౧. విభఙ్గవారో
హేతుపచ్చయో
౪౫. ఆచయగామీ [ఆచయగామి (సీ. స్యా.) ఏవముపరిపి] ధమ్మో ఆచయగామిస్స ధమ్మస్స హేతుపచ్చయేన పచ్చయో – ఆచయగామీ హేతూ సమ్పయుత్తకానం ఖన్ధానం హేతుపచ్చయేన పచ్చయో. (౧)
ఆచయగామీ ధమ్మో నేవాచయగామినాపచయగామిస్స ధమ్మస్స హేతుపచ్చయేన పచ్చయో – ఆచయగామీ హేతూ చిత్తసముట్ఠానానం రూపానం హేతుపచ్చయేన పచ్చయో. (౨)
ఆచయగామీ ధమ్మో ఆచయగామిస్స చ నేవాచయగామినాపచయగామిస్స చ ధమ్మస్స హేతుపచ్చయేన పచ్చయో – ఆచయగామీ హేతూ సమ్పయుత్తకానం ఖన్ధానం చిత్తసముట్ఠానానఞ్చ రూపానం హేతుపచ్చయేన పచ్చయో. (౩)
అపచయగామీ ధమ్మో అపచయగామిస్స ధమ్మస్స హేతుపచ్చయేన పచ్చయో… తీణి.
నేవాచయగామినాపచయగామీ ధమ్మో నేవాచయగామినాపచయగామిస్స ధమ్మస్స హేతుపచ్చయేన పచ్చయో – నేవాచయగామినాపచయగామీ హేతూ సమ్పయుత్తకానం ఖన్ధానం చిత్తసముట్ఠానానఞ్చ రూపానం హేతుపచ్చయేన పచ్చయో. పటిసన్ధిక్ఖణే నేవాచయగామినాపచయగామీ హేతూ సమ్పయుత్తకానం ఖన్ధానం కటత్తా చ రూపానం హేతుపచ్చయేన పచ్చయో. (౧)
ఆరమ్మణపచ్చయో
౪౬. ఆచయగామీ ధమ్మో ఆచయగామిస్స ధమ్మస్స ఆరమ్మణపచ్చయేన పచ్చయో – దానం దత్వా సీలం సమాదియిత్వా ఉపోసథకమ్మం కత్వా తం పచ్చవేక్ఖతి, పుబ్బే సుచిణ్ణాని పచ్చవేక్ఖతి, ఝానా వుట్ఠహిత్వా ఝానం పచ్చవేక్ఖతి. సేక్ఖా పహీనే కిలేసే పచ్చవేక్ఖన్తి, విక్ఖమ్భితే కిలేసే పచ్చవేక్ఖన్తి, పుబ్బే సముదాచిణ్ణే కిలేసే జానన్తి. సేక్ఖా వా పుథుజ్జనా వా ఆచయగామీ ఖన్ధే అనిచ్చతో దుక్ఖతో అనత్తతో విపస్సన్తి, అస్సాదేన్తి అభినన్దన్తి, తం ఆరబ్భ రాగో ఉప్పజ్జతి, దిట్ఠి…పే… విచికిచ్ఛా…పే… ఉద్ధచ్చం…పే… దోమనస్సం ఉప్పజ్జతి, చేతోపరియఞాణేన ఆచయగామిచిత్తసమఙ్గిస్స చిత్తం జానన్తి, ఆకాసానఞ్చాయతనకుసలం విఞ్ఞాణఞ్చాయతనకుసలస్స ఆరమ్మణపచ్చయేన పచ్చయో. ఆకిఞ్చఞ్ఞాయతనకుసలం నేవసఞ్ఞానాసఞ్ఞాయతనకుసలస్స…పే… ఆచయగామీ ఖన్ధా ఇద్ధివిధఞాణస్స, చేతోపరియఞాణస్స, పుబ్బేనివాసానుస్సతిఞాణస్స, యథాకమ్మూపగఞాణస్స, అనాగతంసఞాణస్స ఆరమ్మణపచ్చయేన పచ్చయో. (౧)
ఆచయగామీ ధమ్మో నేవాచయగామినాపచయగామిస్స ధమ్మస్స ఆరమ్మణపచ్చయేన పచ్చయో – అరహా పహీనే కిలేసే పచ్చవేక్ఖతి, పుబ్బే సముదాచిణ్ణే కిలేసే జానాతి, ఆచయగామీ ఖన్ధే అనిచ్చతో దుక్ఖతో అనత్తతో విపస్సతి; చేతోపరియఞాణేన ఆచయగామిచిత్తసమఙ్గిస్స చిత్తం జానాతి. సేక్ఖా వా పుథుజ్జనా వా ఆచయగామీ ఖన్ధే అనిచ్చతో దుక్ఖతో అనత్తతో విపస్సన్తి, కుసలే నిరుద్ధే విపాకో తదారమ్మణతా ఉప్పజ్జతి, ఆచయగామీ ఖన్ధే అస్సాదేతి అభినన్దతి, తం ఆరబ్భ రాగో ఉప్పజ్జతి…పే… దోమనస్సం ఉప్పజ్జతి, అకుసలే నిరుద్ధే విపాకో తదారమ్మణతా ఉప్పజ్జతి, ఆకాసానఞ్చాయతనకుసలం విఞ్ఞాణఞ్చాయతనవిపాకస్స చ కిరియస్స చ ఆరమ్మణపచ్చయేన పచ్చయో. ఆకిఞ్చఞ్ఞాయతనకుసలం నేవసఞ్ఞానాసఞ్ఞాయతనవిపాకస్స చ కిరియస్స చ ఆరమ్మణపచ్చయేన పచ్చయో. ఆచయగామీ ఖన్ధా చేతోపరియఞాణస్స, పుబ్బేనివాసానుస్సతిఞాణస్స, యథాకమ్మూపగఞాణస్స, అనాగతంసఞాణస్స, ఆవజ్జనాయ ఆరమ్మణపచ్చయేన పచ్చయో. (౨)
