౧౩. పరిత్తారమ్మణత్తికం
౧. పటిచ్చవారో
౧. పచ్చయానులోమం
౧. విభఙ్గవారో
హేతుపచ్చయో
౧. పరిత్తారమ్మణం ధమ్మం పటిచ్చ పరిత్తారమ్మణో ధమ్మో ఉప్పజ్జతి హేతుపచ్చయా – పరిత్తారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధా. పటిసన్ధిక్ఖణే పరిత్తారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధా. (౧)
మహగ్గతారమ్మణం ధమ్మం పటిచ్చ మహగ్గతారమ్మణో ధమ్మో ఉప్పజ్జతి హేతుపచ్చయా – మహగ్గతారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధా. పటిసన్ధిక్ఖణే మహగ్గతారమ్మణం…పే…. (౧)
అప్పమాణారమ్మణం ధమ్మం పటిచ్చ అప్పమాణారమ్మణో ధమ్మో ఉప్పజ్జతి హేతుపచ్చయా – అప్పమాణారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధా. (౧)
ఆరమ్మణపచ్చయాది
౨. పరిత్తారమ్మణం ధమ్మం పటిచ్చ పరిత్తారమ్మణో ధమ్మో ఉప్పజ్జతి ఆరమ్మణపచ్చయా… అధిపతిపచ్చయా (సంఖిత్తం)… అవిగతపచ్చయా.
౧. పచ్చయానులోమం
౨. సఙ్ఖ్యావారో
౩. హేతుయా తీణి, ఆరమ్మణే తీణి, అధిపతియా తీణి…పే… అవిగతే తీణి (ఏవం గణేతబ్బం).
అనులోమం.
౨. పచ్చయపచ్చనీయం
౧. విభఙ్గవారో
నహేతుపచ్చయో
౪. పరిత్తారమ్మణం ధమ్మం పటిచ్చ పరిత్తారమ్మణో ధమ్మో ఉప్పజ్జతి నహేతుపచ్చయా – అహేతుకం పరిత్తారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధా. అహేతుకపటిసన్ధిక్ఖణే పరిత్తారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధా, విచికిచ్ఛాసహగతే ఉద్ధచ్చసహగతే ఖన్ధే పటిచ్చ విచికిచ్ఛాసహగతో ఉద్ధచ్చసహగతో మోహో. (౧)
మహగ్గతారమ్మణం ధమ్మం పటిచ్చ మహగ్గతారమ్మణో ధమ్మో ఉప్పజ్జతి నహేతుపచ్చయా – అహేతుకం మహగ్గతారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధా, విచికిచ్ఛాసహగతే ఉద్ధచ్చసహగతే ఖన్ధే పటిచ్చ విచికిచ్ఛాసహగతో ఉద్ధచ్చసహగతో మోహో. (౧)
అప్పమాణారమ్మణం ధమ్మం పటిచ్చ అప్పమాణారమ్మణో ధమ్మో ఉప్పజ్జతి నహేతుపచ్చయా – అహేతుకం అప్పమాణారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధా. (౧)
నఅధిపతిపచ్చయో
౫. పరిత్తారమ్మణం ధమ్మం పటిచ్చ పరిత్తారమ్మణో ధమ్మో ఉప్పజ్జతి నఅధిపతిపచ్చయా – పరిత్తారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధా. పటిసన్ధిక్ఖణే…పే…. (౧)
మహగ్గతారమ్మణం ధమ్మం పటిచ్చ మహగ్గతారమ్మణో ధమ్మో ఉప్పజ్జతి నఅధిపతిపచ్చయా – మహగ్గతారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధా. పటిసన్ధిక్ఖణే…పే…. (౧)
అప్పమాణారమ్మణం ధమ్మం పటిచ్చ అప్పమాణారమ్మణో ధమ్మో ఉప్పజ్జతి నఅధిపతిపచ్చయా – అప్పమాణారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధా. (౧)
నపురేజాతపచ్చయాది
౬. పరిత్తారమ్మణం ధమ్మం పటిచ్చ పరిత్తారమ్మణో ధమ్మో ఉప్పజ్జతి నపురేజాతపచ్చయా – అరూపే పరిత్తారమ్మణం ఏకం ఖన్ధం పటిచ్చ తయో ఖన్ధా…పే… పటిసన్ధిక్ఖణే…పే…. (౧)
మహగ్గతారమ్మణం ధమ్మం పటిచ్చ మహగ్గతారమ్మణో ధమ్మో ఉప్పజ్జతి నపురేజాతపచ్చయా – అరూపే మహగ్గతారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధా (మహగ్గతారమ్మణే పటిసన్ధి నత్థి). (౧)
అప్పమాణారమ్మణం ధమ్మం పటిచ్చ అప్పమాణారమ్మణో ధమ్మో ఉప్పజ్జతి నపురేజాతపచ్చయా – అరూపే అప్పమాణారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధా (నపచ్ఛాజాతపచ్చయఞ్చ నఆసేవనపచ్చయఞ్చ నఅధిపతిసదిసం).
నకమ్మపచ్చయో
౭. పరిత్తారమ్మణం ధమ్మం పటిచ్చ పరిత్తారమ్మణో ధమ్మో ఉప్పజ్జతి నకమ్మపచ్చయా – పరిత్తారమ్మణే ఖన్ధే పటిచ్చ పరిత్తారమ్మణా చేతనా. (౧)
మహగ్గతారమ్మణం ధమ్మం పటిచ్చ మహగ్గతారమ్మణో ధమ్మో ఉప్పజ్జతి నకమ్మపచ్చయా – మహగ్గతారమ్మణే ఖన్ధే పటిచ్చ మహగ్గతారమ్మణా చేతనా. (౧)
అప్పమాణారమ్మణం ధమ్మం పటిచ్చ అప్పమాణారమ్మణో ధమ్మో ఉప్పజ్జతి నకమ్మపచ్చయా – అప్పమాణారమ్మణే ఖన్ధే పటిచ్చ అప్పమాణారమ్మణా చేతనా. (౧)
నవిపాకపచ్చయాది
౮. పరిత్తారమ్మణం ధమ్మం పటిచ్చ పరిత్తారమ్మణో ధమ్మో ఉప్పజ్జతి నవిపాకపచ్చయా (పటిసన్ధి నత్థి)… నఝానపచ్చయా – పఞ్చవిఞ్ఞాణసహగతం ఏకం ఖన్ధం పటిచ్చ తయో ఖన్ధా…పే… ద్వే ఖన్ధా…నమగ్గపచ్చయా – అహేతుకం పరిత్తారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధా; అహేతుకపటిసన్ధిక్ఖణే…పే… ద్వే ఖన్ధా…పే….
