7. கதி²னக்க²ந்த⁴கம்

கதி²னானுஜானனகதா²வண்ணனா

306. கதி²னக்க²ந்த⁴கே ஸீஸவஸேனாதி பதா⁴னங்க³வஸேன. ‘‘கதி²னந்தி பஞ்சானிஸம்ஸே அந்தோகரணஸமத்த²தாய தி²ரந்தி அத்தோ²’’தி க³ண்டி²பதே³ஸு வுத்தம். ‘‘ஸோ நேஸம் ப⁴விஸ்ஸதீ’’தி யுஜ்ஜதீதி ‘‘ஸோ தும்ஹாக’’ந்தி அவத்வா ‘‘நேஸ’’ந்தி வசனம் யுஜ்ஜதி. யே அத்த²தகதி²னாதி ந கேவலம் தும்ஹாகமேவ, யே அஞ்ஞேபி அத்த²தகதி²னா, தேஸம்பி ப⁴விஸ்ஸதீதி அத்தோ². அனாமந்தேத்வா சரணந்தி சாரித்தஸிக்கா²பதே³ வுத்தனயேன அனாபுச்சி²த்வா குலேஸு சரணம். மதகசீவரந்தி மதஸ்ஸ ஸந்தகம் சீவரம். தத்ருப்பாதே³ன ஆப⁴தந்தி விஹாரஸந்தகேன கே²த்தவத்து²ஆதி³னா ஆனீதம்.

பட²மபவாரணாய பவாரிதாதி இத³ம் வஸ்ஸச்சே²த³ம் அகத்வா வஸ்ஸம்வுத்த²பா⁴வஸந்த³ஸ்ஸனத்த²ம் வுத்தம் அந்தராயேன அப்பவாரிதானம்பி வுத்த²வஸ்ஸானம் கதி²னத்தா²ரஸம்ப⁴வதோ. தேனேவ ‘‘அப்பவாரிதா வா’’தி அவத்வா ‘‘சி²ன்னவஸ்ஸா வா பச்சி²மிகாய உபக³தா வா ந லப⁴ந்தீ’’தி ஏத்தகமேவ வுத்தம். அஞ்ஞஸ்மிம் விஹாரே வுத்த²வஸ்ஸாபி ந லப⁴ந்தீதி நானாஸீமாய அஞ்ஞஸ்மிம் விஹாரே வுத்த²வஸ்ஸா இமஸ்மிம் விஹாரே கதி²னத்தா²ரம் ந லப⁴ந்தீதி அத்தோ². க²லிமக்கி²தஸாடகோதி அஹதவத்த²ம் ஸந்தா⁴ய வுத்தம். தா³னகம்மவாசாதி கதி²னது³ஸ்ஸதா³னகம்மவாசா. அகாதும் ந லப்³ப⁴தீதி இமினா அனாத³ரியேன அகரோந்தஸ்ஸ து³க்கடந்தி தீ³பேதி. கம்மவாசா பன ஏகாயேவ வட்டதீதி கதி²னத்தா²ரஸாடகஸ்ஸ தா³னகாலே வுத்தா ஏகாயேவ கம்மவாசா வட்டதி. புன தஸ்ஸ அஞ்ஞஸ்மிம் வத்தே² தி³ய்யமானே கம்மவாசாய தா³தப்³ப³கிச்சம் நத்தி², அபலோகனமேவ அலந்தி அதி⁴ப்பாயோ.

308. மஹாபூ⁴மிகந்தி மஹாவிஸயம், சதுவீஸதிஆகாரவந்ததாய மஹாவித்தா²ரிகந்தி வுத்தம் ஹோதி. பஞ்சகந்தி பஞ்சக²ண்ட³ம். ஏஸ நயோ ஸேஸேஸுபி. பட²மசிமிலிகாதி கதி²னவத்த²தோ அஞ்ஞா அத்தனோ பகதிசிமிலிகா. ‘‘குச்சி²சிமிலிகம் கத்வா ஸிப்³பி³தமத்தேனாதி தி²ரஜிண்ணானம் சிமிலிகானம் ஏகதோ கத்வா ஸிப்³ப³னஸ்ஸேதம் அதி⁴வசன’’ந்தி க³ண்டி²பதே³ஸு வுத்தம். மஹாபச்சரியம் குருந்தி³யஞ்ச ‘‘வுத்தவசனனித³ஸ்ஸனம் ப்³யஞ்ஜனே ஏவ பே⁴தோ³, அத்தே² நத்தீ²தி த³ஸ்ஸனத்த²ம் கத’’ந்தி வத³ந்தி. பிட்டி²அனுவாதாரோபனமத்தேனாதி தீ³க⁴தோ அனுவாதஸ்ஸ ஆரோபனமத்தேன. குச்சி²அனுவாதாரோபனமத்தேனாதி புது²லதோ அனுவாதஸ்ஸ ஆரோபனமத்தேன. ஸாருப்பம் ஹோதீதி ஸமணஸாருப்பம் ஹோதி. ரத்தினிஸ்ஸக்³கி³யேனாதி ரத்திஅதிக்கந்தேன.

கதி²னானுஜானனகதா²வண்ணனா நிட்டி²தா.