౪౭. అపచయగామీ ధమ్మో ఆచయగామిస్స ధమ్మస్స ఆరమ్మణపచ్చయేన పచ్చయో – సేక్ఖా మగ్గా వుట్ఠహిత్వా మగ్గం పచ్చవేక్ఖన్తి, చేతోపరియఞాణేన అపచయగామిచిత్తసమఙ్గిస్స చిత్తం జానన్తి, అపచయగామీ ఖన్ధా చేతోపరియఞాణస్స, పుబ్బేనివాసానుస్సతిఞాణస్స, అనాగతంసఞాణస్స, ఆరమ్మణపచ్చయేన పచ్చయో. (౧)
అపచయగామీ ధమ్మో నేవాచయగామినాపచయగామిస్స ధమ్మస్స ఆరమ్మణపచ్చయేన పచ్చయో – అరహా మగ్గా వుట్ఠహిత్వా మగ్గం పచ్చవేక్ఖతి, చేతోపరియఞాణేన అపచయగామిచిత్తసమఙ్గిస్స చిత్తం జానాతి, అపచయగామీ ఖన్ధా చేతోపరియఞాణస్స, పుబ్బేనివాసానుస్సతిఞాణస్స, అనాగతంసఞాణస్స, ఆవజ్జనాయ ఆరమ్మణపచ్చయేన పచ్చయో. (౨)
౪౮. నేవాచయగామినాపచయగామీ ధమ్మో నేవాచయగామినాపచయగామిస్స ధమ్మస్స ఆరమ్మణపచ్చయేన పచ్చయో – అరహా ఫలం పచ్చవేక్ఖతి, నిబ్బానం పచ్చవేక్ఖతి, నిబ్బానం ఫలస్స ఆవజ్జనాయ ఆరమ్మణపచ్చయేన పచ్చయో. అరహా చక్ఖుం అనిచ్చతో దుక్ఖతో అనత్తతో విపస్సతి, సోతం…పే… వత్థుం… నేవాచయగామినాపచయగామీ ఖన్ధే అనిచ్చతో దుక్ఖతో అనత్తతో విపస్సతి, దిబ్బేన చక్ఖునా రూపం పస్సతి, దిబ్బాయ సోతధాతుయా సద్దం సుణాతి, చేతోపరియఞాణేన నేవాచయగామినాపచయగామిచిత్తసమఙ్గిస్స చిత్తం జానాతి, ఆకాసానఞ్చాయతనకిరియం విఞ్ఞాణఞ్చాయతనకిరియస్స ఆరమ్మణపచ్చయేన పచ్చయో. ఆకిఞ్చఞ్ఞాయతనకిరియం నేవసఞ్ఞానాసఞ్ఞాయతనకిరియస్స…పే… రూపాయతనం చక్ఖువిఞ్ఞాణస్స…పే… ఫోట్ఠబ్బాయతనం కాయవిఞ్ఞాణస్స…పే… నేవాచయగామినాపచయగామీ ఖన్ధా ఇద్ధివిధఞాణస్స, చేతోపరియఞాణస్స, పుబ్బేనివాసానుస్సతిఞాణస్స, అనాగతంసఞాణస్స ఆవజ్జనాయ ఆరమ్మణపచ్చయేన పచ్చయో. (౧)
నేవాచయగామినాపచయగామీ ధమ్మో ఆచయగామిస్స ధమ్మస్స ఆరమ్మణపచ్చయేన పచ్చయో – సేక్ఖా ఫలం పచ్చవేక్ఖన్తి, నిబ్బానం పచ్చవేక్ఖన్తి, నిబ్బానం గోత్రభుస్స, వోదానస్స ఆరమ్మణపచ్చయేన పచ్చయో. సేక్ఖా వా పుథుజ్జనా వా చక్ఖుం అనిచ్చతో దుక్ఖతో అనత్తతో విపస్సన్తి, అస్సాదేన్తి అభినన్దన్తి; తం ఆరబ్భ రాగో ఉప్పజ్జతి…పే… దోమనస్సం ఉప్పజ్జతి. సోతం…పే… వత్థుం… నేవాచయగామినాపచయగామీ ఖన్ధే అనిచ్చతో దుక్ఖతో అనత్తతో విపస్సన్తి, అస్సాదేన్తి అభినన్దన్తి; తం ఆరబ్భ రాగో ఉప్పజ్జతి, దిట్ఠి ఉప్పజ్జతి, విచికిచ్ఛా…పే… ఉద్ధచ్చం…పే… దోమనస్సం…పే… దిబ్బేన చక్ఖునా రూపం పస్సన్తి, దిబ్బాయ సోతధాతుయా సద్దం సుణన్తి, చేతోపరియఞాణేన నేవాచయగామినాపచయగామిచిత్తసమఙ్గిస్స చిత్తం జానన్తి, నేవాచయగామినాపచయగామీ ఖన్ధా ఇద్ధివిధఞాణస్స, చేతోపరియఞాణస్స, పుబ్బేనివాసానుస్సతిఞాణస్స, అనాగతంసఞాణస్స ఆరమ్మణపచ్చయేన పచ్చయో. (౨)
నేవాచయగామినాపచయగామీ ధమ్మో అపచయగామిస్స ధమ్మస్స ఆరమ్మణపచ్చయేన పచ్చయో – నిబ్బానం మగ్గస్స ఆరమ్మణపచ్చయేన పచ్చయో. (౩)
అధిపతిపచ్చయో
౪౯. ఆచయగామీ ధమ్మో ఆచయగామిస్స ధమ్మస్స అధిపతిపచ్చయేన పచ్చయో – ఆరమ్మణాధిపతి, సహజాతాధిపతి. ఆరమ్మణాధిపతి – దానం దత్వా సీలం సమాదియిత్వా ఉపోసథకమ్మం కత్వా తం గరుం కత్వా పచ్చవేక్ఖతి, పుబ్బే సుచిణ్ణాని గరుం కత్వా పచ్చవేక్ఖతి, ఝానా వుట్ఠహిత్వా ఝానం గరుం కత్వా పచ్చవేక్ఖతి, ఆచయగామీ ఖన్ధే గరుం కత్వా అస్సాదేతి అభినన్దతి; తం గరుం కత్వా రాగో ఉప్పజ్జతి, దిట్ఠి ఉప్పజ్జతి. సహజాతాధిపతి – ఆచయగామీ అధిపతి సమ్పయుత్తకానం ఖన్ధానం అధిపతిపచ్చయేన పచ్చయో. (౧)
