౧. సేఖబలవగ్గో

౧. సంఖిత్తసుత్తం

౧. ఏవం మే సుతం – ఏకం సమయం భగవా సావత్థియం విహరతి జేతవనే అనాథపిణ్డికస్స ఆరామే. తత్ర ఖో భగవా భిక్ఖూ ఆమన్తేసి – ‘‘భిక్ఖవో’’తి. ‘‘భదన్తే’’తి తే భిక్ఖూ భగవతో పచ్చస్సోసుం. భగవా ఏతదవోచ –

‘‘పఞ్చిమాని, భిక్ఖవే, సేఖబలాని [సేక్ఖబలాని (క.)]. కతమాని పఞ్చ? సద్ధాబలం, హిరీబలం [హిరిబలం (సీ. పీ.)], ఓత్తప్పబలం, వీరియబలం [విరియబలం (సీ. స్యా. కం. పీ.)], పఞ్ఞాబలం – ఇమాని ఖో, భిక్ఖవే, పఞ్చ సేఖబలాని.

‘‘తస్మాతిహ, భిక్ఖవే, ఏవం సిక్ఖితబ్బం – ‘సద్ధాబలేన సమన్నాగతా భవిస్సామ సేఖబలేన, హిరీబలేన సమన్నాగతా భవిస్సామ సేఖబలేన, ఓత్తప్పబలేన సమన్నాగతా భవిస్సామ సేఖబలేన, వీరియబలేన సమన్నాగతా భవిస్సామ సేఖబలేన, పఞ్ఞాబలేన సమన్నాగతా భవిస్సామ సేఖబలేనా’తి. ఏవఞ్హి వో, భిక్ఖవే, సిక్ఖితబ్బ’’న్తి. ఇదమవోచ భగవా. అత్తమనా తే భిక్ఖూ భగవతో భాసితం అభినన్దున్తి. పఠమం.

౨. విత్థతసుత్తం

౨. ‘‘పఞ్చిమాని, భిక్ఖవే, సేఖబలాని. కతమాని పఞ్చ? సద్ధాబలం, హిరీబలం, ఓత్తప్పబలం, వీరియబలం, పఞ్ఞాబలం. కతమఞ్చ, భిక్ఖవే, సద్ధాబలం? ఇధ, భిక్ఖవే, అరియసావకో సద్ధో హోతి, సద్దహతి తథాగతస్స బోధిం – ‘ఇతిపి సో భగవా అరహం సమ్మాసమ్బుద్ధో విజ్జాచరణసమ్పన్నో సుగతో లోకవిదూ అనుత్తరో పురిసదమ్మసారథి సత్థా దేవమనుస్సానం బుద్ధో భగవా’తి. ఇదం వుచ్చతి, భిక్ఖవే, సద్ధాబలం.

‘‘కతమఞ్చ, భిక్ఖవే, హిరీబలం? ఇధ, భిక్ఖవే, అరియసావకో హిరిమా హోతి, హిరీయతి కాయదుచ్చరితేన వచీదుచ్చరితేన మనోదుచ్చరితేన, హిరీయతి పాపకానం అకుసలానం ధమ్మానం సమాపత్తియా. ఇదం వుచ్చతి, భిక్ఖవే, హిరీబలం.

‘‘కతమఞ్చ, భిక్ఖవే, ఓత్తప్పబలం? ఇధ, భిక్ఖవే, అరియసావకో ఓత్తప్పీ హోతి, ఓత్తప్పతి కాయదుచ్చరితేన వచీదుచ్చరితేన మనోదుచ్చరితేన, ఓత్తప్పతి పాపకానం అకుసలానం ధమ్మానం సమాపత్తియా. ఇదం వుచ్చతి, భిక్ఖవే, ఓత్తప్పబలం.

