ్జతి, దిట్ఠి ఉప్పజ్జతి, విచికిచ్ఛా ఉప్పజ్జతి, దస్సనేన పహాతబ్బం దోమనస్సం ఉప్పజ్జతి. వత్థుపురేజాతం – వత్థు దస్సనేన పహాతబ్బానం ఖన్ధానం పురేజాతపచ్చయేన పచ్చయో. (౨)

నేవదస్సనేన నభావనాయ పహాతబ్బో ధమ్మో భావనాయ పహాతబ్బస్స ధమ్మస్స పురేజాతపచ్చయేన పచ్చయో – ఆరమ్మణపురేజాతం, వత్థుపురేజాతం. ఆరమ్మణపురేజాతం – చక్ఖుం అస్సాదేతి అభినన్దతి; తం ఆరబ్భ భావనాయ పహాతబ్బో రాగో ఉప్పజ్జతి… ఉద్ధచ్చం ఉప్పజ్జతి… భావనాయ పహాతబ్బం దోమనస్సం ఉప్పజ్జతి, సోతం…పే… కాయం… రూపే…పే… ఫోట్ఠబ్బే… వత్థుం అస్సాదేతి అభినన్దతి; తం ఆరబ్భ భావనాయ పహాతబ్బో రాగో ఉప్పజ్జతి, ఉద్ధచ్చం ఉప్పజ్జతి, భావనాయ పహాతబ్బం దోమనస్సం ఉప్పజ్జతి. వత్థుపురేజాతం – వత్థు భావనాయ పహాతబ్బానం ఖన్ధానం పురేజాతపచ్చయేన పచ్చయో. (౩)

పచ్ఛాజాతపచ్చయో

౮౭. దస్సనేన పహాతబ్బో ధమ్మో నేవదస్సనేన నభావనాయ పహాతబ్బస్స ధమ్మస్స పచ్ఛాజాతపచ్చయేన పచ్చయో – పచ్ఛాజాతా దస్సనేన పహాతబ్బా ఖన్ధా పురేజాతస్స ఇమస్స కాయస్స పచ్ఛాజాతపచ్చయేన పచ్చయో. (౧)

భావనాయ పహాతబ్బో ధమ్మో నేవదస్సనేన నభావనాయ పహాతబ్బస్స ధమ్మస్స పచ్ఛాజాతపచ్చయేన పచ్చయో – పచ్ఛాజాతా భావనాయ పహాతబ్బా ఖన్ధా పురేజాతస్స ఇమస్స కాయస్స పచ్ఛాజాతపచ్చయేన పచ్చయో. (౧)

నేవదస్సనేన నభావనాయ పహాతబ్బో ధమ్మో నేవదస్సనేన నభావనాయ పహాతబ్బస్స ధమ్మస్స పచ్ఛాజాతపచ్చయేన పచ్చయో – పచ్ఛాజాతా నేవదస్సనేన నభావనాయ పహాతబ్బా ఖన్ధా పురేజాతస్స ఇమస్స కాయస్స పచ్ఛాజాతపచ్చయేన పచ్చయో. (౧)

ఆసేవనపచ్చయో

౮౮. దస్సనేన పహాతబ్బో ధమ్మో దస్సనేన పహాతబ్బస్స ధమ్మస్స ఆసేవనపచ్చయేన పచ్చయో – పురిమా పురిమా దస్సనేన పహాతబ్బా ఖన్ధా పచ్ఛిమానం పచ్ఛిమానం…పే… ఆసేవనపచ్చయేన పచ్చయో. (౧)

భావనాయ పహాతబ్బో ధమ్మో భావనాయ పహాతబ్బస్స ధమ్మస్స ఆసేవనపచ్చయేన పచ్చయో – పురిమా పురిమా భావనాయ పహాతబ్బా ఖన్ధా పచ్ఛిమానం పచ్ఛిమానం…పే… ఆసేవనపచ్చయేన పచ్చయో. (౧)