ఆచయగామీ ధమ్మో నేవాచయగామినాపచయగామిస్స ధమ్మస్స అధిపతిపచ్చయేన పచ్చయో. సహజాతాధిపతి – ఆచయగామీ అధిపతి చిత్తసముట్ఠానానం రూపానం అధిపతిపచ్చయేన పచ్చయో. (౨)
ఆచయగామీ ధమ్మో ఆచయగామిస్స చ నేవాచయగామినాపచయగామిస్స చ ధమ్మస్స అధిపతిపచ్చయేన పచ్చయో. సహజాతాధిపతి – ఆచయగామీ అధిపతి సమ్పయుత్తకానం ఖన్ధానం చిత్తసముట్ఠానానఞ్చ రూపానం అధిపతిపచ్చయేన పచ్చయో. (౩)
౫౦. అపచయగామీ ధమ్మో అపచయగామిస్స ధమ్మస్స అధిపతిపచ్చయేన పచ్చయో. సహజాతాధిపతి – అపచయగామీ అధిపతి సమ్పయుత్తకానం ఖన్ధానం అధిపతిపచ్చయేన పచ్చయో. (౧)
అపచయగామీ ధమ్మో ఆచయగామిస్స ధమ్మస్స అధిపతిపచ్చయేన పచ్చయో. ఆరమ్మణాధిపతి – సేక్ఖా మగ్గా వుట్ఠహిత్వా మగ్గం గరుం కత్వా పచ్చవేక్ఖన్తి. (౨)
అపచయగామీ ధమ్మో నేవాచయగామినాపచయగామిస్స ధమ్మస్స అధిపతిపచ్చయేన పచ్చయో – ఆరమ్మణాధిపతి, సహజాతాధిపతి. ఆరమ్మణాధిపతి – అరహా మగ్గా వుట్ఠహిత్వా మగ్గం గరుం కత్వా పచ్చవేక్ఖతి. సహజాతాధిపతి – అపచయగామీ అధిపతి చిత్తసముట్ఠానానం రూపానం అధిపతిపచ్చయేన పచ్చయో. (౩)
అపచయగామీ ధమ్మో అపచయగామిస్స చ నేవాచయగామినాపచయగామిస్స చ ధమ్మస్స అధిపతిపచ్చయేన పచ్చయో. సహజాతాధిపతి – అపచయగామీ అధిపతి సమ్పయుత్తకానం ఖన్ధానం చిత్తసముట్ఠానానఞ్చ రూపానం అధిపతిపచ్చయేన పచ్చయో. (౪)
౫౧. నేవాచయగామినాపచయగామీ ధమ్మో నేవాచయగామినాపచయగామిస్స ధమ్మస్స అధిపతిపచ్చయేన పచ్చయో – ఆరమ్మణాధిపతి, సహజాతాధిపతి. ఆరమ్మణాధిపతి – అరహా ఫలం గరుం కత్వా పచ్చవేక్ఖతి, నిబ్బానం గరుం కత్వా పచ్చవేక్ఖతి, నిబ్బానం ఫలస్స అధిపతిపచ్చయేన పచ్చయో. సహజాతాధిపతి – నేవాచయగామినాపచయగామీ అధిపతి సమ్పయుత్తకానం ఖన్ధానం చిత్తసముట్ఠానానఞ్చ రూపానం అధిపతిపచ్చయేన పచ్చయో. (౧)
నేవాచయగామినాపచయగామీ ధమ్మో ఆచయగామిస్స ధమ్మస్స అధిపతిపచ్చయేన పచ్చయో. ఆరమ్మణాధిపతి – సేక్ఖా ఫలం గరుం కత్వా పచ్చవేక్ఖన్తి, నిబ్బానం గరుం కత్వా పచ్చవేక్ఖన్తి, నిబ్బానం గోత్రభుస్స, వోదానస్స అధిపతిపచ్చయేన పచ్చయో. చక్ఖుం గరుం కత్వా అస్సాదేతి…పే… వత్థుం… నేవాచయగామినాపచయగామీ ఖన్ధే గరుం కత్వా అస్సాదేతి అభినన్దతి; తం గరుం కత్వా రాగో ఉప్పజ్జతి, దిట్ఠి ఉప్పజ్జతి. (౨)
నేవాచయగామినాపచయగామీ ధమ్మో అపచయగామిస్స ధమ్మస్స అధిపతిపచ్చయేన పచ్చయో. ఆరమ్మణాధిపతి – నిబ్బానం మగ్గస్స అధిపతిపచ్చయేన పచ్చయో. (౩)
అనన్తరపచ్చయో
౫౨. ఆచయగామీ ధమ్మో ఆచయగామిస్స ధమ్మస్స అనన్తరపచ్చయేన పచ్చయో – పురిమా పురిమా ఆచయగామీ ఖన్ధా పచ్ఛిమానం పచ్ఛిమానం ఆచయగామీనం ఖన్ధానం అనన్తరపచ్చయేన పచ్చయో. అనులోమం గోత్రభుస్స… అనులోమం వోదానస్స అనన్తరపచ్చయేన పచ్చయో. (౧)
ఆచయగామీ ధమ్మో అపచయగామిస్స ధమ్మస్స అనన్తరపచ్చయేన పచ్చయో – గోత్రభు మగ్గస్స… వోదానం మగ్గస్స అనన్తరపచ్చయేన పచ్చయో. (౨)
ఆచయగామీ ధమ్మో నేవాచయగామినాపచయగామిస్స ధమ్మస్స అనన్తరపచ్చయేన పచ్చయో – ఆచయగామీ ఖన్ధా వుట్ఠానస్స అనన్తరపచ్చయేన పచ్చయో. సేక్ఖానం అనులోమం ఫలసమాపత్తియా, నిరోధా వుట్ఠహన్తస్స నేవసఞ్ఞానాసఞ్ఞాయతనకుసలం ఫలసమాపత్తియా అనన్తరపచ్చయేన పచ్చయో. (౩)