‘‘కతమఞ్చ, భిక్ఖవే, వీరియబలం? ఇధ, భిక్ఖవే, అరియసావకో ఆరద్ధవీరియో విహరతి అకుసలానం ధమ్మానం పహానాయ, కుసలానం ధమ్మానం ఉపసమ్పదాయ, థామవా దళ్హపరక్కమో అనిక్ఖిత్తధురో కుసలేసు ధమ్మేసు. ఇదం వుచ్చతి, భిక్ఖవే, వీరియబలం.

‘‘కతమఞ్చ, భిక్ఖవే, పఞ్ఞాబలం? ఇధ, భిక్ఖవే, అరియసావకో పఞ్ఞవా హోతి ఉదయత్థగామినియా పఞ్ఞాయ సమన్నాగతో అరియాయ నిబ్బేధికాయ సమ్మా దుక్ఖక్ఖయగామినియా. ఇదం వుచ్చతి, భిక్ఖవే, పఞ్ఞాబలం. ఇమాని ఖో, భిక్ఖవే, పఞ్చ సేఖబలాని.

‘‘తస్మాతిహ, భిక్ఖవే, ఏవం సిక్ఖితబ్బం – ‘సద్ధాబలేన సమన్నాగతా భవిస్సామ సేఖబలేన, హిరీబలేన… ఓత్తప్పబలేన … వీరియబలేన… పఞ్ఞాబలేన సమన్నాగతా భవిస్సామ సేఖబలేనా’తి. ఏవఞ్హి ఖో, భిక్ఖవే, సిక్ఖితబ్బ’’న్తి. దుతియం.

౩. దుక్ఖసుత్తం

౩. ‘‘పఞ్చహి, భిక్ఖవే, ధమ్మేహి సమన్నాగతో భిక్ఖు దిట్ఠేవ ధమ్మే దుక్ఖం విహరతి సవిఘాతం సఉపాయాసం సపరిళాహం, కాయస్స చ భేదా పరం మరణా దుగ్గతి పాటికఙ్ఖా. కతమేహి పఞ్చహి? ఇధ, భిక్ఖవే, భిక్ఖు అస్సద్ధో హోతి, అహిరికో హోతి, అనోత్తప్పీ హోతి, కుసీతో హోతి, దుప్పఞ్ఞో హోతి. ఇమేహి ఖో, భిక్ఖవే, పఞ్చహి ధమ్మేహి సమన్నాగతో భిక్ఖు దిట్ఠేవ ధమ్మే దుక్ఖం విహరతి సవిఘాతం సఉపాయాసం సపరిళాహం, కాయస్స చ భేదా పరం మరణా దుగ్గతి పాటికఙ్ఖా.

‘‘పఞ్చహి, భిక్ఖవే, ధమ్మేహి సమన్నాగతో భిక్ఖు దిట్ఠేవ ధమ్మే సుఖం విహరతి అవిఘాతం అనుపాయాసం అపరిళాహం, కాయస్స చ భేదా పరం మరణా సుగతి పాటికఙ్ఖా. కతమేహి పఞ్చహి? ఇధ, భిక్ఖవే, భిక్ఖు సద్ధో హోతి, హిరీమా హోతి, ఓత్తప్పీ హోతి, ఆరద్ధవీరియో హోతి, పఞ్ఞవా హోతి. ఇమేహి ఖో, భిక్ఖవే, పఞ్చహి ధమ్మేహి సమన్నాగతో భిక్ఖు దిట్ఠేవ ధమ్మే సుఖం విహరతి అవిఘాతం అనుపాయాసం అపరిళాహం, కాయస్స చ భేదా పరం మరణా సుగతి పాటికఙ్ఖా’’తి. తతియం.

