౧. విభఙ్గవారో
హేతుపచ్చయో
౨౭. మగ్గారమ్మణో ధమ్మో మగ్గారమ్మణస్స ధమ్మస్స హేతుపచ్చయేన పచ్చయో – మగ్గారమ్మణా హేతూ సమ్పయుత్తకానం ఖన్ధానం హేతుపచ్చయేన పచ్చయో. (౧)
మగ్గారమ్మణో ధమ్మో మగ్గాధిపతిస్స ధమ్మస్స హేతుపచ్చయేన పచ్చయో – మగ్గారమ్మణా హేతూ సమ్పయుత్తకానం మగ్గాధిపతీనం ఖన్ధానం హేతుపచ్చయేన పచ్చయో. (౨)
మగ్గారమ్మణో ధమ్మో మగ్గారమ్మణస్స చ మగ్గాధిపతిస్స చ ధమ్మస్స హేతుపచ్చయేన పచ్చయో (ఇమినా కారణేన సత్తరస పఞ్హా కాతబ్బా).
ఆరమ్మణపచ్చయో
౨౮. మగ్గహేతుకో ధమ్మో మగ్గారమ్మణస్స ధమ్మస్స ఆరమ్మణపచ్చయేన పచ్చయో – అరియా మగ్గా వుట్ఠహిత్వా మగ్గం పచ్చవేక్ఖన్తి, చేతోపరియఞాణేన మగ్గహేతుకచిత్తసమఙ్గిస్స చిత్తం జానన్తి, మగ్గహేతుకా ఖన్ధా చేతోపరియఞాణస్స, పుబ్బేనివాసానుస్సతిఞాణస్స, అనాగతంసఞాణస్స, ఆవజ్జనాయ ఆరమ్మణపచ్చయేన పచ్చయో. (౧)
మగ్గహేతుకో ధమ్మో మగ్గాధిపతిస్స ధమ్మస్స ఆరమ్మణపచ్చయేన పచ్చయో – అరియా మగ్గా వుట్ఠహిత్వా మగ్గం గరుం కత్వా పచ్చవేక్ఖన్తి. (౨)
మగ్గహేతుకో ధమ్మో మగ్గారమ్మణస్స చ మగ్గాధిపతిస్స చ ధమ్మస్స ఆరమ్మణపచ్చయేన పచ్చయో – అరియా మగ్గా వుట్ఠహిత్వా మగ్గం గరుం కత్వా పచ్చవేక్ఖన్తి. (౩)
౨౯. మగ్గాధిపతి ధమ్మో మగ్గాధిపతిస్స ధమ్మస్స ఆరమ్మణపచ్చయేన పచ్చయో – అరియా మగ్గా వుట్ఠహిత్వా మగ్గం గరుం కత్వా పచ్చవేక్ఖన్తి. (౧)
మగ్గాధిపతి ధమ్మో మగ్గారమ్మణస్స ధమ్మస్స ఆరమ్మణపచ్చయేన పచ్చయో – అరియా మగ్గా వుట్ఠహిత్వా మగ్గం పచ్చవేక్ఖన్తి, చేతోపరియఞాణేన మగ్గాధిపతిచిత్తసమఙ్గిస్స చిత్తం జానన్తి, మగ్గాధిపతీ ఖన్ధా చేతోపరియఞాణస్స, పుబ్బేనివాసానుస్సతిఞాణస్స, అనాగతంసఞాణస్స, ఆవజ్జనాయ ఆరమ్మణపచ్చయేన పచ్చయో. (౨)
మగ్గాధిపతి ధమ్మో మగ్గారమ్మణస్స చ మగ్గాధిపతిస్స చ ధమ్మస్స ఆరమ్మణపచ్చయేన పచ్చయో – అరియా మగ్గా వుట్ఠహిత్వా మగ్గం గరుం కత్వా పచ్చవేక్ఖన్తి. (౩)
