8. பூ⁴தாரோசனஸிக்கா²பத³ம்

67. [பாரா. 193] தேன ஸமயேன பு³த்³தோ⁴ ப⁴க³வா வேஸாலியம் விஹரதி மஹாவனே கூடாகா³ரஸாலாயம். தேன கோ² பன ஸமயேன ஸம்ப³ஹுலா ஸந்தி³ட்டா² ஸம்ப⁴த்தா பி⁴க்கூ² வக்³கு³முதா³ய நதி³யா தீரே வஸ்ஸம் உபக³ச்சி²ம்ஸு. தேன கோ² பன ஸமயேன வஜ்ஜீ து³ப்³பி⁴க்கா² ஹோதி – த்³வீஹிதிகா ஸேதட்டி²கா ஸலாகாவுத்தா, ந ஸுகரா உஞ்சே²ன பக்³க³ஹேன யாபேதும். அத² கோ² தேஸம் பி⁴க்கூ²னம் ஏதத³ஹோஸி – ‘‘ஏதரஹி கோ² வஜ்ஜீ து³ப்³பி⁴க்கா² – த்³வீஹிதிகா ஸேதட்டி²கா ஸலாகாவுத்தா, ந ஸுகரா உஞ்சே²ன பக்³க³ஹேன யாபேதும். கேன நு கோ² மயம் உபாயேன ஸமக்³கா³ ஸம்மோத³மானா அவிவத³மானா பா²ஸுகம் வஸ்ஸம் வஸேய்யாம, ந ச பிண்ட³கேன கிலமேய்யாமா’’தி? ஏகச்சே ஏவமாஹம்ஸு – ‘‘ஹந்த³ மயம், ஆவுஸோ, கி³ஹீனம் கம்மந்தம் அதி⁴ட்டே²ம. ஏவம் தே அம்ஹாகம் தா³தும் மஞ்ஞிஸ்ஸந்தி. ஏவம் மயம் ஸமக்³கா³ ஸம்மோத³மானா அவிவத³மானா பா²ஸுகம் வஸ்ஸம் வஸிஸ்ஸாம, ந ச பிண்ட³கேன கிலமிஸ்ஸாமா’’தி. ஏகச்சே ஏவமாஹம்ஸு – ‘‘அலம், ஆவுஸோ, கிம் கி³ஹீனம் கம்மந்தம் அதி⁴ட்டி²தேன? ஹந்த³ மயம், ஆவுஸோ, கி³ஹீனம் தூ³தேய்யம் ஹராம. ஏவம் தே அம்ஹாகம் தா³தும் மஞ்ஞிஸ்ஸந்தி. ஏவம் மயம் ஸமக்³கா³ ஸம்மோத³மானா அவிவத³மானா பா²ஸுகம் வஸ்ஸம் வஸிஸ்ஸாம, ந ச பிண்ட³கேன கிலமிஸ்ஸாமா’’தி. ஏகச்சே ஏவமாஹம்ஸு – ‘‘அலம், ஆவுஸோ; கிம் கி³ஹீனம் கம்மந்தம் அதி⁴ட்டி²தேன! கிம் கி³ஹீனம் தூ³தேய்யம் ஹடேன! ஹந்த³ மயம், ஆவுஸோ, கி³ஹீனம் அஞ்ஞமஞ்ஞஸ்ஸ உத்தரிமனுஸ்ஸத⁴ம்மஸ்ஸ வண்ணம் பா⁴ஸிஸ்ஸாம – ‘அஸுகோ பி⁴க்கு² பட²மஸ்ஸ ஜா²னஸ்ஸ லாபீ⁴, அஸுகோ பி⁴க்கு² து³தியஸ்ஸ ஜா²னஸ்ஸ லாபீ⁴, அஸுகோ பி⁴க்கு² ததியஸ்ஸ ஜா²னஸ்ஸ லாபீ⁴, அஸுகோ பி⁴க்கு² சதுத்த²ஸ்ஸ ஜா²னஸ்ஸ லாபீ⁴, அஸுகோ பி⁴க்கு² ஸோதாபன்னோ, அஸுகோ பி⁴க்கு² ஸகதா³கா³மீ, அஸுகோ பி⁴க்கு² அனாகா³மீ, அஸுகோ பி⁴க்கு² அரஹா, அஸுகோ பி⁴க்கு² தேவிஜ்ஜோ, அஸுகோ பி⁴க்கு² ச²ளபி⁴ஞ்ஞோதி. ஏவம் தே அம்ஹாகம் தா³தும் மஞ்ஞிஸ்ஸந்தி. ஏவம் மயம் ஸமக்³கா³ ஸம்மோத³மானா அவிவத³மானா பா²ஸுகம் வஸ்ஸம் வஸிஸ்ஸாம, ந ச பிண்ட³கேன கிலமிஸ்ஸாமா’’தி. ஏஸோ யேவ கோ², ஆவுஸோ, ஸேய்யோ, யோ அம்ஹாகம் கி³ஹீனம் அஞ்ஞமஞ்ஞஸ்ஸ உத்தரிமனுஸ்ஸத⁴ம்மஸ்ஸ வண்ணோ பா⁴ஸிதோ’’தி.

அத² கோ² தே பி⁴க்கூ² கி³ஹீனம் அஞ்ஞமஞ்ஞஸ்ஸ உத்தரிமனுஸ்ஸத⁴ம்மஸ்ஸ வண்ணம் பா⁴ஸிம்ஸு – ‘‘அஸுகோ பி⁴க்கு² பட²மஸ்ஸ ஜா²னஸ்ஸ லாபீ⁴…பே… அஸுகோ பி⁴க்கு² ச²ளபி⁴ஞ்ஞோ’’தி. அத² கோ² தே மனுஸ்ஸா – ‘‘லாபா⁴ வத நோ, ஸுலத்³த⁴ம் வத நோ, யேஸம் நோ ஏவரூபா பி⁴க்கூ² வஸ்ஸம் உபக³தா, ந வத நோ இதோ புப்³பே³ ஏவரூபா பி⁴க்கூ² வஸ்ஸம் உபக³தா, யத²யிமே பி⁴க்கூ² ஸீலவந்தோ கல்யாணத⁴ம்மா’’தி. தே ந தாதி³ஸானி போ⁴ஜனானி அத்தனா பு⁴ஞ்ஜந்தி, மாதாபிதூனம் தே³ந்தி புத்ததா³ரஸ்ஸ தே³ந்தி தா³ஸகம்மகரபோரிஸஸ்ஸ தே³ந்தி மித்தாமச்சானம் தே³ந்தி ஞாதிஸாலோஹிதானம் தே³ந்தி யாதி³ஸானி பி⁴க்கூ²னம் தே³ந்தி. ந தாதி³ஸானி கா²த³னீயானி ஸாயனீயானி பானானி அத்தனா கா²த³ந்தி ஸாயந்தி பிவந்தி [அத்தனா பிவந்தி (ஸ்யா. க.)] மாதாபிதூனம் தே³ந்தி புத்ததா³ரஸ்ஸ தே³ந்தி தா³ஸகம்மகரபோரிஸஸ்ஸ தே³ந்தி மித்தாமச்சானம் தே³ந்தி ஞாதிஸாலோஹிதானம் தே³ந்தி, யாதி³ஸானி பி⁴க்கூ²னம் தே³ந்தி. அத² கோ² தே பி⁴க்கூ² வண்ணவா அஹேஸும் பீணிந்த்³ரியா பஸன்னமுக²வண்ணா விப்பஸன்னச²விவண்ணா.