నేవదస్సనేన నభావనాయ పహాతబ్బో ధమ్మో నేవదస్సనేన నభావనాయ పహాతబ్బస్స ధమ్మస్స ఆసేవనపచ్చయేన పచ్చయో – పురిమా పురిమా నేవదస్సనేన నభావనాయ పహాతబ్బా ఖన్ధా పచ్ఛిమానం పచ్ఛిమానం…పే… ఆసేవనపచ్చయేన పచ్చయో. అనులోమం గోత్రభుస్స… అనులోమం వోదానస్స… గోత్రభు మగ్గస్స… వోదానం మగ్గస్స ఆసేవనపచ్చయేన పచ్చయో. (౧)

కమ్మపచ్చయో

౮౯. దస్సనేన పహాతబ్బో ధమ్మో దస్సనేన పహాతబ్బస్స ధమ్మస్స కమ్మపచ్చయేన పచ్చయో – దస్సనేన పహాతబ్బా చేతనా సమ్పయుత్తకానం ఖన్ధానం కమ్మపచ్చయేన పచ్చయో. (౧)

దస్సనేన పహాతబ్బో ధమ్మో నేవదస్సనేన నభావనాయ పహాతబ్బస్స ధమ్మస్స కమ్మపచ్చయేన పచ్చయో – సహజాతా, నానాక్ఖణికా. సహజాతా – దస్సనేన పహాతబ్బా చేతనా చిత్తసముట్ఠానానం రూపానం కమ్మపచ్చయేన పచ్చయో. నానాక్ఖణికా – దస్సనేన పహాతబ్బా చేతనా విపాకానం ఖన్ధానం కటత్తా చ రూపానం కమ్మపచ్చయేన పచ్చయో. (౨)

దస్సనేన పహాతబ్బో ధమ్మో దస్సనేన పహాతబ్బస్స చ నేవదస్సనేన నభావనాయ పహాతబ్బస్స చ ధమ్మస్స కమ్మపచ్చయేన పచ్చయో – దస్సనేన పహాతబ్బా చేతనా సమ్పయుత్తకానం ఖన్ధానం చిత్తసముట్ఠానానఞ్చ రూపానం కమ్మపచ్చయేన పచ్చయో. (౩)

భావనాయ పహాతబ్బో ధమ్మో భావనాయ పహాతబ్బస్స ధమ్మస్స కమ్మపచ్చయేన పచ్చయో – భావనాయ పహాతబ్బా చేతనా సమ్పయుత్తకానం ఖన్ధానం కమ్మపచ్చయేన పచ్చయో. (౧)

భావనాయ పహాతబ్బో ధమ్మో నేవదస్సనేన నభావనాయ పహాతబ్బస్స ధమ్మస్స కమ్మపచ్చయేన పచ్చయో – భావనాయ పహాతబ్బా చేతనా చిత్తసముట్ఠానానం రూపానం కమ్మపచ్చయేన పచ్చయో. (౨)

భావనాయ పహాతబ్బో ధమ్మో భావనాయ పహాతబ్బస్స చ నేవదస్సనేన నభావనాయ పహాతబ్బస్స చ ధమ్మస్స కమ్మపచ్చయేన పచ్చయో – భావనాయ పహాతబ్బా చేతనా సమ్పయుత్తకానం ఖన్ధానం చిత్తసముట్ఠానానఞ్చ రూపానం కమ్మపచ్చయేన పచ్చయో. (౩)

నేవదస్సనేన నభావనాయ పహాతబ్బో ధమ్మో నేవదస్సనేన నభావనాయ పహాతబ్బస్స ధమ్మస్స కమ్మపచ్చయేన పచ్చయో – సహజాతా, నానాక్ఖణికా. సహజాతా – నేవదస్సనేన నభావనాయ పహాతబ్బా చేతనా సమ్పయుత్తకానం ఖన్ధానం చిత్తసముట్ఠానానఞ్చ రూపానం కమ్మపచ్చయేన పచ్చయో. పటిసన్ధిక్ఖణే నేవదస్సనేన నభావనాయ పహాతబ్బా చేతనా సమ్పయుత్తకానం ఖన్ధానం కటత్తా చ రూపానం…పే…. నానాక్ఖణికా – నేవదస్సనేన నభావనాయ పహాతబ్బా చేతనా విపాకానం ఖన్ధానం కటత్తా చ రూపానం కమ్మపచ్చయేన పచ్చయో. (౧)

