1. பட²மபாடிதே³ஸனீயஸிக்கா²பத³ம்

இமே கோ² பனாய்யாயோ அட்ட² பாடிதே³ஸனீயா

த⁴ம்மா உத்³தே³ஸம் ஆக³ச்ச²ந்தி.

1228. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கு²னியோ ஸப்பிம் விஞ்ஞாபேத்வா பு⁴ஞ்ஜந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ ஸப்பிம் விஞ்ஞாபேத்வா பு⁴ஞ்ஜிஸ்ஸந்தி! கஸ்ஸ ஸம்பன்னம் ந மனாபம், கஸ்ஸ ஸாது³ம் ந ருச்சதீ’’தி! அஸ்ஸோஸும் கோ² பி⁴க்கு²னியோ தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கு²னியோ ஸப்பிம் விஞ்ஞாபேத்வா பு⁴ஞ்ஜிஸ்ஸந்தீ’’தி…பே… ஸச்சம் கிர, பி⁴க்க²வே, ச²ப்³ப³க்³கி³யா, பி⁴க்கு²னியோ ஸப்பிம் விஞ்ஞாபேத்வா பு⁴ஞ்ஜந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, ச²ப்³ப³க்³கி³யா பி⁴க்கு²னியோ ஸப்பிம் விஞ்ஞாபேத்வா பு⁴ஞ்ஜிஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

‘‘யா பன பி⁴க்கு²னீ ஸப்பிம் விஞ்ஞாபேத்வா பு⁴ஞ்ஜேய்ய, படிதே³ஸேதப்³ப³ம் தாய பி⁴க்கு²னியா – ‘கா³ரய்ஹம், அய்யே, த⁴ம்மம் ஆபஜ்ஜிம் அஸப்பாயம் பாடிதே³ஸனீயம், தம் படிதே³ஸேமீ’’’தி.

ஏவஞ்சித³ம் ப⁴க³வதா பி⁴க்கு²னீனம் ஸிக்கா²பத³ம் பஞ்ஞத்தம் ஹோதி.

1229. தேன கோ² பன ஸமயேன பி⁴க்கு²னியோ கி³லானா ஹோந்தி. கி³லானபுச்சி²கா பி⁴க்கு²னியோ கி³லானா பி⁴க்கு²னியோ ஏதத³வோசும் – ‘‘கச்சி, அய்யே, க²மனீயம், கச்சி யாபனீய’’ந்தி? ‘‘புப்³பே³ மயம், அய்யே, ஸப்பிம் விஞ்ஞாபேத்வா பு⁴ஞ்ஜாம, தேன நோ பா²ஸு ஹோதி; இதா³னி பன ‘‘ப⁴க³வதா படிக்கி²த்த’’ந்தி குக்குச்சாயந்தா ந விஞ்ஞாபேம, தேன நோ ந பா²ஸு ஹோதீ’’தி…பே… ப⁴க³வதோ ஏதமத்த²ம் ஆரோசேஸும்…பே… அனுஜானாமி, பி⁴க்க²வே, கி³லானாய பி⁴க்கு²னியா ஸப்பிம் விஞ்ஞாபேத்வா பு⁴ஞ்ஜிதும். ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

1230. ‘‘யா பன பி⁴க்கு²னீ அகி³லானா ஸப்பிம் விஞ்ஞாபேத்வா பு⁴ஞ்ஜேய்ய, படிதே³ஸேதப்³ப³ம் தாய பி⁴க்கு²னியா – ‘கா³ரய்ஹம், அய்யே, த⁴ம்மம் ஆபஜ்ஜிம் அஸப்பாயம் பாடிதே³ஸனீயம் தம் படிதே³ஸேமீ’’’தி.

1231. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

அகி³லானா நாம யஸ்ஸா வினா ஸப்பினா பா²ஸு ஹோதி.

கி³லானா நாம யஸ்ஸா வினா ஸப்பினா ந பா²ஸு ஹோதி.

ஸப்பி நாம கோ³ஸப்பி வா அஜிகாஸப்பி வா மஹிம்ஸஸப்பி வா. யேஸம் மம்ஸம் கப்பதி தேஸம் ஸப்பி.

அகி³லானா அத்தனோ அத்தா²ய விஞ்ஞாபேதி, பயோகே³ து³க்கடம். படிலாபே⁴ன ‘‘பு⁴ஞ்ஜிஸ்ஸாமீ’’தி படிக்³க³ண்ஹாதி, ஆபத்தி து³க்கடஸ்ஸ. அஜ்ஜோ²ஹாரே அஜ்ஜோ²ஹாரே ஆபத்தி பாடிதே³ஸனீயஸ்ஸ.

1232. அகி³லானா அகி³லானஸஞ்ஞா ஸப்பிம் விஞ்ஞாபேத்வா பு⁴ஞ்ஜதி, ஆபத்தி பாடிதே³ஸனீயஸ்ஸ. அகி³லானா வேமதிகா ஸப்பிம் விஞ்ஞாபேத்வா பு⁴ஞ்ஜதி, ஆபத்தி பாடிதே³ஸனீயஸ்ஸ. அகி³லானா கி³லானஸஞ்ஞா ஸப்பிம் விஞ்ஞாபேத்வா பு⁴ஞ்ஜதி, ஆபத்தி பாடிதே³ஸனீயஸ்ஸ.

கி³லானா அகி³லானஸஞ்ஞா, ஆபத்தி து³க்கடஸ்ஸ. கி³லானா வேமதிகா, ஆபத்தி து³க்கடஸ்ஸ. கி³லானா கி³லானஸஞ்ஞா, அனாபத்தி.

1233. அனாபத்தி கி³லானாய, கி³லானா ஹுத்வா விஞ்ஞாபேத்வா அகி³லானா பு⁴ஞ்ஜதி, கி³லானாய ஸேஸகம் பு⁴ஞ்ஜதி, ஞாதகானம் பவாரிதானம், அஞ்ஞஸ்ஸத்தா²ய, அத்தனோ த⁴னேன, உம்மத்திகாய, ஆதி³கம்மிகாயாதி.

பட²மபாடிதே³ஸனீயஸிக்கா²பத³ம் நிட்டி²தம்.