౩౦. మగ్గహేతుకో చ మగ్గాధిపతి చ ధమ్మా మగ్గారమ్మణస్స ధమ్మస్స ఆరమ్మణపచ్చయేన పచ్చయో – అరియా మగ్గా వుట్ఠహిత్వా మగ్గం పచ్చవేక్ఖన్తి, చేతోపరియఞాణేన మగ్గహేతుకమగ్గాధిపతిచిత్తసమఙ్గిస్స చిత్తం జానన్తి, మగ్గహేతుకా చ మగ్గాధిపతీ చ ఖన్ధా చేతోపరియఞాణస్స, పుబ్బేనివాసానుస్సతిఞాణస్స, అనాగతంసఞాణస్స, ఆవజ్జనాయ ఆరమ్మణపచ్చయేన పచ్చయో. (౧)
మగ్గహేతుకో చ మగ్గాధిపతి చ ధమ్మా మగ్గాధిపతిస్స ధమ్మస్స ఆరమ్మణపచ్చయేన పచ్చయో – అరియా మగ్గా వుట్ఠహిత్వా మగ్గం గరుం కత్వా పచ్చవేక్ఖన్తి. (౨)
మగ్గహేతుకో చ మగ్గాధిపతి చ ధమ్మా మగ్గారమ్మణస్స చ మగ్గాధిపతిస్స చ ధమ్మస్స ఆరమ్మణపచ్చయేన పచ్చయో – అరియా మగ్గా వుట్ఠహిత్వా మగ్గం గరుం కత్వా పచ్చవేక్ఖన్తి. (౩)
అధిపతిపచ్చయో
౩౧. మగ్గారమ్మణో ధమ్మో మగ్గారమ్మణస్స ధమ్మస్స అధిపతిపచ్చయేన పచ్చయో. సహజాతాధిపతి – మగ్గారమ్మణాధిపతి సమ్పయుత్తకానం ఖన్ధానం అధిపతిపచ్చయేన పచ్చయో. (౧)
మగ్గారమ్మణో ధమ్మో మగ్గాధిపతిస్స ధమ్మస్స అధిపతిపచ్చయేన పచ్చయో. సహజాతాధిపతి – మగ్గారమ్మణాధిపతి సమ్పయుత్తకానం మగ్గాధిపతీనం ఖన్ధానం అధిపతిపచ్చయేన పచ్చయో. (౨)
మగ్గారమ్మణో ధమ్మో మగ్గారమ్మణస్స చ మగ్గాధిపతిస్స చ ధమ్మస్స అధిపతిపచ్చయేన పచ్చయో. సహజాతాధిపతి – మగ్గారమ్మణాధిపతి సమ్పయుత్తకానం మగ్గారమ్మణానఞ్చ మగ్గాధిపతీనఞ్చ ఖన్ధానం అధిపతిపచ్చయేన పచ్చయో. (౩)
౩౨. మగ్గహేతుకో ధమ్మో మగ్గహేతుకస్స ధమ్మస్స అధిపతిపచ్చయేన పచ్చయో. సహజాతాధిపతి – మగ్గహేతుకాధిపతి సమ్పయుత్తకానం ఖన్ధానం అధిపతిపచ్చయేన పచ్చయో. (౧)
మగ్గహేతుకో ధమ్మో మగ్గారమ్మణస్స ధమ్మస్స అధిపతిపచ్చయేన పచ్చయో. ఆరమ్మణాధిపతి – అరియా మగ్గా వుట్ఠహిత్వా మగ్గం గరుం కత్వా పచ్చవేక్ఖన్తి. (౨)
మగ్గహేతుకో ధమ్మో మగ్గాధిపతిస్స ధమ్మస్స అధిపతిపచ్చయేన పచ్చయో – ఆరమ్మణాధిపతి, సహజాతాధిపతి. ఆరమ్మణాధిపతి – అరియా మగ్గా వుట్ఠహిత్వా మగ్గం గరుం కత్వా పచ్చవేక్ఖన్తి. సహజాతాధిపతి – మగ్గహేతుకాధిపతి సమ్పయుత్తకానం మగ్గాధిపతీనం ఖన్ధానం అధిపతిపచ్చయేన పచ్చయో. (౩)
మగ్గహేతుకో ధమ్మో మగ్గారమ్మణస్స చ మగ్గాధిపతిస్స చ ధమ్మస్స అధిపతిపచ్చయేన పచ్చయో. ఆరమ్మణాధిపతి – అరియా మగ్గా వుట్ఠహిత్వా మగ్గం గరుం కత్వా పచ్చవేక్ఖన్తి. (౪)