68. ஆசிண்ணம் கோ² பனேதம் வஸ்ஸம்வுட்டா²னம் பி⁴க்கூ²னம் ப⁴க³வந்தம் த³ஸ்ஸனாய உபஸங்கமிதும். அத² கோ² தே பி⁴க்கூ² வஸ்ஸம்வுட்டா² தேமாஸச்சயேன ஸேனாஸனம் ஸம்ஸாமேத்வா பத்தசீவரமாதா³ய யேன வேஸாலீ தேன பக்கமிம்ஸு. அனுபுப்³பே³ன யேன வேஸாலீ மஹாவனம் கூடாகா³ரஸாலா யேன ப⁴க³வா தேனுபஸங்கமிம்ஸு; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³ம்ஸு. தேன கோ² பன ஸமயேன தி³ஸாஸு வஸ்ஸம்வுட்டா² பி⁴க்கூ² கிஸா ஹோந்தி லூகா² து³ப்³ப³ண்ணா உப்பண்டு³ப்பண்டு³கஜாதா த⁴மனிஸந்த²தக³த்தா. வக்³கு³முதா³தீரியா பன பி⁴க்கூ² வண்ணவா ஹோந்தி பீணிந்த்³ரியா பஸன்னமுக²வண்ணா விப்பஸன்னச²விவண்ணா. ஆசிண்ணம் கோ² பனேதம் பு³த்³தா⁴னம் ப⁴க³வந்தானம் ஆக³ந்துகேஹி பி⁴க்கூ²ஹி ஸத்³தி⁴ம் படிஸம்மோதி³தும். அத² கோ² ப⁴க³வா வக்³கு³முதா³தீரியே பி⁴க்கூ² ஏதத³வோச – ‘‘கச்சி, பி⁴க்க²வே, க²மனீயம், கச்சி யாபனீயம், கச்சி ஸமக்³கா³ ஸம்மோத³மானா அவிவத³மானா பா²ஸுகம் வஸ்ஸம் வஸித்த², ந ச பிண்ட³கேன கிலமித்தா²’’தி? ‘‘க²மனீயம் ப⁴க³வா, யாபனீயம் ப⁴க³வா. ஸமக்³கா³ ச மயம், ப⁴ந்தே, ஸம்மோத³மானா அவிவத³மானா பா²ஸுகம் வஸ்ஸம் வஸிம்ஹா, ந ச பிண்ட³கேன கிலமிம்ஹா’’தி. ஜானந்தாபி ததா²க³தா புச்ச²ந்தி, ஜானந்தாபி ந புச்ச²ந்தி. காலம் விதி³த்வா புச்ச²ந்தி, காலம் விதி³த்வா ந புச்ச²ந்தி. அத்த²ஸஞ்ஹிதம் ததா²க³தா புச்ச²ந்தி, நோ அனத்த²ஸஞ்ஹிதம். அனத்த²ஸஞ்ஹிதே ஸேதுகா⁴தோ ததா²க³தானம். த்³வீஹாகாரேஹி பு³த்³தா⁴ ப⁴க³வந்தோ பி⁴க்கூ² படிபுச்ச²ந்தி – த⁴ம்மம் வா தே³ஸேஸ்ஸாம, ஸாவகானம் வா ஸிக்கா²பத³ம் பஞ்ஞபேஸ்ஸாமாதி.

அத² கோ² ப⁴க³வா வக்³கு³முதா³தீரியே பி⁴க்கூ² ஏதத³வோச – ‘‘யதா² கத²ம் பன தும்ஹே, பி⁴க்க²வே, ஸமக்³கா³ ஸம்மோத³மானா அவிவத³மானா பா²ஸுகம் வஸ்ஸம் வஸித்த², ந ச பிண்ட³கேன கிலமித்தா²’’தி? அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும். ‘‘கச்சி பன வோ, பி⁴க்க²வே, பூ⁴த’’ந்தி? ‘‘பூ⁴தம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, பி⁴க்க²வே, உத³ரஸ்ஸ காரணா கி³ஹீனம் அஞ்ஞமஞ்ஞஸ்ஸ உத்தரிமனுஸ்ஸத⁴ம்மஸ்ஸ வண்ணம் பா⁴ஸிஸ்ஸத²! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

69. ‘‘யோ பன பி⁴க்கு² அனுபஸம்பன்னஸ்ஸ உத்தரிமனுஸ்ஸத⁴ம்மம் ஆரோசேய்ய பூ⁴தஸ்மிம், பாசித்திய’’ந்தி.

70. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

அனுபஸம்பன்னோ நாம பி⁴க்கு²ஞ்ச பி⁴க்கு²னிஞ்ச ட²பேத்வா, அவஸேஸோ அனுபஸம்பன்னோ நாம.

[பாரா. 198] உத்தரிமனுஸ்ஸத⁴ம்மோ நாம ஜா²னம், விமோக்கோ², ஸமாதி⁴, ஸமாபத்தி, ஞாணத³ஸ்ஸனம், மக்³க³பா⁴வனா, ப²லஸச்சி²கிரியா, கிலேஸப்பஹானம், வினீவரணதா சித்தஸ்ஸ, ஸுஞ்ஞாகா³ரே அபி⁴ரதி.

[பாரா. 199] ஜா²னந்தி பட²மம் ஜா²னம், து³தியம் ஜா²னம், ததியம் ஜா²னம், சதுத்த²ம் ஜா²னம்.

[பாரா. 199] விமோக்கோ²தி ஸுஞ்ஞதோ விமோக்கோ², அனிமித்தோ விமோக்கோ², அப்பணிஹிதோ விமோக்கோ².

[பாரா. 199] ஸமாதீ⁴தி ஸுஞ்ஞதோ ஸமாதி⁴, அனிமித்தோ ஸமாதி⁴, அப்பணிஹிதோ ஸமாதி⁴.

[பாரா. 199] ஸமாபத்தீதி ஸுஞ்ஞதா ஸமாபத்தி, அனிமித்தா ஸமாபத்தி, அப்பணிஹிதா ஸமாபத்தி.

[பாரா. 199] ஞாணத³ஸ்ஸனந்தி திஸ்ஸோ விஜ்ஜா.

[பாரா. 199] மக்³க³பா⁴வனாதி சத்தாரோ ஸதிபட்டா²னா, சத்தாரோ ஸம்மப்பதா⁴னா, சத்தாரோ இத்³தி⁴பாதா³, பஞ்சிந்த்³ரியானி, பஞ்ச ப³லானி, ஸத்த போ³ஜ்ஜ²ங்கா³, அரியோ அட்ட²ங்கி³கோ மக்³கோ³.

