౫. సుద్ధికసంసన్దనం

౧౭. పుగ్గలో ఉపలబ్భతి సచ్చికట్ఠపరమత్థేన, రూపఞ్చ ఉపలబ్భతి సచ్చికట్ఠపరమత్థేనాతి? ఆమన్తా. అఞ్ఞం రూపం అఞ్ఞో పుగ్గలోతి? న హేవం వత్తబ్బే.

ఆజానాహి నిగ్గహం. హఞ్చి పుగ్గలో ఉపలబ్భతి సచ్చికట్ఠపరమత్థేన, రూపఞ్చ ఉపలబ్భతి సచ్చికట్ఠపరమత్థేన, తేన వత రే వత్తబ్బే – ‘‘అఞ్ఞం రూపం అఞ్ఞో పుగ్గలో’’తి. యం తత్థ వదేసి – ‘‘వత్తబ్బే ఖో – ‘పుగ్గలో ఉపలబ్భతి సచ్చికట్ఠపరమత్థేన, రూపఞ్చ ఉపలబ్భతి సచ్చికట్ఠపరమత్థేన,’ నో చ వత్తబ్బే – ‘అఞ్ఞం రూపం అఞ్ఞో పుగ్గలో’’’తి మిచ్ఛా.

నో చే పన వత్తబ్బే – ‘‘అఞ్ఞం రూపం అఞ్ఞో పుగ్గలో’’తి, నో చ వత రే వత్తబ్బే – ‘‘పుగ్గలో ఉపలబ్భతి సచ్చికట్ఠపరమత్థేన, రూపఞ్చ ఉపలబ్భతి సచ్చికట్ఠపరమత్థేనా’’తి. యం తత్థ వదేసి – ‘‘వత్తబ్బే ఖో – ‘పుగ్గలో ఉపలబ్భతి సచ్చికట్ఠపరమత్థేన, రూపఞ్చ ఉపలబ్భతి సచ్చికట్ఠపరమత్థేన’, నో చ వత్తబ్బే – ‘అఞ్ఞం రూపం అఞ్ఞో పుగ్గలో’’’తి మిచ్ఛా…పే….

౧౮. పుగ్గలో ఉపలబ్భతి సచ్చికట్ఠపరమత్థేన, వేదనా చ ఉపలబ్భతి సచ్చికట్ఠపరమత్థేన…పే… సఞ్ఞా చ ఉపలబ్భతి…పే… సఙ్ఖారా చ ఉపలబ్భన్తి…పే… విఞ్ఞాణఞ్చ ఉపలబ్భతి సచ్చికట్ఠపరమత్థేనాతి? ఆమన్తా. అఞ్ఞం విఞ్ఞాణం అఞ్ఞో పుగ్గలోతి? న హేవం వత్తబ్బే.

ఆజానాహి నిగ్గహం. హఞ్చి పుగ్గలో ఉపలబ్భతి సచ్చికట్ఠపరమత్థేన, విఞ్ఞాణఞ్చ ఉపలబ్భతి సచ్చికట్ఠపరమత్థేన, తేన వత రే వత్తబ్బే – ‘‘అఞ్ఞం విఞ్ఞాణం అఞ్ఞో పుగ్గలో’’తి. యం తత్థ వదేసి – ‘‘వత్తబ్బే ఖో – ‘పుగ్గలో ఉపలబ్భతి సచ్చికట్ఠపరమత్థేన, విఞ్ఞాణఞ్చ ఉపలబ్భతి సచ్చికట్ఠపరమత్థేన,’ నో చ వత్తబ్బే – ‘అఞ్ఞం విఞ్ఞాణం అఞ్ఞో పుగ్గలో’’’తి మిచ్ఛా.