మగ్గహేతుకో ధమ్మో మగ్గహేతుకస్స చ మగ్గాధిపతిస్స చ ధమ్మస్స అధిపతిపచ్చయేన పచ్చయో. సహజాతాధిపతి – మగ్గహేతుకాధిపతి సమ్పయుత్తకానం మగ్గహేతుకానఞ్చ మగ్గాధిపతీనఞ్చ ఖన్ధానం అధిపతిపచ్చయేన పచ్చయో. (౫)
౩౩. మగ్గాధిపతి ధమ్మో మగ్గాధిపతిస్స ధమ్మస్స అధిపతిపచ్చయేన పచ్చయో – ఆరమ్మణాధిపతి, సహజాతాధిపతి. ఆరమ్మణాధిపతి – అరియా మగ్గా వుట్ఠహిత్వా మగ్గం గరుం కత్వా పచ్చవేక్ఖన్తి. సహజాతాధిపతి – మగ్గాధిపతి అధిపతి సమ్పయుత్తకానం ఖన్ధానం అధిపతిపచ్చయేన పచ్చయో. (౧)
మగ్గాధిపతి ధమ్మో మగ్గారమ్మణస్స ధమ్మస్స అధిపతిపచ్చయేన పచ్చయో – ఆరమ్మణాధిపతి, సహజాతాధిపతి. ఆరమ్మణాధిపతి – అరియా మగ్గా వుట్ఠహిత్వా మగ్గం గరుం కత్వా పచ్చవేక్ఖన్తి. సహజాతాధిపతి – మగ్గాధిపతి అధిపతి సమ్పయుత్తకానం మగ్గారమ్మణానం ఖన్ధానం అధిపతిపచ్చయేన పచ్చయో. (౨)
మగ్గాధిపతి ధమ్మో మగ్గహేతుకస్స ధమ్మస్స అధిపతిపచ్చయేన పచ్చయో. సహజాతాధిపతి – మగ్గాధిపతి అధిపతి సమ్పయుత్తకానం మగ్గహేతుకానం ఖన్ధానం అధిపతిపచ్చయేన పచ్చయో. (౩)
మగ్గాధిపతి ధమ్మో మగ్గారమ్మణస్స చ మగ్గాధిపతిస్స చ అధిపతిపచ్చయేన పచ్చయో – ఆరమ్మణాధిపతి, సహజాతాధిపతి. ఆరమ్మణాధిపతి – అరియా మగ్గా వుట్ఠహిత్వా మగ్గం గరుం కత్వా పచ్చవేక్ఖన్తి. సహజాతాధిపతి – మగ్గాధిపతి అధిపతి సమ్పయుత్తకానం మగ్గారమ్మణానఞ్చ మగ్గాధిపతీనఞ్చ ఖన్ధానం అధిపతిపచ్చయేన పచ్చయో. (౪)
మగ్గాధిపతి ధమ్మో మగ్గహేతుకస్స చ మగ్గాధిపతిస్స చ ధమ్మస్స అధిపతిపచ్చయేన పచ్చయో. సహజాతాధిపతి – మగ్గాధిపతి అధిపతి సమ్పయుత్తకానం మగ్గాహేతుకానఞ్చ మగ్గాధిపతీనఞ్చ ఖన్ధానం అధిపతిపచ్చయేన పచ్చయో. (౫)
౩౪. మగ్గారమ్మణో చ మగ్గాధిపతి చ ధమ్మా మగ్గారమ్మణస్స ధమ్మస్స అధిపతిపచ్చయేన పచ్చయో. సహజాతాధిపతి – మగ్గారమ్మణా చ మగ్గాధిపతీ చ అధిపతి సమ్పయుత్తకానం మగ్గారమ్మణానం ఖన్ధానం అధిపతిపచ్చయేన పచ్చయో. (౧)
మగ్గారమ్మణో చ మగ్గాధిపతి చ ధమ్మా మగ్గాధిపతిస్స ధమ్మస్స అధిపతిపచ్చయేన పచ్చయో. సహజాతాధిపతి – మగ్గారమ్మణా చ మగ్గాధిపతీ చ అధిపతి సమ్పయుత్తకానం మగ్గాధిపతీనం ఖన్ధానం అధిపతిపచ్చయేన పచ్చయో. (౨)