[பாரா. 199] ப²லஸச்சி²கிரியாதி ஸோதாபத்திப²லஸ்ஸ ஸச்சி²கிரியா, ஸகதா³கா³மிப²லஸ்ஸ ஸச்சி²கிரியா, அனாகா³மிப²லஸ்ஸ ஸச்சி²கிரியா, அரஹத்தஸ்ஸ [அரஹத்தப²லஸ்ஸ (ஸ்யா.)] ஸச்சி²கிரியா.

[பாரா. 199] கிலேஸப்பஹானந்தி ராக³ஸ்ஸ பஹானம், தோ³ஸஸ்ஸ பஹானம், மோஹஸ்ஸ பஹானம்.

[பாரா. 199] வினீவரணதா சித்தஸ்ஸாதி ராகா³ சித்தம் வினீவரணதா, தோ³ஸா சித்தம் வினீவரணதா, மோஹா சித்தம் வினீவரணதா.

[பாரா. 199] ஸுஞ்ஞாகா³ரே அபி⁴ரதீதி பட²மேன ஜா²னேன ஸுஞ்ஞாகா³ரே அபி⁴ரதி, து³தியேன ஜா²னேன ஸுஞ்ஞாகா³ரே அபி⁴ரதி, ததியேன ஜா²னேன ஸுஞ்ஞாகா³ரே அபி⁴ரதி, சதுத்தே²ன ஜா²னேன ஸுஞ்ஞாகா³ரே அபி⁴ரதி.

71. ஆரோசேய்யாதி அனுபஸம்பன்னஸ்ஸ – ‘‘பட²மம் ஜா²னம் ஸமாபஜ்ஜி’’ந்தி ப⁴ணந்தஸ்ஸ ஆபத்தி பாசித்தியஸ்ஸ.

ஆரோசேய்யாதி அனுபஸம்பன்னஸ்ஸ – ‘‘பட²மம் ஜா²னம் ஸமாபஜ்ஜாமீ’’தி ப⁴ணந்தஸ்ஸ ஆபத்தி பாசித்தியஸ்ஸ.

ஆரோசேய்யாதி அனுபஸம்பன்னஸ்ஸ – ‘‘பட²மம் ஜா²னம் ஸமாபன்னோ’’தி ப⁴ணந்தஸ்ஸ ஆபத்தி பாசித்தியஸ்ஸ.

ஆரோசேய்யாதி அனுபஸம்பன்னஸ்ஸ – ‘‘பட²மஸ்ஸ ஜா²னஸ்ஸ லாபி⁴ம்ஹீ’’தி ப⁴ணந்தஸ்ஸ ஆபத்தி பாசித்தியஸ்ஸ.

ஆரோசேய்யாதி அனுபஸம்பன்னஸ்ஸ – ‘‘பட²மஸ்ஸ ஜா²னஸ்ஸ வஸிம்ஹீ’’தி ப⁴ணந்தஸ்ஸ ஆபத்தி பாசித்தியஸ்ஸ.

ஆரோசேய்யாதி அனுபஸம்பன்னஸ்ஸ – ‘‘பட²மம் ஜா²னம் ஸச்சி²கதம் மயா’’தி ப⁴ணந்தஸ்ஸ ஆபத்தி பாசித்தியஸ்ஸ.

ஆரோசேய்யாதி அனுபஸம்பன்னஸ்ஸ – ‘‘து³தியம் ஜா²னம்… ததியம் ஜா²னம்… சதுத்த²ம் ஜா²னம் ஸமாபஜ்ஜிம், ஸமாபஜ்ஜாமி, ஸமாபன்னோ; சதுத்த²ஸ்ஸ ஜா²னஸ்ஸ லாபி⁴ம்ஹி, வஸிம்ஹி; சதுத்த²ம் ஜா²னம் ஸச்சி²கதம் மயா’’தி ப⁴ணந்தஸ்ஸ ஆபத்தி பாசித்தியஸ்ஸ.

ஆரோசேய்யாதி அனுபஸம்பன்னஸ்ஸ – ‘‘ஸுஞ்ஞதம் விமோக்க²ம்… அனிமித்தம் விமோக்க²ம்… அப்பணிஹிதம் விமோக்க²ம்… ஸுஞ்ஞதம் ஸமாதி⁴ம்… அனிமித்தம் ஸமாதி⁴ம்… அப்பணிஹிதம் ஸமாதி⁴ம் ஸமாபஜ்ஜிம், ஸமாபஜ்ஜாமி, ஸமாபன்னோ; அப்பணிஹிதஸ்ஸ ஸமாதி⁴ஸ்ஸ லாபி⁴ம்ஹி, வஸிம்ஹி; அப்பணிஹிதோ ஸமாதி⁴ ஸச்சி²கதோ மயா’’தி ப⁴ணந்தஸ்ஸ ஆபத்தி பாசித்தியஸ்ஸ.

ஆரோசேய்யாதி அனுபஸம்பன்னஸ்ஸ – ‘‘ஸுஞ்ஞதம் ஸமாபத்திம்… அனிமித்தம் ஸமாபத்திம்… அப்பணிஹிதம் ஸமாபத்திம் ஸமாபஜ்ஜிம், ஸமாபஜ்ஜாமி, ஸமாபன்னோ; அப்பணிஹிதாய ஸமாபத்தியா லாபி⁴ம்ஹி, வஸிம்ஹி; அப்பணிஹிதா ஸமாபத்தி ஸச்சி²கதா மயா’’தி ப⁴ணந்தஸ்ஸ ஆபத்தி பாசித்தியஸ்ஸ.

ஆரோசேய்யாதி அனுபஸம்பன்னஸ்ஸ – ‘‘திஸ்ஸோ விஜ்ஜா ஸமாபஜ்ஜிம், ஸமாபஜ்ஜாமி, ஸமாபன்னோ; திஸ்ஸன்னம் விஜ்ஜானம் லாபி⁴ம்ஹி, வஸிம்ஹி; திஸ்ஸோ விஜ்ஜா ஸச்சி²கதா மயா’’தி ப⁴ணந்தஸ்ஸ ஆபத்தி பாசித்தியஸ்ஸ.

ஆரோசேய்யாதி அனுபஸம்பன்னஸ்ஸ – ‘‘சத்தாரோ ஸதிபட்டா²னே… சத்தாரோ ஸம்மப்பதா⁴னே… சத்தாரோ இத்³தி⁴பாதே³ ஸமாபஜ்ஜிம், ஸமாபஜ்ஜாமி, ஸமாபன்னோ; சதுன்னம் இத்³தி⁴பாதா³னம் லாபி⁴ம்ஹி, வஸிம்ஹி; சத்தாரோ இத்³தி⁴பாதா³ ஸச்சி²கதா மயா’’தி ப⁴ணந்தஸ்ஸ ஆபத்தி பாசித்தியஸ்ஸ.

ஆரோசேய்யாதி அனுபஸம்பன்னஸ்ஸ – ‘‘பஞ்சிந்த்³ரியானி… பஞ்ச ப³லானி ஸமாபஜ்ஜிம், ஸமாபஜ்ஜாமி, ஸமாபன்னோ; பஞ்சன்னம் ப³லானம் லாபி⁴ம்ஹி, வஸிம்ஹி; பஞ்ச ப³லானி ஸச்சி²கதானி மயா’’தி ப⁴ணந்தஸ்ஸ ஆபத்தி பாசித்தியஸ்ஸ.

