2. ஓமஸவாத³ஸிக்கா²பத³ம்

12. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கூ² பேஸலேஹி பி⁴க்கூ²ஹி ஸத்³தி⁴ம் ப⁴ண்ட³ந்தா [ப⁴ண்டே³ந்தா (இதிபி)] பேஸலே பி⁴க்கூ² ஓமஸந்தி – ஜாதியாபி, நாமேனபி, கோ³த்தேனபி, கம்மேனபி, ஸிப்பேனபி, ஆபா³தே⁴னபி, லிங்கே³னபி, கிலேஸேனபி, ஆபத்தியாபி; ஹீனேனபி அக்கோஸேன கு²ம்ஸேந்தி வம்பே⁴ந்தி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² பேஸலேஹி பி⁴க்கூ²ஹி ஸத்³தி⁴ம் ப⁴ண்ட³ந்தா பேஸலே பி⁴க்கூ² ஓமஸிஸ்ஸந்தி – ஜாதியாபி, நாமேனபி, கோ³த்தேனபி, கம்மேனபி, ஸிப்பேனபி, ஆபா³தே⁴னபி, லிங்கே³னபி, கிலேஸேனபி, ஆபத்தியாபி; ஹீனேனபி அக்கோஸேன கு²ம்ஸேஸ்ஸந்தி வம்பே⁴ஸ்ஸந்தீ’’தி!

அத² கோ² தே பி⁴க்கூ² ச²ப்³ப³க்³கி³யே பி⁴க்கூ² அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும்…பே… ஸச்சம் கிர தும்ஹே, பி⁴க்க²வே, பேஸலேஹி பி⁴க்கூ²ஹி ஸத்³தி⁴ம் ப⁴ண்ட³ந்தா பேஸலே பி⁴க்கூ² ஓமஸத² – ஜாதியாபி…பே… ஹீனேனபி அக்கோஸேன கு²ம்ஸேத² வம்பே⁴தா²தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, மோக⁴புரிஸா, பேஸலேஹி பி⁴க்கூ²ஹி ஸத்³தி⁴ம் ப⁴ண்ட³ந்தா பேஸலே பி⁴க்கூ² ஓமஸிஸ்ஸத² – ஜாதியாபி…பே… ஹீனேனபி அக்கோஸேன கு²ம்ஸேஸ்ஸத² வம்பே⁴ஸ்ஸத²! நேதம், மோக⁴புரிஸா, அப்பஸன்னானம் வா பஸாதா³ய…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி –

13. ‘‘பூ⁴தபுப்³ப³ம், பி⁴க்க²வே, தக்கஸிலாயம் [தக்கஸீலாயம் (க.)] அஞ்ஞதரஸ்ஸ ப்³ராஹ்மணஸ்ஸ நந்தி³விஸாலோ நாம ப³லீப³த்³தோ³ [ப³லிவத்³தோ³ (ஸீ.), ப³லிப³த்³தோ³ (ஸ்யா.)] அஹோஸி. அத² கோ², பி⁴க்க²வே, நந்தி³விஸாலோ ப³லீப³த்³தோ³ தம் ப்³ராஹ்மணம் ஏதத³வோச – ‘‘க³ச்ச² த்வம், ப்³ராஹ்மண, ஸேட்டி²னா ஸத்³தி⁴ம் ஸஹஸ்ஸேன அப்³பு⁴தம் கரோஹி – மய்ஹம் ப³லீப³த்³தோ³ ஸகடஸதம் அதிப³த்³த⁴ம் பவட்டேஸ்ஸதீ’’தி. அத² கோ², பி⁴க்க²வே, ஸோ ப்³ராஹ்மணோ ஸேட்டி²னா ஸத்³தி⁴ம் ஸஹஸ்ஸேன அப்³பு⁴தம் அகாஸி – மய்ஹம் ப³லீப³த்³தோ³ ஸகடஸதம் அதிப³த்³த⁴ம் பவட்டேஸ்ஸதீதி. அத² கோ², பி⁴க்க²வே, ஸோ ப்³ராஹ்மணோ ஸகடஸதம் அதிப³ந்தி⁴த்வா நந்தி³விஸாலம் ப³லீப³த்³த³ம் யுஞ்ஜித்வா ஏதத³வோச – ‘‘க³ச்ச², கூட [அஞ்ச² கூட (ஸீ. ஸ்யா.)], வஹஸ்ஸு, கூடா’தி. அத² கோ², பி⁴க்க²வே, நந்தி³விஸாலோ ப³லீப³த்³தோ³ தத்தே²வ அட்டா²ஸி. அத² கோ², பி⁴க்க²வே, ஸோ ப்³ராஹ்மணோ ஸஹஸ்ஸேன பராஜிதோ பஜ்ஜா²யி. அத² கோ², பி⁴க்க²வே, நந்தி³விஸாலோ ப³லீப³த்³தோ³ தம் ப்³ராஹ்மணம் ஏதத³வோச – ‘‘கிஸ்ஸ த்வம், ப்³ராஹ்மண, பஜ்ஜா²யஸீ’’தி? ‘ததா² ஹி பனாஹம், போ⁴, தயா ஸஹஸ்ஸேன பராஜிதோ’’தி. ‘கிஸ்ஸ பன மம் த்வம், ப்³ராஹ்மண, அகூடம் கூடவாதே³ன பாபேஸி? க³ச்ச² த்வம், ப்³ராஹ்மண, ஸேட்டி²னா ஸத்³தி⁴ம் த்³வீஹி ஸஹஸ்ஸேஹி அப்³பு⁴தம் கரோஹி – ‘‘மய்ஹம் ப³லீப³த்³தோ³ ஸகடஸதம் அதிப³த்³த⁴ம் பவட்டேஸ்ஸதீ’’தி. ‘‘மா ச மம் அகூடம் கூடவாதே³ன பாபேஸீ’’தி. அத² கோ², பி⁴க்க²வே, ஸோ ப்³ராஹ்மணோ ஸேட்டி²னா ஸத்³தி⁴ம் த்³வீஹி ஸஹஸ்ஸேஹி அப்³பு⁴தம் அகாஸி – ‘‘மய்ஹம் ப³லீப³த்³தோ³ ஸகடஸதம் அதிப³த்³த⁴ம் பவட்டேஸ்ஸதீ’’தி. அத² கோ², பி⁴க்க²வே, ஸோ ப்³ராஹ்மணோ ஸகடஸதம் அதிப³ந்தி⁴த்வா நந்தி³விஸாலம் ப³லீப³த்³த³ம் யுஞ்ஜித்வா ஏதத³வோச – ‘‘அச்ச², ப⁴த்³ர, வஹஸ்ஸு, ப⁴த்³ரா’’தி. அத² கோ², பி⁴க்க²வே, நந்தி³விஸாலோ ப³லீப³த்³தோ³ ஸகடஸதம் அதிப³த்³த⁴ம் பவட்டேஸி.

