3. ததியபா⁴ணவாரோ

ஸங்க⁴பே⁴த³கதா²

344. அத² கோ² தே³வத³த்தோ தத³ஹுபோஸதே² உட்டா²யாஸனா ஸலாகம் கா³ஹேஸி – ‘‘மயம், ஆவுஸோ, ஸமணம் கோ³தமம் உபஸங்கமித்வா பஞ்ச வத்தூ²னி யாசிம்ஹா – ‘ப⁴க³வா, ப⁴ந்தே, அனேகபரியாயேன அப்பிச்ச²ஸ்ஸ…பே… வீரியாரம்ப⁴ஸ்ஸ வண்ணவாதீ³. இமானி, ப⁴ந்தே, பஞ்ச வத்தூ²னி அனேகபரியாயேன அப்பிச்ச²தாய…பே… வீரியாரம்பா⁴ய ஸம்வத்தந்தி. ஸாது⁴, ப⁴ந்தே, பி⁴க்கூ² யாவஜீவம் ஆரஞ்ஞிகா அஸ்ஸு; யோ கா³மந்தம் ஓஸரேய்ய, வஜ்ஜம் நம் பு²ஸேய்ய…பே… யாவஜீவம் மச்ச²மம்ஸம் ந கா²தே³ய்யும்; யோ மச்ச²மம்ஸம் கா²தே³ய்ய, வஜ்ஜம் நம் பு²ஸேய்யா’தி. இமானி பஞ்ச வத்தூ²னி ஸமணோ கோ³தமோ நானுஜானாதி. தே மயம் இமேஹி பஞ்சஹி வத்தூ²ஹி ஸமாதா³ய வத்தாம. யஸ்ஸாயஸ்மதோ இமானி பஞ்ச வத்தூ²னி க²மந்தி, ஸோ ஸலாகம் க³ண்ஹாதூ’’தி.

தேன கோ² பன ஸமயேன வேஸாலிகா வஜ்ஜிபுத்தகா பஞ்சமத்தானி பி⁴க்கு²ஸதானி நவகா சேவ ஹோந்தி அப்பகதஞ்ஞுனோ ச. தே – ‘அயம் த⁴ம்மோ, அயம் வினயோ, இத³ம் ஸத்து²ஸாஸன’ந்தி – ஸலாகம் க³ண்ஹிம்ஸு. அத² கோ² தே³வத³த்தோ ஸங்க⁴ம் பி⁴ந்தி³த்வா பஞ்சமத்தானி பி⁴க்கு²ஸதானி ஆதா³ய யேன க³யாஸீஸம் தேன பக்காமி. அத² கோ² ஸாரிபுத்தமோக்³க³ல்லானா யேன ப⁴க³வா தேனுபஸங்கமிம்ஸு, உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³ம்ஸு. ஏகமந்தம் நிஸின்னோ கோ² ஆயஸ்மா ஸாரிபுத்தோ ப⁴க³வந்தம் ஏதத³வோச – ‘‘தே³வத³த்தோ, ப⁴ந்தே, ஸங்க⁴ம் பி⁴ந்தி³த்வா பஞ்சமத்தானி பி⁴க்கு²ஸதானி ஆதா³ய யேன க³யாஸீஸம் தேன பக்கந்தோ’’தி. ‘‘ந ஹி நாம தும்ஹாகம், ஸாரிபுத்தா, தேஸு நவகேஸு பி⁴க்கூ²ஸு காருஞ்ஞம்பி ப⁴விஸ்ஸதி? க³ச்ச²த² தும்ஹே, ஸாரிபுத்தா, புரா தே பி⁴க்கூ² அனயப்³யஸனம் ஆபஜ்ஜந்தீ’’தி. ‘‘ஏவம் ப⁴ந்தே’’தி கோ² ஸாரிபுத்தமோக்³க³ல்லானா ப⁴க³வதோ படிஸ்ஸுத்வா உட்டா²யாஸனா ப⁴க³வந்தம் அபி⁴வாதே³த்வா பத³க்கி²ணம் கத்வா யேன க³யாஸீஸம் தேனுபஸங்கமிம்ஸு.

தேன கோ² பன ஸமயேன அஞ்ஞதரோ பி⁴க்கு² ப⁴க³வதோ அவிதூ³ரே ரோத³மானோ டி²தோ ஹோதி. அத² கோ² ப⁴க³வா தம் பி⁴க்கு²ம் ஏதத³வோச – ‘‘கிஸ்ஸ த்வம், பி⁴க்கு², ரோத³ஸீ’’தி? ‘‘யேபி தே, ப⁴ந்தே, ப⁴க³வதோ அக்³க³ஸாவகா ஸாரிபுத்தமோக்³க³ல்லானா தேபி தே³வத³த்தஸ்ஸ ஸந்திகே க³ச்ச²ந்தி தே³வத³த்தஸ்ஸ த⁴ம்மம் ரோசேந்தா’’தி. ‘‘அட்டா²னமேதம், பி⁴க்கு², அனவகாஸோ, யம் ஸாரிபுத்தமோக்³க³ல்லானா தே³வத³த்தஸ்ஸ த⁴ம்மம் ரோசேய்யும், அபி ச தே க³தா பி⁴க்கூ²னம் ஸஞ்ஞத்தியா’’தி [பி⁴க்கு²ஸஞ்ஞத்தியாதி (ஸீ. ஸ்யா.), பி⁴க்கூ² ஸஞ்ஞத்தியா (க.)].

345. தேன கோ² பன ஸமயேன தே³வத³த்தோ மஹதியா பரிஸாய பரிவுத்தோ த⁴ம்மம் தே³ஸேந்தோ நிஸின்னோ ஹோதி. அத்³த³ஸா கோ² தே³வத³த்தோ ஸாரிபுத்தமோக்³க³ல்லானே தூ³ரதோவ ஆக³ச்ச²ந்தே. தி³ஸ்வான பி⁴க்கூ² ஆமந்தேஸி – ‘‘பஸ்ஸத², பி⁴க்க²வே, யாவ ஸ்வாக்கா²தோ மயா த⁴ம்மோ, யேபி தே ஸமணஸ்ஸ கோ³தமஸ்ஸ அக்³க³ஸாவகா ஸாரிபுத்தமோக்³க³ல்லானா தேபி மம ஸந்திகே ஆக³ச்ச²ந்தி. மம த⁴ம்மம் ரோசேந்தா’’தி. ஏவம் வுத்தே கோகாலிகோ தே³வத³த்தம் ஏதத³வோச – ‘‘மா, ஆவுஸோ தே³வத³த்த, ஸாரிபுத்தமோக்³க³ல்லானே விஸ்ஸஸி. பாபிச்சா² ஸாரிபுத்தமோக்³க³ல்லானா, பாபிகானம் இச்சா²னம் வஸம் க³தா’’தி. ‘‘அலம், ஆவுஸோ. ஸ்வாக³தம் தேஸம் யதோ மே த⁴ம்மம் ரோசேந்தீ’’தி.

