8. வத்தக்க²ந்த⁴கம்

ஆக³ந்துகவத்தகதா²வண்ணனா

356-357. வத்தக்க²ந்த⁴கே உபரிபிட்டி²தோதி பிட்டி²ஸங்கா⁴டஸ்ஸ உபரிபா⁴க³தோ, த்³வாரபா³ஹஸ்ஸ உபரிபதே³ஸதோதி அத்தோ². விஸ்ஸஜ்ஜேதப்³ப³ந்தி ஸுக்கா²பனத்த²ம் ஆதபே விஸ்ஸஜ்ஜிதப்³ப³ம். அபி⁴வாதா³பேதப்³போ³தி தஸ்ஸ வஸ்ஸே புச்சி²தே யதி³ த³ஹரோ ஹோதி, ஸயமேவ வந்தி³ஸ்ஸதி, ததா³ இமினாவ வந்தா³பிதோ நாம ஹோதி. நில்லோகேதப்³போ³தி ஓலோகேதப்³போ³. யதா²பா⁴க³ந்தி புப்³பே³ பஞ்ஞத்தம் பதே³ஸபா⁴க³ம் அனதிக்கமித்வா. ஸந்தானகந்தி உண்ணனாபி⁴ஸுத்தம். உல்லோகாதி கே³ஹஸ்ஸ உபரிபா⁴க³தோ பட்டா²ய, பட²மம் உபரிபா⁴கோ³ ஸம்மஜ்ஜிதப்³போ³தி வுத்தம் ஹோதி.

ஆவாஸிகவத்தகதா²வண்ணனா

359. மஹாஆவாஸேதி மஹாவிஹாரஸதி³ஸே மஹாஆவாஸே.

அனுமோத³னவத்தகதா²வண்ணனா

362. பஞ்சமே நிஸின்னேதி அனுமோத³னத்தா²ய நிஸின்னே. உபனிஸின்னகதா² நாம ப³ஹூஸு ஸன்னிபதிதேஸு பரிகதா²கத²னம்.

ப⁴த்தக்³க³வத்தகதா²வண்ணனா

364. மனுஸ்ஸானம் பரிவிஸனட்டா²னந்தி யத்த² மனுஸ்ஸா ஸபுத்ததா³ரா ஆவஸித்வா தே³ந்தி. ஹத்த²தோ⁴வனஉத³கம் ஸந்தா⁴யாதி பு⁴த்தாவிஸ்ஸ போ⁴ஜனாவஸானே ஹத்த²தோ⁴வனஉத³கம் ஸந்தா⁴ய. தேனேவாஹ ‘‘அந்தரா பிபாஸிதேன பன…பே… ஹத்தா² ந தோ⁴விதப்³பா³’’தி. போத்த²கேஸு பன ‘‘பானீயம் பிவித்வா ஹத்தா² ந தோ⁴விதப்³பா³’’தி லிக²ந்தி, ‘‘ஹத்தா² தோ⁴விதப்³பா³’’தி பாடே²ன ப⁴விதப்³ப³ந்தி அம்ஹாகம் க²ந்தி. அஞ்ஞதா² ‘‘ந தாவ உத³கந்தி இத³ம் ஹத்த²தோ⁴வனஉத³கம் ஸந்தா⁴ய வுத்த’’ந்தி வத்வா ‘‘அந்தரா பிபாஸிதேன பனா’’திஆதி³னா வுத்தவிஸேஸோ ந உபலப்³ப⁴தி. அத² மதம் ‘‘ந தாவ தே²ரேன உத³கம் படிக்³க³ஹேதப்³ப³ந்தி இத³ம் கிம் பானீயபடிக்³க³ஹணம் ஸந்தா⁴ய வுத்தம், உதா³ஹு ஹத்த²தோ⁴வனஉத³கக்³க³ஹணம் ஸந்தா⁴யாதி ஆஸங்கானிவத்தனத்த²ம் ‘இத³ம் ஹத்த²தோ⁴வனஉத³கம் ஸந்தா⁴ய வுத்த’ந்திஆதி³ கதி²த’’ந்தி, தஞ்ச ந, தத்த² ஆஸங்காய ஏவ அஸம்ப⁴வதோ. ந ஹி ப⁴க³வா ‘‘யாவ அஞ்ஞே ந பு⁴த்தாவினோ ஹோந்தி, தாவ பானீயம் ந பாதப்³ப³’’ந்தி வக்க²தீதி ஸக்கா விஞ்ஞாதும். யதி³ சேதம் பானீயபடிக்³க³ஹணம் ஸந்தா⁴ய வுத்தம், ‘‘ந தாவ தே²ரேன உத³கம் படிக்³க³ஹேதப்³ப³’’ந்தி உத³கஸத்³த³ப்பயோகோ³ ச ந கத்தப்³போ³ ஸியா, அட்ட²கதா²யஞ்ச ‘‘இத³ம் ஹத்த²தோ⁴வனஉத³கம் ஸந்தா⁴ய வுத்த’’ந்தி வத்வா தேன நிவத்திதப்³ப³மத்த²ம் த³ஸ்ஸேந்தேன ‘‘அந்தரா பிபாஸிதேன பன க³லே விலக்³கா³மிஸேன வா பானீயம் பிவிதப்³ப³’’ந்தி ஏத்தகமேவ வத்தப்³ப³ம், ‘‘பானீயம் பிவித்வா ஹத்தா² ந தோ⁴விதப்³பா³’’தி ஏவம் பன ந வத்தப்³ப³ந்தி. து⁴ரே நிஸின்னா ஹோந்தீதி த்³வாரஸமீபே நிஸின்னா ஹோந்தி.

