16. ஸமாரோபனஹாரஸம்பாதவிபா⁴வனா

78. ‘‘தஸ்மா ரக்கி²தசித்தஸ்ஸா’’தி பதே³ன யம் ரக்கி²தசித்தம் வுத்தம், தம் ரக்கி²தசித்தம் திண்ணம் ஸுசரிதானம் கம்மானம் பத³ட்டா²னம். ஸம்மாதி³ட்டி²யா பா⁴விதாய அரியோ அட்ட²ங்கி³கோ மக்³கோ³ பா⁴விதோ ப⁴வதி ஏகதோ பா⁴விதப்³ப³த்தா, பத³ட்டா²னகாரணத்தா ச. தேன வுத்தம் – ‘‘ஸம்மாதி³ட்டி²தோ ஹீ’’திஆதி³. யஸ்ஸ அரஹதோ ஸமாதி⁴விமுத்தி ப⁴வதி, அயம் அரஹா அனுபாதி³ஸேஸோ புக்³க³லோ, அயம் ஸமாதி⁴விமுத்தி அனுபாதி³ஸேஸா நிப்³பா³னதா⁴து.

‘‘தே³ஸனாஹாரஸம்பாதாதி³கோ ஹாரஸம்பாதோ யேன ஸோளஸப்பபே⁴த³பா⁴வேன ஸுத்தப்பதே³ஸத்தே² நித்³தா⁴ரேத்வா யுஜ்ஜிதோ, ஸோளஸப்பபே⁴த³பா⁴வோ கேன அம்ஹேஹி ஸத்³த³ஹிதப்³போ³’’தி வத்தப்³ப³த்தா ‘‘தேனாஹா’’திஆதி³ வுத்தம். தேன ஸோளஸப்பபே⁴த³பா⁴வேன ஆயஸ்மா மஹாகச்சானோ ‘‘ஸோளஸ…பே… ஸுத்த’’ந்தி யம் வசனம் ஆஹ, தேன வசனேன ஸோளஸப்பபே⁴த³பா⁴வோ தும்ஹேஹி ஸத்³த³ஹிதப்³போ³.

‘‘ஏத்தகோவ ஹாரஸம்பாதோ பரிபுண்ணோ’’தி வத்தப்³ப³த்தா ‘‘நியுத்தோ ஹாரஸம்பாதோ’’தி வுத்தம். யேன யேன ஸம்வண்ணனாவிஸேஸபூ⁴தேன தே³ஸனாஹாரஸம்பாதேன ஸுத்தப்பதே³ஸத்தா² நித்³தா⁴ரிதா, ஸோ ஸோ ஸம்வண்ணனாவிஸேஸபூ⁴தோ தே³ஸனாஹாரஸம்பாதாதி³ஹாரஸம்பாதோ நியுத்தோ யதா²ரஹம் நித்³தா⁴ரேத்வா யுஜ்ஜிதப்³போ³தி அத்தோ² க³ஹேதப்³போ³, அட்ட²கதா²யஞ்ச (நேத்தி. அட்ட². 73, 76) ததா² நித்³தா⁴ரேத்வா யுஜ்ஜிதோதி.

இதி தே³ஸனாஹாரஸம்பாதாதி³ஹாரஸம்பாதே ஸத்திப³லானுரூபா

ரசிதா விபா⁴வனா நிட்டி²தா.

பண்டி³தேஹி பன அட்ட²கதா²டீகானுஸாரேன க³ம்பீ⁴ரத்தோ² வித்தா²ரதோ விப⁴ஜித்வா க³ஹேதப்³போ³தி.