అపచయగామీ ధమ్మో నేవాచయగామినాపచయగామిస్స ధమ్మస్స అనన్తరపచ్చయేన పచ్చయో – మగ్గో ఫలస్స అనన్తరపచ్చయేన పచ్చయో. (౧)
నేవాచయగామినాపచయగామీ ధమ్మో నేవాచయగామినాపచయగామిస్స ధమ్మస్స అనన్తరపచ్చయేన పచ్చయో – పురిమా పురిమా నేవాచయగామినాపచయగామీ ఖన్ధా పచ్ఛిమానం పచ్ఛిమానం నేవాచయగామినాపచయగామీనం ఖన్ధానం అనన్తరపచ్చయేన పచ్చయో. భవఙ్గం ఆవజ్జనాయ… కిరియం వుట్ఠానస్స… అరహతో అనులోమం ఫలసమాపత్తియా… నిరోధా వుట్ఠహన్తస్స నేవసఞ్ఞానాసఞ్ఞాయతనకిరియం ఫలసమాపత్తియా అనన్తరపచ్చయేన పచ్చయో. (౧)
నేవాచయగామినాపచయగామీ ధమ్మో ఆచయగామిస్స ధమ్మస్స అనన్తరపచ్చయేన పచ్చయో – ఆవజ్జనా ఆచయగామీనం ఖన్ధానం అనన్తరపచ్చయేన పచ్చయో. (౨)
సమనన్తరపచ్చయాది
౫౩. ఆచయగామీ ధమ్మో ఆచయగామిస్స ధమ్మస్స సమనన్తరపచ్చయేన పచ్చయో…పే… (అనన్తరసదిసం). (సహజాతపచ్చయే పటిచ్చవారే సహజాతవారసదిసా నవ పఞ్హా. అఞ్ఞమఞ్ఞపచ్చయే పటిచ్చవారే అఞ్ఞమఞ్ఞసదిసం తీణి. నిస్సయపచ్చయే పచ్చయవారే నిస్సయవారసదిసం. చత్తారిపి హి విసుం ఘటనా నత్థి. తేరస పఞ్హా.)
ఉపనిస్సయపచ్చయో
౫౪. ఆచయగామీ ధమ్మో ఆచయగామిస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – ఆచయగామిం సద్ధం ఉపనిస్సాయ దానం దేతి, సీలం…పే… ఉపోసథకమ్మం…పే… ఝానం…పే… విపస్సనం…పే… అభిఞ్ఞం…పే… సమాపత్తిం ఉప్పాదేతి, మానం జప్పేతి, దిట్ఠిం గణ్హాతి, ఆచయగామిం సీలం… సుతం… చాగం… పఞ్ఞం… రాగం… దోసం… మోహం… మానం… దిట్ఠిం… పత్థనం ఉపనిస్సాయ దానం దేతి. సీలం…పే… ఉపోసథకమ్మం…పే… ఝానం…పే… విపస్సనం…పే… అభిఞ్ఞం…పే… సమాపత్తిం…పే… పాణం హనతి…పే… సఙ్ఘం భిన్దతి. ఆచయగామీ సద్ధా…పే… పఞ్ఞా, రాగో…పే… పత్థనా ఆచయగామియా సద్ధాయ…పే… పఞ్ఞాయ, రాగస్స…పే… పత్థనాయ ఉపనిస్సయపచ్చయేన పచ్చయో. పఠమస్స ఝానస్స పరికమ్మం పఠమస్స ఝానస్స ఉపనిస్సయపచ్చయేన పచ్చయో…పే…. నేవసఞ్ఞానాసఞ్ఞాయతనస్స పరికమ్మం నేవసఞ్ఞానాసఞ్ఞాయతనస్స ఉపనిస్సయపచ్చయేన పచ్చయో. పఠమం ఝానం దుతియస్స ఝానస్స…పే… ఆకిఞ్చఞ్ఞాయతనం నేవసఞ్ఞానాసఞ్ఞాయతనస్స ఉపనిస్సయపచ్చయేన పచ్చయో. (౧)
ఆచయగామీ ధమ్మో అపచయగామిస్స ధమ్మస్స ఉపనిస్సయపచ్చయేన పచ్చయో – అనన్తరూపనిస్సయో, పకతూపనిస్సయో…పే…. పకతూపనిస్సయో – పఠమస్స మగ్గస్స పరికమ్మం పఠమస్స మగ్గస్స…పే… చతుత్థస్స మగ్గస్స పరికమ్మం చతుత్థస్స మగ్గస్స ఉపనిస్సయపచ్చయేన పచ్చయో. (౨)
ఆచయగామీ ధమ్మో నేవాచయగామినాపచయగామిస్స ధమ్మస్స ఉపనిస్సయపచ్చయేన పచ్చయో – అనన్తరూపనిస్సయో, పకతూపనిస్సయో…పే…. పకతూపనిస్సయో – ఆచయగామిం సద్ధం ఉపనిస్సాయ అత్తానం ఆతాపేతి పరితాపేతి పరియిట్ఠిమూలకం దుక్ఖం పచ్చనుభోతి. ఆచయగామిం సీలం…పే… పఞ్ఞం. రాగం…పే… పత్థనం ఉపనిస్సాయ అత్తానం ఆతాపేతి పరితాపేతి పరియిట్ఠిమూలకం దుక్ఖం పచ్చనుభోతి. ఆచయగామీ సద్ధా…పే… పఞ్ఞా. రాగో…పే… పత్థనా, కాయికస్స సుఖస్స, కాయికస్స దుక్ఖస్స ఫలసమాపత్తియా ఉపనిస్సయపచ్చయేన పచ్చయో. కుసలాకుసలం కమ్మం విపాకస్స ఉపనిస్సయపచ్చయేన పచ్చయో. (౩)
౫౫. అపచయగామీ ధమ్మో అపచయగామిస్స ధమ్మస్స ఉపనిస్సయపచ్చయేన పచ్చయో. పకతూపనిస్సయో – పఠమో మగ్గో దుతియస్స మగ్గస్స…పే… తతియో మగ్గో చతుత్థస్స మగ్గస్స ఉపనిస్సయపచ్చయేన పచ్చయో. (౧)
