4. படிஸாரணீயகம்மம்

33. தேன கோ² பன ஸமயேன ஆயஸ்மா ஸுத⁴ம்மோ மச்சி²காஸண்டே³ சித்தஸ்ஸ க³ஹபதினோ ஆவாஸிகோ ஹோதி, நவகம்மிகோ து⁴வப⁴த்திகோ. யதா³ சித்தோ க³ஹபதி ஸங்க⁴ம் வா க³ணம் வா புக்³க³லம் வா நிமந்தேதுகாமோ ஹோதி ததா³ ந ஆயஸ்மந்தம் ஸுத⁴ம்மம் அனபலோகேத்வா ஸங்க⁴ம் வா க³ணம் வா புக்³க³லம் வா நிமந்தேதி.

தேன கோ² பன ஸமயேன ஸம்ப³ஹுலா தே²ரா பி⁴க்கூ², ஆயஸ்மா ச ஸாரிபுத்தோ, ஆயஸ்மா ச மஹாமோக்³க³ல்லானோ, ஆயஸ்மா ச மஹாகச்சானோ, ஆயஸ்மா ச மஹாகோட்டி²கோ, ஆயஸ்மா ச மஹாகப்பினோ, ஆயஸ்மா ச மஹாசுந்தோ³, ஆயஸ்மா ச அனுருத்³தோ⁴, ஆயஸ்மா ச ரேவதோ, ஆயஸ்மா ச உபாலி, ஆயஸ்மா ச ஆனந்தோ³, ஆயஸ்மா ச ராஹுலோ, காஸீஸு சாரிகம் சரமானா யேன மச்சி²காஸண்டோ³ தத³வஸரும்.

அஸ்ஸோஸி கோ² சித்தோ க³ஹபதி தே²ரா கிர பி⁴க்கூ² மச்சி²காஸண்ட³ம் அனுப்பத்தாதி. அத² கோ² சித்தோ க³ஹபதி யேன தே²ரா பி⁴க்கூ² தேனுபஸங்கமி, உபஸங்கமித்வா தே²ரே பி⁴க்கூ² அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னம் கோ² சித்தம் க³ஹபதிம் ஆயஸ்மா ஸாரிபுத்தோ த⁴ம்மியா கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹம்ஸேஸி.

அத² கோ² சித்தோ க³ஹபதி ஆயஸ்மதா ஸாரிபுத்தேன த⁴ம்மியா கதா²ய ஸந்த³ஸ்ஸிதோ ஸமாத³பிதோ ஸமுத்தேஜிதோ ஸம்பஹம்ஸிதோ தே²ரே பி⁴க்கூ² ஏதத³வோச – ‘‘அதி⁴வாஸேந்து மே, ப⁴ந்தே, தே²ரா ஸ்வாதனாய ஆக³ந்துகப⁴த்த’’ந்தி. அதி⁴வாஸேஸும் கோ² தே²ரா பி⁴க்கூ² [அதி⁴வாஸேஸும் கோ² தே தே²ரா பி⁴க்கூ² (ஸ்யா.)] துண்ஹீபா⁴வேன.

அத² கோ² சித்தோ க³ஹபதி தே²ரானம் பி⁴க்கூ²னம் அதி⁴வாஸனம் விதி³த்வா உட்டா²யாஸனா தே²ரே பி⁴க்கூ² அபி⁴வாதே³த்வா பத³க்கி²ணம் கத்வா யேனாயஸ்மா ஸுத⁴ம்மோ தேனுபஸங்கமி, உபஸங்கமித்வா ஆயஸ்மந்தம் ஸுத⁴ம்மம் அபி⁴வாதே³த்வா ஏகமந்தம் அட்டா²ஸி. ஏகமந்தம் டி²தோ கோ² சித்தோ க³ஹபதி ஆயஸ்மந்தம் ஸுத⁴ம்மம் ஏதத³வோச – ‘‘அதி⁴வாஸேது மே, ப⁴ந்தே, அய்யோ ஸுத⁴ம்மோ ஸ்வாதனாய ப⁴த்தம் ஸத்³தி⁴ம் தே²ரேஹீ’’தி. அத² கோ² ஆயஸ்மா ஸுத⁴ம்மோ ‘புப்³பே³ க்²வாயம் சித்தோ க³ஹபதி யதா³ ஸங்க⁴ம் வா க³ணம் வா புக்³க³லம் வா நிமந்தேதுகாமோ ந மம் அனபலோகேத்வா ஸங்க⁴ம் வா க³ணம் வா புக்³க³லம் வா நிமந்தேதி; ஸோதா³னி மம் அனபலோகேத்வா தே²ரே பி⁴க்கூ² நிமந்தேஸி; து³ட்டோ²தா³னாயம் சித்தோ க³ஹபதி அனபேக்கோ² விரத்தரூபோ மயீ’தி சித்தம் க³ஹபதிம் ஏதத³வோச – ‘‘அலம், க³ஹபதி, நாதி⁴வாஸேமீ’’தி. து³தியம்பி கோ²…பே… ததியம்பி கோ² சித்தோ க³ஹபதி ஆயஸ்மந்தம் ஸுத⁴ம்மம் ஏதத³வோச – ‘‘அதி⁴வாஸேது மே, ப⁴ந்தே, அய்யோ ஸுத⁴ம்மோ ஸ்வாதனாய ப⁴த்தம் ஸத்³தி⁴ம் தே²ரேஹீ’’தி. ‘‘அலம், க³ஹபதி, நாதி⁴வாஸேமீ’’தி. அத² கோ² சித்தோ க³ஹபதி ‘கிம் மே கரிஸ்ஸதி அய்யோ ஸுத⁴ம்மோ அதி⁴வாஸேந்தோ வா அனதி⁴வாஸேந்தோ வா’தி ஆயஸ்மந்தம் ஸுத⁴ம்மம் அபி⁴வாதே³த்வா பத³க்கி²ணம் கத்வா பக்காமி.

