౧. విభఙ్గవారో

హేతుపచ్చయో

౩౬. మిచ్ఛత్తనియతో ధమ్మో మిచ్ఛత్తనియతస్స ధమ్మస్స హేతుపచ్చయేన పచ్చయో – మిచ్ఛత్తనియతా హేతూ సమ్పయుత్తకానం ఖన్ధానం హేతుపచ్చయేన పచ్చయో. (౧)

మిచ్ఛత్తనియతో ధమ్మో అనియతస్స ధమ్మస్స హేతుపచ్చయేన పచ్చయో – మిచ్ఛత్తనియతా హేతూ చిత్తసముట్ఠానానం రూపానం హేతుపచ్చయేన పచ్చయో. (౨)

మిచ్ఛత్తనియతో ధమ్మో మిచ్ఛత్తనియతస్స చ అనియతస్స చ ధమ్మస్స హేతుపచ్చయేన పచ్చయో – మిచ్ఛత్తనియతా హేతూ సమ్పయుత్తకానం ఖన్ధానం చిత్తసముట్ఠానానఞ్చ రూపానం హేతుపచ్చయేన పచ్చయో. (౩)

సమ్మత్తనియతో ధమ్మో సమ్మత్తనియతస్స ధమ్మస్స హేతుపచ్చయేన పచ్చయో… తీణి.

అనియతో ధమ్మో అనియతస్స ధమ్మస్స హేతుపచ్చయేన పచ్చయో – అనియతా హేతూ సమ్పయుత్తకానం ఖన్ధానం చిత్తసముట్ఠానానఞ్చ రూపానం హేతుపచ్చయేన పచ్చయో. పటిసన్ధిక్ఖణే…పే…. (౧)

ఆరమ్మణపచ్చయో

౩౭. మిచ్ఛత్తనియతో ధమ్మో అనియతస్స ధమ్మస్స ఆరమ్మణపచ్చయేన పచ్చయో – అరియా మిచ్ఛత్తనియతే పహీనే కిలేసే పచ్చవేక్ఖన్తి, పుబ్బే సముదాచిణ్ణే కిలేసే జానన్తి. మిచ్ఛత్తనియతే ఖన్ధే అనిచ్చతో…పే… విపస్సన్తి. చేతోపరియఞాణేన మిచ్ఛత్తనియతచిత్తసమఙ్గిస్స చిత్తం జానన్తి. మిచ్ఛత్తనియతా ఖన్ధా చేతోపరియఞాణస్స, పుబ్బేనివాసానుస్సతిఞాణస్స, యథాకమ్మూపగఞాణస్స, అనాగతంసఞాణస్స ఆవజ్జనాయ ఆరమ్మణపచ్చయేన పచ్చయో. (౧)

సమ్మత్తనియతో ధమ్మో అనియతస్స ధమ్మస్స ఆరమ్మణపచ్చయేన పచ్చయో – అరియా మగ్గా వుట్ఠహిత్వా మగ్గం పచ్చవేక్ఖన్తి. చేతోపరియఞాణేన సమ్మత్తనియతచిత్తసమఙ్గిస్స చిత్తం జానన్తి. సమ్మత్తనియతా ఖన్ధా చేతోపరియఞాణస్స, పుబ్బేనివాసానుస్సతిఞాణస్స, అనాగతంసఞాణస్స, ఆవజ్జనాయ ఆరమ్మణపచ్చయేన పచ్చయో. (౧)

౩౮. అనియతో ధమ్మో అనియతస్స ధమ్మస్స ఆరమ్మణపచ్చయేన పచ్చయో – దానం దత్వా సీలం సమాదియిత్వా ఉపోసథకమ్మం కత్వా తం పచ్చవేక్ఖతి, పుబ్బే సుచిణ్ణాని పచ్చవేక్ఖతి, ఝానా వుట్ఠహిత్వా ఝానం పచ్చవేక్ఖతి, అరియా ఫలం పచ్చవేక్ఖన్తి, నిబ్బానం పచ్చవేక్ఖన్తి, నిబ్బానం గోత్రభుస్స, వోదానస్స, ఫలస్స, ఆవజ్జనాయ ఆరమ్మణపచ్చయేన పచ్చయో. అరియా అనియతే పహీనే కిలేసే పచ్చవేక్ఖన్తి, విక్ఖమ్భితే కిలేసే పచ్చవేక్ఖన్తి. పుబ్బే సముదాచిణ్ణే కిలేసే జానన్తి. చక్ఖుం…పే… వత్థుం… అనియతే ఖన్ధే అనిచ్చతో దుక్ఖతో అనత్తతో విపస్సన్తి, అస్సాదేన్తి అభినన్దన్తి, తం ఆరబ్భ అనియతో రాగో ఉప్పజ్జతి…పే… దోమనస్సం ఉప్పజ్జతి. దిబ్బేన చక్ఖునా రూపం పస్సతి, దిబ్బాయ సోతధాతుయా సద్దం సుణాతి, చేతోపరియఞాణేన అనియతచిత్తసమఙ్గిస్స చిత్తం జానాతి, ఆకాసానఞ్చాయతనం విఞ్ఞాణఞ్చాయతనస్స…పే… ఆకిఞ్చఞ్ఞాయతనం నేవసఞ్ఞానాసఞ్ఞాయతనస్స ఆరమ్మణపచ్చయేన పచ్చయో. రూపాయతనం చక్ఖువిఞ్ఞాణస్స…పే… ఫోట్ఠబ్బాయతనం కాయవిఞ్ఞాణస్స ఆరమ్మణపచ్చయేన పచ్చయో. అనియతా ఖన్ధా ఇద్ధివిధఞాణస్స, చేతోపరియఞాణస్స, పుబ్బేనివాసానుస్సతిఞాణస్స, యథాకమ్మూపగఞాణస్స, అనాగతంసఞాణస్స, ఆవజ్జనాయ ఆరమ్మణపచ్చయేన పచ్చయో. (౧)