మగ్గారమ్మణో చ మగ్గాధిపతి చ ధమ్మా మగ్గారమ్మణస్స చ మగ్గాధిపతిస్స చ ధమ్మస్స అధిపతిపచ్చయేన పచ్చయో. సహజాతాధిపతి – మగ్గారమ్మణా చ మగ్గాధిపతీ చ అధిపతి సమ్పయుత్తకానం మగ్గారమ్మణానఞ్చ మగ్గాధిపతీనఞ్చ ఖన్ధానం అధిపతిపచ్చయేన పచ్చయో. (౩)
౩౫. మగ్గహేతుకో చ మగ్గాధిపతి చ ధమ్మా మగ్గారమ్మణస్స ధమ్మస్స అధిపతిపచ్చయేన పచ్చయో. ఆరమ్మణాధిపతి – అరియా మగ్గా వుట్ఠహిత్వా మగ్గం గరుం కత్వా పచ్చవేక్ఖన్తి. (౧)
మగ్గహేతుకో చ మగ్గాధిపతి చ ధమ్మా మగ్గహేతుకస్స ధమ్మస్స అధిపతిపచ్చయేన పచ్చయో. సహజాతాధిపతి – మగ్గహేతుకా చ మగ్గాధిపతీ చ అధిపతి సమ్పయుత్తకానం మగ్గహేతుకానం ఖన్ధానం అధిపతిపచ్చయేన పచ్చయో. (౨)
మగ్గహేతుకో చ మగ్గాధిపతి చ ధమ్మా మగ్గాధిపతిస్స ధమ్మస్స అధిపతిపచ్చయేన పచ్చయో – ఆరమ్మణాధిపతి, సహజాతాధిపతి. ఆరమ్మణాధిపతి – అరియా మగ్గా వుట్ఠహిత్వా మగ్గం గరుం కత్వా పచ్చవేక్ఖన్తి. సహజాతాధిపతి – మగ్గహేతుకా చ మగ్గాధిపతీ చ అధిపతి సమ్పయుత్తకానం మగ్గాధిపతీనం ఖన్ధానం అధిపతిపచ్చయేన పచ్చయో. (౩)
మగ్గహేతుకో చ మగ్గాధిపతి చ ధమ్మా మగ్గారమ్మణస్స చ మగ్గాధిపతిస్స చ ధమ్మస్స అధిపతిపచ్చయేన పచ్చయో. ఆరమ్మణాధిపతి – అరియా మగ్గా వుట్ఠహిత్వా మగ్గం గరుం కత్వా పచ్చవేక్ఖన్తి. (౪)
మగ్గహేతుకో చ మగ్గాధిపతి చ ధమ్మా మగ్గహేతుకస్స చ మగ్గాధిపతిస్స చ ధమ్మస్స అధిపతిపచ్చయేన పచ్చయో. సహజాతాధిపతి – మగ్గహేతుకా చ మగ్గాధిపతీ చ అధిపతి సమ్పయుత్తకానం మగ్గహేతుకానఞ్చ మగ్గాధిపతీనఞ్చ ఖన్ధానం అధిపతిపచ్చయేన పచ్చయో. (౫)
అనన్తరపచ్చయో
౩౬. మగ్గారమ్మణో ధమ్మో మగ్గారమ్మణస్స ధమ్మస్స అనన్తరపచ్చయేన పచ్చయో – పురిమా పురిమా మగ్గారమ్మణా ఖన్ధా పచ్ఛిమానం పచ్ఛిమానం మగ్గారమ్మణానం ఖన్ధానం అనన్తరపచ్చయేన పచ్చయో. ఆవజ్జనా మగ్గారమ్మణానం ఖన్ధానం అనన్తరపచ్చయేన పచ్చయో. (౧)
మగ్గారమ్మణో ధమ్మో మగ్గాధిపతిస్స ధమ్మస్స అనన్తరపచ్చయేన పచ్చయో – పురిమా పురిమా మగ్గారమ్మణా ఖన్ధా పచ్ఛిమానం పచ్ఛిమానం మగ్గాధిపతీనం ఖన్ధానం అనన్తరపచ్చయేన పచ్చయో. ఆవజ్జనా మగ్గాధిపతీనం ఖన్ధానం అనన్తరపచ్చయేన పచ్చయో. (౨)
