౧. విభఙ్గవారో

నహేతుపచ్చయో

౨౬. ఆచయగామిం ధమ్మం పచ్చయా ఆచయగామీ ధమ్మో ఉప్పజ్జతి నహేతుపచ్చయా – విచికిచ్ఛాసహగతే ఉద్ధచ్చసహగతే ఖన్ధే పచ్చయా విచికిచ్ఛాసహగతో ఉద్ధచ్చసహగతో మోహో. (౧)

నేవాచయగామినాపచయగామిం ధమ్మం పచ్చయా నేవాచయగామినాపచయగామీ ధమ్మో ఉప్పజ్జతి నహేతుపచ్చయా – అహేతుకం నేవాచయగామినాపచయగామిం ఏకం ఖన్ధం పచ్చయా తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే… అహేతుకపటిసన్ధిక్ఖణే…పే… అసఞ్ఞసత్తానం ఏకం మహాభూతం…పే… చక్ఖాయతనం పచ్చయా చక్ఖువిఞ్ఞాణం…పే… కాయాయతనం పచ్చయా కాయవిఞ్ఞాణం. వత్థుం పచ్చయా అహేతుకా నేవాచయగామినాపచయగామీ ఖన్ధా. (౧)

నేవాచయగామినాపచయగామిం ధమ్మం పచ్చయా ఆచయగామీ ధమ్మో ఉప్పజ్జతి నహేతుపచ్చయా – వత్థుం పచ్చయా విచికిచ్ఛాసహగతో ఉద్ధచ్చసహగతో మోహో. (౨)

ఆచయగామిఞ్చ నేవాచయగామినాపచయగామిఞ్చ ధమ్మం పచ్చయా ఆచయగామీ ధమ్మో ఉప్పజ్జతి నహేతుపచ్చయా – విచికిచ్ఛాసహగతే ఉద్ధచ్చసహగతే ఖన్ధే చ వత్థుఞ్చ పచ్చయా విచికిచ్ఛాసహగతో ఉద్ధచ్చసహగతో మోహో. (౧)

నఆరమ్మణపచ్చయో

౨౭. ఆచయగామిం ధమ్మం పచ్చయా నేవాచయగామినాపచయగామీ ధమ్మో ఉప్పజ్జతి నఆరమ్మణపచ్చయా (సంఖిత్తం. పటిచ్చవారసదిసం).

నఅధిపతిపచ్చయో

౨౮. ఆచయగామిం ధమ్మం పచ్చయా ఆచయగామీ ధమ్మో ఉప్పజ్జతి నఅధిపతిపచ్చయా… తీణి.

అపచయగామిం ధమ్మం పచ్చయా అపచయగామీ ధమ్మో ఉప్పజ్జతి నఅధిపతిపచ్చయా – అపచయగామీ ఖన్ధే పచ్చయా అపచయగామీ అధిపతి. (౧)

నేవాచయగామినాపచయగామిం ధమ్మం పచ్చయా నేవాచయగామినాపచయగామీ ధమ్మో ఉప్పజ్జతి నఅధిపతిపచ్చయా…పే… అసఞ్ఞసత్తానం…పే… చక్ఖాయతనం పచ్చయా చక్ఖువిఞ్ఞాణం…పే… కాయాయతనం పచ్చయా కాయవిఞ్ఞాణం. వత్థుం పచ్చయా నేవాచయగామినాపచయగామీ ఖన్ధా. (౧)

నేవాచయగామినాపచయగామిం ధమ్మం పచ్చయా ఆచయగామీ ధమ్మో ఉప్పజ్జతి నఅధిపతిపచ్చయా – వత్థుం పచ్చయా ఆచయగామీ ఖన్ధా. (౨)

నేవాచయగామినాపచయగామిం ధమ్మం పచ్చయా అపచయగామీ ధమ్మో ఉప్పజ్జతి నఅధిపతిపచ్చయా – వత్థుం పచ్చయా అపచయగామీ అధిపతి. (౩)

నేవాచయగామినాపచయగామిం ధమ్మం పచ్చయా ఆచయగామీ చ నేవాచయగామినాపచయగామీ చ ధమ్మా ఉప్పజ్జన్తి నఅధిపతిపచ్చయా – వత్థుం పచ్చయా ఆచయగామీ ఖన్ధా, మహాభూతే పచ్చయా చిత్తసముట్ఠానం రూపం. (౪)

౨౯. ఆచయగామిఞ్చ నేవాచయగామినాపచయగామిఞ్చ ధమ్మం పచ్చయా ఆచయగామీ ధమ్మో ఉప్పజ్జతి నఅధిపతిపచ్చయా – ఆచయగామిం ఏకం ఖన్ధఞ్చ వత్థుఞ్చ పచ్చయా తయో ఖన్ధా…పే… ద్వే ఖన్ధే…పే…. (౧)