[ஜா. 1.1.28 நந்தி³விஸாலஜாதகேபி, தத்த² பன மனுஞ்ஞஸத்³தோ³ தி³ஸ்ஸதி] ‘‘மனாபமேவ பா⁴ஸேய்ய, நா, மனாபம் குதா³சனம்;

மனாபம் பா⁴ஸமானஸ்ஸ, க³ரும் பா⁴ரம் உத³ப்³ப³ஹி;

த⁴னஞ்ச நம் அலாபே⁴ஸி, தேன ச, த்தமனோ அஹூதி.

‘‘ததா³பி மே, பி⁴க்க²வே, அமனாபா கு²ம்ஸனா வம்ப⁴னா. கிமங்க³ம் பன ஏதரஹி மனாபா ப⁴விஸ்ஸதி கு²ம்ஸனா வம்ப⁴னா? நேதம், பி⁴க்க²வே, அப்பஸன்னானம் வா பஸாதா³ய…பே…. ‘‘ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

14. ‘‘ஓமஸவாதே³ பாசித்திய’’ந்தி.

15. ஓமஸவாதோ³ நாம த³ஸஹி ஆகாரேஹி ஓமஸதி – ஜாதியாபி, நாமேனபி, கோ³த்தேனபி, கம்மேனபி, ஸிப்பேனபி, ஆபா³தே⁴னபி, லிங்கே³னபி, கிலேஸேனபி, ஆபத்தியாபி, அக்கோஸேனபி.

ஜாதி நாம த்³வே ஜாதியோ – ஹீனா ச ஜாதி உக்கட்டா² ச ஜாதி. ஹீனா நாம ஜாதி – சண்டா³லஜாதி, வேனஜாதி, நேஸாத³ஜாதி, ரத²காரஜாதி, புக்குஸஜாதி. ஏஸா ஹீனா நாம ஜாதி. உக்கட்டா² நாம ஜாதி – க²த்தியஜாதி, ப்³ராஹ்மணஜாதி. ஏஸா உக்கட்டா² நாம ஜாதி.

நாமம் நாம த்³வே நாமானி – ஹீனஞ்ச நாமம் உக்கட்ட²ஞ்ச நாமம். ஹீனம் நாம நாமம் – அவகண்ணகம், ஜவகண்ணகம், த⁴னிட்ட²கம், ஸவிட்ட²கம், குலவட்³ட⁴கம், தேஸு தேஸு வா பன ஜனபதே³ஸு ஓஞ்ஞாதம் அவஞ்ஞாதம் ஹீளிதம் பரிபூ⁴தம் அசித்தீகதம், ஏதம் ஹீனம் நாம நாமம். உக்கட்ட²ம் நாம நாமம் – பு³த்³த⁴ப்படிஸம்யுத்தம், த⁴ம்மப்படிஸம்யுத்தம், ஸங்க⁴ப்படிஸம்யுத்தம், தேஸு தேஸு வா பன ஜனபதே³ஸு அனோஞ்ஞாதம் அனவஞ்ஞாதம் அஹீளிதம் அபரிபூ⁴தம் சித்தீகதம், ஏதம் உக்கட்ட²ம் நாம நாமம்.

கோ³த்தம் நாம த்³வே கோ³த்தானி – ஹீனஞ்ச கோ³த்தம் உக்கட்ட²ஞ்ச கோ³த்தம். ஹீனம் நாம கோ³த்தம் – கோஸியகோ³த்தம், பா⁴ரத்³வாஜகோ³த்தம், தேஸு தேஸு வா பன ஜனபதே³ஸு ஓஞ்ஞாதம் அவஞ்ஞாதம் ஹீளிதம் பரிபூ⁴தம் அசித்தீகதம், ஏதம் ஹீனம் நாம கோ³த்தம். உக்கட்ட²ம் நாம கோ³த்தம் – கோ³தமகோ³த்தம், மோக்³க³ல்லானகோ³த்தம், கச்சானகோ³த்தம், வாஸிட்ட²கோ³த்தம், தேஸு தேஸு வா பன ஜனபதே³ஸு அனோஞ்ஞாதம் அனவஞ்ஞாதம் அஹீளிதம் அபரிபூ⁴தம் சித்தீகதம், ஏதம் உக்கட்ட²ம் நாம கோ³த்தம்.

கம்மம் நாம த்³வே கம்மானி – ஹீனஞ்ச கம்மம் உக்கட்ட²ஞ்ச கம்மம். ஹீனம் நாம கம்மம் – கோட்ட²ககம்மம், புப்ப²ச²ட்³ட³ககம்மம், தேஸு தேஸு வா பன ஜனபதே³ஸு ஓஞ்ஞாதம் அவஞ்ஞாதம் ஹீளிதம் பரிபூ⁴தம் அசித்தீகதம், ஏதம் ஹீனம் நாம கம்மம். உக்கட்ட²ம் நாம கம்மம் – கஸி, வணிஜ்ஜா, கோ³ரக்கா², தேஸு தேஸு வா பன ஜனபதே³ஸு அனோஞ்ஞாதம் அனவஞ்ஞாதம் அஹீளிதம் அபரிபூ⁴தம் சித்தீகதம். ஏதம் உக்கட்ட²ம் நாம கம்மம்.