మగ్గారమ్మణో ధమ్మో మగ్గారమ్మణస్స చ మగ్గాధిపతిస్స చ ధమ్మస్స అనన్తరపచ్చయేన పచ్చయో – పురిమా పురిమా మగ్గారమ్మణా ఖన్ధా పచ్ఛిమానం పచ్ఛిమానం మగ్గారమ్మణానఞ్చ మగ్గాధిపతీనఞ్చ ఖన్ధానం అనన్తరపచ్చయేన పచ్చయో. ఆవజ్జనా మగ్గారమ్మణానఞ్చ మగ్గాధిపతీనఞ్చ ఖన్ధానం అనన్తరపచ్చయేన పచ్చయో. (౩)
౩౭. మగ్గాధిపతి ధమ్మో మగ్గాధిపతిస్స ధమ్మస్స అనన్తరపచ్చయేన పచ్చయో – పురిమా పురిమా మగ్గాధిపతీ ఖన్ధా పచ్ఛిమానం పచ్ఛిమానం మగ్గాధిపతీనం ఖన్ధానం అనన్తరపచ్చయేన పచ్చయో. (౧)
మగ్గాధిపతి ధమ్మో మగ్గారమ్మణస్స ధమ్మస్స అనన్తరపచ్చయేన పచ్చయో – పురిమా పురిమా మగ్గాధిపతీ ఖన్ధా పచ్ఛిమానం పచ్ఛిమానం మగ్గారమ్మణానం ఖన్ధానం అనన్తరపచ్చయేన పచ్చయో. (౨)
మగ్గాధిపతి ధమ్మో మగ్గారమ్మణస్స చ మగ్గాధిపతిస్స చ ధమ్మస్స అనన్తరపచ్చయేన పచ్చయో – పురిమా పురిమా మగ్గాధిపతీ ఖన్ధా పచ్ఛిమానం పచ్ఛిమానం మగ్గారమ్మణానఞ్చ మగ్గాధిపతీనఞ్చ ఖన్ధానం అనన్తరపచ్చయేన పచ్చయో. (౩)
౩౮. మగ్గారమ్మణో చ మగ్గాధిపతి చ ధమ్మా మగ్గారమ్మణస్స ధమ్మస్స అనన్తరపచ్చయేన పచ్చయో – పురిమా పురిమా మగ్గారమ్మణా చ మగ్గాధిపతీ చ ఖన్ధా పచ్ఛిమానం పచ్ఛిమానం మగ్గారమ్మణానం ఖన్ధానం అనన్తరపచ్చయేన పచ్చయో. (౧)
మగ్గారమ్మణో చ మగ్గాధిపతి చ ధమ్మా మగ్గాధిపతిస్స ధమ్మస్స అనన్తరపచ్చయేన పచ్చయో – పురిమా పురిమా మగ్గారమ్మణా చ మగ్గాధిపతీ చ ఖన్ధా పచ్ఛిమానం పచ్ఛిమానం మగ్గాధిపతీనం ఖన్ధానం అనన్తరపచ్చయేన పచ్చయో. (౨)
మగ్గారమ్మణో చ మగ్గాధిపతి చ ధమ్మా మగ్గారమ్మణస్స చ మగ్గాధిపతిస్స చ ధమ్మస్స అనన్తరపచ్చయేన పచ్చయో – పురిమా పురిమా మగ్గారమ్మణా చ మగ్గాధిపతీ చ ఖన్ధా పచ్ఛిమానం పచ్ఛిమానం మగ్గారమ్మణానఞ్చ మగ్గాధిపతీనఞ్చ ఖన్ధానం అనన్తరపచ్చయేన పచ్చయో. (౩)
సమనన్తరపచ్చయాది
౩౯. మగ్గారమ్మణో ధమ్మో మగ్గారమ్మణస్స ధమ్మస్స సమనన్తరపచ్చయేన పచ్చయో…పే… (అనన్తరసదిసం) సహజాతపచ్చయేన పచ్చయో… అఞ్ఞమఞ్ఞపచ్చయేన పచ్చయో… నిస్సయపచ్చయేన పచ్చయో… (తీసుపి సత్తరస పఞ్హా కాతబ్బా).
