கு²த்³த³கவத்தூ²னி

243. தேன ஸமயேன பு³த்³தோ⁴ ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன ச²ப்³ப³க்³கி³யா பி⁴க்கூ² நஹாயமானா ருக்கே² காயம் உக்³க⁴ம்ஸேந்தி, ஊரும்பி பா³ஹும்பி உரம்பி பிட்டி²ம்பி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸமணா ஸக்யபுத்தியா நஹாயமானா ருக்கே² காயம் உக்³க⁴ம்ஸேஸ்ஸந்தி, ஊரும்பி பா³ஹும்பி உரம்பி பிட்டி²ம்பி, ஸேய்யதா²பி மல்லமுட்டி²கா கா³மமோத்³த³வா’’தி [கா³மபோத்³த³வா (ஸீ.), கா³மபூதவா (ஸ்யா.)]! அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே பி⁴க்கு²ஸங்க⁴ம் ஸன்னிபாதாபேத்வா பி⁴க்கூ² படிபுச்சி² – ‘‘ஸச்சம் கிர, பி⁴க்க²வே, ச²ப்³ப³க்³கி³யா பி⁴க்கூ² நஹாயமானா ருக்கே² காயம் உக்³க⁴ம்ஸேந்தி, ஊரும்பி பா³ஹும்பி உரம்பி பிட்டி²ம்பீ’’தி? ‘‘ஸச்சம் ப⁴க³வா’’தி. விக³ரஹி பு³த்³தோ⁴ ப⁴க³வா – ‘‘அனனுச்ச²விகம், பி⁴க்க²வே, தேஸம் மோக⁴புரிஸானம் அனனுலோமிகம் அப்பதிரூபம் அஸ்ஸாமணகம் அகப்பியம் அகரணீயம். கத²ஞ்ஹி நாம தே, பி⁴க்க²வே, மோக⁴புரிஸா நஹாயமானா ருக்கே² காயம் உக்³க⁴ம்ஸேஸ்ஸந்தி, ஊரும்பி பா³ஹும்பி உரம்பி பிட்டி²ம்பி? நேதம், பி⁴க்க²வே, அப்பஸன்னானம் வா பஸாதா³ய…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘ந, பி⁴க்க²வே, நஹாயமானேன பி⁴க்கு²னா ருக்கே² காயோ உக்³க⁴ம்ஸேதப்³போ³. யோ உக்³க⁴ம்ஸேய்ய, ஆபத்தி து³க்கடஸ்ஸா’’தி.

தேன கோ² பன ஸமயேன ச²ப்³ப³க்³கி³யா பி⁴க்கூ² நஹாயமானா த²ம்பே⁴ காயம் உக்³க⁴ம்ஸேந்தி, ஊரும்பி பா³ஹும்பி உரம்பி பிட்டி²ம்பி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸமணா ஸக்யபுத்தியா நஹாயமானா த²ம்பே⁴ காயம் உக்³க⁴ம்ஸேஸ்ஸந்தி, ஊரும்பி பா³ஹும்பி உரம்பி பிட்டி²ம்பி, ஸேய்யதா²பி மல்லமுட்டி²கா கா³மமோத்³த³வா’’தி! அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் ப⁴க³வா’’தி…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘ந, பி⁴க்க²வே, நஹாயமானேன பி⁴க்கு²னா த²ம்பே⁴ காயோ உக்³க⁴ம்ஸேதப்³போ³. யோ உக்³க⁴ம்ஸேய்ய, ஆபத்தி து³க்கடஸ்ஸா’’தி.

தேன கோ² பன ஸமயேன ச²ப்³ப³க்³கி³யா பி⁴க்கூ² நஹாயமானா குட்டே [குட்³டே³ (ஸீ. ஸ்யா.)] காயம் உக்³க⁴ம்ஸேந்தி, ஊரும்பி பா³ஹும்பி உரம்பி பிட்டி²ம்பி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸமணா ஸக்யபுத்தியா நஹாயமானா குட்டே காயம் உக்³க⁴ம்ஸேஸ்ஸந்தி, ஊரும்பி பா³ஹும்பி உரம்பி பிட்டி²ம்பி, ஸேய்யதா²பி மல்லமுட்டி²கா கா³மமோத்³த³வா’’தி…பே… ‘‘ந, பி⁴க்க²வே, நஹாயமானேன பி⁴க்கு²னா குட்டே காயோ உக்³க⁴ம்ஸேதப்³போ³. யோ உக்³க⁴ம்ஸேய்ய, ஆபத்தி து³க்கடஸ்ஸா’’தி.

தேன கோ² பன ஸமயேன ச²ப்³ப³க்³கி³யா பி⁴க்கூ² அட்டானே [அட்டா²னே (ஸீ. ஸ்யா.)] நஹாயந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி…பே… ஸேய்யதா²பி கி³ஹீ காமபோ⁴கி³னோதி! அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²யந்தானம் விபாசேந்தானம். அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் ப⁴க³வா’’தி…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘ந, பி⁴க்க²வே, அட்டானே நஹாயிதப்³ப³ம். யோ நஹாயேய்ய, ஆபத்தி து³க்கடஸ்ஸா’’தி.

தேன கோ² பன ஸமயேன ச²ப்³ப³க்³கி³யா பி⁴க்கூ² க³ந்த⁴ப்³ப³ஹத்த²கேன நஹாயந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி…பே… ஸேய்யதா²பி கி³ஹீ காமபோ⁴கி³னோதி! அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும்…பே… ‘‘ந, பி⁴க்க²வே, க³ந்த⁴ப்³ப³ஹத்த²கேன நஹாயிதப்³ப³ம். யோ நஹாயேய்ய, ஆபத்தி து³க்கடஸ்ஸா’’தி.

தேன கோ² பன ஸமயேன ச²ப்³ப³க்³கி³யா பி⁴க்கூ² குருவிந்த³கஸுத்தியா நஹாயந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி…பே… ஸேய்யதா²பி கி³ஹீ காமபோ⁴கி³னோதி! ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, குருவிந்த³கஸுத்தியா நஹாயிதப்³ப³ம். யோ நஹாயேய்ய, ஆபத்தி து³க்கடஸ்ஸா’’தி.

தேன கோ² பன ஸமயேன ச²ப்³ப³க்³கி³யா பி⁴க்கூ² விக்³க³ய்ஹ பரிகம்மம் காராபேந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி…பே… ஸேய்யதா²பி கி³ஹீ காமபோ⁴கி³னோதி! ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, விக்³க³ய்ஹ பரிகம்மம் காராபேதப்³ப³ம். யோ காராபேய்ய, ஆபத்தி து³க்கடஸ்ஸா’’தி.

தேன கோ² பன ஸமயேன ச²ப்³ப³க்³கி³யா பி⁴க்கூ² மல்லகேன நஹாயந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி…பே… ஸேய்யதா²பி கி³ஹீ காமபோ⁴கி³னோதி! ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, மல்லகேன நஹாயிதப்³ப³ம். யோ நஹாயேய்ய, ஆபத்தி து³க்கடஸ்ஸா’’தி.

244. தேன கோ² பன ஸமயேன அஞ்ஞதரஸ்ஸ பி⁴க்கு²னோ கச்சு²ரோகா³பா³தோ⁴ ஹோதி. ந தஸ்ஸ வினா மல்லகேன பா²ஸு ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, கி³லானஸ்ஸ அகதமல்லக’’ந்தி.

தேன கோ² பன ஸமயேன அஞ்ஞதரோ பி⁴க்கு² ஜராது³ப்³ப³லோ நஹாயமானோ ந ஸக்கோதி அத்தனோ காயம் உக்³க⁴ம்ஸேதும். ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, உக்காஸிக’’ந்தி.

தேன கோ² பன ஸமயேன பி⁴க்கூ² பிட்டி²பரிகம்மம் காதும் குக்குச்சாயந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, புது²பாணிக’’ந்தி.

245. தேன கோ² பன ஸமயேன ச²ப்³ப³க்³கி³யா பி⁴க்கூ² வல்லிகம் தா⁴ரேந்தி…பே… பாமங்க³ம் தா⁴ரேந்தி…பே… கண்ட²ஸுத்தகம் தா⁴ரேந்தி…பே… கடிஸுத்தகம் தா⁴ரேந்தி…பே… ஓவட்டிகம் தா⁴ரேந்தி…பே… காயுரம் தா⁴ரேந்தி…பே… ஹத்தா²ப⁴ரணம் தா⁴ரேந்தி…பே… அங்கு³லிமுத்³தி³கம் தா⁴ரேந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி…பே… ஸேய்யதா²பி கி³ஹீ காமபோ⁴கி³னோதி! அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும். ‘‘ஸச்சம் கிர, பி⁴க்க²வே, ச²ப்³ப³க்³கி³யா பி⁴க்கூ² வல்லிகம் தா⁴ரேந்தி…பே… பாமங்க³ம் தா⁴ரேந்தி, கண்ட²ஸுத்தகம் தா⁴ரேந்தி, கடிஸுத்தகம் தா⁴ரேந்தி, ஓவட்டிகம் தா⁴ரேந்தி, காயுரம் தா⁴ரேந்தி, ஹத்தா²ப⁴ரணம் தா⁴ரேந்தி, அங்கு³லிமுத்³தி³கம் தா⁴ரேந்தீ’’தி? ‘‘ஸச்சம் ப⁴க³வா’’தி…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘ந, பி⁴க்க²வே, வல்லிகா தா⁴ரேதப்³பா³…பே… ந பாமங்கோ³ தா⁴ரேதப்³போ³… ந கண்ட²ஸுத்தகம் தா⁴ரேதப்³ப³ம்… ந கடிஸுத்தகம் தா⁴ரேதப்³ப³ம்… ந ஓவட்டிகம் தா⁴ரேதப்³ப³ம்… ந காயுரம் தா⁴ரேதப்³ப³ம்… ந ஹத்தா²ப⁴ரணம் தா⁴ரேதப்³ப³ம்… ந அங்கு³லிமுத்³தி³கா தா⁴ரேதப்³பா³. யோ தா⁴ரேய்ய, ஆபத்தி து³க்கடஸ்ஸா’’தி.

246. தேன கோ² பன ஸமயேன ச²ப்³ப³க்³கி³யா பி⁴க்கூ² தீ³கே⁴ கேஸே தா⁴ரேந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ஸேய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, தீ³கா⁴ கேஸா தா⁴ரேதப்³பா³. யோ தா⁴ரேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, து³மாஸிகம் வா து³வங்கு³லம் வா’’தி.

தேன கோ² பன ஸமயேன ச²ப்³ப³க்³கி³யா பி⁴க்கூ² கோச்சே²ன கேஸே ஓஸண்டே²ந்தி [ஓஸண்ஹேந்தி (ஸீ. ஸ்யா.)] …பே… ப²ணகேன கேஸே ஓஸண்டே²ந்தி, ஹத்த²ப²ணகேன கேஸே ஓஸண்டே²ந்தி, ஸித்த²தேலகேன கேஸே ஓஸண்டே²ந்தி, உத³கதேலகேன கேஸே ஓஸண்டே²ந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ஸேய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, கோச்சே²ன கேஸா ஓஸண்டே²தப்³பா³…பே… ந ஸித்த²தேலகேன கேஸா ஓஸண்டே²தப்³பா³… ந உத³கதேலகேன கேஸா ஓஸண்டே²தப்³பா³. யோ ஓஸண்டே²ய்ய, ஆபத்தி து³க்கடஸ்ஸா’’தி.

247. தேன கோ² பன ஸமயேன ச²ப்³ப³க்³கி³யா பி⁴க்கூ² ஆதா³ஸேபி உத³கபத்தேபி முக²னிமித்தம் ஓலோகேந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ஸேய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, ஆதா³ஸே வா உத³கபத்தே வா முக²னிமித்தம் ஓலோகேதப்³ப³ம். யோ ஓலோகேய்ய, ஆபத்தி து³க்கடஸ்ஸா’’தி.

தேன கோ² பன ஸமயேன அஞ்ஞதரஸ்ஸ பி⁴க்கு²னோ முகே² வணோ ஹோதி. ஸோ பி⁴க்கூ² புச்சி² – ‘‘கீதி³ஸோ மே, ஆவுஸோ, வணோ’’தி? பி⁴க்கூ² ஏவமாஹம்ஸு – ‘‘ஏதி³ஸோ தே, ஆவுஸோ வணோ’’தி. ஸோ ந ஸத்³த³ஹதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, ஆபா³த⁴ப்பச்சயா ஆதா³ஸே வா உத³கபத்தே வா முக²னிமித்தம் ஓலோகேது’’ந்தி.

தேன கோ² பன ஸமயேன ச²ப்³ப³க்³கி³யா பி⁴க்கூ² முக²ம் ஆலிம்பந்தி…பே… முக²ம் உம்மத்³தே³ந்தி, முக²ம் சுண்ணேந்தி, மனோஸிலிகாய முக²ம் லஞ்சே²ந்தி, அங்க³ராக³ம் கரோந்தி, முக²ராக³ம் கரோந்தி, அங்க³ராக³முக²ராக³ம் கரோந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ஸேய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, முக²ம் ஆலிம்பிதப்³ப³ம்…பே… ந முக²ம் உம்மத்³தி³தப்³ப³ம், ந முக²ம் சுண்ணேதப்³ப³ம், ந மனோஸிலிகாய முக²ம் லஞ்சே²தப்³ப³ம், ந அங்க³ராகோ³ காதப்³போ³, ந முக²ராகோ³ காதப்³போ³, ந அங்க³ராக³முக²ராகோ³ காதப்³போ³. யோ கரேய்ய, ஆபத்தி து³க்கடஸ்ஸா’’தி.

தேன கோ² பன ஸமயேன அஞ்ஞதரஸ்ஸ பி⁴க்கு²னோ சக்கு²ரோகா³பா³தோ⁴ ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, ஆபா³த⁴ப்பச்சயா முக²ம் ஆலிம்பிது’’ந்தி.

248. தேன கோ² பன ஸமயேன ராஜக³ஹே கி³ரக்³க³ஸமஜ்ஜோ [ஸமஜ்ஜா (அபி⁴தா⁴னக³ந்தே²ஸு)] ஹோதி. ச²ப்³ப³க்³கி³யா பி⁴க்கூ² கி³ரக்³க³ஸமஜ்ஜம் த³ஸ்ஸனாய அக³மம்ஸு. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸமணா ஸக்யபுத்தியா நச்சம்பி கீ³தம்பி வாதி³தம்பி த³ஸ்ஸனாய க³ச்சி²ஸ்ஸந்தி, ஸேய்யதா²பி கி³ஹீ காமபோ⁴கி³னோ’’தி! ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, நச்சம் வா கீ³தம் வா வாதி³தம் வா த³ஸ்ஸனாய க³ந்தப்³ப³ம். யோ க³ச்சே²ய்ய, ஆபத்தி து³க்கடஸ்ஸா’’தி.

249. தேன கோ² பன ஸமயேன ச²ப்³ப³க்³கி³யா பி⁴க்கூ² ஆயதகேன கீ³தஸ்ஸரேன த⁴ம்மம் கா³யந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘யதே²வ [யதா² ச (க.)] மயம் கா³யாம, ஏவமேவிமே ஸமணா ஸக்யபுத்தியா ஆயதகேன கீ³தஸ்ஸரேன த⁴ம்மம் கா³யந்தீ’’தி! அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² ஆயதகேன கீ³தஸ்ஸரேன த⁴ம்மம் கா³யிஸ்ஸந்தீ’’தி! அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும். ‘‘ஸச்சம் கிர, பி⁴க்க²வே…பே… ‘‘ஸச்சம் ப⁴க³வா’’தி…பே… த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘பஞ்சிமே, பி⁴க்க²வே, ஆதீ³னவா ஆயதகேன கீ³தஸ்ஸரேன த⁴ம்மம் கா³யந்தஸ்ஸ. அத்தனாபி தஸ்மிம் ஸரே ஸாரஜ்ஜதி, பரேபி தஸ்மிம் ஸரே ஸாரஜ்ஜந்தி, க³ஹபதிகாபி உஜ்ஜா²யந்தி, ஸரகுத்திம்பி நிகாமயமானஸ்ஸ ஸமாதி⁴ஸ்ஸ ப⁴ங்கோ³ ஹோதி, பச்சி²மா ஜனதா தி³ட்டா²னுக³திம் ஆபஜ்ஜதி – இமே கோ², பி⁴க்க²வே, பஞ்ச ஆதீ³னவா ஆயதகேன கீ³தஸ்ஸரேன த⁴ம்மம் கா³யந்தஸ்ஸ. ந, பி⁴க்க²வே, ஆயதகேன கீ³தஸ்ஸரேன த⁴ம்மோ கா³யிதப்³போ³. யோ கா³யேய்ய, ஆபத்தி து³க்கடஸ்ஸா’’தி.

தேன கோ² பன ஸமயேன பி⁴க்கூ² ஸரப⁴ஞ்ஞே குக்குச்சாயந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, ஸரப⁴ஞ்ஞ’’ந்தி.

‘‘தேன கோ² பன ஸமயேன ச²ப்³ப³க்³கி³யா பி⁴க்கூ² பா³ஹிரலோமிம் [பா³ஹியலோமிம் (க.)] உண்ணிம் தா⁴ரேந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ஸேய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, பா³ஹியலோமி உண்ணி தா⁴ரேதப்³பா³. யோ தா⁴ரேய்ய, ஆபத்தி து³க்கடஸ்ஸா’’தி.

