1. முஸாவாத³வக்³கோ³

54. யம் தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன ஸம்பஜானமுஸாவாதே³ பாசித்தியம் கத்த² பஞ்ஞத்தந்தி? ஸாவத்தி²யம் பஞ்ஞத்தம். கம் ஆரப்³பா⁴தி? ஹத்த²கம் ஸக்யபுத்தம் ஆரப்³ப⁴. கிஸ்மிம் வத்து²ஸ்மிந்தி? ஆயஸ்மா ஹத்த²கோ ஸக்யபுத்தோ தித்தி²யேஹி ஸத்³தி⁴ம் ஸல்லபந்தோ அவஜானித்வா படிஜானி, படிஜானித்வா அவஜானி, தஸ்மிம் வத்து²ஸ்மிம். ஏகா பஞ்ஞத்தி. ச²ன்னம் ஆபத்திஸமுட்டா²னானம் தீஹி ஸமுட்டா²னேஹி ஸமுட்டா²தி – ஸியா காயதோ ச சித்ததோ ச ஸமுட்டா²தி, ந வாசதோ; ஸியா வாசதோ ச சித்ததோ ச ஸமுட்டா²தி, ந காயதோ; ஸியா காயதோ ச வாசதோ ச சித்ததோ ச ஸமுட்டா²தி…பே….

55. ஓமஸவாதே³ பாசித்தியம் கத்த² பஞ்ஞத்தந்தி? ஸாவத்தி²யம் பஞ்ஞத்தம். கம் ஆரப்³பா⁴தி? ச²ப்³ப³க்³கி³யே பி⁴க்கூ² ஆரப்³ப⁴. கிஸ்மிம் வத்து²ஸ்மிந்தி? ச²ப்³ப³க்³கி³யா பி⁴க்கூ² பேஸலேஹி பி⁴க்கூ²ஹி ஸத்³தி⁴ம் ப⁴ண்ட³ந்தா [ப⁴ண்டே³ந்தா (க.)] பேஸலே பி⁴க்கூ² ஓமஸிம்ஸு, தஸ்மிம் வத்து²ஸ்மிம். ஏகா பஞ்ஞத்தி. ச²ன்னம் ஆபத்திஸமுட்டா²னானம் தீஹி ஸமுட்டா²னேஹி ஸமுட்டா²தி…பே….

56. பி⁴க்கு²பேஸுஞ்ஞே பாசித்தியம் கத்த² பஞ்ஞத்தந்தி? ஸாவத்தி²யம் பஞ்ஞத்தம். கம் ஆரப்³பா⁴தி? ச²ப்³ப³க்³கி³யே பி⁴க்கூ² ஆரப்³ப⁴. கிஸ்மிம் வத்து²ஸ்மிந்தி? ச²ப்³ப³க்³கி³யா பி⁴க்கூ² பி⁴க்கூ²னம் ப⁴ண்ட³னஜாதானம் கலஹஜாதானம் விவாதா³பன்னானம் பேஸுஞ்ஞம் உபஸம்ஹரிம்ஸு, தஸ்மிம் வத்து²ஸ்மிம். ஏகா பஞ்ஞத்தி. ச²ன்னம் ஆபத்திஸமுட்டா²னானம் தீஹி ஸமுட்டா²னேஹி ஸமுட்டா²தி…பே….

57. அனுபஸம்பன்னம் பத³ஸோ த⁴ம்மம் வாசேந்தஸ்ஸ பாசித்தியம் கத்த² பஞ்ஞத்தந்தி? ஸாவத்தி²யம் பஞ்ஞத்தம். கம் ஆரப்³பா⁴தி? ச²ப்³ப³க்³கி³யே பி⁴க்கூ² ஆரப்³ப⁴. கிஸ்மிம் வத்து²ஸ்மிந்தி? ச²ப்³ப³க்³கி³யா பி⁴க்கூ² உபாஸகே பத³ஸோ த⁴ம்மம் வாசேஸும், தஸ்மிம் வத்து²ஸ்மிம். ஏகா பஞ்ஞத்தி. ச²ன்னம் ஆபத்திஸமுட்டா²னானம் த்³வீஹி ஸமுட்டா²னேஹி ஸமுட்டா²தி – ஸியா வாசதோ ஸமுட்டா²தி, ந காயதோ ந சித்ததோ; ஸியா வாசதோ ச சித்ததோ ச ஸமுட்டா²தி, ந காயதோ…பே….

58. அனுபஸம்பன்னேன உத்தரிதி³ரத்ததிரத்தம் ஸஹஸேய்யம் கப்பேந்தஸ்ஸ பாசித்தியம் கத்த² பஞ்ஞத்தந்தி? ஆளவியம் பஞ்ஞத்தம். கம் ஆரப்³பா⁴தி? ஸம்ப³ஹுலே பி⁴க்கூ² ஆரப்³ப⁴. கிஸ்மிம் வத்து²ஸ்மிந்தி? ஸம்ப³ஹுலா பி⁴க்கூ² அனுபஸம்பன்னேன ஸஹஸேய்யம் கப்பேஸும், தஸ்மிம் வத்து²ஸ்மிம். ஏகா பஞ்ஞத்தி, ஏகா அனுபஞ்ஞத்தி. ச²ன்னம் ஆபத்திஸமுட்டா²னானம் த்³வீஹி ஸமுட்டா²னேஹி ஸமுட்டா²தி – ஸியா காயதோ ஸமுட்டா²தி, ந வாசதோ ந சித்ததோ; ஸியா காயதோ ச சித்ததோ ச ஸமுட்டா²தி, ந வாசதோ…பே….