34. அத² கோ² சித்தோ க³ஹபதி தஸ்ஸா ரத்தியா அச்சயேன தே²ரானம் பி⁴க்கூ²னம் பணீதம் கா²த³னீயம் போ⁴ஜனீயம் படியாதா³பேஸி. அத² கோ² ஆயஸ்மா ஸுத⁴ம்மோ ‘யம்னூனாஹம் சித்தஸ்ஸ க³ஹபதினோ தே²ரானம் பி⁴க்கூ²னம் படியத்தம் பஸ்ஸேய்ய’ந்தி புப்³ப³ண்ஹஸமயம் நிவாஸேத்வா பத்தசீவரமாதா³ய யேன சித்தஸ்ஸ க³ஹபதினோ நிவேஸனம் தேனுபஸங்கமி, உபஸங்கமித்வா பஞ்ஞத்தே ஆஸனே நிஸீதி³. அத² கோ² சித்தோ க³ஹபதி யேனாயஸ்மா ஸுத⁴ம்மோ தேனுபஸங்கமி, உபஸங்கமித்வா ஆயஸ்மந்தம் ஸுத⁴ம்மம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னம் கோ² சித்தம் க³ஹபதிம் ஆயஸ்மா ஸுத⁴ம்மோ ஏதத³வோச – ‘‘பஹூதம் கோ² தே இத³ம், க³ஹபதி, கா²த³னீயம் போ⁴ஜனீயம் படியத்தம்; ஏகா ச கோ² இத⁴ நத்தி² யதி³த³ம் திலஸங்கு³ளிகா’’தி. ‘‘ப³ஹும்ஹி வத, ப⁴ந்தே, ரதனே பு³த்³த⁴வசனே [ப⁴ந்தே பு³த்³த⁴வசனே (ஸ்யா.)] விஜ்ஜமானே அய்யேன ஸுத⁴ம்மேன யதே³வ கிஞ்சி பா⁴ஸிதம் யதி³த³ம் திலஸங்கு³ளிகாதி. பூ⁴தபுப்³ப³ம், ப⁴ந்தே, த³க்கி²ணாபத²கா வாணிஜா புரத்தி²மம் ஜனபத³ம் அக³மம்ஸு வாணிஜ்ஜாய. தே ததோ குக்குடிம் ஆனேஸும். அத² கோ² ஸா, ப⁴ந்தே, குக்குடீ காகேன ஸத்³தி⁴ம் ஸம்வாஸம் கப்பேஸி. ஸா போதகம் ஜனேஸி. யதா³ கோ² ஸோ, ப⁴ந்தே, குக்குடபோதகோ காகவஸ்ஸம் வஸ்ஸிதுகாமோ ஹோதி, காககுக்குடீதி வஸ்ஸதி; யதா³ குக்குடிவஸ்ஸம் வஸ்ஸிதுகாமோ ஹோதி, குக்குடிகாகாதி வஸ்ஸதி. ஏவமேவ கோ², ப⁴ந்தே, ப³ஹும்ஹி ரதனே பு³த்³த⁴வசனே விஜ்ஜமானே அய்யேன ஸுத⁴ம்மேன யதே³வ கிஞ்சி பா⁴ஸிதம் யதி³த³ம் திலஸம்கு³ளிகா’’தி. ‘‘அக்கோஸஸி மம் த்வம், க³ஹபதி, பரிபா⁴ஸஸி மம் த்வம், க³ஹபதி. ஏஸோ தே, க³ஹபதி, ஆவாஸோ, பக்கமிஸ்ஸாமீ’’தி. ‘‘நாஹம், ப⁴ந்தே, அய்யம் ஸுத⁴ம்மம் அக்கோஸாமி, பரிபா⁴ஸாமி [ந பரிபா⁴ஸாமி (ஸீ. ஸ்யா.)]. வஸது, ப⁴ந்தே, அய்யோ ஸுத⁴ம்மோ மச்சி²காஸண்டே³. ரமணீயம் அம்பா³டகவனம். அஹம் அய்யஸ்ஸ ஸுத⁴ம்மஸ்ஸ உஸ்ஸுக்கம் கரிஸ்ஸாமி, சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரான’’ந்தி. து³தியம்பி கோ²…பே… ததியம்பி கோ² ஆயஸ்மா ஸுத⁴ம்மோ சித்தம் க³ஹபதிம் ஏதத³வோச – ‘‘அக்கோஸஸி மம் த்வம், க³ஹபதி, பரிபா⁴ஸஸி மம் த்வம், க³ஹபதி. ஏஸோ தே, க³ஹபதி, ஆவாஸோ, பக்கமிஸ்ஸாமீ’’தி. ‘‘கஹம், ப⁴ந்தே, அய்யோ ஸுத⁴ம்மோ க³மிஸ்ஸதீ’’தி? ‘‘ஸாவத்தி²ம் கோ² அஹம், க³ஹபதி, க³மிஸ்ஸாமி ப⁴க³வந்தம் த³ஸ்ஸனாயா’’தி. ‘‘தேன ஹி, ப⁴ந்தே, யஞ்ச அத்தனா ப⁴ணிதம், யஞ்ச மயா ப⁴ணிதம் தம் ஸப்³ப³ம் ப⁴க³வதோ ஆரோசேஹி. அனச்ச²ரியம் கோ² பனேதம், ப⁴ந்தே, யம் அய்யோ ஸுத⁴ம்மோ புனதே³வ மச்சி²காஸண்ட³ம் பச்சாக³ச்சே²ய்யா’’தி.