ఉపనిస్సయపచ్చయో
౪౦. మగ్గారమ్మణో ధమ్మో మగ్గారమ్మణస్స ధమ్మస్స ఉపనిస్సయపచ్చయేన పచ్చయో – అనన్తరూపనిస్సయో, పకతూపనిస్సయో…పే…. పకతూపనిస్సయో – పచ్చవేక్ఖణా పచ్చవేక్ఖణాయ ఉపనిస్సయపచ్చయేన పచ్చయో. (౧)
మగ్గారమ్మణో ధమ్మో మగ్గాధిపతిస్స ధమ్మస్స ఉపనిస్సయపచ్చయేన పచ్చయో – అనన్తరూపనిస్సయో, పకతూపనిస్సయో…పే…. పకతూపనిస్సయో – పచ్చవేక్ఖణా పచ్చవేక్ఖణాయ ఉపనిస్సయపచ్చయేన పచ్చయో. (౨)
మగ్గారమ్మణో ధమ్మో మగ్గారమ్మణస్స చ మగ్గాధిపతిస్స చ ధమ్మస్స ఉపనిస్సయపచ్చయేన పచ్చయో – అనన్తరూపనిస్సయో, పకతూపనిస్సయో…పే…. పకతూపనిస్సయో – పచ్చవేక్ఖణా పచ్చవేక్ఖణాయ ఉపనిస్సయపచ్చయేన పచ్చయో. (౩)
౪౧. మగ్గహేతుకో ధమ్మో మగ్గహేతుకస్స ధమ్మస్స ఉపనిస్సయపచ్చయేన పచ్చయో. పకతూపనిస్సయో – పఠమో మగ్గో దుతియస్స మగ్గస్స ఉపనిస్సయపచ్చయేన పచ్చయో…పే… తతియో మగ్గో చతుత్థస్స మగ్గస్స ఉపనిస్సయపచ్చయేన పచ్చయో. (౧)
మగ్గహేతుకో ధమ్మో మగ్గారమ్మణస్స ధమ్మస్స ఉపనిస్సయపచ్చయేన పచ్చయో. ఆరమ్మణూపనిస్సయో – అరియా మగ్గా వుట్ఠహిత్వా మగ్గం గరుం కత్వా పచ్చవేక్ఖన్తి. (౨)
మగ్గహేతుకో ధమ్మో మగ్గాధిపతిస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, పకతూపనిస్సయో…పే…. పకతూపనిస్సయో – పఠమో మగ్గో దుతియస్స మగ్గస్స…పే… తతియో మగ్గో చతుత్థస్స మగ్గస్స ఉపనిస్సయపచ్చయేన పచ్చయో. (౩)
మగ్గహేతుకో ధమ్మో మగ్గారమ్మణస్స చ మగ్గాధిపతిస్స చ ధమ్మస్స ఉపనిస్సయపచ్చయేన పచ్చయో. ఆరమ్మణూపనిస్సయో – అరియా మగ్గా వుట్ఠహిత్వా మగ్గం గరుం కత్వా పచ్చవేక్ఖన్తి. (౪)
మగ్గహేతుకో ధమ్మో మగ్గహేతుకస్స చ మగ్గాధిపతిస్స చ ధమ్మస్స ఉపనిస్సయపచ్చయేన పచ్చయో. పకతూపనిస్సయో – పఠమో మగ్గో దుతియస్స మగ్గస్స…పే… తతియో మగ్గో చతుత్థస్స మగ్గస్స ఉపనిస్సయపచ్చయేన పచ్చయో. (౫)
