6. ஸேகி²யகண்ட³ம் (பி⁴க்கு²னீவிப⁴ங்கோ³)

1. பரிமண்ட³லவக்³கோ³

இமே கோ² பனாய்யாயோ ஸேகி²யா

த⁴ம்மா உத்³தே³ஸம் ஆக³ச்ச²ந்தி.

1240. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கு²னியோ புரதோபி பச்ச²தோபி ஓலம்பே³ந்தீ நிவாஸேந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ புரதோபி பச்ச²தோபி ஓலம்பே³ந்தீ நிவாஸேஸ்ஸந்தி, ஸேய்யதா²பி கி³ஹினியோ காமபோ⁴கி³னியோ’’தி! அஸ்ஸோஸும் கோ² பி⁴க்கு²னியோ தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கு²னியோ புரதோபி பச்ச²தோபி ஓலம்பே³ந்தீ நிவாஸேஸ்ஸந்தீ’’தி…பே… ஸச்சம் கிர, பி⁴க்க²வே, ச²ப்³ப³க்³கி³யா பி⁴க்கு²னியோ புரதோபி பச்ச²தோபி ஓலம்பே³ந்தீ நிவாஸேந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, ச²ப்³ப³க்³கி³யா பி⁴க்கு²னியோ புரதோபி பச்ச²தோபி ஓலம்பே³ந்தீ நிவாஸேஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

‘‘பரிமண்ட³லம் நிவாஸேஸ்ஸாமீதி ஸிக்கா² கரணீயா’’தி.

பரிமண்ட³லம் நிவாஸேதப்³ப³ம் நாபி⁴மண்ட³லம் ஜாணுமண்ட³லம் படிச்சா²தே³ந்தியா. யா அனாத³ரியம் படிச்ச புரதோ வா பச்ச²தோ வா ஓலம்பே³ந்தீ நிவாஸேதி, ஆபத்தி து³க்கடஸ்ஸ.

அனாபத்தி அஸஞ்சிச்ச, அஸ்ஸதியா, அஜானந்தியா, கி³லானாய, ஆபதா³ஸு, உம்மத்திகாய, ஆதி³கம்மிகாயாதி…பே… (ஸம்கி²த்தம்).

7. பாது³கவக்³கோ³

1241. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கு²னியோ உத³கே உச்சாரம்பி பஸ்ஸாவம்பி கே²ளம்பி கரோந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ உத³கே உச்சாரம்பி பஸ்ஸாவம்பி கே²ளம்பி கரிஸ்ஸந்தி, ஸேய்யதா²பி கி³ஹினியோ காமபோ⁴கி³னியோ’’தி! அஸ்ஸோஸும் கோ² பி⁴க்கு²னியோ தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யா தா பி⁴க்கு²னியோ அப்பிச்சா², தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கு²னியோ உத³கே உச்சாரம்பி பஸ்ஸாவம்பி கே²ளம்பி கரிஸ்ஸந்தீ’’தி! அத² கோ² பி⁴க்கு²னியோ பி⁴க்கூ²னம் ஏதமத்த²ம் ஆரோசேஸும். பி⁴க்கூ² [யே தே பி⁴க்கூ²…பே… (?)] ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா…பே… பி⁴க்கூ² படிபுச்சி² – ‘‘ஸச்சம் கிர, பி⁴க்க²வே, ச²ப்³ப³க்³கி³யா பி⁴க்கு²னியோ உத³கே உச்சாரம்பி பஸ்ஸாவம்பி கே²ளம்பி கரோந்தீ’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, ச²ப்³ப³க்³கி³யா பி⁴க்கு²னியோ உத³கே உச்சாரம்பி பஸ்ஸாவம்பி கே²ளம்பி கரிஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

‘‘ந உத³கே உச்சாரம் வா பஸ்ஸாவம் வா கே²ளம் வா கரிஸ்ஸாமீதி ஸிக்கா² கரணீயா’’தி.

ஏவஞ்சித³ம் ப⁴க³வதா பி⁴க்கு²னீனம் ஸிக்கா²பத³ம் பஞ்ஞத்தம் ஹோதி.

தேன கோ² பன ஸமயேன கி³லானா பி⁴க்கு²னியோ உத³கே உச்சாரம்பி பஸ்ஸாவம்பி கே²ளம்பி காதும் குக்குச்சாயந்தி. ப⁴க³வதோ ஏதமத்த²ம் ஆரோசேஸும்…பே… அனுஜானாமி, பி⁴க்க²வே, கி³லானாய பி⁴க்கு²னியா உத³கே உச்சாரம்பி பஸ்ஸாவம்பி கே²ளம்பி காதும். ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

‘‘ந உத³கே அகி³லானா உச்சாரம் வா பஸ்ஸாவம் வா கே²ளம் வா கரிஸ்ஸாமீதி ஸிக்கா² கரணீயா’’தி.

ந உத³கே அகி³லானாய உச்சாரோ வா பஸ்ஸாவோ வா கே²ளோ வா காதப்³போ³. யா அனாத³ரியம் படிச்ச உத³கே அகி³லானா உச்சாரம் வா பஸ்ஸாவம் வா கே²ளம் வா கரோதி, ஆபத்தி து³க்கடஸ்ஸ.

அனாபத்தி அஸஞ்சிச்ச, அஸ்ஸதியா, அஜானந்தியா, கி³லானாய, த²லே கதோ உத³கம் ஓத்த²ரதி, ஆபதா³ஸு, உம்மத்திகாய, கி²த்தசித்தாய, வேத³னாட்டாய, ஆதி³கம்மிகாயாதி.

பன்னரஸமஸிக்கா²பத³ம் நிட்டி²தம்.

பாது³கவக்³கோ³ ஸத்தமோ.

உத்³தி³ட்டா² கோ², அய்யாயோ, ஸேகி²யா த⁴ம்மா. தத்தா²ய்யாயோ புச்சா²மி – ‘‘கச்சித்த² பரிஸுத்³தா⁴’’? து³தியம்பி புச்சா²மி – ‘‘கச்சித்த² பரிஸுத்³தா⁴’’? ததியம்பி புச்சா²மி – ‘‘கச்சித்த² பரிஸுத்³தா⁴’’? பரிஸுத்³தே⁴த்தா²ய்யாயோ, தஸ்மா துண்ஹீ, ஏவமேதம் தா⁴ரயாமீதி.

ஸேகி²யகண்ட³ம் நிட்டி²தம்.