250. தேன கோ² பன ஸமயேன ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ ஆராமே அம்பா³ ப²லினோ ஹோந்தி. ரஞ்ஞா மாக³தே⁴ன ஸேனியேன பி³ம்பி³ஸாரேன அனுஞ்ஞாதம் ஹோதி – ‘‘யதா²ஸுக²ம் அய்யா அம்ப³ம் பரிபு⁴ஞ்ஜந்தூ’’தி. ச²ப்³ப³க்³கி³யா பி⁴க்கூ² தருணஞ்ஞேவ அம்ப³ம் பாதாபேத்வா பரிபு⁴ஞ்ஜிம்ஸு. ரஞ்ஞோ ச மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ அம்பே³ன அத்தோ² ஹோதி. அத² கோ² ராஜா மாக³தோ⁴ ஸேனியோ பி³ம்பி³ஸாரோ மனுஸ்ஸே ஆணாபேஸி – ‘‘க³ச்ச²த², ப⁴ணே, ஆராமம் க³ந்த்வா அம்ப³ம் ஆஹரதா²’’தி. ‘‘ஏவம் தே³வா’’தி கோ² தே மனுஸ்ஸா ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ படிஸ்ஸுத்வா ஆராமம் க³ந்த்வா ஆராமபாலம் ஏதத³வோசும் – ‘‘தே³வஸ்ஸ, ப⁴ணே, அம்பே³ன அத்தோ², அம்ப³ம் தே³தா²’’தி. ‘‘நத்தா²ய்யா அம்ப³ம். தருணஞ்ஞேவ அம்ப³ம் பாதாபேத்வா பி⁴க்கூ² பரிபு⁴ஞ்ஜிம்ஸூ’’தி. அத² கோ² தே மனுஸ்ஸா ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ ஏதமத்த²ம் ஆரோசேஸும். ‘‘ஸுபரிபு⁴த்தம், ப⁴ணே, அய்யேஹி அம்ப³ம், அபி ச ப⁴க³வதா மத்தா வண்ணிதா’’தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸமணா ஸக்யபுத்தியா ந மத்தம் ஜானித்வா ரஞ்ஞோ அம்ப³ம் பரிபு⁴ஞ்ஜிஸ்ஸந்தீ’’தி! அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, அம்ப³ம் பரிபு⁴ஞ்ஜிதப்³ப³ம். யோ பரிபு⁴ஞ்ஜேய்ய, ஆபத்தி து³க்கடஸ்ஸா’’தி.

தேன கோ² பன ஸமயேன அஞ்ஞதரஸ்ஸ பூக³ஸ்ஸ ஸங்க⁴ப⁴த்தம் ஹோதி. ஸூபே அம்ப³பேஸிகாயோ பக்கி²த்தா ஹோந்தி. பி⁴க்கூ² குக்குச்சாயந்தா நப்படிக்³க³ண்ஹந்தி. ‘‘படிக்³க³ண்ஹத², பி⁴க்க²வே, பரிபு⁴ஞ்ஜத². அனுஜானாமி, பி⁴க்க²வே, அம்ப³பேஸிக’’ந்தி.

தேன கோ² பன ஸமயேன அஞ்ஞதரஸ்ஸ பூக³ஸ்ஸ ஸங்க⁴ப⁴த்தம் ஹோதி. தே ந பரியாபுணிம்ஸு அம்ப³பேஸிகம் காதும், ப⁴த்தக்³கே³ ஸகலேஹேவ அம்பே³ஹி தே³ந்தி. பி⁴க்கூ² குக்குச்சாயந்தா நப்படிக்³க³ண்ஹந்தி. ‘‘படிக்³க³ண்ஹத², பி⁴க்க²வே, பரிபு⁴ஞ்ஜத². அனுஜானாமி, பி⁴க்க²வே, பஞ்சஹி ஸமணகப்பேஹி ப²லம் பரிபு⁴ஞ்ஜிதும் – அக்³கி³பரிசிதம், ஸத்த²பரிசிதம், நக²பரிசிதம், அபீ³ஜம், நிப்³ப³த்தபீ³ஜஞ்ஞேவ [நிப்³ப³ட்டபீ³ஜம் (ஸீ. ஸ்யா.)] பஞ்சமம். அனுஜானாமி, பி⁴க்க²வே, இமேஹி பஞ்சஹி ஸமணகப்பேஹி ப²லம் பரிபு⁴ஞ்ஜிது’’ந்தி.

251. தேன கோ² பன ஸமயேன அஞ்ஞதரோ பி⁴க்கு² அஹினா த³ட்டோ² காலங்கதோ ஹோதி. ப⁴க³வதோ ஏதமத்த²ம் ஆரோசேஸும். ‘‘ந ஹி நூன ஸோ, பி⁴க்க²வே, பி⁴க்கு² இமானி சத்தாரி அஹிராஜகுலானி மேத்தேன சித்தேன ப²ரி. ஸசே ஹி ஸோ, பி⁴க்க²வே, பி⁴க்கு² இமானி சத்தாரி அஹிராஜகுலானி மேத்தேன சித்தேன ப²ரேய்ய, ந ஹி ஸோ, பி⁴க்க²வே, பி⁴க்கு² அஹினா த³ட்டோ² காலங்கரேய்ய. கதமானி சத்தாரி அஹிராஜகுலானி? விரூபக்க²ம் அஹிராஜகுலம், ஏராபத²ம் அஹிராஜகுலம், ச²ப்³யாபுத்தம் அஹிராஜகுலம், கண்ஹாகோ³தமம் அஹிராஜகுலம். ந ஹி நூன ஸோ, பி⁴க்க²வே, பி⁴க்கு² இமானி சத்தாரி அஹிராஜகுலானி மேத்தேன சித்தேன ப²ரி. ஸசே ஹி ஸோ, பி⁴க்க²வே, பி⁴க்கு² இமானி சத்தாரி அஹிராஜகுலானி மேத்தேன சித்தேன ப²ரேய்ய, ந ஹி ஸோ, பி⁴க்க²வே, பி⁴க்கு² அஹினா த³ட்டோ² காலங்கரேய்ய. அனுஜானாமி, பி⁴க்க²வே, இமானி சத்தாரி அஹிராஜகுலானி மேத்தேன சித்தேன ப²ரிதும், அத்தகு³த்தியா அத்தரக்கா²ய அத்தபரித்தம் காதும். ஏவஞ்ச பன, பி⁴க்க²வே, காதப்³ப³ம் –

[ஜா. 1.2.105-106; அ. நி. 4.67 இத³ம் வத்து² ஆக³தம்] ‘‘விரூபக்கே²ஹி மே மேத்தம், மேத்தம் ஏராபதே²ஹி மே;

ச²ப்³யாபுத்தேஹி மே மேத்தம், மேத்தம் கண்ஹாகோ³தமகேஹி ச.

‘‘அபாத³கேஹி மே மேத்தம், மேத்தம் த்³விபாத³கேஹி மே;

சதுப்பதே³ஹி மே மேத்தம், மேத்தம் ப³ஹுப்பதே³ஹி மே.

‘‘மா மம் அபாத³கோ ஹிம்ஸி, மா மம் ஹிம்ஸி த்³விபாத³கோ;

மா மம் சதுப்பதோ³ ஹிம்ஸி, மா மம் ஹிம்ஸி ப³ஹுப்பதோ³.

‘‘ஸப்³பே³ ஸத்தா ஸப்³பே³ பாணா, ஸப்³பே³ பூ⁴தா ச கேவலா;

ஸப்³பே³ ப⁴த்³ரானி பஸ்ஸந்து, மா கிஞ்சி பாபமாக³மா.

‘‘அப்பமாணோ பு³த்³தோ⁴, அப்பமாணோ த⁴ம்மோ,

அப்பமாணோ ஸங்கோ⁴, பமாணவந்தானி ஸரீஸபானி [ஸிரிம்ஸபானி (ஸீ. ஸ்யா.)].

‘‘அஹி விச்சி²கா ஸதபதீ³, உண்ணனாபி⁴ ஸரபூ³ மூஸிகா;

கதா மே ரக்கா² கதம் மே பரித்தம், படிக்கமந்து பூ⁴தானி.

‘‘ஸோஹம் நமோ ப⁴க³வதோ, நமோ ஸத்தன்னம் ஸம்மாஸம்பு³த்³தா⁴ன’’ந்தி.

தேன கோ² பன ஸமயேன அஞ்ஞதரோ பி⁴க்கு² அனபி⁴ரதியா பீளிதோ அத்தனோ அங்க³ஜாதம் சி²ந்தி³. ப⁴க³வதோ ஏதமத்த²ம் ஆரோசேஸும். ‘‘அஞ்ஞம்ஹி ஸோ, பி⁴க்க²வே, மோக⁴புரிஸோ சே²தப்³ப³ம்ஹி, அஞ்ஞம் சி²ந்தி³. ந, பி⁴க்க²வே, அத்தனோ அங்க³ஜாதம் சே²தப்³ப³ம். யோ சி²ந்தே³ய்ய, ஆபத்தி து²ல்லச்சயஸ்ஸா’’தி.

252. தேன கோ² பன ஸமயேன ராஜக³ஹகஸ்ஸ ஸேட்டி²ஸ்ஸ மஹக்³க⁴ஸ்ஸ சந்த³னஸ்ஸ [சந்த³னஸாரஸ்ஸ (ஸீ. ஸ்யா.)] சந்த³னக³ண்டி² உப்பன்னா ஹோதி. அத² கோ² ராஜக³ஹகஸ்ஸ ஸேட்டி²ஸ்ஸ ஏதத³ஹோஸி – ‘‘யம்னூனாஹம் இமாய சந்த³னக³ண்டி²யா பத்தம் லேகா²பேய்யம். லேக²ஞ்ச மே பரிபோ⁴க³ம் ப⁴விஸ்ஸதி, பத்தஞ்ச தா³னம் த³ஸ்ஸாமீ’’தி. அத² கோ² ராஜக³ஹகோ ஸேட்டி² தாய சந்த³னக³ண்டி²யா பத்தம் லேகா²பேத்வா ஸிக்காய உட்³டி³த்வா [வாஹித்வா (ஸீ.)] வேளக்³கே³ ஆலக்³கே³த்வா வேளுபரம்பராய ப³ந்தி⁴த்வா [வாஹித்வா (ஸ்யா.)] ஏவமாஹ – ‘‘யோ ஸமணோ வா ப்³ராஹ்மணோ வா அரஹா சேவ இத்³தி⁴மா ச தி³ன்னம்யேவ பத்தம் ஓஹரதூ’’தி. அத² கோ² பூரணோ கஸ்ஸபோ யேன ராஜக³ஹகோ ஸேட்டி² தேனுபஸங்கமி, உபஸங்கமித்வா ராஜக³ஹகம் ஸேட்டி²ம் ஏதத³வோச – ‘‘அஹஞ்ஹி, க³ஹபதி, அரஹா சேவ இத்³தி⁴மா ச, தே³ஹி மே பத்த’’ந்தி. ‘‘ஸசே, ப⁴ந்தே, ஆயஸ்மா அரஹா சேவ இத்³தி⁴மா ச தி³ன்னம்யேவ பத்தம் ஓஹரதூ’’தி. அத² கோ² மக்க²லி கோ³ஸாலோ… அஜிதோ கேஸகம்ப³லோ… பகுதோ⁴ கச்சாயனோ… ஸஞ்சயோ பே³லட்ட²புத்தோ [ஸஞ்ஜயோ பே³ல்லட்டி²புத்தோ (ஸீ.)] … நிக³ண்டோ² நாடபுத்தோ [நாத²புத்தோ (ஸீ.)] யேன ராஜக³ஹகோ ஸேட்டி² தேனுபஸங்கமி, உபஸங்கமித்வா ராஜக³ஹகம் ஸேட்டி²ம் ஏதத³வோச – ‘‘அஹஞ்ஹி, க³ஹபதி, அரஹா சேவ இத்³தி⁴மா ச, தே³ஹி மே பத்த’’ந்தி. ‘‘ஸசே, ப⁴ந்தே, ஆயஸ்மா அரஹா சேவ இத்³தி⁴மா ச, தி³ன்னம்யேவ பத்தம் ஓஹரதூ’’தி.

தேன கோ² பன ஸமயேன ஆயஸ்மா ச மஹாமோக்³க³ல்லானோ ஆயஸ்மா ச பிண்டோ³லபா⁴ரத்³வாஜோ புப்³ப³ண்ஹஸமயம் நிவாஸேத்வா பத்தசீவரமாதா³ய ராஜக³ஹம் பிண்டா³ய பவிஸிம்ஸு. அத² கோ² ஆயஸ்மா பிண்டோ³லபா⁴ரத்³வாஜோ ஆயஸ்மந்தம் மஹாமோக்³க³ல்லானம் ஏதத³வோச – ‘‘ஆயஸ்மா கோ² மஹாமோக்³க³ல்லானோ அரஹா சேவ இத்³தி⁴மா ச. க³ச்சா²வுஸோ, மோக்³க³ல்லான, ஏதம் பத்தம் ஓஹர. துய்ஹேஸோ பத்தோ’’தி. ‘‘ஆயஸ்மா கோ² பா⁴ரத்³வாஜோ அரஹா சேவ இத்³தி⁴மா ச. க³ச்சா²வுஸோ, பா⁴ரத்³வாஜ, ஏதம் பத்தம் ஓஹர. துய்ஹேஸோ பத்தோ’’தி. அத² கோ² ஆயஸ்மா பிண்டோ³லபா⁴ரத்³வாஜோ வேஹாஸம் அப்³பு⁴க்³க³ந்த்வா தம் பத்தம் க³ஹேத்வா திக்க²த்தும் ராஜக³ஹம் அனுபரியாயி.

தேன கோ² பன ஸமயேன ராஜக³ஹகோ ஸேட்டி² ஸபுத்ததா³ரோ ஸகே நிவேஸனே டி²தோ ஹோதி பஞ்ஜலிகோ நமஸ்ஸமானோ – இதே⁴வ, ப⁴ந்தே, அய்யோ பா⁴ரத்³வாஜோ அம்ஹாகம் நிவேஸனே பதிட்டா²தூதி. அத² கோ² ஆயஸ்மா பிண்டோ³லபா⁴ரத்³வாஜோ ராஜக³ஹகஸ்ஸ ஸேட்டி²ஸ்ஸ நிவேஸனே பதிட்டா²ஸி. அத² கோ² ராஜக³ஹகோ ஸேட்டி² ஆயஸ்மதோ பிண்டோ³லபா⁴ரத்³வாஜஸ்ஸ ஹத்த²தோ பத்தம் க³ஹேத்வா மஹக்³க⁴ஸ்ஸ கா²த³னீயஸ்ஸ பூரேத்வா ஆயஸ்மதோ பிண்டோ³லபா⁴ரத்³வாஜஸ்ஸ அதா³ஸி. அத² கோ² ஆயஸ்மா பிண்டோ³லபா⁴ரத்³வாஜோ தம் பத்தம் க³ஹேத்வா ஆராமம் அக³மாஸி. அஸ்ஸோஸும் கோ² மனுஸ்ஸா – அய்யேன கிர பிண்டோ³லபா⁴ரத்³வாஜேன ராஜக³ஹகஸ்ஸ ஸேட்டி²ஸ்ஸ பத்தோ ஓஹாரிதோதி. தே ச மனுஸ்ஸா உச்சாஸத்³தா³ மஹாஸத்³தா³ ஆயஸ்மந்தம் பிண்டோ³லபா⁴ரத்³வாஜம் பிட்டி²தோ பிட்டி²தோ அனுப³ந்தி⁴ம்ஸு.