నో చే పన వత్తబ్బే – ‘‘అఞ్ఞం విఞ్ఞాణం అఞ్ఞో పుగ్గలో’’తి, నో చ వత రే వత్తబ్బే – ‘‘పుగ్గలో ఉపలబ్భతి సచ్చికట్ఠపరమత్థేన, విఞ్ఞాణఞ్చ ఉపలబ్భతి సచ్చికట్ఠపరమత్థేనా’’తి. యం తత్థ వదేసి – ‘‘వత్తబ్బే ఖో – ‘పుగ్గలో ఉపలబ్భతి సచ్చికట్ఠపరమత్థేన, విఞ్ఞాణఞ్చ ఉపలబ్భతి సచ్చికట్ఠపరమత్థేన,’ నో చ వత్తబ్బే – ‘అఞ్ఞం విఞ్ఞాణం అఞ్ఞో పుగ్గలో’’’తి మిచ్ఛా…పే….

౧౯. పుగ్గలో ఉపలబ్భతి సచ్చికట్ఠపరమత్థేన, చక్ఖాయతనఞ్చ ఉపలబ్భతి సచ్చికట్ఠపరమత్థేన…పే… సోతాయతనఞ్చ ఉపలబ్భతి… ఘానాయతనఞ్చ ఉపలబ్భతి… జివ్హాయతనఞ్చ ఉపలబ్భతి… కాయాయతనఞ్చ ఉపలబ్భతి… రూపాయతనఞ్చ ఉపలబ్భతి… సద్దాయతనఞ్చ ఉపలబ్భతి… గన్ధాయతనఞ్చ ఉపలబ్భతి… రసాయతనఞ్చ ఉపలబ్భతి… ఫోట్ఠబ్బాయతనఞ్చ ఉపలబ్భతి… మనాయతనఞ్చ ఉపలబ్భతి… ధమ్మాయతనఞ్చ ఉపలబ్భతి సచ్చికట్ఠపరమత్థేన…పే….

౨౦. చక్ఖుధాతు చ ఉపలబ్భతి సచ్చికట్ఠపరమత్థేన…పే… సోతధాతు చ ఉపలబ్భతి… ఘానధాతు చ ఉపలబ్భతి… జివ్హాధాతు చ ఉపలబ్భతి… కాయధాతు చ ఉపలబ్భతి… రూపధాతు చ ఉపలబ్భతి… సద్దధాతు చ ఉపలబ్భతి… గన్ధధాతు చ ఉపలబ్భతి… రసధాతు చ ఉపలబ్భతి… ఫోట్ఠబ్బధాతు చ ఉపలబ్భతి… చక్ఖువిఞ్ఞాణధాతు చ ఉపలబ్భతి… సోతవిఞ్ఞాణధాతు చ ఉపలబ్భతి… ఘానవిఞ్ఞాణధాతు చ ఉపలబ్భతి… జివ్హావిఞ్ఞాణధాతు చ ఉపలబ్భతి… కాయవిఞ్ఞాణధాతు చ ఉపలబ్భతి… మనోధాతు చ ఉపలబ్భతి… మనోవిఞ్ఞాణధాతు చ ఉపలబ్భతి… ధమ్మధాతు చ ఉపలబ్భతి సచ్చికట్ఠపరమత్థేన…పే….

౨౧. చక్ఖున్ద్రియఞ్చ ఉపలబ్భతి సచ్చికట్ఠపరమత్థేన…పే… సోతిన్ద్రియఞ్చ ఉపలబ్భతి… ఘానిన్ద్రియఞ్చ ఉపలబ్భతి… జివ్హిన్ద్రియఞ్చ ఉపలబ్భతి… కాయిన్ద్రియఞ్చ ఉపలబ్భతి … మనిన్ద్రియఞ్చ ఉపలబ్భతి… జీవితిన్ద్రియఞ్చ ఉపలబ్భతి… ఇత్థిన్ద్రియఞ్చ ఉపలబ్భతి… పురిసిన్ద్రియఞ్చ ఉపలబ్భతి… సుఖిన్ద్రియఞ్చ ఉపలబ్భతి… దుక్ఖిన్ద్రియఞ్చ ఉపలబ్భతి… సోమనస్సిన్ద్రియఞ్చ ఉపలబ్భతి… దోమనస్సిన్ద్రియఞ్చ ఉపలబ్భతి… ఉపేక్ఖిన్ద్రియఞ్చ ఉపలబ్భతి… సద్ధిన్ద్రియఞ్చ ఉపలబ్భతి… వీరియిన్ద్రియఞ్చ ఉపలబ్భతి… సతిన్ద్రియఞ్చ ఉపలబ్భతి… సమాధిన్ద్రియఞ్చ ఉపలబ్భతి… పఞ్ఞిన్ద్రియఞ్చ ఉపలబ్భతి… అనఞ్ఞాతఞ్ఞస్సామీతిన్ద్రియఞ్చ ఉపలబ్భతి… అఞ్ఞిన్ద్రియఞ్చ ఉపలబ్భతి… అఞ్ఞాతావిన్ద్రియఞ్చ ఉపలబ్భతి సచ్చికట్ఠపరమత్థేనాతి? ఆమన్తా. అఞ్ఞం అఞ్ఞాతావిన్ద్రియం అఞ్ఞో పుగ్గలోతి? న హేవం వత్తబ్బే.