మహగ్గతారమ్మణం ధమ్మం పటిచ్చ మహగ్గతారమ్మణో ధమ్మో ఉప్పజ్జతి నమగ్గపచ్చయా – అహేతుకం మహగ్గతారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధా. (౧)
అప్పమాణారమ్మణం ధమ్మం పటిచ్చ అప్పమాణారమ్మణో ధమ్మో ఉప్పజ్జతి నమగ్గపచ్చయా – అహేతుకం అప్పమాణారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధా. (౧)
నవిప్పయుత్తపచ్చయో
౯. పరిత్తారమ్మణం ధమ్మం పటిచ్చ పరిత్తారమ్మణో ధమ్మో ఉప్పజ్జతి నవిప్పయుత్తపచ్చయా – అరూపే పరిత్తారమ్మణం ఏకం ఖన్ధం పటిచ్చ తయో ఖన్ధా…పే…. (౧)
మహగ్గతారమ్మణం ధమ్మం పటిచ్చ మహగ్గతారమ్మణో ధమ్మో ఉప్పజ్జతి నవిప్పయుత్తపచ్చయా – అరూపే మహగ్గతారమ్మణం ఏకం ఖన్ధం పటిచ్చ తయో ఖన్ధా…పే…. (౧)
అప్పమాణారమ్మణం ధమ్మం పటిచ్చ అప్పమాణారమ్మణో ధమ్మో ఉప్పజ్జతి నవిప్పయుత్తపచ్చయా – అరూపే అప్పమాణారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధా. (౧)
౨. పచ్చయపచ్చనీయం
౨. సఙ్ఖ్యావారో
౧౦. నహేతుయా తీణి, నఅధిపతియా తీణి…పే… నపురేజాతే తీణి, నపచ్ఛాజాతే తీణి, నఆసేవనే తీణి, నకమ్మే తీణి, నవిపాకే తీణి, నఝానే ఏకం, నమగ్గే తీణి, నవిప్పయుత్తే తీణి (ఏవం గణేతబ్బం).
పచ్చనీయం.
౩. పచ్చయానులోమపచ్చనీయం
౧౧. హేతుపచ్చయా నఅధిపతియా తీణి, నపురేజాతే తీణి, నపచ్ఛాజాతే తీణి, నఆసేవనే తీణి, నకమ్మే తీణి, నవిపాకే తీణి, నవిప్పయుత్తే తీణి (ఏవం గణేతబ్బం).
అనులోమపచ్చనీయం.
౪. పచ్చయపచ్చనీయానులోమం
నహేతుదుకం
౧౨. నహేతుపచ్చయా ఆరమ్మణే తీణి, అనన్తరే తీణి, సమనన్తరే తీణి, సహజాతే తీణి, అఞ్ఞమఞ్ఞే తీణి, నిస్సయే తీణి, ఉపనిస్సయే తీణి, పురేజాతే తీణి, ఆసేవనే ద్వే, కమ్మే తీణి, విపాకే ఏకం, ఆహారే తీణి, ఇన్ద్రియే తీణి, ఝానే తీణి, మగ్గే ద్వే, సమ్పయుత్తే తీణి, విప్పయుత్తే తీణి, అత్థియా తీణి, నత్థియా తీణి, విగతే తీణి, అవిగతే తీణి (ఏవం గణేతబ్బం).
పచ్చనీయానులోమం.
పటిచ్చవారో.
౨-౬. సహజాత-పచ్చయ-నిస్సయ-సంసట్ఠ-సమ్పయుత్తవారో
(సహజాతవారోపి పచ్చయవారోపి నిస్సయవారోపి సంసట్ఠవారోపి సమ్పయుత్తవారోపి పటిచ్చవారసదిసో).
౭. పఞ్హావారో
౧. పచ్చయానులోమం
౧. విభఙ్గవారో
హేతుపచ్చయో
౧౩. పరిత్తారమ్మణో ధమ్మో పరిత్తారమ్మణస్స ధమ్మస్స హేతుపచ్చయేన పచ్చయో – పరిత్తారమ్మణా హేతూ సమ్పయుత్తకానం ఖన్ధానం హేతుపచ్చయేన పచ్చయో. పటిసన్ధిక్ఖణే పరిత్తారమ్మణా హేతూ సమ్పయుత్తకానం ఖన్ధానం హేతుపచ్చయేన పచ్చయో. (౧)
మహగ్గతారమ్మణో ధమ్మో మహగ్గతారమ్మణస్స ధమ్మస్స హేతుపచ్చయేన పచ్చయో – మహగ్గతారమ్మణా హేతూ సమ్పయుత్తకానం ఖన్ధానం హేతుపచ్చయేన పచ్చయో. పటిసన్ధిక్ఖణే…పే…. (౧)
అప్పమాణారమ్మణో ధమ్మో అప్పమాణారమ్మణస్స ధమ్మస్స హేతుపచ్చయేన పచ్చయో – అప్పమాణారమ్మణా హేతూ సమ్పయుత్తకానం ఖన్ధానం హేతుపచ్చయేన పచ్చయో. (౧)
ఆరమ్మణపచ్చయో
౧౪. పరిత్తారమ్మణో ధమ్మో పరిత్తారమ్మణస్స ధమ్మస్స ఆరమ్మణపచ్చయేన పచ్చయో – దానం దత్వా సీలం సమాదియిత్వా ఉపోసథకమ్మం కత్వా తం పచ్చవేక్ఖతి, పుబ్బే సుచిణ్ణాని పచ్చవేక్ఖతి, అరియా పరిత్తారమ్మణే పహీనే కిలేసే పచ్చవేక్ఖన్తి, విక్ఖమ్భితే కిలేసే పచ్చవేక్ఖన్తి, పుబ్బే సముదాచిణ్ణే కిలేసే జానన్తి. పరిత్తారమ్మణే పరిత్తే ఖన్ధే అనిచ్చతో దుక్ఖతో అనత్తతో విపస్సతి, అస్సాదేతి అభినన్దతి, తం ఆరబ్భ పరిత్తారమ్మణో రాగో ఉప్పజ్జతి…పే… దోమనస్సం ఉప్పజ్జతి. చేతోపరియఞాణేన పరిత్తారమ్మణపరిత్తచిత్తసమఙ్గిస్స చిత్తం జానాతి. పరిత్తారమ్మణా పరిత్తా ఖన్ధా చేతోపరియఞాణస్స, పుబ్బేనివాసానుస్సతిఞాణస్స, యథాకమ్మూపగఞాణస్స, అనాగతంసఞాణస్స, ఆవజ్జనాయ ఆరమ్మణపచ్చయేన పచ్చయో. (౧)
