5. லக்க²ணஹாரஸம்பாதவிபா⁴வனா

67. யேன யேன பத³ட்டா²னஹாரஸம்பாதேன ஸுத்தப்பதே³ஸத்தா²னி பத³ட்டா²னானி ஆசரியேன நித்³தா⁴ரிதானி, அம்ஹேஹி ச ஞாதானி, ஸோ பத³ட்டா²னஹாரஸம்பாதோ பரிபுண்ணோ, ‘‘கதமோ லக்க²ணஹாரஸம்பாதோ’’தி புச்சி²தப்³ப³த்தா ‘‘தத்த² கதமோ லக்க²ணோ ஹாரஸம்பாதோ’’திஆதி³ வுத்தம். தத்த² தேஸு தே³ஸனாஹாரஸம்பாதாதீ³ஸு ஸோளஸஸு ஹாரஸம்பாதேஸு கதமோ ஸம்வண்ணனாவிஸேஸோ லக்க²ணஹாரஸம்பாதோ நாமாதி புச்ச²தி.

‘‘கதமேஹி ஸுத்தத்தே²ஹி ஸமானலக்க²ணா கதமே த⁴ம்மா க³ஹிதா’’தி புச்சி²தப்³ப³த்தா ‘‘தஸ்மா’’திஆதி³ வுத்தம். ‘‘தஸ்மா ரக்கி²தசித்தஸ்ஸ, ஸம்மாஸங்கப்பகோ³சரோ’’தி ஸுத்தப்பதே³ஸேன வுத்தம் இத³ம் ரக்க²ணம் ஸதிந்த்³ரியம் க³ஹிதம், ஸதிந்த்³ரியே க³ஹிதே ஸத்³தா⁴தி³பஞ்சிந்த்³ரியானி க³ஹிதானி ப⁴வந்தி இந்த்³ரியட்டே²ன ஸமானலக்க²ணத்தா. ‘‘ஸம்மாதி³ட்டி²புரேக்கா²ரோ’’தி ஸுத்தப்பதே³ஸேன வுத்தா ஸம்மாதி³ட்டி² க³ஹிதா, ஸம்மாதி³ட்டி²யா க³ஹிதாய அரியோ அட்ட²ங்கி³கோ மக்³கோ³ க³ஹிதோ ப⁴வதி. தம் கிஸ்ஸ ஹேதூதி காரணம் புச்ச²தி. புச்சி²த்வா காரணமாஹ ‘‘ஸம்மாதி³ட்டி²தோ ஹீ’’திஆதி³னா. ஸம்மாதி³ட்டி²ஹேதுதோ ஸம்மாஸங்கப்போ ஹி யஸ்மா பப⁴வதி, தஸ்மா, ஸம்மாஸங்கப்பதோ ஸம்மாவாசா ஹி யஸ்மா பப⁴வதி, தஸ்மா, ஸம்மாவாசாதோ ஸம்மாகம்மந்தோ ஹி யஸ்மா பப⁴வதி, தஸ்மா, ஸம்மாகம்மந்ததோ ஸம்மாஆஜீவோ ஹி யஸ்மா பப⁴வதி, தஸ்மா, ஸம்மாஆஜீவதோ ஸம்மாவாயாமோ ஹி யஸ்மா பப⁴வதி, தஸ்மா, ஸம்மாவாயாமதோ ஸம்மாஸதிஹி யஸ்மா பப⁴வதி, தஸ்மா, ஸம்மாஸதிதோ ஸம்மாஸமாதி⁴ ஹி யஸ்மா பப⁴வதி, தஸ்மா, ஸம்மாஸமாதி⁴தோ ஸம்மாவிமுத்தி ஹி யஸ்மா பப⁴வதி, தஸ்மா, ஸம்மாவிமுத்திதோ ஸம்மாவிமுத்திஞாணத³ஸ்ஸனம் ஹி யஸ்மா பப⁴வதி, தஸ்மா, அரியோ அட்ட²ங்கி³கோ மக்³கோ³ க³ஹிதோ ப⁴வதீதி.

‘‘ஏத்தகோவ லக்க²ணஹாரஸம்பாதோ பரிபுண்ணோ’’தி வத்தப்³ப³த்தா ‘‘நியுத்தோ லக்க²ணோ ஹாரஸம்பாதோ’’தி வுத்தம். யேன யேன ஸம்வண்ணனாவிஸேஸபூ⁴தேன லக்க²ணஹாரஸம்பாதேன ஸுத்தப்பதே³ஸத்தா² ஸமானலக்க²ணேன க³ஹிதா ப⁴வந்தி, ஸோ ஸோ ஸம்வண்ணனாவிஸேஸபூ⁴தோ லக்க²ணஹாரஸம்பாதோ நியுத்தோ யதா²ரஹம் நித்³தா⁴ரேத்வா யுஜ்ஜிதப்³போ³தி அத்தோ² க³ஹிதோதி.

இதி லக்க²ணஹாரஸம்பாதே ஸத்திப³லானுரூபா ரசிதா

விபா⁴வனா நிட்டி²தா.

பண்டி³தேஹி பன…பே… க³ஹேதப்³போ³தி.