అనియతో ధమ్మో మిచ్ఛత్తనియతస్స ధమ్మస్స ఆరమ్మణపచ్చయేన పచ్చయో – రూపజీవితిన్ద్రియం మాతుఘాతికమ్మస్స… పితుఘాతికమ్మస్స… అరహన్తఘాతికమ్మస్స… రుహిరుప్పాదకమ్మస్స ఆరమ్మణపచ్చయేన పచ్చయో. యం వత్థుం పరామసన్తస్స మిచ్ఛత్తనియతా ఖన్ధా ఉప్పజ్జన్తి, తం వత్థు మిచ్ఛత్తనియతానం ఖన్ధానం ఆరమ్మణపచ్చయేన పచ్చయో. (౨)

అనియతో ధమ్మో సమ్మత్తనియతస్స ధమ్మస్స ఆరమ్మణపచ్చయేన పచ్చయో – నిబ్బానం మగ్గస్స ఆరమ్మణపచ్చయేన పచ్చయో. (౩)

అధిపతిపచ్చయో

౩౯. మిచ్ఛత్తనియతో ధమ్మో మిచ్ఛత్తనియతస్స ధమ్మస్స అధిపతిపచ్చయేన పచ్చయో. సహజాతాధిపతి – మిచ్ఛత్తనియతాధిపతి సమ్పయుత్తకానం ఖన్ధానం అధిపతిపచ్చయేన పచ్చయో. (౧)

మిచ్ఛత్తనియతో ధమ్మో అనియతస్స ధమ్మస్స అధిపతిపచ్చయేన పచ్చయో. సహజాతాధిపతి – మిచ్ఛత్తనియతాధిపతి చిత్తసముట్ఠానానం రూపానం అధిపతిపచ్చయేన పచ్చయో. (౨)

మిచ్ఛత్తనియతో ధమ్మో మిచ్ఛత్తనియతస్స చ అనియతస్స చ ధమ్మస్స అధిపతిపచ్చయేన పచ్చయో. సహజాతాధిపతి – మిచ్ఛత్తనియతాధిపతి సమ్పయుత్తకానం ఖన్ధానం చిత్తసముట్ఠానానఞ్చ రూపానం అధిపతిపచ్చయేన పచ్చయో. (౩)

౪౦. సమ్మత్తనియతో ధమ్మో సమ్మత్తనియతస్స ధమ్మస్స అధిపతిపచ్చయేన పచ్చయో. సహజాతాధిపతి – సమ్మత్తనియతాధిపతి సమ్పయుత్తకానం ఖన్ధానం అధిపతిపచ్చయేన పచ్చయో. (౧)

సమ్మత్తనియతో ధమ్మో అనియతస్స ధమ్మస్స అధిపతిపచ్చయేన పచ్చయో – ఆరమ్మణాధిపతి, సహజాతాధిపతి. ఆరమ్మణాధిపతి – అరియా మగ్గా వుట్ఠహిత్వా మగ్గం గరుం కత్వా పచ్చవేక్ఖన్తి. సహజాతాధిపతి – సమ్మత్తనియతాధిపతి చిత్తసముట్ఠానానం రూపానం అధిపతిపచ్చయేన పచ్చయో. (౨)

సమ్మత్తనియతో ధమ్మో సమ్మత్తనియతస్స చ అనియతస్స చ ధమ్మస్స అధిపతిపచ్చయేన పచ్చయో. సహజాతాధిపతి – సమ్మత్తనియతాధిపతి సమ్పయుత్తకానం ఖన్ధానం చిత్తసముట్ఠానానఞ్చ రూపానం అధిపతిపచ్చయేన పచ్చయో. (౩)

