౧. అననుస్సుతసుత్తం

౧౧. ‘‘పుబ్బాహం, భిక్ఖవే, అననుస్సుతేసు ధమ్మేసు అభిఞ్ఞావోసానపారమిప్పత్తో పటిజానామి. పఞ్చిమాని, భిక్ఖవే, తథాగతస్స తథాగతబలాని, యేహి బలేహి సమన్నాగతో తథాగతో ఆసభం ఠానం పటిజానాతి, పరిసాసు సీహనాదం నదతి, బ్రహ్మచక్కం పవత్తేతి. కతమాని పఞ్చ? సద్ధాబలం, హిరీబలం, ఓత్తప్పబలం, వీరియబలం, పఞ్ఞాబలం – ఇమాని ఖో, భిక్ఖవే, పఞ్చ తథాగతస్స తథాగతబలాని యేహి బలేహి సమన్నాగతో తథాగతో ఆసభం ఠానం పటిజానాతి, పరిసాసు సీహనాదం నదతి, బ్రహ్మచక్కం పవత్తేతీ’’తి. పఠమం.