1. சோத³னாதி³புச்சா²விஸ்ஸஜ்ஜனா

359. சோத³னா கிமத்தா²ய, ஸாரணா கிஸ்ஸ காரணா;

ஸங்கோ⁴ கிமத்தா²ய, மதிகம்மம் பன கிஸ்ஸ காரணா.

சோத³னா ஸாரணத்தா²ய, நிக்³க³ஹத்தா²ய ஸாரணா;

ஸங்கோ⁴ பரிக்³க³ஹத்தா²ய, மதிகம்மம் பன பாடியேக்கம்.

மா கோ² துரிதோ அப⁴ணி, மா கோ² சண்டி³கதோ ப⁴ணி;

மா கோ² படிக⁴ம் ஜனயி, ஸசே அனுவிஜ்ஜகோ துவம்.

மா கோ² ஸஹஸா அப⁴ணி, கத²ம் விக்³கா³ஹிகம் அனத்த²ஸம்ஹிதம்;

ஸுத்தே வினயே அனுலோமே, பஞ்ஞத்தே அனுலோமிகே.

அனுயோக³வத்தம் நிஸாமய, குஸலேன பு³த்³தி⁴மதா கதம்;

ஸுவுத்தம் ஸிக்கா²பதா³னுலோமிகம், க³திம் ந நாஸேந்தோ ஸம்பராயிகம்;

ஹிதேஸீ அனுயுஞ்ஜஸ்ஸு, காலேனத்தூ²பஸம்ஹிதம்.

சுதி³தஸ்ஸ ச சோத³கஸ்ஸ ச;

ஸஹஸா வோஹாரம் மா பதா⁴ரேஸி;

சோத³கோ ஆஹ ஆபன்னோதி;

சுதி³தகோ ஆஹ அனாபன்னோதி.

உபோ⁴ அனுக்கி²பந்தோ, படிஞ்ஞானுஸந்தி⁴தேன காரயே;

படிஞ்ஞா லஜ்ஜீஸு கதா, அலஜ்ஜீஸு ஏவம் ந விஜ்ஜதி;

ப³ஹும்பி அலஜ்ஜீ பா⁴ஸேய்ய, வத்தானுஸந்தி⁴தேன [வுத்தானுஸந்தி⁴தேன (ஸீ. ஸ்யா. க.)] காரயே.

அலஜ்ஜீ கீதி³ஸோ ஹோதி, படிஞ்ஞா யஸ்ஸ ந ரூஹதி;

ஏதஞ்ச [ஏவஞ்ச (க.)] தாஹம் புச்சா²மி, கீதி³ஸோ வுச்சதி அலஜ்ஜீ புக்³க³லோ.

ஸஞ்சிச்ச ஆபத்திம் ஆபஜ்ஜதி, ஆபத்திம் பரிகூ³ஹதி;

அக³திக³மனஞ்ச க³ச்ச²தி, ஏதி³ஸோ வுச்சதி அலஜ்ஜீபுக்³க³லோ.

ஸச்சம் அஹம்பி ஜானாமி, ஏதி³ஸோ வுச்சதி அலஜ்ஜீபுக்³க³லோ;

அஞ்ஞஞ்ச தாஹம் புச்சா²மி, கீதி³ஸோ வுச்சதி லஜ்ஜீபுக்³க³லோ.

ஸஞ்சிச்ச ஆபத்திம் நாபஜ்ஜதி, ஆபத்திம் ந பரிகூ³ஹதி;

அக³திக³மனம் ந க³ச்ச²தி, ஏதி³ஸோ வுச்சதி லஜ்ஜீபுக்³க³லோ.

ஸச்சம் அஹம்பி ஜானாமி, ஏதி³ஸோ வுச்சதி லஜ்ஜீபுக்³க³லோ;

அஞ்ஞஞ்ச தாஹம் புச்சா²மி, கீதி³ஸோ வுச்சதி அத⁴ம்மசோத³கோ.

அகாலே சோதே³தி அபூ⁴தேன;

ப²ருஸேன அனத்த²ஸம்ஹிதேன;

தோ³ஸந்தரோ சோதே³தி நோ மேத்தாசித்தோ;

ஏதி³ஸோ வுச்சதி அத⁴ம்மசோத³கோ.

ஸச்சம் அஹம்பி ஜானாமி, ஏதி³ஸோ வுச்சதி அத⁴ம்மசோத³கோ;

அஞ்ஞஞ்ச தாஹம் புச்சா²மி, கீதி³ஸோ வுச்சதி த⁴ம்மசோத³கோ.

காலேன சோதே³தி பூ⁴தேன, ஸண்ஹேன அத்த²ஸம்ஹிதேன;

மேத்தாசித்தோ சோதே³தி நோ தோ³ஸந்தரோ;

ஏதி³ஸோ வுச்சதி த⁴ம்மசோத³கோ.

ஸச்சம் அஹம்பி ஜானாமி, ஏதி³ஸோ வுச்சதி த⁴ம்மசோத³கோ;

அஞ்ஞஞ்ச தாஹம் புச்சா²மி, கீதி³ஸோ வுச்சதி பா³லசோத³கோ.

புப்³பா³பரம் ந ஜானாதி, புப்³பா³பரஸ்ஸ அகோவிதோ³;

அனுஸந்தி⁴வசனபத²ம் ந ஜானாதி;

அனுஸந்தி⁴வசனபத²ஸ்ஸ அகோவிதோ³;

ஏதி³ஸோ வுச்சதி பா³லசோத³கோ.

ஸச்சம் அஹம்பி ஜானாமி, ஏதி³ஸோ வுச்சதி பா³லசோத³கோ;

அஞ்ஞஞ்ச தாஹம் புச்சா²மி, கீதி³ஸோ வுச்சதி பண்டி³தசோத³கோ.

புப்³பா³பரம்பி ஜானாதி, புப்³பா³பரஸ்ஸ கோவிதோ³;

அனுஸந்தி⁴வசனபத²ம் ஜானாதி, அனுஸந்தி⁴வசனபத²ஸ்ஸ கோவிதோ³;

ஏதி³ஸோ வுச்சதி பண்டி³தசோத³கோ.

ஸச்சம் அஹம்பி ஜானாமி, ஏதி³ஸோ வுச்சதி பண்டி³தசோத³கோ;

அஞ்ஞஞ்ச தாஹம் புச்சா²மி, சோத³னா கிந்தி வுச்சதி.

ஸீலவிபத்தியா சோதே³தி, அதோ² ஆசாரதி³ட்டி²யா;

ஆஜீவேனபி சோதே³தி, சோத³னா தேன வுச்சதீதி.

அபரம் கா³தா²ஸங்க³ணிகம் நிட்டி²தம்.