ஆரோசேய்யாதி அனுபஸம்பன்னஸ்ஸ – ‘‘ஸத்த போ³ஜ்ஜ²ங்கே³ ஸமாபஜ்ஜிம், ஸமாபஜ்ஜாமி, ஸமாபன்னோ; ஸத்தன்னம் போ³ஜ்ஜ²ங்கா³னம் லாபி⁴ம்ஹி, வஸிம்ஹி; ஸத்த போ³ஜ்ஜ²ங்கா³ ஸச்சி²கதா மயா’’தி ப⁴ணந்தஸ்ஸ ஆபத்தி பாசித்தியஸ்ஸ.

ஆரோசேய்யாதி அனுபஸம்பன்னஸ்ஸ – ‘‘அரியம் அட்ட²ங்கி³கம் மக்³க³ம் ஸமாபஜ்ஜிம், ஸமாபஜ்ஜாமி, ஸமாபன்னோ; அரியஸ்ஸ அட்ட²ங்கி³கஸ்ஸ மக்³க³ஸ்ஸ லாபி⁴ம்ஹி, வஸிம்ஹி; அரியோ அட்ட²ங்கி³கோ மக்³கோ³ ஸச்சி²கதோ மயா’’தி ப⁴ணந்தஸ்ஸ ஆபத்தி பாசித்தியஸ்ஸ.

ஆரோசேய்யாதி அனுபஸம்பன்னஸ்ஸ – ‘‘ஸோதாபத்திப²லம்… ஸகதா³கா³மிப²லம்… அனாகா³மிப²லம்… அரஹத்தம் ஸமாபஜ்ஜிம், ஸமாபஜ்ஜாமி, ஸமாபன்னோ; அரஹத்தஸ்ஸ லாபி⁴ம்ஹி, வஸிம்ஹி; அரஹத்தம் [அரஹத்தப²லம் (ஸ்யா.)] ஸச்சி²கதம் மயா’’தி ப⁴ணந்தஸ்ஸ ஆபத்தி பாசித்தியஸ்ஸ.

ஆரோசேய்யாதி அனுபஸம்பன்னஸ்ஸ – ‘‘ராகோ³ மே சத்தோ… தோ³ஸோ மே சத்தோ… மோஹோ மே சத்தோ, வந்தோ, முத்தோ, பஹீனோ, படினிஸ்ஸட்டோ², உக்கே²டிதோ, ஸமுக்கே²டிதோ’’தி ப⁴ணந்தஸ்ஸ ஆபத்தி பாசித்தியஸ்ஸ.

ஆரோசேய்யாதி அனுபஸம்பன்னஸ்ஸ – ‘‘ராகா³ மே சித்தம் வினீவரணம்… தோ³ஸா மே சித்த வினீவரணம்… மோஹா மே சித்தம் வினீவரண’’ந்தி ப⁴ணந்தஸ்ஸ ஆபத்தி பாசித்தியஸ்ஸ.

ஆரோசேய்யாதி அனுபஸம்பன்னஸ்ஸ – ‘‘ஸுஞ்ஞாகா³ரே பட²மம் ஜா²னம்… து³தியம் ஜா²னம்… ததியம் ஜா²னம்… சதுத்த²ம் ஜா²னம் ஸமாபஜ்ஜிம், ஸமாபஜ்ஜாமி, ஸமாபன்னோ; ஸுஞ்ஞாகா³ரே சதுத்த²ஸ்ஸ ஜா²னஸ்ஸ லாபி⁴ம்ஹி, வஸிம்ஹி; ஸுஞ்ஞாகா³ரே சதுத்த²ம் ஜா²னம் ஸச்சி²கதம் மயா’’தி ப⁴ணந்தஸ்ஸ ஆபத்தி பாசித்தியஸ்ஸ.

72. ஆரோசேய்யாதி அனுபஸம்பன்னஸ்ஸ – ‘‘பட²மஞ்ச ஜா²னம் து³தியஞ்ச ஜா²னம் ஸமாபஜ்ஜிம், ஸமாபஜ்ஜாமி, ஸமாபன்னோ; பட²மஸ்ஸ ச ஜா²னஸ்ஸ து³தியஸ்ஸ ச ஜா²னஸ்ஸ லாபி⁴ம்ஹி, வஸிம்ஹி; பட²மஞ்ச ஜா²னம் து³தியஞ்ச ஜா²னம் ஸச்சி²கதம் மயா’’தி ப⁴ணந்தஸ்ஸ ஆபத்தி பாசித்தியஸ்ஸ.

ஆரோசேய்யாதி அனுபஸம்பன்னஸ்ஸ – ‘‘பட²மஞ்ச ஜா²னம் ததியஞ்ச ஜா²னம்… பட²மஞ்ச ஜா²னம் சதுத்த²ஞ்ச ஜா²னம் ஸமாபஜ்ஜிம், ஸமாபஜ்ஜாமி, ஸமாபன்னோ; பட²மஸ்ஸ ச ஜா²னஸ்ஸ சதுத்த²ஸ்ஸ ச ஜா²னஸ்ஸ லாபி⁴ம்ஹி, வஸிம்ஹி; பட²மஞ்ச ஜா²னம் சதுத்த²ஞ்ச ஜா²னம் ஸச்சி²கதம் மயா’’தி ப⁴ணந்தஸ்ஸ ஆபத்தி பாசித்தியஸ்ஸ.

ஆரோசேய்யாதி அனுபஸம்பன்னஸ்ஸ – ‘‘பட²மஞ்ச ஜா²னம் ஸுஞ்ஞதஞ்ச விமோக்க²ம்… அனிமித்தஞ்ச விமோக்க²ம்… அப்பணிஹிதஞ்ச விமோக்க²ம்… ஸுஞ்ஞதஞ்ச ஸமாதி⁴ம்… அனிமித்தஞ்ச ஸமாதி⁴ம்… அப்பணிஹிதஞ்ச ஸமாதி⁴ம் ஸமாபஜ்ஜிம், ஸமாபஜ்ஜாமி, ஸமாபன்னோ; பட²மஸ்ஸ ச ஜா²னஸ்ஸ அப்பணிஹிதஸ்ஸ ச ஸமாதி⁴ஸ்ஸ லாபி⁴ம்ஹி, வஸிம்ஹி; பட²மஞ்ச ஜா²னம் அப்பணிஹிதோ ச ஸமாதி⁴ ஸச்சி²கதோ மயா’’தி ப⁴ணந்தஸ்ஸ ஆபத்தி பாசித்தியஸ்ஸ.