அஸ்ஸேஸி கோ² ப⁴க³வா உச்சாஸத்³த³ம் மஹாஸத்³த³ம்; ஸுத்வான ஆயஸ்மந்தம் ஆனந்த³ம் ஆமந்தேஸி – ‘‘கிம் நு கோ² ஸோ, ஆனந்த³, உச்சாஸத்³தோ³ மஹாஸத்³தோ³’’தி? ‘‘ஆயஸ்மதா, ப⁴ந்தே, பிண்டோ³லபா⁴ரத்³வாஜேன ராஜக³ஹகஸ்ஸ ஸேட்டி²ஸ்ஸ பத்தோ ஓஹாரிதோ. அஸ்ஸோஸும் கோ², ப⁴ந்தே, மனுஸ்ஸா – அய்யேன கிர பிண்டோ³லபா⁴ரத்³வாஜேன ராஜக³ஹகஸ்ஸ ஸேட்டி²ஸ்ஸ பத்தோ ஓஹாரிதோதி. தே ச, ப⁴ந்தே, மனுஸ்ஸா உச்சாஸத்³தா³ மஹாஸத்³தா³ ஆயஸ்மந்தம் பிண்டோ³லபா⁴ரத்³வாஜம் பிட்டி²தோ பிட்டி²தோ அனுப³ந்தா⁴. ஸோ ஏஸோ, ப⁴ந்தே, ப⁴க³வா உச்சாஸத்³தோ³ மஹாஸத்³தோ³’’தி. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே பி⁴க்கு²ஸங்க⁴ம் ஸன்னிபாதாபேத்வா ஆயஸ்மந்தம் பிண்டோ³லபா⁴ரத்³வாஜம் படிபுச்சி² – ‘‘ஸச்சம் கிர தயா, பா⁴ரத்³வாஜ, ராஜக³ஹகஸ்ஸ ஸேட்டி²ஸ்ஸ பத்தோ ஓஹாரிதோ’’தி? ‘‘ஸச்சம் ப⁴க³வா’’தி. விக³ரஹி பு³த்³தோ⁴ ப⁴க³வா – ‘‘அனனுச்ச²விகம், பா⁴ரத்³வாஜ, அனனுலோமிகம் அப்பதிரூபம் அஸ்ஸாமணகம் அகப்பியம் அகரணீயம். கத²ஞ்ஹி நாம த்வம், பா⁴ரத்³வாஜ, ச²வஸ்ஸ தா³ருபத்தஸ்ஸ காரணா கி³ஹீனம் உத்தரிமனுஸ்ஸத⁴ம்மம் இத்³தி⁴பாடிஹாரியம் த³ஸ்ஸேஸ்ஸஸி! ஸேய்யதா²பி, பா⁴ரத்³வாஜ, மாதுகா³மோ ச²வஸ்ஸ மாஸகரூபஸ்ஸ காரணா கோபினம் த³ஸ்ஸேதி, ஏவமேவ கோ² தயா, பா⁴ரத்³வாஜ, ச²வஸ்ஸ தா³ருபத்தஸ்ஸ காரணா கி³ஹீனம் உத்தரிமனுஸ்ஸத⁴ம்மம் இத்³தி⁴பாடிஹாரியம் த³ஸ்ஸிதம். நேதம், பா⁴ரத்³வாஜ, அப்பஸன்னானம் வா பஸாதா³ய…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘ந, பி⁴க்க²வே, கி³ஹீனம் உத்தரிமனுஸ்ஸத⁴ம்மம் இத்³தி⁴பாடிஹாரியம் த³ஸ்ஸேதப்³ப³ம். யோ த³ஸ்ஸேய்ய, ஆபத்தி து³க்கடஸ்ஸ. பி⁴ந்த³தே²தம், பி⁴க்க²வே, தா³ருபத்தம் ஸகலிகம் ஸகலிகம் கத்வா, பி⁴க்கூ²னம் அஞ்ஜனுபபிஸனம் தே³த². ந ச, பி⁴க்க²வே, தா³ருபத்தோ தா⁴ரேதப்³போ³. யோ தா⁴ரேய்ய, ஆபத்தி து³க்கடஸ்ஸா’’தி.

தேன கோ² பன ஸமயேன ச²ப்³ப³க்³கி³யா பி⁴க்கூ² உச்சாவசே பத்தே தா⁴ரேந்தி ஸோவண்ணமயம் ரூபியமயம். மனுஸ்ஸா உஜ்ஜா²யந்தி கி²ய்யந்தி விபாசேந்தி – ஸேய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, ஸோவண்ணமயோ பத்தோ தா⁴ரேதப்³போ³…பே… ந ரூபியமயோ பத்தோ தா⁴ரேதப்³போ³… ந மணிமயோ பத்தோ தா⁴ரேதப்³போ³… ந வேளுரியமயோ பத்தோ தா⁴ரேதப்³போ³… ந ப²லிகமயோ பத்தோ தா⁴ரேதப்³போ³… ந கம்ஸமயோ பத்தோ தா⁴ரேதப்³போ³… ந காசமயோ பத்தோ தா⁴ரேதப்³போ³… ந திபுமயோ பத்தோ தா⁴ரேதப்³போ³… ந ஸீஸமயோ பத்தோ தா⁴ரேதப்³போ³… ந தம்ப³லோஹமயோ பத்தோ தா⁴ரேதப்³போ³. யோ தா⁴ரேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, த்³வே பத்தே – அயோபத்தம், மத்திகாபத்த’’ந்தி.

253. தேன கோ² பன ஸமயேன பத்தமூலம் க⁴ம்ஸியதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, பத்தமண்ட³ல’’ந்தி.

தேன கோ² பன ஸமயேன ச²ப்³ப³க்³கி³யா பி⁴க்கூ² உச்சாவசானி பத்தமண்ட³லானி தா⁴ரேந்தி ஸோவண்ணமயம் ரூபியமயம். மனுஸ்ஸா உஜ்ஜா²யந்தி கி²ய்யந்தி விபாசேந்தி – ஸேய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, உச்சாவசானி பத்தமண்ட³லானி தா⁴ரேதப்³பா³னி. யோ தா⁴ரேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, த்³வே பத்தமண்ட³லானி – திபுமயம், ஸீஸமய’’ந்தி. ப³ஹலானி மண்ட³லானி ந அச்சு²பியந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, லிகி²து’’ந்தி. வலீ [சலீ (க.)] ஹோந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, மகரத³ந்தகம் சி²ந்தி³து’’ந்தி.

தேன கோ² பன ஸமயேன ச²ப்³ப³க்³கி³யா பி⁴க்கூ² சித்ரானி பத்தமண்ட³லானி தா⁴ரேந்தி ரூபகாகிண்ணானி பி⁴த்திகம்மகதானி. தானி ரதி²காயபி த³ஸ்ஸேந்தா ஆஹிண்ட³ந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ஸேய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, சித்ரானி பத்தமண்ட³லானி தா⁴ரேதப்³பா³னி ரூபகாகிண்ணானி பி⁴த்திகம்மகதானி. யோ தா⁴ரேய்ய, ஆபத்தி து³க்கடஸ்ஸ. ‘‘அனுஜானாமி, பி⁴க்க²வே, பகதிமண்ட³ல’’ந்தி.

254. தேன கோ² பன ஸமயேன பி⁴க்கூ² ஸோத³கம் பத்தம் படிஸாமேந்தி. பத்தோ து³ஸ்ஸதி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, ஸோத³கோ பத்தோ படிஸாமேதப்³போ³. யோ படிஸாமேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, ஓதாபேத்வா பத்தம் படிஸாமேது’’ந்தி.

தேன கோ² பன ஸமயேன பி⁴க்கூ² ஸோத³கம் [ஸஉத³கம் (க.)] பத்தம் ஓதாபேந்தி. பத்தோ து³க்³க³ந்தோ⁴ ஹோதி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, ஸோத³கோ பத்தோ ஓதாபேதப்³போ³. யோ ஓதாபேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, வோத³கம் கத்வா ஓதாபேத்வா பத்தம் படிஸாமேது’’ந்தி.

தேன கோ² பன ஸமயேன பி⁴க்கூ² உண்ஹே பத்தம் நித³ஹந்தி. பத்தஸ்ஸ வண்ணோ து³ஸ்ஸதி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, உண்ஹே பத்தோ நித³ஹிதப்³போ³. யோ நித³ஹேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, முஹுத்தம் உண்ஹே ஓதாபேத்வா பத்தம் படிஸாமேது’’ந்தி.

தேன கோ² பன ஸமயேன ஸம்ப³ஹுலா பத்தா அஜ்ஜோ²காஸே அனாதா⁴ரா நிக்கி²த்தா ஹோந்தி. வாதமண்ட³லிகாய ஆவட்டேத்வா பத்தா பி⁴ஜ்ஜிம்ஸு. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, பத்தாதா⁴ரக’’ந்தி.

தேன கோ² பன ஸமயேன பி⁴க்கூ² மிட்³ட⁴ந்தே பத்தம் நிக்கி²பந்தி. பரிபதித்வா [பரிவட்டித்வா (ஸ்யா.)] பத்தோ பி⁴ஜ்ஜதி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, மிட்³ட⁴ந்தே பத்தோ நிக்கி²பிதப்³போ³. யோ நிக்கி²பேய்ய, ஆபத்தி து³க்கடஸ்ஸா’’தி.

தேன கோ² பன ஸமயேன பி⁴க்கூ² பரிப⁴ண்ட³ந்தே பத்தம் நிக்கி²பந்தி. பரிபதித்வா பத்தோ பி⁴ஜ்ஜதி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, பரிப⁴ண்ட³ந்தே பத்தோ நிக்கி²பிதப்³போ³. யோ நிக்கி²பேய்ய, ஆபத்தி து³க்கடஸ்ஸா’’தி.

தேன கோ² பன ஸமயேன பி⁴க்கூ² ச²மாய பத்தம் நிக்குஜ்ஜந்தி. ஓட்டோ² க⁴ம்ஸியதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, திணஸந்தா²ரக’’ந்தி. திணஸந்தா²ரகோ உபசிகாஹி க²ஜ்ஜதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, சோளக’’ந்தி. சோளகம் உபசிகாஹி க²ஜ்ஜதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, பத்தமாளக’’ந்தி. பத்தமாளகோ பரிபதித்வா பத்தோ பி⁴ஜ்ஜதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, பத்தகுண்டோ³லிக’’ந்தி. பத்தகுண்டோ³லிகாய பத்தோ க⁴ம்ஸியதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, பத்தத²விக’’ந்தி. அம்ஸப³த்³த⁴கோ ந ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, அம்ஸப³த்³த⁴கம் ப³ந்த⁴னஸுத்தக’’ந்தி.

தேன கோ² பன ஸமயேன பி⁴க்கூ² பி⁴த்திகி²லேபி நாக³த³ந்தகேபி பத்தம் லக்³கே³ந்தி. பரிபதித்வா பத்தோ பி⁴ஜ்ஜதி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, பத்தோ லக்³கே³தப்³போ³. யோ லக்³கே³ய்ய, ஆபத்தி து³க்கடஸ்ஸா’’தி.

தேன கோ² பன ஸமயேன பி⁴க்கூ² மஞ்சே பத்தம் நிக்கி²பந்தி, ஸதிஸம்மோஸா நிஸீத³ந்தா ஓத்த²ரித்வா பத்தம் பி⁴ந்தே³ந்தி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, மஞ்சே பத்தோ நிக்கி²பிதப்³போ³. யோ நிக்கி²பேய்ய, ஆபத்தி து³க்கடஸ்ஸா’’தி.

தேன கோ² பன ஸமயேன பி⁴க்கூ² பீடே² பத்தம் நிக்கி²பந்தி, ஸதிஸம்மோஸா நிஸீத³ந்தா ஓத்த²ரித்வா பத்தம் பி⁴ந்தே³ந்தி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, பீடே² பத்தோ நிக்கி²பிதப்³போ³. யோ நிக்கி²பேய்ய, ஆபத்தி து³க்கடஸ்ஸா’’தி.

தேன கோ² பன ஸமயேன பி⁴க்கூ² அங்கே பத்தம் நிக்கி²பந்தி, ஸதிஸம்மோஸா உட்ட²ஹந்தி. பரிபதித்வா பத்தோ பி⁴ஜ்ஜதி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, அங்கே பத்தோ நிக்கி²பிதப்³போ³. யோ நிக்கி²பேய்ய, ஆபத்தி து³க்கடஸ்ஸா’’தி.

தேன கோ² பன ஸமயேன பி⁴க்கூ² ச²த்தே பத்தம் நிக்கி²பந்தி. வாதமண்ட³லிகாய ச²த்தம் உக்கி²பியதி பரிபதித்வா பத்தோ பி⁴ஜ்ஜதி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, ச²த்தே பத்தோ நிக்கி²பிதப்³போ³. யோ நிக்கி²பேய்ய, ஆபத்தி து³க்கடஸ்ஸா’’தி.

255. தேன கோ² பன ஸமயேன பி⁴க்கூ² பத்தஹத்தா² கவாடம் பணாமேந்தி. கவாடோ ஆவட்டித்வா பத்தோ பி⁴ஜ்ஜதி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, பத்தஹத்தே²ன கவாடம் பணாமேதப்³ப³ம் [கவாடோ பணாமேதப்³போ³ (க.)]. யோ பணாமேய்ய, ஆபத்தி து³க்கடஸ்ஸா’’தி.

தேன கோ² பன ஸமயேன பி⁴க்கூ² தும்ப³கடாஹே பிண்டா³ய சரந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ஸேய்யதா²பி தித்தி²யாதி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, தும்ப³கடாஹே பிண்டா³ய சரிதப்³ப³ம். யோ சரேய்ய, ஆபத்தி து³க்கடஸ்ஸா’’தி.

தேன கோ² பன ஸமயேன பி⁴க்கூ² க⁴டிகடாஹே [க⁴டிகடாஹேன (ஸ்யா.)] பிண்டா³ய சரந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ஸேய்யதா²பி தித்தி²யாதி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, க⁴டிகடாஹே பிண்டா³ய சரிதப்³ப³ம். யோ சரேய்ய, ஆபத்தி து³க்கடஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² ஸப்³ப³பம்ஸுகூலிகோ ஹோதி. ஸோ ச²வஸீஸஸ்ஸ பத்தம் தா⁴ரேதி. அஞ்ஞதரா இத்தீ² பஸ்ஸித்வா பீ⁴தா விஸ்ஸரமகாஸி – ‘‘அபு⁴ம் மே பிஸாசோ வதாய’’ந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸமணா ஸக்யபுத்தியா ச²வஸீஸஸ்ஸ பத்தம் தா⁴ரேஸ்ஸந்தி, ஸேய்யதா²பி பிஸாசில்லிகா’’தி! ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, ச²வஸீஸஸ்ஸ பத்தோ தா⁴ரேதப்³போ³. யோ தா⁴ரேய்ய, ஆபத்தி து³க்கடஸ்ஸ. ந ச, பி⁴க்க²வே, ஸப்³ப³பம்ஸுகூலிகேன ப⁴விதப்³ப³ம். யோ ப⁴வேய்ய, ஆபத்தி து³க்கடஸ்ஸா’’தி.

தேன கோ² பன ஸமயேன பி⁴க்கூ² சலகானிபி அட்டி²கானிபி உச்சி²ட்டோ²த³கம்பி பத்தேன நீஹரந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘யஸ்மிம் யேவிமே ஸமணா ஸக்யபுத்தியா பு⁴ஞ்ஜந்தி ஸோவ நேஸம் படிக்³க³ஹோ’’தி. ப⁴க³வதோ ஏதமத்த²ம் ஆரோசேஸும். ‘‘ந பி⁴க்க²வே, சலகானி வா அட்டி²கானி வா உச்சி²ட்டோ²த³கம் வா பத்தேன நீஹரிதப்³ப³ம். யோ நீஹரேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, படிக்³க³ஹ’’ந்தி.

256. தேன கோ² பன ஸமயேன பி⁴க்கூ² ஹத்தே²ன விப்பா²ளேத்வா சீவரம் ஸிப்³பே³ந்தி. சீவரம் விலோமிகம் ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, ஸத்த²கம் நமதக’’ந்தி.

தேன கோ² பன ஸமயேன ஸங்க⁴ஸ்ஸ த³ண்ட³ஸத்த²கம் உப்பன்னம் ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, த³ண்ட³ஸத்த²க’’ந்தி.

தேன கோ² பன ஸமயேன ச²ப்³ப³க்³கி³யா பி⁴க்கூ² உச்சாவசே ஸத்த²கத³ண்டே³ தா⁴ரேந்தி ஸோவண்ணமயம் ரூபியமயம். மனுஸ்ஸா உஜ்ஜா²யந்தி கி²ய்யந்தி விபாசேந்தி – ஸேய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, உச்சாவசா ஸத்த²கத³ண்டா³ தா⁴ரேதப்³பா³. யோ தா⁴ரேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, அட்டி²மயம் த³ந்தமயம் விஸாணமயம் நளமயம் வேளுமயம் கட்ட²மயம் ஜதுமயம் ப²லமயம் லோஹமயம் ஸங்க²னாபி⁴மய’’ந்தி.

தேன கோ² பன ஸமயேன பி⁴க்கூ² குக்குடபத்தேனபி வேளுபேஸிகாயபி சீவரம் ஸிப்³பே³ந்தி. சீவரம் து³ஸ்ஸிப்³பி³தம் ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, ஸூசி’’ந்தி. ஸூசியோ கண்ணகிதாயோ ஹோந்தி…பே… ‘‘அனுஜானாமி, பி⁴க்க²வே, ஸூசினாளிக’’ந்தி. ஸூசினாளிகாயபி கண்ணகிதாயோ ஹோந்தி…பே… ‘‘அனுஜானாமி, பி⁴க்க²வே, கிண்ணேன பூரேது’’ந்தி. கிண்ணேபி கண்ணகிதாயோ ஹோந்தி…பே… ‘‘அனுஜானாமி, பி⁴க்க²வே, ஸத்துயா பூரேது’’ந்தி. ஸத்துயாபி கண்ணகிதாயோ ஹோந்தி…பே… ‘‘அனுஜானாமி, பி⁴க்க²வே, ஸரிதக’’ந்தி. ஸரிதகேபி கண்ணகிதாயோ ஹோந்தி…பே… ‘‘அனுஜானாமி, பி⁴க்க²வே, மது⁴ஸித்த²கேன ஸாரேது’’ந்தி. ஸரிதகம் பரிபி⁴ஜ்ஜதி. ‘‘அனுஜானாமி, பி⁴க்க²வே, ஸரிதகஸிபாடிக’’ந்தி.