35. அத² கோ² ஆயஸ்மா ஸுத⁴ம்மோ ஸேனாஸனம் ஸம்ஸாமேத்வா பத்தசீவரமாதா³ய யேன ஸாவத்தி² தேன பக்காமி. அனுபுப்³பே³ன யேன ஸாவத்தி² ஜேதவனம் அனாத²பிண்டி³கஸ்ஸ ஆராமோ யேன ப⁴க³வா தேனுபஸங்கமி, உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா ஸுத⁴ம்மோ யஞ்ச அத்தனா ப⁴ணிதம் யஞ்ச சித்தேன க³ஹபதினா ப⁴ணிதம் தம் ஸப்³ப³ம் ப⁴க³வதோ ஆரோசேஸி.

விக³ரஹி பு³த்³தோ⁴ ப⁴க³வா – ‘‘அனனுச்ச²விகம், மோக⁴புரிஸ, அனனுலோமிகம் அப்பதிரூபம் அஸ்ஸாமணகம் அகப்பியம் அகரணீயம். கத²ஞ்ஹி நாம த்வம், மோக⁴புரிஸ, சித்தம் க³ஹபதிம் ஸத்³த⁴ம் பஸன்னம் தா³யகம் காரகம் ஸங்கு⁴பட்டா²கம் ஹீனேன கு²ம்ஸேஸ்ஸஸி, ஹீனேன வம்பே⁴ஸ்ஸஸி? நேதம், மோக⁴புரிஸ, அப்பஸன்னானம் வா பஸாதா³ய…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி – தேன ஹி, பி⁴க்க²வே, ஸங்கோ⁴ ஸுத⁴ம்மஸ்ஸ பி⁴க்கு²னோ படிஸாரணீயகம்மம் கரோது – சித்தோ தே க³ஹபதி க²மாபேதப்³போ³தி. ஏவஞ்ச பன, பி⁴க்க²வே, காதப்³ப³ம் – பட²மம் ஸுத⁴ம்மோ பி⁴க்கு² சோதே³தப்³போ³, சோதே³த்வா ஸாரேதப்³போ³, ஸாரேத்வா ஆபத்திம் ஆரோபேதப்³போ³, ஆபத்திம் ஆரோபேத்வா ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

36. ‘‘ஸுணாது மே, ப⁴ந்தே, ஸங்கோ⁴. அயம் ஸுத⁴ம்மோ பி⁴க்கு² சித்தம் க³ஹபதிம் ஸத்³த⁴ம் பஸன்னம் தா³யகம் காரகம் ஸங்கு⁴பட்டா²கம் ஹீனேன கு²ம்ஸேதி, ஹீனேன வம்பே⁴தி. யதி³ ஸங்க⁴ஸ்ஸ பத்தகல்லம், ஸங்கோ⁴ ஸுத⁴ம்மஸ்ஸ பி⁴க்கு²னோ படிஸாரணீயகம்மம் கரேய்ய – சித்தோ தே க³ஹபதி க²மாபேதப்³போ³தி. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. அயம் ஸுத⁴ம்மோ பி⁴க்கு² சித்தம் க³ஹபதிம் ஸத்³த⁴ம் பஸன்னம் தா³யகம் காரகம் ஸங்கு⁴பட்டா²கம் ஹீனேன கு²ம்ஸேதி, ஹீனேன வம்பே⁴தி. ஸங்கோ⁴ ஸுத⁴ம்மஸ்ஸ பி⁴க்கு²னோ படிஸாரணீயகம்மம் கரோதி – சித்தோ தே க³ஹபதி க²மாபேதப்³போ³தி. யஸ்ஸாயஸ்மதோ க²மதி ஸுத⁴ம்மஸ்ஸ பி⁴க்கு²னோ படிஸாரணீயஸ்ஸ கம்மஸ்ஸ கரணம் – சித்தோ தே க³ஹபதி க²மாபேதப்³போ³தி, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘து³தியம்பி ஏதமத்த²ம் வதா³மி…பே… ததியம்பி ஏதமத்த²ம் வதா³மி – ஸுணாது மே, ப⁴ந்தே, ஸங்கோ⁴. அயம் ஸுத⁴ம்மோ பி⁴க்கு² சித்தம் க³ஹபதிம் ஸத்³த⁴ம் பஸன்னம் தா³யகம் காரகம் ஸங்கு⁴பட்டா²கம் ஹீனேன கு²ம்ஸேதி, ஹீனேன வம்பே⁴தி. ஸங்கோ⁴ ஸுத⁴ம்மஸ்ஸ பி⁴க்கு²னோ படிஸாரணீயகம்மம் கரோதி – சித்தோ தே க³ஹபதி க²மாபேதப்³போ³தி. யஸ்ஸாயஸ்மதோ க²மதி ஸுத⁴ம்மஸ்ஸ பி⁴க்கு²னோ படிஸாரணீயஸ்ஸ கம்மஸ்ஸ கரணம் – சித்தோ தே க³ஹபதி க²மாபேதப்³போ³தி, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘கதம் ஸங்கே⁴ன ஸுத⁴ம்மஸ்ஸ பி⁴க்கு²னோ படிஸாரணீயகம்மம் – சித்தோ தே க³ஹபதி க²மாபேதப்³போ³தி. க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

அத⁴ம்மகம்மத்³வாத³ஸகம்

37. ‘‘தீஹி, பி⁴க்க²வே, அங்கே³ஹி ஸமன்னாக³தம் படிஸாரணீயகம்மம் அத⁴ம்மகம்மஞ்ச ஹோதி, அவினயகம்மஞ்ச, து³வூபஸந்தஞ்ச. அஸம்முகா² கதம் ஹோதி, அப்படிபுச்சா² கதம் ஹோதி, அப்படிஞ்ஞாய கதம் ஹோதி – இமேஹி கோ², பி⁴க்க²வே, தீஹங்கே³ஹி ஸமன்னாக³தம் படிஸாரணீயகம்மம் அத⁴ம்மகம்மஞ்ச ஹோதி, அவினயகம்மஞ்ச, து³வூபஸந்தஞ்ச.