౪. యథాభతసుత్తం

౪. ‘‘పఞ్చహి, భిక్ఖవే, ధమ్మేహి సమన్నాగతో భిక్ఖు యథాభతం నిక్ఖిత్తో ఏవం నిరయే. కతమేహి పఞ్చహి? ఇధ, భిక్ఖవే, భిక్ఖు అస్సద్ధో హోతి, అహిరికో హోతి, అనోత్తప్పీ హోతి, కుసీతో హోతి, దుప్పఞ్ఞో హోతి. ఇమేహి ఖో, భిక్ఖవే, పఞ్చహి ధమ్మేహి సమన్నాగతో భిక్ఖు యథాభతం నిక్ఖిత్తో ఏవం నిరయే.

‘‘పఞ్చహి, భిక్ఖవే, ధమ్మేహి సమన్నాగతో భిక్ఖు యథాభతం నిక్ఖిత్తో ఏవం సగ్గే. కతమేహి పఞ్చహి? ఇధ, భిక్ఖవే, భిక్ఖు సద్ధో హోతి, హిరీమా హోతి, ఓత్తప్పీ హోతి, ఆరద్ధవీరియో హోతి, పఞ్ఞవా హోతి. ఇమేహి ఖో, భిక్ఖవే, పఞ్చహి ధమ్మేహి సమన్నాగతో భిక్ఖు యథాభతం నిక్ఖిత్తో ఏవం సగ్గే’’తి. చతుత్థం.

౫. సిక్ఖాసుత్తం

౫. ‘‘యో హి కోచి, భిక్ఖవే, భిక్ఖు వా భిక్ఖునీ వా సిక్ఖం పచ్చక్ఖాయ హీనాయావత్తతి, తస్స దిట్ఠేవ [దిట్ఠే చేవ (సీ.)] ధమ్మే పఞ్చ సహధమ్మికా వాదానుపాతా [వాదానువాదా (అ. ని. ౮.౧౨; అ. ని. ౩.౫౮)] గారయ్హా ఠానా ఆగచ్ఛన్తి. కతమే పఞ్చ? సద్ధాపి నామ తే నాహోసి కుసలేసు ధమ్మేసు, హిరీపి నామ తే నాహోసి కుసలేసు ధమ్మేసు, ఓత్తప్పమ్పి నామ తే నాహోసి కుసలేసు ధమ్మేసు, వీరియమ్పి నామ తే నాహోసి కుసలేసు ధమ్మేసు, పఞ్ఞాపి నామ తే నాహోసి కుసలేసు ధమ్మేసు. యో హి కోచి, భిక్ఖవే, భిక్ఖు వా భిక్ఖునీ వా సిక్ఖం పచ్చక్ఖాయ హీనాయావత్తతి, తస్స దిట్ఠేవ ధమ్మే ఇమే పఞ్చ సహధమ్మికా వాదానుపాతా గారయ్హా ఠానా ఆగచ్ఛన్తి.

‘‘యో హి కోచి, భిక్ఖవే, భిక్ఖు వా భిక్ఖునీ వా సహాపి దుక్ఖేన సహాపి దోమనస్సేన అస్సుముఖో [అస్సుముఖోపి (స్యా.)] రుదమానో పరిపుణ్ణం పరిసుద్ధం బ్రహ్మచరియం చరతి, తస్స దిట్ఠేవ ధమ్మే పఞ్చ సహధమ్మికా పాసంసా ఠానా [పాసంసం ఠానం (స్యా.)] ఆగచ్ఛన్తి. కతమే పఞ్చ? సద్ధాపి నామ తే అహోసి కుసలేసు ధమ్మేసు, హిరీపి నామ తే అహోసి కుసలేసు ధమ్మేసు, ఓత్తప్పమ్పి నామ తే అహోసి కుసలేసు ధమ్మేసు, వీరియమ్పి నామ తే అహోసి కుసలేసు ధమ్మేసు, పఞ్ఞాపి నామ తే అహోసి కుసలేసు ధమ్మేసు. యో హి కోచి, భిక్ఖవే, భిక్ఖు వా భిక్ఖునీ వా సహాపి దుక్ఖేన సహాపి దోమనస్సేన అస్సుముఖో రుదమానో పరిపుణ్ణం పరిసుద్ధం బ్రహ్మచరియం చరతి, తస్స దిట్ఠేవ ధమ్మే ఇమే పఞ్చ సహధమ్మికా పాసంసా ఠానా ఆగచ్ఛన్తీ’’తి. పఞ్చమం.