విపాకపచ్చయో

౯౦. నేవదస్సనేన నభావనాయ పహాతబ్బో ధమ్మో నేవదస్సనేన నభావనాయ పహాతబ్బస్స ధమ్మస్స విపాకపచ్చయేన పచ్చయో – విపాకో నేవదస్సనేన నభావనాయ పహాతబ్బో ఏకో ఖన్ధో తిణ్ణన్నం ఖన్ధానం చిత్తసముట్ఠానానఞ్చ రూపానం విపాకపచ్చయేన పచ్చయో…పే… పటిసన్ధిక్ఖణే…పే… ఖన్ధా వత్థుస్స విపాకపచ్చయేన పచ్చయో.

ఆహారపచ్చయాది

౯౧. దస్సనేన పహాతబ్బో ధమ్మో దస్సనేన పహాతబ్బస్స ధమ్మస్స ఆహారపచ్చయేన పచ్చయో (సంఖిత్తం) కబళీకారో… సత్త పఞ్హా… ఇన్ద్రియపచ్చయేన పచ్చయో… చక్ఖున్ద్రియఞ్చ…పే… రూపజీవితిన్ద్రియఞ్చ …పే… సత్త పఞ్హా ఝానపచ్చయేన పచ్చయో… మగ్గపచ్చయేన పచ్చయో… సమ్పయుత్తపచ్చయేన పచ్చయో.

విప్పయుత్తపచ్చయో

౯౨. దస్సనేన పహాతబ్బో ధమ్మో దస్సనేన పహాతబ్బస్స ధమ్మస్స విప్పయుత్తపచ్చయేన పచ్చయో – సహజాతం, పచ్ఛాజాతం. సహజాతా – దస్సనేన పహాతబ్బా ఖన్ధా చిత్తసముట్ఠానానం రూపానం విప్పయుత్తపచ్చయేన పచ్చయో. పచ్ఛాజాతా – దస్సనేన పహాతబ్బా ఖన్ధా పురేజాతస్స ఇమస్స కాయస్స విప్పయుత్తపచ్చయేన పచ్చయో. (౧)

భావనాయ పహాతబ్బో ధమ్మో నేవదస్సనేన నభావనాయ పహాతబ్బస్స ధమ్మస్స విప్పయుత్తపచ్చయేన పచ్చయో – సహజాతం, పచ్ఛాజాతం (ఇదమ్పి దస్సనేన సదిసం).

నేవదస్సనేన నభావనాయ పహాతబ్బో ధమ్మో నేవదస్సనేన నభావనాయ పహాతబ్బస్స ధమ్మస్స విప్పయుత్తపచ్చయేన పచ్చయో – సహజాతం, పురేజాతం, పచ్ఛాజాతం. సహజాతా – నేవదస్సనేన నభావనాయ పహాతబ్బా ఖన్ధా చిత్తసముట్ఠానానం రూపానం విప్పయుత్తపచ్చయేన పచ్చయో. పటిసన్ధిక్ఖణే నేవదస్సనేన నభావనాయ పహాతబ్బా ఖన్ధా కటత్తారూపానం విప్పయుత్తపచ్చయేన పచ్చయో, ఖన్ధా వత్థుస్స విప్పయుత్తపచ్చయేన పచ్చయో, వత్థు ఖన్ధానం విప్పయుత్తపచ్చయేన పచ్చయో. పురేజాతం – చక్ఖాయతనం చక్ఖువిఞ్ఞాణస్స…పే… కాయాయతనం కాయవిఞ్ఞాణస్స…పే… వత్థు నేవదస్సనేన నభావనాయ పహాతబ్బానం ఖన్ధానం విప్పయుత్తపచ్చయేన పచ్చయో. పచ్ఛాజాతా – నేవదస్సనేన నభావనాయ పహాతబ్బా ఖన్ధా పురేజాతస్స ఇమస్స కాయస్స విప్పయుత్తపచ్చయేన పచ్చయో. (౧)

నేవదస్సనేన నభావనాయ పహాతబ్బో ధమ్మో దస్సనేన పహాతబ్బస్స ధమ్మస్స విప్పయుత్తపచ్చయేన పచ్చయో – పురేజాతం వత్థు దస్సనేన పహాతబ్బానం ఖన్ధానం విప్పయుత్తపచ్చయేన పచ్చయో. (౨)

