8. ஸமுச்சயவாரோ

187. மேது²னம் த⁴ம்மம் படிஸேவந்தோ கதி ஆபத்தியோ ஆபஜ்ஜதி? மேது²னம் த⁴ம்மம் படிஸேவந்தோ திஸ்ஸோ ஆபத்தியோ ஆபஜ்ஜதி. அக்கா²யிதே ஸரீரே மேது²னம் த⁴ம்மம் படிஸேவதி, ஆபத்தி பாராஜிகஸ்ஸ; யேபு⁴ய்யேன கா²யிதே ஸரீரே மேது²னம் த⁴ம்மம் படிஸேவதி, ஆபத்தி து²ல்லச்சயஸ்ஸ; வட்டகதே முகே² அச்சு²பந்தம் அங்க³ஜாதம் பவேஸேதி, ஆபத்தி து³க்கடஸ்ஸ – மேது²னம் த⁴ம்மம் படிஸேவந்தோ இமா திஸ்ஸோ ஆபத்தியோ ஆபஜ்ஜதி.

தா ஆபத்தியோ சதுன்னம் விபத்தீனம் கதி விபத்தியோ ப⁴ஜந்தி, ஸத்தன்னம் ஆபத்திக்க²ந்தா⁴னம் கதிஹி ஆபத்திக்க²ந்தே⁴ஹி ஸங்க³ஹிதா, ச²ன்னம் ஆபத்திஸமுட்டா²னானம் கதிஹி ஸமுட்டா²னேஹி ஸமுட்ட²ந்தி, சதுன்னம் அதி⁴கரணானம் கதமம் அதி⁴கரணம், ஸத்தன்னம் ஸமதா²னம் கதிஹி ஸமதே²ஹி ஸம்மந்தி? தா ஆபத்தியோ சதுன்னம் விபத்தீனம் த்³வே விபத்தியோ ப⁴ஜந்தி – ஸியா ஸீலவிபத்திம், ஸியா ஆசாரவிபத்திம். ஸத்தன்னம் ஆபத்திக்க²ந்தா⁴னம் தீஹி ஆபத்திக்க²ந்தே⁴ஹி ஸங்க³ஹிதா – ஸியா பாராஜிகாபத்திக்க²ந்தே⁴ன, ஸியா து²ல்லச்சயாபத்திக்க²ந்தே⁴ன, ஸியா து³க்கடாபத்திக்க²ந்தே⁴ன. ச²ன்னம் ஆபத்திஸமுட்டா²னானம் ஏகேன ஸமுட்டா²னேன ஸமுட்ட²ந்தி – காயதோ ச சித்ததோ ச ஸமுட்ட²ந்தி, ந வாசதோ. சதுன்னம் அதி⁴கரணானம், ஆபத்தாதி⁴கரணம். ஸத்தன்னம் ஸமதா²னம் தீஹி ஸமதே²ஹி ஸம்மந்தி – ஸியா ஸம்முகா²வினயேன ச படிஞ்ஞாதகரணேன ச, ஸியா ஸம்முகா²வினயேன ச திணவத்தா²ரகேன ச…பே….

அனாத³ரியம் படிச்ச உத³கே உச்சாரம் வா பஸ்ஸாவம் வா கே²ளம் வா கரோந்தோ கதி ஆபத்தியோ ஆபஜ்ஜதி? அனாத³ரியம் படிச்ச உத³கே உச்சாரம் வா பஸ்ஸாவம் வா கே²ளம் வா கரோந்தோ ஏகம் ஆபத்திம் ஆபஜ்ஜதி. து³க்கடம் – அனாத³ரியம் படிச்ச உத³கே உச்சாரம் வா பஸ்ஸாவம் வா கே²ளம் வா கரோந்தோ இமம் ஏகம் ஆபத்திம் ஆபஜ்ஜதி.

ஸா ஆபத்தி சதுன்னம் விபத்தீனம் கதி விபத்தியோ ப⁴ஜதி, ஸத்தன்னம் ஆபத்திக்க²ந்தா⁴னம் கதிஹி ஆபத்திக்க²ந்தே⁴ஹி ஸங்க³ஹிதா, ச²ன்னம் ஆபத்திஸமுட்டா²னானம் கதிஹி ஸமுட்டா²னேஹி ஸமுட்டா²தி, சதுன்னம் அதி⁴கரணானம் கதமம் அதி⁴கரணம், ஸத்தன்னம், ஸமதா²னம் கதிஹி ஸமதே²ஹி ஸம்மதி? ஸா ஆபத்தி சதுன்னம் விபத்தீனம் ஏகம் விபத்திம் ப⁴ஜதி – ஆசாரவிபத்திம். ஸத்தன்னம் ஆபத்திக்க²ந்தா⁴னம் ஏகேன ஆபத்திக்க²ந்தே⁴ன ஸங்க³ஹிதா – து³க்கடாபத்திக்க²ந்தே⁴ன. ச²ன்னம் ஆபத்திஸமுட்டா²னானம் ஏகேன ஸமுட்டா²னேன ஸமுட்டா²தி – காயதோ ச சித்ததோ ச ஸமுட்டா²தி, ந வாசதோ. சதுன்னம் அதி⁴கரணானம், ஆபத்தாதி⁴கரணம். ஸத்தன்னம் ஸமதா²னம் தீஹி ஸமதே²ஹி ஸம்மதி – ஸியா ஸம்முகா²வினயேன ச படிஞ்ஞாதகரணேன ச, ஸியா ஸம்முகா²வினயேன ச திணவத்தா²ரகேன ச.

ஸமுச்சயவாரோ நிட்டி²தோ அட்ட²மோ.

இமே அட்ட² வாரா ஸஜ்ஜா²யமக்³கே³ன லிகி²தா.

தஸ்ஸுத்³தா³னம் –

கத்த²பஞ்ஞத்தி கதி ச, விபத்திஸங்க³ஹேன ச;

ஸமுட்டா²னாதி⁴கரணா ஸமதோ², ஸமுச்சயேன சாதி.