அத² கோ² தே³வத³த்தோ ஆயஸ்மந்தம் ஸாரிபுத்தம் உபட்³டா⁴ஸனேன நிமந்தேஸி – ‘‘ஏஹாவுஸோ ஸாரிபுத்த, இத⁴ நிஸீதா³ஹீ’’தி. ‘‘அலம் ஆவுஸோ’’தி கோ² ஆயஸ்மா ஸாரிபுத்தோ அஞ்ஞதரம் ஆஸனம் க³ஹேத்வா ஏகமந்தம் நிஸீதி³. ஆயஸ்மாபி கோ² மஹாமோக்³க³ல்லானோ அஞ்ஞதரம் ஆஸனம் க³ஹேத்வா ஏகமந்தம் நிஸீதி³. அத² கோ² தே³வத³த்தோ ப³ஹுதே³வ ரத்திம் பி⁴க்கூ² த⁴ம்மியா கதா²ய ஸந்த³ஸ்ஸேத்வா ஸமாத³பேத்வா ஸமுத்தேஜேத்வா ஸம்பஹம்ஸேத்வா ஆயஸ்மந்தம் ஸாரிபுத்தம் அஜ்ஜே²ஸி – ‘‘விக³ததி²னமித்³தோ⁴ கோ², ஆவுஸோ ஸாரிபுத்த, பி⁴க்கு²ஸங்கோ⁴. படிபா⁴து தம், ஆவுஸோ ஸாரிபுத்த, பி⁴க்கூ²னம் த⁴ம்மீ கதா², பிட்டி² மே ஆகி³லாயதி, தமஹம் ஆயமிஸ்ஸாமீ’’தி. ‘‘ஏவமாவுஸோ’’தி கோ² ஆயஸ்மா ஸாரிபுத்தோ தே³வத³த்தஸ்ஸ பச்சஸ்ஸோஸி. அத² கோ² தே³வத³த்தோ சதுக்³கு³ணம் ஸங்கா⁴டிம் பஞ்ஞாபேத்வா த³க்கி²ணேன பஸ்ஸேன ஸேய்யம் கப்பேஸி. தஸ்ஸ கிலமந்தஸ்ஸ முட்ட²ஸ்ஸதிஸ்ஸ அஸம்பஜானஸ்ஸ முஹுத்தகேனேவ நித்³தா³ ஓக்கமி.

அத² கோ² ஆயஸ்மா ஸாரிபுத்தோ ஆதே³ஸனாபாடிஹாரியானுஸாஸனியா பி⁴க்கூ² த⁴ம்மியா கதா²ய ஓவதி³ அனுஸாஸி. ஆயஸ்மா மஹாமோக்³க³ல்லானோ இத்³தி⁴பாடிஹாரியானுஸாஸனியா பி⁴க்கூ² த⁴ம்மியா கதா²ய ஓவதி³ அனுஸாஸி. அத² கோ² தேஸம் பி⁴க்கூ²னம் ஆயஸ்மதா ஸாரிபுத்தேன ஆதே³ஸனாபாடிஹாரியானுஸாஸனியா ஆயஸ்மதா ச மஹாமோக்³க³ல்லானேன இத்³தி⁴பாடிஹாரியானுஸாஸனியா ஓவதி³யமானானம் அனுஸாஸியமானானம் விரஜம் வீதமலம் த⁴ம்மசக்கு²ம் உத³பாதி³ – யம் கிஞ்சி ஸமுத³யத⁴ம்மம், ஸப்³ப³ம் தம் நிரோத⁴த⁴ம்மந்தி.

அத² கோ² ஆயஸ்மா ஸாரிபுத்தோ பி⁴க்கூ² ஆமந்தேஸி – ‘‘க³ச்சா²ம மயம், ஆவுஸோ, ப⁴க³வதோ ஸந்திகே. யோ தஸ்ஸ ப⁴க³வதோ த⁴ம்மம் ரோசேஸி ஸோ ஆக³ச்ச²தூ’’தி. அத² கோ² ஸாரிபுத்தமோக்³க³ல்லானா தானி பஞ்சபி⁴க்கு²ஸதானி ஆதா³ய யேன வேளுவனம் தேனுபஸங்கமிம்ஸு. அத² கோ² கோகாலிகோ தே³வத³த்தம் உட்டா²பேஸி – ‘‘உட்டே²ஹி, ஆவுஸோ தே³வத³த்த, நீதா தே பி⁴க்கூ² ஸாரிபுத்தமோக்³க³ல்லானேஹி. நனு த்வம், ஆவுஸோ தே³வத³த்த, மயா வுத்தோ – ‘மா, ஆவுஸோ தே³வத³த்த, ஸாரிபுத்தமோக்³க³ல்லானே விஸ்ஸாஸி. பாபிச்சா² ஸாரிபுத்தமோக்³க³ல்லானா, பாபிகானம் இச்சா²னம் வஸம் க³தா’’’தி? அத² கோ² தே³வத³த்தஸ்ஸ தத்தே²வ உண்ஹம் லோஹிதம் முக²தோ உக்³க³ஞ்சி².

அத² கோ² ஸாரிபுத்தமோக்³க³ல்லானா யேன ப⁴க³வா தேனுபஸங்கமிம்ஸு, உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³ஸும். ஏகமந்தம் நிஸின்னோ கோ² ஆயஸ்மா ஸாரிபுத்தோ ப⁴க³வந்தம் ஏதத³வோச – ‘‘ஸாது⁴, ப⁴ந்தே, பே⁴த³கானுவத்தகா பி⁴க்கூ² புன உபஸம்பஜ்ஜேய்யு’’ந்தி. ‘‘அலம், ஸாரிபுத்த. மா தே ருச்சி பே⁴த³கானுவத்தகானம் பி⁴க்கூ²னம் புன உபஸம்பதா³. தேன ஹி த்வம், ஸாரிபுத்த, பே⁴த³கானுவத்தகே பி⁴க்கூ² து²ல்லச்சயம் தே³ஸாபேஹி. கத²ம் பன தே, ஸாரிபுத்த, தே³வத³த்தோ படிபஜ்ஜீ’’தி? ‘‘யதே²வ, ப⁴ந்தே, ப⁴க³வா ப³ஹுதே³வ ரத்திம் பி⁴க்கூ² த⁴ம்மியா கதா²ய ஸந்த³ஸ்ஸேத்வா ஸமாத³பேத்வா ஸமுத்தேஜேத்வா ஸம்பஹம்ஸேத்வா மம் அஜ்ஜே²ஸதி – ‘விக³ததி²னமித்³தோ⁴ கோ², ஸாரிபுத்த, பி⁴க்கு²ஸங்கோ⁴; படிபா⁴து தம், ஸாரிபுத்த, பி⁴க்கூ²னம் த⁴ம்மீ கதா², பிட்டி² மே ஆகி³லாயதி, தமஹம் ஆயமிஸ்ஸாமீ’தி, ஏவமேவ கோ², ப⁴ந்தே, தே³வத³த்தோ படிபஜ்ஜீ’’தி.