అపచయగామీ ధమ్మో ఆచయగామిస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, పకతూపనిస్సయో…పే…. పకతూపనిస్సయో – సేక్ఖా మగ్గం ఉపనిస్సాయ అనుప్పన్నం కుసలసమాపత్తిం ఉప్పాదేన్తి, ఉప్పన్నం సమాపజ్జన్తి, సఙ్ఖారే అనిచ్చతో దుక్ఖతో అనత్తతో విపస్సన్తి, మగ్గో సేక్ఖానం అత్థప్పటిసమ్భిదాయ…పే… పటిభానపటిసమ్భిదాయ ఠానాఠానకోసల్లస్స ఉపనిస్సయపచ్చయేన పచ్చయో. (౨)
అపచయగామీ ధమ్మో నేవాచయగామినాపచయగామిస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – అరహా మగ్గం ఉపనిస్సాయ అనుప్పన్నం కిరియసమాపత్తిం ఉప్పాదేతి, ఉప్పన్నం సమాపజ్జతి…పే… ఠానాఠానకోసల్లస్స ఉపనిస్సయపచ్చయేన పచ్చయో. మగ్గో ఫలసమాపత్తియా ఉపనిస్సయపచ్చయేన పచ్చయో. (౩)
౫౬. నేవాచయగామినాపచయగామీ ధమ్మో నేవాచయగామినాపచయగామిస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – కాయికం సుఖం ఉపనిస్సాయ అత్తానం ఆతాపేతి పరితాపేతి పరియిట్ఠిమూలకం దుక్ఖం పచ్చనుభోతి. కాయికం దుక్ఖం… ఉతుం… భోజనం… సేనాసనం ఉపనిస్సాయ అత్తానం ఆతాపేతి పరితాపేతి…పే… కాయికం సుఖం… కాయికం దుక్ఖం… ఉతు… భోజనం… సేనాసనం కాయికస్స సుఖస్స, కాయికస్స దుక్ఖస్స ఫలసమాపత్తియా ఉపనిస్సయపచ్చయేన పచ్చయో. అరహా కాయికం సుఖం ఉపనిస్సాయ అనుప్పన్నం కిరియసమాపత్తిం ఉప్పాదేతి…పే… విపస్సతి. కాయికం దుక్ఖం… ఉతుం… భోజనం… సేనాసనం ఉపనిస్సాయ…పే… విపస్సతి. (౧)
నేవాచయగామీనాపచయగామీ ధమ్మో ఆచయగామిస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – కాయికం సుఖం ఉపనిస్సాయ దానం దేతి…పే… సమాపత్తిం ఉప్పాదేతి, పాణం హనతి…పే… సఙ్ఘం భిన్దతి. కాయికం దుక్ఖం… ఉతుం… భోజనం… సేనాసనం ఉపనిస్సాయ దానం దేతి…పే… సఙ్ఘం భిన్దతి, కాయికం సుఖం…పే… సేనాసనం ఆచయగామియా సద్ధాయ…పే… పఞ్ఞాయ, రాగస్స…పే… పత్థనాయ ఉపనిస్సయపచ్చయేన పచ్చయో. (౨)
నేవాచయగామినాపచయగామీ ధమ్మో అపచయగామిస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, పకతూపనిస్సయో…పే…. పకతూపనిస్సయో – కాయికం సుఖం ఉపనిస్సాయ మగ్గం ఉప్పాదేతి. కాయికం దుక్ఖం …పే… సేనాసనం ఉపనిస్సాయ మగ్గం ఉప్పాదేతి, కాయికం సుఖం, కాయికం దుక్ఖం…పే… సేనాసనం మగ్గస్స ఉపనిస్సయపచ్చయేన పచ్చయో. (౩)
పురేజాతపచ్చయో
౫౭. నేవాచయగామినాపచయగామీ ధమ్మో నేవాచయగామినాపచయగామిస్స ధమ్మస్స పురేజాతపచ్చయేన పచ్చయో – ఆరమ్మణపురేజాతం, వత్థుపురేజాతం. ఆరమ్మణపురేజాతం – అరహా చక్ఖుం…పే… వత్థుం అనిచ్చతో దుక్ఖతో అనత్తతో విపస్సతి, దిబ్బేన చక్ఖునా రూపం పస్సతి, దిబ్బాయ సోతధాతుయా సద్దం సుణాతి, రూపాయతనం చక్ఖువిఞ్ఞాణస్స…పే… ఫోట్ఠబ్బాయతనం కాయవిఞ్ఞాణస్స పురేజాతపచ్చయేన పచ్చయో. వత్థుపురేజాతం – చక్ఖాయతనం చక్ఖువిఞ్ఞాణస్స…పే… కాయాయతనం కాయవిఞ్ఞాణస్స…పే… వత్థు నేవాచయగామినాపచయగామీనం ఖన్ధానం పురేజాతపచ్చయేన పచ్చయో. (౧)
నేవాచయగామినాపచయగామీ ధమ్మో ఆచయగామిస్స ధమ్మస్స పురేజాతపచ్చయేన పచ్చయో – ఆరమ్మణపురేజాతం, వత్థుపురేజాతం. ఆరమ్మణపురేజాతం – సేక్ఖా వా పుథుజ్జనా వా చక్ఖుం…పే… వత్థుం అనిచ్చతో దుక్ఖతో అనత్తతో విపస్సన్తి, అస్సాదేన్తి అభినన్దన్తి; తం ఆరబ్భ రాగో ఉప్పజ్జతి…పే… దోమనస్సం ఉప్పజ్జతి, దిబ్బేన చక్ఖునా రూపం పస్సతి, దిబ్బాయ సోతధాతుయా సద్దం సుణాతి. వత్థుపురేజాతం – వత్థు ఆచయగామీనం ఖన్ధానం పురేజాతపచ్చయేన పచ్చయో. (౨)