పరిత్తారమ్మణో ధమ్మో మహగ్గతారమ్మణస్స ధమ్మస్స ఆరమ్మణపచ్చయేన పచ్చయో – దిబ్బం చక్ఖుం పచ్చవేక్ఖతి, దిబ్బం సోతధాతుం పచ్చవేక్ఖతి, పరిత్తారమ్మణం ఇద్ధివిధఞాణం పచ్చవేక్ఖతి, చేతోపరియఞాణం…పే… పుబ్బేనివాసానుస్సతిఞాణం…పే… యథాకమ్మూపగఞాణం…పే… అనాగతంసఞాణం పచ్చవేక్ఖతి. పరిత్తారమ్మణే మహగ్గతే ఖన్ధే అనిచ్చతో…పే… విపస్సతి, అస్సాదేతి అభినన్దతి, తం ఆరబ్భ మహగ్గతారమ్మణో రాగో ఉప్పజ్జతి…పే… దోమనస్సం ఉప్పజ్జతి. చేతోపరియఞాణేన పరిత్తారమ్మణమహగ్గతచిత్తసమఙ్గిస్స చిత్తం జానాతి. పరిత్తారమ్మణా మహగ్గతా ఖన్ధా చేతోపరియఞాణస్స, పుబ్బేనివాసానుస్సతిఞాణస్స, అనాగతంసఞాణస్స, ఆవజ్జనాయ ఆరమ్మణపచ్చయేన పచ్చయో. (౨)
౧౫. మహగ్గతారమ్మణో ధమ్మో మహగ్గతారమ్మణస్స ధమ్మస్స ఆరమ్మణపచ్చయేన పచ్చయో – విఞ్ఞాణఞ్చాయతనం పచ్చవేక్ఖతి, నేవసఞ్ఞానాసఞ్ఞాయతనం పచ్చవేక్ఖతి, మహగ్గతారమ్మణం ఇద్ధివిధఞాణం పచ్చవేక్ఖతి, చేతోపరియఞాణం…పే… పుబ్బేనివాసానుస్సతిఞాణం…పే… యథాకమ్మూపగఞాణం…పే… అనాగతంసఞాణం పచ్చవేక్ఖతి. మహగ్గతారమ్మణే మహగ్గతే ఖన్ధే అనిచ్చతో…పే… విపస్సతి, అస్సాదేతి అభినన్దతి, తం ఆరబ్భ మహగ్గతారమ్మణో రాగో ఉప్పజ్జతి…పే… దోమనస్సం ఉప్పజ్జతి. చేతోపరియఞాణేన మహగ్గతారమ్మణమహగ్గతచిత్తసమఙ్గిస్స చిత్తం జానాతి. మహగ్గతారమ్మణా మహగ్గతా ఖన్ధా చేతోపరియఞాణస్స, పుబ్బేనివాసానుస్సతిఞాణస్స, యథాకమ్మూపగఞాణస్స, అనాగతంసఞాణస్స, ఆవజ్జనాయ ఆరమ్మణపచ్చయేన పచ్చయో. (౧)
మహగ్గతారమ్మణో ధమ్మో పరిత్తారమ్మణస్స ధమ్మస్స ఆరమ్మణపచ్చయేన పచ్చయో – పఠమజ్ఝానపచ్చవేక్ఖణం పచ్చవేక్ఖతి…పే… నేవసఞ్ఞానాసఞ్ఞాయతనపచ్చవేక్ఖణం పచ్చవేక్ఖతి, దిబ్బచక్ఖుపచ్చవేక్ఖణం పచ్చవేక్ఖతి, దిబ్బసోతధాతుపచ్చవేక్ఖణం పచ్చవేక్ఖతి, ఇద్ధివిధఞాణపచ్చవేక్ఖణం…పే… చేతోపరియఞాణపచ్చవేక్ఖణం…పే… పుబ్బేనివాసానుస్సతిఞాణపచ్చవేక్ఖణం…పే… యథాకమ్మూపగఞాణపచ్చవేక్ఖణం…పే… అనాగతంసఞాణపచ్చవేక్ఖణం పచ్చవేక్ఖతి, అరియా మహగ్గతారమ్మణే పహీనే కిలేసే పచ్చవేక్ఖన్తి, విక్ఖమ్భితే కిలేసే పచ్చవేక్ఖన్తి, పుబ్బే సముదాచిణ్ణే కిలేసే జానన్తి. మహగ్గతారమ్మణే పరిత్తే ఖన్ధే అనిచ్చతో…పే… విపస్సతి, అస్సాదేతి అభినన్దతి, తం ఆరబ్భ పరిత్తారమ్మణో రాగో ఉప్పజ్జతి…పే… దోమనస్సం ఉప్పజ్జతి. చేతోపరియఞాణేన మహగ్గతారమ్మణపరిత్తచిత్తసమఙ్గిస్స చిత్తం జానాతి. మహగ్గతారమ్మణా పరిత్తా ఖన్ధా చేతోపరియఞాణస్స, పుబ్బేనివాసానుస్సతిఞాణస్స, యథాకమ్మూపగఞాణస్స, అనాగతంసఞాణస్స, ఆవజ్జనాయ ఆరమ్మణపచ్చయేన పచ్చయో. (౨)
౧౬. అప్పమాణారమ్మణో ధమ్మో అప్పమాణారమ్మణస్స ధమ్మస్స ఆరమ్మణపచ్చయేన పచ్చయో – అరియా మగ్గా వుట్ఠహిత్వా మగ్గం పచ్చవేక్ఖన్తి, ఫలం పచ్చవేక్ఖన్తి. చేతోపరియఞాణేన అప్పమాణారమ్మణఅప్పమాణచిత్తసమఙ్గిస్స చిత్తం జానాతి. అప్పమాణారమ్మణా అప్పమాణా ఖన్ధా చేతోపరియఞాణస్స, పుబ్బేనివాసానుస్సతిఞాణస్స, అనాగతంసఞాణస్స, ఆవజ్జనాయ ఆరమ్మణపచ్చయేన పచ్చయో. (౧)
అప్పమాణారమ్మణో ధమ్మో పరిత్తారమ్మణస్స ధమ్మస్స ఆరమ్మణపచ్చయేన పచ్చయో – అరియా గోత్రభుం పచ్చవేక్ఖన్తి, వోదానం పచ్చవేక్ఖన్తి, మగ్గపచ్చవేక్ఖణం పచ్చవేక్ఖన్తి, ఫలపచ్చవేక్ఖణం పచ్చవేక్ఖన్తి, నిబ్బానపచ్చవేక్ఖణం పచ్చవేక్ఖన్తి. అప్పమాణారమ్మణే పరిత్తే ఖన్ధే అనిచ్చతో…పే… విపస్సతి, చేతోపరియఞాణేన అప్పమాణారమ్మణపరిత్తచిత్తసమఙ్గిస్స చిత్తం జానాతి. అప్పమాణారమ్మణా పరిత్తా ఖన్ధా చేతోపరియఞాణస్స, పుబ్బేనివాసానుస్సతిఞాణస్స, యథాకమ్మూపగఞాణస్స, అనాగతంసఞాణస్స ఆవజ్జనాయ ఆరమ్మణపచ్చయేన పచ్చయో. (౨)
