1. கோஸியஸிக்கா²பத³ம்

542. தேன ஸமயேன பு³த்³தோ⁴ ப⁴க³வா ஆளவியம் விஹரதி அக்³கா³ளவே சேதியே. தேன கோ² பன ஸமயேன ச²ப்³ப³க்³கி³யா பி⁴க்கூ² கோஸியகாரகே உபஸங்கமித்வா ஏவம் வத³ந்தி – ‘‘ப³ஹூ, ஆவுஸோ, கோஸகாரகே பசத², அம்ஹாகம்பி த³ஸ்ஸத², மயம்பி இச்சா²ம கோஸியமிஸ்ஸகம் ஸந்த²தம் காது’’ந்தி. தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸமணா ஸக்யபுத்தியா அம்ஹே உபஸங்கமித்வா ஏவம் வக்க²ந்தி – ‘ப³ஹூ, ஆவுஸோ, கோஸகாரகே பசத², அம்ஹாகம்பி த³ஸ்ஸத², மயம்பி இச்சா²ம கோஸியமிஸ்ஸகம் ஸந்த²தம் காது’ந்தி! அம்ஹாகம்பி அலாபா⁴, அம்ஹாகம்பி து³ல்லத்³த⁴ம், யே மயம் ஆஜீவஸ்ஸ ஹேது புத்ததா³ரஸ்ஸ காரணா ப³ஹூ கு²த்³த³கே பாணே ஸங்கா⁴தம் ஆபாதே³மா’’தி. அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² கோஸியகாரகே உபஸங்கமித்வா ஏவம் வக்க²ந்தி – ‘ப³ஹூ, ஆவுஸோ, கோஸகாரகே பசத², அம்ஹாகம்பி த³ஸ்ஸத², மயம்பி இச்சா²ம கோஸியமிஸ்ஸகம் ஸந்த²தம் காது’’’ந்தி! அத² கோ² தே பி⁴க்கூ² ச²ப்³ப³க்³கி³யே பி⁴க்கூ² அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர தும்ஹே, பி⁴க்க²வே, கோஸியகாரகே உபஸங்கமித்வா ஏவம் வதே³த² – ‘ப³ஹூ, ஆவுஸோ, கோஸகாரகே பசத², அம்ஹாகம்பி த³ஸ்ஸத², மயம்பி இச்சா²ம கோஸியமிஸ்ஸகம் ஸந்த²தம் காது’’’ந்தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, மோக⁴புரிஸா, கோஸியகாரகே உபஸங்கமித்வா ஏவம் வக்க²த² – ப³ஹூ, ஆவுஸோ, கோஸகாரகே பசத², அம்ஹாகம்பி த³ஸ்ஸத², மயம்பி இச்சா²ம கோஸியமிஸ்ஸகம் ஸந்த²தம் காதுந்தி. நேதம், மோக⁴புரிஸா, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

543. ‘‘யோ பன பி⁴க்கு² கோஸியமிஸ்ஸகம் ஸந்த²தம் காராபேய்ய, நிஸ்ஸக்³கி³யம் பாசித்திய’’ந்தி.

544. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

ஸந்த²தம் நாம ஸந்த²ரித்வா கதம் ஹோதி அவாயிமம்.

காராபேய்யாதி ஏகேனபி கோஸியம்ஸுனா மிஸ்ஸித்வா கரோதி வா காராபேதி வா, பயோகே³ து³க்கடம். படிலாபே⁴ன நிஸ்ஸக்³கி³யம் ஹோதி. நிஸ்ஸஜ்ஜிதப்³ப³ம் ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³…பே… இத³ம் மே, ப⁴ந்தே, கோஸியமிஸ்ஸகம் ஸந்த²தம் காராபிதம் நிஸ்ஸக்³கி³யம். இமாஹம் ஸங்க⁴ஸ்ஸ நிஸ்ஸஜ்ஜாமீதி…பே… த³தே³ய்யாதி…பே… த³தே³ய்யுந்தி…பே… ஆயஸ்மதோ த³ம்மீதி.

545. அத்தனா விப்பகதம் அத்தனா பரியோஸாபேதி, நிஸ்ஸக்³கி³யம் பாசித்தியம். அத்தனா விப்பகதம் பரேஹி பரியோஸாபேதி, நிஸ்ஸக்³கி³யம் பாசித்தியம். பரேஹி விப்பகதம் அத்தனா பரியோஸாபேதி, நிஸ்ஸக்³கி³யம் பாசித்தியம். பரேஹி விப்பகதம் பரேஹி பரியோஸாபேதி, நிஸ்ஸக்³கி³யம் பாசித்தியம்.

அஞ்ஞஸ்ஸத்தா²ய கரோதி வா காராபேதி வா, ஆபத்தி து³க்கடஸ்ஸ. அஞ்ஞேன கதம் படிலபி⁴த்வா பரிபு⁴ஞ்ஜதி, ஆபத்தி து³க்கடஸ்ஸ.

546. அனாபத்தி விதானம் வா பூ⁴மத்த²ரணம் வா ஸாணிபாகாரம் வா பி⁴ஸிம் வா பி³ப்³போ³ஹனம் வா கரோதி, உம்மத்தகஸ்ஸ, ஆதி³கம்மிகஸ்ஸாதி.

கோஸியஸிக்கா²பத³ம் நிட்டி²தம் பட²மம்.