‘‘அபரேஹிபி, பி⁴க்க²வே, தீஹங்கே³ஹி ஸமன்னாக³தம் படிஸாரணீயகம்மம் அத⁴ம்மகம்மஞ்ச ஹோதி, அவினயகம்மஞ்ச, து³வூபஸந்தஞ்ச. அனாபத்தியா கதம் ஹோதி, அதே³ஸனாகா³மினியா ஆபத்தியா கதம் ஹோதி, தே³ஸிதாய ஆபத்தியா கதம் ஹோதி…பே… அசோதே³த்வா கதம் ஹோதி, அஸாரேத்வா கதம் ஹோதி, ஆபத்திம் அனாரோபேத்வா கதம் ஹோதி…பே… அஸம்முகா² கதம் ஹோதி, அத⁴ம்மேன கதம் ஹோதி, வக்³கே³ன கதம் ஹோதி…பே… அப்படிபுச்சா² கதம் ஹோதி, அத⁴ம்மேன கதம் ஹோதி, வக்³கே³ன கதம் ஹோதி…பே… அப்படிஞ்ஞாய கதம் ஹோதி, அத⁴ம்மேன கதம் ஹோதி, வக்³கே³ன கதம் ஹோதி…பே… அனாபத்தியா கதம் ஹோதி, அத⁴ம்மேன கதம் ஹோதி, வக்³கே³ன கதம் ஹோதி…பே… அதே³ஸனாகா³மினியா ஆபத்தியா கதம் ஹோதி, அத⁴ம்மேன கதம் ஹோதி, வக்³கே³ன கதம் ஹோதி…பே… தே³ஸிதாய ஆபத்தியா கதம் ஹோதி, அத⁴ம்மேன கதம் ஹோதி, வக்³கே³ன கதம் ஹோதி…பே… அசோதே³த்வா கதம் ஹோதி, அத⁴ம்மேன கதம் ஹோதி, வக்³கே³ன கதம் ஹோதி…பே… அஸாரேத்வா கதம் ஹோதி, அத⁴ம்மேன கதம் ஹோதி, வக்³கே³ன கதம் ஹோதி…பே… ஆபத்திம் அனாரோபேத்வா கதம் ஹோதி, அத⁴ம்மேன கதம் ஹோதி, வக்³கே³ன கதம் ஹோதி – இமேஹி கோ², பி⁴க்க²வே, தீஹங்கே³ஹி ஸமன்னாக³தம் படிஸாரணீயகம்மம் அத⁴ம்மகம்மஞ்ச ஹோதி, அவினயகம்மஞ்ச, து³வூபஸந்தஞ்ச.

படிஸாரணீயகம்மே அத⁴ம்மகம்மத்³வாத³ஸகம் நிட்டி²தம்.

த⁴ம்மகம்மத்³வாத³ஸகம்

38. ‘‘தீஹி, பி⁴க்க²வே, அங்கே³ஹி ஸமன்னாக³தம் படிஸாரணீயகம்மம் த⁴ம்மகம்மஞ்ச ஹோதி, வினயகம்மஞ்ச, ஸுவூபஸந்தஞ்ச. ஸம்முகா² கதம் ஹோதி, படிபுச்சா² கதம் ஹோதி, படிஞ்ஞாய கதம் ஹோதி – இமேஹி கோ², பி⁴க்க²வே, தீஹங்கே³ஹி ஸமன்னாக³தம் படிஸாரணீயகம்மம் த⁴ம்மகம்மஞ்ச ஹோதி, வினயகம்மஞ்ச, ஸுவூபஸந்தஞ்ச.

‘‘அபரேஹிபி, பி⁴க்க²வே, தீஹங்கே³ஹி ஸமன்னாக³தம் படிஸாரணீயகம்மம் த⁴ம்மகம்மஞ்ச ஹோதி, வினயகம்மஞ்ச, ஸுவூபஸந்தஞ்ச. ஆபத்தியா கதம் ஹோதி, தே³ஸனாகா³மினியா ஆபத்தியா கதம் ஹோதி, அதே³ஸிதாய ஆபத்தியா கதம் ஹோதி…பே… சோதே³த்வா கதம் ஹோதி, ஸாரேத்வா கதம் ஹோதி, ஆபத்திம் ஆரோபேத்வா கதம் ஹோதி…பே… ஸம்முகா² கதம் ஹோதி, த⁴ம்மேன கதம் ஹோதி, ஸமக்³கே³ன கதம் ஹோதி…பே… படிபுச்சா² கதம் ஹோதி, த⁴ம்மேன கதம் ஹோதி, ஸமக்³கே³ன கதம் ஹோதி…பே… படிஞ்ஞாய கதம் ஹோதி, த⁴ம்மேன கதம் ஹோதி, ஸமக்³கே³ன கதம் ஹோதி…பே… ஆபத்தியா கதம் ஹோதி, த⁴ம்மேன கதம் ஹோதி, ஸமக்³கே³ன கதம் ஹோதி…பே… தே³ஸனாகா³மினியா ஆபத்தியா கதம் ஹோதி, த⁴ம்மேன கதம் ஹோதி, ஸமக்³கே³ன கதம் ஹோதி…பே… அதே³ஸிதாய ஆபத்தியா கதம் ஹோதி, த⁴ம்மேன கதம் ஹோதி, ஸமக்³கே³ன கதம் ஹோதி…பே… சோதே³த்வா கதம் ஹோதி, த⁴ம்மேன கதம் ஹோதி, ஸமக்³கே³ன கதம் ஹோதி…பே… ஸாரேத்வா கதம் ஹோதி, த⁴ம்மேன கதம் ஹோதி, ஸமக்³கே³ன கதம் ஹோதி…பே… ஆபத்திம் ஆரோபேத்வா கதம் ஹோதி, த⁴ம்மேன கதம் ஹோதி, ஸமக்³கே³ன கதம் ஹோதி – இமேஹி கோ², பி⁴க்க²வே, தீஹங்கே³ஹி ஸமன்னாக³தம் படிஸாரணீயகம்மம் த⁴ம்மகம்மஞ்ச ஹோதி, வினயகம்மஞ்ச, ஸுவூபஸந்தஞ்ச.