ఆజానాహి నిగ్గహం. హఞ్చి పుగ్గలో ఉపలబ్భతి సచ్చికట్ఠపరమత్థేన, అఞ్ఞాతావిన్ద్రియఞ్చ ఉపలబ్భతి సచ్చికట్ఠపరమత్థేన, తేన వత రే వత్తబ్బే – ‘‘అఞ్ఞం అఞ్ఞాతావిన్ద్రియం అఞ్ఞో పుగ్గలో’’తి. యం తత్థ వదేసి – ‘‘వత్తబ్బే ఖో – ‘పుగ్గలో ఉపలబ్భతి సచ్చికట్ఠపరమత్థేన, అఞ్ఞాతావిన్ద్రియఞ్చ ఉపలబ్భతి సచ్చికట్ఠపరమత్థేన,’ నో చ వత్తబ్బే – ‘అఞ్ఞం అఞ్ఞాతావిన్ద్రియం అఞ్ఞో పుగ్గలో’’’తి మిచ్ఛా.

నో చే పన వత్తబ్బే – ‘‘అఞ్ఞం అఞ్ఞాతావిన్ద్రియం అఞ్ఞో పుగ్గలో’’తి, నో చ వత రే వత్తబ్బే – ‘‘పుగ్గలో ఉపలబ్భతి సచ్చికట్ఠపరమత్థేన, అఞ్ఞాతావిన్ద్రియఞ్చ ఉపలబ్భతి సచ్చికట్ఠపరమత్థేనా’’తి. యం తత్థ వదేసి – ‘‘వత్తబ్బే ఖో – ‘పుగ్గలో ఉపలబ్భతి సచ్చికట్ఠపరమత్థేన, అఞ్ఞాతావిన్ద్రియఞ్చ ఉపలబ్భతి సచ్చికట్ఠపరమత్థేన,’ నో చ వత్తబ్బే – ‘అఞ్ఞం అఞ్ఞాతావిన్ద్రియం అఞ్ఞో పుగ్గలో’’’తి మిచ్ఛా…పే….

౨౨. [పు. ప. మాతికా ౪.౨౪; అ. ని. ౪.౯౫-౯౬] పుగ్గలో నుపలబ్భతి సచ్చికట్ఠపరమత్థేనాతి? ఆమన్తా. వుత్తం భగవతా – ‘‘అత్థి పుగ్గలో అత్తహితాయ పటిపన్నో,’’ రూపఞ్చ ఉపలబ్భతి సచ్చికట్ఠపరమత్థేనాతి? ఆమన్తా. అఞ్ఞం రూపం అఞ్ఞో పుగ్గలోతి? న హేవం వత్తబ్బే.

ఆజానాహి పటికమ్మం. హఞ్చి వుత్తం భగవతా – ‘‘అత్థి పుగ్గలో అత్తహితాయ పటిపన్నో,’’ రూపఞ్చ ఉపలబ్భతి సచ్చికట్ఠపరమత్థేన, తేన వత రే వత్తబ్బే – ‘‘అఞ్ఞం రూపం అఞ్ఞో పుగ్గలో’’తి. యం తత్థ వదేసి – ‘‘వత్తబ్బే ఖో – ‘వుత్తం భగవతా – అత్థి పుగ్గలో అత్తహితాయ పటిపన్నో, రూపఞ్చ ఉపలబ్భతి సచ్చికట్ఠపరమత్థేన,’ నో చ వత్తబ్బే – ‘అఞ్ఞం రూపం అఞ్ఞో పుగ్గలో’’’తి మిచ్ఛా.