౪౧. అనియతో ధమ్మో అనియతస్స ధమ్మస్స అధిపతిపచ్చయేన పచ్చయో – ఆరమ్మణాధిపతి సహజాతాధిపతి. ఆరమ్మణాధిపతి – దానం దత్వా సీలం సమాదియిత్వా ఉపోసథకమ్మం కత్వా తం గరుం కత్వా పచ్చవేక్ఖతి, పుబ్బే సుచిణ్ణాని గరుం కత్వా పచ్చవేక్ఖతి, ఝానా…పే… అరియా ఫలం గరుం కత్వా పచ్చవేక్ఖన్తి, నిబ్బానం గరుం కత్వా పచ్చవేక్ఖన్తి, నిబ్బానం గోత్రభుస్స, వోదానస్స, ఫలస్స అధిపతిపచ్చయేన పచ్చయో. చక్ఖుం…పే… వత్థుం…పే… అనియతే ఖన్ధే గరుం కత్వా అస్సాదేతి అభినన్దతి, తం గరుం కత్వా అనియతో రాగో ఉప్పజ్జతి, దిట్ఠి ఉప్పజ్జతి. సహజాతాధిపతి – అనియతాధిపతి సమ్పయుత్తకానం ఖన్ధానం చిత్తసముట్ఠానానఞ్చ రూపానం అధిపతిపచ్చయేన పచ్చయో. (౧)

అనియతో ధమ్మో సమ్మత్తనియతస్స ధమ్మస్స అధిపతిపచ్చయేన పచ్చయో. ఆరమ్మణాధిపతి – నిబ్బానం మగ్గస్స అధిపతిపచ్చయేన పచ్చయో. (౨)

అనన్తరపచ్చయో

౪౨. మిచ్ఛత్తనియతో ధమ్మో అనియతస్స ధమ్మస్స అనన్తరపచ్చయేన పచ్చయో – మిచ్ఛత్తనియతా ఖన్ధా వుట్ఠానస్స అనన్తరపచ్చయేన పచ్చయో. (౧)

సమ్మత్తనియతో ధమ్మో అనియతస్స ధమ్మస్స అనన్తరపచ్చయేన పచ్చయో – మగ్గో ఫలస్స అనన్తరపచ్చయేన పచ్చయో. (౧)

అనియతో ధమ్మో అనియతస్స ధమ్మస్స అనన్తరపచ్చయేన పచ్చయో – పురిమా పురిమా అనియతా ఖన్ధా పచ్ఛిమానం పచ్ఛిమానం అనియతానం ఖన్ధానం అనన్తరపచ్చయేన పచ్చయో. అనులోమం గోత్రభుస్స… అనులోమం వోదానస్స… ఫలం ఫలస్స… అనులోమం ఫలసమాపత్తియా… నిరోధా వుట్ఠహన్తస్స నేవసఞ్ఞానాసఞ్ఞాయతనం ఫలసమాపత్తియా అనన్తరపచ్చయేన పచ్చయో. (౧)

౪౩. అనియతో ధమ్మో మిచ్ఛత్తనియతస్స ధమ్మస్స అనన్తరపచ్చయేన పచ్చయో – అనియతం దోమనస్సం మిచ్ఛత్తనియతస్స దోమనస్సస్స అనన్తరపచ్చయేన పచ్చయో. అనియతమిచ్ఛాదిట్ఠి నియతమిచ్ఛాదిట్ఠియా అనన్తరపచ్చయేన పచ్చయో. (౨)

అనియతో ధమ్మో సమ్మత్తనియతస్స ధమ్మస్స అనన్తరపచ్చయేన పచ్చయో – గోత్రభు మగ్గస్స… వోదానం మగ్గస్స అనన్తరపచ్చయేన పచ్చయో. (౩)

సమనన్తరపచ్చయాది

౪౪. మిచ్ఛత్తనియతో ధమ్మో అనియతస్స ధమ్మస్స సమనన్తరపచ్చయేన పచ్చయో (అనన్తరసదిసం)… సహజాతపచ్చయేన పచ్చయో (పటిచ్చవారసదిసం, నవ పఞ్హా)… అఞ్ఞమఞ్ఞపచ్చయేన పచ్చయో (పటిచ్చవారసదిసం, తిస్సో పఞ్హా)… నిస్సయపచ్చయేన పచ్చయో (కుసలత్తికసదిసా, తేరస పఞ్హా).