నేవాచయగామినాపచయగామీ ధమ్మో అపచయగామిస్స ధమ్మస్స పురేజాతపచ్చయేన పచ్చయో. వత్థుపురేజాతం – వత్థు అపచయగామీనం ఖన్ధానం పురేజాతపచ్చయేన పచ్చయో. (౩)
పచ్ఛాజాతపచ్చయో
౫౮. ఆచయగామీ ధమ్మో నేవాచయగామినాపచయగామిస్స ధమ్మస్స పచ్ఛాజాతపచ్చయేన పచ్చయో – పచ్ఛాజాతా ఆచయగామీ ఖన్ధా పురేజాతస్స ఇమస్స కాయస్స పచ్ఛాజాతపచ్చయేన పచ్చయో. (౧)
అపచయగామీ ధమ్మో నేవాచయగామినాపచయగామిస్స ధమ్మస్స పచ్ఛాజాతపచ్చయేన పచ్చయో – పచ్ఛాజాతా అపచయగామీ ఖన్ధా పురేజాతస్స ఇమస్స కాయస్స పచ్ఛాజాతపచ్చయేన పచ్చయో. (౧)
నేవాచయగామినాపచయగామీ ధమ్మో నేవాచయగామినాపచయగామిస్స ధమ్మస్స పచ్ఛాజాతపచ్చయేన పచ్చయో – పచ్ఛాజాతా నేవాచయగామినాపచయగామీ ఖన్ధా పురేజాతస్స ఇమస్స కాయస్స పచ్ఛాజాతపచ్చయేన పచ్చయో.
ఆసేవనపచ్చయో
౫౯. ఆచయగామీ ధమ్మో ఆచయగామిస్స ధమ్మస్స ఆసేవనపచ్చయేన పచ్చయో – పురిమా పురిమా ఆచయగామీ ఖన్ధా పచ్ఛిమానం పచ్ఛిమానం ఆచయగామీనం ఖన్ధానం ఆసేవనపచ్చయేన పచ్చయో. అనులోమం గోత్రభుస్స… అనులోమం వోదానస్స ఆసేవనపచ్చయేన పచ్చయో. (౧)
ఆచయగామీ ధమ్మో అపచయగామిస్స ధమ్మస్స ఆసేవనపచ్చయేన పచ్చయో – గోత్రభు మగ్గస్స… వోదానం మగ్గస్స ఆసేవనపచ్చయేన పచ్చయో. (౨)
నేవాచయగామినాపచయగామీ ధమ్మో నేవాచయగామినాపచయగామిస్స ధమ్మస్స ఆసేవనపచ్చయేన పచ్చయో – పురిమా పురిమా నేవాచయగామినాపచయగామీ ఖన్ధా పచ్ఛిమానం పచ్ఛిమానం నేవాచయగామినాపచయగామీనం ఖన్ధానం ఆసేవనపచ్చయేన పచ్చయో. (౧)
కమ్మపచ్చయో
౬౦. ఆచయగామీ ధమ్మో ఆచయగామిస్స ధమ్మస్స కమ్మపచ్చయేన పచ్చయో – ఆచయగామీ చేతనా సమ్పయుత్తకానం ఖన్ధానం కమ్మపచ్చయేన పచ్చయో. (౧)
ఆచయగామీ ధమ్మో నేవాచయగామినాపచయగామిస్స ధమ్మస్స కమ్మపచ్చయేన పచ్చయో – సహజాతా, నానాక్ఖణికా. సహజాతా – ఆచయగామీ చేతనా చిత్తసముట్ఠానానం రూపానం కమ్మపచ్చయేన పచ్చయో. నానాక్ఖణికా – ఆచయగామీ చేతనా విపాకానం ఖన్ధానం కటత్తా చ రూపానం కమ్మపచ్చయేన పచ్చయో. (౨)
ఆచయగామీ ధమ్మో ఆచయగామిస్స చ నేవాచయగామినాపచయగామిస్స చ ధమ్మస్స కమ్మపచ్చయేన పచ్చయో – ఆచయగామీ చేతనా సమ్పయుత్తకానం ఖన్ధానం చిత్తసముట్ఠానానఞ్చ రూపానం కమ్మపచ్చయేన పచ్చయో. (౩)
౬౧. అపచయగామీ ధమ్మో అపచయగామిస్స ధమ్మస్స కమ్మపచ్చయేన పచ్చయో – అపచయగామీ చేతనా సమ్పయుత్తకానం ఖన్ధానం కమ్మపచ్చయేన పచ్చయో. (౧)
అపచయగామీ ధమ్మో నేవాచయగామినాపచయగామిస్స ధమ్మస్స కమ్మపచ్చయేన పచ్చయో – సహజాతా, నానాక్ఖణికా. సహజాతా – అపచయగామీ చేతనా చిత్తసముట్ఠానానం రూపానం కమ్మపచ్చయేన పచ్చయో. నానాక్ఖణికా – అపచయగామీ చేతనా విపాకానం ఖన్ధానం కమ్మపచ్చయేన పచ్చయో. (౨)
అపచయగామీ ధమ్మో అపచయగామిస్స చ నేవాచయగామినాపచయగామిస్స చ ధమ్మస్స కమ్మపచ్చయేన పచ్చయో – అపచయగామీ చేతనా సమ్పయుత్తకానం ఖన్ధానం చిత్తసముట్ఠానానఞ్చ రూపానం కమ్మపచ్చయేన పచ్చయో. (౩)