అప్పమాణారమ్మణో ధమ్మో మహగ్గతారమ్మణస్స ధమ్మస్స ఆరమ్మణపచ్చయేన పచ్చయో – అరియా అప్పమాణారమ్మణం చేతోపరియఞాణం పచ్చవేక్ఖన్తి, పుబ్బేనివాసానుస్సతిఞాణం పచ్చవేక్ఖన్తి, అనాగతంసఞాణం పచ్చవేక్ఖన్తి. చేతోపరియఞాణేన అప్పమాణారమ్మణమహగ్గతచిత్తసమఙ్గిస్స చిత్తం జానన్తి. అప్పమాణారమ్మణం మహగ్గతా ఖన్ధా చేతోపరియఞాణస్స, పుబ్బేనివాసానుస్సతిఞాణస్స, అనాగతంసఞాణస్స, ఆవజ్జనాయ ఆరమ్మణపచ్చయేన పచ్చయో. (౩)
అధిపతిపచ్చయో
౧౭. పరిత్తారమ్మణో ధమ్మో పరిత్తారమ్మణస్స ధమ్మస్స అధిపతిపచ్చయేన పచ్చయో – ఆరమ్మణాధిపతి, సహజాతాధిపతి. ఆరమ్మణాధిపతి – దానం దత్వా సీలం సమాదియిత్వా ఉపోసథకమ్మం కత్వా తం గరుం కత్వా పచ్చవేక్ఖతి, పుబ్బే సుచిణ్ణాని గరుం కత్వా పచ్చవేక్ఖతి, పరిత్తారమ్మణే పరిత్తే ఖన్ధే గరుం కత్వా అస్సాదేతి అభినన్దతి, తం గరుం కత్వా పరిత్తారమ్మణో రాగో ఉప్పజ్జతి, దిట్ఠి ఉప్పజ్జతి. సహజాతాధిపతి – పరిత్తారమ్మణాధిపతి సమ్పయుత్తకానం ఖన్ధానం అధిపతిపచ్చయేన పచ్చయో. (౧)
పరిత్తారమ్మణో ధమ్మో మహగ్గతారమ్మణస్స ధమ్మస్స అధిపతిపచ్చయేన పచ్చయో. ఆరమ్మణాధిపతి – దిబ్బం చక్ఖుం గరుం కత్వా పచ్చవేక్ఖతి, దిబ్బం సోతధాతుం…పే… పరిత్తారమ్మణం ఇద్ధివిధఞాణం…పే… చేతోపరియఞాణం…పే… పుబ్బేనివాసానుస్సతిఞాణం…పే… యథాకమ్మూపగఞాణం…పే… అనాగతంసఞాణం గరుం కత్వా పచ్చవేక్ఖతి. పరిత్తారమ్మణే మహగ్గతే ఖన్ధే గరుం కత్వా అస్సాదేతి అభినన్దతి, తం గరుం కత్వా మహగ్గతారమ్మణో రాగో ఉప్పజ్జతి, దిట్ఠి ఉప్పజ్జతి. (౨)
౧౮. మహగ్గతారమ్మణో ధమ్మో మహగ్గతారమ్మణస్స ధమ్మస్స అధిపతిపచ్చయేన పచ్చయో – ఆరమ్మణాధిపతి, సహజాతాధిపతి. ఆరమ్మణాధిపతి – విఞ్ఞాణఞ్చాయతనం గరుం కత్వా పచ్చవేక్ఖతి, నేవసఞ్ఞానాసఞ్ఞాయతనం…పే… మహగ్గతారమ్మణం ఇద్ధివిధఞాణం…పే… చేతోపరియఞాణం …పే… పుబ్బేనివాసానుస్సతిఞాణం…పే… యథాకమ్మూపగఞాణం…పే… అనాగతంసఞాణం గరుం కత్వా పచ్చవేక్ఖతి. మహగ్గతారమ్మణే మహగ్గతే ఖన్ధే గరుం కత్వా అస్సాదేతి అభినన్దతి, తం గరుం కత్వా మహగ్గతారమ్మణో రాగో ఉప్పజ్జతి, దిట్ఠి ఉప్పజ్జతి. సహజాతాధిపతి – మహగ్గతారమ్మణాధిపతి సమ్పయుత్తకానం ఖన్ధానం అధిపతిపచ్చయేన పచ్చయో. (౧)
మహగ్గతారమ్మణో ధమ్మో పరిత్తారమ్మణస్స ధమ్మస్స అధిపతిపచ్చయేన పచ్చయో. ఆరమ్మణాధిపతి – పఠమజ్ఝానపచ్చవేక్ఖణం గరుం కత్వా పచ్చవేక్ఖతి…పే… అనాగతంసఞాణపచ్చవేక్ఖణం గరుం కత్వా పచ్చవేక్ఖతి. మహగ్గతారమ్మణే పరిత్తే ఖన్ధే గరుం కత్వా అస్సాదేతి అభినన్దతి, తం గరుం కత్వా పరిత్తారమ్మణో రాగో ఉప్పజ్జతి, దిట్ఠి ఉప్పజ్జతి. (౨)
౧౯. అప్పమాణారమ్మణో ధమ్మో అప్పమాణారమ్మణస్స ధమ్మస్స అధిపతిపచ్చయేన పచ్చయో – ఆరమ్మణాధిపతి, సహజాతాధిపతి. ఆరమ్మణాధిపతి – అరియా మగ్గా వుట్ఠహిత్వా మగ్గం గరుం కత్వా పచ్చవేక్ఖన్తి, ఫలం గరుం కత్వా పచ్చవేక్ఖన్తి. సహజాతాధిపతి – అప్పమాణారమ్మణాధిపతి సమ్పయుత్తకానం ఖన్ధానం అధిపతిపచ్చయేన పచ్చయో. (౧)
అప్పమాణారమ్మణో ధమ్మో పరిత్తారమ్మణస్స ధమ్మస్స అధిపతిపచ్చయేన పచ్చయో. ఆరమ్మణాధిపతి – సేక్ఖా గోత్రభుం గరుం కత్వా పచ్చవేక్ఖన్తి, వోదానం గరుం కత్వా పచ్చవేక్ఖన్తి, మగ్గపచ్చవేక్ఖణం గరుం కత్వా పచ్చవేక్ఖన్తి, ఫలపచ్చవేక్ఖణం గరుం కత్వా పచ్చవేక్ఖన్తి, నిబ్బానపచ్చవేక్ఖణం గరుం కత్వా పచ్చవేక్ఖన్తి. (౨)