నేవదస్సనేన నభావనాయ పహాతబ్బో ధమ్మో భావనాయ పహాతబ్బస్స ధమ్మస్స విప్పయుత్తపచ్చయేన పచ్చయో – పురేజాతం వత్థు భావనాయ పహాతబ్బానం ఖన్ధానం విప్పయుత్తపచ్చయేన పచ్చయో. (౩)

అత్థిపచ్చయో

౯౩. దస్సనేన పహాతబ్బో ధమ్మో దస్సనేన పహాతబ్బస్స ధమ్మస్స అత్థిపచ్చయేన పచ్చయో – దస్సనేన పహాతబ్బో ఏకో ఖన్ధో తిణ్ణన్నం ఖన్ధానం అత్థిపచ్చయేన పచ్చయో…పే… ద్వే ఖన్ధా…పే…. (౧)

దస్సనేన పహాతబ్బో ధమ్మో నేవదస్సనేన నభావనాయ పహాతబ్బస్స ధమ్మస్స అత్థిపచ్చయేన పచ్చయో – సహజాతం, పచ్ఛాజాతం. సహజాతా – దస్సనేన పహాతబ్బా ఖన్ధా చిత్తసముట్ఠానానం రూపానం అత్థిపచ్చయేన పచ్చయో. పచ్ఛాజాతా – దస్సనేన పహాతబ్బా ఖన్ధా పురేజాతస్స ఇమస్స కాయస్స అత్థిపచ్చయేన పచ్చయో. (౨)

దస్సనేన పహాతబ్బో ధమ్మో దస్సనేన పహాతబ్బస్స చ నేవదస్సనేన నభావనాయ పహాతబ్బస్స చ ధమ్మస్స అత్థిపచ్చయేన పచ్చయో – దస్సనేన పహాతబ్బో ఏకో ఖన్ధో తిణ్ణన్నం ఖన్ధానం చిత్తసముట్ఠానానఞ్చ రూపానం…పే… ద్వే ఖన్ధా…పే…. (౩)

భావనాయ పహాతబ్బో ధమ్మో భావనాయ పహాతబ్బస్స… తీణి (దస్సనేన సదిసం కాతబ్బం).

౯౪. నేవదస్సనేన నభావనాయ పహాతబ్బో ధమ్మో నేవదస్సనేన నభావనాయ పహాతబ్బస్స ధమ్మస్స అత్థిపచ్చయేన పచ్చయో – సహజాతం, పురేజాతం, పచ్ఛాజాతం, ఆహారం, ఇన్ద్రియం. సహజాతో – నేవదస్సనేన నభావనాయ పహాతబ్బో ఏకో ఖన్ధో తిణ్ణన్నం ఖన్ధానం చిత్తసముట్ఠానానఞ్చ రూపానం అత్థిపచ్చయేన పచ్చయో…పే… పటిసన్ధిక్ఖణే…పే… ఖన్ధా వత్థుస్స…పే… వత్థు ఖన్ధానం అత్థిపచ్చయేన పచ్చయో; ఏకం మహాభూతం…పే… అసఞ్ఞసత్తానం ఏకం మహాభూతం…పే…. పురేజాతం – చక్ఖుం అనిచ్చతో దుక్ఖతో అనత్తతో విపస్సతి, సోతం…పే… కాయం… రూపే…పే… ఫోట్ఠబ్బే… వత్థుం అనిచ్చతో దుక్ఖతో అనత్తతో విపస్సతి; దిబ్బేన చక్ఖునా రూపం పస్సతి, దిబ్బాయ సోతధాతుయా సద్దం సుణాతి, రూపాయతనం చక్ఖువిఞ్ఞాణస్స…పే… ఫోట్ఠబ్బాయతనం కాయవిఞ్ఞాణస్స…పే… చక్ఖాయతనం చక్ఖువిఞ్ఞాణస్స…పే… కాయాయతనం కాయవిఞ్ఞాణస్స…పే… వత్థు నేవదస్సనేన నభావనాయ పహాతబ్బానం ఖన్ధానం అత్థిపచ్చయేన పచ్చయో. పచ్ఛాజాతా – నేవదస్సనేన నభావనాయ పహాతబ్బా ఖన్ధా పురేజాతస్స ఇమస్స కాయస్స అత్థిపచ్చయేన పచ్చయో. కబళీకారో ఆహారో ఇమస్స కాయస్స…పే… రూపజీవితిన్ద్రియం కటత్తారూపానం అత్థిపచ్చయేన పచ్చయో. (౧)