தேன கோ² பன ஸமயேன பி⁴க்கூ² தத்த² தத்த² கி²லம் நிக்க²ணித்வா ஸம்ப³ந்தி⁴த்வா சீவரம் ஸிப்³பே³ந்தி. சீவரம் விகண்ணம் ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, கதி²னம் கதி²னரஜ்ஜும் [கடி²னம் கடி²னரஜ்ஜும் (ஸீ. ஸ்யா.)] தத்த² தத்த² ஓப³ந்தி⁴த்வா சீவரம் ஸிப்³பே³து’’ந்தி. விஸமே கதி²னம் பத்த²ரந்தி. கதி²னம் பரிபி⁴ஜ்ஜதி…பே… ‘‘ந, பி⁴க்க²வே, விஸமே கதி²னம் பத்த²ரிதப்³ப³ம். யோ பத்த²ரேய்ய, ஆபத்தி து³க்கடஸ்ஸா’’தி.

ச²மாய கதி²னம் பத்த²ரந்தி. கதி²னம் பம்ஸுகிதம் ஹோதி…பே… ‘‘அனுஜானாமி, பி⁴க்க²வே, திணஸந்தா²ரக’’ந்தி. கதி²னஸ்ஸ அந்தோ ஜீரதி…பே… ‘‘அனுஜானாமி, பி⁴க்க²வே, அனுவாதம் பரிப⁴ண்ட³ம் ஆரோபேது’’ந்தி. கதி²னம் நப்பஹோதி…பே… ‘‘அனுஜானாமி, பி⁴க்க²வே, த³ண்ட³கதி²னம் பி³த³லகம் ஸலாகம் வினந்த⁴னரஜ்ஜும் வினந்த⁴னஸுத்தம் வினந்தி⁴த்வா சீவரம் ஸிப்³பே³து’’ந்தி. ஸுத்தந்தரிகாயோ விஸமா ஹோந்தி…பே… ‘‘அனுஜானாமி, பி⁴க்க²வே, களிம்ப⁴க’’ந்தி. ஸுத்தா வங்கா ஹோந்தி…பே… ‘‘அனுஜானாமி, பி⁴க்க²வே, மோக⁴ஸுத்தக’’ந்தி.

தேன கோ² பன ஸமயேன பி⁴க்கூ² அதோ⁴தேஹி பாதே³ஹி கதி²னம் அக்கமந்தி. கதி²னம் து³ஸ்ஸதி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, அதோ⁴தேஹி பாதே³ஹி கதி²னம் அக்கமிதப்³ப³ம். யோ அக்கமேய்ய, ஆபத்தி து³க்கடஸ்ஸா’’தி.

தேன கோ² பன ஸமயேன பி⁴க்கூ² அல்லேஹி பாதே³ஹி கதி²னம் அக்கமந்தி. கதி²னம் து³ஸ்ஸதி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, அல்லேஹி பாதே³ஹி கதி²னம் அக்கமிதப்³ப³ம். யோ அக்கமேய்ய, ஆபத்தி து³க்கடஸ்ஸா’’தி.

தேன கோ² பன ஸமயேன பி⁴க்கூ² ஸஉபாஹனா கதி²னம் அக்கமந்தி. கதி²னம் து³ஸ்ஸதி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, ஸஉபாஹனேன கதி²னம் அக்கமிதப்³ப³ம். யோ அக்கமேய்ய, ஆபத்தி து³க்கடஸ்ஸா’’தி.

தேன கோ² பன ஸமயேன பி⁴க்கூ² சீவரம் ஸிப்³ப³ந்தா அங்கு³லியா படிக்³க³ண்ஹந்தி. அங்கு³லியோ து³க்கா² ஹோந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, படிக்³க³ஹ’’ந்தி.

257. தேன கோ² பன ஸமயேன ச²ப்³ப³க்³கி³யா பி⁴க்கூ² உச்சாவசே படிக்³க³ஹே தா⁴ரேந்தி ஸோவண்ணமயம் ரூபியமயம். மனுஸ்ஸா உஜ்ஜா²யந்தி கி²ய்யந்தி விபாசேந்தி – ஸேய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, உச்சாவசா படிக்³க³ஹா தா⁴ரேதப்³பா³. யோ தா⁴ரேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, அட்டி²மயம்…பே… ஸங்க²னாபி⁴மய’’ந்தி.

தேன கோ² பன ஸமயேன ஸூசியோபி ஸத்த²காபி படிக்³க³ஹாபி நஸ்ஸந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, ஆவேஸனவித்த²க’’ந்தி. ஆவேஸனவித்த²கே ஸமாகுலா ஹோந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, படிக்³க³ஹத²விக’’ந்தி. அம்ஸப³த்³த⁴கோ ந ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, அம்ஸப³த்³த⁴கம் ப³ந்த⁴னஸுத்தக’’ந்தி.

தேன கோ² பன ஸமயேன பி⁴க்கூ² அப்³போ⁴காஸே சீவரம் ஸிப்³ப³ந்தா ஸீதேனபி உண்ஹேனபி கிலமந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, கதி²னஸாலம் கதி²னமண்ட³ப’’ந்தி. கதி²னஸாலா நீசவத்து²கா ஹோதி, உத³கேன ஓத்த²ரிய்யதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே உச்சவத்து²கம் காது’’ந்தி. சயோ பரிபததி…பே… ‘‘அனுஜானாமி, பி⁴க்க²வே, சினிதும் தயோ சயே – இட்ட²காசயம், ஸிலாசயம், தா³ருசய’’ந்தி. ஆரோஹந்தா விஹஞ்ஞந்தி…பே… ‘‘அனுஜானாமி, பி⁴க்க²வே, தயோ ஸோபானே – இட்ட²காஸோபானம், ஸிலாஸோபானம், தா³ருஸோபான’’ந்தி. ஆரோஹந்தா பரிபதந்தி…பே… ‘‘அனுஜானாமி, பி⁴க்க²வே, ஆலம்ப³னபா³ஹ’’ந்தி. கதி²னஸாலாய திணசுண்ணம் பரிபததி…பே… ‘‘அனுஜானாமி, பி⁴க்க²வே, ஓகு³ம்பே²த்வா [ஓகு³ம்பே³த்வா (ஸீ. ஸ்யா.)] உல்லித்தாவலித்தம் காதும் – ஸேதவண்ணம் காளவண்ணம் கே³ருகபரிகம்மம் மாலாகம்மம் லதாகம்மம் மகரத³ந்தகம் பஞ்சபடிகம் சீவரவம்ஸம் சீவரரஜ்ஜுக’’ந்தி.

தேன கோ² பன ஸமயேன பி⁴க்கூ² சீவரம் ஸிப்³பே³த்வா தத்தே²வ கதி²னம் உஜ்ஜி²த்வா பக்கமந்தி, உந்தூ³ரேஹிபி உபசிகாஹிபி க²ஜ்ஜதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, கதி²னம் ஸங்க⁴ரிது’’ந்தி. கதி²னம் பரிபி⁴ஜ்ஜதி…பே… ‘‘அனுஜானாமி, பி⁴க்க²வே, கோ³க⁴ம்ஸிகாய கதி²னம் ஸங்க⁴ரிது’’ந்தி. கதி²னம் வினிவேடி²யதி…பே… ‘‘அனுஜானாமி, பி⁴க்க²வே, ப³ந்த⁴னரஜ்ஜு’’ந்தி.

தேன கோ² பன ஸமயேன பி⁴க்கூ² குட்டேபி த²ம்பே⁴பி கதி²னம் உஸ்ஸாபேத்வா பக்கமந்தி. பரிபதித்வா கதி²னம் பி⁴ஜ்ஜதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, பி⁴த்திகி²லே வா நாக³த³ந்தே வா லக்³கே³து’’ந்தி.

258. அத² கோ² ப⁴க³வா ராஜக³ஹே யதா²பி⁴ரந்தம் விஹரித்வா யேன வேஸாலீ தேன சாரிகம் பக்காமி. தேன கோ² பன ஸமயேன பி⁴க்கூ² ஸூசிகம்பி ஸத்த²கம்பி பே⁴ஸஜ்ஜம்பி பத்தேன ஆதா³ய க³ச்ச²ந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, பே⁴ஸஜ்ஜத்த²விக’’ந்தி. அம்ஸப³த்³த⁴கோ ந ஹோதி…பே… ‘‘அனுஜானாமி, பி⁴க்க²வே, அம்ஸப³த்³த⁴கம் ப³ந்த⁴னஸுத்தக’’ந்தி.

தேன கோ² பன ஸமயேன அஞ்ஞதரோ பி⁴க்கு² உபாஹனாயோ காயப³ந்த⁴னேன ப³ந்தி⁴த்வா கா³மம் பிண்டா³ய பாவிஸி. அஞ்ஞதரோ உபாஸகோ தம் பி⁴க்கு²ம் அபி⁴வாதே³ந்தோ உபாஹனாயோ ஸீஸேன க⁴ட்டேதி. ஸோ பி⁴க்கு² மங்கு அஹோஸி. அத² கோ² ஸோ பி⁴க்கு² ஆராமம் க³ந்த்வா பி⁴க்கூ²னம் ஏதமத்த²ம் ஆரோசேஸி. பி⁴க்கூ² ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, உபாஹனத்த²விக’’ந்தி. அம்ஸப³த்³த⁴கோ ந ஹோதி…பே… ‘‘அனுஜானாமி, பி⁴க்க²வே, அம்ஸப³த்³த⁴கம் ப³ந்த⁴னஸுத்தக’’ந்தி.

தேன கோ² பன ஸமயேன அந்தராமக்³கே³ உத³கம் அகப்பியம் ஹோதி. பரிஸ்ஸாவனம் ந ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, பரிஸ்ஸாவன’’ந்தி. சோளகம் நப்பஹோதி…பே… ‘‘அனுஜானாமி, பி⁴க்க²வே, கடச்சு²பரிஸ்ஸாவன’’ந்தி. சோளகம் நப்பஹோதி…பே… ‘‘அனுஜானாமி, பி⁴க்க²வே, த⁴ம்மகரண’’ந்தி [த⁴ம்மகரணம் (ஸீ. ஸ்யா.), த⁴மகரணம் (க.)].

259. தேன கோ² பன ஸமயேன த்³வே பி⁴க்கூ² கோஸலேஸு ஜனபதே³ அத்³தா⁴னமக்³க³ப்படிபன்னா ஹோந்தி. ஏகோ பி⁴க்கு² அனாசாரம் ஆசரதி. து³தியோ பி⁴க்கு² தம் பி⁴க்கு²ம் ஏதத³வோச – ‘‘மா, ஆவுஸோ, ஏவரூபம் அகாஸி. நேதம் கப்பதீ’’தி. ஸோ தஸ்மிம் உபனந்தி⁴. அத² கோ² ஸோ பி⁴க்கு² பிபாஸாய பீளிதோ உபனத்³த⁴ம் பி⁴க்கு²ம் ஏதத³வோச – ‘‘தே³ஹி மே, ஆவுஸோ, பரிஸ்ஸாவனம், பானீயம் பிவிஸ்ஸாமீ’’தி. உபனத்³தோ⁴ பி⁴க்கு² ந அதா³ஸி. ஸோ பி⁴க்கு² பிபாஸாய பீளிதோ காலமகாஸி. அத² கோ² ஸோ பி⁴க்கு² ஆராமம் க³ந்த்வா பி⁴க்கூ²னம் ஏதமத்த²ம் ஆரோசேஸி. ‘‘கிம் பன த்வம், ஆவுஸோ, பரிஸ்ஸாவனம் யாசியமானோ ந அதா³ஸீ’’தி? ‘‘ஏவமாவுஸோ’’தி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு² பரிஸ்ஸாவனம் யாசியமானோ ந த³ஸ்ஸதீ’’தி! அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே பி⁴க்கு²ஸங்க⁴ம் ஸன்னிபாதாபேத்வா தம் பி⁴க்கு²ம் படிபுச்சி² – ‘‘ஸச்சம் கிர த்வம், பி⁴க்கு², பரிஸ்ஸாவனம் யாசியமானோ ந அதா³ஸீ’’தி? ‘‘ஸச்சம் ப⁴க³வா’’தி. விக³ரஹி பு³த்³தோ⁴ ப⁴க³வா – ‘‘அனனுச்ச²விகம், மோக⁴புரிஸ, அனனுலோமிகம் அப்பதிரூபம் அஸ்ஸாமணகம் அகப்பியம் அகரணீயம். கத²ஞ்ஹி நாம த்வம், மோக⁴புரிஸ, பரிஸ்ஸாவனம் யாசியமானோ ந த³ஸ்ஸஸி. நேதம், மோக⁴புரிஸ, அப்பஸன்னானம் வா பஸாதா³ய…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘ந பி⁴க்க²வே, அத்³தா⁴னமக்³க³ப்படிபன்னேன பி⁴க்கு²னா பரிஸ்ஸாவனம் யாசியமானேன ந தா³தப்³ப³ம். யோ ந த³தே³ய்ய, ஆபத்தி து³க்கடஸ்ஸ. ந ச, பி⁴க்க²வே, அபரிஸ்ஸாவனகேன அத்³தா⁴னோ படிபஜ்ஜிதப்³போ³. யோ படிபஜ்ஜேய்ய, ஆபத்தி து³க்கடஸ்ஸ. ஸசே ந ஹோதி பரிஸ்ஸாவனம் வா த⁴ம்மகரணோ வா, ஸங்கா⁴டிகண்ணோபி அதி⁴ட்டா²தப்³போ³ – இமினா பரிஸ்ஸாவேத்வா பிவிஸ்ஸாமீ’’தி. அத² கோ² ப⁴க³வா அனுபுப்³பே³ன சாரிகம் சரமானோ யேன வேஸாலீ தத³வஸரி. தத்ர ஸுத³ம் ப⁴க³வா வேஸாலியம் விஹரதி மஹாவனே கூடாகா³ரஸாலாயம். தேன கோ² பன ஸமயேன பி⁴க்கூ² நவகம்மம் கரோந்தி. பரிஸ்ஸாவனம் ந ஸம்மதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, த³ண்ட³பரிஸ்ஸாவன’’ந்தி. த³ண்ட³பரிஸ்ஸாவனம் ந ஸம்மதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, ஓத்த²ரக’’ந்தி.

தேன கோ² பன ஸமயேன பி⁴க்கூ² மகஸேஹி உப்³பா³ள்ஹா ஹோந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, மகஸகுடிக’’ந்தி.

260. தேன கோ² பன ஸமயேன வேஸாலியம் பணீதானம் ப⁴த்தானம் ப⁴த்தபடிபாடி அட்டி²தா ஹோதி. பி⁴க்கூ² பணீதானி போ⁴ஜனானி பு⁴ஞ்ஜித்வா அபி⁴ஸன்னகாயா ஹோந்தி ப³ஹ்வாபா³தா⁴ [ப³வ்ஹாபா³தா⁴ (ஸீ.)]. அத² கோ² ஜீவகோ கோமாரப⁴ச்சோ வேஸாலிம் அக³மாஸி கேனசிதே³வ கரணீயேன. அத்³த³ஸா கோ² ஜீவகோ கோமாரப⁴ச்சோ பி⁴க்கூ² அபி⁴ஸன்னகாயே ப³ஹ்வாபா³தே⁴. தி³ஸ்வான யேன ப⁴க³வா தேனுபஸங்கமி, உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஜீவகோ கோமாரப⁴ச்சோ ப⁴க³வந்தம் ஏதத³வோச – ‘‘ஏதரஹி, ப⁴ந்தே, பி⁴க்கூ² அபி⁴ஸன்னகாயா ப³ஹ்வாபா³தா⁴. ஸாது⁴, ப⁴ந்தே, ப⁴க³வா பி⁴க்கூ²னம் சங்கமஞ்ச ஜந்தாக⁴ரஞ்ச அனுஜானாது. ஏவம் பி⁴க்கூ² அப்பாபா³தா⁴ ப⁴விஸ்ஸந்தீ’’தி. அத² கோ² ப⁴க³வா ஜீவகம் கோமாரப⁴ச்சம் த⁴ம்மியா கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹம்ஸேஸி. அத² கோ² ஜீவகோ கோமாரப⁴ச்சோ ப⁴க³வதா த⁴ம்மியா கதா²ய ஸந்த³ஸ்ஸிதோ ஸமாத³பிதோ ஸமுத்தேஜிதோ ஸம்பஹம்ஸிதோ உட்டா²யாஸனா ப⁴க³வந்தம் அபி⁴வாதே³த்வா பத³க்கி²ணம் கத்வா பக்காமி. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, சங்கமஞ்ச ஜந்தாக⁴ரஞ்சா’’தி.

தேன கோ² பன ஸமயேன பி⁴க்கூ² விஸமே சங்கமே சங்கமந்தி. பாதா³ து³க்கா² ஹோந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, ஸமம் காது’’ந்தி. சங்கமோ நீசவத்து²கோ ஹோதி. உத³கேன ஓத்த²ரிய்யதி…பே… ‘‘அனுஜானாமி, பி⁴க்க²வே, உச்சவத்து²கம் காது’’ந்தி. சயோ பரிபததி…பே… ‘‘அனுஜானாமி, பி⁴க்க²வே, சினிதும் தயோ சயே – இட்ட²காசயம், ஸிலாசயம், தா³ருசய’’ந்தி. ஆரோஹந்தா விஹஞ்ஞந்தி…பே… ‘‘அனுஜானாமி, பி⁴க்க²வே, தயோ ஸோபானே – இட்ட²காஸோபானம், ஸிலாஸோபானம், தா³ருஸோபான’’ந்தி. ஆரோஹந்தா பரிபதந்தி…பே… ‘‘அனுஜானாமி, பி⁴க்க²வே, ஆலம்ப³னபா³ஹ’’ந்தி.

