౧౬. సోళసమవగ్గో

(౧౬౩) ౮. రూపం విపాకోతికథా

౭౬౫. రూపం విపాకోతి? ఆమన్తా. రూపం సుఖవేదనియం దుక్ఖవేదనియం అదుక్ఖమసుఖవేదనియం, సుఖాయ వేదనాయ సమ్పయుత్తం, దుక్ఖాయ వేదనాయ సమ్పయుత్తం, అదుక్ఖమసుఖాయ వేదనాయ సమ్పయుత్తం, ఫస్సేన సమ్పయుత్తం…పే… చిత్తేన సమ్పయుత్తం, సారమ్మణం, అత్థి తస్స ఆవట్టనా…పే… పణిధీతి? న హేవం వత్తబ్బే…పే… నను న సుఖవేదనియం న దుక్ఖవేదనియం…పే… అనారమ్మణం, నత్థి తస్స ఆవట్టనా…పే… పణిధీతి? ఆమన్తా. హఞ్చి న సుఖవేదనియం న దుక్ఖవేదనియం…పే… అనారమ్మణం, నత్థి తస్స ఆవట్టనా…పే… పణిధి, నో చ వత రే వత్తబ్బే – ‘‘రూపం విపాకో’’తి.

౭౬౬. ఫస్సో విపాకో, ఫస్సో సుఖవేదనియో దుక్ఖవేదనియో…పే… సారమ్మణో, అత్థి తస్స ఆవట్టనా…పే… పణిధీతి? ఆమన్తా. రూపం విపాకో, రూపం సుఖవేదనియం దుక్ఖవేదనియం…పే… సారమ్మణం, అత్థి తస్స ఆవట్టనా…పే… పణిధీతి? న హేవం వత్తబ్బే…పే….

రూపం విపాకో, రూపం న సుఖవేదనియం న దుక్ఖవేదనియం…పే… అనారమ్మణం, నత్థి తస్స ఆవట్టనా…పే… పణిధీతి? ఆమన్తా. ఫస్సో విపాకో, ఫస్సో న సుఖవేదనియో న దుక్ఖవేదనియో…పే… అనారమ్మణో, నత్థి తస్స ఆవట్టనా…పే… పణిధీతి? న హేవం వత్తబ్బే…పే….

౭౬౭. న వత్తబ్బం – ‘‘రూపం విపాకో’’తి? ఆమన్తా. నను కమ్మస్స కతత్తా ఉప్పన్నా చిత్తచేతసికా ధమ్మా విపాకోతి? ఆమన్తా. హఞ్చి కమ్మస్స కతత్తా ఉప్పన్నా చిత్తచేతసికా ధమ్మా విపాకో, తేన వత రే వత్తబ్బే – ‘‘కమ్మస్స కతత్తా ఉప్పన్నం రూపం విపాకో’’తి.

రూపం విపాకోతికథా నిట్ఠితా.