నో చే పన వత్తబ్బే – ‘‘అఞ్ఞం రూపం అఞ్ఞో పుగ్గలో’’తి, నో చ వత రే వత్తబ్బే – ‘‘వుత్తం భగవతా – ‘అత్థి పుగ్గలో అత్తహితాయ పటిపన్నో,’ రూపఞ్చ ఉపలబ్భతి సచ్చికట్ఠపరమత్థేనా’’తి. యం తత్థ వదేసి – ‘‘వత్తబ్బే ఖో – ‘వుత్తం భగవతా – అత్థి పుగ్గలో అత్తహితాయ పటిపన్నో, రూపఞ్చ ఉపలబ్భతి సచ్చికట్ఠపరమత్థేన,’ నో చ వత్తబ్బే – ‘అఞ్ఞం రూపం అఞ్ఞో పుగ్గలో’’’తి మిచ్ఛా…పే….

౨౩. పుగ్గలో నుపలబ్భతి సచ్చికట్ఠపరమత్థేనాతి? ఆమన్తా. వుత్తం భగవతా – ‘‘అత్థి పుగ్గలో అత్తహితాయ పటిపన్నో,’’ వేదనా చ ఉపలబ్భతి…పే… సఞ్ఞా చ ఉపలబ్భతి…పే… సఙ్ఖారా చ ఉపలబ్భన్తి…పే… విఞ్ఞాణఞ్చ ఉపలబ్భతి సచ్చికట్ఠపరమత్థేనాతి? ఆమన్తా. అఞ్ఞం విఞ్ఞాణం అఞ్ఞో పుగ్గలోతి? న హేవం వత్తబ్బే.

ఆజానాహి పటికమ్మం. హఞ్చి వుత్తం భగవతా – ‘‘అత్థి పుగ్గలో అత్తహితాయ పటిపన్నో,’’ విఞ్ఞాణఞ్చ ఉపలబ్భతి సచ్చికట్ఠపరమత్థేన, తేన వత రే వత్తబ్బే – ‘‘అఞ్ఞం విఞ్ఞాణం అఞ్ఞో పుగ్గలో’’తి. యం తత్థ వదేసి – ‘‘వత్తబ్బే ఖో – ‘వుత్తం భగవతా – అత్థి పుగ్గలో అత్తహితాయ పటిపన్నో, విఞ్ఞాణఞ్చ ఉపలబ్భతి సచ్చికట్ఠపరమత్థేన,’ నో చ వత్తబ్బే – ‘అఞ్ఞం విఞ్ఞాణం అఞ్ఞో పుగ్గలో’’’తి మిచ్ఛా.

నో చే పన వత్తబ్బే – ‘‘అఞ్ఞం విఞ్ఞాణం అఞ్ఞో పుగ్గలో’’తి, నో చ వత రే వత్తబ్బే – ‘‘వుత్తం భగవతా – ‘అత్థి పుగ్గలో అత్తహితాయ పటిపన్నో,’ విఞ్ఞాణఞ్చ ఉపలబ్భతి సచ్చికట్ఠపరమత్థేనా’’తి. యం తత్థ వదేసి – ‘‘వత్తబ్బే ఖో – ‘వుత్తం భగవతా – అత్థి పుగ్గలో అత్తహితాయ పటిపన్నో,’ విఞ్ఞాణఞ్చ ఉపలబ్భతి సచ్చికట్ఠపరమత్థేన, నో చ వత్తబ్బే – ‘అఞ్ఞం విఞ్ఞాణం అఞ్ఞో పుగ్గలో’’’తి మిచ్ఛా…పే….

౨౪. పుగ్గలో నుపలబ్భతి సచ్చికట్ఠపరమత్థేనాతి? ఆమన్తా. వుత్తం భగవతా – ‘‘అత్థి పుగ్గలో అత్తహితాయ పటిపన్నో,’’ చక్ఖాయతనఞ్చ ఉపలబ్భతి సచ్చికట్ఠపరమత్థేన…పే… సోతాయతనఞ్చ ఉపలబ్భతి…పే… ధమ్మాయతనఞ్చ ఉపలబ్భతి సచ్చికట్ఠపరమత్థేన…పే….