అప్పమాణారమ్మణో ధమ్మో మహగ్గతారమ్మణస్స ధమ్మస్స అధిపతిపచ్చయేన పచ్చయో. ఆరమ్మణాధిపతి – సేక్ఖా అప్పమాణారమ్మణం చేతోపరియఞాణం గరుం కత్వా పచ్చవేక్ఖన్తి. పుబ్బేనివాసానుస్సతిఞాణం…పే… అనాగతంసఞాణం గరుం కత్వా పచ్చవేక్ఖన్తి. (౩)
అనన్తరపచ్చయో
౨౦. పరిత్తారమ్మణో ధమ్మో పరిత్తారమ్మణస్స ధమ్మస్స అనన్తరపచ్చయేన పచ్చయో – పురిమా పురిమా పరిత్తారమ్మణా ఖన్ధా పచ్ఛిమానం పచ్ఛిమానం పరిత్తారమ్మణానం ఖన్ధానం అనన్తరపచ్చయేన పచ్చయో. (౧)
పరిత్తారమ్మణో ధమ్మో మహగ్గతారమ్మణస్స ధమ్మస్స అనన్తరపచ్చయేన పచ్చయో – పరిత్తారమ్మణం చుతిచిత్తం మహగ్గతారమ్మణస్స ఉపపత్తిచిత్తస్స అనన్తరపచ్చయేన పచ్చయో. పరిత్తారమ్మణం భవఙ్గం మహగ్గతారమ్మణాయ ఆవజ్జనాయ అనన్తరపచ్చయేన పచ్చయో. పరిత్తారమ్మణా ఖన్ధా మహగ్గతారమ్మణస్స వుట్ఠానస్స అనన్తరపచ్చయేన పచ్చయో. (౨)
పరిత్తారమ్మణో ధమ్మో అప్పమాణారమ్మణస్స ధమ్మస్స అనన్తరపచ్చయేన పచ్చయో – పరిత్తారమ్మణం భవఙ్గం అప్పమాణారమ్మణాయ ఆవజ్జనాయ అనన్తరపచ్చయేన పచ్చయో. పరిత్తారమ్మణం అనులోమం గోత్రభుస్స… అనులోమం వోదానస్స… అనులోమం ఫలసమాపత్తియా అనన్తరపచ్చయేన పచ్చయో. (౩)
౨౧. మహగ్గతారమ్మణో ధమ్మో మహగ్గతారమ్మణస్స ధమ్మస్స అనన్తరపచ్చయేన పచ్చయో – పురిమా పురిమా మహగ్గతారమ్మణా ఖన్ధా పచ్ఛిమానం పచ్ఛిమానం మహగ్గతారమ్మణానం ఖన్ధానం అనన్తరపచ్చయేన పచ్చయో. (౧)
మహగ్గతారమ్మణో ధమ్మో పరిత్తారమ్మణస్స ధమ్మస్స అనన్తరపచ్చయేన పచ్చయో – మహగ్గతారమ్మణం చుతిచిత్తం పరిత్తారమ్మణస్స ఉపపత్తిచిత్తస్స అనన్తరపచ్చయేన పచ్చయో. మహగ్గతారమ్మణం భవఙ్గం పరిత్తారమ్మణాయ ఆవజ్జనాయ అనన్తరపచ్చయేన పచ్చయో. మహగ్గతారమ్మణా ఖన్ధా పరిత్తారమ్మణస్స వుట్ఠానస్స అనన్తరపచ్చయేన పచ్చయో. (౨)
మహగ్గతారమ్మణో ధమ్మో అప్పమాణారమ్మణస్స ధమ్మస్స అనన్తరపచ్చయేన పచ్చయో – మహగ్గతారమ్మణం భవఙ్గం అప్పమాణారమ్మణాయ ఆవజ్జనాయ అనన్తరపచ్చయేన పచ్చయో. మహగ్గతారమ్మణం అనులోమం గోత్రభుస్స… అనులోమం వోదానస్స… అనులోమం ఫలసమాపత్తియా… నిరోధా వుట్ఠహన్తస్స నేవసఞ్ఞానాసఞ్ఞాయతనం ఫలసమాపత్తియా అనన్తరపచ్చయేన పచ్చయో. (౩)
౨౨. అప్పమాణారమ్మణో ధమ్మో అప్పమాణారమ్మణస్స ధమ్మస్స అనన్తరపచ్చయేన పచ్చయో – పురిమా పురిమా అప్పమాణారమ్మణా ఖన్ధా పచ్ఛిమానం పచ్ఛిమానం అప్పమాణారమ్మణానం ఖన్ధానం అనన్తరపచ్చయేన పచ్చయో. గోత్రభు మగ్గస్స… వోదానం మగ్గస్స… మగ్గో ఫలస్స… ఫలం ఫలస్స అనన్తరపచ్చయేన పచ్చయో. (౧)
అప్పమాణారమ్మణో ధమ్మో పరిత్తారమ్మణస్స ధమ్మస్స అనన్తరపచ్చయేన పచ్చయో – మగ్గపచ్చవేక్ఖణం పరిత్తారమ్మణస్స వుట్ఠానస్స… ఫలపచ్చవేక్ఖణం పరిత్తారమ్మణస్స వుట్ఠానస్స… నిబ్బానపచ్చవేక్ఖణం పరిత్తారమ్మణస్స వుట్ఠానస్స… అప్పమాణారమ్మణం చేతోపరియఞాణం పరిత్తారమ్మణస్స వుట్ఠానస్స… పుబ్బేనివాసానుస్సతిఞాణం పరిత్తారమ్మణస్స వుట్ఠానస్స… అనాగతంసఞాణం పరిత్తారమ్మణస్స వుట్ఠానస్స… ఫలం పరిత్తారమ్మణస్స వుట్ఠానస్స అనన్తరపచ్చయేన పచ్చయో. (౨)
అప్పమాణారమ్మణో ధమ్మో మహగ్గతారమ్మణస్స ధమ్మస్స అనన్తరపచ్చయేన పచ్చయో – మగ్గపచ్చవేక్ఖణం మహగ్గతారమ్మణస్స వుట్ఠానస్స… ఫలపచ్చవేక్ఖణం మహగ్గతారమ్మణస్స వుట్ఠానస్స… నిబ్బానపచ్చవేక్ఖణం మహగ్గతారమ్మణస్స వుట్ఠానస్స… ఫలం మహగ్గతారమ్మణస్స వుట్ఠానస్స అనన్తరపచ్చయేన పచ్చయో. (౩)
సమనన్తరపచ్చయో
౨౩. పరిత్తారమ్మణో ధమ్మో పరిత్తారమ్మణస్స ధమ్మస్స సమనన్తరపచ్చయేన పచ్చయో (అనన్తరసదిసం).
సహజాతపచ్చయాది
౨౪. పరిత్తారమ్మణో ధమ్మో పరిత్తారమ్మణస్స ధమ్మస్స సహజాతపచ్చయేన పచ్చయో… అఞ్ఞమఞ్ఞపచ్చయేన పచ్చయో… నిస్సయపచ్చయేన పచ్చయో… తీణి (పటిచ్చవారసదిసా కాతబ్బా).