౬. సమాపత్తిసుత్తం

౬. ‘‘న తావ, భిక్ఖవే, అకుసలస్స సమాపత్తి హోతి యావ సద్ధా పచ్చుపట్ఠితా హోతి కుసలేసు ధమ్మేసు. యతో చ ఖో, భిక్ఖవే, సద్ధా అన్తరహితా హోతి, అసద్ధియం పరియుట్ఠాయ తిట్ఠతి; అథ అకుసలస్స సమాపత్తి హోతి.

‘‘న తావ, భిక్ఖవే, అకుసలస్స సమాపత్తి హోతి యావ హిరీ పచ్చుపట్ఠితా హోతి కుసలేసు ధమ్మేసు. యతో చ ఖో, భిక్ఖవే, హిరీ అన్తరహితా హోతి, అహిరికం పరియుట్ఠాయ తిట్ఠతి; అథ అకుసలస్స సమాపత్తి హోతి.

‘‘న తావ, భిక్ఖవే, అకుసలస్స సమాపత్తి హోతి యావ ఓత్తప్పం పచ్చుపట్ఠితం హోతి కుసలేసు ధమ్మేసు. యతో చ ఖో, భిక్ఖవే, ఓత్తప్పం అన్తరహితం హోతి, అనోత్తప్పం పరియుట్ఠాయ తిట్ఠతి; అథ అకుసలస్స సమాపత్తి హోతి.

‘‘న తావ, భిక్ఖవే, అకుసలస్స సమాపత్తి హోతి యావ వీరియం పచ్చుపట్ఠితం హోతి కుసలేసు ధమ్మేసు. యతో చ ఖో, భిక్ఖవే, వీరియం అన్తరహితం హోతి, కోసజ్జం పరియుట్ఠాయ తిట్ఠతి; అథ అకుసలస్స సమాపత్తి హోతి.

‘‘న తావ, భిక్ఖవే, అకుసలస్స సమాపత్తి హోతి యావ పఞ్ఞా పచ్చుపట్ఠితా హోతి కుసలేసు ధమ్మేసు. యతో చ ఖో, భిక్ఖవే, పఞ్ఞా అన్తరహితా హోతి, దుప్పఞ్ఞా [దుప్పఞ్ఞం (క.)] పరియుట్ఠాయ తిట్ఠతి; అథ అకుసలస్స సమాపత్తి హోతీ’’తి. ఛట్ఠం.

