౧౪. అభిఞ్ఞానుయోగో

౧౯౩. న వత్తబ్బం – ‘‘పుగ్గలో ఉపలబ్భతి సచ్చికట్ఠపరమత్థేనా’’తి? ఆమన్తా. నను అత్థి కోచి ఇద్ధిం వికుబ్బతీతి? ఆమన్తా. హఞ్చి అత్థి కోచి ఇద్ధిం వికుబ్బతి, తేన వత రే వత్తబ్బే – ‘‘పుగ్గలో ఉపలబ్భతి సచ్చికట్ఠపరమత్థేనా’’తి.

౧౯౪. న వత్తబ్బం – ‘‘పుగ్గలో ఉపలబ్భతి సచ్చికట్ఠపరమత్థేనా’’తి? ఆమన్తా. నను అత్థి కోచి దిబ్బాయ సోతధాతుయా సద్దం సుణాతి…పే… పరచిత్తం విజానాతి… పుబ్బేనివాసం అనుస్సరతి… దిబ్బేన చక్ఖునా రూపం పస్సతి… ఆసవానం ఖయం సచ్ఛికరోతీతి? ఆమన్తా. హఞ్చి అత్థి కోచి ఆసవానం ఖయం సచ్ఛికరోతి, తేన వత రే వత్తబ్బే – ‘‘పుగ్గలో ఉపలబ్భతి సచ్చికట్ఠపరమత్థేనా’’తి.

౧౯౫. అత్థి కోచి ఇద్ధిం వికుబ్బతీతి కత్వా తేన చ కారణేన పుగ్గలో ఉపలబ్భతి సచ్చికట్ఠపరమత్థేనాతి? ఆమన్తా. యో ఇద్ధిం వికుబ్బతి, స్వేవ పుగ్గలో? యో ఇద్ధిం న వికుబ్బతి, న సో పుగ్గలోతి? న హేవం వత్తబ్బే…పే….

౧౯౬. యో దిబ్బాయ సోతధాతుయా సద్దం సుణాతి…పే… యో పరచిత్తం విజానాతి… యో పుబ్బేనివాసం అనుస్సరతి… యో దిబ్బేన చక్ఖునా రూపం పస్సతి… యో ఆసవానం ఖయం సచ్ఛికరోతి, స్వేవ పుగ్గలో? యో ఆసవానం ఖయం న సచ్ఛికరోతి, న సో పుగ్గలోతి? న హేవం వత్తబ్బే…పే….

అభిఞ్ఞానుయోగో.