ఉపనిస్సయపచ్చయో
౨౫. పరిత్తారమ్మణో ధమ్మో పరిత్తారమ్మణస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – పరిత్తారమ్మణం సద్ధం ఉపనిస్సాయ దానం దేతి, సీలం…పే… ఉపోసథకమ్మం…పే… పరిత్తారమ్మణం ఝానం ఉప్పాదేతి, విపస్సనం…పే… అభిఞ్ఞం…పే… సమాపత్తిం ఉప్పాదేతి, మానం జప్పేతి, దిట్ఠిం గణ్హాతి. పరిత్తారమ్మణం సీలం…పే… పఞ్ఞం… రాగం దోసం… మోహం… మానం… దిట్ఠిం… పత్థనం… కాయికం సుఖం… కాయికం దుక్ఖం ఉపనిస్సాయ దానం దేతి, సీలం…పే… ఉపోసథకమ్మం…పే… పరిత్తారమ్మణం ఝానం ఉప్పాదేతి, విపస్సనం…పే… అభిఞ్ఞం…పే… సమాపత్తిం ఉప్పాదేతి, పాణం హనతి…పే… సఙ్ఘం భిన్దతి. పరిత్తారమ్మణా సద్ధా…పే… పఞ్ఞా, రాగో…పే… పత్థనా, కాయికం సుఖం… కాయికం దుక్ఖం… పరిత్తారమ్మణాయ సద్ధాయ…పే… పఞ్ఞాయ రాగస్స…పే… పత్థనాయ, కాయికస్స సుఖస్స, కాయికస్స దుక్ఖస్స ఉపనిస్సయపచ్చయేన పచ్చయో. (౧)
పరిత్తారమ్మణో ధమ్మో మహగ్గతారమ్మణస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – పరిత్తారమ్మణం సద్ధం ఉపనిస్సాయ మహగ్గతారమ్మణం ఝానం ఉప్పాదేతి, విపస్సనం…పే… అభిఞ్ఞం…పే… సమాపత్తిం ఉప్పాదేతి, మానం జప్పేతి, దిట్ఠిం గణ్హాతి. పరిత్తారమ్మణం సీలం…పే… పఞ్ఞం… రాగం…పే… పత్థనం… కాయికం సుఖం, కాయికం దుక్ఖం ఉపనిస్సాయ మహగ్గతారమ్మణం ఝానం ఉప్పాదేతి, విపస్సనం…పే… అభిఞ్ఞం…పే… సమాపత్తిం ఉప్పాదేతి, మానం జప్పేతి, దిట్ఠిం గణ్హాతి. పరిత్తారమ్మణా సద్ధా…పే… కాయికం సుఖం, కాయికం దుక్ఖం, మహగ్గతారమ్మణాయ సద్ధాయ…పే… పఞ్ఞాయ రాగస్స…పే… పత్థనాయ ఉపనిస్సయపచ్చయేన పచ్చయో. (౨)
పరిత్తారమ్మణో ధమ్మో అప్పమాణారమ్మణస్స ధమ్మస్స ఉపనిస్సయపచ్చయేన పచ్చయో – అనన్తరూపనిస్సయో, పకతూపనిస్సయో…పే…. పకతూపనిస్సయో – పరిత్తారమ్మణం సద్ధం ఉపనిస్సాయ అప్పమాణారమ్మణం ఝానం ఉప్పాదేతి, మగ్గం…పే… అభిఞ్ఞం…పే… సమాపత్తిం ఉప్పాదేతి. పరిత్తారమ్మణం సీలం…పే… పఞ్ఞం, రాగం…పే… కాయికం సుఖం, కాయికం దుక్ఖం ఉపనిస్సాయ అప్పమాణారమ్మణం ఝానం ఉప్పాదేతి, మగ్గం… అభిఞ్ఞం… సమాపత్తిం ఉప్పాదేతి. పరిత్తారమ్మణా సద్ధా…పే… కాయికం సుఖం, కాయికం దుక్ఖం అప్పమాణారమ్మణాయ సద్ధాయ…పే… పఞ్ఞాయ ఉపనిస్సయపచ్చయేన పచ్చయో. (౩)
౨౬. మహగ్గతారమ్మణో ధమ్మో మహగ్గతారమ్మణస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – మహగ్గతారమ్మణం సద్ధం ఉపనిస్సాయ మహగ్గతారమ్మణం ఝానం ఉప్పాదేతి, విపస్సనం… అభిఞ్ఞం… సమాపత్తిం ఉప్పాదేతి, మానం జప్పేతి, దిట్ఠిం గణ్హాతి. మహగ్గతారమ్మణం సీలం…పే… పఞ్ఞం, రాగం…పే… పత్థనం ఉపనిస్సాయ మహగ్గతారమ్మణం ఝానం ఉప్పాదేతి…పే… దిట్ఠిం గణ్హాతి. మహగ్గతారమ్మణా సద్ధా…పే… పఞ్ఞా, రాగో…పే… పత్థనా మహగ్గతారమ్మణాయ సద్ధాయ…పే… పత్థనాయ ఉపనిస్సయపచ్చయేన పచ్చయో. (౧)
మహగ్గతారమ్మణో ధమ్మో పరిత్తారమ్మణస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – మహగ్గతారమ్మణం సద్ధం ఉపనిస్సాయ దానం దేతి, సీలం సమాదియతి, ఉపోసథకమ్మం కరోతి, పరిత్తారమ్మణం ఝానం ఉప్పాదేతి, విపస్సనం… అభిఞ్ఞం… సమాపత్తిం ఉప్పాదేతి, మానం జప్పేతి, దిట్ఠిం గణ్హాతి. మహగ్గతారమ్మణం సీలం…పే… పత్థనం ఉపనిస్సాయ దానం దేతి…పే… దిట్ఠిం గణ్హాతి. మహగ్గతారమ్మణా సద్ధా…పే… పత్థనా పరిత్తారమ్మణాయ సద్ధాయ…పే… పత్థనాయ కాయికస్స సుఖస్స, కాయికస్స దుక్ఖస్స ఉపనిస్సయపచ్చయేన పచ్చయో. (౨)
మహగ్గతారమ్మణో ధమ్మో అప్పమాణారమ్మణస్స ధమ్మస్స ఉపనిస్సయపచ్చయేన పచ్చయో – అనన్తరూపనిస్సయో, పకతూపనిస్సయో…పే…. పకతూపనిస్సయో – మహగ్గతారమ్మణం సద్ధం ఉపనిస్సాయ అప్పమాణారమ్మణం ఝానం ఉప్పాదేతి, మగ్గం… అభిఞ్ఞం… సమాపత్తిం ఉప్పాదేతి. మహగ్గతారమ్మణం సీలం…పే… పత్థనం ఉపనిస్సాయ అప్పమాణారమ్మణం ఝానం ఉప్పాదేతి…పే… సమాపత్తిం ఉప్పాదేతి. మహగ్గతారమ్మణా సద్ధా…పే… పత్థనా అప్పమాణారమ్మణాయ సద్ధాయ…పే… పఞ్ఞాయ ఉపనిస్సయపచ్చయేన పచ్చయో (౩)
౨౭. అప్పమాణారమ్మణో ధమ్మో అప్పమాణారమ్మణస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – అప్పమాణారమ్మణం సద్ధం ఉపనిస్సాయ అప్పమాణారమ్మణం ఝానం ఉప్పాదేతి, మగ్గం… అభిఞ్ఞం… సమాపత్తిం ఉప్పాదేతి. అప్పమాణారమ్మణం సీలం…పే… పఞ్ఞం ఉపనిస్సాయ అప్పమాణారమ్మణం ఝానం ఉప్పాదేతి. మగ్గం…పే… అభిఞ్ఞం…పే… సమాపత్తిం ఉప్పాదేతి అప్పమాణారమ్మణా సద్ధా…పే… పఞ్ఞా అప్పమాణారమ్మణాయ సద్ధాయ…పే… పఞ్ఞాయ మగ్గస్స ఫలసమాపత్తియా ఉపనిస్సయపచ్చయేన పచ్చయో. (౧)
