3. த்³வேபா⁴க³ஸிக்கா²பத³ம்

552. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கூ² – ‘‘ப⁴க³வதா படிக்கி²த்தம் ஸுத்³த⁴காளகானம் ஏளகலோமானம் ஸந்த²தம் காராபேது’’ந்தி, தே தோ²கம்யேவ ஓதா³தம் அந்தே ஆதி³யித்வா ததே²வ ஸுத்³த⁴காளகானம் ஏளகலோமானம் ஸந்த²தம் காராபேந்தி. யே தே பி⁴க்கூ² அப்பிச்சா²… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² தோ²கம்யேவ ஓதா³தம் அந்தே ஆதி³யித்வா ததே²வ ஸுத்³த⁴காளகானம் ஏளகலோமானம் ஸந்த²தம் காராபேஸ்ஸந்தீ’’தி! அத² கோ² தே பி⁴க்கூ² ச²ப்³ப³க்³கி³யே பி⁴க்கூ² அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர தும்ஹே, பி⁴க்க²வே, தோ²கம்யேவ ஓதா³தம் அந்தே ஆதி³யித்வா ததே²வ ஸுத்³த⁴காளகானம் ஏளகலோமானம் ஸந்த²தம் காராபேதா²’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, மோக⁴புரிஸா, தோ²கம்யேவ ஓதா³தம் அந்தே ஆதி³யித்வா ததே²வ ஸுத்³த⁴காளகானம் ஏளகலோமானம் ஸந்த²தம் காராபேஸ்ஸத²! நேதம், மோக⁴புரிஸா, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

553. ‘‘நவம் பன பி⁴க்கு²னா ஸந்த²தம் காரயமானேன த்³வே பா⁴கா³ ஸுத்³த⁴காளகானம் ஏளகலோமானம் ஆதா³தப்³பா³ ததியம் ஓதா³தானம் சதுத்த²ம் கோ³சரியானம். அனாதா³ சே பி⁴க்கு² த்³வே பா⁴கே³ ஸுத்³த⁴காளகானம் ஏளகலோமானம் ததியம் ஓதா³தானம் சதுத்த²ம் கோ³சரியானம் நவம் ஸந்த²தம் காராபேய்ய, நிஸ்ஸக்³கி³யம் பாசித்திய’’ந்தி.

554. நவம் நாம கரணம் உபாதா³ய வுச்சதி.

ஸந்த²தம் நாம ஸந்த²ரித்வா கதம் ஹோதி அவாயிமம்.

காரயமானேனாதி கரோந்தோ வா காராபேந்தோ வா.

த்³வே பா⁴கா³ ஸுத்³த⁴காளகானம் ஏளகலோமானம் ஆதா³தப்³பா³தி தா⁴ரயித்வா த்³வே துலா ஆதா³தப்³பா³.

ததியம் ஓதா³தானந்தி துலம் ஓதா³தானம்.

சதுத்த²ம் கோ³சரியானந்தி துலம் கோ³சரியானம்.

அனாதா³ சே பி⁴க்கு² த்³வே பா⁴கே³ ஸுத்³த⁴காளகானம் ஏளகலோமானம் ததியம் ஓதா³தானம் சதுத்த²ம் கோ³சரியானந்தி. அனாதி³யித்வா த்³வே துலே ஸுத்³த⁴காளகானம் ஏளகலோமானம் துலம் ஓதா³தானம் துலம் கோ³சரியானம் நவம் ஸந்த²தம் கரோதி வா காராபேதி வா பயோகே³ து³க்கடம், படிலாபே⁴ன நிஸ்ஸக்³கி³யம் ஹோதி. நிஸ்ஸஜ்ஜிதப்³ப³ம் ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ம்…பே… இத³ம் மே, ப⁴ந்தே, ஸந்த²தம் அனாதி³யித்வா த்³வே துலே ஸுத்³த⁴காளகானம் ஏளகலோமானம் துலம் ஓதா³தானம் துலம் கோ³சரியானம் காராபிதம் நிஸ்ஸக்³கி³யம். இமாஹம் ஸங்க⁴ஸ்ஸ நிஸ்ஸஜ்ஜாமீதி…பே… த³தே³ய்யாதி…பே… த³தே³ய்யுந்தி…பே… ஆயஸ்மதோ த³ம்மீதி.

555. அத்தனா விப்பகதம் அத்தனா பரியோஸாபேதி, நிஸ்ஸக்³கி³யம் பாசித்தியம். அத்தனா விப்பகதம் பரேஹி பரியோஸாபேதி, நிஸ்ஸக்³கி³யம் பாசித்தியம். பரேஹி விப்பகதம் அத்தனா பரியோஸாபேதி, நிஸ்ஸக்³கி³யம் பாசித்தியம். பரேஹி விப்பகதம் பரேஹி பரியோஸாபேதி, நிஸ்ஸக்³கி³யம் பாசித்தியம்.

அஞ்ஞஸ்ஸத்தா²ய கரோதி வா காராபேதி வா, ஆபத்தி து³க்கடஸ்ஸ. அஞ்ஞேன கதம் படிலபி⁴த்வா பரிபு⁴ஞ்ஜதி, ஆபத்தி து³க்கடஸ்ஸ.

556. அனாபத்தி துலம் ஓதா³தானம் துலம் கோ³சரியானம் ஆதி³யித்வா கரோதி, ப³ஹுதரம் ஓதா³தானம் ப³ஹுதரம் கோ³சரியானம் ஆதி³யித்வா கரோதி, ஸுத்³த⁴ம் ஓதா³தானம் ஸுத்³த⁴ம் கோ³சரியானம் ஆதி³யித்வா கரோதி, விதானம் வா பூ⁴மத்த²ரணம் வா ஸாணிபாகாரம் வா பி⁴ஸிம் வா பி³ப்³போ³ஹனம் வா கரோதி, உம்மத்தகஸ்ஸ, ஆதி³கம்மிகஸ்ஸாதி.

த்³வேபா⁴க³ஸிக்கா²பத³ம் நிட்டி²தம் ததியம்.