346. அத² கோ² ப⁴க³வா பி⁴க்கூ² ஆமந்தேஸி – ‘‘பூ⁴தபுப்³ப³ம், பி⁴க்க²வே, அரஞ்ஞாயதனே மஹாஸரஸீ. தம் நாகா³ உபனிஸ்ஸாய விஹரிம்ஸு. தே தம் ஸரஸிம் ஓகா³ஹேத்வா, ஸோண்டா³ய பி⁴ஸமுளாலம் அப்³பு³ஹித்வா, ஸுவிக்கா²லிதம் விக்கா²லேத்வா, அகத்³த³மம் ஸங்கா²தி³த்வா, அஜ்ஜோ²ஹரந்தி. தேஸம் தம் வண்ணாய சேவ ஹோதி, ப³லாய ச. ந ச ததோனிதா³னம் மரணம் வா நிக³ச்ச²ந்தி, மரணமத்தம் வா து³க்க²ம். தேஸம்யேவ கோ² பன, பி⁴க்க²வே, மஹானாகா³னம் அனுஸிக்க²மானா தருணா பி⁴ங்கச்சா²பா. தே தம் ஸரஸிம் ஓகா³ஹேத்வா, ஸோண்டா³ய பி⁴ஸமுளாலம் அப்³பு³ஹித்வா, ந ஸுவிக்கா²லிதம் விக்கா²லேத்வா, ஸகத்³த³மம் ஸங்கா²தி³த்வா, அஜ்ஜோ²ஹரந்தி. தேஸம் தம் நேவ வண்ணாய ஹோதி, ந ப³லாய. ததோனிதா³னஞ்ச மரணம் வா நிக³ச்ச²ந்தி, மரணமத்தம் வா து³க்க²ம். ஏவமேவ கோ², பி⁴க்க²வே, தே³வத³த்தோ மமானுக்ருப்³ப³ம் [மமானுகுப்³ப³ம் (ஸீ. ஸ்யா.)] கபணோ மரிஸ்ஸதீதி.

‘‘மஹாவராஹஸ்ஸ மஹிம் விக்ருப்³ப³தோ [விகுப்³ப³தோ (ஸீ. ஸ்யா.)], பி⁴ஸம் க⁴ஸானஸ்ஸ [க⁴ஸமானஸ்ஸ (க.)] நதீ³ஸு ஜக்³க³தோ;

பி⁴ங்கோவ பங்கம் அபி⁴ப⁴க்க²யித்வா, மமானுக்ருப்³ப³ம் கபணோ மரிஸ்ஸதீ’’தி.

347. [அ. நி. 8.16] ‘‘அட்ட²ஹி, பி⁴க்க²வே, அங்கே³ஹி ஸமன்னாக³தோ பி⁴க்கு² தூ³தேய்யம் க³ந்துமரஹதி. கதமேஹி அட்ட²ஹி? இத⁴, பி⁴க்க²வே, பி⁴க்கு² ஸோதா ச ஹோதி, ஸாவேதா ச, உக்³க³ஹேதா ச, தா⁴ரேதா ச, விஞ்ஞாதா ச, விஞ்ஞாபேதா ச, குஸலோ ச ஸஹிதாஸஹிதஸ்ஸ, நோ ச கலஹகாரகோ – இமேஹி கோ², பி⁴க்க²வே, அட்ட²ஹங்கே³ஹி ஸமன்னாக³தோ பி⁴க்கு² தூ³தேய்யம் க³ந்துமரஹதி.

[அ. நி. 8.16] ‘‘அட்ட²ஹி, பி⁴க்க²வே, அங்கே³ஹி ஸமன்னாக³தோ ஸாரிபுத்தோ தூ³தேய்யம் க³ந்துமரஹதி. கதமேஹி அட்ட²ஹி? இத⁴, பி⁴க்க²வே, ஸாரிபுத்தோ ஸோதா ச ஹோதி, ஸாவேதா ச, உக்³க³ஹேதா ச, தா⁴ரேதா ச, விஞ்ஞாதா ச, விஞ்ஞாபேதா ச, குஸலோ ச ஸஹிதாஸஹிதஸ்ஸ, நோ ச கலஹகாரகோ – இமேஹி கோ², பி⁴க்க²வே, அட்ட²ஹங்கே³ஹி ஸமன்னாக³தோ ஸாரிபுத்தோ தூ³தேய்யம் க³ந்துமரஹதீதி.

[அ. நி. 8.16] ‘‘யோ வே ந ப்³யத²தி [ப்³யாத⁴தி (ஸீ. ஸ்யா.)] பத்வா, பரிஸம் உக்³க³வாதி³னிம்;

ந ச ஹாபேதி வசனம், ந ச சா²தே³தி ஸாஸனம்.

‘‘அஸந்தி³த்³தோ⁴ ச அக்கா²தி [அக்கா²தா (க.)], புச்சி²தோ ச ந குப்பதி;

ஸ வே தாதி³ஸகோ பி⁴க்கு², தூ³தேய்யம் க³ந்துமரஹதீ’’தி.

348. [அ. நி. 8.7] ‘‘அட்ட²ஹி, பி⁴க்க²வே, அஸத்³த⁴ம்மேஹி அபி⁴பூ⁴தோ பரியாதி³ன்னசித்தோ தே³வத³த்தோ ஆபாயிகோ நேரயிகோ கப்பட்டோ² அதேகிச்சோ². கதமேஹி அட்ட²ஹி? லாபே⁴ன, பி⁴க்க²வே, அபி⁴பூ⁴தோ பரியாதி³ன்னசித்தோ தே³வத³த்தோ ஆபாயிகோ நேரயிகோ கப்பட்டோ² அதேகிச்சோ²; அலாபே⁴ன, பி⁴க்க²வே…பே… யஸேன, பி⁴க்க²வே…பே… அயஸேன, பி⁴க்க²வே…பே… ஸக்காரேன, பி⁴க்க²வே…பே… அஸக்காரேன, பி⁴க்க²வே…பே… பாபிச்ச²தாய, பி⁴க்க²வே…பே… பாபமித்ததாய பி⁴க்க²வே, அபி⁴பூ⁴தோ பரியாதி³ன்னசித்தோ தே³வத³த்தோ ஆபாயிகோ நேரயிகோ கப்பட்டோ² அதேகிச்சோ² – இமேஹி கோ², பி⁴க்க²வே, அட்ட²ஹி அஸத்³த⁴ம்மேஹி அபி⁴பூ⁴தோ பரியாதி³ன்னசித்தோ தே³வத³த்தோ ஆபாயிகோ நேரயிகோ கப்பட்டோ² அதேகிச்சோ².

