౨. సిక్ఖాపదపేయ్యాలం

౧. భిక్ఖుసుత్తం

౨౮౬. ‘‘పఞ్చహి, భిక్ఖవే, ధమ్మేహి సమన్నాగతో భిక్ఖు యథాభతం నిక్ఖిత్తో ఏవం నిరయే. కతమేహి పఞ్చహి? పాణాతిపాతీ హోతి, అదిన్నాదాయీ హోతి, అబ్రహ్మచారీ హోతి, ముసావాదీ హోతి, సురామేరయమజ్జపమాదట్ఠాయీ హోతి. ఇమేహి ఖో, భిక్ఖవే, పఞ్చహి ధమ్మేహి సమన్నాగతో భిక్ఖు యథాభతం నిక్ఖిత్తో ఏవం నిరయే.

‘‘పఞ్చహి, భిక్ఖవే, ధమ్మేహి సమన్నాగతో భిక్ఖు యథాభతం నిక్ఖిత్తో ఏవం సగ్గే. కతమేహి పఞ్చహి? పాణాతిపాతా పటివిరతో హోతి, అదిన్నాదానా పటివిరతో హోతి, అబ్రహ్మచరియా పటివిరతో హోతి, ముసావాదా పటివిరతో హోతి, సురామేరయమజ్జపమాదట్ఠానా పటివిరతో హోతి. ఇమేహి ఖో, భిక్ఖవే, పఞ్చహి ధమ్మేహి సమన్నాగతో భిక్ఖు యథాభతం నిక్ఖిత్తో ఏవం సగ్గే’’తి. పఠమం.

౨-౭. భిక్ఖునీసుత్తాదిఛక్కం

౨౮౭-౨౯౨. ‘‘పఞ్చహి, భిక్ఖవే, ధమ్మేహి సమన్నాగతా భిక్ఖునీ…పే… సిక్ఖమానా… సామణేరో… సామణేరీ… ఉపాసకో… ఉపాసికా యథాభతం నిక్ఖిత్తా ఏవం నిరయే. కతమేహి పఞ్చహి? పాణాతిపాతినీ హోతి, అదిన్నాదాయినీ హోతి, కామేసుమిచ్ఛాచారినీ హోతి, ముసావాదినీ హోతి, సురామేరయమజ్జపమాదట్ఠాయినీ హోతి. ఇమేహి ఖో, భిక్ఖవే, పఞ్చహి ధమ్మేహి సమన్నాగతా ఉపాసికా యథాభతం నిక్ఖిత్తా ఏవం నిరయే.

‘‘పఞ్చహి, భిక్ఖవే, ధమ్మేహి సమన్నాగతా ఉపాసికా యథాభతం నిక్ఖిత్తా ఏవం సగ్గే. కతమేహి పఞ్చహి? పాణాతిపాతా పటివిరతా హోతి, అదిన్నాదానా పటివిరతా హోతి, కామేసుమిచ్ఛాచారా పటివిరతా హోతి, ముసావాదా పటివిరతా హోతి, సురామేరయమజ్జపమాదట్ఠానా పటివిరతా హోతి. ఇమేహి ఖో, భిక్ఖవే, పఞ్చహి ధమ్మేహి సమన్నాగతా ఉపాసికా యథాభతం నిక్ఖిత్తా ఏవం సగ్గే’’తి. సత్తమం.

౮. ఆజీవకసుత్తం

౨౯౩. ‘‘పఞ్చహి, భిక్ఖవే, ధమ్మేహి సమన్నాగతో ఆజీవకో యథాభతం నిక్ఖిత్తో ఏవం నిరయే. కతమేహి పఞ్చహి? పాణాతిపాతీ హోతి, అదిన్నాదాయీ హోతి, అబ్రహ్మచారీ హోతి, ముసావాదీ హోతి, సురామేరయమజ్జపమాదట్ఠాయీ హోతి. ఇమేహి ఖో, భిక్ఖవే, పఞ్చహి ధమ్మేహి సమన్నాగతో ఆజీవకో యథాభతం నిక్ఖిత్తో ఏవం నిరయే’’తి. అట్ఠమం.

౯-౧౭. నిగణ్ఠసుత్తాదినవకం

౨౯౪-౩౦౨. ‘‘పఞ్చహి, భిక్ఖవే, ధమ్మేహి సమన్నాగతో నిగణ్ఠో…పే… ముణ్డసావకో… జటిలకో… పరిబ్బాజకో… మాగణ్డికో… తేదణ్డికో… ఆరుద్ధకో… గోతమకో… దేవధమ్మికో యథాభతం నిక్ఖిత్తో ఏవం నిరయే. కతమేహి పఞ్చహి? పాణాతిపాతీ హోతి, అదిన్నాదాయీ హోతి…పే… సురామేరయమజ్జపమాదట్ఠాయీ హోతి. ఇమేహి ఖో, భిక్ఖవే, పఞ్చహి ధమ్మేహి సమన్నాగతో దేవధమ్మికో యథాభతం నిక్ఖిత్తో ఏవం నిరయే’’తి. సత్తరసమం.

సిక్ఖాపదపేయ్యాలం నిట్ఠితం.