ஸிப்பம் நாம த்³வே ஸிப்பானி – ஹீனஞ்ச ஸிப்பம் உக்கட்ட²ஞ்ச ஸிப்பம். ஹீனம் நாம ஸிப்பம் – நளகாரஸிப்பம், கும்ப⁴காரஸிப்பம், பேஸகாரஸிப்பம், சம்மகாரஸிப்பம், நஹாபிதஸிப்பம், தேஸு தேஸு வா பன ஜனபதே³ஸு ஓஞ்ஞாதம் அவஞ்ஞாதம் ஹீளிதம் பரிபூ⁴தம் அசித்தீகதம். ஏதம் ஹீனம் நாம ஸிப்பம். உக்கட்ட²ம் நாம ஸிப்பம் – முத்³தா³, க³ணனா, லேகா², தேஸு தேஸு வா பன ஜனபதே³ஸு அனோஞ்ஞாதம் அனவஞ்ஞாதம் அஹீளிதம் அபரிபூ⁴தம் சித்தீகதம், ஏதம் உக்கட்ட²ம் நாம ஸிப்பம்.

ஸப்³பே³பி ஆபா³தா⁴ ஹீனா, அபிச மது⁴மேஹோ ஆபா³தோ⁴ உக்கட்டோ².

லிங்க³ம் நாம த்³வே லிங்கா³னி – ஹீனஞ்ச லிங்க³ம் உக்கட்ட²ஞ்ச லிங்க³ம். ஹீனம் நாம லிங்க³ம் – அதிதீ³க⁴ம், அதிரஸ்ஸம், அதிகண்ஹம், அச்சோதா³தம், ஏதம் ஹீனம் நாம லிங்க³ம். உக்கட்ட²ம் நாம லிங்க³ம் – நாதிதீ³க⁴ம், நாதிரஸ்ஸம், நாதிகண்ஹம், நாச்சோதா³தம். ஏதம் உக்கட்ட²ம் நாம லிங்க³ம்.

ஸப்³பே³பி கிலேஸா ஹீனா.

ஸப்³பா³பி ஆபத்தியோ ஹீனா. அபிச, ஸோதாபத்திஸமாபத்தி உக்கட்டா².

அக்கோஸோ நாம த்³வே அக்கோஸா – ஹீனோ ச அக்கோஸோ உக்கட்டோ² ச அக்கோஸோ. ஹீனோ நாம அக்கோஸோ – ஓட்டோ²ஸி, மேண்டோ³ஸி, கோ³ணோஸி, க³த்³ரபோ⁴ஸி, திரச்சா²னக³தோஸி, நேரயிகோஸி; நத்தி² துய்ஹம் ஸுக³தி, து³க்³க³தி யேவ துய்ஹம் பாடிகங்கா²தி, யகாரேன வா ப⁴காரேன வா, காடகோடசிகாய வா, ஏஸோ ஹீனோ நாம அக்கோஸோ. உக்கட்டோ² நாம அக்கோஸோ – பண்டி³தோஸி, ப்³யத்தோஸி, மேதா⁴வீஸி, ப³ஹுஸ்ஸுதோஸி, த⁴ம்மகதி²கோஸி, நத்தி² துய்ஹம் து³க்³க³தி, ஸுக³தியேவ துய்ஹம் பாடிகங்கா²தி, ஏஸோ உக்கட்டோ² நாம அக்கோஸோ.

16. உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ ஹீனேன ஹீனம் வதே³தி, சண்டா³லம் வேனம் நேஸாத³ம் ரத²காரம் புக்குஸம் – ‘‘சண்டா³லோஸி, வேனோஸி, நேஸாதோ³ஸி, ரத²காரோஸி, புக்குஸோஸீ’’தி ப⁴ணதி [வதே³தீதி உத்³தே³ஸோ. ப⁴ணதீதி வித்தா²ரோ (வஜிரபு³த்³தி⁴)], ஆபத்தி வாசாய, வாசாய பாசித்தியஸ்ஸ.

உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ ஹீனேன உக்கட்ட²ம் வதே³தி, க²த்தியம் ப்³ராஹ்மணம் – ‘‘சண்டா³லோஸி, வேனோஸி, நேஸாதோ³ஸி, ரத²காரோஸி, புக்குஸோஸீ’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ உக்கட்டே²ன ஹீனம் வதே³தி, சண்டா³லம் வேனம் நேஸாத³ம் ரத²காரம் புக்குஸம் – ‘‘க²த்தியோஸி, ப்³ராஹ்மணோஸீ’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ உக்கட்டே²ன உக்கட்ட²ம் வதே³தி, க²த்தியம் ப்³ராஹ்மணம் – ‘‘க²த்தியோஸி, ப்³ராஹ்மணோஸீ’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

17. உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ ஹீனேன ஹீனம் வதே³தி, அவகண்ணகம் ஜவகண்ணகம் த⁴னிட்ட²கம் ஸவிட்ட²கம் குலவட்³ட⁴கம் – ‘‘அவகண்ணகோஸி, ஜவகண்ணகோஸி, த⁴னிட்ட²கோஸி, ஸவிட்ட²கோஸி, குலவட்³ட⁴கோஸீ’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ ஹீனேன உக்கட்ட²ம் வதே³தி, பு³த்³த⁴ரக்கி²தம் த⁴ம்மரக்கி²தம் ஸங்க⁴ரக்கி²தம் – ‘‘அவகண்ணகோஸி, ஜவகண்ணகோஸி, த⁴னிட்ட²கோஸி, ஸவிட்ட²கோஸி, குலவட்³ட⁴கோஸீ’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ உக்கட்டே²ன ஹீனம் வதே³தி, அவகண்ணகம் ஜவகண்ணகம் த⁴னிட்ட²கம் ஸவிட்ட²கம் குலவட்³ட⁴கம் – ‘‘பு³த்³த⁴ரக்கி²தோஸி, த⁴ம்மரக்கி²தோஸி, ஸங்க⁴ரக்கி²தோஸீ’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ உக்கட்டே²ன உகட்ட²ம் வதே³தி, பு³த்³த⁴ரக்கி²தம் த⁴ம்மரக்கி²தம் ஸங்க⁴ரக்கி²தம் – ‘‘பு³த்³த⁴ரக்கி²தோஸி, த⁴ம்மரக்கி²தோஸி, ஸங்க⁴ரக்கி²தோஸீ’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

18. உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ ஹீனேன ஹீனம் வதே³தி, கோஸியம் பா⁴ரத்³வாஜம் – ‘‘கோஸியோஸி, பா⁴ரத்³வாஜோஸீ’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ ஹீனேன உக்கட்ட²ம் வதே³தி, கோ³தமம் மோக்³க³ல்லானம் கச்சானம் வாஸிட்ட²ம் – ‘‘கோஸியோஸி, பா⁴ரத்³வாஜோஸீ’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ உக்கட்டே²ன ஹீனம் வதே³தி, கோஸியம் பா⁴ரத்³வாஜம் – ‘‘கோ³தமோஸி, மோக்³க³ல்லானோஸி, கச்சானோஸி, வாஸிட்டோ²ஸீ’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ உக்கட்டே²ன உக்கட்ட²ம் வதே³தி, கோ³தமம் மோக்³க³ல்லானம் கச்சானம் வாஸிட்ட²ம் – ‘‘கோ³தமோஸி, மோக்³க³ல்லானோஸி, கச்சானோஸி, வாஸிட்டோ²ஸீ’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

19. உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ ஹீனேன ஹீனம் வதே³தி, கோட்ட²கம் புப்ப²ச²ட்³ட³கம் – ‘‘கோட்ட²கோஸி, புப்ப²ச²ட்³ட³கோஸீ’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ ஹீனேன உக்கட்ட²ம் வதே³தி, கஸ்ஸகம் வாணிஜம் கோ³ரக்க²ம் – ‘‘கோட்ட²கோஸி, புப்ப²ச²ட்³ட³கோஸீ’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ உக்கட்டே²ன ஹீனம் வதே³தி, கோட்ட²கம் புப்ப²ச²ட்³ட³கம் – ‘‘கஸ்ஸகோஸி, வாணிஜோஸி, கோ³ரக்கோ²ஸீ’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ உக்கட்டே²ன உக்கட்ட²ம் வதே³தி, கஸ்ஸகம் வாணிஜம் கோ³ரக்க²ம் – ‘‘கஸ்ஸகோஸி, வாணிஜோஸி, கோ³ரக்கோ²ஸீ’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

20. உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ ஹீனேன ஹீனம் வதே³தி, நளகாரம் கும்ப⁴காரம் பேஸகாரம் சம்மகாரம் நஹாபிதம் – ‘‘நளகாரோஸி, கும்ப⁴காரோஸி, பேஸகாரோஸி, சம்மகாரோஸி, நஹாபிதோஸீ’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ ஹீனேன உக்கட்ட²ம் வதே³தி, முத்³தி³கம் க³ணகம் லேக²கம் – ‘‘நளகாரோஸி, கும்ப⁴காரோஸி, பேஸகாரோஸி, சம்மகாரோஸி, நஹாபிதோஸீ’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ உக்கட்டே²ன ஹீனம் வதே³தி, நளகாரம் கும்ப⁴காரம் பேஸகாரம் சம்மகாரம் நஹாபிதம் – ‘‘முத்³தி³கோஸி, க³ணகோஸி, லேக²கோஸீ’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ உக்கட்டே²ன உக்கட்ட²ம் வதே³தி, முத்³தி³கம் க³ணகம் லேக²கம் – ‘‘முத்³தி³கோஸி, க³ணகோஸி, லேக²கோஸீ’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

21. உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ ஹீனேன ஹீனம் வதே³தி, குட்டி²கம் க³ண்டி³கம் கிலாஸிகம் ஸோஸிகம் அபமாரிகம் – ‘‘குட்டி²கோஸி, க³ண்டி³கோஸி, கிலாஸிகோஸி, ஸோஸிகோஸி, அபமாரிகோஸீ’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ ஹீனேன உக்கட்ட²ம் வதே³தி, மது⁴மேஹிகம் – ‘‘குட்டி²கோஸி, க³ண்டி³கோஸி, கிலாஸிகோஸி, ஸோஸிகோஸி, அபமாரிகோஸீ’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ உக்கட்டே²ன ஹீனம் வதே³தி, குட்டி²கம் க³ண்டி³கம் கிலாஸிகம் ஸோஸிகம் அபமாரிகம் – ‘‘மது⁴மேஹிகோஸீ’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ உக்கட்டே²ன உக்கட்ட²ம் வதே³தி, மது⁴மேஹிகம் – ‘‘மது⁴மேஹிகோஸீ’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

22. உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ ஹீனேன ஹீனம் வதே³தி, அதிதீ³க⁴ம் அதிரஸ்ஸம் அதிகண்ஹம் அச்சோதா³தம் – ‘‘அதிதீ³கோ⁴ஸி, அதிரஸ்ஸோஸி, அதிகண்ஹோஸி, அச்சோதா³தோஸீ’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ ஹீனேன உக்கட்ட²ம் வதே³தி, நாதிதீ³க⁴ம் நாதிரஸ்ஸம் நாதிகண்ஹம் நாச்சோதா³தம் – ‘‘அதிதீ³கோ⁴ஸி, அதிரஸ்ஸோஸி, அதிகண்ஹோஸி, அச்சோதா³தோஸீ’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ உக்கட்டே²ன ஹீனம் வதே³தி, அதிதீ³க⁴ம் அதிரஸ்ஸம் அதிகண்ஹம் அச்சோதா³தம் – ‘‘நாதிதீ³கோ⁴ஸி, நாதிரஸ்ஸோஸி, நாதிகண்ஹோஸி, நாச்சோதா³தோஸீ’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ உக்கட்டே²ன உக்கட்ட²ம் வதே³தி, நாதிதீ³க⁴ம் நாதிரஸ்ஸம் நாதிகண்ஹம் நாச்சோதா³தம் – ‘‘நாதிதீ³கோ⁴ஸி, நாதிரஸ்ஸோஸி, நாதிகண்ஹோஸி, நாச்சோதா³தோஸீ’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

23. உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ ஹீனேன ஹீனம் வதே³தி, ராக³பரியுட்டி²தம் தோ³ஸபரியுட்டி²தம் மோஹபரியுட்டி²தம் – ‘‘ராக³பரியுட்டி²தோஸி, தோ³ஸபரியுட்டி²தோஸி, மோஹபரியுட்டி²தோஸீ’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ ஹீனேன உக்கட்ட²ம் வதே³தி, வீதராக³ம் வீததோ³ஸம் வீதமோஹம் – ‘‘ராக³பரியுட்டி²தோஸி, தோ³ஸபரியுட்டி²தோஸி, மோஹபரியுட்டி²தோஸீ’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ உக்கட்டே²ன ஹீனம் வதே³தி, ராக³பரியுட்டி²தம் தோ³ஸபரியுட்டி²தம் மோஹபரியுட்டி²தம் – ‘‘வீதராகோ³ஸி, வீததோ³ஸோஸி, வீதமோஹோஸீ’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ உக்கட்டே²ன உக்கட்ட²ம் வதே³தி, வீதராக³ம் வீததோ³ஸம் வீதமோஹம் – ‘‘வீதராகோ³ஸி, வீததோ³ஸோஸி, வீதமோஹோஸீ’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

24. உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ ஹீனேன ஹீனம் வதே³தி, பாராஜிகம் அஜ்ஜா²பன்னம் ஸங்கா⁴தி³ஸேஸம் அஜ்ஜா²பன்னம் து²ல்லச்சயம் அஜ்ஜா²பன்னம் பாசித்தியம் அஜ்ஜா²பன்னம் பாடிதே³ஸனீயம் அஜ்ஜா²பன்னம் து³க்கடம் அஜ்ஜா²பன்னம் து³ப்³பா⁴ஸிதம் அஜ்ஜா²பன்னம் – ‘‘பாராஜிகம் அஜ்ஜா²பன்னோஸி, ஸங்கா⁴தி³ஸேஸம் அஜ்ஜா²பன்னோஸி, து²ல்லச்சயம் அஜ்ஜா²பன்னோஸி, பாசித்தியம் அஜ்ஜா²பன்னோஸி, பாடிதே³ஸனீயம் அஜ்ஜா²பன்னோஸி, து³க்கடம் அஜ்ஜா²பன்னோஸி, து³ப்³பா⁴ஸிதம் அஜ்ஜா²பன்னோஸீ’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ ஹீனேன உக்கட்ட²ம் வதே³தி, ஸோதாபன்னம் – ‘‘பாராஜிகம் அஜ்ஜா²பன்னோஸி…பே… து³ப்³பா⁴ஸிதம் அஜ்ஜா²பன்னோஸீ’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ உக்கட்டே²ன ஹீனம் வதே³தி, பாராஜிகம் அஜ்ஜா²பன்னம்…பே… து³ப்³பா⁴ஸிதம் அஜ்ஜா²பன்னம் – ‘‘ஸோதாபன்னோஸீ’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ உக்கட்டே²ன உக்கட்ட²ம் வதே³தி, ஸோதாபன்னம் – ‘‘ஸோதாபன்னோஸீ’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

25. உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ ஹீனேன ஹீனம் வதே³தி, ஓட்ட²ம் மேண்ட³ம் கோ³ணம் க³த்³ரப⁴ம் திரச்சா²னக³தம் நேரயிகம் – ‘‘ஓட்டோ²ஸி, மேண்டோ³ஸி, கோ³ணோஸி, க³த்³ரபோ⁴ஸி, திரச்சா²னக³தோஸி, நேரயிகோஸி, நத்தி² துய்ஹம் ஸுக³தி, து³க்³க³தி யேவ துய்ஹம் பாடிகங்கா²’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ ஹீனேன உக்கட்ட²ம் வதே³தி, பண்டி³தம் ப்³யத்தம் மேதா⁴வி ப³ஹுஸ்ஸுதம் த⁴ம்மகதி²கம் – ‘‘ஓட்டோ²ஸி, மேண்டோ³ஸி, கோ³ணோஸி, க³த்³ரபோ⁴ஸி, திரச்சா²னக³தோஸி, நேரயிகோஸி; நத்தி² துய்ஹம் ஸுக³தி, து³க்³க³தி யேவ துய்ஹம் பாடிகங்கா²’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ உக்கட்டே²ன ஹீனம் வதே³தி, ஓட்ட²ம் மேண்ட³ம் கோ³ணம் க³த்³ரப⁴ம் திரச்சா²னக³தம் நேரயிகம் – ‘‘பண்டி³தோஸி, ப்³யத்தோஸி, மேதா⁴வீஸி, ப³ஹுஸ்ஸுதோஸி, த⁴ம்மகதி²கோஸி, நத்தி² துய்ஹம் து³க்³க³தி, ஸுக³தி யேவ துய்ஹம் பாடிகங்கா²’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ உக்கட்டே²ன உக்கட்ட²ம் வதே³தி, பண்டி³தம் ப்³யத்தம் மேதா⁴விம் ப³ஹுஸ்ஸுதம் த⁴ம்மகதி²கம் – ‘‘பண்டி³தோஸி, ப்³யத்தோஸி, மேதா⁴வீஸி, ப³ஹுஸ்ஸுதோஸி, த⁴ம்மகதி²கோஸி, நத்தி² துய்ஹம் து³க்³க³தி, ஸுக³தி யேவ துய்ஹம் பாடிகங்கா²’’தி ப⁴ணதி, ஆபத்தி வாசாய, வாசாய பாசித்தியஸ்ஸ.

26. உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ ஏவம் வதே³தி, ‘‘ஸந்தி இதே⁴கச்சே சண்டா³லா வேனா நேஸாதா³ ரத²காரா புக்குஸா’’தி ப⁴ணதி, ஆபத்தி வாசாய, வாசாய து³க்கடஸ்ஸ.

உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ ஏவம் வதே³தி, ‘‘ஸந்தி இதே⁴கச்சே க²த்தியா, ப்³ராஹ்மணா’’தி ப⁴ணதி, ஆபத்தி வாசாய, வாசாய து³க்கடஸ்ஸ.

27. உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ ஏவம் வதே³தி, ‘‘ஸந்தி இதே⁴கச்சே அவகண்ணகா ஜவகண்ணகா த⁴னிட்ட²கா ஸவிட்ட²கா குலவட்³ட⁴கா’’தி ப⁴ணதி…பே…. ‘‘ஸந்தி இதே⁴கச்சே பு³த்³த⁴ரக்கி²தா த⁴ம்மரக்கி²தா ஸங்க⁴ரக்கி²தா’’தி ப⁴ணதி …பே…. ‘‘ஸந்தி இதே⁴கச்சே கோஸியா பா⁴ரத்³வாஜா’’தி ப⁴ணதி…பே…. ‘‘ஸந்தி இதே⁴கச்சே கோ³தமா மோக்³க³ல்லானா கச்சானா வாஸிட்டா²’’தி ப⁴ணதி…பே…. ‘‘ஸந்தி இதே⁴கச்சே கோட்ட²கா புப்ப²ச²ட்³ட³கா’’தி ப⁴ணதி…பே…. ‘‘ஸந்தி இதே⁴கச்சே கஸ்ஸகா வாணிஜா கோ³ரக்கா²’’தி ப⁴ணதி…பே…. ‘‘ஸந்தி இதே⁴கச்சே நளகாரா கும்ப⁴காரா பேஸகாரா சம்மகாரா நஹாபிதா’’தி ப⁴ணதி…பே…. ‘‘ஸந்தி இதே⁴கச்சே முத்³தி³கா க³ணகா லேக²கா’’தி ப⁴ணதி…பே…. ‘‘ஸந்தி இதே⁴கச்சே குட்டி²கா க³ண்டி³கா கிலாஸிகா ஸோஸிகா அபமாரிகா’’தி ப⁴ணதி…பே…. ‘‘ஸந்தி இதே⁴கச்சே மது⁴மேஹிகா’’தி ப⁴ணதி…பே…. ‘‘ஸந்தி இதே⁴கச்சே அதிதீ³கா⁴ அதிரஸ்ஸா அதிகண்ஹா அச்சோதா³தா’’தி ப⁴ணதி…பே…. ‘‘ஸந்தி இதே⁴கச்சே நாதிதீ³கா⁴ நாதிரஸ்ஸா நாதிகண்ஹா நாச்சோதா³தா’’தி ப⁴ணதி…பே…. ‘‘ஸந்தி இதே⁴கச்சே ராக³பரியுட்டி²தா தோ³ஸபரியுட்டி²தா மோஹபரியுட்டி²தா’’தி ப⁴ணதி…பே…. ‘‘ஸந்தி இதே⁴கச்சே வீதராகா³ வீததோ³ஸா வீதமோஹா’’தி ப⁴ணதி…பே…. ‘‘ஸந்தி இதே⁴கச்சே பாராஜிகம் அஜ்ஜா²பன்னா…பே… து³ப்³பா⁴ஸிதம் அஜ்ஜா²பன்னா’’தி ப⁴ணதி…பே…. ‘‘ஸந்தி இதே⁴கச்சே ஸோதாபன்னா’’தி ப⁴ணதி…பே…. ‘‘ஸந்தி இதே⁴கச்சே ஓட்டா² மேண்டா³ கோ³ணா க³த்³ரபா⁴ திரச்சா²னக³தா நேரயிகா, நத்தி² தேஸம் ஸுக³தி, து³க்³க³தியேவ தேஸம் பாடிகங்கா²’’தி ப⁴ணதி, ஆபத்தி வாசாய, வாசாய து³க்கடஸ்ஸ.

28. உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ ஏவம் வதே³தி, ‘‘ஸந்தி இதே⁴கச்சே பண்டி³தா ப்³யத்தா, மேதா⁴வீ ப³ஹுஸ்ஸுதா த⁴ம்மகதி²கா, நத்தி² தேஸம் து³க்³க³தி, ஸுக³தியேவ தேஸம் பாடிகங்கா²’’தி ப⁴ணதி, ஆபத்தி வாசாய, வாசாய து³க்கடஸ்ஸ.

29. உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ ஏவம் வதே³தி, ‘‘யே நூன சண்டா³லா வேனா நேஸாதா³ ரத²காரா புக்குஸா’’தி ப⁴ணதி, ஆபத்தி வாசாய, வாசாய து³க்கடஸ்ஸ…பே….

உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ ஏவம் வதே³தி, ‘‘யே நூன பண்டி³தா ப்³யத்தா மேதா⁴வீ ப³ஹுஸ்ஸுதா த⁴ம்மகதி²கா’’தி ப⁴ணதி, ஆபத்தி வாசாய, வாசாய து³க்கடஸ்ஸ.

30. உபஸம்பன்னோ உபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ ஏவம் வதே³தி, ‘‘ந மயம் சண்டா³லா வேனா நேஸாதா³ ரத²காரா புக்குஸா’’தி ப⁴ணதி…பே…. ‘‘ந மயம் பண்டி³தா ப்³யத்தா மேதா⁴வீ ப³ஹுஸ்ஸுதா த⁴ம்மகதி²கா, நத்த²ம்ஹாகம் து³க்³க³தி, ஸுக³தியேவ அம்ஹாகம் பாடிகங்கா²’’தி ப⁴ணதி. ஆபத்தி வாசாய, வாசாய து³க்கடஸ்ஸ.

31. உபஸம்பன்னோ அனுபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ ஹீனேன ஹீனம் வதே³தி,…பே… ஹீனேன உக்கட்ட²ம் வதே³தி…பே… உக்கட்டே²ன ஹீனம் வதே³தி…பே… உக்கட்டே²ன உக்கட்ட²ம் வதே³தி, பண்டி³தம் ப்³யத்தம் மேதா⁴விம் ப³ஹுஸ்ஸுதம் த⁴ம்மகதி²கம் – ‘‘பண்டி³தோஸி, ப்³யத்தோஸி, மேதா⁴வீஸி, ப³ஹுஸ்ஸுதோஸி, த⁴ம்மகதி²கோஸி, நத்தி² துய்ஹம் து³க்³க³தி, ஸுக³தியேவ துய்ஹம் பாடிகங்கா²’’தி ப⁴ணதி, ஆபத்தி வாசாய, வாசாய து³க்கடஸ்ஸ.