ఆచయగామిఞ్చ నేవాచయగామినాపచయగామిఞ్చ ధమ్మం పచ్చయా నేవాచయగామినాపచయగామీ ధమ్మో ఉప్పజ్జతి నఅధిపతిపచ్చయా – ఆచయగామీ ఖన్ధే చ మహాభూతే చ పచ్చయా చిత్తసముట్ఠానం రూపం. (౨)

ఆచయగామిఞ్చ నేవాచయగామినాపచయగామిఞ్చ ధమ్మం పచ్చయా ఆచయగామీ చ నేవాచయగామినాపచయగామీ చ ధమ్మా ఉప్పజ్జన్తి నఅధిపతిపచ్చయా – ఆచయగామిం ఏకం ఖన్ధఞ్చ వత్థుఞ్చ పచ్చయా తయో ఖన్ధా…పే… ద్వే ఖన్ధే…పే… ఆచయగామీ ఖన్ధే చ మహాభూతే చ పచ్చయా చిత్తసముట్ఠానం రూపం. (౩)

అపచయగామిఞ్చ నేవాచయగామినాపచయగామిఞ్చ ధమ్మం పచ్చయా అపచయగామీ ధమ్మో ఉప్పజ్జతి నఅధిపతిపచ్చయా – అపచయగామీ ఖన్ధే చ వత్థుఞ్చ పచ్చయా అపచయగామీ అధిపతి. (౧)

నఅనన్తరపచ్చయాది

౩౦. నఅనన్తరపచ్చయా… నసమనన్తరపచ్చయా… నఅఞ్ఞమఞ్ఞపచ్చయా… నఉపనిస్సయపచ్చయా… నపురేజాతపచ్చయా (పటిచ్చవారసదిసా, సత్త పఞ్హా)… నపచ్ఛాజాతపచ్చయా (పరిపుణ్ణం).

నఆసేవనపచ్చయో

౩౧. ఆచయగామిం ధమ్మం పచ్చయా ఆచయగామీ ధమ్మో ఉప్పజ్జతి నఆసేవనపచ్చయా… తీణి.

అపచయగామిం ధమ్మం పచ్చయా నేవాచయగామినాపచయగామీ ధమ్మో ఉప్పజ్జతి నఆసేవనపచ్చయా – అపచయగామీ ఖన్ధే పచ్చయా చిత్తసముట్ఠానం రూపం. (౧)

నేవాచయగామినాపచయగామిం ధమ్మం పచ్చయా నేవాచయగామినాపచయగామీ ధమ్మో ఉప్పజ్జతి నఆసేవనపచ్చయా – అసఞ్ఞసత్తానం…పే… చక్ఖాయతనం పచ్చయా చక్ఖువిఞ్ఞాణం…పే… కాయాయతనం పచ్చయా కాయవిఞ్ఞాణం. వత్థుం పచ్చయా నేవాచయగామినాపచయగామీ ఖన్ధా. (౧)

నేవాచయగామినాపచయగామిం ధమ్మం పచ్చయా ఆచయగామీ ధమ్మో ఉప్పజ్జతి నఆసేవనపచ్చయా – వత్థుం పచ్చయా ఆచయగామీ ఖన్ధా. (౨)

నేవాచయగామినాపచయగామిం ధమ్మం పచ్చయా ఆచయగామీ చ నేవాచయగామినాపచయగామీ చ ధమ్మా ఉప్పజ్జన్తి నఆసేవనపచ్చయా – వత్థుం పచ్చయా ఆచయగామీ ఖన్ధా, మహాభూతే పచ్చయా చిత్తసముట్ఠానం రూపం. (౩)

ఆచయగామిఞ్చ నేవాచయగామినాపచయగామిఞ్చ ధమ్మం పచ్చయా ఆచయగామీ ధమ్మో ఉప్పజ్జతి నఆసేవనపచ్చయా – ఆచయగామిం ఏకం ఖన్ధఞ్చ వత్థుఞ్చ పచ్చయా తయో ఖన్ధా…పే… ద్వే ఖన్ధే…పే…. (౧)

ఆచయగామిఞ్చ నేవాచయగామినాపచయగామిఞ్చ ధమ్మం పచ్చయా నేవాచయగామినాపచయగామీ ధమ్మో ఉప్పజ్జతి నఆసేవనపచ్చయా – ఆచయగామీ ఖన్ధే చ మహాభూతే చ పచ్చయా చిత్తసముట్ఠానం రూపం. (౨)

ఆచయగామిఞ్చ నేవాచయగామినాపచయగామిఞ్చ ధమ్మం పచ్చయా ఆచయగామీ చ నేవాచయగామినాపచయగామీ చ ధమ్మా ఉప్పజ్జన్తి నఆసేవనపచ్చయా – ఆచయగామిం ఏకం ఖన్ధఞ్చ వత్థుఞ్చ పచ్చయా తయో ఖన్ధా…పే… ద్వే ఖన్ధే…పే… ఆచయగామీ ఖన్ధే చ మహాభూతే చ పచ్చయా చిత్తసముట్ఠానం రూపం. (౩)