౭. కామసుత్తం

౭. ‘‘యేభుయ్యేన, భిక్ఖవే, సత్తా కామేసు లళితా [పలాళితా (సీ.)]. అసితబ్యాభఙ్గిం [అసితబ్యాభఙ్గి చేపి (?)], భిక్ఖవే, కులపుత్తో ఓహాయ అగారస్మా అనగారియం పబ్బజితో హోతి, ‘సద్ధాపబ్బజితో కులపుత్తో’తి అలం వచనాయ. తం కిస్స హేతు? లబ్భా [లబ్భా హి (స్యా.)], భిక్ఖవే, యోబ్బనేన కామా తే చ ఖో యాదిసా వా తాదిసా వా. యే చ, భిక్ఖవే, హీనా కామా యే చ మజ్ఝిమా కామా యే చ పణీతా కామా, సబ్బే కామా ‘కామా’త్వేవ సఙ్ఖం గచ్ఛన్తి. సేయ్యథాపి, భిక్ఖవే, దహరో కుమారో మన్దో ఉత్తానసేయ్యకో ధాతియా పమాదమన్వాయ కట్ఠం వా కఠలం [కథలం (క.)] వా ముఖే ఆహరేయ్య. తమేనం ధాతి సీఘం సీఘం [సీఘసీఘం (సీ.)] మనసి కరేయ్య; సీఘం సీఘం మనసి కరిత్వా సీఘం సీఘం ఆహరేయ్య. నో చే సక్కుణేయ్య సీఘం సీఘం ఆహరితుం, వామేన హత్థేన సీసం పరిగ్గహేత్వా దక్ఖిణేన హత్థేన వఙ్కఙ్గులిం కరిత్వా సలోహితమ్పి ఆహరేయ్య. తం కిస్స హేతు? ‘అత్థేసా, భిక్ఖవే, కుమారస్స విహేసా; నేసా నత్థీ’తి వదామి. కరణీయఞ్చ ఖో ఏతం [ఏవం (క.)], భిక్ఖవే, ధాతియా అత్థకామాయ హితేసినియా అనుకమ్పికాయ, అనుకమ్పం ఉపాదాయ. యతో చ ఖో, భిక్ఖవే, సో కుమారో వుద్ధో హోతి అలంపఞ్ఞో, అనపేక్ఖా దాని [అనపేక్ఖా పన (సీ. స్యా. కం.)], భిక్ఖవే, ధాతి తస్మిం కుమారే హోతి – ‘అత్తగుత్తో దాని కుమారో నాలం పమాదాయా’తి.

‘‘ఏవమేవం ఖో, భిక్ఖవే, యావకీవఞ్చ భిక్ఖునో సద్ధాయ అకతం హోతి కుసలేసు ధమ్మేసు, హిరియా అకతం హోతి కుసలేసు ధమ్మేసు, ఓత్తప్పేన అకతం హోతి కుసలేసు ధమ్మేసు, వీరియేన అకతం హోతి కుసలేసు ధమ్మేసు, పఞ్ఞాయ అకతం హోతి కుసలేసు ధమ్మేసు, అనురక్ఖితబ్బో తావ మే సో, భిక్ఖవే, భిక్ఖు హోతి. యతో చ ఖో, భిక్ఖవే, భిక్ఖునో సద్ధాయ కతం హోతి కుసలేసు ధమ్మేసు, హిరియా కతం హోతి కుసలేసు ధమ్మేసు, ఓత్తప్పేన కతం హోతి కుసలేసు ధమ్మేసు, వీరియేన కతం హోతి కుసలేసు ధమ్మేసు, పఞ్ఞాయ కతం హోతి కుసలేసు ధమ్మేసు, అనపేక్ఖో దానాహం, భిక్ఖవే [పనాహం (సీ. స్యా. కం.)], తస్మిం భిక్ఖుస్మిం హోమి – ‘అత్తగుత్తో దాని భిక్ఖు నాలం పమాదాయా’’’తి. సత్తమం.

౮. చవనసుత్తం

౮. ‘‘పఞ్చహి, భిక్ఖవే, ధమ్మేహి సమన్నాగతో భిక్ఖు చవతి, నప్పతిట్ఠాతి సద్ధమ్మే. కతమేహి పఞ్చహి? అసద్ధో, భిక్ఖవే, భిక్ఖు చవతి, నప్పతిట్ఠాతి సద్ధమ్మే. అహిరికో, భిక్ఖవే, భిక్ఖు చవతి, నప్పతిట్ఠాతి సద్ధమ్మే. అనోత్తప్పీ, భిక్ఖవే, భిక్ఖు చవతి, నప్పతిట్ఠాతి సద్ధమ్మే. కుసీతో, భిక్ఖవే, భిక్ఖు చవతి, నప్పతిట్ఠాతి సద్ధమ్మే. దుప్పఞ్ఞో, భిక్ఖవే, భిక్ఖు చవతి, నప్పతిట్ఠాతి సద్ధమ్మే. ఇమేహి ఖో, భిక్ఖవే, పఞ్చహి ధమ్మేహి సమన్నాగతో భిక్ఖు చవతి, నప్పతిట్ఠాతి సద్ధమ్మే.