தேன கோ² பன ஸமயேன பி⁴க்கூ² சங்கமே சங்கமந்தா பரிபதந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, சங்கமனவேதி³க’’ந்தி.

தேன கோ² பன ஸமயேன பி⁴க்கூ² அஜ்ஜோ²காஸே சங்கமந்தா ஸீதேனபி உண்ஹேனபி கிலமந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, சங்கமனஸால’’ந்தி. சங்கமனஸாலாயம் திணசுண்ணம் பரிபததி…பே… ‘‘அனுஜானாமி, பி⁴க்க²வே, ஓகு³ம்பே²த்வா உல்லித்தாவலித்தம் காதும் – ஸேதவண்ணம் காளவண்ணம் கே³ருகபரிகம்மம் மாலாகம்மம் லதாகம்மம் மகரத³ந்தகம் பஞ்சபடிகம் சீவரவம்ஸம் சீவரரஜ்ஜு’’ந்தி. ஜந்தாக⁴ரம் நீசவத்து²கம் ஹோதி, உத³கேன ஓத்த²ரிய்யதி…பே… ‘‘அனுஜானாமி, பி⁴க்க²வே, உச்சவத்து²கம் காது’’ந்தி. சயோ பரிபததி…பே… ‘‘அனுஜானாமி, பி⁴க்க²வே, சினிதும் தயோ சயே – இட்ட²காசயம், ஸிலாசயம், தா³ருசய’’ந்தி. ஆரோஹந்தா விஹஞ்ஞந்தி…பே… ‘‘அனுஜானாமி, பி⁴க்க²வே, தயோ ஸோபானே – இட்ட²காஸோபானம், ஸிலாஸோபானம், தா³ருஸோபான’’ந்தி. ஆரோஹந்தா பரிபதந்தி…பே… ‘‘அனுஜானாமி, பி⁴க்க²வே, ஆலம்ப³னபா³ஹ’’ந்தி. ஜந்தாக⁴ரஸ்ஸ கவாடம் ந ஹோதி…பே… ‘‘அனுஜானாமி, பி⁴க்க²வே, கவாடம் பிட்ட²ஸங்கா⁴டம் [பீட²ஸம்கா⁴டம் (க.)] உது³க்க²லிகம் உத்தரபாஸகம் அக்³க³ளவட்டிகம் கபிஸீஸகம் ஸூசிகம் க⁴டிகம் தாளச்சி²த்³த³ம் ஆவிஞ்ச²னசி²த்³த³ம் ஆவிஞ்ச²னரஜ்ஜு’’ந்தி. ஜந்தாக⁴ரஸ்ஸ குட்டபாதோ³ ஜீரதி…பே… ‘‘அனுஜானாமி, பி⁴க்க²வே, மண்ட³லிகம் காது’’ந்தி. ஜந்தாக⁴ரஸ்ஸ தூ⁴மனேத்தம் ந ஹோதி…பே… ‘‘அனுஜானாமி, பி⁴க்க²வே, தூ⁴மனேத்த’’ந்தி.

தேன கோ² பன ஸமயேன பி⁴க்கூ² கு²த்³த³கே ஜந்தாக⁴ரே மஜ்ஜே² அக்³கி³ட்டா²னம் கரோந்தி. உபசாரோ ந ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, கு²த்³த³கே ஜந்தாக⁴ரே ஏகமந்தம் அக்³கி³ட்டா²னம் காதும், மஹல்லகே மஜ்ஜே²’’தி. ஜந்தாக⁴ரே அக்³கி³ முக²ம் ட³ஹதி…பே… ‘‘அனுஜானாமி, பி⁴க்க²வே, முக²மத்திக’’ந்தி. ஹத்தே² மத்திகம் தேமேந்தி…பே… ‘‘அனுஜானாமி, பி⁴க்க²வே, மத்திகாதோ³ணிக’’ந்தி. மத்திகா து³க்³க³ந்தா⁴ ஹோதி…பே… ‘‘அனுஜானாமி, பி⁴க்க²வே, வாஸேது’’ந்தி. ஜந்தாக⁴ரே அக்³கி³ காயம் ட³ஹதி…பே… ‘‘அனுஜானாமி, பி⁴க்க²வே, உத³கம் அதிஹரிது’’ந்தி. பாதியாபி பத்தேனபி உத³கம் அதிஹரந்தி…பே… ‘‘அனுஜானாமி, பி⁴க்க²வே, உத³கட்டா²னம், உத³கஸராவக’’ந்தி. ஜந்தாக⁴ரம் திணச்ச²த³னம் ந ஸேதே³தி [திணச்சா²த³னேன சா²தே³தி (க.)] …பே… ‘‘அனுஜானாமி, பி⁴க்க²வே, ஓகு³ம்பே²த்வா உல்லித்தாவலித்தம் காது’’ந்தி. ஜந்தாக⁴ரம் சிக்க²ல்லம் ஹோதி…பே… ‘‘அனுஜானாமி, பி⁴க்க²வே, ஸந்த²ரிதும் தயோ ஸந்த²ரே – இட்ட²காஸந்த²ரம், ஸிலாஸந்த²ரம், தா³ருஸந்த²ர’’ந்தி. சிக்க²ல்லம்யேவ ஹோதி…பே… ‘‘அனுஜானாமி, பி⁴க்க²வே, தோ⁴விது’’ந்தி. உத³கம் ஸந்திட்ட²தி…பே… ‘‘அனுஜானாமி, பி⁴க்க²வே, உத³கனித்³த⁴மன’’ந்தி.

தேன கோ² பன ஸமயேன பி⁴க்கூ² ஜந்தாக⁴ரே ச²மாய நிஸீத³ந்தி, க³த்தானி கண்டூ³வந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, ஜந்தாக⁴ரபீட²’’ந்தி. தேன கோ² பன ஸமயேன ஜந்தாக⁴ரம் அபரிக்கி²த்தம் ஹோதி…பே… ‘‘அனுஜானாமி, பி⁴க்க²வே, பரிக்கி²பிதும் தயோ பாகாரே – இட்ட²காபாகாரம், ஸிலாபாகாரம், தா³ருபாகார’’ந்தி. கோட்ட²கோ ந ஹோதி…பே… ‘‘அனுஜானாமி, பி⁴க்க²வே, கோட்ட²க’’ந்தி. கோட்ட²கோ நீசவத்து²கோ ஹோதி, உத³கேன ஓத்த²ரிய்யதி…பே… ‘‘அனுஜானாமி, பி⁴க்க²வே, உச்சவத்து²கம் காது’’ந்தி. சயோ பரிபததி…பே… ‘‘அனுஜானாமி, பி⁴க்க²வே, சினிதும் தயோ சயே – இட்ட²காசயம், ஸிலாசயம், தா³ருசய’’ந்தி. ஆரோஹந்தா விஹஞ்ஞந்தி…பே… ‘‘அனுஜானாமி, பி⁴க்க²வே, தயோ ஸோபானே – இட்ட²காஸோபானம், ஸிலாஸோபானம், தா³ருஸோபான’’ந்தி. ஆரோஹந்தா பரிபதந்தி…பே… ‘‘அனுஜானாமி, பி⁴க்க²வே, ஆலம்ப³னபா³ஹ’’ந்தி. கோட்ட²கஸ்ஸ கவாடம் ந ஹோதி…பே… ‘‘அனுஜானாமி, பி⁴க்க²வே, கவாடம் பிட்ட²ஸங்கா⁴டம் உது³க்க²லிகம் உத்தரபாஸகம் அக்³க³ளவட்டிம் கபிஸீஸகம் ஸூசிகம் க⁴டிகம் தாளச்சி²த்³த³ம் ஆவிஞ்ச²னசி²த்³த³ம் ஆவிஞ்ச²னரஜ்ஜு’’ந்தி. கோட்ட²கே திணசுண்ணம் பரிபததி…பே… ‘‘அனுஜானாமி, பி⁴க்க²வே, ஓகு³ம்பே²த்வா உல்லித்தாவலித்தம் காதும் – ஸேதவண்ணம் காளவண்ணம் கே³ருகபரிகம்மம் மாலாகம்மம் லதாகம்மம் மகரத³ந்தகம் பஞ்சபடிகந்தி. பரிவேணம் சிக்க²ல்லம் ஹோதி…பே… ‘‘அனுஜானாமி, பி⁴க்க²வே, மரும்ப³ம் உபகிரிது’’ந்தி. ந பரியாபுணந்தி…பே… ‘‘அனுஜானாமி, பி⁴க்க²வே, பத³ரஸிலம் நிக்கி²பிது’’ந்தி. உத³கம் ஸந்திட்ட²தி…பே… ‘‘அனுஜானாமி, பி⁴க்க²வே, உத³கனித்³த⁴மன’’ந்தி.

261. தேன கோ² பன ஸமயேன பி⁴க்கூ² நக்³கா³ நக்³க³ம் அபி⁴வாதே³ந்தி…பே… நக்³கா³ நக்³க³ம் அபி⁴வாதா³பேந்தி, நக்³கா³ நக்³க³ஸ்ஸ பரிகம்மம் கரோந்தி, நக்³கா³ நக்³க³ஸ்ஸ பரிகம்மம் காராபேந்தி, நக்³கா³ நக்³க³ஸ்ஸ தே³ந்தி, நக்³கா³ படிக்³க³ண்ஹந்தி, நக்³கா³ கா²த³ந்தி, நக்³கா³ பு⁴ஞ்ஜந்தி, நக்³கா³ ஸாயந்தி, நக்³கா³ பிவந்தி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, நக்³கே³ன [இத³ம் பத³ம் கத்த²சி நத்தி²] நக்³கோ³ அபி⁴வாதே³தப்³போ³…பே… ந நக்³கே³ன அபி⁴வாதே³தப்³ப³ம்… ந நக்³கே³ன [இத³ம் பத³ம் கத்த²சி நத்தி²] நக்³கோ³ அபி⁴வாதா³பேதப்³போ³… ந நக்³கே³ன அபி⁴வாதா³பேதப்³ப³ம்… ந நக்³கே³ன நக்³க³ஸ்ஸ பரிகம்மம் காதப்³ப³ம்… ந நக்³கே³ன நக்³க³ஸ்ஸ பரிகம்மம் காராபேதப்³ப³ம்… ந நக்³கே³ன நக்³க³ஸ்ஸ தா³தப்³ப³ம்… ந நக்³கே³ன படிக்³க³ஹேதப்³ப³ம்… ந நக்³கே³ன கா²தி³தப்³ப³ம்… ந நக்³கே³ன பு⁴ஞ்ஜிதப்³ப³ம்… ந நக்³கே³ன ஸாயிதப்³ப³ம்… ந நக்³கே³ன பாதப்³ப³ம். யோ பிவேய்ய, ஆபத்தி து³க்கடஸ்ஸா’’தி.

தேன கோ² பன ஸமயேன பி⁴க்கூ² ஜந்தாக⁴ரே ச²மாய சீவரம் நிக்கி²பந்தி. சீவரம் பம்ஸுகிதம் ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, சீவரவம்ஸம் சீவரரஜ்ஜு’’ந்தி. தே³வே வஸ்ஸந்தே சீவரம் ஓவஸ்ஸதி…பே… ‘‘அனுஜானாமி, பி⁴க்க²வே, ஜந்தாக⁴ரஸால’’ந்தி. ஜந்தாக⁴ரஸாலா நீசவத்து²கா ஹோதி, உத³கேன ஓத்த²ரிய்யதி…பே… ‘‘அனுஜானாமி, பி⁴க்க²வே, உச்சவத்து²கம் காது’’ந்தி. சயோ பரிபததி…பே… ‘‘அனுஜானாமி, பி⁴க்க²வே, சினிதும்…பே… ஆரோஹந்தா விஹஞ்ஞந்தி…பே… ஆரோஹந்தா பரிபதந்தி…பே… ‘‘அனுஜானாமி, பி⁴க்க²வே, ஆலம்ப³னபா³ஹ’’ந்தி. ஜந்தாக⁴ரஸாலாய திணசுண்ணம் பரிபததி…பே… ‘‘அனுஜானாமி, பி⁴க்க²வே, ஓகு³ம்பே²த்வா உல்லித்தாவலித்தம் காதும்…பே… சீவரவம்ஸம் சீவரரஜ்ஜு’’ந்தி.

தேன கோ² பன ஸமயேன பி⁴க்கூ² ஜந்தாக⁴ரேபி உத³கேபி பரிகம்மம் காதும் குக்குச்சாயந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, திஸ்ஸோ படிச்சா²தி³யோ – ஜந்தாக⁴ரபடிச்சா²தி³ம், உத³கபடிச்சா²தி³ம், வத்த²படிச்சா²தி³’’ந்தி.

தேன கோ² பன ஸமயேன ஜந்தாக⁴ரே உத³கம் ந ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, உத³பான’’ந்தி. உத³பானஸ்ஸ கூலம் லுஜ்ஜதி…பே… ‘‘அனுஜானாமி, பி⁴க்க²வே, சினிதும் தயோ சயே – இட்ட²காசயம், ஸிலாசயம், தா³ருசய’’ந்தி. உத³பானோ நீசவத்து²கோ ஹோதி, உத³கேன ஓத்த²ரிய்யதி…பே… ‘‘அனுஜானாமி, பி⁴க்க²வே, உச்சவத்து²கம் காது’’ந்தி. சயோ பரிபததி…பே… ஆரோஹந்தா விஹஞ்ஞந்தி…பே… ஆரோஹந்தா பரிபதந்தி…பே… ‘‘அனுஜானாமி, பி⁴க்க²வே, ஆலம்ப³னபா³ஹ’’ந்தி.

262. தேன கோ² பன ஸமயேன பி⁴க்கூ² வல்லிகாயபி காயப³ந்த⁴னேனபி உத³கம் வாஹேந்தி [வாஹந்தி (க.)]. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, உத³கவாஹனரஜ்ஜு’’ந்தி. ஹத்தா² து³க்கா² ஹோந்தி…பே… ‘‘அனுஜானாமி, பி⁴க்க²வே, துலம் கரகடகம் சக்கவட்டக’’ந்தி. பா⁴ஜனா ப³ஹூ பி⁴ஜ்ஜந்தி…பே… ‘‘அனுஜானாமி, பி⁴க்க²வே, தயோ வாரகே – லோஹவாரகம், தா³ருவாரகம், சம்மக்க²ண்ட³’’ந்தி.

தேன கோ² பன ஸமயேன பி⁴க்கூ² அஜ்ஜோ²காஸே உத³கம் வாஹேந்தா ஸீதேனபி உண்ஹேனபி கிலமந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, உத³பானஸால’’ந்தி. உத³பானஸாலாய திணசுண்ணம் பரிபததி…பே… ‘‘அனுஜானாமி, பி⁴க்க²வே, ஓகு³ம்பே²த்வா உல்லித்தாவலித்தம் காதும் – ஸேதவண்ணம் காளவண்ணம் கே³ருகபரிகம்மம் மாலாகம்மம் லதாகம்மம் மகரத³ந்தகம் பஞ்சபடிகம் சீவரவம்ஸம் சீவரரஜ்ஜு’’ந்தி. உத³பானோ அபாருதோ ஹோதி, திணசுண்ணேஹிபி பம்ஸுகேஹிபி ஓகிரிய்யதி…பே… ‘‘அனுஜானாமி, பி⁴க்க²வே, அபிதா⁴ன’’ந்தி. உத³கபா⁴ஜனம் ந ஸம்விஜ்ஜதி…பே… ‘‘அனுஜானாமி, பி⁴க்க²வே, உத³கதோ³ணிம் உத³ககடாஹ’’ந்தி.

தேன கோ² பன ஸமயேன பி⁴க்கூ² ஆராமே தஹம் தஹம் நஹாயந்தி. ஆராமோ சிக்க²ல்லோ ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, சந்த³னிக’’ந்தி. சந்த³னிகா பாகடா ஹோதி. பி⁴க்கூ² ஹிரியந்தி நஹாயிதும்…பே… ‘‘அனுஜானாமி, பி⁴க்க²வே, பரிக்கி²பிதும் தயோ பாகாரே – இட்ட²காபாகாரம், ஸிலாபாகாரம், தா³ருபாகார’’ந்தி. சந்த³னிகா சிக்க²ல்லா ஹோதி…பே… ‘‘அனுஜானாமி, பி⁴க்க²வே, ஸந்த²ரிதும் தயோ ஸந்த²ரே – இட்ட²காஸந்த²ரம், ஸிலாஸந்த²ரம், தா³ருஸந்த²ர’’ந்தி. உத³கம் ஸந்திட்ட²தி…பே… ‘‘அனுஜானாமி, பி⁴க்க²வே, உத³கனித்³த⁴மன’’ந்தி.

தேன கோ² பன ஸமயேன பி⁴க்கூ²னம் க³த்தானி ஸீதிக³தானி ஹோந்தி. ப⁴க³வதோ ஏதமத்த²ம் ஆரோசேஸும்…பே… ‘‘அனுஜானாமி, பி⁴க்க²வே, உத³கபுஞ்ச²னிம் சோளகேனபி பச்சுத்³த⁴ரிது’’ந்தி.