349. ‘‘ஸாது⁴, பி⁴க்க²வே, பி⁴க்கு² உப்பன்னம் லாப⁴ம் அபி⁴பு⁴ய்ய அபி⁴பு⁴ய்ய விஹரேய்ய, உப்பன்னம் அலாப⁴ம்…பே… உப்பன்னம் யஸம்… உப்பன்னம் அயஸம்… உப்பன்னம் ஸக்காரம்… உப்பன்னம் அஸக்காரம்… உப்பன்னம் பாபிச்ச²தம்… உப்பன்னம் பாபமித்ததம் அபி⁴பு⁴ய்ய அபி⁴பு⁴ய்ய விஹரேய்ய. கத²ஞ்ச, பி⁴க்க²வே, பி⁴க்கு² அத்த²வஸம் படிச்ச உப்பன்னம் லாப⁴ம் அபி⁴பு⁴ய்ய அபி⁴பு⁴ய்ய விஹரேய்ய, உப்பன்னம் அலாப⁴ம்…பே… உப்பன்னம் யஸம்… உப்பன்னம் அயஸம்… உப்பன்னம் ஸக்காரம்… உப்பன்னம் அஸக்காரம்… உப்பன்னம் பாபிச்ச²தம்… உப்பன்னம் பாபமித்ததம் அபி⁴பு⁴ய்ய அபி⁴பு⁴ய்ய விஹரேய்ய? யம் ஹிஸ்ஸ, பி⁴க்க²வே, உப்பன்னம் லாப⁴ம் அனபி⁴பு⁴ய்ய விஹரதோ உப்பஜ்ஜேய்யும் ஆஸவா விகா⁴தபரிளாஹா, உப்பன்னம் லாப⁴ம் அபி⁴பு⁴ய்ய அபி⁴பு⁴ய்ய விஹரதோ ஏவம்ஸதே ஆஸவா விகா⁴தபரிளாஹா ந ஹோந்தி. யம் ஹிஸ்ஸ, பி⁴க்க²வே, உப்பன்னம் அலாப⁴ம்…பே… உப்பன்னம் யஸம்… உப்பன்னம் அயஸம்… உப்பன்னம் ஸக்காரம்… உப்பன்னம் அஸக்காரம்… உப்பன்னம் பாபிச்ச²தம்… உப்பன்னம் பாபமித்ததம் அனபி⁴பு⁴ய்ய விஹரதோ உப்பஜ்ஜேய்யும் ஆஸவா விகா⁴தபரிளாஹா, உப்பன்னம் பாபமித்ததம் அபி⁴பு⁴ய்ய அபி⁴பு⁴ய்ய விஹரதோ ஏவம்ஸதே ஆஸவா விகா⁴தபரிளாஹா ந ஹோந்தி. இத³ம் கோ², பி⁴க்க²வே, அத்த²வஸம் படிச்ச உப்பன்னம் லாப⁴ம் அபி⁴பு⁴ய்ய அபி⁴பு⁴ய்ய விஹரேய்ய, உப்பன்னம் அலாப⁴ம்…பே… உப்பன்னம் யஸம்… உப்பன்னம் அயஸம்… உப்பன்னம் ஸக்காரம்… உப்பன்னம் அஸக்காரம்… உப்பன்னம் பாபிச்ச²தம்… உப்பன்னம் பாபமித்ததம் அபி⁴பு⁴ய்ய அபி⁴பு⁴ய்ய விஹரேய்ய. தஸ்மாதிஹ, பி⁴க்க²வே, உப்பன்னம் லாப⁴ம் அபி⁴பு⁴ய்ய அபி⁴பு⁴ய்ய விஹரிஸ்ஸாம, உப்பன்னம் அலாப⁴ம்…பே… உப்பன்னம் யஸம்… உப்பன்னம் அயஸம்… உப்பன்னம் ஸக்காரம்… உப்பன்னம் அஸக்காரம்… உப்பன்னம் பாபிச்ச²தம்… உப்பன்னம் பாபமித்ததம் அபி⁴பு⁴ய்ய அபி⁴பு⁴ய்ய விஹரிஸ்ஸாமாதி; ஏவஞ்ஹி வோ, பி⁴க்க²வே, ஸிக்கி²தப்³ப³ந்தி.

350. ‘‘தீஹி, பி⁴க்க²வே, அஸத்³த⁴ம்மேஹி அபி⁴பூ⁴தோ பரியாதி³ன்னசித்தோ தே³வத³த்தோ ஆபாயிகோ நேரயிகோ கப்பட்டோ² அதேகிச்சோ². கதமேஹி தீஹி? பாபிச்ச²தா, பாபமித்ததா, ஓரமத்தகேன விஸேஸாதி⁴க³மேன அந்தரா வோஸானம் ஆபாதி³ – இமேஹி கோ², பி⁴க்க²வே, தீஹி அஸத்³த⁴ம்மேஹி அபி⁴பூ⁴தோ பரியாதி³ன்னசித்தோ தே³வத³த்தோ ஆபாயிகோ நேரயிகோ கப்பட்டோ² அதேகிச்சோ²தி.

‘‘மா ஜாது கோசி லோகஸ்மிம், பாபிச்சோ² உத³பஜ்ஜத²;

தத³மினாபி ஜானாத², பாபிச்சா²னம் யதா²க³தி.

‘‘பண்டி³தோதி ஸமஞ்ஞாதோ, பா⁴விதத்தோதி ஸம்மதோ;

ஜலம்வ யஸஸா அட்டா², தே³வத³த்தோதி மே ஸுதம்.

‘‘ஸோ பமாத³ம் அனுசிண்ணோ, ஆஸஜ்ஜ நம் ததா²க³தம்;

அவீசினிரயம் பத்தோ, சதுத்³வாரம் ப⁴யானகம்.

‘‘அது³ட்ட²ஸ்ஸ ஹி யோ து³ப்³பே⁴, பாபகம்மம் அக்ருப்³ப³தோ;

தமேவ பாபம் பு²ஸதி, து³ட்ட²சித்தம் அனாத³ரம்.

‘‘ஸமுத்³த³ம் விஸகும்பே⁴ன, யோ மஞ்ஞேய்ய பதூ³ஸிதும் [பது³ஸ்ஸிதும் (க.)];

ந ஸோ தேன பதூ³ஸேய்ய, பே⁴ஸ்மா ஹி உத³தீ⁴ மஹா.