ఉపనిస్సయపచ్చయో

౪౫. మిచ్ఛత్తనియతో ధమ్మో మిచ్ఛత్తనియతస్స ధమ్మస్స ఉపనిస్సయపచ్చయేన పచ్చయో. పకతూపనిస్సయో – మాతుఘాతికమ్మం మాతుఘాతికమ్మస్స ఉపనిస్సయపచ్చయేన పచ్చయో. మాతుఘాతికమ్మం…పే… పితుఘాతికమ్మం…పే… అరహన్తఘాతికమ్మం…పే… రుహిరుప్పాదకమ్మం…పే… సఙ్ఘభేదకమ్మం…పే… నియతమిచ్ఛాదిట్ఠియా ఉపనిస్సయపచ్చయేన పచ్చయో (చక్కం కాతబ్బం). నియతమిచ్ఛాదిట్ఠి నియతమిచ్ఛాదిట్ఠియా ఉపనిస్సయపచ్చయేన పచ్చయో. నియతమిచ్ఛాదిట్ఠి మాతుఘాతికమ్మస్స…పే… సఙ్ఘభేదకమ్మస్స ఉపనిస్సయపచ్చయేన పచ్చయో. (౧)

మిచ్ఛత్తనియతో ధమ్మో అనియతస్స ధమ్మస్స ఉపనిస్సయపచ్చయేన పచ్చయో – అనన్తరూపనిస్సయో, పకతూపనిస్సయో…పే…. పకతూపనిస్సయో – మాతరం జీవితా వోరోపేత్వా తస్స పటిఘాతత్థాయ దానం దేతి, సీలం సమాదియతి, ఉపోసథకమ్మం కరోతి. పితరం జీవితా వోరోపేత్వా…పే… అరహన్తం జీవితా వోరోపేత్వా…పే… దుట్ఠేన చిత్తేన తథాగతస్స లోహితం ఉప్పాదేత్వా…పే… సఙ్ఘం భిన్దిత్వా తస్స పటిఘాతత్థాయ దానం దేతి, సీలం సమాదియతి, ఉపోసథకమ్మం కరోతి. (౨)

౪౬. సమ్మత్తనియతో ధమ్మో సమ్మత్తనియతస్స ధమ్మస్స ఉపనిస్సయపచ్చయేన పచ్చయో. పకతూపనిస్సయో – పఠమో మగ్గో దుతియస్స మగ్గస్స ఉపనిస్సయపచ్చయేన పచ్చయో…పే… తతియో మగ్గో చతుత్థస్స మగ్గస్స ఉపనిస్సయపచ్చయేన పచ్చయో. (౧)

సమ్మత్తనియతో ధమ్మో అనియతస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – అరియా మగ్గం ఉపనిస్సాయ అనుప్పన్నం సమాపత్తిం ఉప్పాదేన్తి, ఉప్పన్నం సమాపజ్జన్తి, సఙ్ఖారే అనిచ్చతో దుక్ఖతో అనత్తతో విపస్సన్తి. మగ్గో అరియానం అత్థప్పటిసమ్భిదాయ…పే… ఠానాఠానకోసల్లస్స ఉపనిస్సయపచ్చయేన పచ్చయో. మగ్గో ఫలసమాపత్తియా ఉపనిస్సయపచ్చయేన పచ్చయో. (౨)

౪౭. అనియతో ధమ్మో అనియతస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – అనియతం సద్ధం ఉపనిస్సాయ దానం దేతి, సీలం సమాదియతి, ఉపోసథకమ్మం…పే… ఝానం ఉప్పాదేతి, విపస్సనం… అభిఞ్ఞం… సమాపత్తిం ఉప్పాదేతి, మానం జప్పేతి, దిట్ఠిం గణ్హాతి. అనియతం సీలం… సుతం… చాగం… పఞ్ఞం… రాగం…పే… పత్థనం… కాయికం సుఖం… కాయికం దుక్ఖం… ఉతుం… భోజనం… సేనాసనం ఉపనిస్సాయ దానం దేతి…పే… నిగమఘాతం కరోతి. అనియతా సద్ధా…పే… పఞ్ఞా, రాగో…పే… సేనాసనం అనియతాయ సద్ధాయ…పే… కాయికస్స సుఖస్స, కాయికస్స దుక్ఖస్స, ఫలసమాపత్తియా ఉపనిస్సయపచ్చయేన పచ్చయో. పఠమస్స ఝానస్స పరికమ్మం తస్సేవ…పే… నేవసఞ్ఞానాసఞ్ఞాయతనస్స పరికమ్మం తస్సేవ…పే… పఠమం ఝానం దుతియస్స ఝానస్స…పే… ఆకిఞ్చఞ్ఞాయతనం నేవసఞ్ఞానాసఞ్ఞాయతనస్స…పే… పాణాతిపాతో పాణాతిపాతస్స ఉపనిస్సయపచ్చయేన పచ్చయో (చక్కం కాతబ్బం). (౧)