263. தேன கோ² பன ஸமயேன அஞ்ஞதரோ உபாஸகோ ஸங்க⁴ஸ்ஸ அத்தா²ய போக்க²ரணிம் காரேதுகாமோ ஹோதி. ப⁴க³வதோ ஏதமத்த²ம் ஆரோசேஸும்…பே… ‘‘அனுஜானாமி, பி⁴க்க²வே, போக்க²ரணி’’ந்தி. போக்க²ரணியா கூலம் லுஜ்ஜதி…பே… ‘‘அனுஜானாமி, பி⁴க்க²வே, சினிதும் தயோ சயே – இட்ட²காசயம், ஸிலாசயம், தா³ருசய’’ந்தி. ஆரோஹந்தா விஹஞ்ஞந்தி…பே… ‘‘அனுஜானாமி, பி⁴க்க²வே, தயோ ஸோபானே – இட்ட²காஸோபானம், ஸிலாஸோபானம், தா³ருஸோபான’’ந்தி. ஆரோஹந்தா பரிபதந்தி…பே… ‘‘அனுஜானாமி, பி⁴க்க²வே, ஆலம்ப³னபா³ஹ’’ந்தி. போக்க²ரணியா உத³கம் புராணம் ஹோதி…பே… ‘‘அனுஜானாமி, பி⁴க்க²வே, உத³கமாதிகம் உத³கனித்³த⁴மன’’ந்தி.

தேன கோ² பன ஸமயேன அஞ்ஞதரோ பி⁴க்கு² ஸங்க⁴ஸ்ஸ அத்தா²ய நில்லேக²ம் ஜந்தாக⁴ரம் கத்துகாமோ ஹோதி. ப⁴க³வதோ ஏதமத்த²ம் ஆரோசேஸும்…பே… ‘‘அனுஜானாமி, பி⁴க்க²வே, நில்லேக²ம் ஜந்தாக⁴ர’’ந்தி.

தேன கோ² பன ஸமயேன ச²ப்³ப³க்³கி³யா பி⁴க்கூ² சாதுமாஸம் நிஸீத³னேன விப்பவஸந்தி. ப⁴க³வதோ ஏதமத்த²ம் ஆரோசேஸும்…பே… ‘‘ந, பி⁴க்க²வே, சாதுமாஸம் நிஸீத³னேன விப்பவஸிதப்³ப³ம். யோ விப்பவஸேய்ய, ஆபத்தி து³க்கடஸ்ஸா’’தி.

264. தேன கோ² பன ஸமயேன ச²ப்³ப³க்³கி³யா பி⁴க்கூ² புப்பா²பி⁴கிண்ணேஸு ஸயனேஸு ஸயந்தி. மனுஸ்ஸா விஹாரசாரிகம் ஆஹிண்ட³ந்தா பஸ்ஸித்வா உஜ்ஜா²யந்தி கி²ய்யந்தி விபாசேந்தி – ஸேய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, புப்பா²பி⁴கிண்ணேஸு ஸயனேஸு ஸயிதப்³ப³ம். யோ ஸயேய்ய, ஆபத்தி து³க்கடஸ்ஸா’’தி.

தேன கோ² பன ஸமயேன மனுஸ்ஸா க³ந்த⁴ம்பி மாலம்பி ஆதா³ய ஆராமம் ஆக³ச்ச²ந்தி. பி⁴க்கூ² குக்குச்சாயந்தா ந படிக்³க³ண்ஹந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, க³ந்த⁴ம் க³ஹேத்வா கவாடே பஞ்சங்கு³லிகம் தா³தும், புப்ப²ம் க³ஹேத்வா விஹாரே ஏகமந்தம் நிக்கி²பிது’’ந்தி.

தேன கோ² பன ஸமயேன ஸங்க⁴ஸ்ஸ நமதகம் உப்பன்னம் ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, நமதக’’ந்தி. அத² கோ² பி⁴க்கூ²னம் ஏதத³ஹோஸி – ‘‘நமதகம் அதி⁴ட்டா²தப்³ப³ம் நு கோ² உதா³ஹு விகப்பேதப்³ப³’’ந்தி…பே… ‘‘ந, பி⁴க்க²வே, நமதகம் அதி⁴ட்டா²தப்³ப³ம், ந விகப்பேதப்³ப³’’ந்தி.

தேன கோ² பன ஸமயேன ச²ப்³ப³க்³கி³யா பி⁴க்கூ² ஆஸித்தகூபதா⁴னே பு⁴ஞ்ஜந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ஸேய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ம் ஆரோசேஸும்…பே… ‘‘ந, பி⁴க்க²வே, ஆஸித்தகூபதா⁴னே பு⁴ஞ்ஜிதப்³ப³ம். யோ பு⁴ஞ்ஜேய்ய, ஆபத்தி து³க்கடஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² கி³லானோ ஹோதி. ஸோ பு⁴ஞ்ஜமானோ ந ஸக்கோதி ஹத்தே²ன பத்தம் ஸந்தா⁴ரேதும். ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, மளோரிக’’ந்தி.

தேன கோ² பன ஸமயேன ச²ப்³ப³க்³கி³யா பி⁴க்கூ² ஏகபா⁴ஜனேபி பு⁴ஞ்ஜந்தி…பே… ஏகதா²லகேபி பிவந்தி, ஏகமஞ்சேபி துவட்டேந்தி, ஏகத்த²ரணாபி துவட்டேந்தி, ஏகபாவுரணாபி துவட்டேந்தி, ஏகத்த²ரணபாவுரணாபி துவட்டேந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ஸேய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, ஏகபா⁴ஜனே பு⁴ஞ்ஜிதப்³ப³ம்…பே… ந ஏகதா²லகே பாதப்³ப³ம்… ந ஏகமஞ்சே துவட்டிதப்³ப³ம்… ந ஏகத்த²ரணா [ந ஏகத்த²ரணே] துவட்டிதப்³ப³ம்… ந ஏகபாவுரணா [ந ஏகபாவுரணே] துவட்டிதப்³ப³ம்… ந ஏகத்த²ரணபாவுரணா [ந ஏகத்த²ரணபாவுரணே (ஸ்யா.)] துவட்டிதப்³ப³ம். யோ துவட்டேய்ய, ஆபத்தி து³க்கடஸ்ஸா’’தி.

265. தேன கோ² பன ஸமயேன வட்³டோ⁴ லிச்ச²வீ மேத்தியபூ⁴மஜகானம் பி⁴க்கூ²னம் ஸஹாயோ ஹோதி. அத² கோ² வட்³டோ⁴ லிச்ச²வீ யேன மேத்தியபூ⁴மஜகா பி⁴க்கூ² தேனுபஸங்கமி, உபஸங்கமித்வா மேத்தியபூ⁴மஜகே பி⁴க்கூ² ஏதத³வோச – ‘‘வந்தா³மி அய்யா’’தி. ஏவம் வுத்தே மேத்தியபூ⁴மஜகா பி⁴க்கூ² நாலபிம்ஸு. து³தியம்பி கோ² வட்³டோ⁴ லிச்ச²வீ மேத்தியபூ⁴மஜகே பி⁴க்கூ² ஏதத³வோச – ‘‘வந்தா³மி அய்யா’’தி. து³தியம்பி கோ² மேத்தியபூ⁴மஜகா பி⁴க்கூ² நாலபிம்ஸு. ததியம்பி கோ² வட்³டோ⁴ லிச்ச²வீ மேத்தியபூ⁴மஜகே பி⁴க்கூ² ஏதத³வோச – ‘‘வந்தா³மி அய்யா’’தி. ததியம்பி கோ² மேத்தியபூ⁴மஜகா பி⁴க்கூ² நாலபிம்ஸு. ‘‘க்யாஹம் அய்யானம் அபரஜ்ஜா²மி, கிஸ்ஸ மம் அய்யா நாலபந்தீ’’தி? ‘‘ததா² ஹி பன த்வம், ஆவுஸோ வட்³ட⁴, அம்ஹே த³ப்³பே³ன மல்லபுத்தேன விஹேடி²யமானே அஜ்ஜு²பேக்க²ஸீ’’தி. ‘‘க்யாஹம் அய்யா கரோமீ’’தி? ‘‘ஸசே கோ² த்வம், ஆவுஸோ வட்³ட⁴, இச்சே²ய்யாஸி, அஜ்ஜேவ ப⁴க³வா ஆயஸ்மந்தம் த³ப்³ப³ம் மல்லபுத்தம் நாஸாபேய்யா’’தி. ‘‘க்யாஹம் அய்யா கரோமி, கிம் மயா ஸக்கா காது’’ந்தி? ‘‘ஏஹி த்வம், ஆவுஸோ வட்³ட⁴, யேன ப⁴க³வா தேனுபஸங்கம, உபஸங்கமித்வா ப⁴க³வந்தம் ஏவம் வதே³ஹி – ‘இத³ம், ப⁴ந்தே, நச்ச²ன்னம் நப்பதிரூபம். யாயம், ப⁴ந்தே, தி³ஸா அப⁴யா அனீதிகா அனுபத்³த³வா ஸாயம் தி³ஸா ஸப⁴யா ஸஈதிகா ஸஉபத்³த³வா; யதோ நிவாதம் ததோ ஸவாதம்; உத³கம் மஞ்ஞே ஆதி³த்தம்; அய்யேன மே த³ப்³பே³ன மல்லபுத்தேன பஜாபதி தூ³ஸிதா’’’தி. ‘‘ஏவம் அய்யா’’தி கோ² வட்³டோ⁴ லிச்ச²வீ மேத்தியபூ⁴மஜகானம் பி⁴க்கூ²னம் படிஸ்ஸுத்வா யேன ப⁴க³வா தேனுபஸங்கமி, உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² வட்³டோ⁴ லிச்ச²வீ ப⁴க³வந்தம் ஏதத³வோச – ‘‘இத³ம், ப⁴ந்தே, நச்ச²ன்னம் நப்பதிரூபம். யாயம், ப⁴ந்தே, தி³ஸா அப⁴யா அனீதிகா அனுபத்³த³வா ஸாயம் தி³ஸா ஸப⁴யா ஸஈதிகா ஸஉபத்³த³வா; யதோ நிவாதம் ததோ ஸவாதம்; உத³கம் மஞ்ஞே ஆதி³த்தம்; அய்யேன மே த³ப்³பே³ன மல்லபுத்தேன பஜாபதி தூ³ஸிதா’’தி.

அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே பி⁴க்கு²ஸங்க⁴ம் ஸன்னிபாதாபேத்வா ஆயஸ்மந்தம் த³ப்³ப³ம் மல்லபுத்தம் படிபுச்சி² – ‘‘ஸரஸி த்வம், த³ப்³ப³, ஏவரூபம் கத்தா யதா²யம் வட்³டோ⁴ ஆஹா’’தி? ‘‘யதா² மம், ப⁴ந்தே, ப⁴க³வா ஜானாதீ’’தி. து³தியம்பி கோ² ப⁴க³வா…பே… ததியம்பி கோ² ப⁴க³வா ஆயஸ்மந்தம் த³ப்³ப³ம் மல்லபுத்தம் ஏதத³வோச – ‘‘ஸரஸி த்வம், த³ப்³ப³, ஏவரூபம் கத்தா யதா²யம் வட்³டோ⁴ ஆஹா’’தி? ‘‘யதா² மம், ப⁴ந்தே, ப⁴க³வா ஜானாதீ’’தி. ‘‘ந கோ², த³ப்³ப³, த³ப்³பா³ ஏவம் நிப்³பே³டே²ந்தி. ஸசே தயா கதம், கதந்தி வதே³ஹி; ஸசே அகதம், அகதந்தி வதே³ஹீ’’தி. ‘‘யதோ அஹம், ப⁴ந்தே, ஜாதோ நாபி⁴ஜானாமி ஸுபினந்தேனபி மேது²னம் த⁴ம்மம் படிஸேவிதா, பகே³வ ஜாக³ரோ’’தி. அத² கோ² ப⁴க³வா பி⁴க்கூ² ஆமந்தேஸி – ‘‘தேன ஹி, பி⁴க்க²வே, ஸங்கோ⁴ வட்³ட⁴ஸ்ஸ லிச்ச²விஸ்ஸ பத்தம் நிக்குஜ்ஜது, அஸம்போ⁴க³ம் ஸங்கே⁴ன கரோது.

‘‘அட்ட²ஹி, பி⁴க்க²வே, அங்கே³ஹி ஸமன்னாக³தஸ்ஸ உபாஸகஸ்ஸ பத்தோ நிக்குஜ்ஜிதப்³போ³ – பி⁴க்கூ²னம் அலாபா⁴ய பரிஸக்கதி, பி⁴க்கூ²னம் அனத்தா²ய பரிஸக்கதி, பி⁴க்கூ²னம் அவாஸாய [அனாவாஸாய (ஸ்யா.)] பரிஸக்கதி, பி⁴க்கூ² அக்கோஸதி பரிபா⁴ஸதி, பி⁴க்கூ² பி⁴க்கூ²ஹி பே⁴தே³தி, பு³த்³த⁴ஸ்ஸ அவண்ணம் பா⁴ஸதி, த⁴ம்மஸ்ஸ அவண்ணம் பா⁴ஸதி, ஸங்க⁴ஸ்ஸ அவண்ணம் பா⁴ஸதி. அனுஜானாமி, பி⁴க்க²வே, இமேஹி அட்ட²ஹங்கே³ஹி ஸமன்னாக³தஸ்ஸ உபாஸகஸ்ஸ பத்தம் நிக்குஜ்ஜிதும். ஏவஞ்ச பன, பி⁴க்க²வே, நிக்குஜ்ஜிதப்³போ³. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

266. ‘‘ஸுணாது மே, ப⁴ந்தே, ஸங்கோ⁴. வட்³டோ⁴ லிச்ச²வீ ஆயஸ்மந்தம் த³ப்³ப³ம் மல்லபுத்தம் அமூலிகாய ஸீலவிபத்தியா அனுத்³த⁴ம்ஸேதி. யதி³ ஸங்க⁴ஸ்ஸ பத்தகல்லம், ஸங்கோ⁴ வட்³ட⁴ஸ்ஸ லிச்ச²விஸ்ஸ பத்தம் நிக்குஜ்ஜேய்ய, அஸம்போ⁴க³ம் ஸங்கே⁴ன கரேய்ய. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. வட்³டோ⁴ லிச்ச²வீ ஆயஸ்மந்தம் த³ப்³ப³ம் மல்லபுத்தம் அமூலிகாய ஸீலவிபத்தியா அனுத்³த⁴ம்ஸேதி. ஸங்கோ⁴ வட்³ட⁴ஸ்ஸ லிச்ச²விஸ்ஸ பத்தம் நிக்குஜ்ஜதி, அஸம்போ⁴க³ம் ஸங்கே⁴ன கரோதி. யஸ்ஸாயஸ்மதோ க²மதி வட்³ட⁴ஸ்ஸ லிச்ச²விஸ்ஸ பத்தஸ்ஸ நிக்குஜ்ஜனா, அஸம்போ⁴க³ம் ஸங்கே⁴ன கரணம், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘நிக்குஜ்ஜிதோ ஸங்கே⁴ன வட்³ட⁴ஸ்ஸ லிச்ச²விஸ்ஸ பத்தோ, அஸம்போ⁴கோ³ ஸங்கே⁴ன. க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

அத² கோ² ஆயஸ்மா ஆனந்தோ³ புப்³ப³ண்ஹஸமயம் நிவாஸேத்வா பத்தசீவரமாதா³ய யேன வட்³ட⁴ஸ்ஸ லிச்ச²விஸ்ஸ நிவேஸனம் தேனுபஸங்கமி, உபஸங்கமித்வா வட்³ட⁴ம் லிச்ச²விம் ஏதத³வோச – ‘‘ஸங்கே⁴ன தே, ஆவுஸோ வட்³ட⁴, பத்தோ நிக்குஜ்ஜிதோ. அஸம்போ⁴கோ³ஸி ஸங்கே⁴னா’’தி. அத² கோ² வட்³டோ⁴ லிச்ச²வீ – ஸங்கே⁴ன கிர மே பத்தோ நிக்குஜ்ஜிதோ, அஸம்போ⁴கோ³ம்ஹி கிர ஸங்கே⁴னாதி – தத்தே²வ முச்சி²தோ பபதோ. அத² கோ² வட்³ட⁴ஸ்ஸ லிச்ச²விஸ்ஸ மித்தாமச்சா ஞாதிஸாலோஹிதா வட்³ட⁴ம் லிச்ச²விம் ஏதத³வோசும் – ‘‘அலம், ஆவுஸோ வட்³ட⁴, மா ஸோசி, மா பரிதே³வி. மயம் ப⁴க³வந்தம் பஸாதே³ஸ்ஸாம பி⁴க்கு²ஸங்க⁴ஞ்சா’’தி.

