1. பட²மபாடிதே³ஸனீயஸிக்கா²பத³ம்

இமே கோ² பனாயஸ்மந்தோ சத்தாரோ பாடிதே³ஸனீயா

த⁴ம்மா உத்³தே³ஸம் ஆக³ச்ச²ந்தி.

552. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன அஞ்ஞதரா பி⁴க்கு²னீ ஸாவத்தி²யம் பிண்டா³ய சரித்வா படிக்கமனகாலே அஞ்ஞதரம் பி⁴க்கு²ம் பஸ்ஸித்வா ஏதத³வோச – ‘‘ஹந்தா³ய்ய, பி⁴க்க²ம் படிக்³க³ண்ஹா’’தி. ‘‘ஸுட்டு², ப⁴கி³னீ’’தி ஸப்³பே³வ அக்³க³ஹேஸி. ஸா உபகட்டே² காலே நாஸக்கி² பிண்டா³ய சரிதும், சி²ன்னப⁴த்தா அஹோஸி. அத² கோ² ஸா பி⁴க்கு²னீ து³தியம்பி தி³வஸம்…பே… ததியம்பி தி³வஸம் ஸாவத்தி²யம் பிண்டா³ய சரித்வா படிக்கமனகாலே தம் பி⁴க்கு²ம் பஸ்ஸித்வா ஏதத³வோச – ‘‘ஹந்தா³ய்ய, பி⁴க்க²ம் படிக்³க³ண்ஹா’’தி. ‘‘ஸுட்டு², ப⁴கி³னீ’’தி ஸப்³பே³வ அக்³க³ஹேஸி. ஸா உபகட்டே² காலே நாஸக்கி² பிண்டா³ய சரிதும், சி²ன்னப⁴த்தா அஹோஸி. அத² கோ² ஸா பி⁴க்கு²னீ சதுத்தே² தி³வஸே ரதி²காய பவேதே⁴ந்தீ க³ச்ச²தி. ஸேட்டி² க³ஹபதி ரதே²ன படிபத²ம் ஆக³ச்ச²ந்தோ தம் பி⁴க்கு²னிம் ஏதத³வோச – ‘‘அபேஹாய்யே’’தி. ஸா வோக்கமந்தீ தத்தே²வ பரிபதி. ஸேட்டி² க³ஹபதி தம் பி⁴க்கு²னிம் க²மாபேஸி – ‘‘க²மாஹாய்யே, மயாஸி பாதிதா’’தி. ‘‘நாஹம், க³ஹபதி, தயா பாதிதா. அபிச, அஹமேவ து³ப்³ப³லா’’தி. ‘‘கிஸ்ஸ பன த்வம், அய்யே, து³ப்³ப³லா’’தி? அத² கோ² ஸா பி⁴க்கு²னீ ஸேட்டி²ஸ்ஸ க³ஹபதிஸ்ஸ ஏதமத்த²ம் ஆரோசேஸி. ஸேட்டி² க³ஹபதி தம் பி⁴க்கு²னிம் க⁴ரம் நேத்வா போ⁴ஜேத்வா உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம ப⁴த³ந்தா பி⁴க்கு²னியா ஹத்த²தோ ஆமிஸம் படிக்³க³ஹேஸ்ஸந்தி! கிச்ச²லாபோ⁴ மாதுகா³மோ’’தி!

அஸ்ஸோஸும் கோ² பி⁴க்கூ² தஸ்ஸ ஸேட்டி²ஸ்ஸ க³ஹபதிஸ்ஸ உஜ்ஜா²யந்தஸ்ஸ கி²ய்யந்தஸ்ஸ விபாசேந்தஸ்ஸ. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு² பி⁴க்கு²னியா ஹத்த²தோ ஆமிஸம் படிக்³க³ஹேஸ்ஸதீ’’தி …பே… ஸச்சம் கிர த்வம், பி⁴க்கு², பி⁴க்கு²னியா ஹத்த²தோ ஆமிஸம் படிக்³க³ஹேஸீதி? ‘‘ஸச்சம், ப⁴க³வா’’தி. ‘‘ஞாதிகா தே, பி⁴க்கு², அஞ்ஞாதிகா’’தி? ‘‘அஞ்ஞாதிகா, ப⁴க³வா’’தி. ‘‘அஞ்ஞாதகோ, மோக⁴புரிஸ, அஞ்ஞாதிகாய ந ஜானாதி பதிரூபம் வா அப்பதிரூபம் வா ஸந்தம் வா அஸந்தம் வா. கத²ஞ்ஹி நாம த்வம், மோக⁴புரிஸ, அஞ்ஞாதிகாய பி⁴க்கு²னியா ஹத்த²தோ ஆமிஸம் படிக்³க³ஹேஸ்ஸஸி! நேதம், மோக⁴புரிஸ, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

553. ‘‘யோ பன பி⁴க்கு² அஞ்ஞாதிகாய பி⁴க்கு²னியா அந்தரக⁴ரம் பவிட்டா²ய ஹத்த²தோ கா²த³னீயம் வா போ⁴ஜனீயம் வா ஸஹத்தா² படிக்³க³ஹேத்வா கா²தே³ய்ய வா பு⁴ஞ்ஜேய்ய வா, படிதே³ஸேதப்³ப³ம் தேன பி⁴க்கு²னா – ‘கா³ரய்ஹம், ஆவுஸோ, த⁴ம்மம் ஆபஜ்ஜிம் அஸப்பாயம் பாடிதே³ஸனீயம், தம் படிதே³ஸேமீ’’’தி.

554. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

அஞ்ஞாதிகா நாம மாதிதோ வா. பிதிதோ வா யாவ ஸத்தமா பிதாமஹயுகா³ அஸம்ப³த்³தா⁴.

பி⁴க்கு²னீ நாம உப⁴தோஸங்கே⁴ உபஸம்பன்னா.

அந்தரக⁴ரம் நாம ரதி²கா ப்³யூஹம் ஸிங்கா⁴டகம் க⁴ரம்.

கா²த³னீயம் நாம பஞ்ச போ⁴ஜனானி – யாமகாலிகம் ஸத்தாஹகாலிகம் யாவஜீவிகம் ட²பேத்வா அவஸேஸம் கா²த³னீயம் நாம.

போ⁴ஜனீயம் நாம பஞ்ச போ⁴ஜனானி – ஓத³னோ, கும்மாஸோ, ஸத்து, மச்சோ², மம்ஸம். ‘‘கா²தி³ஸ்ஸாமி பு⁴ஞ்ஜிஸ்ஸாமீ’’தி படிக்³க³ண்ஹாதி, ஆபத்தி து³க்கடஸ்ஸ. அஜ்ஜோ²ஹாரே அஜ்ஜோ²ஹாரே ஆபத்தி பாடிதே³ஸனீயஸ்ஸ.

555. அஞ்ஞாதிகாய அஞ்ஞாதிகஸஞ்ஞீ அந்தரக⁴ரம் பவிட்டா²ய ஹத்த²தோ கா²த³னீயம் வா போ⁴ஜனீயம் வா ஸஹத்தா² படிக்³க³ஹேத்வா கா²த³தி வா பு⁴ஞ்ஜதி வா, ஆபத்தி பாடிதே³ஸனீயஸ்ஸ. அஞ்ஞாதிகாய வேமதிகோ அந்தரக⁴ரம் பவிட்டா²ய ஹத்த²தோ கா²த³னீயம் வா போ⁴ஜனீயம் வா ஸஹத்தா² படிக்³க³ஹேத்வா கா²த³தி வா பு⁴ஞ்ஜதி வா, ஆபத்தி பாடிதே³ஸனீயஸ்ஸ. அஞ்ஞாதிகாய ஞாதிகஸஞ்ஞீ அந்தரக⁴ரம் பவிட்டா²ய ஹத்த²தோ கா²த³னீயம் வா போ⁴ஜனீயம் வா ஸஹத்தா² படிக்³க³ஹேத்வா கா²த³தி வா பு⁴ஞ்ஜதி வா, ஆபத்தி பாடிதே³ஸனீயஸ்ஸ.

யாமகாலிகம் ஸத்தாஹகாலிகம் யாவஜீவிகம் ஆஹாரத்தா²ய படிக்³க³ண்ஹாதி, ஆபத்தி து³க்கடஸ்ஸ. அஜ்ஜோ²ஹாரே அஜ்ஜோ²ஹாரே ஆபத்தி து³க்கடஸ்ஸ. ஏகதோஉபஸம்பன்னாய ஹத்த²தோ கா²த³னீயம் வா போ⁴ஜனீயம் வா – ‘‘கா²தி³ஸ்ஸாமி பு⁴ஞ்ஜிஸ்ஸாமீ’’தி படிக்³க³ண்ஹாதி, ஆபத்தி து³க்கடஸ்ஸ. அஜ்ஜோ²ஹாரே அஜ்ஜோ²ஹாரே ஆபத்தி து³க்கடஸ்ஸ. ஞாதிகாய அஞ்ஞாதிகஸஞ்ஞீ, ஆபத்தி து³க்கடஸ்ஸ. ஞாதிகாய வேமதிகோ, ஆபத்தி து³க்கடஸ்ஸ. ஞாதிகாய ஞாதிகஸஞ்ஞீ, அனாபத்தி.

556. அனாபத்தி ஞாதிகாய, தா³பேதி ந தே³தி, உபனிக்கி²பித்வா தே³தி அந்தராராமே, பி⁴க்கு²னுபஸ்ஸயே, தித்தி²யஸேய்யாய, படிக்கமனே, கா³மதோ நீஹரித்வா தே³தி, யாமகாலிகம் ஸத்தாஹகாலிகம் யாவஜீவிகம் ‘‘ஸதி பச்சயே பரிபு⁴ஞ்ஜா’’தி தே³தி, ஸிக்க²மானாய, ஸாமணேரியா, உம்மத்தகஸ்ஸ, ஆதி³கம்மிகஸ்ஸாதி.

பட²மபாடிதே³ஸனீயஸிக்கா²பத³ம் நிட்டி²தம்.