6. ஸுராபானவக்³கோ³

104. ஸுராமேரயபானே பாசித்தியம் கத்த² பஞ்ஞத்தந்தி? கோஸம்பி³யம் பஞ்ஞத்தம். கம் ஆரப்³பா⁴தி? ஆயஸ்மந்தம் ஸாக³தம் ஆரப்³ப⁴. கிஸ்மிம் வத்து²ஸ்மிந்தி? ஆயஸ்மா ஸாக³தோ மஜ்ஜம் பிவி, தஸ்மிம் வத்து²ஸ்மிம். ஏகா பஞ்ஞத்தி. ச²ன்னம் ஆபத்திஸமுட்டா²னானம் த்³வீஹி ஸமுட்டா²னேஹி ஸமுட்டா²தி – ஸியா காயதோ ஸமுட்டா²தி, ந வாசதோ ந சித்ததோ; ஸியா காயதோ ச சித்ததோ ச ஸமுட்டா²தி, ந வாசதோ…பே….

105. அங்கு³லிபதோத³கே பாசித்தியம் கத்த² பஞ்ஞத்தந்தி? ஸாவத்தி²யம் பஞ்ஞத்தம். கம் ஆரப்³பா⁴தி? ச²ப்³ப³க்³கி³யே பி⁴க்கூ² ஆரப்³ப⁴. கிஸ்மிம் வத்து²ஸ்மிந்தி? ச²ப்³ப³க்³கி³யா பி⁴க்கூ² பி⁴க்கு²ம் அங்கு³லிபதோத³கேன ஹாஸேஸும், தஸ்மிம் வத்து²ஸ்மிம். ஏகா பஞ்ஞத்தி. ச²ன்னம் ஆபத்திஸமுட்டா²னானம் ஏகேன ஸமுட்டா²னேன ஸமுட்டா²தி – காயதோ ச சித்ததோ ச ஸமுட்டா²தி, ந வாசதோ…பே….

106. உத³கே ஹஸத⁴ம்மே [ஹஸ்ஸத⁴ம்மே (ஸீ. ஸ்யா.)] பாசித்தியம் கத்த² பஞ்ஞத்தந்தி? ஸாவத்தி²யம் பஞ்ஞத்தம். கம் ஆரப்³பா⁴தி? ஸத்தரஸவக்³கி³யே பி⁴க்கூ² ஆரப்³ப⁴. கிஸ்மிம் வத்து²ஸ்மிந்தி? ஸத்தரஸவக்³கி³யா பி⁴க்கூ² அசிரவதியா நதி³யா உத³கே கீளிம்ஸு, தஸ்மிம் வத்து²ஸ்மிம். ஏகா பஞ்ஞத்தி. ச²ன்னம் ஆபத்திஸமுட்டா²னானம் ஏகேன ஸமுட்டா²னேன ஸமுட்டா²தி – காயதோ ச சித்ததோ ச ஸமுட்டா²தி, ந வாசதோ…பே….

107. அனாத³ரியே பாசித்தியம் கத்த² பஞ்ஞத்தந்தி? கோஸம்பி³யம் பஞ்ஞத்தம். கம் ஆரப்³பா⁴தி? ஆயஸ்மந்தம் ச²ன்னம் ஆரப்³ப⁴. கிஸ்மிம் வத்து²ஸ்மிந்தி? ஆயஸ்மா ச²ன்னோ அனாத³ரியம் அகாஸி, தஸ்மிம் வத்து²ஸ்மிம். ஏகா பஞ்ஞத்தி. ச²ன்னம் ஆபத்திஸமுட்டா²னானம் தீஹி ஸமுட்டா²னேஹி ஸமுட்டா²தி…பே….

108. பி⁴க்கு²ம் பி⁴ம்ஸாபேந்தஸ்ஸ பாசித்தியம் கத்த² பஞ்ஞத்தந்தி? ஸாவத்தி²யம் பஞ்ஞத்தம். கம் ஆரப்³பா⁴தி? ச²ப்³ப³க்³கி³யே பி⁴க்கூ² ஆரப்³ப⁴. கிஸ்மிம் வத்து²ஸ்மிந்தி? ச²ப்³ப³க்³கி³யா பி⁴க்கூ² பி⁴க்கு²ம் பி⁴ம்ஸாபேஸும், தஸ்மிம் வத்து²ஸ்மிம். ஏகா பஞ்ஞத்தி. ச²ன்னம் ஆபத்திஸமுட்டா²னானம் தீஹி ஸமுட்டா²னேஹி ஸமுட்டா²தி…பே….

109. ஜோதிம் ஸமாத³ஹித்வா விஸிப்³பே³ந்தஸ்ஸ பாசித்தியம் கத்த² பஞ்ஞத்தந்தி? ப⁴க்³கே³ஸு பஞ்ஞத்தம். கம் ஆரப்³பா⁴தி? ஸம்ப³ஹுலே பி⁴க்கூ² ஆரப்³ப⁴. கிஸ்மிம் வத்து²ஸ்மிந்தி? ஸம்ப³ஹுலா பி⁴க்கூ² ஜோதிம் ஸமாத³ஹித்வா விஸிப்³பே³ஸும், தஸ்மிம் வத்து²ஸ்மிம். ஏகா பஞ்ஞத்தி, த்³வே அனுபஞ்ஞத்தியோ. ச²ன்னம் ஆபத்திஸமுட்டா²னானம் ச²ஹி ஸமுட்டா²னேஹி ஸமுட்டா²தி…பே….