படிஸாரணீயகம்மே த⁴ம்மகம்மத்³வாத³ஸகம் நிட்டி²தம்.

ஆகங்க²மானசதுக்கம்

39. ‘‘பஞ்சஹி, பி⁴க்க²வே, அங்கே³ஹி ஸமன்னாக³தஸ்ஸ பி⁴க்கு²னோ, ஆகங்க²மானோ ஸங்கோ⁴, படிஸாரணீயகம்மம் கரேய்ய. கி³ஹீனம் அலாபா⁴ய பரிஸக்கதி, கி³ஹீனம் அனத்தா²ய பரிஸக்கதி, கி³ஹீனம் அனாவாஸாய [அவாஸாய (ஸீ.)] பரிஸக்கதி, கி³ஹீ அக்கோஸதி பரிபா⁴ஸதி, கி³ஹீ கி³ஹீஹி பே⁴தே³தி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ, ஆகங்க²மானோ ஸங்கோ⁴, படிஸாரணீயகம்மம் கரேய்ய.

‘‘அபரேஹிபி, பி⁴க்க²வே, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ, ஆகங்க²மானோ ஸங்கோ⁴, படிஸாரணீயகம்மம் கரேய்ய. கி³ஹீனம் பு³த்³த⁴ஸ்ஸ அவண்ணம் பா⁴ஸதி, கி³ஹீனம் த⁴ம்மஸ்ஸ அவண்ணம் பா⁴ஸதி, கி³ஹீனம் ஸங்க⁴ஸ்ஸ அவண்ணம் பா⁴ஸதி, கி³ஹீ ஹீனேன கு²ம்ஸேதி ஹீனேன வம்பே⁴தி, கி³ஹீனம் த⁴ம்மிகம் படிஸ்ஸவம் ந ஸச்சாபேதி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ, ஆகங்க²மானோ ஸங்கோ⁴, படிஸாரணீயகம்மம் கரேய்ய.

‘‘பஞ்சன்னம், பி⁴க்க²வே, பி⁴க்கூ²னம், ஆகங்க²மானோ ஸங்கோ⁴, படிஸாரணீயகம்மம் கரேய்ய. ஏகோ கி³ஹீனம் அலாபா⁴ய பரிஸக்கதி, ஏகோ கி³ஹீனம் அனத்தா²ய பரிஸக்கதி, ஏகோ கி³ஹீனம் அனாவாஸாய பரிஸக்கதி, ஏகோ கி³ஹீ அக்கோஸதி பரிபா⁴ஸதி, ஏகோ கி³ஹீ கி³ஹீஹி பே⁴தே³தி – இமேஸம் கோ², பி⁴க்க²வே, பஞ்சன்னம் பி⁴க்கூ²னம், ஆகங்க²மானோ ஸங்கோ⁴, படிஸாரணீயகம்மம் கரேய்ய.

‘‘அபரேஸம்பி, பி⁴க்க²வே, பஞ்சன்னம் பி⁴க்கூ²னம், ஆகங்க²மானோ ஸங்கோ⁴, படிஸாரணீயகம்மம் கரேய்ய. ஏகோ கி³ஹீனம் பு³த்³த⁴ஸ்ஸ அவண்ணம் பா⁴ஸதி, ஏகோ கி³ஹீனம் த⁴ம்மஸ்ஸ அவண்ணம் பா⁴ஸதி, ஏகோ கி³ஹீனம் ஸங்க⁴ஸ்ஸ அவண்ணம் பா⁴ஸதி, ஏகோ கி³ஹீ ஹீனேன கு²ம்ஸேதி ஹீனேன வம்பே⁴தி, ஏகோ கி³ஹீனம் த⁴ம்மிகம் படிஸ்ஸவம் ந ஸச்சாபேதி – இமேஸம் கோ², பி⁴க்க²வே, பஞ்சன்னம் பி⁴க்கூ²னம், ஆகங்க²மானோ ஸங்கோ⁴, படிஸாரணீயகம்மம் கரேய்ய.

ஆகங்க²மானசதுக்கம் நிட்டி²தம்.

அட்டா²ரஸவத்தம்

40. ‘‘படிஸாரணீயகம்மகதேன, பி⁴க்க²வே, பி⁴க்கு²னா ஸம்மா வத்திதப்³ப³ம். தத்ராயம் ஸம்மாவத்தனா – ந உபஸம்பாதே³தப்³ப³ம், ந நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³, ந பி⁴க்கு²னோவாத³கஸம்முதி ஸாதி³தப்³பா³, ஸம்மதேனபி பி⁴க்கு²னியோ ந ஓவதி³தப்³பா³. யாய ஆபத்தியா ஸங்கே⁴ன படிஸாரணீயகம்மம் கதம் ஹோதி ஸா ஆபத்தி ந ஆபஜ்ஜிதப்³பா³, அஞ்ஞா வா தாதி³ஸிகா, ததோ வா பாபிட்ட²தரா; கம்மம் ந க³ரஹிதப்³ப³ம், கம்மிகா ந க³ரஹிதப்³பா³. ந பகதத்தஸ்ஸ பி⁴க்கு²னோ உபோஸதோ² ட²பேதப்³போ³, ந பவாரணா ட²பேதப்³பா³, ந ஸவசனீயம் காதப்³ப³ம், ந அனுவாதோ³ பட்ட²பேதப்³போ³, ந ஓகாஸோ காரேதப்³போ³, ந சோதே³தப்³போ³, ந ஸாரேதப்³போ³, ந பி⁴க்கூ²ஹி ஸம்பயோஜேதப்³ப³’’ந்தி.