பிண்ட³சாரிகவத்தகதா²வண்ணனா

366. பராமஸதீதி க³ண்ஹாதி. ட²பேதி வாதி ‘‘திட்ட²த², ப⁴ந்தே’’தி வத³ந்தீ ட²பேதி நாம.

ஆரஞ்ஞிகவத்தகதா²வண்ணனா

367. கேனஜ்ஜ, ப⁴ந்தே, யுத்தந்தி கேன நக்க²த்தேன அஜ்ஜ சந்தோ³ யுத்தோதி ஏவம் வத³ந்தேன நக்க²த்தம் புச்சி²தம் ஹோதி.

ஸேனாஸனவத்தகதா²வண்ணனா

369-370. அங்க³ணேதி அப்³போ⁴காஸே. ந வுட்³ட⁴ம் அனாபுச்சா²தி ஏத்த² தஸ்ஸ ஓவரகே தது³பசாரே ச ஆபுச்சி²தப்³ப³ந்தி வத³ந்தி. போ⁴ஜனஸாலாதீ³ஸுபி ஏவமேவ படிபஜ்ஜிதப்³ப³ந்தி போ⁴ஜனஸாலாதீ³ஸுபி உத்³தே³ஸதா³னாதி³ ஆபுச்சி²த்வாவ காதப்³ப³ந்தி அத்தோ².

வச்சகுடிவத்தகதா²வண்ணனா

373-374. இத³ம் அதிவிவடந்தி இத³ம் டா²னம் கு³ம்பா³தீ³ஹி அப்படிச்ச²ன்னத்தா அதிவிய பகாஸனம். நிப³த்³த⁴க³மனத்தா²யாதி அத்தனோ நிப³த்³த⁴க³மனத்தா²ய. புக்³க³லிகட்டா²னம் வாதி அத்தனோ விஹாரம் ஸந்தா⁴ய வுத்தம். ஸேஸமேத்த² ஸுவிஞ்ஞேய்யமேவ.

இமஸ்மிம் வத்தக்க²ந்த⁴கே ஆக³தானி ஆக³ந்துகாவாஸிகக³மியானுமோத³னப⁴த்தக்³க³பிண்ட³சாரிகாரஞ்ஞிக ஸேனாஸன ஜந்தாக⁴ர வச்சகுடி உபஜ்ஜா²சரிய ஸத்³தி⁴விஹாரிக அந்தேவாஸிகவத்தானி சுத்³த³ஸ மஹாவத்தானி நாம, இதோ அஞ்ஞானி பன கதா³சி தஜ்ஜனீயகம்மகதாதி³காலேயேவ சரிதப்³பா³னி அஸீதி க²ந்த⁴கவத்தானீதி வேதி³தப்³பா³னி. க³ண்டி²பதே³ஸு பன ‘‘இமானியேவ சுத்³த³ஸ மஹாவத்தானி அக்³க³ஹிதக்³க³ஹணேன க³ஹியமானானி அஸீதி க²ந்த⁴கவத்தாஆனீ’’தி வுத்தம், தம் ந க³ஹேதப்³ப³ம்.

வத்தக்க²ந்த⁴கவண்ணனா நிட்டி²தா.