౧. భత్తుద్దేసకసుత్తం

౨౭౨. ‘‘పఞ్చహి, భిక్ఖవే, ధమ్మేహి సమన్నాగతో భత్తుద్దేసకో న సమ్మన్నితబ్బో [న సమ్మనితబ్బో (క.) చూళవ. ౩౨౬ పస్సితబ్బం]. కతమేహి పఞ్చహి? ఛన్దాగతిం గచ్ఛతి, దోసాగతిం గచ్ఛతి, మోహాగతిం గచ్ఛతి, భయాగతిం గచ్ఛతి, ఉద్దిట్ఠానుద్దిట్ఠం న జానాతి – ఇమేహి ఖో, భిక్ఖవే, పఞ్చహి ధమ్మేహి సమన్నాగతో భత్తుద్దేసకో న సమ్మన్నితబ్బో.

‘‘పఞ్చహి, భిక్ఖవే, ధమ్మేహి సమన్నాగతో భత్తుద్దేసకో సమ్మన్నితబ్బో. కతమేహి పఞ్చహి? న ఛన్దాగతిం గచ్ఛతి, న దోసాగతిం గచ్ఛతి, న మోహాగతిం గచ్ఛతి, న భయాగతిం గచ్ఛతి, ఉద్దిట్ఠానుద్దిట్ఠం జానాతి – ఇమేహి ఖో, భిక్ఖవే, పఞ్చహి ధమ్మేహి సమన్నాగతో భత్తుద్దేసకో సమ్మన్నితబ్బోతి.

‘‘పఞ్చహి, భిక్ఖవే, ధమ్మేహి సమన్నాగతో భత్తుద్దేసకో సమ్మతో [సమ్మతోపి (సీ.)] న పేసేతబ్బో…పే… సమ్మతో పేసేతబ్బో… బాలో వేదితబ్బో… పణ్డితో వేదితబ్బో… ఖతం ఉపహతం అత్తానం పరిహరతి… అక్ఖతం అనుపహతం అత్తానం పరిహరతి… యథాభతం నిక్ఖిత్తో ఏవం నిరయే… యథాభతం నిక్ఖిత్తో ఏవం సగ్గే. కతమేహి పఞ్చహి? న ఛన్దాగతిం గచ్ఛతి, న దోసాగతిం గచ్ఛతి, న మోహాగతిం గచ్ఛతి, న భయాగతిం గచ్ఛతి, ఉద్దిట్ఠానుద్దిట్ఠం జానాతి – ఇమేహి ఖో, భిక్ఖవే, పఞ్చహి ధమ్మేహి సమన్నాగతో భత్తుద్దేసకో యథాభతం నిక్ఖిత్తో ఏవం సగ్గే’’తి. పఠమం.