అనియతో ధమ్మో మిచ్ఛత్తనియతస్స ధమ్మస్స ఉపనిస్సయపచ్చయేన పచ్చయో – అనన్తరూపనిస్సయో, పకతూపనిస్సయో…పే…. పకతూపనిస్సయో – అనియతం రాగం ఉపనిస్సాయ మాతరం జీవితా వోరోపేతి…పే… సఙ్ఘం భిన్దతి. అనియతం దోసం…పే… పత్థనం… కాయికం సుఖం…పే… సేనాసనం ఉపనిస్సాయ మాతరం జీవితా వోరోపేతి…పే… సఙ్ఘం భిన్దతి. అనియతో రాగో…పే… సేనాసనం మాతుఘాతికమ్మస్స… పితుఘాతికమ్మస్స… అరహన్తఘాతికమ్మస్స… రుహిరుప్పాదకమ్మస్స… సఙ్ఘభేదకమ్మస్స… నియతమిచ్ఛాదిట్ఠియా ఉపనిస్సయపచ్చయేన పచ్చయో. (౨)

అనియతో ధమ్మో సమ్మత్తనియతస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – పఠమస్స మగ్గస్స పరికమ్మం పఠమస్స మగ్గస్స…పే… చతుత్థస్స మగ్గస్స పరికమ్మం చతుత్థస్స మగ్గస్స ఉపనిస్సయపచ్చయేన పచ్చయో. (౩)

పురేజాతపచ్చయో

౪౮. అనియతో ధమ్మో అనియతస్స ధమ్మస్స పురేజాతపచ్చయేన పచ్చయో – ఆరమ్మణపురేజాతం, వత్థుపురేజాతం. ఆరమ్మణపురేజాతం – చక్ఖుం…పే… వత్థుం అనిచ్చతో…పే… విపస్సతి, అస్సాదేతి అభినన్దతి, తం ఆరబ్భ అనియతో రాగో ఉప్పజ్జతి…పే… దోమనస్సం ఉప్పజ్జతి. దిబ్బేన చక్ఖునా రూపం పస్సతి, దిబ్బాయ సోతధాతుయా సద్దం సుణాతి, రూపాయతనం చక్ఖువిఞ్ఞాణస్స…పే… ఫోట్ఠబ్బాయతనం కాయవిఞ్ఞాణస్స పురేజాతపచ్చయేన పచ్చయో. వత్థుపురేజాతం – చక్ఖాయతనం చక్ఖువిఞ్ఞాణస్స…పే… కాయాయతనం కాయవిఞ్ఞాణస్స… వత్థు అనియతానం ఖన్ధానం పురేజాతపచ్చయేన పచ్చయో. (౧)

అనియతో ధమ్మో మిచ్ఛత్తనియతస్స ధమ్మస్స పురేజాతపచ్చయేన పచ్చయో – ఆరమ్మణపురేజాతం, వత్థుపురేజాతం. ఆరమ్మణపురేజాతం – రూపజీవితిన్ద్రియం మాతుఘాతికమ్మస్స… పితుఘాతికమ్మస్స… అరహన్తఘాతికమ్మస్స… రుహిరుప్పాదకమ్మస్స పురేజాతపచ్చయేన పచ్చయో. వత్థుపురేజాతం – వత్థు మిచ్ఛత్తనియతానం ఖన్ధానం పురేజాతపచ్చయేన పచ్చయో. (౨)

అనియతో ధమ్మో సమ్మత్తనియతస్స ధమ్మస్స పురేజాతపచ్చయేన పచ్చయో. వత్థుపురేజాతం – వత్థు సమ్మత్తనియతానం ఖన్ధానం పురేజాతపచ్చయేన పచ్చయో. (౩)

పచ్ఛాజాతపచ్చయో

౪౯. మిచ్ఛత్తనియతో ధమ్మో అనియతస్స ధమ్మస్స పచ్ఛాజాతపచ్చయేన పచ్చయో – పచ్ఛాజాతా మిచ్ఛత్తనియతా ఖన్ధా పురేజాతస్స ఇమస్స కాయస్స పచ్ఛాజాతపచ్చయేన పచ్చయో. (౧)

సమ్మత్తనియతో ధమ్మో అనియతస్స ధమ్మస్స పచ్ఛాజాతపచ్చయేన పచ్చయో. పచ్ఛాజాతా సమ్మత్తనియతా ఖన్ధా పురేజాతస్స ఇమస్స కాయస్స పచ్ఛాజాతపచ్చయేన పచ్చయో. (౧)

అనియతో ధమ్మో అనియతస్స ధమ్మస్స పచ్ఛాజాతపచ్చయేన పచ్చయో – పచ్ఛాజాతా అనియతా ఖన్ధా పురేజాతస్స ఇమస్స కాయస్స పచ్ఛాజాతపచ్చయేన పచ్చయో. (౧)

ఆసేవనపచ్చయో

౫౦. అనియతో ధమ్మో అనియతస్స ధమ్మస్స ఆసేవనపచ్చయేన పచ్చయో – పురిమా పురిమా అనియతా ఖన్ధా పచ్ఛిమానం పచ్ఛిమానం అనియతానం ఖన్ధానం ఆసేవనపచ్చయేన పచ్చయో. అనులోమం గోత్రభుస్స… అనులోమం వోదానస్స ఆసేవనపచ్చయేన పచ్చయో. (౧)

