౭. చతుక్కనయసంసన్దనం

౪౬. పుగ్గలో ఉపలబ్భతి సచ్చికట్ఠపరమత్థేనాతి? ఆమన్తా. రూపం పుగ్గలోతి? న హేవం వత్తబ్బే.

ఆజానాహి నిగ్గహం. హఞ్చి పుగ్గలో ఉపలబ్భతి సచ్చికట్ఠపరమత్థేన, తేన వత రే వత్తబ్బే – ‘‘రూపం పుగ్గలో’’తి. యం తత్థ వదేసి – ‘‘వత్తబ్బే ఖో – ‘పుగ్గలో ఉపలబ్భతి సచ్చికట్ఠపరమత్థేన,’ నో చ వత్తబ్బే – ‘రూపం పుగ్గలో’’’తి మిచ్ఛా.

నో చే పన వత్తబ్బే – ‘‘రూపం పుగ్గలో’’తి, నో చ వత రే వత్తబ్బే – ‘‘పుగ్గలో ఉపలబ్భతి సచ్చికట్ఠపరమత్థేనా’’తి. యం తత్థ వదేసి – ‘‘వత్తబ్బే ఖో – ‘పుగ్గలో ఉపలబ్భతి సచ్చికట్ఠపరమత్థేన,’ నో చ వత్తబ్బే – ‘రూపం పుగ్గలో’’’తి మిచ్ఛా…పే….

౪౭. పుగ్గలో ఉపలబ్భతి సచ్చికట్ఠపరమత్థేనాతి? ఆమన్తా. రూపస్మిం పుగ్గలో…పే… అఞ్ఞత్ర రూపా పుగ్గలో…పే… పుగ్గలస్మిం రూపన్తి? న హేవం వత్తబ్బే.

ఆజానాహి నిగ్గహం. హఞ్చి పుగ్గలో ఉపలబ్భతి సచ్చికట్ఠపరమత్థేన, తేన వత రే వత్తబ్బే – ‘‘పుగ్గలస్మిం రూప’’న్తి. యం తత్థ వదేసి – ‘‘వత్తబ్బే ఖో – ‘పుగ్గలో ఉపలబ్భతి సచ్చికట్ఠపరమత్థేన,’ నో చ వత్తబ్బే – ‘పుగ్గలస్మిం రూప’’’న్తి మిచ్ఛా.

నో చే పన వత్తబ్బే – ‘‘పుగ్గలస్మిం రూప’’న్తి, నో చ వత రే వత్తబ్బే – ‘‘పుగ్గలో ఉపలబ్భతి సచ్చికట్ఠపరమత్థేనా’’తి. యం తత్థ వదేసి – ‘‘వత్తబ్బే ఖో – ‘పుగ్గలో ఉపలబ్భతి సచ్చికట్ఠపరమత్థేన,’ నో చ వత్తబ్బే – ‘పుగ్గలస్మిం రూప’’’న్తి మిచ్ఛా…పే….

౪౮. పుగ్గలో ఉపలబ్భతి సచ్చికట్ఠపరమత్థేనాతి? ఆమన్తా. వేదనా పుగ్గలో…పే… వేదనాయ పుగ్గలో…పే… అఞ్ఞత్ర వేదనాయ పుగ్గలో…పే… పుగ్గలస్మిం వేదనా…పే….

సఞ్ఞా పుగ్గలో…పే… సఞ్ఞాయ పుగ్గలో…పే… అఞ్ఞత్ర సఞ్ఞాయ పుగ్గలో…పే… పుగ్గలస్మిం సఞ్ఞా…పే….

సఙ్ఖారా పుగ్గలో…పే… సఙ్ఖారేసు పుగ్గలో…పే… అఞ్ఞత్ర సఙ్ఖారేహి పుగ్గలో…పే… పుగ్గలస్మిం సఙ్ఖారా…పే….

విఞ్ఞాణం పుగ్గలో…పే… విఞ్ఞాణస్మిం పుగ్గలో…పే… అఞ్ఞత్ర విఞ్ఞాణా పుగ్గలో…పే… పుగ్గలస్మిం విఞ్ఞాణన్తి? న హేవం వత్తబ్బే.

ఆజానాహి నిగ్గహం. హఞ్చి పుగ్గలో ఉపలబ్భతి సచ్చికట్ఠపరమత్థేన, తేన వత రే వత్తబ్బే – ‘‘పుగ్గలస్మిం విఞ్ఞాణ’’న్తి. యం తత్థ వదేసి – ‘‘వత్తబ్బే ఖో – ‘పుగ్గలో ఉపలబ్భతి సచ్చికట్ఠపరమత్థేన,’ నో చ వత్తబ్బే – ‘పుగ్గలస్మిం విఞ్ఞాణ’’’న్తి మిచ్ఛా.

నో చే పన వత్తబ్బే – ‘‘పుగ్గలస్మిం విఞ్ఞాణ’’న్తి, నో చ వత రే వత్తబ్బే – ‘‘పుగ్గలో ఉపలబ్భతి సచ్చికట్ఠపరమత్థేనా’’తి. యం తత్థ వదేసి – ‘‘వత్తబ్బే ఖో – ‘పుగ్గలో ఉపలబ్భతి సచ్చికట్ఠపరమత్థేన,’ నో చ వత్తబ్బే – ‘పుగ్గలస్మిం విఞ్ఞాణ’’’న్తి మిచ్ఛా…పే….