౨౫. చక్ఖుధాతు చ ఉపలబ్భతి సచ్చికట్ఠపరమత్థేన…పే… కాయధాతు చ ఉపలబ్భతి…పే… రూపధాతు చ ఉపలబ్భతి…పే… ఫోట్ఠబ్బధాతు చ ఉపలబ్భతి…పే… చక్ఖువిఞ్ఞాణధాతు చ ఉపలబ్భతి…పే… మనోవిఞ్ఞాణధాతు చ ఉపలబ్భతి…పే… ధమ్మధాతు చ ఉపలబ్భతి సచ్చికట్ఠపరమత్థేన…పే….

౨౬. చక్ఖున్ద్రియఞ్చ ఉపలబ్భతి సచ్చికట్ఠపరమత్థేన…పే… సోతిన్ద్రియఞ్చ ఉపలబ్భతి సచ్చికట్ఠపరమత్థేన…పే… అఞ్ఞిన్ద్రియఞ్చ [అఞ్ఞాతావిన్ద్రియఞ్చ (బహూసు)] ఉపలబ్భతి సచ్చికట్ఠపరమత్థేన…పే….

౨౭. పుగ్గలో నుపలబ్భతి సచ్చికట్ఠపరమత్థేనాతి? ఆమన్తా. వుత్తం భగవతా – ‘‘అత్థి పుగ్గలో అత్తహితాయ పటిపన్నో,’’ అఞ్ఞాతావిన్ద్రియఞ్చ ఉపలబ్భతి సచ్చికట్ఠపరమత్థేనాతి? ఆమన్తా. అఞ్ఞం అఞ్ఞాతావిన్ద్రియం అఞ్ఞో పుగ్గలోతి? న హేవం వత్తబ్బే.

ఆజానాహి పటికమ్మం. హఞ్చి వుత్తం భగవతా – ‘‘అత్థి పుగ్గలో అత్తహితాయ పటిపన్నో,’’ అఞ్ఞాతావిన్ద్రియఞ్చ ఉపలబ్భతి సచ్చికట్ఠపరమత్థేన, తేన వత రే వత్తబ్బే – ‘‘అఞ్ఞం అఞ్ఞాతావిన్ద్రియం అఞ్ఞో పుగ్గలో’’తి. యం తత్థ వదేసి – ‘‘వత్తబ్బే ఖో – ‘వుత్తం భగవతా – అత్థి పుగ్గలో అత్తహితాయ పటిపన్నో, అఞ్ఞాతావిన్ద్రియఞ్చ ఉపలబ్భతి సచ్చికట్ఠపరమత్థేన,’ నో చ వత్తబ్బే – ‘అఞ్ఞం అఞ్ఞాతావిన్ద్రియం అఞ్ఞో పుగ్గలో’’’తి మిచ్ఛా.

నో చే పన వత్తబ్బే – ‘‘అఞ్ఞం అఞ్ఞాతావిన్ద్రియం అఞ్ఞో పుగ్గలో’’తి, నో చ వత రే వత్తబ్బే – ‘‘వుత్తం భగవతా – ‘అత్థి పుగ్గలో అత్తహితాయ పటిపన్నో,’ అఞ్ఞాతావిన్ద్రియఞ్చ ఉపలబ్భతి సచ్చికట్ఠపరమత్థేనా’’తి. యం తత్థ వదేసి – ‘‘వత్తబ్బే ఖో – ‘వుత్తం భగవతా – అత్థి పుగ్గలో అత్తహితాయ పటిపన్నో, అఞ్ఞాతావిన్ద్రియఞ్చ ఉపలబ్భతి సచ్చికట్ఠపరమత్థేన,’ నో చ వత్తబ్బే – ‘అఞ్ఞం అఞ్ఞాతావిన్ద్రియం అఞ్ఞో పుగ్గలో’’’తి మిచ్ఛా…పే….

సుద్ధికసంసన్దనా.