உபஸம்பன்னோ அனுபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ ஏவம் வதே³தி, ‘‘ஸந்தி இதே⁴கச்சே சண்டா³லா வேனா நேஸாதா³ ரத²காரா புக்குஸா’’தி ப⁴ணதி…பே…. ‘‘ஸந்தி இதே⁴கச்சே பண்டி³தா ப்³யத்தா மேதா⁴வீ ப³ஹுஸ்ஸுதா த⁴ம்மகதி²கா, நத்தி² தேஸம் து³க்³க³தி, ஸுக³தியேவ தேஸம் பாடிகங்கா²’’தி ப⁴ணதி, ஆபத்தி வாசாய, வாசாய து³க்கடஸ்ஸ.

உபஸம்பன்னோ அனுபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ ஏவம் வதே³தி, ‘‘யே நூன சண்டா³லா வேனா நேஸாதா³ ரத²காரா புக்குஸா’’தி ப⁴ணதி…பே…. ‘‘யே நூன பண்டி³தா ப்³யத்தா மேதா⁴வீ ப³ஹுஸ்ஸுதா த⁴ம்மகதி²கா’’தி ப⁴ணதி, ஆபத்தி வாசாய, வாசாய து³க்கடஸ்ஸ.

உபஸம்பன்னோ அனுபஸம்பன்னம் கு²ம்ஸேதுகாமோ வம்பே⁴துகாமோ மங்குகத்துகாமோ ஏவம் வதே³தி, ‘‘ந மயம் சண்டா³லா வேனா நேஸாதா³ ரத²காரா புக்குஸா’’தி ப⁴ணதி…பே…. ‘‘ந மயம் பண்டி³தா ப்³யத்தா மேதா⁴வீ ப³ஹுஸ்ஸுதா த⁴ம்மகதி²கா, நத்த²ம்ஹாகம் து³க்³க³தி, ஸுக³தியேவ அம்ஹாகம் பாடிகங்கா²’’தி ப⁴ணதி. ஆபத்தி வாசாய, வாசாய து³க்கடஸ்ஸ.

32. உபஸம்பன்னோ உபஸம்பன்னம் ந கு²ம்ஸேதுகாமோ ந வம்பே⁴துகாமோ ந மங்குகத்துகாமோ, த³வகம்யதா ஹீனேன ஹீனம் வதே³தி, சண்டா³லம் வேனம் நேஸாத³ம் ரத²காரம் புக்குஸம் – ‘‘சண்டா³லோஸி, வேனோஸி, நேஸாதோ³ஸி, ரத²காரோஸி, புக்குஸோஸீ’’தி ப⁴ணதி, ஆபத்தி வாசாய, வாசாய து³ப்³பா⁴ஸிதஸ்ஸ.

உபஸம்பன்னோ உபஸம்பன்னம் ந கு²ம்ஸேதுகாமோ ந வம்பே⁴துகாமோ ந மங்குகத்துகாமோ, த³வகம்யதா ஹீனேன உக்கட்ட²ம் வதே³தி, க²த்தியம் ப்³ராஹ்மணம் – ‘‘சண்டா³லோஸி, வேனோஸி, நேஸாதோ³ஸி, ரத²காரோஸி, புக்குஸோஸீ’’தி ப⁴ணதி, ஆபத்தி வாசாய, வாசாய து³ப்³பா⁴ஸிதஸ்ஸ.

உபஸம்பன்னோ உபஸம்பன்னம் ந கு²ம்ஸேதுகாமோ ந வம்பே⁴துகாமோ ந மங்குகத்துகாமோ, த³வகம்யதா உக்கட்டே²ன ஹீனம் வதே³தி, சண்டா³லம் வேனம் நேஸாத³ம் ரத²காரம் புக்குஸம் – ‘‘க²த்தியோஸி, ப்³ராஹ்மணோஸீ’’தி ப⁴ணதி, ஆபத்தி வாசாய, வாசாய து³ப்³பா⁴ஸிதஸ்ஸ.

உபஸம்பன்னோ உபஸம்பன்னம் ந கு²ம்ஸேதுகாமோ ந வம்பே⁴துகாமோ ந மங்குகத்துகாமோ, த³வகம்யதா உக்கட்டே²ன உக்கட்ட²ம் வதே³தி, க²த்தியம் ப்³ராஹ்மணம் – ‘‘க²த்தியோஸி, ப்³ராஹ்மணோஸீ’’தி ப⁴ணதி, ஆபத்தி வாசாய, வாசாய து³ப்³பா⁴ஸிதஸ்ஸ.

உபஸம்பன்னோ உபஸம்பன்னம் ந கு²ம்ஸேதுகாமோ ந வம்பே⁴துகாமோ ந மங்குகத்துகாமோ, த³வகம்யதா ஹீனேன ஹீனம் வதே³தி…பே… ஹீனேன உக்கட்ட²ம் வதே³தி…பே… உக்கட்டே²ன ஹீனம் வதே³தி…பே… உக்கட்டே²ன உக்கட்ட²ம் வதே³தி, பண்டி³தம் ப்³யத்தம் மேதா⁴விம் ப³ஹுஸ்ஸுதம் த⁴ம்மகதி²கம் – ‘‘பண்டி³தோஸி, ப்³யத்தோஸி, மேதா⁴வீஸி, ப³ஹுஸ்ஸுதோஸி, த⁴ம்மகதி²கோஸி, நத்தி² துய்ஹம் து³க்³க³தி, ஸுக³தி யேவ துய்ஹம் பாடிகங்கா²’’தி ப⁴ணதி, ஆபத்தி வாசாய, வாசாய து³ப்³பா⁴ஸிதஸ்ஸ.

33. உபஸம்பன்னோ உபஸம்பன்னம் ந கு²ம்ஸேதுகாமோ ந வம்பே⁴துகாமோ ந மங்குகத்துகாமோ, த³வகம்யதா ஏவம் வதே³தி, ‘‘ஸந்தி இதே⁴கச்சே சண்டா³லா வேனா நேஸாதா³ ரத²காரா புக்குஸா’’தி ப⁴ணதி…பே…. ‘‘ஸந்தி இதே⁴கச்சே பண்டி³தா ப்³யத்தா மேதா⁴வீ ப³ஹுஸ்ஸுதா த⁴ம்மகதி²கா, நத்தி² தேஸம் து³க்³க³தி, ஸுக³தி யேவ தேஸம் பாடிகங்கா²’’தி ப⁴ணதி, ஆபத்தி வாசாய, வாசாய து³ப்³பா⁴ஸிதஸ்ஸ.

