౪. అతపనీయసుత్తం

౪. ‘‘ద్వేమే, భిక్ఖవే, ధమ్మా అతపనీయా. కతమే ద్వే? ఇధ, భిక్ఖవే, ఏకచ్చస్స కాయసుచరితం కతం హోతి, అకతం హోతి కాయదుచ్చరితం; వచీసుచరితం కతం హోతి, అకతం హోతి వచీదుచ్చరితం; మనోసుచరితం కతం హోతి, అకతం హోతి మనోదుచ్చరితం. సో ‘కాయసుచరితం మే కత’న్తి న తప్పతి, ‘అకతం మే కాయదుచ్చరిత’న్తి న తప్పతి; ‘వచీసుచరితం మే కత’న్తి న తప్పతి, ‘అకతం మే వచీదుచ్చరిత’న్తి న తప్పతి; ‘మనోసుచరితం మే కత’న్తి న తప్పతి, ‘అకతం మే మనోదుచ్చరిత’న్తి న తప్పతి. ఇమే ఖో, భిక్ఖవే, ద్వే ధమ్మా అతపనీయా’’తి. చతుత్థం.