అనియతో ధమ్మో మిచ్ఛత్తనియతస్స ధమ్మస్స ఆసేవనపచ్చయేన పచ్చయో – అనియతం దోమనస్సం మిచ్ఛత్తనియతస్స దోమనస్సస్స ఆసేవనపచ్చయేన పచ్చయో. అనియతమిచ్ఛాదిట్ఠి నియతమిచ్ఛాదిట్ఠియా ఆసేవనపచ్చయేన పచ్చయో. (౨)

అనియతో ధమ్మో సమ్మత్తనియతస్స ధమ్మస్స ఆసేవనపచ్చయేన పచ్చయో – గోత్రభు మగ్గస్స… వోదానం మగ్గస్స ఆసేవనపచ్చయేన పచ్చయో. (౩)

కమ్మపచ్చయో

౫౧. మిచ్ఛత్తనియతో ధమ్మో మిచ్ఛత్తనియతస్స ధమ్మస్స కమ్మపచ్చయేన పచ్చయో – మిచ్ఛత్తనియతా చేతనా సమ్పయుత్తకానం ఖన్ధానం కమ్మపచ్చయేన పచ్చయో. (౧)

మిచ్ఛత్తనియతో ధమ్మో అనియతస్స ధమ్మస్స కమ్మపచ్చయేన పచ్చయో – సహజాతా, నానాక్ఖణికా. సహజాతా – మిచ్ఛత్తనియతా చేతనా చిత్తసముట్ఠానానం రూపానం కమ్మపచ్చయేన పచ్చయో. నానాక్ఖణికా – మిచ్ఛత్తనియతా చేతనా విపాకానం ఖన్ధానం కటత్తా చ రూపానం కమ్మపచ్చయేన పచ్చయో. (౨)

మిచ్ఛత్తనియతో ధమ్మో మిచ్ఛత్తనియతస్స చ అనియతస్స చ ధమ్మస్స కమ్మపచ్చయేన పచ్చయో – మిచ్ఛత్తనియతా చేతనా సమ్పయుత్తకానం ఖన్ధానం చిత్తసముట్ఠానానఞ్చ రూపానం కమ్మపచ్చయేన పచ్చయో. (౩)

౫౨. సమ్మత్తనియతో ధమ్మో సమ్మత్తనియతస్స ధమ్మస్స కమ్మపచ్చయేన పచ్చయో – సమ్మత్తనియతా చేతనా సమ్పయుత్తకానం ఖన్ధానం కమ్మపచ్చయేన పచ్చయో. (౧)

సమ్మత్తనియతో ధమ్మో అనియతస్స ధమ్మస్స కమ్మపచ్చయేన పచ్చయో – సహజాతా, నానాక్ఖణికా. సహజాతా – సమ్మత్తనియతా చేతనా చిత్తసముట్ఠానానం రూపానం కమ్మపచ్చయేన పచ్చయో. నానాక్ఖణికా – సమ్మత్తనియతా చేతనా విపాకానం ఖన్ధానం కమ్మపచ్చయేన పచ్చయో. (౨)

సమ్మత్తనియతో ధమ్మో సమ్మత్తనియతస్స చ అనియతస్స చ ధమ్మస్స కమ్మపచ్చయేన పచ్చయో – సమ్మత్తనియతా చేతనా సమ్పయుత్తకానం ఖన్ధానం చిత్తసముట్ఠానానఞ్చ రూపానం కమ్మపచ్చయేన పచ్చయో. (౩)

అనియతో ధమ్మో అనియతస్స ధమ్మస్స కమ్మపచ్చయేన పచ్చయో – సహజాతా, నానాక్ఖణికా. సహజాతా – అనియతా చేతనా సమ్పయుత్తకానం ఖన్ధానం చిత్తసముట్ఠానానఞ్చ రూపానం కమ్మపచ్చయేన పచ్చయో. పటిసన్ధిక్ఖణే…పే…. నానాక్ఖణికా – అనియతా చేతనా విపాకానం ఖన్ధానం కటత్తా చ రూపానం కమ్మపచ్చయేన పచ్చయో. (౧)

విపాకపచ్చయో

౫౩. అనియతో ధమ్మో అనియతస్స ధమ్మస్స విపాకపచ్చయేన పచ్చయో – విపాకో అనియతో ఏకో ఖన్ధో తిణ్ణన్నం ఖన్ధానం చిత్తసముట్ఠానానఞ్చ రూపానం విపాకపచ్చయేన పచ్చయో…పే… పటిసన్ధిక్ఖణే…పే… ఖన్ధా వత్థుస్స…పే….