౪౯. పుగ్గలో ఉపలబ్భతి సచ్చికట్ఠపరమత్థేనాతి? ఆమన్తా. చక్ఖాయతనం పుగ్గలో…పే… చక్ఖాయతనస్మిం పుగ్గలో…పే… అఞ్ఞత్ర చక్ఖాయతనా పుగ్గలో…పే… పుగ్గలస్మిం చక్ఖాయతనం…పే… ధమ్మాయతనం పుగ్గలో…పే… ధమ్మాయతనస్మిం పుగ్గలో…పే… అఞ్ఞత్ర ధమ్మాయతనా పుగ్గలో…పే… పుగ్గలస్మిం ధమ్మాయతనం…పే….

చక్ఖుధాతు పుగ్గలో…పే… చక్ఖుధాతుయా పుగ్గలో…పే… అఞ్ఞత్ర చక్ఖుధాతుయా పుగ్గలో…పే… పుగ్గలస్మిం చక్ఖుధాతు…పే… ధమ్మధాతు పుగ్గలో…పే… ధమ్మధాతుయా పుగ్గలో…పే… అఞ్ఞత్ర ధమ్మధాతుయా పుగ్గలో…పే… పుగ్గలస్మిం ధమ్మధాతు…పే….

చక్ఖున్ద్రియం పుగ్గలో…పే… చక్ఖున్ద్రియస్మిం పుగ్గలో…పే… అఞ్ఞత్ర చక్ఖున్ద్రియా పుగ్గలో …పే… పుగ్గలస్మిం చక్ఖున్ద్రియం…పే… అఞ్ఞాతావిన్ద్రియం పుగ్గలో…పే… అఞ్ఞాతావిన్ద్రియస్మిం పుగ్గలో…పే… అఞ్ఞత్ర అఞ్ఞాతావిన్ద్రియా పుగ్గలో…పే… పుగ్గలస్మిం అఞ్ఞాతావిన్ద్రియన్తి? న హేవం వత్తబ్బే.

ఆజానాహి నిగ్గహం. హఞ్చి పుగ్గలో ఉపలబ్భతి సచ్చికట్ఠపరమత్థేన, తేన వత రే వత్తబ్బే – ‘‘పుగ్గలస్మిం అఞ్ఞాతావిన్ద్రియ’’న్తి. యం తత్థ వదేసి – ‘‘వత్తబ్బే ఖో – ‘పుగ్గలో ఉపలబ్భతి సచ్చికట్ఠపరమత్థేన,’ నో చ వత్తబ్బే – ‘పుగ్గలస్మిం అఞ్ఞాతావిన్ద్రియ’’’న్తి మిచ్ఛా.

నో చే పన వత్తబ్బే – ‘‘పుగ్గలస్మిం అఞ్ఞాతావిన్ద్రియ’’న్తి, నో చ వత రే వత్తబ్బే – ‘‘పుగ్గలో ఉపలబ్భతి సచ్చికట్ఠపరమత్థేనా’’తి. యం తత్థ వదేసి – ‘‘వత్తబ్బే ఖో – ‘పుగ్గలో ఉపలబ్భతి సచ్చికట్ఠపరమత్థేన,’ నో చ వత్తబ్బే – ‘పుగ్గలస్మిం అఞ్ఞాతావిన్ద్రియ’’’న్తి మిచ్ఛా…పే….

౫౦. పుగ్గలో నుపలబ్భతి సచ్చికట్ఠపరమత్థేనాతి? ఆమన్తా. వుత్తం భగవతా – ‘‘అత్థి పుగ్గలో అత్తహితాయ పటిపన్నో’’తి? ఆమన్తా. రూపం పుగ్గలోతి? న హేవం వత్తబ్బే.

ఆజానాహి పటికమ్మం. హఞ్చి వుత్తం భగవతా – ‘‘అత్థి పుగ్గలో అత్తహితాయ పటిపన్నో,’’ తేన వత రే వత్తబ్బే – ‘‘రూపం పుగ్గలో’’తి. యం తత్థ వదేసి – ‘‘వత్తబ్బే ఖో – ‘వుత్తం భగవతా – అత్థి పుగ్గలో అత్తహితాయ పటిపన్నో,’ నో చ వత్తబ్బే – ‘రూపం పుగ్గలోతి’’’ మిచ్ఛా.

నో చే పన వత్తబ్బే – ‘‘రూపం పుగ్గలో’’తి, నో చ వత రే వత్తబ్బే – ‘‘వుత్తం భగవతా – ‘అత్థి పుగ్గలో అత్తహితాయ పటిపన్నో’’’తి. యం తత్థ వదేసి – ‘‘వత్తబ్బే ఖో – ‘వుత్తం భగవతా – అత్థి పుగ్గలో అత్తహితాయ పటిపన్నో,’ నో చ వత్తబ్బే – ‘రూపం పుగ్గలో’’’తి మిచ్ఛా…పే….