ஆரோசேய்யாதி அனுபஸம்பன்னஸ்ஸ – ‘‘பட²மஞ்ச ஜா²னம் ஸுஞ்ஞதஞ்ச ஸமாபத்திம்… அனிமித்தஞ்ச ஸமாபத்திம்… அப்பணிஹிதஞ்ச ஸமாபத்திம் ஸமாபஜ்ஜிம், ஸமாபஜ்ஜாமி, ஸமாபன்னோ; பட²மஸ்ஸ ச ஜா²னஸ்ஸ அப்பணிஹிதாய ச ஸமாபத்தியா லாபி⁴ம்ஹி, வஸிம்ஹி; பட²மஞ்ச ஜா²னம் அப்பணிஹிதா ச ஸமாபத்தி ஸச்சி²கதா மயா’’தி ப⁴ணந்தஸ்ஸ ஆபத்தி பாசித்தியஸ்ஸ.

ஆரோசேய்யாதி அனுபஸம்பன்னஸ்ஸ – ‘‘பட²மஞ்ச ஜா²னம் திஸ்ஸோ ச விஜ்ஜா ஸமாபஜ்ஜிம், ஸமாபஜ்ஜாமி, ஸமாபன்னோ; பட²மஸ்ஸ ச ஜா²னஸ்ஸ திஸ்ஸன்னஞ்ச விஜ்ஜானம் லாபி⁴ம்ஹி, வஸிம்ஹி; பட²மஞ்ச ஜா²னம் திஸ்ஸோ ச விஜ்ஜா ஸச்சி²கதா மயா’’தி ப⁴ணந்தஸ்ஸ ஆபத்தி பாசித்தியஸ்ஸ.

ஆரோசேய்யாதி அனுபஸம்பன்னஸ்ஸ – ‘‘பட²மஞ்ச ஜா²னம் சத்தாரோ ச ஸதிபட்டா²னே…பே… சத்தாரோ ச ஸம்மப்பதா⁴னே… சத்தாரோ ச இத்³தி⁴பாதே³ ஸமாபஜ்ஜிம், ஸமாபஜ்ஜாமி, ஸமாபன்னோ; பட²மஸ்ஸ ச ஜா²னஸ்ஸ சதுன்னஞ்ச இத்³தி⁴பாதா³னம் லாபி⁴ம்ஹி, வஸிம்ஹி; பட²மஞ்ச ஜா²னம் சத்தாரோ ச இத்³தி⁴பாதா³ ஸச்சி²கதா மயா’’தி ப⁴ணந்தஸ்ஸ ஆபத்தி பாசித்தியஸ்ஸ.

ஆரோசேய்யாதி அனுபஸம்பன்னஸ்ஸ – ‘‘பட²மஞ்ச ஜா²னம், பஞ்ச ச இந்த்³ரியானி… பஞ்ச ச ப³லானி ஸமாபஜ்ஜிம், ஸமாபஜ்ஜாமி, ஸமாபன்னோ; பட²மஸ்ஸ ச ஜா²னஸ்ஸ பஞ்சன்னஞ்ச ப³லானம் லாபி⁴ம்ஹி, வஸிம்ஹி; பட²மஞ்ச ஜா²னம் பஞ்ச ச ப³லானி ஸச்சி²கதானி மயா’’தி ப⁴ணந்தஸ்ஸ ஆபத்தி பாசித்தியஸ்ஸ.

ஆரோசேய்யாதி அனுபஸம்பன்னஸ்ஸ – ‘‘பட²மஞ்ச ஜா²னம் ஸத்த ச போ³ஜ்ஜ²ங்கே³ ஸமாபஜ்ஜிம், ஸமாபஜ்ஜாமி, ஸமாபன்னோ; பட²மஸ்ஸ ச ஜா²னஸ்ஸ ஸத்தன்னஞ்ச போ³ஜ்ஜ²ங்கா³னம் லாபி⁴ம்ஹி, வஸிம்ஹி; பட²மஞ்ச ஜா²னம் ஸத்த ச போ³ஜ்ஜ²ங்கா³ ஸச்சி²கதா மயா’’தி ப⁴ணந்தஸ்ஸ ஆபத்தி பாசித்தியஸ்ஸ.

ஆரோசேய்யாதி அனுபஸம்பன்னஸ்ஸ – ‘‘பட²மஞ்ச ஜா²னம் அரியஞ்ச அட்ட²ங்கி³கம் மக்³க³ம் ஸமாபஜ்ஜிம், ஸமாபஜ்ஜாமி, ஸமாபன்னோ; பட²மஸ்ஸ ச ஜா²னஸ்ஸ அரியஸ்ஸ ச அட்ட²ங்கி³கஸ்ஸ மக்³க³ஸ்ஸ லாபி⁴ம்ஹி, வஸிம்ஹி; பட²மஞ்ச ஜா²னம் அரியோ ச அட்ட²ங்கி³கோ மக்³கோ³ ஸச்சி²கதோ மயா’’தி ப⁴ணந்தஸ்ஸ ஆபத்தி பாசித்தியஸ்ஸ.

ஆரோசேய்யாதி அனுபஸம்பன்னஸ்ஸ – ‘‘பட²மஞ்ச ஜா²னம் ஸோதாபத்திப²லஞ்ச… ஸகதா³கா³மிப²லஞ்ச… அனாகா³மிப²லஞ்ச… அரஹத்தஞ்ச [அரஹத்தப²லஞ்ச (ஸ்யா.)] ஸமாபஜ்ஜிம், ஸமாபஜ்ஜாமி, ஸமாபன்னோ; பட²மஸ்ஸ ச ஜா²னஸ்ஸ அரஹத்தஸ்ஸ [அரஹத்தப²லஸ்ஸ (ஸ்யா.)] ச லாபி⁴ம்ஹி, வஸிம்ஹி; பட²மஞ்ச ஜா²னம் அரஹத்தஞ்ச ஸச்சி²கதம் மயா’’தி ப⁴ணந்தஸ்ஸ ஆபத்தி பாசித்தியஸ்ஸ.

ஆரோசேய்யாதி அனுபஸம்பன்னஸ்ஸ – ‘‘பட²மஞ்ச ஜா²னம் ஸமாபஜ்ஜிம், ஸமாபஜ்ஜாமி, ஸமாபன்னோ… ராகோ³ ச மே சத்தோ… தோ³ஸோ ச மே சத்தோ… மோஹோ ச மே சத்தோ, வந்தோ, முத்தோ, பஹீனோ, படினிஸ்ஸட்டோ², உக்கே²டிதோ, ஸமுக்கே²டிதோ’’தி ப⁴ணந்தஸ்ஸ ஆபத்தி பாசித்தியஸ்ஸ.

ஆரோசேய்யாதி அனுபஸம்பன்னஸ்ஸ – ‘‘பட²மஞ்ச ஜா²னம் ஸமாபஜ்ஜிம், ஸமாபஜ்ஜாமி, ஸமாபன்னோ… ராகா³ ச மே சித்தம் வினீவரணம்… தோ³ஸா ச மே சித்தம் வினீவரணம்… மோஹா ச மே சித்தம் வினீவரண’’ந்தி ப⁴ணந்தஸ்ஸ ஆபத்தி பாசித்தியஸ்ஸ.

