౭. సమాధిసుత్తం

౨౭. ‘‘సమాధిం, భిక్ఖవే, భావేథ అప్పమాణం నిపకా పతిస్సతా. సమాధిం, భిక్ఖవే, భావయతం అప్పమాణం నిపకానం పతిస్సతానం పఞ్చ ఞాణాని పచ్చత్తఞ్ఞేవ ఉప్పజ్జన్తి. కతమాని పఞ్చ? ‘అయం సమాధి పచ్చుప్పన్నసుఖో చేవ ఆయతిఞ్చ సుఖవిపాకో’తి పచ్చత్తఞ్ఞేవ ఞాణం ఉప్పజ్జతి, ‘అయం సమాధి అరియో నిరామిసో’తి పచ్చత్తఞ్ఞేవ ఞాణం ఉప్పజ్జతి, ‘అయం సమాధి అకాపురిససేవితో’తి [మహాపురిససేవితోతి (క.)] పచ్చత్తఞ్ఞేవ ఞాణం ఉప్పజ్జతి, ‘అయం సమాధి సన్తో పణీతో పటిప్పస్సద్ధలద్ధో ఏకోదిభావాధిగతో, న సఙ్ఖారనిగ్గయ్హవారితగతో’తి [న చ ససఙ్ఖారనిగ్గయ్హవారితప్పతితోతి (సీ.), న చ ససఙ్ఖారనిగ్గయ్హవారితపత్తోతి (స్యా.), న చ ససఙ్ఖారనిగ్గయ్హవారివావటోతి (క.), న ససఙ్ఖారనిగ్గయ్హవారియాధిగతోతి (?) దీ. ని. ౩.౩౫౫; అ. ని. ౩.౧౦౨; ౯.౨౭] పచ్చత్తఞ్ఞేవ ఞాణం ఉప్పజ్జతి, ‘సతో ఖో పనాహం ఇమం సమాపజ్జామి సతో వుట్ఠహామీ’తి [సో ఖో పనాహం ఇమం సమాధిం సతోవ సమాపజ్జామి, సతో ఉట్ఠహామీతి (సీ. స్యా. కం.)] పచ్చత్తఞ్ఞేవ ఞాణం ఉప్పజ్జతి.

‘‘సమాధిం, భిక్ఖవే, భావేథ అప్పమాణం నిపకా పతిస్సతా. సమాధిం, భిక్ఖవే, భావయతం అప్పమాణం నిపకానం పతిస్సతానం ఇమాని పఞ్చ ఞాణాని పచ్చత్తఞ్ఞేవ ఉప్పజ్జన్తీ’’తి. సత్తమం.