అపచయగామిఞ్చ నేవాచయగామినాపచయగామిఞ్చ ధమ్మం పచ్చయా నేవాచయగామినాపచయగామీ ధమ్మో ఉప్పజ్జతి నఆసేవనపచ్చయా – అపచయగామీ ఖన్ధే చ మహాభూతే చ పచ్చయా చిత్తసముట్ఠానం రూపం. (౧)

నకమ్మపచ్చయో

౩౨. ఆచయగామిం ధమ్మం పచ్చయా ఆచయగామీ ధమ్మో ఉప్పజ్జతి నకమ్మపచ్చయా – ఆచయగామీ ఖన్ధే పచ్చయా ఆచయగామీ చేతనా. (౧)

అపచయగామిం ధమ్మం పచ్చయా అపచయగామీ ధమ్మో ఉప్పజ్జతి నకమ్మపచ్చయా – అపచయగామీ ఖన్ధే పచ్చయా అపచయగామీ చేతనా. (౧)

నేవాచయగామినాపచయగామిం ధమ్మం పచ్చయా నేవాచయగామినాపచయగామీ ధమ్మో ఉప్పజ్జతి నకమ్మపచ్చయా – నేవాచయగామినాపచయగామీ ఖన్ధే పచ్చయా నేవాచయగామినాపచయగామీ చేతనా; బాహిరం… ఆహారసముట్ఠానం… ఉతుసముట్ఠానం…పే… వత్థుం పచ్చయా నేవాచయగామినాపచయగామీ చేతనా. (౧)

నేవాచయగామినాపచయగామిం ధమ్మం పచ్చయా ఆచయగామీ ధమ్మో ఉప్పజ్జతి నకమ్మపచ్చయా – వత్థుం పచ్చయా ఆచయగామీ చేతనా. (౨)

నేవాచయగామినాపచయగామిం ధమ్మం పచ్చయా అపచయగామీ ధమ్మో ఉప్పజ్జతి నకమ్మపచ్చయా – వత్థుం పచ్చయా అపచయగామీ చేతనా. (౩)

ఆచయగామిఞ్చ నేవాచయగామినాపచయగామిఞ్చ ధమ్మం పచ్చయా ఆచయగామీ ధమ్మో ఉప్పజ్జతి నకమ్మపచ్చయా – ఆచయగామీ ఖన్ధే చ వత్థుఞ్చ పచ్చయా ఆచయగామీ చేతనా. (౧)

అపచయగామిఞ్చ నేవాచయగామినాపచయగామిఞ్చ ధమ్మం పచ్చయా అపచయగామీ ధమ్మో ఉప్పజ్జతి నకమ్మపచ్చయా – అపచయగామీ ఖన్ధే చ వత్థుఞ్చ పచ్చయా అపచయగామీ చేతనా. (౧)

నవిపాకపచ్చయాది

౩౩. ఆచయగామిం ధమ్మం పచ్చయా ఆచయగామీ ధమ్మో ఉప్పజ్జతి నవిపాకపచ్చయా (పరిపుణ్ణం కాతబ్బం, పటిసన్ధిక్ఖణే నత్థి).

నేవాచయగామినాపచయగామిం ధమ్మం పచ్చయా నేవాచయగామినాపచయగామీ ధమ్మో ఉప్పజ్జతి నఆహారపచ్చయా – బాహిరం… ఉతుసముట్ఠానం… అసఞ్ఞసత్తానం…పే… నఇన్ద్రియపచ్చయా – బాహిరం… ఆహారసముట్ఠానం… ఉతుసముట్ఠానం… అసఞ్ఞసత్తానం…పే… మహాభూతే పచ్చయా రూపజీవితిన్ద్రియం… నఝానపచ్చయా – పఞ్చవిఞ్ఞాణం…పే… బాహిరం… ఆహారసముట్ఠానం… ఉతుసముట్ఠానం… అసఞ్ఞసత్తానం…పే… చక్ఖాయతనం పచ్చయా చక్ఖువిఞ్ఞాణం…పే… కాయాయతనం పచ్చయా కాయవిఞ్ఞాణం…పే… నమగ్గపచ్చయా – అహేతుకా నేవాచయగామినాపచయగామీ…పే… అసఞ్ఞసత్తానం ఏకం మహాభూతం…పే… చక్ఖాయతనం పచ్చయా చక్ఖువిఞ్ఞాణం…పే… కాయాయతనం పచ్చయా కాయవిఞ్ఞాణం, వత్థుం పచ్చయా అహేతుకా నేవాచయగామినాపచయగామీ…పే… నసమ్పయుత్తపచ్చయా… నవిప్పయుత్తపచ్చయా (పటిచ్చవారసదిసం, తీణి)… నోనత్థిపచ్చయా… నోవిగతపచ్చయా.