‘‘ஏவமேவ ததா²க³தம், யோ வாதே³னுபஹிம்ஸதி;

ஸமக்³க³தம் [ஸம்மாக³தம் (ஸீ.), ஸமக³தம் (ஸ்யா.)] ஸந்தசித்தம், வாதோ³ தம்ஹி ந ரூஹதி.

‘‘தாதி³ஸம் மித்தம் க்ருப்³பே³த² [குப்³பே³த² (ஸீ. ஸ்யா.)], தஞ்ச ஸேவேத² பண்டி³தோ;

யஸ்ஸ மக்³கா³னுகோ³ பி⁴க்கு², க²யம் து³க்க²ஸ்ஸ பாபுணே’’தி.

உபாலிபஞ்ஹா

351. அத² கோ² ஆயஸ்மா உபாலி யேன ப⁴க³வா தேனுபஸங்கமி, உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா உபாலி ப⁴க³வந்தம் ஏதத³வோச – ‘‘ஸங்க⁴ராஜி ஸங்க⁴ராஜீதி, ப⁴ந்தே, வுச்சதி. கித்தாவதா நு கோ², ப⁴ந்தே, ஸங்க⁴ராஜி ஹோதி, நோ ச ஸங்க⁴பே⁴தோ³? கித்தாவதா ச பன ஸங்க⁴ராஜி சேவ ஹோதி ஸங்க⁴பே⁴தோ³ சா’’தி?

‘‘ஏகதோ, உபாலி, ஏகோ ஹோதி, ஏகதோ த்³வே, சதுத்தோ² அனுஸ்ஸாவேதி, ஸலாகம் கா³ஹேதி – ‘அயம் த⁴ம்மோ, அயம் வினயோ, இத³ம் ஸத்து²ஸாஸனம், இமம் க³ண்ஹத², இமம் ரோசேதா²’தி. ஏவம்பி கோ², உபாலி, ஸங்க⁴ராஜி ஹோதி, நோ ச ஸங்க⁴பே⁴தோ³. ஏகதோ, உபாலி, த்³வே ஹோந்தி, ஏகதோ த்³வே, பஞ்சமோ அனுஸ்ஸாவேதி, ஸலாகம் கா³ஹேதி – ‘அயம் த⁴ம்மோ, அயம் வினயோ, இத³ம் ஸத்து²ஸாஸனம், இமம் க³ண்ஹத², இமம் ரோசேதா²’தி. ஏவம்பி கோ², உபாலி, ஸங்க⁴ராஜி ஹோதி, நோ ச ஸங்க⁴பே⁴தோ³. ஏகதோ, உபாலி, த்³வே ஹோந்தி, ஏகதோ தயோ, ச²ட்டோ² அனுஸ்ஸாவேதி, ஸலாகம் கா³ஹேதி – ‘அயம் த⁴ம்மோ, அயம் வினயோ, இத³ம் ஸத்து²ஸாஸனம், இமம் க³ண்ஹத², இமம் ரோசேதா²’தி. ஏவம்பி கோ², உபாலி, ஸங்க⁴ராஜி ஹோதி, நோ ச ஸங்க⁴பே⁴தோ³. ஏகதோ, உபாலி, தயோ ஹோந்தி, ஏகதோ தயோ, ஸத்தமோ அனுஸ்ஸாவேதி, ஸலாகம் கா³ஹேதி – ‘அயம் த⁴ம்மோ, அயம் வினயோ, இத³ம் ஸத்து²ஸாஸனம், இமம் க³ண்ஹத², இமம் ரோசேதா²’தி. ஏவம்பி கோ², உபாலி, ஸங்க⁴ராஜி ஹோதி, நோ ச ஸங்க⁴பே⁴தோ³. ஏகதோ, உபாலி, தயோ ஹோந்தி, ஏகதோ சத்தாரோ, அட்ட²மோ அனுஸ்ஸாவேதி, ஸலாகம் கா³ஹேதி – ‘அயம் த⁴ம்மோ, அயம் வினயோ, இத³ம் ஸத்து²ஸாஸனம், இமம் க³ண்ஹத², இமம் ரோசேதா²’தி. ஏவம்பி கோ², உபாலி, ஸங்க⁴ராஜி ஹோதி, நோ ச ஸங்க⁴பே⁴தோ³. ஏகதோ, உபாலி, சத்தாரோ ஹோந்தி, ஏகதோ சத்தாரோ, நவமோ அனுஸ்ஸாவேதி, ஸலாகம் கா³ஹேதி – ‘அயம் த⁴ம்மோ, அயம் வினயோ, இத³ம் ஸத்து²ஸாஸனம், இமம் க³ண்ஹத², இமம் ரோசேதா²’தி. ஏவம் கோ², உபாலி, ஸங்க⁴ராஜி சேவ ஹோதி ஸங்க⁴பே⁴தோ³ ச. நவன்னம் வா, உபாலி, அதிரேகனவன்னம் வா ஸங்க⁴ராஜி சேவ ஹோதி ஸங்க⁴பே⁴தோ³ ச. ந கோ², உபாலி, பி⁴க்கு²னீ ஸங்க⁴ம் பி⁴ந்த³தி, அபி ச பே⁴தா³ய பரக்கமதி, ந ஸிக்க²மானா ஸங்க⁴ம் பி⁴ந்த³தி…பே… ந ஸாமணேரோ ஸங்க⁴ம் பி⁴ந்த³தி, ந ஸாமணேரீ ஸங்க⁴ம் பி⁴ந்த³தி, ந உபாஸகோ ஸங்க⁴ம் பி⁴ந்த³தி, ந உபாஸிகா ஸங்க⁴ம் பி⁴ந்த³தி, அபி ச பே⁴தா³ய பரக்கமதி. பி⁴க்கு² கோ², உபாலி, பகதத்தோ, ஸமானஸம்வாஸகோ, ஸமானஸீமாயம் டி²தோ, ஸங்க⁴ம் பி⁴ந்த³தீ’’தி.

352. [அ. நி. 10.37] ‘‘ஸங்க⁴பே⁴தோ³ ஸங்க⁴பே⁴தோ³தி, ப⁴ந்தே, வுச்சதி. கித்தாவதா நு கோ², ப⁴ந்தே, ஸங்கோ⁴ பி⁴ன்னோ ஹோதீ’’தி?