73. ஆரோசேய்யாதி அனுபஸம்பன்னஸ்ஸ – ‘‘து³தியஞ்ச ஜா²னம் ததியஞ்ச ஜா²னம்… து³தியஞ்ச ஜா²னம் சதுத்த²ஞ்ச ஜா²னம் ஸமாபஜ்ஜிம், ஸமாபஜ்ஜாமி, ஸமாபன்னோ; து³தியஸ்ஸ ச ஜா²னஸ்ஸ சதுத்த²ஸ்ஸ ச ஜா²னஸ்ஸ லாபி⁴ம்ஹி, வஸிம்ஹி; து³தியஞ்ச ஜா²னம் சதுத்த²ஞ்ச ஜா²னம் ஸச்சி²கதம் மயா’’தி ப⁴ணந்தஸ்ஸ ஆபத்தி பாசித்தியஸ்ஸ.

ஆரோசேய்யாதி அனுபஸம்பன்னஸ்ஸ – ‘‘து³தியஞ்ச ஜா²னம் ஸுஞ்ஞதஞ்ச விமோக்க²ம்…பே… மோஹா ச மே சித்தம் வினீவரண’’ந்தி ப⁴ணந்தஸ்ஸ ஆபத்தி பாசித்தியஸ்ஸ.

ஆரோசேய்யாதி அனுபஸம்பன்னஸ்ஸ – ‘‘து³தியஞ்ச ஜா²னம் பட²மஞ்ச ஜா²னம் ஸமாபஜ்ஜிம், ஸமாபஜ்ஜாமி, ஸமாபன்னோ; து³தியஸ்ஸ ச ஜா²னஸ்ஸ பட²மஸ்ஸ ச ஜா²னஸ்ஸ லாபி⁴ம்ஹி, வஸிம்ஹி; து³தியஞ்ச ஜா²னம் பட²மஞ்ச ஜா²னம் ஸச்சி²கதம் மயா’’தி ப⁴ணந்தஸ்ஸ ஆபத்தி பாசித்தியஸ்ஸ…பே….

மூலம் ஸம்கி²த்தம்.

ஆரோசேய்யாதி அனுபஸம்பன்னஸ்ஸ – ‘‘மோஹா ச மே சித்தம் வினீவரணம், பட²மஞ்ச ஜா²னம் ஸமாபஜ்ஜிம், ஸமாபஜ்ஜாமி, ஸமாபன்னோ; மோஹா ச மே சித்தம் வினீவரணம், பட²மஸ்ஸ ச ஜா²னஸ்ஸ லாபி⁴ம்ஹி, வஸிம்ஹி; மோஹா ச மே சித்தம் வினீவரணம், பட²மஞ்ச ஜா²னம் ஸச்சி²கதம் மயா’’தி ப⁴ணந்தஸ்ஸ ஆபத்தி பாசித்தியஸ்ஸ…பே….

ஆரோசேய்யாதி அனுபஸம்பன்னஸ்ஸ – ‘‘மோஹா ச மே சித்தம் வினீவரணம், தோ³ஸா ச மே சித்தம் வினீவரண’’ந்தி ப⁴ணந்தஸ்ஸ ஆபத்தி பாசித்தியஸ்ஸ…பே….

ஆரோசேய்யாதி அனுபஸம்பன்னஸ்ஸ – ‘‘பட²மஞ்ச ஜா²னம் து³தியஞ்ச ஜா²னம் ததியஞ்ச ஜா²னம் சதுத்த²ஞ்ச ஜா²னம் ஸுஞ்ஞதஞ்ச விமோக்க²ம் அனிமித்தஞ்ச விமோக்க²ம் அப்பணிஹிதஞ்ச விமோக்க²ம் ஸுஞ்ஞதஞ்ச ஸமாதி⁴ம் அனிமித்தஞ்ச ஸமாதி⁴ம் அப்பணிஹிதஞ்ச ஸமாதி⁴ம் ஸுஞ்ஞதஞ்ச ஸமாபத்திம் அனிமித்தஞ்ச ஸமாபத்திம் அப்பணிஹிதஞ்ச ஸமாபத்திம் திஸ்ஸோ ச விஜ்ஜா சத்தாரோ ச ஸதிபட்டா²னே சத்தாரோ ச ஸம்மப்பதா⁴னே சத்தாரோ ச இத்³தி⁴பாதே³ பஞ்ச ச இந்த்³ரியானி பஞ்ச ச ப³லானி ஸத்த ச போ³ஜ்ஜ²ங்கே³ அரியஞ்ச அட்ட²ங்கி³கம் மக்³க³ம் ஸோதாபத்திப²லஞ்ச ஸகதா³கா³மிப²லஞ்ச அனாகா³மிப²லஞ்ச அரஹத்தஞ்ச [அரஹத்தப²லஞ்ச (ஸ்யா.)] ஸமாபஜ்ஜிம்…பே… ராகோ³ ச மே சத்தோ, தோ³ஸோ ச மே சத்தோ, மோஹோ ச மே சத்தோ, வந்தோ, முத்தோ, பஹீனோ, படினிஸ்ஸட்டோ², உக்கே²டிதோ ஸமுக்கே²டிதோ, ராகா³ ச மே சித்தம் வினீவரணம், தோ³ஸா ச மே சித்தம் வினீவரணம், மோஹா ச மே சித்தம் வினீவரண’’ந்தி ப⁴ணந்தஸ்ஸ ஆபத்தி பாசித்தியஸ்ஸ.

74. ஆரோசேய்யாதி அனுபஸம்பன்னஸ்ஸ – ‘‘பட²மம் ஜா²னம் ஸமாபஜ்ஜி’’ந்தி வத்துகாமோ ‘‘து³தியம் ஜா²னம் ஸமாபஜ்ஜி’’ந்தி ப⁴ணந்தஸ்ஸ படிவிஜானந்தஸ்ஸ ஆபத்தி பாசித்தியஸ்ஸ, ந படிவிஜானந்தஸ்ஸ ஆபத்தி து³க்கடஸ்ஸ.

ஆரோசேய்யாதி அனுபஸம்பன்னஸ்ஸ – ‘‘பட²மம் ஜா²னம் ஸமாபஜ்ஜி’’ந்தி வத்துகாமோ ‘‘ததியம் ஜா²னம்…பே… சதுத்த²ம் ஜா²னம், ஸுஞ்ஞதம் விமோக்க²ம், அனிமித்தம் விமோக்க²ம், அப்பணிஹிதம் விமோக்க²ம், ஸுஞ்ஞதம் ஸமாதி⁴ம், அனிமித்தம் ஸமாதி⁴ம், அப்பணிஹிதம் ஸமாதி⁴ம், ஸுஞ்ஞதம் ஸமாபத்திம், அனிமித்தம் ஸமாபத்திம், அப்பணிஹிதம் ஸமாபத்திம், திஸ்ஸோ விஜ்ஜா, சத்தாரோ ஸதிபட்டா²னே, சத்தாரோ ஸம்மப்பதா⁴னே, சத்தாரோ இத்³தி⁴பாதே³, பஞ்சிந்த்³ரியானி, பஞ்ச ப³லானி, ஸத்த போ³ஜ்ஜ²ங்கே³, அரியம் அட்ட²ங்கி³கம் மக்³க³ம், ஸோதாபத்திப²லம், ஸகதா³கா³மிப²லம், அனாகா³மிப²லம், அரஹத்தம் [அரஹத்தப²லம் (ஸ்யா.)] ஸமாபஜ்ஜிம்…பே… ராகோ³ மே சத்தோ, தோ³ஸோ மே சத்தோ, மோஹோ மே சத்தோ, வந்தோ, முத்தோ, பஹீனோ; படினிஸ்ஸட்டோ², உக்கே²டிதோ, ஸமுக்கே²டிதோ; ராகா³ மே சித்தம் வினீவரணம், தோ³ஸா மே சித்தம் வினீவரணம், மோஹா மே சித்தம் வினீவரண’’ந்தி ப⁴ணந்தஸ்ஸ படிவிஜானந்தஸ்ஸ ஆபத்தி பாசித்தியஸ்ஸ, ந படிவிஜானந்தஸ்ஸ ஆபத்தி து³க்கடஸ்ஸ.

