1. காயிகாதி³ஆபத்தி

474. கதி ஆபத்தியோ காயிகா, கதி வாசஸிகா கதா.

சா²தே³ந்தஸ்ஸ கதி ஆபத்தியோ, கதி ஸம்ஸக்³க³பச்சயா.

சா²பத்தியோ காயிகா, ச² வாசஸிகா கதா;

சா²தே³ந்தஸ்ஸ திஸ்ஸோ ஆபத்தியோ, பஞ்ச ஸம்ஸக்³க³பச்சயா.

அருணுக்³கே³ கதி ஆபத்தியோ, கதி யாவததியகா;

கதேத்த² அட்ட² வத்து²கா, கதிஹி ஸப்³ப³ஸங்க³ஹோ.

அருணுக்³கே³ திஸ்ஸோ ஆபத்தியோ, த்³வே யாவததியகா;

ஏகேத்த² அட்ட² வத்து²கா, ஏகேன ஸப்³ப³ஸங்க³ஹோ.

வினயஸ்ஸ கதி மூலானி, யானி பு³த்³தே⁴ன பஞ்ஞத்தா;

வினயக³ருகா கதி வுத்தா, து³ட்டு²ல்லச்சா²த³னா கதி.

வினயஸ்ஸ த்³வே மூலானி, யானி பு³த்³தே⁴ன பஞ்ஞத்தா;

வினயக³ருகா த்³வே வுத்தா, த்³வே து³ட்டு²ல்லச்சா²த³னா.

கா³மந்தரே கதி ஆபத்தியோ, கதி நதி³பாரபச்சயா;

கதிமம்ஸேஸு து²ல்லச்சயம், கதிமம்ஸேஸு து³க்கடம்.

கா³மந்தரே சதஸ்ஸோ ஆபத்தியோ, சதஸ்ஸோ நதி³பாரபச்சயா;

ஏகமம்ஸே து²ல்லச்சயம், நவமம்ஸேஸு து³க்கடம்.

கதி வாசஸிகா ரத்திம், கதி வாசஸிகா தி³வா;

த³த³மானஸ்ஸ கதி ஆபத்தியோ, படிக்³க³ண்ஹந்தஸ்ஸ கித்தகா.

த்³வே வாசஸிகா ரத்திம், த்³வே வாசஸிகா தி³வா;

த³த³மானஸ்ஸ திஸ்ஸோ ஆபத்தியோ, சத்தாரோ ச படிக்³க³ஹே.