నేవదస్సనేన నభావనాయ పహాతబ్బో ధమ్మో దస్సనేన పహాతబ్బస్స ధమ్మస్స అత్థిపచ్చయేన పచ్చయో – పురేజాతం చక్ఖుం అస్సాదేతి అభినన్దతి; తం ఆరబ్భ దస్సనేన పహాతబ్బో రాగో ఉప్పజ్జతి, దిట్ఠి ఉప్పజ్జతి, విచికిచ్ఛా ఉప్పజ్జతి, దస్సనేన పహాతబ్బం దోమనస్సం ఉప్పజ్జతి, సోతం…పే… వత్థుం అస్సాదేతి…పే… వత్థు దస్సనేన పహాతబ్బానం ఖన్ధానం అత్థిపచ్చయేన పచ్చయో. (౨)

నేవదస్సనేన నభావనాయ పహాతబ్బో ధమ్మో భావనాయ పహాతబ్బస్స ధమ్మస్స అత్థిపచ్చయేన పచ్చయో – పురేజాతం చక్ఖుం అస్సాదేతి అభినన్దతి; తం ఆరబ్భ భావనాయ పహాతబ్బో రాగో ఉప్పజ్జతి, ఉద్ధచ్చం ఉప్పజ్జతి, భావనాయ పహాతబ్బం దోమనస్సం ఉప్పజ్జతి, సోతం…పే… వత్థుం అస్సాదేతి అభినన్దతి…పే… వత్థు భావనాయ పహాతబ్బానం ఖన్ధానం అత్థిపచ్చయేన పచ్చయో. (౩)

౯౫. దస్సనేన పహాతబ్బో చ నేవదస్సనేన నభావనాయ పహాతబ్బో చ ధమ్మా దస్సనేన పహాతబ్బస్స ధమ్మస్స అత్థిపచ్చయేన పచ్చయో – సహజాతం, పురేజాతం. సహజాతో – దస్సనేన పహాతబ్బో ఏకో ఖన్ధో చ వత్థు చ తిణ్ణన్నం ఖన్ధానం అత్థిపచ్చయేన పచ్చయో…పే… ద్వే ఖన్ధా చ వత్థు చ…పే…. (౧)

దస్సనేన పహాతబ్బో చ నేవదస్సనేన నభావనాయ పహాతబ్బో చ ధమ్మా నేవదస్సనేన నభావనాయ పహాతబ్బస్స ధమ్మస్స అత్థిపచ్చయేన పచ్చయో – సహజాతం, పచ్ఛాజాతం, ఆహారం, ఇన్ద్రియం. సహజాతా – దస్సనేన పహాతబ్బా ఖన్ధా చ మహాభూతా చ చిత్తసముట్ఠానానం రూపానం అత్థిపచ్చయేన పచ్చయో. పచ్ఛాజాతా – దస్సనేన పహాతబ్బా ఖన్ధా చ కబళీకారో ఆహారో చ ఇమస్స కాయస్స అత్థిపచ్చయేన పచ్చయో. పచ్ఛాజాతా – దస్సనేన పహాతబ్బా ఖన్ధా చ రూపజీవితిన్ద్రియఞ్చ కటత్తారూపానం అత్థిపచ్చయేన పచ్చయో. (౨)

భావనాయ పహాతబ్బో చ నేవదస్సనేన నభావనాయ పహాతబ్బో చ ధమ్మా భావనాయ పహాతబ్బస్స…పే… (ద్వే పఞ్హా కాతబ్బా).

నత్థివిగతావిగతపచ్చయా

౯౬. దస్సనేన పహాతబ్బో ధమ్మో దస్సనేన పహాతబ్బస్స ధమ్మస్స నత్థిపచ్చయేన పచ్చయో… విగతపచ్చయేన పచ్చయో… అవిగతపచ్చయేన పచ్చయో.