ஆரோசேய்யாதி அனுபஸம்பன்னஸ்ஸ – ‘‘து³தியம் ஜா²னம் ஸமாபஜ்ஜி’’ந்தி வத்துகாமோ…பே… ‘‘மோஹா மே சித்தம் வினீவரண’’ந்தி ப⁴ணந்தஸ்ஸ படிவிஜானந்தஸ்ஸ ஆபத்தி பாசித்தியஸ்ஸ, ந படிவிஜானந்தஸ்ஸ ஆபத்தி து³க்கடஸ்ஸ…பே….

ஆரோசேய்யாதி அனுபஸம்பன்னஸ்ஸ – ‘‘து³தியம் ஜா²னம் ஸமாபஜ்ஜி’’ந்தி வத்துகாமோ – ‘‘பட²மம் ஜா²னம் ஸமாபஜ்ஜி’’ந்தி ப⁴ணந்தஸ்ஸ படிவிஜானந்தஸ்ஸ ஆபத்தி பாசித்தியஸ்ஸ, ந படிவிஜானந்தஸ்ஸ ஆபத்தி து³க்கடஸ்ஸ…பே….

மூலம் ஸம்கி²த்தம்.

ஆரோசேய்யாதி அனுபஸம்பன்னஸ்ஸ – ‘‘மோஹா மே சித்தம் வினீவரண’’ந்தி வத்துகாமோ – ‘‘பட²மம் ஜா²னம் ஸமாபஜ்ஜி’’ந்தி ப⁴ணந்தஸ்ஸ படிவிஜானந்தஸ்ஸ ஆபத்தி பாசித்தியஸ்ஸ, ந படிவிஜானந்தஸ்ஸ ஆபத்தி து³க்கடஸ்ஸ…பே….

ஆரோசேய்யாதி அனுபஸம்பன்னஸ்ஸ – ‘‘மோஹா மே சித்தம் வினீவரண’’ந்தி வத்துகாமோ – ‘‘தோ³ஸா மே சித்தம் வினீவரண’’ந்தி ப⁴ணந்தஸ்ஸ படிவிஜானந்தஸ்ஸ ஆபத்தி பாசித்தியஸ்ஸ, ந படிவிஜானந்தஸ்ஸ ஆபத்தி து³க்கடஸ்ஸ…பே….

ஆரோசேய்யாதி அனுபஸம்பன்னஸ்ஸ – ‘‘பட²மஞ்ச ஜா²னம் து³தியஞ்ச ஜா²னம் ததியஞ்ச ஜா²னம் சதுத்த²ஞ்ச ஜா²னம் …பே… தோ³ஸா ச மே சித்தம் வினீவரண’’ந்தி வத்துகாமோ – ‘‘மோஹா மே சித்தம் வினீவரண’’ந்தி ப⁴ணந்தஸ்ஸ படிவிஜானந்தஸ்ஸ ஆபத்தி பாசித்தியஸ்ஸ, ந படிவிஜானந்தஸ்ஸ ஆபத்தி து³க்கடஸ்ஸ.

ஆரோசேய்யாதி அனுபஸம்பன்னஸ்ஸ – ‘‘து³தியஞ்ச ஜா²னம் ததியஞ்ச ஜா²னம் சதுத்த²ஞ்ச ஜா²னம்…பே… மோஹா ச மே சித்தம் வினீவரண’’ந்தி வத்துகாமோ – ‘‘பட²மம் ஜா²னம் ஸமாபஜ்ஜி’’ந்தி ப⁴ணந்தஸ்ஸ படிவிஜானந்தஸ்ஸ ஆபத்தி பாசித்தியஸ்ஸ, ந படிவிஜானந்தஸ்ஸ ஆபத்தி து³க்கடஸ்ஸ…பே….

75. ஆரோசேய்யாதி அனுபஸம்பன்னஸ்ஸ – ‘‘யோ தே விஹாரே வஸி ஸோ பி⁴க்கு² பட²மம் ஜா²னம் ஸமாபஜ்ஜி, ஸமாபஜ்ஜதி, ஸமாபன்னோ; ஸோ பி⁴க்கு² பட²மஸ்ஸ ஜா²னஸ்ஸ லாபீ⁴, வஸீ; தேன பி⁴க்கு²னா பட²மம் ஜா²னம் ஸச்சி²கத’’ந்தி ப⁴ணந்தஸ்ஸ ஆபத்தி து³க்கடஸ்ஸ.

ஆரோசேய்யாதி அனுபஸம்பன்னஸ்ஸ – ‘‘யோ தே விஹாரே வஸி ஸோ பி⁴க்கு² து³தியம் ஜா²னம்…பே… ததியம் ஜா²னம் சதுத்த²ம் ஜா²னம் ஸமாபஜ்ஜி, ஸமாபஜ்ஜதி, ஸமாபன்னோ; ஸோ பி⁴க்கு² சதுத்த²ஸ்ஸ ஜா²னஸ்ஸ லாபீ⁴, வஸீ; தேன பி⁴க்கு²னா சதுத்த²ம் ஜா²னம் ஸச்சி²கத’’ந்தி ப⁴ணந்தஸ்ஸ ஆபத்தி து³க்கடஸ்ஸ.

ஆரோசேய்யாதி அனுபஸம்பன்னஸ்ஸ – ‘‘யோ தே விஹாரே வஸி ஸோ பி⁴க்கு² ஸுஞ்ஞதம் விமோக்க²ம்…பே… அனிமித்தம் விமோக்க²ம் அப்பணிஹிதம் விமோக்க²ம் ஸுஞ்ஞதம் ஸமாதி⁴ம் அனிமித்தம் ஸமாதி⁴ம் அப்பணிஹிதம் ஸமாதி⁴ம் ஸமாபஜ்ஜி, ஸமாபஜ்ஜதி, ஸமாபன்னோ; ஸோ பி⁴க்கு² அப்பணிஹிதஸ்ஸ ஸமாதி⁴ஸ்ஸ லாபீ⁴, வஸீ; தேன பி⁴க்கு²னா அப்பணிஹிதோ ஸமாதி⁴ ஸச்சி²கதோ’’தி ப⁴ணந்தஸ்ஸ ஆபத்தி து³க்கடஸ்ஸ.