படிஸாரணீயகம்மே அட்டா²ரஸவத்தம் நிட்டி²தம்.

41. அத² கோ² ஸங்கோ⁴ ஸுத⁴ம்மஸ்ஸ பி⁴க்கு²னோ படிஸாரணீயகம்மம் அகாஸி – ‘‘சித்தோ தே க³ஹபதி க²மாபேதப்³போ³’’தி. ஸோ ஸங்கே⁴ன படிஸாரணீயகம்மகதோ மச்சி²காஸண்ட³ம் க³ந்த்வா மங்குபூ⁴தோ நாஸக்கி² சித்தம் க³ஹபதிம் க²மாபேதும். புனதே³வ ஸாவத்தி²ம் பச்சாக³ஞ்சி². பி⁴க்கூ² ஏவமாஹம்ஸு – ‘‘க²மாபிதோ தயா, ஆவுஸோ ஸுத⁴ம்ம, சித்தோ க³ஹபதீ’’தி? ‘‘இதா⁴ஹம், ஆவுஸோ, மச்சி²காஸண்ட³ம் க³ந்த்வா மங்குபூ⁴தோ நாஸக்கி²ம் சித்தம் க³ஹபதிம் க²மாபேது’’ந்தி. பி⁴க்கூ² ப⁴க³வதோ ஏதமத்த²ம் ஆரோசேஸும்…பே…. ‘‘தேன ஹி, பி⁴க்க²வே, ஸங்கோ⁴ ஸுத⁴ம்மஸ்ஸ பி⁴க்கு²னோ அனுதூ³தம் தே³து – சித்தம் க³ஹபதிம் க²மாபேதும். ஏவஞ்ச பன பி⁴க்க²வே தா³தப்³போ³ – பட²மம் பி⁴க்கு² யாசிதப்³போ³, யாசித்வா ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

‘‘ஸுணாது மே, ப⁴ந்தே, ஸங்கோ⁴. யதி³ ஸங்க⁴ஸ்ஸ பத்தகல்லம், ஸங்கோ⁴ இத்த²ன்னாமம் பி⁴க்கு²ம் ஸுத⁴ம்மஸ்ஸ பி⁴க்கு²னோ அனுதூ³தம் த³தே³ய்ய சித்தம் க³ஹபதிம் க²மாபேதும். ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. ஸங்கோ⁴ இத்த²ன்னாமம் பி⁴க்கு²ம் ஸுத⁴ம்மஸ்ஸ பி⁴க்கு²னோ அனுதூ³தம் தே³தி சித்தம் க³ஹபதிம் க²மாபேதும். யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ ஸுத⁴ம்மஸ்ஸ பி⁴க்கு²னோ அனுதூ³தஸ்ஸ தா³னம் சித்தம் க³ஹபதிம் க²மாபேதும், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘தி³ன்னோ ஸங்கே⁴ன இத்த²ன்னாமோ பி⁴க்கு² ஸுத⁴ம்மஸ்ஸ பி⁴க்கு²னோ அனுதூ³தோ சித்தம் க³ஹபதிம் க²மாபேதும். க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

42. ‘‘தேன, பி⁴க்க²வே, ஸுத⁴ம்மேன பி⁴க்கு²னா அனுதூ³தேன பி⁴க்கு²னா ஸத்³தி⁴ம் மச்சி²காஸண்ட³ம் க³ந்த்வா சித்தோ க³ஹபதி க²மாபேதப்³போ³ – ‘க²ம, க³ஹபதி, பஸாதே³மி த’ந்தி. ஏவஞ்சே வுச்சமானோ க²மதி, இச்சேதம் குஸலம். நோ சே க²மதி, அனுதூ³தேன பி⁴க்கு²னா வத்தப்³போ³ – ‘க²ம, க³ஹபதி, இமஸ்ஸ பி⁴க்கு²னோ, பஸாதே³தி த’ந்தி. ஏவஞ்சே வுச்சமானோ க²மதி, இச்சேதம் குஸலம். நோ சே க²மதி, அனுதூ³தேன பி⁴க்கு²னா வத்தப்³போ³ – ‘க²ம, க³ஹபதி, இமஸ்ஸ பி⁴க்கு²னோ, அஹம் தம் பஸாதே³மீ’தி. ஏவஞ்சே வுச்சமானோ க²மதி, இச்சேதம் குஸலம். நோ சே க²மதி, அனுதூ³தேன பி⁴க்கு²னா வத்தப்³போ³ – ‘க²ம, க³ஹபதி, இமஸ்ஸ பி⁴க்கு²னோ, ஸங்க⁴ஸ்ஸ வசனேனா’தி. ஏவஞ்சே வுச்சமானோ க²மதி, இச்சேதம் குஸலம். நோ சே க²மதி, அனுதூ³தேன பி⁴க்கு²னா ஸுத⁴ம்மோ பி⁴க்கு² [ஸுத⁴ம்மம் பி⁴க்கு²ம்… ஸா ஆபத்தி தே³ஸாபேதப்³பா³தி (ஸீ. ஸ்யா.)] சித்தஸ்ஸ க³ஹபதினோ த³ஸ்ஸனூபசாரம் அவிஜஹாபேத்வா ஸவனூபசாரம் அவிஜஹாபேத்வா ஏகம்ஸம் உத்தராஸங்க³ம் காராபேத்வா உக்குடிகம் நிஸீதா³பேத்வா அஞ்ஜலிம் பக்³க³ண்ஹாபேத்வா தம் ஆபத்திம் தே³ஸாபேதப்³போ³’’தி [ஸுத⁴ம்மம் பி⁴க்கு²ம்… ஸா ஆபத்தி தே³ஸாபேதப்³பா³தி (ஸீ. ஸ்யா.)].