ఆహారపచ్చయాది

౫౪. మిచ్ఛత్తనియతో ధమ్మో మిచ్ఛత్తనియతస్స ధమ్మస్స ఆహారపచ్చయేన పచ్చయో… ఇన్ద్రియపచ్చయేన పచ్చయో… ఝానపచ్చయేన పచ్చయో… మగ్గపచ్చయేన పచ్చయో… సమ్పయుత్తపచ్చయేన పచ్చయో.

విప్పయుత్తపచ్చయో

౫౫. మిచ్ఛత్తనియతో ధమ్మో అనియతస్స ధమ్మస్స విప్పయుత్తపచ్చయేన పచ్చయో – సహజాతం, పచ్ఛాజాతం. సహజాతా – మిచ్ఛత్తనియతా ఖన్ధా చిత్తసముట్ఠానానం రూపానం విప్పయుత్తపచ్చయేన పచ్చయో. పచ్ఛాజాతా – మిచ్ఛత్తనియతా ఖన్ధా పురేజాతస్స ఇమస్స కాయస్స విప్పయుత్తపచ్చయేన పచ్చయో. (౧)

సమ్మత్తనియతో ధమ్మో అనియతస్స ధమ్మస్స విప్పయుత్తపచ్చయేన పచ్చయో – సహజాతం, పచ్ఛాజాతం. సహజాతా – సమ్మత్తనియతా ఖన్ధా చిత్తసముట్ఠానానం రూపానం విప్పయుత్తపచ్చయేన పచ్చయో. పచ్ఛాజాతా – సమ్మత్తనియతా ఖన్ధా పురేజాతస్స ఇమస్స కాయస్స విప్పయుత్తపచ్చయేన పచ్చయో. (౧)

అనియతో ధమ్మో అనియతస్స ధమ్మస్స విప్పయుత్తపచ్చయేన పచ్చయో – సహజాతం, పురేజాతం, పచ్ఛాజాతం. సహజాతా – అనియతా ఖన్ధా చిత్తసముట్ఠానానం రూపానం విప్పయుత్తపచ్చయేన పచ్చయో. పటిసన్ధిక్ఖణే…పే… ఖన్ధా వత్థుస్స విప్పయుత్తపచ్చయేన పచ్చయో. వత్థు ఖన్ధానం విప్పయుత్తపచ్చయేన పచ్చయో. పురేజాతం – చక్ఖాయతనం చక్ఖువిఞ్ఞాణస్స…పే… కాయాయతనం కాయవిఞ్ఞాణస్స… వత్థు అనియతానం ఖన్ధానం విప్పయుత్తపచ్చయేన పచ్చయో. పచ్ఛాజాతా – అనియతా ఖన్ధా పురేజాతస్స ఇమస్స కాయస్స విప్పయుత్తపచ్చయేన పచ్చయో. (౧)

అనియతో ధమ్మో మిచ్ఛత్తనియతస్స ధమ్మస్స విప్పయుత్తపచ్చయేన పచ్చయో. పురేజాతం – వత్థు మిచ్ఛత్తనియతానం ఖన్ధానం విప్పయుత్తపచ్చయేన పచ్చయో. (౨)

అనియతో ధమ్మో సమ్మత్తనియతస్స ధమ్మస్స విప్పయుత్తపచ్చయేన పచ్చయో. పురేజాతం – వత్థు సమ్మత్తనియతానం ఖన్ధానం విప్పయుత్తపచ్చయేన పచ్చయో. (౩)

అత్థిపచ్చయో

౫౬. మిచ్ఛత్తనియతో ధమ్మో మిచ్ఛత్తనియతస్స ధమ్మస్స అత్థిపచ్చయేన పచ్చయో – మిచ్ఛత్తనియతో ఏకో ఖన్ధో తిణ్ణన్నం ఖన్ధానం…పే… ద్వే ఖన్ధా ద్విన్నం ఖన్ధానం అత్థిపచ్చయేన పచ్చయో. (౧)

మిచ్ఛత్తనియతో ధమ్మో అనియతస్స ధమ్మస్స అత్థిపచ్చయేన పచ్చయో – సహజాతం, పచ్ఛాజాతం. సహజాతా – మిచ్ఛత్తనియతా ఖన్ధా చిత్తసముట్ఠానానం రూపానం అత్థిపచ్చయేన పచ్చయో. పచ్ఛాజాతా – మిచ్ఛత్తనియతా ఖన్ధా పురేజాతస్స ఇమస్స కాయస్స అత్థిపచ్చయేన పచ్చయో. (౨)

మిచ్ఛత్తనియతో ధమ్మో మిచ్ఛత్తనియతస్స చ అనియతస్స చ అత్థిపచ్చయేన పచ్చయో – మిచ్ఛత్తనియతో ఏకో ఖన్ధో తిణ్ణన్నం ఖన్ధానం చిత్తసముట్ఠానానఞ్చ రూపానం అత్థిపచ్చయేన పచ్చయో…పే… ద్వే ఖన్ధా…పే…. (౩)

సమ్మత్తనియతో ధమ్మో సమ్మత్తనియతస్స ధమ్మస్స అత్థిపచ్చయేన పచ్చయో…పే… (తిస్సో పఞ్హా).