ஆரோசேய்யாதி அனுபஸம்பன்னஸ்ஸ – ‘‘யோ தே விஹாரே வஸி ஸோ பி⁴க்கு² ஸுஞ்ஞதம் ஸமாபத்திம்…பே… அனிமித்தம் ஸமாபத்திம் அப்பணிஹிதம் ஸமாபத்திம் ஸமாபஜ்ஜி, ஸமாபஜ்ஜதி, ஸமாபன்னோ; அப்பணிஹிதாய ஸமாபத்தியா லாபீ⁴, வஸீ; தேன பி⁴க்கு²னா அப்பணிஹிதா ஸமாபத்தி ஸச்சி²கதா’’தி ப⁴ணந்தஸ்ஸ ஆபத்தி து³க்கடஸ்ஸ.

ஆரோசேய்யாதி அனுபஸம்பன்னஸ்ஸ – ‘‘யோ தே விஹாரே வஸி ஸோ பி⁴க்கு² திஸ்ஸோ விஜ்ஜா …பே… சத்தாரோ ஸதிபட்டா²னே, சத்தாரோ ஸம்மப்பதா⁴னே, சத்தாரோ இத்³தி⁴பாதே³, பஞ்சிந்த்³ரியானி, பஞ்ச ப³லானி, ஸத்த போ³ஜ²ங்கே³, அரியம் அட்ட²ங்கி³கம் மக்³க³ம், ஸோதாபத்திப²லம், ஸகதா³கா³மிப²லம், அனாகா³மிப²லம், அரஹத்தம் [அரஹத்தப²லம் (ஸ்யா.)] ஸமாபஜ்ஜி…பே… ஸமாபஜ்ஜதி, ஸமாபன்னோ…பே… தஸ்ஸ பி⁴க்கு²னோ ராகோ³ சத்தோ, தோ³ஸோ சத்தோ, மோஹோ சத்தோ, வந்தோ, முத்தோ, பஹீனோ, படினிஸ்ஸட்டோ², உக்கே²டிதோ, ஸமுக்கே²டிதோ; தஸ்ஸ பி⁴க்கு²னோ ராகா³ சித்தம் வினீவரணம், தோ³ஸா சித்தம் வினீவரணம், மோஹா சித்தம் வினீவரண’’ந்தி ப⁴ணந்தஸ்ஸ ஆபத்தி து³க்கடஸ்ஸ.

ஆரோசேய்யாதி அனுபஸம்பன்னஸ்ஸ – ‘‘யோ தே விஹாரே வஸி ஸோ பி⁴க்கு² ஸுஞ்ஞாகா³ரே பட²மம் ஜா²னம்…பே… து³தியம் ஜா²னம் ததியம் ஜா²னம் சதுத்த²ம் ஜா²னம் ஸமாபஜ்ஜி, ஸமாபஜ்ஜதி, ஸமாபன்னோ; ஸோ பி⁴க்கு² ஸுஞ்ஞாகா³ரே சதுத்த²ஸ்ஸ ஜா²னஸ்ஸ லாபீ⁴, வஸீ; தேன பி⁴க்கு²னா ஸுஞ்ஞாகா³ரே சதுத்த²ம் ஜா²னம் ஸச்சி²கத’’ந்தி ப⁴ணந்தஸ்ஸ ஆபத்தி து³க்கடஸ்ஸ.

ஆரோசேய்யாதி அனுபஸம்பன்னஸ்ஸ – ‘‘யோ தே சீவரம் பரிபு⁴ஞ்ஜி, யோ தே பிண்ட³பாதம் பரிபு⁴ஞ்ஜி, யோ தே ஸேனாஸனம் பரிபு⁴ஞ்ஜி, யோ தே கி³லானப்பச்சயபே⁴ஸஜ்ஜபரிக்கா²ரம் பரிபு⁴ஞ்ஜி ஸோ பி⁴க்கு² ஸுஞ்ஞாகா³ரே சதுத்த²ம் ஜா²னம் ஸமாபஜ்ஜி, ஸமாபஜ்ஜதி, ஸமாபன்னோ; ஸோ பி⁴க்கு² ஸுஞ்ஞாகா³ரே சதுத்த²ஸ்ஸ ஜா²னஸ்ஸ லாபீ⁴, வஸீ; தேன பி⁴க்கு²னா ஸுஞ்ஞாகா³ரே சதுத்த²ம் ஜா²னம் ஸச்சி²கத’’ந்தி ப⁴ணந்தஸ்ஸ ஆபத்தி து³க்கடஸ்ஸ.

76. ஆரோசேய்யாதி அனுபஸம்பன்னஸ்ஸ – ‘‘யேன தே விஹாரோ பரிபு⁴த்தோ…பே… யேன தே சீவரம் பரிபு⁴த்தம், யேன தே பிண்ட³பாதோ பரிபு⁴த்தோ, யேன தே ஸேனாஸனம் பரிபு⁴த்தம், யேன தே கி³லானப்பச்சயபே⁴ஸஜ்ஜபரிக்கா²ரோ பரிபு⁴த்தோ ஸோ பி⁴க்கு² ஸுஞ்ஞாகா³ரே சதுத்த²ம் ஜா²னம் ஸமாபஜ்ஜி, ஸமாபஜ்ஜதி, ஸமாபன்னோ; ஸோ பி⁴க்கு² ஸுஞ்ஞாகா³ரே சதுத்த²ஸ்ஸ ஜா²னஸ்ஸ லாபீ⁴, வஸீ; தேன பி⁴க்கு²னா ஸுஞ்ஞாகா³ரே சதுத்த²ம் ஜா²னம் ஸச்சி²கத’’ந்தி ப⁴ணந்தஸ்ஸ ஆபத்தி து³க்கடஸ்ஸ.

ஆரோசேய்யாதி அனுபஸம்பன்னஸ்ஸ – ‘‘யம் த்வம் ஆக³ம்ம விஹாரம் அதா³ஸி…பே… சீவரம் அதா³ஸி, பிண்ட³பாதம் அதா³ஸி, ஸேனாஸனம் அதா³ஸி, கி³லானப்பச்சயபே⁴ஸஜ்ஜபரிக்கா²ரம் அதா³ஸி ஸோ பி⁴க்கு² ஸுஞ்ஞாகா³ரே சதுத்த²ம் ஜா²னம் ஸமாபஜ்ஜி, ஸமாபஜ்ஜதி, ஸமாபன்னோ; ஸோ பி⁴க்கு² ஸுஞ்ஞாகா³ரே சதுத்த²ஸ்ஸ ஜா²னஸ்ஸ லாபீ⁴, வஸீ; தேன பி⁴க்கு²னா ஸுஞ்ஞாகா³ரே சதுத்த²ம் ஜா²னம் ஸச்சி²கத’’ந்தி ப⁴ணந்தஸ்ஸ ஆபத்தி து³க்கடஸ்ஸ.

77. அனாபத்தி உபஸம்பன்னஸ்ஸ, பூ⁴தம் ஆரோசேதி, ஆதி³கம்மிகஸ்ஸாதி.

பூ⁴தாரோசனஸிக்கா²பத³ம் நிட்டி²தம் அட்ட²மம்.