౧. ఉపసమ్పాదేతబ్బసుత్తం

౨౫౧. [మహావ. ౮౪] ‘‘పఞ్చహి, భిక్ఖవే, ధమ్మేహి సమన్నాగతేన భిక్ఖునా ఉపసమ్పాదేతబ్బం. కతమేహి పఞ్చహి? ఇధ, భిక్ఖవే, భిక్ఖు అసేఖేన సీలక్ఖన్ధేన సమన్నాగతో హోతి; అసేఖేన సమాధిక్ఖన్ధేన సమన్నాగతో హోతి; అసేఖేన పఞ్ఞాక్ఖన్ధేన సమన్నాగతో హోతి; అసేఖేన విముత్తిక్ఖన్ధేన సమన్నాగతో హోతి; అసేఖేన విముత్తిఞాణదస్సనక్ఖన్ధేన సమన్నాగతో హోతి. ఇమేహి ఖో, భిక్ఖవే, పఞ్చహి ధమ్మేహి సమన్నాగతేన భిక్ఖునా ఉపసమ్పాదేతబ్బ’’న్తి. పఠమం.