౫౧. పుగ్గలో నుపలబ్భతి సచ్చికట్ఠపరమత్థేనాతి? ఆమన్తా. వుత్తం భగవతా – ‘‘అత్థి పుగ్గలో అత్తహితాయ పటిపన్నో’’తి? ఆమన్తా. రూపస్మిం పుగ్గలో…పే… అఞ్ఞత్ర రూపా పుగ్గలో…పే… పుగ్గలస్మిం రూపం…పే….

వేదనా పుగ్గలో…పే… వేదనాయ పుగ్గలో…పే… అఞ్ఞత్ర వేదనాయ పుగ్గలో…పే… పుగ్గలస్మిం వేదనా…పే….

ఆజానాహి పటికమ్మం. హఞ్చి వుత్తం భగవతా – ‘‘అత్థి పుగ్గలో అత్తహితాయ పటిపన్నో,’’ తేన వత రే వత్తబ్బే – ‘‘పుగ్గలస్మిం విఞ్ఞాణ’’న్తి. యం తత్థ వదేసి – ‘‘వత్తబ్బే ఖో – ‘వుత్తం భగవతా – అత్థి పుగ్గలో అత్తహితాయ పటిపన్నో,’ నో చ వత్తబ్బే – ‘పుగ్గలస్మిం విఞ్ఞాణ’’’న్తి మిచ్ఛా.

నో చే పన వత్తబ్బే – ‘‘పుగ్గలస్మిం విఞ్ఞాణ’’న్తి, నో చ వత రే వత్తబ్బే – ‘‘వుత్తం భగవతా – ‘అత్థి పుగ్గలో అత్తహితాయ పటిపన్నో’’’తి. యం తత్థ వదేసి – ‘‘వత్తబ్బే ఖో – ‘వుత్తం భగవతా – అత్థి పుగ్గలో అత్తహితాయ పటిపన్నో,’ నో చ వత్తబ్బే – ‘పుగ్గలస్మిం విఞ్ఞాణ’’’న్తి మిచ్ఛా…పే….

౫౨. పుగ్గలో నుపలబ్భతి సచ్చికట్ఠపరమత్థేనాతి? ఆమన్తా. వుత్తం భగవతా – ‘‘అత్థి పుగ్గలో అత్తహితాయ పటిపన్నో’’తి? ఆమన్తా. చక్ఖాయతనం పుగ్గలో…పే… చక్ఖాయతనస్మిం పుగ్గలో…పే… అఞ్ఞత్ర చక్ఖాయతనా పుగ్గలో…పే… పుగ్గలస్మిం చక్ఖాయతనం…పే… ధమ్మాయతనం పుగ్గలో…పే… ధమ్మాయతనస్మిం పుగ్గలో…పే… అఞ్ఞత్ర ధమ్మాయతనా పుగ్గలో…పే… పుగ్గలస్మిం ధమ్మాయతనం…పే….

చక్ఖున్ద్రియం పుగ్గలో…పే… చక్ఖున్ద్రియస్మిం పుగ్గలో…పే… అఞ్ఞత్ర చక్ఖున్ద్రియా పుగ్గలో…పే… పుగ్గలస్మిం చక్ఖున్ద్రియం…పే… అఞ్ఞాతావిన్ద్రియం పుగ్గలో…పే… అఞ్ఞాతావిన్ద్రియస్మిం పుగ్గలో…పే… అఞ్ఞత్ర అఞ్ఞాతావిన్ద్రియా పుగ్గలో…పే… పుగ్గలస్మిం అఞ్ఞాతావిన్ద్రియన్తి? న హేవం వత్తబ్బే.

ఆజానాహి పటికమ్మం. హఞ్చి వుత్తం భగవతా – ‘‘అత్థి పుగ్గలో అత్తహితాయ పటిపన్నో,’’ తేన వత రే వత్తబ్బే – ‘‘పుగ్గలస్మిం అఞ్ఞాతావిన్ద్రియ’’న్తి. యం తత్థ వదేసి – ‘‘వత్తబ్బే ఖో – ‘వుత్తం భగవతా – అత్థి పుగ్గలో అత్తహితాయ పటిపన్నో,’ నో చ వత్తబ్బే – ‘పుగ్గలస్మిం అఞ్ఞాతావిన్ద్రియ’’’న్తి మిచ్ఛా.

నో చే పన వత్తబ్బే – ‘‘పుగ్గలస్మిం అఞ్ఞాతావిన్ద్రియ’’న్తి, నో చ వత రే వత్తబ్బే – ‘‘వుత్తం భగవతా – ‘అత్థి పుగ్గలో అత్తహితాయ పటిపన్నో’’’తి. యం తత్థ వదేసి – ‘‘వత్తబ్బే ఖో – ‘వుత్తం భగవతా – అత్థి పుగ్గలో అత్తహితాయ పటిపన్నో,’ నో చ వత్తబ్బే – ‘పుగ్గలస్మిం అఞ్ఞాతావిన్ద్రియ’’’న్తి మిచ్ఛా…పే….

చతుక్కనయసంసన్దనం.