‘‘இது⁴பாலி, பி⁴க்கூ² அத⁴ம்மம் த⁴ம்மோதி தீ³பேந்தி, த⁴ம்மம் அத⁴ம்மோதி தீ³பேந்தி, அவினயம் வினயோதி தீ³பேந்தி, வினயம் அவினயோதி தீ³பேந்தி, அபா⁴ஸிதம் அலபிதம் ததா²க³தேன பா⁴ஸிதம் லபிதம் ததா²க³தேனாதி தீ³பேந்தி, பா⁴ஸிதம் லபிதம் ததா²க³தேன அபா⁴ஸிதம் அலபிதம் ததா²க³தேனாதி தீ³பேந்தி, அனாசிண்ணம் ததா²க³தேன ஆசிண்ணம் ததா²க³தேனாதி தீ³பேந்தி, ஆசிண்ணம் ததா²க³தேன அனாசிண்ணம் ததா²க³தேனாதி தீ³பேந்தி, அபஞ்ஞத்தம் ததா²க³தேன பஞ்ஞத்தம் ததா²க³தேனாதி தீ³பேந்தி, பஞ்ஞத்தம் ததா²க³தேன அபஞ்ஞத்தம் ததா²க³தேனாதி தீ³பேந்தி, அனாபத்திம் ஆபத்தீதி தீ³பேந்தி, ஆபத்திம் அனாபத்தீதி தீ³பேந்தி, லஹுகம் ஆபத்திம் க³ருகா ஆபத்தீதி தீ³பேந்தி, க³ருகம் ஆபத்திம் லஹுகா ஆபத்தீதி தீ³பேந்தி, ஸாவஸேஸம் ஆபத்திம் அனவஸேஸா ஆபத்தீதி தீ³பேந்தி, அனவஸேஸம் ஆபத்திம் ஸாவஸேஸா ஆபத்தீதி தீ³பேந்தி, து³ட்டு²ல்லம் ஆபத்திம் அது³ட்டு²லா ஆபத்தீதி தீ³பேந்தி, அது³ட்டு²ல்லம் ஆபத்திம் து³ட்டு²ல்லா ஆபத்தீதி தீ³பேந்தி. தே இமேஹி அட்டா²ரஸஹி வத்தூ²ஹி அபகஸ்ஸந்தி, அவபகஸ்ஸந்தி, ஆவேனிம் [ஆவேணி (ஸீ.), ஆவேணிகம் (ஸ்யா.)] உபோஸத²ம் கரோந்தி, ஆவேனிம் பவாரணம் கரோந்தி, ஆவேனிம் ஸங்க⁴கம்மம் கரோந்தி. ஏத்தாவதா கோ², உபாலி, ஸங்கோ⁴ பி⁴ன்னோ ஹோதீ’’தி.

353. [அ. நி. 10.37] ‘‘ஸங்க⁴ஸாமக்³கீ³ ஸங்க⁴ஸாமக்³கீ³தி, ப⁴ந்தே, வுச்சதி. கித்தாவதா நு கோ², ப⁴ந்தே, ஸங்கோ⁴ ஸமக்³கோ³ ஹோதீ’’தி? ‘‘இது⁴பாலி, பி⁴க்கூ² அத⁴ம்மம் அத⁴ம்மோதி தீ³பேந்தி, த⁴ம்மம் த⁴ம்மோதி தீ³பேந்தி, அவினயம் அவினயோதி தீ³பேந்தி, வினயம் வினயோதி தீ³பேந்தி, அபா⁴ஸிதம் அலபிதம் ததா²க³தேன அபா⁴ஸிதம் அலபிதம் ததா²க³தேனாதி தீ³பேந்தி, பா⁴ஸிதம் லபிதம் ததா²க³தேன பா⁴ஸிதம் லபிதம் ததா²க³தேனாதி தீ³பேந்தி, அனாசிண்ணம் ததா²க³தேன அனாசிண்ணம் ததா²க³தேனாதி தீ³பேந்தி, ஆசிண்ணம் ததா²க³தேன ஆசிண்ணம் ததா²க³தேனாதி தீ³பேந்தி, அபஞ்ஞத்தம் ததா²க³தேன அபஞ்ஞத்தம் ததா²க³தேனாதி தீ³பேந்தி, பஞ்ஞத்தம் ததா²க³தேன பஞ்ஞத்தம் ததா²க³தேனாதி தீ³பேந்தி, அனாபத்திம் அனாபத்தீதி தீ³பேந்தி, ஆபத்திம் ஆபத்தீதி தீ³பேந்தி, லஹுகம் ஆபத்திம் லஹுகா ஆபத்தீதி தீ³பேந்தி, க³ருகம் ஆபத்திம் க³ருகா ஆபத்தீதி தீ³பேந்தி, ஸாவஸேஸம் ஆபத்திம் ஸாவஸேஸா ஆபத்தீதி தீ³பேந்தி, அனவஸேஸம் ஆபத்திம் அனவஸேஸா ஆபத்தீதி தீ³பேந்தி, து³ட்டு²ல்லம் ஆபத்திம் து³ட்டு²ல்லா ஆபத்தீதி தீ³பேந்தி, அது³ட்டு²ல்லம் ஆபத்திம் அது³ட்டு²ல்லா ஆபத்தீதி தீ³பேந்தி. தே இமேஹி அட்டா²ரஸஹி வத்தூ²ஹி ந அபகஸ்ஸந்தி, ந அவபகஸ்ஸந்தி, ந ஆவேனிம் உபோஸத²ம் கரோந்தி, ந ஆவேனிம் பவாரணம் கரோந்தி, ந ஆவேனிம் ஸங்க⁴கம்மம் கரோந்தி. ஏத்தாவதா கோ², உபாலி, ஸங்கோ⁴ ஸமக்³கோ³ ஹோதீ’’தி.

354. ‘‘ஸமக்³க³ம் பன, ப⁴ந்தே, ஸங்க⁴ம் பி⁴ந்தி³த்வா கிம் ஸோ பஸவதீ’’தி? ‘‘ஸமக்³க³ம் கோ², உபாலி, ஸங்க⁴ம் பி⁴ந்தி³த்வா கப்பட்டி²கம் கிப்³பி³ஸம் பஸவதி, கப்பம் நிரயம்ஹி பச்சதீ’’தி.

[இதிவு. 18; அ. நி. 10.39] ‘‘ஆபாயிகோ நேரயிகோ, கப்பட்டோ² ஸங்க⁴பே⁴த³கோ;

வக்³க³ரதோ அத⁴ம்மட்டோ², யோக³க்கே²மா பத⁴ம்ஸதி;

ஸங்க⁴ம் ஸமக்³க³ம் பி⁴ந்தி³த்வா, கப்பம் நிரயம்ஹி பச்சதீ’’தி.

‘‘பி⁴ன்னம் பன, ப⁴ந்தே, ஸங்க⁴ம் ஸமக்³க³ம் கத்வா கிம் ஸோ பஸவதீ’’தி? ‘‘பி⁴ன்னம் கோ², உபாலி, ஸங்க⁴ம் ஸமக்³க³ம் கத்வா ப்³ரஹ்மம் புஞ்ஞம் பஸவதி, கப்பம் ஸக்³க³ம்ஹி மோத³தீ’’தி.