నేవాచయగామినాపచయగామీ ధమ్మో నేవాచయగామినాపచయగామిస్స ధమ్మస్స కమ్మపచ్చయేన పచ్చయో – నేవాచయగామినాపచయగామీ చేతనా సమ్పయుత్తకానం ఖన్ధానం చిత్తసముట్ఠానానఞ్చ రూపానం కమ్మపచ్చయేన పచ్చయో. పటిసన్ధిక్ఖణే నేవాచయగామినాపచయగామీ చేతనా సమ్పయుత్తకానం ఖన్ధానం కటత్తా చ రూపానం కమ్మపచ్చయేన పచ్చయో. (౧)
విపాకపచ్చయో
౬౨. నేవాచయగామినాపచయగామీ ధమ్మో నేవాచయగామినాపచయగామిస్స ధమ్మస్స విపాకపచ్చయేన పచ్చయో – విపాకో నేవాచయగామినాపచయగామీ ఏకో ఖన్ధో తిణ్ణన్నం ఖన్ధానం…పే… పటిసన్ధిక్ఖణే…పే… ఖన్ధా వత్థుస్స విపాకపచ్చయేన పచ్చయో. (౧)
ఆహారపచ్చయాది
౬౩. ఆచయగామీ ధమ్మో ఆచయగామిస్స ధమ్మస్స ఆహారపచ్చయేన పచ్చయో… ఇన్ద్రియపచ్చయేన పచ్చయో… ఝానపచ్చయేన పచ్చయో… మగ్గపచ్చయేన పచ్చయో… సమ్పయుత్తపచ్చయేన పచ్చయో.
విప్పయుత్తపచ్చయో
౬౪. ఆచయగామీ ధమ్మో నేవాచయగామినాపచయగామిస్స ధమ్మస్స విప్పయుత్తపచ్చయేన పచ్చయో – సహజాతం, పచ్ఛాజాతం. సహజాతా – ఆచయగామీ ఖన్ధా చిత్తసముట్ఠానానం రూపానం విప్పయుత్తపచ్చయేన పచ్చయో. పచ్ఛాజాతా – ఆచయగామీ ఖన్ధా పురేజాతస్స ఇమస్స కాయస్స విప్పయుత్తపచ్చయేన పచ్చయో. (౧)
అపచయగామీ ధమ్మో నేవాచయగామినాపచయగామిస్స ధమ్మస్స విప్పయుత్తపచ్చయేన పచ్చయో – సహజాతం, పచ్ఛాజాతం. సహజాతా – అపచయగామీ ఖన్ధా చిత్తసముట్ఠానానం రూపానం విప్పయుత్తపచ్చయేన పచ్చయో. పచ్ఛాజాతా – అపచయగామీ ఖన్ధా పురేజాతస్స ఇమస్స కాయస్స విప్పయుత్తపచ్చయేన పచ్చయో. (౧)
నేవాచయగామినాపచయగామీ ధమ్మో నేవాచయగామినాపచయగామిస్స ధమ్మస్స విప్పయుత్తపచ్చయేన పచ్చయో – సహజాతం, పురేజాతం, పచ్ఛాజాతం. సహజాతా – నేవాచయగామినాపచయగామీ ఖన్ధా చిత్తసముట్ఠానానం రూపానం విప్పయుత్తపచ్చయేన పచ్చయో. పటిసన్ధిక్ఖణే నేవాచయగామినాపచయగామీ ఖన్ధా కటత్తారూపానం విప్పయుత్తపచ్చయేన పచ్చయో. ఖన్ధా వత్థుస్స విప్పయుత్తపచ్చయేన పచ్చయో. వత్థు ఖన్ధానం విప్పయుత్తపచ్చయేన పచ్చయో. పురేజాతం – చక్ఖాయతనం చక్ఖువిఞ్ఞాణస్స…పే… కాయాయతనం కాయవిఞ్ఞాణస్స…పే… వత్థు నేవాచయగామినాపచయగామీనం ఖన్ధానం విప్పయుత్తపచ్చయేన పచ్చయో. పచ్ఛాజాతా – నేవాచయగామినాపచయగామీ ఖన్ధా పురేజాతస్స ఇమస్స కాయస్స…పే…. (౧)
నేవాచయగామినాపచయగామీ ధమ్మో ఆచయగామిస్స ధమ్మస్స విప్పయుత్తపచ్చయేన పచ్చయో. పురేజాతం – వత్థు ఆచయగామీనం ఖన్ధానం విప్పయుత్తపచ్చయేన పచ్చయో. (౨)
నేవాచయగామినాపచయగామీ ధమ్మో అపచయగామిస్స ధమ్మస్స విప్పయుత్తపచ్చయేన పచ్చయో. పురేజాతం – వత్థు అపచయగామీనం ఖన్ధానం విప్పయుత్తపచ్చయేన పచ్చయో. (౩)
అత్థిపచ్చయాది
౬౫. ఆచయగామీ ధమ్మో ఆచయగామిస్స ధమ్మస్స అత్థిపచ్చయేన పచ్చయో – ఆచయగామీ ఏకో ఖన్ధో తిణ్ణన్నం ఖన్ధానం…పే…. (౧)
ఆచయగామీ ధమ్మో నేవాచయగామినాపచయగామిస్స ధమ్మస్స అత్థిపచ్చయేన పచ్చయో – సహజాతం, పచ్ఛాజాతం. సహజాతా – ఆచయగామీ ఖన్ధా చిత్తసముట్ఠానానం రూపానం అత్థిపచ్చయేన పచ్చయో. పచ్ఛాజాతా – ఆచయగామీ ఖన్ధా పురేజాతస్స ఇమస్స కాయస్స అత్థిపచ్చయేన పచ్చయో. (౨)
ఆచయగామీ ధమ్మో ఆచయగామిస్స చ నేవాచయగామినాపచయగామిస్స చ ధమ్మస్స అత్థిపచ్చయేన పచ్చయో – ఆచయగామీ ఏకో ఖన్ధో తిణ్ణన్నం ఖన్ధానం చిత్తసముట్ఠానానఞ్చ రూపానం అత్థిపచ్చయేన పచ్చయో…పే… ద్వే ఖన్ధా…పే…. (౩)
అపచయగామీ ధమ్మో… తీణి (ఆచయగామినయేన కాతబ్బం).