‘‘పఞ్చహి, భిక్ఖవే, ధమ్మేహి సమన్నాగతో భిక్ఖు న చవతి, పతిట్ఠాతి సద్ధమ్మే. కతమేహి పఞ్చహి? సద్ధో, భిక్ఖవే, భిక్ఖు న చవతి, పతిట్ఠాతి సద్ధమ్మే. హిరీమా, భిక్ఖవే, భిక్ఖు న చవతి, పతిట్ఠాతి సద్ధమ్మే. ఓత్తప్పీ, భిక్ఖవే, భిక్ఖు న చవతి, పతిట్ఠాతి సద్ధమ్మే. ఆరద్ధవీరియో, భిక్ఖవే, భిక్ఖు న చవతి, పతిట్ఠాతి సద్ధమ్మే. పఞ్ఞవా, భిక్ఖవే, భిక్ఖు న చవతి, పతిట్ఠాతి సద్ధమ్మే. ఇమేహి ఖో, భిక్ఖవే, పఞ్చహి ధమ్మేహి సమన్నాగతో భిక్ఖు న చవతి, పతిట్ఠాతి సద్ధమ్మే’’తి. అట్ఠమం.

౯. పఠమఅగారవసుత్తం

౯. ‘‘పఞ్చహి, భిక్ఖవే, ధమ్మేహి సమన్నాగతో భిక్ఖు అగారవో అప్పతిస్సో చవతి, నప్పతిట్ఠాతి సద్ధమ్మే. కతమేహి పఞ్చహి? అస్సద్ధో, భిక్ఖవే, భిక్ఖు అగారవో అప్పతిస్సో చవతి, నప్పతిట్ఠాతి సద్ధమ్మే. అహిరికో, భిక్ఖవే, భిక్ఖు అగారవో అప్పతిస్సో చవతి, నప్పతిట్ఠాతి సద్ధమ్మే. అనోత్తప్పీ, భిక్ఖవే, భిక్ఖు అగారవో అప్పతిస్సో చవతి, నప్పతిట్ఠాతి సద్ధమ్మే. కుసీతో, భిక్ఖవే, భిక్ఖు అగారవో అప్పతిస్సో చవతి, నప్పతిట్ఠాతి సద్ధమ్మే. దుప్పఞ్ఞో, భిక్ఖవే, భిక్ఖు అగారవో అప్పతిస్సో చవతి, నప్పతిట్ఠాతి సద్ధమ్మే. ఇమేహి ఖో, భిక్ఖవే, పఞ్చహి ధమ్మేహి సమన్నాగతో భిక్ఖు అగారవో అప్పతిస్సో చవతి, నప్పతిట్ఠాతి సద్ధమ్మే.

‘‘పఞ్చహి, భిక్ఖవే, ధమ్మేహి సమన్నాగతో భిక్ఖు సగారవో సప్పతిస్సో న చవతి, పతిట్ఠాతి సద్ధమ్మే. కతమేహి పఞ్చహి? సద్ధో, భిక్ఖవే, భిక్ఖు సగారవో సప్పతిస్సో న చవతి, పతిట్ఠాతి సద్ధమ్మే. హిరిమా, భిక్ఖవే, భిక్ఖు సగారవో సప్పతిస్సో న చవతి, పతిట్ఠాతి సద్ధమ్మే. ఓత్తప్పీ, భిక్ఖవే, భిక్ఖు సగారవో సప్పతిస్సో న చవతి, పతిట్ఠాతి సద్ధమ్మే. ఆరద్ధవీరియో, భిక్ఖవే, భిక్ఖు సగారవో సప్పతిస్సో న చవతి, పతిట్ఠాతి సద్ధమ్మే. పఞ్ఞవా, భిక్ఖవే, భిక్ఖు సగారవో సప్పతిస్సో న చవతి, పతిట్ఠాతి సద్ధమ్మే. ఇమేహి ఖో, భిక్ఖవే, పఞ్చహి ధమ్మేహి సమన్నాగతో భిక్ఖు సగారవో సప్పతిస్సో న చవతి, పతిట్ఠాతి సద్ధమ్మే’’తి. నవమం.

