2. கோஸியவக்³கோ³

163. கோஸியமிஸ்ஸகம் ஸந்த²தம் காராபேந்தோ த்³வே ஆபத்தியோ ஆபஜ்ஜதி. காராபேதி, பயோகே³ து³க்கடம்; காராபிதே நிஸ்ஸக்³கி³யம் பாசித்தியம்.

ஸுத்³த⁴காளகானம் ஏளகலோமானம் ஸந்த²தம் காராபேந்தோ த்³வே ஆபத்தியோ ஆபஜ்ஜதி. காராபேதி, பயோகே³ து³க்கடம்; காராபிதே நிஸ்ஸக்³கி³யம் பாசித்தியம்.

அனாதி³யித்வா துலம் ஓதா³தானம் துலம் கோ³சரியானம் நவம் ஸந்த²தம் காராபேந்தோ த்³வே ஆபத்தியோ ஆபஜ்ஜதி. காராபேதி, பயோகே³ து³க்கடம்; காராபிதே நிஸ்ஸக்³கி³யம் பாசித்தியம்.

அனுவஸ்ஸம் ஸந்த²தம் காராபேந்தோ த்³வே ஆபத்தியோ ஆபஜ்ஜதி. காராபேதி, பயோகே³ து³க்கடம்; காராபிதே நிஸ்ஸக்³கி³யம் பாசித்தியம்.

அனாதி³யித்வா புராணஸந்த²தஸ்ஸ ஸாமந்தா ஸுக³தவித³த்தி²ம் நவம் நிஸீத³னஸந்த²தம் காராபேந்தோ த்³வே ஆபத்தியோ ஆபஜ்ஜதி. காராபேதி, பயோகே³ து³க்கடம்; காராபிதே நிஸ்ஸக்³கி³யம் பாசித்தியம்.

ஏளகலோமானி படிக்³க³ஹேத்வா தியோஜனம் அதிக்காமேந்தோ த்³வே ஆபத்தியோ ஆபஜ்ஜதி. பட²மம் பாத³ம் தியோஜனம் அதிக்காமேதி, ஆபத்தி து³க்கடஸ்ஸ; து³தியம் பாத³ம் அதிக்காமேதி, நிஸ்ஸக்³கி³யம் பாசித்தியம்.

அஞ்ஞாதிகாய பி⁴க்கு²னியா ஏளகலோமானி தோ⁴வாபேந்தோ த்³வே ஆபத்தியோ ஆபஜ்ஜதி. தோ⁴வாபேதி, பயோகே³ து³க்கடம்; தோ⁴வாபிதே நிஸ்ஸக்³கி³யம் பாசித்தியம்.

ரூபியம் படிக்³க³ண்ஹந்தோ த்³வே ஆபத்தியோ ஆபஜ்ஜதி. க³ண்ஹாதி, பயோகே³ து³க்கடம்; க³ஹிதே நிஸ்ஸக்³கி³யம் பாசித்தியம்.

நானப்பகாரகம் ரூபியஸம்வோஹாரம் ஸமாபஜ்ஜந்தோ த்³வே ஆபத்தியோ ஆபஜ்ஜதி. ஸமாபஜ்ஜதி, பயோகே³ து³க்கடம்; ஸமாபன்னே நிஸ்ஸக்³கி³யம் பாசித்தியம்.

நானப்பகாரகம் கயவிக்கயம் ஸமாபஜ்ஜந்தோ த்³வே ஆபத்தியோ ஆபஜ்ஜதி. ஸமாபஜ்ஜதி, பயோகே³ து³க்கடம்; ஸமாபன்னே நிஸ்ஸக்³கி³யம் பாசித்தியம்.

கோஸியவக்³கோ³ து³தியோ.