౬౬. నేవాచయగామినాపచయగామీ ధమ్మో నేవాచయగామినాపచయగామిస్స ధమ్మస్స అత్థిపచ్చయేన పచ్చయో – సహజాతం, పురేజాతం, పచ్ఛాజాతం, ఆహారం, ఇన్ద్రియం. సహజాతో – నేవాచయగామినాపచయగామీ ఏకో ఖన్ధో తిణ్ణన్నం ఖన్ధానం చిత్తసముట్ఠానానఞ్చ రూపానం అత్థిపచ్చయేన పచ్చయో…పే… ద్వే ఖన్ధా…పే… పటిసన్ధిక్ఖణే…పే… ఖన్ధా వత్థుస్స అత్థిపచ్చయేన పచ్చయో. వత్థు ఖన్ధానం అత్థిపచ్చయేన పచ్చయో. ఏకం మహాభూతం…పే… బాహిరం… ఆహారసముట్ఠానం… ఉతుసముట్ఠానం… అసఞ్ఞసత్తానం…పే…. పురేజాతం – అరహా చక్ఖుం…పే… వత్థుం అనిచ్చతో దుక్ఖతో అనత్తతో విపస్సతి, దిబ్బేన చక్ఖునా రూపం పస్సతి, దిబ్బాయ సోతధాతుయా సద్దం సుణాతి, రూపాయతనం చక్ఖువిఞ్ఞాణస్స…పే… ఫోట్ఠబ్బాయతనం కాయవిఞ్ఞాణస్స…పే… చక్ఖాయతనం చక్ఖువిఞ్ఞాణస్స…పే… కాయాయతనం కాయవిఞ్ఞాణస్స…పే… వత్థు నేవాచయగామినాపచయగామీనం ఖన్ధానం అత్థిపచ్చయేన పచ్చయో. పచ్ఛాజాతా – నేవాచయగామినాపచయగామీ ఖన్ధా పురేజాతస్స ఇమస్స కాయస్స అత్థిపచ్చయేన పచ్చయో. కబళీకారో ఆహారో ఇమస్స కాయస్స…పే… రూపజీవితిన్ద్రియం కటత్తారూపానం…పే…. (౧)
నేవాచయగామినాపచయగామీ ధమ్మో ఆచయగామిస్స ధమ్మస్స అత్థిపచ్చయేన పచ్చయో. పురేజాతం – సేక్ఖా వా పుథుజ్జనా వా చక్ఖుం అనిచ్చతో దుక్ఖతో అనత్తతో విపస్సన్తి, అస్సాదేన్తి అభినన్దన్తి; తం ఆరబ్భ రాగో…పే… దోమనస్సం ఉప్పజ్జతి, సోతం…పే… వత్థుం అనిచ్చతో…పే… విపస్సన్తి, అస్సాదేన్తి అభినన్దన్తి; తం ఆరబ్భ రాగో…పే… దోమనస్సం ఉప్పజ్జతి, దిబ్బేన చక్ఖునా రూపం పస్సతి, దిబ్బాయ సోతధాతుయా సద్దం సుణాతి, వత్థు ఆచయగామీనం ఖన్ధానం అత్థిపచ్చయేన పచ్చయో. (౨)
నేవాచయగామినాపచయగామీ ధమ్మో అపచయగామిస్స ధమ్మస్స అత్థిపచ్చయేన పచ్చయో. పురేజాతం – వత్థు అపచయగామీనం ఖన్ధానం అత్థిపచ్చయేన పచ్చయో. (౩)
౬౭. ఆచయగామీ చ నేవాచయగామినాపచయగామీ చ ధమ్మా ఆచయగామిస్స ధమ్మస్స అత్థిపచ్చయేన పచ్చయో సహజాతం, పురేజాతం. సహజాతో – ఆచయగామీ ఏకో ఖన్ధో చ వత్థు చ తిణ్ణన్నం ఖన్ధానం అత్థిపచ్చయేన పచ్చయో…పే… ద్వే ఖన్ధా…పే…. (౧)
ఆచయగామీ చ నేవాచయగామినాపచయగామీ చ ధమ్మా నేవాచయగామినాపచయగామిస్స ధమ్మస్స అత్థిపచ్చయేన పచ్చయో – సహజాతం, పచ్ఛాజాతం, ఆహారం, ఇన్ద్రియం. సహజాతా – ఆచయగామీ ఖన్ధా చ మహాభూతా చ చిత్తసముట్ఠానానం రూపానం అత్థిపచ్చయేన పచ్చయో. పచ్ఛాజాతా – ఆచయగామీ ఖన్ధా చ కబళీకారో ఆహారో చ ఇమస్స కాయస్స అత్థిపచ్చయేన పచ్చయో. పచ్ఛాజాతా – ఆచయగామీ ఖన్ధా చ రూపజీవితిన్ద్రియఞ్చ కటత్తారూపానం అత్థిపచ్చయేన పచ్చయో. (౨)
అపచయగామీ చ నేవాచయగామినాపచయగామీ చ ధమ్మా అపచయగామిస్స ధమ్మస్స అత్థిపచ్చయేన పచ్చయో (ద్వే కాతబ్బా దస్సితనయేన), నత్థిపచ్చయేన పచ్చయో, విగతపచ్చయేన పచ్చయో, అవిగతపచ్చయేన పచ్చయో.