[இத்திவு. 18; அ. நி. 10.40] ‘‘ஸுகா² ஸங்க⁴ஸ்ஸ ஸாமக்³கீ³, ஸமக்³கா³னஞ்ச அனுக்³க³ஹோ;

ஸமக்³க³ரதோ த⁴ம்மட்டோ², யோக³க்கே²மா ந த⁴ம்ஸதி;

ஸங்க⁴ம் ஸமக்³க³ம் கத்வான, கப்பம் ஸக்³க³ம்ஹி மோத³தீ’’தி.

355. [பரி. 459] ‘‘ஸியா நு கோ², ப⁴ந்தே, ஸங்க⁴பே⁴த³கோ ஆபாயிகோ, நேரயிகோ, கப்பட்டோ², அதேகிச்சோ²’’தி? ‘‘ஸியா, உபாலி, ஸங்க⁴பே⁴த³கோ ஆபாயிகோ, நேரயிகோ, கப்பட்டோ², அதேகிச்சோ²’’தி.

[பரி. 459] ‘‘ஸியா [ஸியா நு கோ² (ஸ்யா. கம்.)] பன, ப⁴ந்தே, ஸங்க⁴பே⁴த³கோ ந ஆபாயிகோ, ந நேரயிகோ, ந கப்பட்டோ², ந அதேகிச்சோ²’’தி? ‘‘ஸியா, உபாலி, ஸங்க⁴பே⁴த³கோ ந ஆபாயிகோ, ந நேரயிகோ, ந கப்பட்டோ², ந அதேகிச்சோ²’’தி.

‘‘கதமோ பன, ப⁴ந்தே, ஸங்க⁴பே⁴த³கோ ஆபாயிகோ, நேரயிகோ, கப்பட்டோ², அதேகிச்சோ²’’தி? ‘‘இது⁴பாலி, பி⁴க்கு² அத⁴ம்மம் த⁴ம்மோதி தீ³பேதி. தஸ்மிம் அத⁴ம்மதி³ட்டி², பே⁴தே³ அத⁴ம்மதி³ட்டி², வினிதா⁴ய தி³ட்டி²ம், வினிதா⁴ய க²ந்திம், வினிதா⁴ய ருசிம், வினிதா⁴ய பா⁴வம், அனுஸ்ஸாவேதி, ஸலாகம் கா³ஹேதி – ‘அயம் த⁴ம்மோ, அயம் வினயோ, இத³ம் ஸத்து²ஸாஸனம், இமம் க³ண்ஹத², இமம் ரோசேதா²’தி. அயம்பி கோ², உபாலி, ஸங்க⁴பே⁴த³கோ ஆபாயிகோ, நேரயிகோ, கப்பட்டோ², அதேகிச்சோ².

‘‘புன சபரம், உபாலி, பி⁴க்கு² அத⁴ம்மம் த⁴ம்மோதி தீ³பேதி. தஸ்மிம் அத⁴ம்மதி³ட்டி², பே⁴தே³ த⁴ம்மதி³ட்டி², வினிதா⁴ய தி³ட்டி²ம், வினிதா⁴ய க²ந்திம், வினிதா⁴ய ருசிம், வினிதா⁴ய பா⁴வம், அனுஸ்ஸாவேதி, ஸலாகம் கா³ஹேதி – ‘அயம் த⁴ம்மோ, அயம் வினயோ, இத³ம் ஸத்து²ஸாஸனம், இமம் க³ண்ஹத², இமம் ரோசேதா²’தி. அயம்பி கோ², உபாலி, ஸங்க⁴பே⁴த³கோ ஆபாயிகோ, நேரயிகோ, கப்பட்டோ², அதேகிச்சோ².

‘‘புன சபரம், உபாலி, பி⁴க்கு² அத⁴ம்மம் த⁴ம்மோதி தீ³பேதி. தஸ்மிம் அத⁴ம்மதி³ட்டி², பே⁴தே³ வேமதிகோ, வினிதா⁴ய தி³ட்டி²ம், வினிதா⁴ய க²ந்திம், வினிதா⁴ய ருசிம், வினிதா⁴ய பா⁴வம், அனுஸ்ஸாவேதி, ஸலாகம் கா³ஹேதி – ‘அயம் த⁴ம்மோ, அயம் வினயோ, இத³ம் ஸத்து²ஸாஸனம், இமம் க³ண்ஹத², இமம் ரோசேதா²’தி. அயம்பி கோ², உபாலி, ஸங்க⁴பே⁴த³கோ ஆபாயிகோ, நேரயிகோ, கப்பட்டோ², அதேகிச்சோ².

‘‘புன சபரம், உபாலி, பி⁴க்கு² அத⁴ம்மம் த⁴ம்மோதி தீ³பேதி. தஸ்மிம் த⁴ம்மதி³ட்டி², பே⁴தே³ அத⁴ம்மதி³ட்டி²…பே… (தஸ்மிம் த⁴ம்மதி³ட்டி² பே⁴தே³ த⁴ம்மதி³ட்டி²) [( ) ஸ்யாமபோத்த²கே நத்தி², விமதிவினோத³னீடீகாய ஸமேதி]. தஸ்மிம் த⁴ம்மதி³ட்டி² பே⁴தே³ வேமதிகோ. தஸ்மிம் வேமதிகோ பே⁴தே³ அத⁴ம்மதி³ட்டி². தஸ்மிம் வேமதிகோ பே⁴தே³ த⁴ம்மதி³ட்டி². தஸ்மிம் வேமதிகோ பே⁴தே³ வேமதிகோ வினிதா⁴ய தி³ட்டி²ம், வினிதா⁴ய க²ந்திம், வினிதா⁴ய ருசிம், வினிதா⁴ய பா⁴வம், அனுஸ்ஸாவேதி, ஸலாகம் கா³ஹேதி – ‘அயம் த⁴ம்மோ, அயம் வினயோ, இத³ம் ஸத்து²ஸாஸனம், இமம் க³ண்ஹத², இமம் ரோசேதா²’தி. அயம்பி கோ², உபாலி, ஸங்க⁴பே⁴த³கோ ஆபாயிகோ, நேரயிகோ, கப்பட்டோ², அதேகிச்சோ².