அத² கோ² வட்³டோ⁴ லிச்ச²வீ ஸபுத்ததா³ரோ ஸமித்தாமச்சோ ஸஞாதிஸாலோஹிதோ அல்லவத்தோ² அல்லகேஸோ யேன ப⁴க³வா தேனுபஸங்கமி, உபஸங்கமித்வா ப⁴க³வதோ பாதே³ஸு ஸிரஸா நிபதித்வா ப⁴க³வந்தம் ஏதத³வோச – ‘‘அச்சயோ மம், ப⁴ந்தே, அச்சக³மா யதா²பா³லம் யதா²மூள்ஹம் யதா²அகுஸலம், யோஹம் அய்யம் த³ப்³ப³ம் மல்லபுத்தம் அமூலிகாய ஸீலவிபத்தியா அனுத்³த⁴ம்ஸேஸிம். தஸ்ஸ மே, ப⁴ந்தே, ப⁴க³வா அச்சயம் அச்சயதோ படிக்³க³ண்ஹாது ஆயதிம் ஸம்வராயா’’தி. ‘‘தக்³க⁴ த்வம், ஆவுஸோ வட்³ட⁴, அச்சயோ அச்சக³மா யதா²பா³லம் யதா²மூள்ஹம் யதா²அகுஸலம், யம் த்வம் த³ப்³ப³ம் மல்லபுத்தம் அமூலிகாய ஸீலவிபத்தியா அனுத்³த⁴ம்ஸேஸி. யதோ ச கோ² த்வம், ஆவுஸோ வட்³ட⁴, அச்சயம் அச்சயதோ தி³ஸ்வா யதா²த⁴ம்மம் படிகரோஸி, தம் தே மயம் படிக்³க³ண்ஹாம. வுட்³டி⁴ஹேஸா, ஆவுஸோ வட்³ட⁴, அரியஸ்ஸ வினயே யோ அச்சயம் அச்சயதோ தி³ஸ்வா யதா²த⁴ம்மம் படிகரோதி, ஆயதிம் ஸம்வரம் ஆபஜ்ஜதீ’’தி. அத² கோ² ப⁴க³வா பி⁴க்கூ² ஆமந்தேஸி – ‘‘தேன ஹி, பி⁴க்க²வே, ஸங்கோ⁴ வட்³ட⁴ஸ்ஸ லிச்ச²விஸ்ஸ பத்தம் உக்குஜ்ஜது, ஸம்போ⁴க³ம் ஸங்கே⁴ன கரோது.

‘‘அட்ட²ஹி, பி⁴க்க²வே, அங்கே³ஹி ஸமன்னாக³தஸ்ஸ உபாஸகஸ்ஸ பத்தோ உக்குஜ்ஜிதப்³போ³ – ந பி⁴க்கூ²னம் அலாபா⁴ய பரிஸக்கதி, ந பி⁴க்கூ²னம் அனத்தா²ய பரிஸக்கதி, ந பி⁴க்கூ²னம் அவாஸாய பரிஸக்கதி, ந பி⁴க்கூ² அக்கோஸதி பரிபா⁴ஸதி, ந பி⁴க்கூ² பி⁴க்கூ²ஹி பே⁴தே³தி, ந பு³த்³த⁴ஸ்ஸ அவண்ணம் பா⁴ஸதி, ந த⁴ம்மஸ்ஸ அவண்ணம் பா⁴ஸதி, ந ஸங்க⁴ஸ்ஸ அவண்ணம் பா⁴ஸதி. அனுஜானாமி, பி⁴க்க²வே, இமேஹி அட்ட²ஹங்கே³ஹி ஸமன்னாக³தஸ்ஸ உபாஸகஸ்ஸ பத்தம் உக்குஜ்ஜிதும். ஏவஞ்ச பன, பி⁴க்க²வே, உக்குஜ்ஜிதப்³போ³. தேன, பி⁴க்க²வே, வட்³டே⁴ன லிச்ச²வினா ஸங்க⁴ம் உபஸங்கமித்வா ஏகம்ஸம் உத்தராஸங்க³ம் கரித்வா பி⁴க்கூ²னம் பாதே³ வந்தி³த்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘ஸங்கே⁴ன மே, ப⁴ந்தே, பத்தோ நிக்குஜ்ஜிதோ, அஸம்போ⁴கோ³ம்ஹி ஸங்கே⁴ன. ஸோஹம், ப⁴ந்தே, ஸம்மா வத்தாமி, லோமம் பாதேமி, நேத்தா²ரம் வத்தாமி, ஸங்க⁴ம் பத்துக்குஜ்ஜனம் யாசாமீ’தி. து³தியம்பி யாசிதப்³போ³. ததியம்பி யாசிதப்³போ³. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

267. ‘‘ஸுணாது மே, ப⁴ந்தே, ஸங்கோ⁴. ஸங்கே⁴ன வட்³ட⁴ஸ்ஸ லிச்ச²விஸ்ஸ பத்தோ நிக்குஜ்ஜிதோ, அஸம்போ⁴கோ³ ஸங்கே⁴ன. ஸோ ஸம்மா வத்ததி, லோமம் பாதேதி, நேத்தா²ரம் வத்ததி, ஸங்க⁴ம் பத்துக்குஜ்ஜனம் யாசதி. யதி³ ஸங்க⁴ஸ்ஸ பத்தகல்லம், ஸங்கோ⁴ வட்³ட⁴ஸ்ஸ லிச்ச²விஸ்ஸ பத்தம் உக்குஜ்ஜேய்ய, ஸம்போ⁴க³ம் ஸங்கே⁴ன கரேய்ய. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. ஸங்கே⁴ன வட்³ட⁴ஸ்ஸ லிச்ச²விஸ்ஸ பத்தோ நிக்குஜ்ஜிதோ, அஸம்போ⁴கோ³ ஸங்கே⁴ன. ஸோ ஸம்மா வத்ததி, லோமம் பாதேதி, நேத்தா²ரம் வத்ததி, ஸங்க⁴ம் பத்துக்குஜ்ஜனம் யாசதி. ஸங்கோ⁴ வட்³ட⁴ஸ்ஸ லிச்ச²விஸ்ஸ பத்தம் உக்குஜ்ஜதி, ஸம்போ⁴க³ம் ஸங்கே⁴ன கரோதி. யஸ்ஸாயஸ்மதோ க²மதி வட்³ட⁴ஸ்ஸ லிச்ச²விஸ்ஸ பத்தஸ்ஸ உக்குஜ்ஜனா, ஸம்போ⁴க³ம் ஸங்கே⁴ன கரணம், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘உக்குஜ்ஜிதோ ஸங்கே⁴ன வட்³ட⁴ஸ்ஸ லிச்ச²விஸ்ஸ பத்தோ, ஸம்போ⁴கோ³ ஸங்கே⁴ன. க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

268. அத² கோ² ப⁴க³வா வேஸாலியம் யதா²பி⁴ரந்தம் விஹரித்வா யேன ப⁴க்³கா³ தேன சாரிகம் பக்காமி. அனுபுப்³பே³ன சாரிகம் சரமானோ யேன ப⁴க்³கா³ தத³வஸரி. தத்ர ஸுத³ம் ப⁴க³வா ப⁴க்³கே³ஸு விஹரதி ஸுஸுமாரகி³ரே [ஸும்ஸுமாரகி³ரே (ஸீ. ஸ்யா.), ஸம்ஸுமாரகி³ரே (க.)] பே⁴ஸகளாவனே மிக³தா³யே. தேன கோ² பன ஸமயேன போ³தி⁴ஸ்ஸ ராஜகுமாரஸ்ஸ கோகனதோ³ [கோகனுதோ³ (க.)] நாம பாஸாதோ³ அசிரகாரிதோ ஹோதி, அனஜ்ஜா²வுத்தோ² ஸமணேன வா ப்³ராஹ்மணேன வா கேனசி வா மனுஸ்ஸபூ⁴தேன. அத² கோ² போ³தி⁴ ராஜகுமாரோ ஸஞ்ஜிகாபுத்தம் மாணவம் ஆமந்தேஸி – ‘‘ஏஹி த்வம், ஸம்ம ஸஞ்சிகாபுத்த, யேன ப⁴க³வா தேனுபஸங்கம, உபஸங்கமித்வா மம வசனேன ப⁴க³வதோ பாதே³ ஸிரஸா வந்த³; அப்பாபா³த⁴ம் அப்பாதங்கம் லஹுட்டா²னம் ப³லம் பா²ஸுவிஹாரம் புச்ச² – ‘போ³தி⁴, ப⁴ந்தே, ராஜகுமாரோ ப⁴க³வதோ பாதே³ ஸிரஸா வந்த³தி, அப்பாபா³த⁴ம் அப்பாதங்கம் லஹுட்டா²னம் ப³லம் பா²ஸுவிஹாரம் புச்ச²தீ’தி. ஏவஞ்ச வதே³ஹி – ‘அதி⁴வாஸேது கிர, ப⁴ந்தே, ப⁴க³வா போ³தி⁴ஸ்ஸ ராஜகுமாரஸ்ஸ ஸ்வாதனாய ப⁴த்தம் ஸத்³தி⁴ம் பி⁴க்கு²ஸங்கே⁴னா’’’தி. ‘‘ஏவம் போ⁴’’தி கோ² ஸஞ்சிகாபுத்தோ மாணவோ போ³தி⁴ஸ்ஸ ராஜகுமாரஸ்ஸ படிஸ்ஸுத்வா யேன ப⁴க³வா தேனுபஸங்கமி, உபஸங்கமித்வா ப⁴க³வதா ஸத்³தி⁴ம் ஸம்மோதி³, ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³. ஏகமந்தம் நிஸின்னோ கோ² ஸஞ்சிகாபுத்தோ மாணவோ ப⁴க³வந்தம் ஏதத³வோச – ‘‘போ³தி⁴ கோ² ராஜகுமாரோ போ⁴தோ கோ³தமஸ்ஸ பாதே³ ஸிரஸா வந்த³தி, அப்பாபா³த⁴ம் அப்பாதங்கம் லஹுட்டா²னம் ப³லம் பா²ஸுவிஹாரம் புச்ச²தி. ஏவஞ்ச வதே³தி – ‘அதி⁴வாஸேது கிர ப⁴வம் கோ³தமோ போ³தி⁴ஸ்ஸ ராஜகுமாரஸ்ஸ ஸ்வாதனாய ப⁴த்தம் ஸத்³தி⁴ம் பி⁴க்கு²ஸங்கே⁴னா’’’தி. அதி⁴வாஸேஸி ப⁴க³வா துண்ஹீபா⁴வேன. அத² கோ² ஸஞ்சிகாபுத்தோ மாணவோ ப⁴க³வதோ அதி⁴வாஸனம் விதி³த்வா உட்டா²யாஸனா யேன போ³தி⁴ ராஜகுமாரோ தேனுபஸங்கமி, உபஸங்கமித்வா போ³தி⁴ம் ராஜகுமாரம் ஏதத³வோச – ‘‘அவோசும்ஹ கோ² மயம் போ⁴தோ வசனேன தம் ப⁴வந்தம் கோ³தமம் – ‘போ³தி⁴ கோ² ராஜகுமாரோ போ⁴தோ கோ³தமஸ்ஸ பாதே³ ஸிரஸா வந்த³தி, அப்பாபா³த⁴ம் அப்பாதங்கம் லஹுட்டா²னம் ப³லம் பா²ஸுவிஹாரம் புச்ச²தி. ஏவஞ்ச வதே³தி – அதி⁴வாஸேது கிர ப⁴வம் கோ³தமோ போ³தி⁴ஸ்ஸ ராஜகுமாரஸ்ஸ ஸ்வாதனாய ப⁴த்தம் ஸத்³தி⁴ம் பி⁴க்கு²ஸங்கே⁴னா’தி. அதி⁴வுத்த²ஞ்ச பன ஸமணேன கோ³தமேனா’’தி.

அத² கோ² போ³தி⁴ ராஜகுமாரோ தஸ்ஸா ரத்தியா அச்சயேன பணீதம் கா²த³னீயம் போ⁴ஜனீயம் படியாதா³பேத்வா, கோகனத³ஞ்ச பாஸாத³ம் ஓதா³தேஹி து³ஸ்ஸேஹி ஸந்த²ராபேத்வா யாவ பச்சி²மஸோபானகளேவரா, ஸஞ்சிகாபுத்தம் மாணவம் ஆமந்தேஸி – ‘‘ஏஹி த்வம், ஸம்ம ஸஞ்சிகாபுத்த, யேன ப⁴க³வா தேனுபஸங்கம, உபஸங்கமித்வா ப⁴க³வதோ காலம் ஆரோசேஹி – ‘காலோ, ப⁴ந்தே நிட்டி²தம் ப⁴த்த’’’ந்தி. ‘‘ஏவம் போ⁴’’தி கோ² ஸஞ்சிகாபுத்தோ மாணவோ போ³தி⁴ஸ்ஸ ராஜகுமாரஸ்ஸ படிஸ்ஸுத்வா யேன ப⁴க³வா தேனுபஸங்கமி, உபஸங்கமித்வா ப⁴க³வதோ காலம் ஆரோசேஸி – ‘‘காலோ, போ⁴ கோ³தம, நிட்டி²தம் ப⁴த்த’’ந்தி.

அத² கோ² ப⁴க³வா புப்³ப³ண்ஹஸமயம் நிவாஸேத்வா பத்தசீவரமாதா³ய யேன போ³தி⁴ஸ்ஸ ராஜகுமாரஸ்ஸ நிவேஸனம் தேனுபஸங்கமி. தேன கோ² பன ஸமயேன போ³தி⁴ ராஜகுமாரோ ப³ஹித்³வாரகோட்ட²கே டி²தோ ஹோதி, ப⁴க³வந்தம் ஆக³மயமானோ. அத்³த³ஸா கோ² போ³தி⁴ ராஜகுமாரோ ப⁴க³வந்தம் தூ³ரதோவ ஆக³ச்ச²ந்தம். தி³ஸ்வான ததோ பச்சுக்³க³ந்த்வா ப⁴க³வந்தம் அபி⁴வாதே³த்வா புரேக்க²த்வா யேன கோகனதோ³ பாஸாதோ³ தேனுபஸங்கமி. அத² கோ² ப⁴க³வா பச்சி²மஸோபானகளேவரம் நிஸ்ஸாய அட்டா²ஸி. அத² கோ² போ³தி⁴ ராஜகுமாரோ ப⁴க³வந்தம் ஏதத³வோச – ‘‘அக்கமது, ப⁴ந்தே, ப⁴க³வா து³ஸ்ஸானி, அக்கமது ஸுக³தோ து³ஸ்ஸானி, யம் மம அஸ்ஸ தீ³க⁴ரத்தம் ஹிதாய ஸுகா²யா’’தி. ஏவம் வுத்தே ப⁴க³வா துண்ஹீ அஹோஸி. து³தியம்பி கோ²…பே… ததியம்பி கோ² போ³தி⁴ ராஜகுமாரோ ப⁴க³வந்தம் ஏதத³வோச – ‘‘அக்கமது, ப⁴ந்தே, ப⁴க³வா து³ஸ்ஸானி, அக்கமது ஸுக³தோ து³ஸ்ஸானி, யம் மம அஸ்ஸ தீ³க⁴ரத்தம் ஹிதாய ஸுகா²யா’’தி. அத² கோ² ப⁴க³வா ஆயஸ்மந்தம் ஆனந்த³ம் அபலோகேஸி. அத² கோ² ஆயஸ்மா ஆனந்தோ³ போ³தி⁴ம் ராஜகுமாரம் ஏதத³வோச – ‘‘ஸம்ஹரந்து, ராஜகுமார, து³ஸ்ஸானி. ந ப⁴க³வா சேலபடிகம் [சேலபத்திகம் (ஸீ.)] அக்கமிஸ்ஸதி பச்சி²மம் ஜனதம் ததா²க³தோ அனுகம்பதீ’’தி.

அத² கோ² போ³தி⁴ ராஜகுமாரோ து³ஸ்ஸானி ஸம்ஹராபேத்வா உபரிகோகனதே³ பாஸாதே³ ஆஸனம் பஞ்ஞபேஸி. அத² கோ² ப⁴க³வா கோகனத³ம் பாஸாத³ம் அபி⁴ருஹித்வா பஞ்ஞத்தே ஆஸனே நிஸீதி³ ஸத்³தி⁴ம் பி⁴க்கு²ஸங்கே⁴ன. அத² கோ² போ³தி⁴ ராஜகுமாரோ பு³த்³த⁴ப்பமுக²ம் பி⁴க்கு²ஸங்க⁴ம் பணீதேன கா²த³னீயேன போ⁴ஜனீயேன ஸஹத்தா² ஸந்தப்பேத்வா ஸம்பவாரேத்வா, ப⁴க³வந்தம் பு⁴த்தாவிம் ஓனீதபத்தபாணிம், ஏகமந்தம் நிஸீதி³. ஏகமந்தம் நிஸின்னம் கோ² போ³தி⁴ம் ராஜகுமாரம் ப⁴க³வா த⁴ம்மியா கதா²ய ஸந்த³ஸ்ஸேத்வா ஸமாத³பேத்வா ஸமுத்தேஜேத்வா ஸம்பஹம்ஸேத்வா உட்டா²யாஸனா பக்காமி. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘ந, பி⁴க்க²வே, சேலபடிகா அக்கமிதப்³பா³. யோ அக்கமேய்ய, ஆபத்தி து³க்கடஸ்ஸா’’தி.

தேன கோ² பன ஸமயேன அஞ்ஞதரா இத்தீ² அபக³தக³ப்³பா⁴ பி⁴க்கூ² நிமந்தேத்வா து³ஸ்ஸம் பஞ்ஞபேத்வா ஏதத³வோச – ‘‘அக்கமத², ப⁴ந்தே, து³ஸ்ஸ’’ந்தி. பி⁴க்கூ² குக்குச்சாயந்தா ந அக்கமந்தி. ‘‘அக்கமத², ப⁴ந்தே, து³ஸ்ஸம் மங்க³லத்தா²யா’’தி. பி⁴க்கூ² குக்குச்சாயந்தா ந அக்கமிம்ஸு. அத² கோ² ஸா இத்தீ² உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம அய்யா மங்க³லத்தா²ய யாசியமானா சேலப்படிகம் ந அக்கமிஸ்ஸந்தீ’’தி! அஸ்ஸோஸும் கோ² பி⁴க்கூ² தஸ்ஸா இத்தி²யா உஜ்ஜா²யந்தியா கி²ய்யந்தியா விபாசேந்தியா. அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும். ‘‘கி³ஹீ, பி⁴க்க²வே, மங்க³லிகா. அனுஜானாமி, பி⁴க்க²வே, கி³ஹீனம் மங்க³லத்தா²ய யாசியமானேன சேலப்படிகம் அக்கமிது’’ந்தி.

