3. பாராஜிகாதி³

473. சத்தாரோ பாராஜிகா கதிஹி ஸமுட்டா²னேஹி ஸமுட்ட²ந்தி? சத்தாரோ பாராஜிகா தீஹி ஸமுட்டா²னேஹி ஸமுட்ட²ந்தி – ஸியா காயதோ ச சித்ததோ ச ஸமுட்ட²ந்தி, ந வாசதோ; ஸியா வாசதோ ச சித்ததோ ச ஸமுட்ட²ந்தி, ந காயதோ; ஸியா காயதோ ச வாசதோ ச சித்ததோ ச ஸமுட்ட²ந்தி.

தேரஸ ஸங்கா⁴தி³ஸேஸா கதிஹி ஸமுட்டா²னேஹி ஸமுட்ட²ந்தி? தேரஸ ஸங்கா⁴தி³ஸேஸா ச²ஹி ஸமுட்டா²னேஹி ஸமுட்ட²ந்தி – ஸியா காயதோ ஸமுட்ட²ந்தி, ந வாசதோ ந சித்ததோ; ஸியா வாசதோ ஸமுட்ட²ந்தி, ந காயதோ ந சித்ததோ; ஸியா காயதோ ச வாசதோ ந ஸமுட்ட²ந்தி, ந சித்ததோ; ஸியா காயதோ ச சித்ததோ ச ஸமுட்ட²ந்தி, ந வாசதோ; ஸியா வாசதோ ச சித்ததோ ச ஸமுட்ட²ந்தி, ந காயதோ; ஸியா காயதோ ச வாசதோ ச சித்ததோ ச ஸமுட்ட²ந்தி.

த்³வே அனியதா கதிஹி ஸமுட்டா²னேஹி ஸமுட்ட²ந்தி? த்³வே அனியதா தீஹி ஸமுட்டா²னேஹி ஸமுட்ட²ந்தி – ஸியா காயதோ ச சித்ததோ ச ஸமுட்ட²ந்தி, ந வாசதோ; ஸியா வாசதோ ச சித்ததோ ச ஸமுட்ட²ந்தி, ந காயதோ; ஸியா காயதோ ச வாசதோ ச சித்ததோ ச ஸமுட்ட²ந்தி.

திம்ஸ நிஸ்ஸக்³கி³யா பாசித்தியா கதிஹி ஸமுட்டா²னேஹி ஸமுட்ட²ந்தி? திம்ஸ நிஸ்ஸக்³கி³யா பாசித்தியா ச²ஹி ஸமுட்டா²னேஹி ஸமுட்ட²ந்தி – ஸியா காயதோ ஸமுட்ட²ந்தி, ந வாசதோ ந சித்ததோ; ஸியா வாசதோ ஸமுட்ட²ந்தி, ந காயதோ ந சித்ததோ; ஸியா காயதோ ச வாசதோ ச ஸமுட்ட²ந்தி, ந சித்ததோ; ஸியா காயதோ ச சித்ததோ ச ஸமுட்ட²ந்தி, ந வாசதோ; ஸியா வாசதோ ச சித்ததோ ச ஸமுட்ட²ந்தி, ந காயதோ; ஸியா காயதோ ச வாசதோ ச சித்ததோ ச ஸமுட்ட²ந்தி.

த்³வேனவுதி பாசித்தியா கதிஹி ஸமுட்டா²னேஹி ஸமுட்ட²ந்தி? த்³வேனவுதி பாசித்தியா ச²ஹி ஸமுட்டா²னேஹி ஸமுட்ட²ந்தி – ஸியா காயதோ ஸமுட்ட²ந்தி, ந வாசதோ ந சித்ததோ; ஸியா வாசதோ ஸமுட்ட²ந்தி, ந காயதோ ந சித்ததோ; ஸியா காயதோ ச வாசதோ ச ஸமுட்ட²ந்தி, ந சித்ததோ; ஸியா காயதோ ச சித்ததோ ச ஸமுட்ட²ந்தி ந வாசதோ; ஸியா வாசதோ ச சித்ததோ ச ஸமுட்ட²ந்தி, ந காயதோ; ஸியா காயதோ ச வாசதோ ச சித்ததோ ச ஸமுட்ட²ந்தி.

சத்தாரோ பாடிதே³ஸனீயா கதிஹி ஸமுட்டா²னேஹி ஸமுட்ட²ந்தி? சத்தாரோ பாடிதே³ஸனீயா சதூஹி ஸமுட்டா²னேஹி ஸமுட்ட²ந்தி – ஸியா காயதோ ஸமுட்ட²ந்தி, ந வாசதோ ந சித்ததோ; ஸியா காயதோ ச வாசதோ ச ஸமுட்ட²ந்தி, ந சித்ததோ; ஸியா காயதோ ச சித்ததோ ச ஸமுட்ட²ந்தி, ந வாசதோ; ஸியா காயதோ ச வாசதோ ச சித்ததோ ச ஸமுட்ட²ந்தி.

பஞ்சஸத்ததி ஸேகி²யா கதிஹி ஸமுட்டா²னேஹி ஸமுட்ட²ந்தி? பஞ்சஸத்ததி ஸேகி²யா தீஹி ஸமுட்டா²னேஹி ஸமுட்ட²ந்தி – ஸியா காயதோ ச சித்ததோ ச ஸமுட்ட²ந்தி, ந வாசதோ; ஸியா வாசதோ ச சித்ததோ ச ஸமுட்ட²ந்தி, ந காயதோ; ஸியா காயதோ ச வாசதோ ச சித்ததோ ச ஸமுட்ட²ந்தி.

ஸமுட்டா²னம் நிட்டி²தம்.