౪౨. మగ్గాధిపతి ధమ్మో మగ్గాధిపతిస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – పఠమో మగ్గో దుతియస్స మగ్గస్స…పే… తతియో మగ్గో చతుత్థస్స మగ్గస్స ఉపనిస్సయపచ్చయేన పచ్చయో; పచ్చవేక్ఖణా పచ్చవేక్ఖణాయ ఉపనిస్సయపచ్చయేన పచ్చయో. (౧)
మగ్గాధిపతి ధమ్మో మగ్గారమ్మణస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – పచ్చవేక్ఖణా పచ్చవేక్ఖణాయ ఉపనిస్సయపచ్చయేన పచ్చయో. (౨)
మగ్గాధిపతి ధమ్మో మగ్గహేతుకస్స ధమ్మస్స ఉపనిస్సయపచ్చయేన పచ్చయో. పకతూపనిస్సయో – పఠమో మగ్గో దుతియస్స మగ్గస్స…పే… తతియో మగ్గో చతుత్థస్స మగ్గస్స ఉపనిస్సయపచ్చయేన పచ్చయో. (౩)
మగ్గాధిపతి ధమ్మో మగ్గారమ్మణస్స చ మగ్గాధిపతిస్స చ ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – పచ్చవేక్ఖణా పచ్చవేక్ఖణాయ ఉపనిస్సయపచ్చయేన పచ్చయో. (౪)
మగ్గాధిపతి ధమ్మో మగ్గహేతుకస్స చ మగ్గాధిపతిస్స చ ధమ్మస్స ఉపనిస్సయపచ్చయేన పచ్చయో. పకతూపనిస్సయో – పఠమో మగ్గో దుతియస్స మగ్గస్స…పే… తతియో మగ్గో చతుత్థస్స మగ్గస్స ఉపనిస్సయపచ్చయేన పచ్చయో. (౫)
౪౩. మగ్గారమ్మణో చ మగ్గాధిపతి చ ధమ్మా మగ్గారమ్మణస్స ధమ్మస్స ఉపనిస్సయపచ్చయేన పచ్చయో – అనన్తరూపనిస్సయో, పకతూపనిస్సయో…పే…. పకతూపనిస్సయో – పచ్చవేక్ఖణా పచ్చవేక్ఖణాయ ఉపనిస్సయపచ్చయేన పచ్చయో. (౧)
మగ్గారమ్మణో చ మగ్గాధిపతి చ ధమ్మా మగ్గాధిపతిస్స ధమ్మస్స ఉపనిస్సయపచ్చయేన పచ్చయో – అనన్తరూపనిస్సయో, పకతూపనిస్సయో…పే…. పకతూపనిస్సయో – పచ్చవేక్ఖణా పచ్చవేక్ఖణాయ ఉపనిస్సయపచ్చయేన పచ్చయో. (౨)
మగ్గారమ్మణో చ మగ్గాధిపతి చ ధమ్మా మగ్గారమ్మణస్స చ మగ్గాధిపతిస్స చ ధమ్మస్స ఉపనిస్సయపచ్చయేన పచ్చయో – అనన్తరూపనిస్సయో, పకతూపనిస్సయో…పే…. పకతూపనిస్సయో – పచ్చవేక్ఖణా పచ్చవేక్ఖణాయ ఉపనిస్సయపచ్చయేన పచ్చయో. (౩)
౪౪. మగ్గహేతుకో చ మగ్గాధిపతి చ ధమ్మా మగ్గారమ్మణస్స ధమ్మస్స ఉపనిస్సయపచ్చయేన పచ్చయో. ఆరమ్మణూపనిస్సయో – అరియా మగ్గా వుట్ఠహిత్వా మగ్గం గరుం కత్వా పచ్చవేక్ఖన్తి. (౧)