‘‘புன சபரம், உபாலி, பி⁴க்கு² த⁴ம்மம் அத⁴ம்மோதி தீ³பேதி…பே… அவினயம் வினயோதி தீ³பேதி… வினயம் அவினயோதி தீ³பேதி… அபா⁴ஸிதம் அலபிதம் ததா²க³தேன பா⁴ஸிதம் லபிதம் ததா²க³தேனாதி தீ³பேதி… பா⁴ஸிதம் லபிதம் ததா²க³தேன அபா⁴ஸிதம் அலபிதம் ததா²க³தேனாதி தீ³பேதி… அனாசிண்ணம் ததா²க³தேன ஆசிண்ணம் ததா²க³தேனாதி தீ³பேதி… ஆசிண்ணம் ததா²க³தேன அனாசிண்ணம் ததா²க³தேனாதி தீ³பேதி… அபஞ்ஞத்தம் ததா²க³தேன பஞ்ஞத்தம் ததா²க³தேனாதி தீ³பேதி… பஞ்ஞத்தம் ததா²க³தேன அபஞ்ஞத்தம் ததா²க³தேனாதி தீ³பேதி… அனாபத்திம் ஆபத்தீதி தீ³பேதி… ஆபத்திம் அனாபத்தீதி தீ³பேதி… லஹுகம் ஆபத்திம் க³ருகா ஆபத்தீதி தீ³பேதி… க³ருகம் ஆபத்திம் லஹுகா ஆபத்தீதி தீ³பேதி… ஸாவஸேஸம் ஆபத்திம் அனவஸேஸா ஆபத்தீதி தீ³பேதி… அனவஸேஸம் ஆபத்திம் ஸாவஸேஸா ஆபத்தீதி தீ³பேதி… து³ட்டு²ல்லம் ஆபத்திம் அது³ட்டு²ல்லா ஆபத்தீதி தீ³பேதி… அது³ட்டு²ல்லம் ஆபத்திம் து³ட்டு²ல்லா ஆபத்தீதி தீ³பேதி… தஸ்மிம் அத⁴ம்மதி³ட்டி², பே⁴தே³ அத⁴ம்மதி³ட்டி²…பே… தஸ்மிம் அத⁴ம்மதி³ட்டி², பே⁴தே³ த⁴ம்மதி³ட்டி² … தஸ்மிம் அத⁴ம்மதி³ட்டி², பே⁴தே³ வேமதிகோ… தஸ்மிம் த⁴ம்மதி³ட்டி², பே⁴தே³ அத⁴ம்மதி³ட்டி²… (தஸ்மிம் த⁴ம்மதி³ட்டி², பே⁴தே³ த⁴ம்மதி³ட்டி²) [( ) ஸ்யாமபோத்த²கே நத்தி²] … தஸ்மிம் த⁴ம்மதி³ட்டி², பே⁴தே³ வேமதிகோ… தஸ்மிம் வேமதிகோ, பே⁴தே³ அத⁴ம்மதி³ட்டி²… தஸ்மிம் வேமதிகோ, பே⁴தே³ த⁴ம்மதி³ட்டி²… தஸ்மிம் வேமதிகோ, பே⁴தே³ வேமதிகோ, வினிதா⁴ய தி³ட்டி²ம், வினிதா⁴ய க²ந்திம், வினிதா⁴ய ருசிம், வினிதா⁴ய பா⁴வம், அனுஸ்ஸாவேதி, ஸலாகம் கா³ஹேதி – ‘அயம் த⁴ம்மோ, அயம் வினயோ, இத³ம் ஸத்து²ஸாஸனம், இமம் க³ண்ஹத², இமம் ரோசேதா²’தி. அயம்பி கோ², உபாலி, ஸங்க⁴பே⁴த³கோ ஆபாயிகோ, நேரயிகோ, கப்பட்டோ², அதேகிச்சோ²’’தி.

‘‘கதமோ பன, ப⁴ந்தே, ஸங்க⁴பே⁴த³கோ ந ஆபாயிகோ, ந நேரயிகோ, ந கப்பட்டோ², ந அதேகிச்சோ²’’தி? ‘‘இது⁴பாலி, பி⁴க்கு² அத⁴ம்மம் த⁴ம்மோதி தீ³பேதி. தஸ்மிம் த⁴ம்மதி³ட்டி², பே⁴தே³ த⁴ம்மதி³ட்டி², அவினிதா⁴ய தி³ட்டி²ம், அவினிதா⁴ய க²ந்திம், அவினிதா⁴ய ருசிம், அவினிதா⁴ய பா⁴வம், அனுஸ்ஸாவேதி, ஸலாகம் கா³ஹேதி – ‘அயம் த⁴ம்மோ, அயம் வினயோ, இத³ம் ஸத்து²ஸாஸனம், இமம் க³ண்ஹத², இமம் ரோசேதா²’தி. அயம்பி கோ², உபாலி, ஸங்க⁴பே⁴த³கோ ந ஆபாயிகோ, ந நேரயிகோ, ந கப்பட்டோ², ந அதேகிச்சோ².

‘‘புன சபரம், உபாலி, பி⁴க்கு² த⁴ம்மம் அத⁴ம்மோதி தீ³பேதி…பே… து³ட்டு²ல்லம் ஆபத்திம் அது³ட்டு²ல்லா ஆபத்தீதி தீ³பேதி. தஸ்மிம் த⁴ம்மதி³ட்டி², பே⁴தே³ த⁴ம்மதி³ட்டி², அவினிதா⁴ய தி³ட்டி²ம், அவினிதா⁴ய க²ந்திம், அவினிதா⁴ய ருசிம், அவினிதா⁴ய பா⁴வம், அனுஸ்ஸாவேதி, ஸலாகம் கா³ஹேதி – ‘அயம் த⁴ம்மோ, அயம் வினயோ, இத³ம் ஸத்து²ஸாஸனம், இமம் க³ண்ஹத², இமம் ரோசேதா²’தி. அயம்பி கோ², உபாலி, ஸங்க⁴பே⁴த³கோ ந ஆபாயிகோ, ந நேரயிகோ, ந கப்பட்டோ², ந அதேகிச்சோ²’’தி.

ததியபா⁴ணவாரோ நிட்டி²தோ.

ஸங்க⁴பே⁴த³கக்க²ந்த⁴கோ ஸத்தமோ.

தஸ்ஸுத்³தா³னம் –

அனுபியே அபி⁴ஞ்ஞாதா, ஸுகு²மாலோ ந இச்ச²தி;

கஸா வபா அபி⁴ நின்னே, நித்³தா⁴ லாவே ச உப்³ப³ஹே.

புஞ்ஜமத்³த³பலாலஞ்ச, பு⁴ஸஓபு²ணனீஹரே;

ஆயதிம்பி ந கீ²யந்தி, பிதரோ ச பிதாமஹா.

ப⁴த்³தி³யோ அனுருத்³தோ⁴ ச, ஆனந்தோ³ ப⁴கு³ கிமிலோ;

ஸக்யமானோ ச கோஸம்பி³ம், பரிஹாயி ககுதே⁴ன ச.

பகாஸேஸி பிதுனோ ச, புரிஸே ஸிலம் நாளாகி³ரிம்;

திகபஞ்சக³ருகோ கோ², பி⁴ந்தி³ து²ல்லச்சயேன ச;

தயோ அட்ட² புன தீணி, ராஜி பே⁴தா³ ஸியா நு கோ²தி.

ஸங்க⁴பே⁴த³கக்க²ந்த⁴கம் நிட்டி²தம்.