అప్పమాణారమ్మణో ధమ్మో పరిత్తారమ్మణస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – అప్పమాణారమ్మణం సద్ధం ఉపనిస్సాయ దానం దేతి, సీలం సమాదియతి, ఉపోసథకమ్మం కరోతి, పరిత్తారమ్మణం ఝానం ఉప్పాదేతి, విపస్సనం… అభిఞ్ఞం… సమాపత్తిం ఉప్పాదేతి. అప్పమాణారమ్మణం సీలం…పే… పఞ్ఞం ఉపనిస్సాయ దానం దేతి…పే… సమాపత్తిం ఉప్పాదేతి. అప్పమాణారమ్మణా సద్ధా…పే… పఞ్ఞా పరిత్తారమ్మణాయ సద్ధాయ…పే… పఞ్ఞాయ కాయికస్స సుఖస్స, కాయికస్స దుక్ఖస్స ఉపనిస్సయపచ్చయేన పచ్చయో. (౨)
అప్పమాణారమ్మణో ధమ్మో మహగ్గతారమ్మణస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – అప్పమాణారమ్మణం సద్ధం ఉపనిస్సాయ మహగ్గతారమ్మణం ఝానం ఉప్పాదేతి, విపస్సనం… అభిఞ్ఞం… సమాపత్తిం ఉప్పాదేతి. అప్పమాణారమ్మణం సీలం…పే… పఞ్ఞం ఉపనిస్సాయ మహగ్గతారమ్మణం ఝానం ఉప్పాదేతి, విపస్సనం… అభిఞ్ఞం… సమాపత్తిం ఉప్పాదేతి. అప్పమాణారమ్మణా సద్ధా…పే… పఞ్ఞా మహగ్గతారమ్మణాయ సద్ధాయ…పే… పఞ్ఞాయ ఉపనిస్సయపచ్చయేన పచ్చయో. (౩)
ఆసేవనపచ్చయో
౨౮. పరిత్తారమ్మణో ధమ్మో పరిత్తారమ్మణస్స ధమ్మస్స ఆసేవనపచ్చయేన పచ్చయో – పురిమా పురిమా పరిత్తారమ్మణా ఖన్ధా పచ్ఛిమానం పచ్ఛిమానం పరిత్తారమ్మణానం ఖన్ధానం ఆసేవనపచ్చయేన పచ్చయో. (౧)
పరిత్తారమ్మణో ధమ్మో అప్పమాణారమ్మణస్స ధమ్మస్స ఆసేవనపచ్చయేన పచ్చయో – పరిత్తారమ్మణం అనులోమం గోత్రభుస్స… అనులోమం వోదానస్స ఆసేవనపచ్చయేన పచ్చయో. (౨)
౨౯. మహగ్గతారమ్మణో ధమ్మో మహగ్గతారమ్మణస్స ధమ్మస్స ఆసేవనపచ్చయేన పచ్చయో – పురిమా పురిమా మహగ్గతారమ్మణా ఖన్ధా పచ్ఛిమానం పచ్ఛిమానం మహగ్గతారమ్మణానం ఖన్ధానం ఆసేవనపచ్చయేన పచ్చయో. (౧)
మహగ్గతారమ్మణో ధమ్మో అప్పమాణారమ్మణస్స ధమ్మస్స ఆసేవనపచ్చయేన పచ్చయో – మహగ్గతారమ్మణం అనులోమం గోత్రభుస్స… అనులోమం వోదానస్స ఆసేవనపచ్చయేన పచ్చయో. (౨)
౩౦. అప్పమాణారమ్మణో ధమ్మో అప్పమాణారమ్మణస్స ధమ్మస్స ఆసేవనపచ్చయేన పచ్చయో – పురిమా పురిమా అప్పమాణారమ్మణా ఖన్ధా పచ్ఛిమానం పచ్ఛిమానం అప్పమాణారమ్మణానం ఖన్ధానం ఆసేవనపచ్చయేన పచ్చయో. గోత్రభు మగ్గస్స… వోదానం మగ్గస్స ఆసేవనపచ్చయేన పచ్చయో. (౧)
కమ్మపచ్చయో
౩౧. పరిత్తారమ్మణో ధమ్మో పరిత్తారమ్మణస్స ధమ్మస్స కమ్మపచ్చయేన పచ్చయో – సహజాతా, నానాక్ఖణికా. సహజాతా – పరిత్తారమ్మణా చేతనా సమ్పయుత్తకానం ఖన్ధానం కమ్మపచ్చయేన పచ్చయో. పటిసన్ధిక్ఖణే…పే…. నానాక్ఖణికా – పరిత్తారమ్మణా చేతనా విపాకానం పరిత్తారమ్మణానం ఖన్ధానం కమ్మపచ్చయేన పచ్చయో. (౧)
మహగ్గతారమ్మణో ధమ్మో మహగ్గతారమ్మణస్స ధమ్మస్స కమ్మపచ్చయేన పచ్చయో – సహజాతా, నానాక్ఖణికా. సహజాతా – మహగ్గతారమ్మణా చేతనా సమ్పయుత్తకానం ఖన్ధానం కమ్మపచ్చయేన పచ్చయో. పటిసన్ధిక్ఖణే…పే…. నానాక్ఖణికా – మహగ్గతారమ్మణా చేతనా విపాకానం మహగ్గతారమ్మణానం ఖన్ధానం కమ్మపచ్చయేన పచ్చయో. (౧)
మహగ్గతారమ్మణో ధమ్మో పరిత్తారమ్మణస్స ధమ్మస్స కమ్మపచ్చయేన పచ్చయో. నానాక్ఖణికా – మహగ్గతారమ్మణా చేతనా విపాకానం పరిత్తారమ్మణానం ఖన్ధానం కమ్మపచ్చయేన పచ్చయో. (౨)
౩౨. అప్పమాణారమ్మణో ధమ్మో అప్పమాణారమ్మణస్స ధమ్మస్స కమ్మపచ్చయేన పచ్చయో – సహజాతా, నానాక్ఖణికా. సహజాతా – అప్పమాణారమ్మణా చేతనా సమ్పయుత్తకానం ఖన్ధానం కమ్మపచ్చయేన పచ్చయో. నానాక్ఖణికా – అప్పమాణారమ్మణా చేతనా విపాకానం అప్పమాణారమ్మణానం ఖన్ధానం కమ్మపచ్చయేన పచ్చయో. (౧)
అప్పమాణారమ్మణో ధమ్మో పరిత్తారమ్మణస్స ధమ్మస్స కమ్మపచ్చయేన పచ్చయో. నానాక్ఖణికా – అప్పమాణారమ్మణా చేతనా విపాకానం పరిత్తారమ్మణానం ఖన్ధానం కమ్మపచ్చయేన పచ్చయో. (౨)
విపాకపచ్చయాది
౩౩. పరిత్తారమ్మణో ధమ్మో పరిత్తారమ్మణస్స ధమ్మస్స విపాకపచ్చయేన పచ్చయో… ఆహారపచ్చయేన పచ్చయో… ఇన్ద్రియపచ్చయేన పచ్చయో… ఝానపచ్చయేన పచ్చయో… మగ్గపచ్చయేన పచ్చయో… సమ్పయుత్తపచ్చయేన పచ్చయ… అత్థిపచ్చయేన పచ్చయో… నత్థిపచ్చయేన పచ్చయో… విగతపచ్చయేన పచ్చయ… అవిగతపచ్చయేన పచ్చయో.