అనియతో ధమ్మో అనియతస్స ధమ్మస్స అత్థిపచ్చయేన పచ్చయో – సహజాతం, పురేజాతం, పచ్ఛాజాతం, ఆహారం, ఇన్ద్రియం. సహజాతో – అనియతో ఏకో ఖన్ధో తిణ్ణన్నం ఖన్ధానం చిత్తసముట్ఠానానఞ్చ రూపానం అత్థిపచ్చయేన పచ్చయో…పే… ద్వే ఖన్ధా…పే… పటిసన్ధిక్ఖణే…పే… ఖన్ధా వత్థుస్స అత్థిపచ్చయేన పచ్చయో. వత్థు ఖన్ధానం అత్థిపచ్చయేన పచ్చయో. ఏకం మహాభూతం…పే… అసఞ్ఞసత్తానం ఏకం మహాభూతం…పే…. పురేజాతం – చక్ఖుం…పే… వత్థుం అనిచ్చతో దుక్ఖతో అనత్తతో విపస్సతి అస్సాదేతి అభినన్దతి, తం ఆరబ్భ రాగో ఉప్పజ్జతి…పే… దోమనస్సం ఉప్పజ్జతి. దిబ్బేన చక్ఖునా రూపం పస్సతి, దిబ్బాయ సోతధాతుయా సద్దం సుణాతి, రూపాయతనం చక్ఖువిఞ్ఞాణస్స…పే… ఫోట్ఠబ్బాయతనం కాయవిఞ్ఞాణస్స…పే… చక్ఖాయతనం చక్ఖువిఞ్ఞాణస్స…పే… కాయాయతనం కాయవిఞ్ఞాణస్స… వత్థు అనియతానం ఖన్ధానం అత్థిపచ్చయేన పచ్చయో. పచ్ఛాజాతా – అనియతా ఖన్ధా పురేజాతస్స ఇమస్స కాయస్స అత్థిపచ్చయేన పచ్చయో. కబళీకారో ఆహారో ఇమస్స కాయస్స అత్థిపచ్చయేన పచ్చయో. రూపజీవితిన్ద్రియం కటత్తారూపానం అత్థిపచ్చయేన పచ్చయో. (౧)

అనియతో ధమ్మో మిచ్ఛత్తనియతస్స ధమ్మస్స అత్థిపచ్చయేన పచ్చయో. పురేజాతం – రూపజీవితిన్ద్రియం మాతుఘాతికమ్మస్స…పే… రుహిరుప్పాదకమ్మస్స అత్థిపచ్చయేన పచ్చయో. వత్థు మిచ్ఛత్తనియతానం ఖన్ధానం అత్థిపచ్చయేన పచ్చయో. (౨)

అనియతో ధమ్మో సమ్మత్తనియతస్స ధమ్మస్స అత్థిపచ్చయేన పచ్చయో. పురేజాతం – వత్థు సమ్మత్తనియతానం ఖన్ధానం అత్థిపచ్చయేన పచ్చయో. (౩)

౫౭. మిచ్ఛత్తనియతో చ అనియతో చ ధమ్మా మిచ్ఛత్తనియతస్స ధమ్మస్స అత్థిపచ్చయేన పచ్చయో – సహజాతం, పురేజాతం. సహజాతో – మిచ్ఛత్తనియతో ఏకో ఖన్ధో చ వత్థు చ తిణ్ణన్నం ఖన్ధానం…పే… ద్వే ఖన్ధా చ…పే…. (౧)

మిచ్ఛత్తనియతో చ అనియతో చ ధమ్మా అనియతస్స ధమ్మస్స అత్థిపచ్చయేన పచ్చయో – సహజాతం, పచ్ఛాజాతం, ఆహారం, ఇన్ద్రియం. సహజాతా – మిచ్ఛత్తనియతా ఖన్ధా చ మహాభూతా చ చిత్తసముట్ఠానానం రూపానం అత్థిపచ్చయేన పచ్చయో. పచ్ఛాజాతా – మిచ్ఛత్తనియతా ఖన్ధా చ కబళీకారో ఆహారో చ ఇమస్స కాయస్స అత్థిపచ్చయేన పచ్చయో. పచ్ఛాజాతా – మిచ్ఛత్తనియతా ఖన్ధా చ రూపజీవితిన్ద్రియఞ్చ కటత్తారూపానం అత్థిపచ్చయేన పచ్చయో. (౨)

సమ్మత్తనియతో చ అనియతో చ ధమ్మా సమ్మత్తనియతస్స ధమ్మస్స అత్థిపచ్చయేన పచ్చయో…పే… (ద్వే పఞ్హా మిచ్ఛత్తనియతసదిసా).