౨. దుతియఅగారవసుత్తం

౨౨. ‘‘సో వత, భిక్ఖవే, భిక్ఖు అగారవో అప్పతిస్సో అసభాగవుత్తికో ‘సబ్రహ్మచారీసు ఆభిసమాచారికం ధమ్మం పరిపూరేస్సతీ’తి నేతం ఠానం విజ్జతి. ‘ఆభిసమాచారికం ధమ్మం అపరిపూరేత్వా సేఖం ధమ్మం పరిపూరేస్సతీ’తి నేతం ఠానం విజ్జతి. ‘సేఖం ధమ్మం అపరిపూరేత్వా సీలక్ఖన్ధం పరిపూరేస్సతీ’తి నేతం ఠానం విజ్జతి. ‘సీలక్ఖన్ధం అపరిపూరేత్వా సమాధిక్ఖన్ధం పరిపూరేస్సతీ’తి నేతం ఠానం విజ్జతి. ‘సమాధిక్ఖన్ధం అపరిపూరేత్వా పఞ్ఞాక్ఖన్ధం పరిపూరేస్సతీ’తి నేతం ఠానం విజ్జతి.

‘‘సో వత, భిక్ఖవే, భిక్ఖు సగారవో సప్పతిస్సో సభాగవుత్తికో ‘సబ్రహ్మచారీసు ఆభిసమాచారికం ధమ్మం పరిపూరేస్సతీ’తి ఠానమేతం విజ్జతి. ‘ఆభిసమాచారికం ధమ్మం పరిపూరేత్వా సేఖం ధమ్మం పరిపూరేస్సతీ’తి ఠానమేతం విజ్జతి. సేఖం ధమ్మం పరిపూరేత్వా సీలక్ఖన్ధం పరిపూరేస్సతీ’తి ఠానమేతం విజ్జతి. ‘సీలక్ఖన్ధం పరిపూరేత్వా సమాధిక్ఖన్ధం పరిపూరేస్సతీ’తి ఠానమేతం విజ్జతి. ‘సమాధిక్ఖన్ధం పరిపూరేత్వా పఞ్ఞాక్ఖన్ధం పరిపూరేస్సతీ’తి ఠానమేతం విజ్జతీ’’తి. దుతియం.