110. ஓரேனத்³த⁴மாஸம் நஹாயந்தஸ்ஸ பாசித்தியம் கத்த² பஞ்ஞத்தந்தி? ராஜக³ஹே பஞ்ஞத்தம். கம் ஆரப்³பா⁴தி? ஸம்ப³ஹுலே பி⁴க்கூ² ஆரப்³ப⁴. கிஸ்மிம் வத்து²ஸ்மிந்தி? ஸம்ப³ஹுலா பி⁴க்கூ² ராஜானம்பி பஸ்ஸித்வா ந மத்தம் ஜானித்வா நஹாயிம்ஸு, தஸ்மிம் வத்து²ஸ்மிம். ஏகா பஞ்ஞத்தி, ச² அனுபஞ்ஞத்தியோ. ஸப்³ப³த்த²பஞ்ஞத்தி, பதே³ஸபஞ்ஞத்தீதி? பதே³ஸபஞ்ஞத்தி. ச²ன்னம் ஆபத்திஸமுட்டா²னானம் த்³வீஹி ஸமுட்டா²னேஹி ஸமுட்டா²தி ஏளகலோமகே…பே….

111. அனாதி³யித்வா திண்ணம் து³ப்³ப³ண்ணகரணானம் அஞ்ஞதரம் து³ப்³ப³ண்ணகரணம் நவம் சீவரம் பரிபு⁴ஞ்ஜந்தஸ்ஸ பாசித்தியம் கத்த² பஞ்ஞத்தந்தி? ஸாவத்தி²யம் பஞ்ஞத்தம். கம் ஆரப்³பா⁴தி? ஸம்ப³ஹுலே பி⁴க்கூ² ஆரப்³ப⁴. கிஸ்மிம் வத்து²ஸ்மிந்தி? ஸம்ப³ஹுலா பி⁴க்கூ² அத்தனோ சீவரம் ந ஸஞ்ஜானிம்ஸு, தஸ்மிம் வத்து²ஸ்மிம். ஏகா பஞ்ஞத்தி. ச²ன்னம் ஆபத்திஸமுட்டா²னானம் த்³வீஹி ஸமுட்டா²னேஹி ஸமுட்டா²தி ஏளகலோமகே…பே….

112. பி⁴க்கு²ஸ்ஸ வா பி⁴க்கு²னியா வா ஸிக்க²மானாய வா ஸாமணேரஸ்ஸ வா ஸாமணேரியா வா ஸாமம் சீவரம் விகப்பேத்வா அப்பச்சுத்³தா⁴ரணம் பரிபு⁴ஞ்ஜந்தஸ்ஸ பாசித்தியம் கத்த² பஞ்ஞத்தந்தி? ஸாவத்தி²யம் பஞ்ஞத்தம். கம் ஆரப்³பா⁴தி? ஆயஸ்மந்தம் உபனந்த³ம் ஸக்யபுத்தம் ஆரப்³ப⁴. கிஸ்மிம் வத்து²ஸ்மிந்தி? ஆயஸ்மா உபனந்தோ³ ஸக்யபுத்தோ பி⁴க்கு²ஸ்ஸ ஸாமம் சீவரம் விகப்பேத்வா அப்பச்சுத்³தா⁴ரணம் பரிபு⁴ஞ்ஜி, தஸ்மிம் வத்து²ஸ்மிம். ஏகா பஞ்ஞத்தி. ச²ன்னம் ஆபத்திஸமுட்டா²னானம் த்³வீஹி ஸமுட்டா²னேஹி ஸமுட்டா²தி கதி²னகே…பே….

113. பி⁴க்கு²ஸ்ஸ பத்தம் வா சீவரம் வா நிஸீத³னம் வா ஸூசிக⁴ரம் வா காயப³ந்த⁴னம் வா அபனிதே⁴ந்தஸ்ஸ பாசித்தியம் கத்த² பஞ்ஞத்தந்தி? ஸாவத்தி²யம் பஞ்ஞத்தம். கம் ஆரப்³பா⁴தி? ச²ப்³ப³க்³கி³யே பி⁴க்கூ² ஆரப்³ப⁴. கிஸ்மிம் வத்து²ஸ்மிந்தி? ச²ப்³ப³க்³கி³யா பி⁴க்கூ² பி⁴க்கூ²னம் பத்தம்பி சீவரம்பி அபனிதே⁴ஸும், தஸ்மிம் வத்து²ஸ்மிம். ஏகா பஞ்ஞத்தி. ச²ன்னம் ஆபத்திஸமுட்டா²னானம் தீஹி ஸமுட்டா²னேஹி ஸமுட்டா²தி…பே….

ஸுராமேரயவக்³கோ³ ச²ட்டோ².