தேன கோ² பன ஸமயேன பி⁴க்கூ² தோ⁴தபாத³கம் அக்கமிதும் குக்குச்சாயந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, தோ⁴தபாத³கம் அக்கமிது’’ந்தி.

து³தியபா⁴ணவாரோ நிட்டி²தோ.

269. அத² கோ² ப⁴க³வா ப⁴க்³கே³ஸு யதா²பி⁴ரந்தம் விஹரித்வா யேன ஸாவத்தி² தேன சாரிகம் பக்காமி. அனுபுப்³பே³ன சாரிகம் சரமானோ யேன ஸாவத்தி² தத³வஸரி. தத்ர ஸுத³ம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. அத² கோ² விஸாகா² மிகா³ரமாதா க⁴டகஞ்ச கதகஞ்ச ஸம்மஜ்ஜனிஞ்ச ஆதா³ய யேன ப⁴க³வா தேனுபஸங்கமி, உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னா கோ² விஸாகா² மிகா³ரமாதா ப⁴க³வந்தம் ஏதத³வோச – ‘‘படிக்³க³ண்ஹாது மே, ப⁴ந்தே, ப⁴க³வா க⁴டகஞ்ச கதகஞ்ச ஸம்மஜ்ஜனிஞ்ச, யம் மம அஸ்ஸ தீ³க⁴ரத்தம் ஹிதாய ஸுகா²யா’’தி. படிக்³க³ஹேஸி ப⁴க³வா க⁴டகஞ்ச ஸம்மஜ்ஜனிஞ்ச. ந ப⁴க³வா கதகம் படிக்³க³ஹேஸி. அத² கோ² ப⁴க³வா விஸாக²ம் மிகா³ரமாதரம் த⁴ம்மியா கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹம்ஸேஸி. அத² கோ² விஸாகா² மிகா³ரமாதா ப⁴க³வதா த⁴ம்மியா கதா²ய ஸந்த³ஸ்ஸிதா ஸமாத³பிதா ஸமுத்தேஜிதா ஸம்பஹம்ஸிதா உட்டா²யாஸனா ப⁴க³வந்தம் அபி⁴வாதே³த்வா பத³க்கி²ணம் கத்வா பக்காமி.

அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, க⁴டகஞ்ச ஸம்மஜ்ஜனிஞ்ச. ந, பி⁴க்க²வே, கதகம் பரிபு⁴ஞ்ஜிதப்³ப³ம். யோ பரிபு⁴ஞ்ஜேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, திஸ்ஸோ பாத³க⁴ம்ஸனியோ – ஸக்க²ரம், கத²லம், ஸமுத்³த³பே²ணக’’ந்தி.

அத² கோ² விஸாகா² மிகா³ரமாதா விதூ⁴பனஞ்ச தாலவண்டஞ்ச [தாலவண்ட³ஞ்ச (க.)] ஆதா³ய யேன ப⁴க³வா தேனுபஸங்கமி, உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னா கோ² விஸாகா² மிகா³ரமாதா ப⁴க³வந்தம் ஏதத³வோச – ‘‘படிக்³க³ண்ஹாது மே, ப⁴ந்தே, ப⁴க³வா விதூ⁴பனஞ்ச தாலவண்டஞ்ச, யம் மம அஸ்ஸ தீ³க⁴ரத்தம் ஹிதாய ஸுகா²யா’’தி. படிக்³க³ஹேஸி ப⁴க³வா விதூ⁴பனஞ்ச தாலவண்டஞ்ச.

அத² கோ² ப⁴க³வா விஸாக²ம் மிகா³ரமாதரம் த⁴ம்மியா கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹம்ஸேஸி…பே… பத³க்கி²ணம் கத்வா பக்காமி. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, விதூ⁴பனஞ்ச தாலவண்டஞ்சா’’தி.

தேன கோ² பன ஸமயேன ஸங்க⁴ஸ்ஸ மகஸபீ³ஜனீ உப்பன்னா ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, மகஸபீ³ஜனி’’ந்தி. சாமரிபீ³ஜனீ உப்பன்னா ஹோதி. ப⁴க³வதோ ஏதமத்த²ம் ஆரோசேஸும். ‘‘ந, பி⁴க்க²வே, சாமரிபீ³ஜனீ தா⁴ரேதப்³பா³. யோ தா⁴ரேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, திஸ்ஸோ பீ³ஜனியோ – வாகமயம், உஸீரமயம், மோரபிஞ்ச²மய’’ந்தி.

270. தேன கோ² பன ஸமயேன ஸங்க⁴ஸ்ஸ ச²த்தம் உப்பன்னம் ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, ச²த்த’’ந்தி.

தேன கோ² பன ஸமயேன ச²ப்³ப³க்³கி³யா பி⁴க்கூ² ச²த்தப்பக்³க³ஹிதா [ச²த்தம் பக்³க³ஹேத்வா (க.)] ஆஹிண்ட³ந்தி. தேன கோ² பன ஸமயேன அஞ்ஞதரோ உபாஸகோ ஸம்ப³ஹுலேஹி ஆஜீவகஸாவகேஹி ஸத்³தி⁴ம் உய்யானம் அக³மாஸி. அத்³த³ஸாஸும் கோ² தே ஆஜீவகஸாவகா ச²ப்³ப³க்³கி³யே பி⁴க்கூ² தூ³ரதோவ ச²த்தப்பக்³க³ஹிதே ஆக³ச்ச²ந்தே. தி³ஸ்வான தம் உபாஸகம் ஏதத³வோசும் – ‘‘ஏதே கோ², அய்யா [அய்யோ (க.)], தும்ஹாகம் ப⁴த³ந்தா ச²த்தப்பக்³க³ஹிதா ஆக³ச்ச²ந்தி, ஸேய்யதா²பி க³ணகமஹாமத்தா’’தி. ‘‘நாய்யா ஏதே பி⁴க்கூ², பரிப்³பா³ஜகா’’தி. ‘பி⁴க்கூ² ந பி⁴க்கூ²’தி அப்³பு⁴தம் அகம்ஸு. அத² கோ² ஸோ உபாஸகோ உபக³தே ஸஞ்ஜானித்வா உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம ப⁴த³ந்தா ச²த்தப்பக்³க³ஹிதா ஆஹிண்டி³ஸ்ஸந்தீ’’தி! அஸ்ஸோஸும் கோ² பி⁴க்கூ² தஸ்ஸ உபாஸகஸ்ஸ உஜ்ஜா²யந்தஸ்ஸ கி²ய்யந்தஸ்ஸ விபாசேந்தஸ்ஸ. அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும். ‘‘ஸச்சம் கிர, பி⁴க்க²வே…பே… ‘‘ஸச்சம் ப⁴க³வா’’தி…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘ந, பி⁴க்க²வே, ச²த்தம் தா⁴ரேதப்³ப³ம். யோ தா⁴ரேய்ய, ஆபத்தி து³க்கடஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² கி³லானோ ஹோதி. தஸ்ஸ பி⁴க்கு²னோ வினா ச²த்தம் ந பா²ஸு ஹோதி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, கி³லானஸ்ஸ ச²த்தம் தா⁴ரேது’’ந்தி.

தேன கோ² பன ஸமயேன பி⁴க்கூ² – கி³லானஸ்ஸேவ ப⁴க³வதா ச²த்தம் அனுஞ்ஞாதம் நோ அகி³லானஸ்ஸாதி – ஆராமே ஆராமூபசாரே ச²த்தம் தா⁴ரேதும் குக்குச்சாயந்தி. ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, அகி³லானேனபி ஆராமே ஆராமூபசாரே ச²த்தம் தா⁴ரேது’’ந்தி.

தேன கோ² பன ஸமயேன அஞ்ஞதரோ பி⁴க்கு² ஸிக்காய பத்தம் உட்டித்வா த³ண்டே³ ஆலக்³கி³த்வா விகாலே அஞ்ஞதரேன கா³மத்³வாரேன அதிக்கமதி. மனுஸ்ஸா – ‘ஏஸய்யோ சோரோ க³ச்ச²தி, அஸிஸ்ஸ விஜ்ஜோதலதீ’தி அனுபதித்வா க³ஹேத்வா ஸஞ்ஜானித்வா முஞ்சிம்ஸு. அத² கோ² ஸோ பி⁴க்கு² ஆராமம் க³ந்த்வா பி⁴க்கூ²னம் ஏதமத்த²ம் ஆரோசேஸி. ‘‘கிம் பன த்வம், ஆவுஸோ, த³ண்ட³ஸிக்கம் தா⁴ரேஸீ’’தி? ‘‘ஏவமாவுஸோ’’தி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு² த³ண்ட³ஸிக்கம் தா⁴ரேஸ்ஸஸீ’’தி! அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் ப⁴க³வா’’தி…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘ந, பி⁴க்க²வே, த³ண்ட³ஸிக்கா தா⁴ரேதப்³பா³. யோ தா⁴ரேய்ய, ஆபத்தி து³க்கடஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² கி³லானோ ஹோதி, ந ஸக்கோதி வினா த³ண்டே³ன ஆஹிண்டி³தும். ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, கி³லானஸ்ஸ பி⁴க்கு²னோ த³ண்ட³ஸம்முதிம் தா³தும். ஏவஞ்ச பன, பி⁴க்க²வே, தா³தப்³பா³. தேன கி³லானேன பி⁴க்கு²னா ஸங்க⁴ம் உபஸங்கமித்வா ஏகம்ஸம் உத்தராஸங்க³ம் கரித்வா வுட்³டா⁴னம் பி⁴க்கூ²னம் பாதே³ வந்தி³த்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘அஹம், ப⁴ந்தே, கி³லானோ; ந ஸக்கோமி வினா த³ண்டே³ன ஆஹிண்டி³தும். ஸோஹம், ப⁴ந்தே, ஸங்க⁴ம் த³ண்ட³ஸம்முதிம் யாசாமீ’தி. து³தியம்பி யாசிதப்³பா³. ததியம்பி யாசிதப்³பா³. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

‘‘ஸுணாது மே, ப⁴ந்தே, ஸங்கோ⁴. அயம் இத்த²ன்னாமோ பி⁴க்கு² கி³லானோ, ந ஸக்கோதி வினா த³ண்டே³ன ஆஹிண்டி³தும். ஸோ ஸங்க⁴ம் த³ண்ட³ஸம்முதிம் யாசதி. யதி³ ஸங்க⁴ஸ்ஸ பத்தகல்லம், ஸங்கோ⁴ இத்த²ன்னாமஸ்ஸ பி⁴க்கு²னோ த³ண்ட³ஸம்முதிம் த³தே³ய்ய. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. அயம் இத்த²ன்னாமோ பி⁴க்கு² கி³லானோ, ந ஸக்கோதி வினா த³ண்டே³ன ஆஹிண்டி³தும். ஸோ ஸங்க⁴ம் த³ண்ட³ஸம்முதிம் யாசதி. ஸங்கோ⁴ இத்த²ன்னாமஸ்ஸ பி⁴க்கு²னோ த³ண்ட³ஸம்முதிம் தே³தி. யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ த³ண்ட³ஸம்முதியா தா³னம், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘தி³ன்னா ஸங்கே⁴ன இத்த²ன்னாமஸ்ஸ பி⁴க்கு²னோ த³ண்ட³ஸம்முதி. க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

271. தேன கோ² பன ஸமயேன அஞ்ஞதரோ பி⁴க்கு² கி³லானோ ஹோதி, ந ஸக்கோதி வினா ஸிக்காய பத்தம் பரிஹரிதும். ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, கி³லானஸ்ஸ பி⁴க்கு²னோ ஸிக்காஸம்முதிம் தா³தும். ஏவஞ்ச பன, பி⁴க்க²வே, தா³தப்³பா³. தேன கி³லானேன பி⁴க்கு²னா ஸங்க⁴ம் உபஸங்கமித்வா ஏகம்ஸம் உத்தராஸங்க³ம் கரித்வா வுட்³டா⁴னம் பி⁴க்கூ²னம் பாதே³ வந்தி³த்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘அஹம், ப⁴ந்தே, கி³லானோ; ந ஸக்கோமி வினா ஸிக்காய பத்தம் பரிஹரிதும். ஸோஹம், ப⁴ந்தே, ஸங்க⁴ம் ஸிக்காஸம்முதிம் யாசாமீ’தி. து³தியம்பி யாசிதப்³பா³. ததியம்பி யாசிதப்³பா³. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

‘‘ஸுணாது மே, ப⁴ந்தே, ஸங்கோ⁴. அயம் இத்த²ன்னாமோ பி⁴க்கு² கி³லானோ, ந ஸக்கோதி வினா ஸிக்காய பத்தம் பரிஹரிதும். ஸோ ஸங்க⁴ம் ஸிக்காஸம்முதிம் யாசதி. யதி³ ஸங்க⁴ஸ்ஸ பத்தகல்லம், ஸங்கோ⁴ இத்த²ன்னாமஸ்ஸ பி⁴க்கு²னோ ஸிக்காஸம்முதிம் த³தே³ய்ய. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. அயம் இத்த²ன்னாமோ பி⁴க்கு² கி³லானோ, ந ஸக்கோதி வினா ஸிக்காய பத்தம் பரிஹரிதும். ஸோ ஸங்க⁴ம் ஸிக்காஸம்முதிம் யாசதி. ஸங்கோ⁴ இத்த²ன்னாமஸ்ஸ பி⁴க்கு²னோ ஸிக்காஸம்முதிம் தே³தி. யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ ஸிக்காஸம்முதியா தா³னம், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘தி³ன்னா ஸங்கே⁴ன இத்த²ன்னாமஸ்ஸ பி⁴க்கு²னோ ஸிக்காஸம்முதி. க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

272. தேன கோ² பன ஸமயேன அஞ்ஞதரோ பி⁴க்கு² கி³லானோ ஹோதி, ந ஸக்கோதி வினா த³ண்டே³ன ஆஹிண்டி³தும், ந ஸக்கோதி வினா ஸிக்காய பத்தம் பரிஹரிதும். ப⁴க³வதோ ஏதமத்த²ம் ஆரோசேஸும். ‘‘அனுஜானாமி, பி⁴க்க²வே, கி³லானஸ்ஸ பி⁴க்கு²னோ த³ண்ட³ஸிக்காஸம்முதிம் தா³தும். ஏவஞ்ச பன, பி⁴க்க²வே, தா³தப்³பா³. தேன கி³லானேன பி⁴க்கு²னா ஸங்க⁴ம் உபஸங்கமித்வா ஏகம்ஸம் உத்தராஸங்க³ம் கரித்வா வுட்³டா⁴னம் பி⁴க்கூ²னம் பாதே³ வந்தி³த்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘அஹம், ப⁴ந்தே, கி³லானோ; ந ஸக்கோமி வினா த³ண்டே³ன ஆஹிண்டி³தும்; ந ஸக்கோமி வினா ஸிக்காய பத்தம் பரிஹரிதும். ஸோஹம், ப⁴ந்தே, ஸங்க⁴ம் த³ண்ட³ஸிக்காஸம்முதிம் யாசாமீ’தி. து³தியம்பி யாசிதப்³பா³. ததியம்பி யாசிதப்³பா³. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

‘‘ஸுணாது மே, ப⁴ந்தே, ஸங்கோ⁴. அயம் இத்த²ன்னாமோ பி⁴க்கு² கி³லானோ, ந ஸக்கோதி வினா த³ண்டே³ன ஆஹிண்டி³தும், ந ஸக்கோதி வினா ஸிக்காய பத்தம் பரிஹரிதும். ஸோ ஸங்க⁴ம் த³ண்ட³ஸிக்காஸம்முதிம் யாசதி. யதி³ ஸங்க⁴ஸ்ஸ பத்தகல்லம், ஸங்கோ⁴ இத்த²ன்னாமஸ்ஸ பி⁴க்கு²னோ த³ண்ட³ஸிக்காஸம்முதிம் த³தே³ய்ய. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. அயம் இத்த²ன்னாமோ பி⁴க்கு² கி³லானோ ந ஸக்கோதி வினா த³ண்டே³ன ஆஹிண்டி³தும், ந ஸக்கோதி வினா ஸிக்காய பத்தம் பரிஹரிதும். ஸோ ஸங்க⁴ம் த³ண்ட³ஸிக்காஸம்முதிம் யாசதி. ஸங்கோ⁴ இத்த²ன்னாமஸ்ஸ பி⁴க்கு²னோ த³ண்ட³ஸிக்காஸம்முதிம் தே³தி. யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ த³ண்ட³ஸிக்காஸம்முதியா தா³னம், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘தி³ன்னா ஸங்கே⁴ன இத்த²ன்னாமஸ்ஸ பி⁴க்கு²னோ த³ண்ட³ஸிக்காஸம்முதி. க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.