உபஸம்பன்னோ உபஸம்பன்னம் ந கு²ம்ஸேதுகாமோ ந வம்பே⁴துகாமோ ந மங்குகத்துகாமோ, த³வகம்யதா ஏவம் வதே³தி, ‘‘யே நூன சண்டா³லா வேனா நேஸாதா³ ரத²காரா புக்குஸா’’தி ப⁴ணதி…பே…. ‘‘யே நூன பண்டி³தா ப்³யத்தா மேதா⁴வீ ப³ஹுஸ்ஸுதா த⁴ம்மகதி²கா’’தி ப⁴ணதி, ஆபத்தி வாசாய, வாசாய து³ப்³பா⁴ஸிதஸ்ஸ.

உபஸம்பன்னோ உபஸம்பன்னம் ந கு²ம்ஸேதுகாமோ ந வம்பே⁴துகாமோ ந மங்குகத்துகாமோ, த³வகம்யதா ஏவம் வதே³தி, ‘‘ந மயம் சண்டா³லா வேனா நேஸாதா³ ரத²காரா புக்குஸா’’தி ப⁴ணதி…பே…. ‘‘ந மயம் பண்டி³தா ப்³யத்தா மேதா⁴வீ ப³ஹுஸ்ஸுதா த⁴ம்மகதி²கா, நத்த²ம்ஹாகம் து³க்³க³தி, ஸுக³தியேவ அம்ஹாகம் பாடிகங்கா²’’தி ப⁴ணதி. ஆபத்தி வாசாய, வாசாய து³ப்³பா⁴ஸிதஸ்ஸ.

34. உபஸம்பன்னோ அனுபஸம்பன்னம் ந கு²ம்ஸேதுகாமோ ந வம்பே⁴துகாமோ ந மங்குகத்துகாமோ, த³வகம்யதா ஹீனேன ஹீனம் வதே³தி…பே… ஹீனேன உக்கட்ட²ம் வதே³தி…பே… உக்கட்டே²ன ஹீனம் வதே³தி…பே… உக்கட்டே²ன உக்கட்ட²ம் வதே³தி, பண்டி³தம் ப்³யத்தம் மேதா⁴விம் ப³ஹுஸ்ஸுதம் த⁴ம்மகதி²கம் – ‘‘பண்டி³தோஸி, ப்³யத்தோஸி, மேதா⁴வீஸி, ப³ஹுஸ்ஸுதோஸி த⁴ம்மகதி²கோஸி, நத்தி² துய்ஹம் து³க்³க³தி; ஸுக³தி யேவ துய்ஹம் பாடிகங்கா²’’தி ப⁴ணதி, ஆபத்தி வாசாய, வாசாய து³ப்³பா⁴ஸிதஸ்ஸ.

உபஸம்பன்னோ அனுபஸம்பன்னம் ந கு²ம்ஸேதுகாமோ ந வம்பே⁴துகாமோ ந மங்குகத்துகாமோ, த³வகம்யதா ஏவம் வதே³தி, ‘‘ஸந்தி இதே⁴கச்சே சண்டா³லா வேனா நேஸாதா³ ரத²காரா புக்குஸா’’தி ப⁴ணதி…பே…. ‘‘ஸந்தி இதே⁴கச்சே பண்டி³தா ப்³யத்தா மேதா⁴வீ ப³ஹுஸ்ஸுதா த⁴ம்மகதி²கா, நத்தி² தேஸம் து³க்³க³தி, ஸுக³தி யேவ தேஸம் பாடிகங்கா²’’தி ப⁴ணதி, ஆபத்தி வாசாய, வாசாய து³ப்³பா⁴ஸிதஸ்ஸ.

உபஸம்பன்னோ அனுபஸம்பன்னம் ந கு²ம்ஸேதுகாமோ ந வம்பே⁴துகாமோ ந மங்குகத்துகாமோ, த³வகம்யதா ஏவம் வதே³தி, ‘‘யே நூன சண்டா³லா வேனா நேஸாதா³ ரத²காரா புக்குஸா’’தி ப⁴ணதி…பே…. ‘‘யே நூன பண்டி³தா ப்³யத்தா மேதா⁴வீ ப³ஹுஸ்ஸுதா த⁴ம்மகதி²கா’’தி ப⁴ணதி, ஆபத்தி வாசாய, வாசாய து³ப்³பா⁴ஸிதஸ்ஸ.

உபஸம்பன்னோ அனுபஸம்பன்னம் ந கு²ம்ஸேதுகாமோ ந வம்பே⁴துகாமோ ந மங்குகத்துகாமோ, த³வகம்யதா ஏவம் வதே³தி, ‘‘ந மயம் சண்டா³லா வேனா நேஸாதா³ ரத²காரா புக்குஸா’’தி ப⁴ணதி…பே…. ‘‘ந மயம் பண்டி³தா ப்³யத்தா மேதா⁴வீ ப³ஹுஸ்ஸுதா த⁴ம்மகதி²கா, நத்த²ம்ஹாகம் து³க்³க³தி, ஸுக³தி யேவ அம்ஹாகம் பாடிகங்கா²’’தி ப⁴ணதி, ஆபத்தி வாசாய, வாசாய து³ப்³பா⁴ஸிதஸ்ஸ.

35. அனாபத்தி அத்த²புரேக்கா²ரஸ்ஸ, த⁴ம்மபுரேக்கா²ரஸ்ஸ, அனுஸாஸனிபுரேக்கா²ரஸ்ஸ, உம்மத்தகஸ்ஸ, கி²த்தசித்தஸ்ஸ, வேத³னாட்டஸ்ஸ, ஆதி³கம்மிகஸ்ஸாதி.

ஓமஸவாத³ஸிக்கா²பத³ம் நிட்டி²தம் து³தியம்.