59. மாதுகா³மேன ஸஹஸேய்யம் கப்பேந்தஸ்ஸ பாசித்தியம் கத்த² பஞ்ஞத்தந்தி? ஸாவத்தி²யம் பஞ்ஞத்தம். கம் ஆரப்³பா⁴தி? ஆயஸ்மந்தம் அனுருத்³த⁴ம் ஆரப்³ப⁴. கிஸ்மிம் வத்து²ஸ்மிந்தி? ஆயஸ்மா அனுருத்³தோ⁴ மாதுகா³மேன ஸஹஸேய்யம் கப்பேஸி, தஸ்மிம் வத்து²ஸ்மிம். ஏகா பஞ்ஞத்தி. ச²ன்னம் ஆபத்திஸமுட்டா²னானம் த்³வீஹி ஸமுட்டா²னேஹி ஸமுட்டா²தி ஏளகலோமகே…பே….

60. மாதுகா³மஸ்ஸ உத்தரிச²ப்பஞ்சவாசாஹி த⁴ம்மம் தே³ஸேந்தஸ்ஸ பாசித்தியம் கத்த² பஞ்ஞத்தந்தி? ஸாவத்தி²யம் பஞ்ஞத்தம். கம் ஆரப்³பா⁴தி? ஆயஸ்மந்தம் உதா³யிம் ஆரப்³ப⁴. கிஸ்மிம் வத்து²ஸ்மிந்தி? ஆயஸ்மா உதா³யீ மாதுகா³மஸ்ஸ த⁴ம்மம் தே³ஸேஸி, தஸ்மிம் வத்து²ஸ்மிம். ஏகா பஞ்ஞத்தி, த்³வே அனுபஞ்ஞத்தியோ. ச²ன்னம் ஆபத்திஸமுட்டா²னானம் த்³வீஹி ஸமுட்டா²னேஹி ஸமுட்டா²தி பத³ஸோத⁴ம்மே…பே….

61. அனுபஸம்பன்னஸ்ஸ உத்தரிமனுஸ்ஸத⁴ம்மம் பூ⁴தம் ஆரோசேந்தஸ்ஸ பாசித்தியம் கத்த² பஞ்ஞத்தந்தி? வேஸாலியம் பஞ்ஞத்தம். கம் ஆரப்³பா⁴தி? வக்³கு³முதா³தீரியே பி⁴க்கூ² ஆரப்³ப⁴. கிஸ்மிம் வத்து²ஸ்மிந்தி? வக்³கு³முதா³தீரியா பி⁴க்கூ² கி³ஹீனம் அஞ்ஞமஞ்ஞஸ்ஸ உத்தரிமனுஸ்ஸத⁴ம்மஸ்ஸ வண்ணம் பா⁴ஸிம்ஸு, தஸ்மிம் வத்து²ஸ்மிம். ஏகா பஞ்ஞத்தி. ச²ன்னம் ஆபத்திஸமுட்டா²னானம் தீஹி ஸமுட்டா²னேஹி ஸமுட்டா²தி – ஸியா காயதோ ஸமுட்டா²தி, ந வாசதோ ந சித்ததோ; ஸியா வாசதோ ஸமுட்டா²தி, ந காயதோ ந சித்ததோ; ஸியா காயதோ ச வாசதோ ச ஸமுட்டா²தி, ந சித்ததோ…பே….

62. பி⁴க்கு²ஸ்ஸ து³ட்டு²ல்லாபத்திம் அனுபஸம்பன்னஸ்ஸ ஆரோசேந்தஸ்ஸ பாசித்தியம் கத்த² பஞ்ஞத்தந்தி? ஸாவத்தி²யம் பஞ்ஞத்தம். கம் ஆரப்³பா⁴தி? ச²ப்³ப³க்³கி³யே பி⁴க்கூ² ஆரப்³ப⁴. கிஸ்மிம் வத்து²ஸ்மிந்தி? ச²ப்³ப³க்³கி³யா பி⁴க்கூ² பி⁴க்கு²ஸ்ஸ து³ட்டு²ல்லாபத்திம் அனுபஸம்பன்னஸ்ஸ ஆரோசேஸும், தஸ்மிம் வத்து²ஸ்மிம். ஏகா பஞ்ஞத்தி. ச²ன்னம் ஆபத்திஸமுட்டா²னானம் தீஹி ஸமுட்டா²னேஹி ஸமுட்டா²தி…பே….

63. பத²விம் க²ணந்தஸ்ஸ பாசித்தியம் கத்த² பஞ்ஞத்தந்தி? ஆளவியம் பஞ்ஞத்தம். கம் ஆரப்³பா⁴தி? ஆளவகே பி⁴க்கூ² ஆரப்³ப⁴. கிஸ்மிம் வத்து²ஸ்மிந்தி? ஆளவகா பி⁴க்கூ² பத²விம் க²ணிம்ஸு, தஸ்மிம் வத்து²ஸ்மிம். ஏகா பஞ்ஞத்தி. ச²ன்னம் ஆபத்திஸமுட்டா²னானம் தீஹி ஸமுட்டா²னேஹி ஸமுட்டா²தி…பே….

முஸாவாத³வக்³கோ³ பட²மோ.