அத² கோ² ஆயஸ்மா ஸுத⁴ம்மோ அனுதூ³தேன பி⁴க்கு²னா ஸத்³தி⁴ம் மச்சி²காஸண்ட³ம் க³ந்த்வா சித்தம் க³ஹபதிம் க²மாபேஸி. ஸோ ஸம்மா வத்ததி, லோமம் பாதேதி, நேத்தா²ரம் வத்ததி, பி⁴க்கூ² உபஸங்கமித்வா ஏவம் வதே³தி – ‘‘அஹம், ஆவுஸோ, ஸங்கே⁴ன படிஸாரணீயகம்மகதோ ஸம்மா வத்தாமி, லோமம் பாதேமி, நேத்தா²ரம் வத்தாமி. கத²ம் நு கோ² மயா படிபஜ்ஜிதப்³ப³’’ந்தி? பி⁴க்கூ² ப⁴க³வதோ ஏதமத்த²ம் ஆரோசேஸும்…பே… ‘‘தேன ஹி, பி⁴க்க²வே, ஸங்கோ⁴ ஸுத⁴ம்மஸ்ஸ பி⁴க்கு²னோ படிஸாரணீயகம்மம் படிப்பஸ்ஸம்பே⁴து.

நப்படிப்பஸ்ஸம்பே⁴தப்³ப³அட்டா²ரஸகம்

43. ‘‘பஞ்சஹி, பி⁴க்க²வே, அங்கே³ஹி ஸமன்னாக³தஸ்ஸ பி⁴க்கு²னோ படிஸாரணீயகம்மம் நப்படிப்பஸ்ஸம்பே⁴தப்³ப³ம். உபஸம்பாதே³தி, நிஸ்ஸயம் தே³தி, ஸாமணேரம் உபட்டா²பேதி, பி⁴க்கு²னோவாத³கஸம்முதிம் ஸாதி³யதி, ஸம்மதோபி பி⁴க்கு²னியோ ஓவத³தி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ படிஸாரணீயகம்மம் நப்படிப்பஸ்ஸம்பே⁴தப்³ப³ம்.

[பரி. 420] ‘‘அபரேஹிபி, பி⁴க்க²வே, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ படிஸாரணீயகம்மம் நப்படிப்பஸ்ஸம்பே⁴தப்³ப³ம். யாய ஆபத்தியா ஸங்கே⁴ன படிஸாரணீயகம்மம் கதம் ஹோதி தம் ஆபத்திம் ஆபஜ்ஜதி, அஞ்ஞம் வா தாதி³ஸிகம், ததோ வா பாபிட்ட²தரம்; கம்மம் க³ரஹதி, கம்மிகே க³ரஹதி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ படிஸாரணீயகம்மம் நப்படிப்பஸ்ஸம்பே⁴தப்³ப³ம்.

‘‘அட்ட²ஹி, பி⁴க்க²வே, அங்கே³ஹி ஸமன்னாக³தஸ்ஸ பி⁴க்கு²னோ படிஸாரணீயகம்மம் நப்படிப்பஸ்ஸம்பே⁴தப்³ப³ம். பகதத்தஸ்ஸ பி⁴க்கு²னோ உபோஸத²ம் ட²பேதி, பவாரணம் ட²பேதி, ஸவசனீயம் கரோதி, அனுவாத³ம் பட்ட²பேதி, ஓகாஸம் காரேதி, சோதே³தி, ஸாரேதி, பி⁴க்கூ²ஹி ஸம்பயோஜேதி – இமேஹி கோ², பி⁴க்க²வே, அட்ட²ஹங்கே³ஹி ஸமன்னாக³தஸ்ஸ பி⁴க்கு²னோ படிஸாரணீயகம்மம் நப்படிப்பஸ்ஸம்பே⁴தப்³ப³ம்’’.

படிஸாரணீயகம்மே நப்படிப்பஸ்ஸம்பே⁴தப்³ப³அட்டா²ரஸகம் நிட்டி²தம்.

படிப்பஸ்ஸம்பே⁴தப்³ப³அட்டா²ரஸகம்

44. ‘‘பஞ்சஹி, பி⁴க்க²வே, அங்கே³ஹி ஸமன்னாக³தஸ்ஸ பி⁴க்கு²னோ படிஸாரணீயகம்மம் படிப்பஸ்ஸம்பே⁴தப்³ப³ம். ந உபஸம்பாதே³தி, ந நிஸ்ஸயம் தே³தி, ந ஸாமணேரம் உபட்டா²பேதி, ந பி⁴க்கு²னோவாத³கஸம்முதிம் ஸாதி³யதி, ஸம்மதோபி பி⁴க்கு²னியோ ந ஓவத³தி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ படிஸாரணீயகம்மம் படிப்பஸ்ஸம்பே⁴தப்³ப³ம்.