౧౦. దుతియఅగారవసుత్తం

౧౦. ‘‘పఞ్చహి, భిక్ఖవే, ధమ్మేహి సమన్నాగతో భిక్ఖు అగారవో అప్పతిస్సో అభబ్బో ఇమస్మిం ధమ్మవినయే వుద్ధిం విరూళ్హిం వేపుల్లం ఆపజ్జితుం. కతమేహి పఞ్చహి? అస్సద్ధో, భిక్ఖవే, భిక్ఖు అగారవో అప్పతిస్సో అభబ్బో ఇమస్మిం ధమ్మవినయే వుద్ధిం విరూళ్హిం వేపుల్లం ఆపజ్జితుం. అహిరికో, భిక్ఖవే, భిక్ఖు అగారవో అప్పతిస్సో అభబ్బో ఇమస్మిం ధమ్మవినయే వుద్ధిం విరూళ్హిం వేపుల్లం ఆపజ్జితుం. అనోత్తప్పీ, భిక్ఖవే, భిక్ఖు అగారవో అప్పతిస్సో అభబ్బో ఇమస్మిం ధమ్మవినయే వుద్ధిం విరూళ్హిం వేపుల్లం ఆపజ్జితుం. కుసీతో, భిక్ఖవే, భిక్ఖు అగారవో అప్పతిస్సో అభబ్బో ఇమస్మిం ధమ్మవినయే వుద్ధిం విరూళ్హిం వేపుల్లం ఆపజ్జితుం. దుప్పఞ్ఞో, భిక్ఖవే, భిక్ఖు అగారవో అప్పతిస్సో అభబ్బో ఇమస్మిం ధమ్మవినయే వుద్ధిం విరూళ్హిం వేపుల్లం ఆపజ్జితుం. ఇమేహి ఖో, భిక్ఖవే, పఞ్చహి ధమ్మేహి సమన్నాగతో భిక్ఖు అగారవో అప్పతిస్సో అభబ్బో ఇమస్మిం ధమ్మవినయే వుద్ధిం విరూళ్హిం వేపుల్లం ఆపజ్జితుం.

‘‘పఞ్చహి, భిక్ఖవే, ధమ్మేహి సమన్నాగతో భిక్ఖు సగారవో సప్పతిస్సో భబ్బో ఇమస్మిం ధమ్మవినయే వుద్ధిం విరూళ్హిం వేపుల్లం ఆపజ్జితుం. కతమేహి పఞ్చహి? సద్ధో, భిక్ఖవే, భిక్ఖు సగారవో సప్పతిస్సో భబ్బో ఇమస్మిం ధమ్మవినయే వుద్ధిం విరూళ్హిం వేపుల్లం ఆపజ్జితుం. హిరీమా, భిక్ఖవే, భిక్ఖు…పే… ఓత్తప్పీ, భిక్ఖవే, భిక్ఖు…పే… ఆరద్ధవీరియో, భిక్ఖవే, భిక్ఖు…పే… పఞ్ఞవా, భిక్ఖవే, భిక్ఖు సగారవో సప్పతిస్సో భబ్బో ఇమస్మిం ధమ్మవినయే వుద్ధిం విరూళ్హిం వేపుల్లం ఆపజ్జితుం. ఇమేహి ఖో, భిక్ఖవే, పఞ్చహి ధమ్మేహి సమన్నాగతో భిక్ఖు సగారవో సప్పతిస్సో భబ్బో ఇమస్మిం ధమ్మవినయే వుద్ధిం విరూళ్హిం వేపుల్లం ఆపజ్జితు’’న్తి. దసమం.

సేఖబలవగ్గో పఠమో.