మగ్గహేతుకో చ మగ్గాధిపతి చ ధమ్మా మగ్గహేతుకస్స ధమ్మస్స ఉపనిస్సయపచ్చయేన పచ్చయో. పకతూపనిస్సయో – పఠమో మగ్గో దుతియస్స మగ్గస్స…పే… తతియో మగ్గో చతుత్థస్స మగ్గస్స ఉపనిస్సయపచ్చయేన పచ్చయో. (౨)
మగ్గహేతుకో చ మగ్గాధిపతి చ ధమ్మా మగ్గాధిపతిస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, పకతూపనిస్సయో…పే…. పకతూపనిస్సయో – పఠమో మగ్గో దుతియస్స మగ్గస్స…పే… తతియో మగ్గో చతుత్థస్స మగ్గస్స ఉపనిస్సయపచ్చయేన పచ్చయో. (౩)
మగ్గహేతుకో చ మగ్గాధిపతి చ ధమ్మా మగ్గారమ్మణస్స చ మగ్గాధిపతిస్స చ ధమ్మస్స ఉపనిస్సయపచ్చయేన పచ్చయో. ఆరమ్మణూపనిస్సయో – అరియా మగ్గా వుట్ఠహిత్వా మగ్గం గరుం కత్వా పచ్చవేక్ఖన్తి. (౪)
మగ్గహేతుకో చ మగ్గాధిపతి చ ధమ్మా మగ్గహేతుకస్స చ మగ్గాధిపతిస్స చ ధమ్మస్స ఉపనిస్సయపచ్చయేన పచ్చయో. పకతూపనిస్సయో – పఠమో మగ్గో దుతియస్స మగ్గస్స…పే… తతియో మగ్గో చతుత్థస్స మగ్గస్స ఉపనిస్సయపచ్చయేన పచ్చయో. (౫)
ఆసేవనపచ్చయో
౪౫. మగ్గారమ్మణో ధమ్మో మగ్గారమ్మణస్స ధమ్మస్స ఆసేవనపచ్చయేన పచ్చయో – పురిమా పురిమా మగ్గారమ్మణా ఖన్ధా పచ్ఛిమానం పచ్ఛిమానం మగ్గారమ్మణానం ఖన్ధానం ఆసేవనపచ్చయేన పచ్చయో.
మగ్గారమ్మణో ధమ్మో మగ్గాధిపతిస్స ధమ్మస్స ఆసేవనపచ్చయేన పచ్చయో (అనన్తరసదిసం. నవ పఞ్హా కాతబ్బా, ఆవజ్జనా న కాతబ్బా).
కమ్మపచ్చయాది
౪౬. మగ్గారమ్మణో ధమ్మో మగ్గారమ్మణస్స ధమ్మస్స కమ్మపచ్చయేన పచ్చయో – సహజాతా…పే… (నానాక్ఖణికా నత్థి, సత్తరస పఞ్హా కాతబ్బా).
ఆహారపచ్చయాది
౪౭. మగ్గారమ్మణో ధమ్మో మగ్గారమ్మణస్స ధమ్మస్స ఆహారపచ్చయేన పచ్చయో… ఇన్ద్రియపచ్చయేన పచ్చయో… ఝానపచ్చయేన పచ్చయో… మగ్గపచ్చయేన పచ్చయో… సమ్పయుత్తపచ్చయేన పచ్చయో… అత్థిపచ్చయేన పచ్చయో (ఇమే సత్త పచ్చయా సత్తరస పఞ్హా హేతుసదిసా)… నత్థిపచ్చయేన పచ్చయో… విగతపచ్చయేన పచ్చయో (అనన్తరసదిసా)… అవిగతపచ్చయేన పచ్చయో (సత్తరస పఞ్హా).