౧. పచ్చయానులోమం
౨. సఙ్ఖ్యావారో
౩౪. హేతుయా తీణి, ఆరమ్మణే సత్త, అధిపతియా సత్త, అనన్తరే నవ, సమనన్తరే నవ, సహజాతే తీణి, అఞ్ఞమఞ్ఞే తీణి, నిస్సయే తీణి, ఉపనిస్సయే నవ, ఆసేవనే పఞ్చ, కమ్మే పఞ్చ, విపాకే తీణి, ఆహారే తీణి, ఇన్ద్రియే ఝానే మగ్గే సమ్పయుత్తే అత్థియా తీణి, నత్థియా నవ, విగతే నవ, అవిగతే తీణి (ఏవం గణేతబ్బం).
అనులోమం.
పచ్చనీయుద్ధారో
౩౫. పరిత్తారమ్మణో ధమ్మో పరిత్తారమ్మణస్స ధమ్మస్స ఆరమ్మణపచ్చయేన పచ్చయో… సహజాతపచ్చయేన పచ్చయో… ఉపనిస్సయపచ్చయేన పచ్చయో… కమ్మపచ్చయేన పచ్చయో. (౧)
పరిత్తారమ్మణో ధమ్మో మహగ్గతారమ్మణస్స ధమ్మస్స ఆరమ్మణపచ్చయేన పచ్చయో… ఉపనిస్సయపచ్చయేన పచ్చయో. (౨)
పరిత్తారమ్మణో ధమ్మో అప్పమాణారమ్మణస్స ధమ్మస్స ఉపనిస్సయపచ్చయేన పచ్చయో. (౩)
౩౬. మహగ్గతారమ్మణో ధమ్మో మహగ్గతారమ్మణస్స ధమ్మస్స ఆరమ్మణపచ్చయేన పచ్చయో… సహజాతపచ్చయేన పచ్చయో… ఉపనిస్సయపచ్చయేన పచ్చయో. (౧)
మహగ్గతారమ్మణో ధమ్మో పరిత్తారమ్మణస్స ధమ్మస్స ఆరమ్మణపచ్చయేన పచ్చయో… ఉపనిస్సయపచ్చయేన పచ్చయో… కమ్మపచ్చయేన పచ్చయో. (౨)
మహగ్గతారమ్మణో ధమ్మో అప్పమాణారమ్మణస్స ధమ్మస్స ఉపనిస్సయపచ్చయేన పచ్చయో. (౩)
౩౭. అప్పమాణారమ్మణో ధమ్మో అప్పమాణారమ్మణస్స ధమ్మస్స ఆరమ్మణపచ్చయేన పచ్చయో… సహజాతపచ్చయేన పచ్చయో… ఉపనిస్సయపచ్చయేన పచ్చయో. (౧)
అప్పమాణారమ్మణో ధమ్మో పరిత్తారమ్మణస్స ధమ్మస్స ఆరమ్మణపచ్చయేన పచ్చయో… ఉపనిస్సయపచ్చయేన పచ్చయో… కమ్మపచ్చయేన పచ్చయో. (౨)
అప్పమాణారమ్మణో ధమ్మో మహగ్గతారమ్మణస్స ధమ్మస్స ఆరమ్మణపచ్చయేన పచ్చయో… ఉపనిస్సయపచ్చయేన పచ్చయో. (౩)
౨. పచ్చయపచ్చనీయం
౨. సఙ్ఖ్యావారో
౩౮. నహేతుయా నవ, నఆరమ్మణే నవ, నఅధిపతియా నవ, నఅనన్తరే నవ, నసమనన్తరే నవ, నసహజాతే నవ, నఅఞ్ఞమఞ్ఞే నవ, ననిస్సయే నవ, నఉపనిస్సయే సత్త, నపురేజాతే నవ, నపచ్ఛాజాతే నవ, నఆసేవనే నవ…పే… నమగ్గే నవ, నసమ్పయుత్తే నవ, నవిప్పయుత్తే నవ, నోఅత్థియా నవ, నోనత్థియా నవ, నోవిగతే నవ, నోఅవిగతే నవ (ఏవం గణేతబ్బం).
పచ్చనీయం.
౩. పచ్చయానులోమపచ్చనీయం
నహేతుదుకం
౩౯. హేతుపచ్చయా నఆరమ్మణే తీణి, నఅధిపతియా నఅనన్తరే నసమనన్తరే నఉపనిస్సయే నపురేజాతే నపచ్ఛాజాతే నఆసేవనే తీణి…పే… నమగ్గే నవిప్పయుత్తే నోనత్థియా నోవిగతే తీణి (ఏవం గణేతబ్బం).
అనులోమపచ్చనీయం.
౪. పచ్చయపచ్చనీయానులోమం
హేతుదుకం
౪౦. నహేతుపచ్చయా ఆరమ్మణే సత్త, అధిపతియా సత్త, అనన్తరే నవ, సమనన్తరే నవ, సహజాతే తీణి, అఞ్ఞమఞ్ఞే తీణి, నిస్సయే తీణి, ఉపనిస్సయే నవ, ఆసేవనే పఞ్చ, కమ్మే పఞ్చ, విపాకే తీణి…పే… సమ్పయుత్తే తీణి, అత్థియా తీణి, నత్థియా నవ, విగతే నవ, అవిగతే తీణి (ఏవం గణేతబ్బం).
పచ్చనీయానులోమం.
పఞ్హావారో.
పరిత్తారమ్మణత్తికం నిట్ఠితం.