‘‘அபரேஹிபி, பி⁴க்க²வே, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ படிஸாரணீயகம்மம் படிப்பஸ்ஸம்பே⁴தப்³ப³ம். யாய ஆபத்தியா ஸங்கே⁴ன படிஸாரணீயகம்மம் கதம் ஹோதி தம் ஆபத்திம் ந ஆபஜ்ஜதி, அஞ்ஞம் வா தாதி³ஸிகம், ததோ வா பாபிட்ட²தரம்; கம்மம் ந க³ரஹதி, கம்மிகே ந க³ரஹதி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தஸ்ஸ பி⁴க்கு²னோ படிஸாரணீயகம்மம் படிப்பஸ்ஸம்பே⁴தப்³ப³ம்.

‘‘அட்ட²ஹி, பி⁴க்க²வே, அங்கே³ஹி ஸமன்னாக³தஸ்ஸ பி⁴க்கு²னோ படிஸாரணீயகம்மம் படிப்பஸ்ஸம்பே⁴தப்³ப³ம். ந பகதத்தஸ்ஸ பி⁴க்கு²னோ உபோஸத²ம் ட²பேதி, ந பவாரணம் ட²பேதி, ந ஸவசனீயம் கரோதி, ந அனுவாத³ம் பட்ட²பேதி, ந ஓகாஸம் காரேதி, ந சோதே³தி, ந ஸாரேதி, ந பி⁴க்கூ²ஹி ஸம்பயோஜேதி – இமேஹி கோ², பி⁴க்க²வே, அட்ட²ஹங்கே³ஹி ஸமன்னாக³தஸ்ஸ பி⁴க்கு²னோ படிஸாரணீயகம்மம் படிப்பஸ்ஸம்பே⁴தப்³ப³ம்.

படிஸாரணீயகம்மே படிப்பஸ்ஸம்பே⁴தப்³ப³அட்டா²ரஸகம் நிட்டி²தம்.

45. ‘‘ஏவஞ்ச பன, பி⁴க்க²வே, படிப்பஸ்ஸம்பே⁴தப்³ப³ம். தேன [தேன ஹி (ஸ்யா. க.)], பி⁴க்க²வே, ஸுத⁴ம்மேன பி⁴க்கு²னா ஸங்க⁴ம் உபஸங்கமித்வா ஏகம்ஸம் உத்தராஸங்க³ம் கரித்வா வுட்³டா⁴னம் பி⁴க்கூ²னம் பாதே³ வந்தி³த்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘அஹம், ப⁴ந்தே, ஸங்கே⁴ன படிஸாரணீயகம்மகதோ ஸம்மா வத்தாமி, லோமம் பாதேமி, நேத்தா²ரம் வத்தாமி, படிஸாரணீயஸ்ஸ கம்மஸ்ஸ படிப்பஸ்ஸத்³தி⁴ம் யாசாமீ’தி. து³தியம்பி யாசிதப்³பா³. ததியம்பி யாசிதப்³பா³. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

‘‘ஸுணாது மே, ப⁴ந்தே, ஸங்கோ⁴. அயம் ஸுத⁴ம்மோ பி⁴க்கு² ஸங்கே⁴ன படிஸாரணீயகம்மகதோ ஸம்மா வத்ததி, லோமம் பாதேதி, நேத்தா²ரம் வத்ததி, படிஸாரணீயஸ்ஸ கம்மஸ்ஸ படிப்பஸ்ஸத்³தி⁴ம் யாசதி. யதி³ ஸங்க⁴ஸ்ஸ பத்தகல்லம், ஸங்கோ⁴ ஸுத⁴ம்மஸ்ஸ பி⁴க்கு²னோ படிஸாரணீயகம்மம் படிப்பஸ்ஸம்பே⁴ய்ய. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. அயம் ஸுத⁴ம்மோ பி⁴க்கு² ஸங்கே⁴ன படிஸாரணீயகம்மகதோ ஸம்மா வத்ததி, லோமம் பாதேதி, நேத்தா²ரம் வத்ததி, படிஸாரணீயஸ்ஸ கம்மஸ்ஸ படிப்பஸ்ஸத்³தி⁴ம் யாசதி. ஸங்கோ⁴ ஸுத⁴ம்மஸ்ஸ பி⁴க்கு²னோ படிஸாரணீயகம்மம் படிப்பஸ்ஸம்பே⁴தி. யஸ்ஸாயஸ்மதோ க²மதி ஸுத⁴ம்மஸ்ஸ பி⁴க்கு²னோ படிஸாரணீயஸ்ஸ கம்மஸ்ஸ படிப்பஸ்ஸத்³தி⁴, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘து³தியம்பி ஏதமத்த²ம் வதா³மி…பே… ததியம்பி ஏதமத்த²ம் வதா³மி – ஸுணாது மே, ப⁴ந்தே, ஸங்கோ⁴. அயம் ஸுத⁴ம்மோ பி⁴க்கு² ஸங்கே⁴ன படிஸாரணீயகம்மகதோ ஸம்மா வத்ததி, லோமம் பாதேதி, நேத்தா²ரம் வத்ததி, படிஸாரணீயஸ்ஸ கம்மஸ்ஸ படிப்பஸ்ஸத்³தி⁴ம் யாசதி. ஸங்கோ⁴ ஸுத⁴ம்மஸ்ஸ பி⁴க்கு²னோ படிஸாரணீயகம்மம் படிப்பஸ்ஸம்பே⁴தி. யஸ்ஸாயஸ்மதோ க²மதி ஸுத⁴ம்மஸ்ஸ பி⁴க்கு²னோ படிஸாரணீயஸ்ஸ கம்மஸ்ஸ படிப்பஸ்ஸத்³தி⁴, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘படிப்பஸ்ஸத்³த⁴ம் ஸங்கே⁴ன ஸுத⁴ம்மஸ்ஸ பி⁴க்கு²னோ படிஸாரணீயகம்மம். க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

படிஸாரணீயகம்மம் நிட்டி²தம் சதுத்த²ம்.