ஆதா³யஸத்தகாதி³கதா²வண்ணனா

311. அயந்தி ஆஸாவச்சே²தி³கோ கதி²னுத்³தா⁴ரோ. இத⁴ ந வுத்தோதி பாளியம் மாதிகாபத³பா⁴ஜனே ஸவனந்திகானந்தரம் ந வுத்தோ. தத்தா²தி தஸ்மிம் ஸீமாதிக்கந்திகே கதி²னுத்³தா⁴ரே. ‘‘ஸீமாதிக்கந்திகோ நாம சீவரகாலஸீமாதிக்கந்திகோ’’தி கேனசி வுத்தம். ‘‘ப³ஹிஸீமாயம் சீவரகாலஸமயஸ்ஸ அதிக்கந்தத்தா ஸீமாதிக்கந்திகோ’’தி அயம் அம்ஹாகம் க²ந்தி. ஸஹுப்³பா⁴ரே ‘‘ஸோ கதசீவரோ’’தி பாடோ² தி³ஸ்ஸதி, ஏவஞ்ச ஸதி சீவரபலிபோ³தோ⁴ பட²மம் சி²ஜ்ஜதீதி விஞ்ஞாயதி, இத⁴ பன பரிவாரபாளியஞ்ச ‘‘த்³வே பலிபோ³தா⁴ அபுப்³ப³ம் அசரிமம் சி²ஜ்ஜந்தீ’’தி (பரி. 415) வசனதோ தம் ந ஸமேதி, தஸ்மா வீமம்ஸிதப்³ப³மேத்த² காரணம்.

312. ‘‘ஸமாதா³யவாரோ ஆதா³யவாரஸதி³ஸோ, உபஸக்³க³மத்தமேத்த² விஸேஸோ’’தி க³ண்டி²பதே³ஸு வுத்தம். கேசி பன ‘‘ஸப்³ப³ம் அத்தனோ பரிக்கா²ரம் அனவஸேஸேத்வா பக்கமந்தோ ‘ஸமாதா³ய பக்கமதீ’தி வுச்சதீ’’தி வத³ந்தி. புன ஸமாதா³யவாரேபி தேயேவ த³ஸ்ஸிதாதி ஸம்ப³ந்தோ⁴. விப்பகதசீவரே பக்கமனந்திகஸ்ஸ கதி²னுத்³தா⁴ரஸ்ஸ அஸம்ப⁴வதோ ‘‘யதா²ஸம்ப⁴வ’’ந்தி வுத்தம். பக்கமனந்திகோ ஹி கதி²னுத்³தா⁴ரோ நிட்டி²தசீவரஸ்ஸேவ வஸேன வுத்தோ ‘‘பி⁴க்கு² அத்த²தகதி²னோ கதசீவரம் ஆதா³ய பக்கமதீ’’தி வுத்தத்தா, தஸ்மா ஸோ விப்பகதசீவரோ ந ஸம்ப⁴வதீதி ச²ளேவ உப்³பா⁴ரா தத்த² த³ஸ்ஸிதா.

தத்ராயம் ஆதி³தோ பட்டா²ய வாரவிபா⁴வனா – ஆதா³யவாரா ஸத்த, ததா² ஸமாதா³யவாராதி த்³வே ஸத்தகவாரா, ததோ பக்கமனந்திகம் வஜ்ஜேத்வா விப்பகதசீவரஸ்ஸ ஆதா³யஸமாதா³யவாரவஸேன த்³வே ச²க்கவாரா, ததோ பரம் நிட்டா²னஸன்னிட்டா²னனாஸனந்திகானம் வஸேன தீணி திகானி த³ஸ்ஸிதானி. தத்த² பட²மத்திகம் அந்தோஸீமாயம் ‘‘பச்சேஸ்ஸம் ந பச்சேஸ்ஸ’’ந்தி இமம் விதி⁴ம் அனாமஸித்வா ப³ஹிஸீமாயமேவ ‘‘ந பச்சேஸ்ஸ’’ந்தி பவத்தம், தஸ்மா பக்கமனந்திகஸீமாதிக்கந்திகஸஉப்³பா⁴ரா தத்த² ந யுஜ்ஜந்தி. து³தியத்திகம் அந்தோஸீமாயம் ‘‘ந பச்சேஸ்ஸ’’ந்தி பவத்தம். ததியத்திகம் அனதி⁴ட்டி²த-பதே³ன விஸேஸேத்வா பவத்தம், அத்த²தோ பட²மத்திகேன ஸமேதி. அனதி⁴ட்டி²தேனாதி ச ‘‘பச்சேஸ்ஸம் ந பச்சேஸ்ஸ’’ந்தி ஏவம் அனதி⁴ட்டி²தேன, அனியமிதேனாதி அத்தோ². ததியத்திகானந்தரம் சதுத்த²த்திகம் ஸம்ப⁴வந்தம் அந்தோஸீமாயம் ‘‘பச்சேஸ்ஸ’’ந்தி வசனவிஸேஸேன ஸம்ப⁴வதி. ததா² ச யோஜியமானம் இதரேஹி ஸவனந்திகாதீ³ஹி அவிருத்³த⁴ம் ஹோதீதி சதுத்த²த்திகம் அஹுத்வா ச²க்கம் ஜாதந்தி வேதி³தப்³ப³ம். ஏவம் தீணி திகானி ஏகம் ச²க்கஞ்சாதி பட²மம் பன்னரஸகம் வேதி³தப்³ப³ம்.

316-320. ததோ இத³மேவ பன்னரஸகம் உபஸக்³க³விஸேஸேன து³தியம் ஸமாதா³யபன்னரஸகம் நாம கதம். புன ‘‘விப்பகதசீவரம் ஆதா³யா’’தி ததியம் பன்னரஸகம், ‘‘ஸமாதா³யா’’தி சதுத்த²ம் பன்னரஸகம் த³ஸ்ஸிதந்தி ஏவம் சத்தாரி பன்னரஸகானி வேதி³தப்³பா³னி. தத்த² பட²மது³தியேஸு பன்னரஸகேஸு ஸப்³பே³ன ஸப்³ப³ம் அகதசீவரம் அதி⁴ப்பேதம், இதரேஸு த்³வீஸு விப்பகதந்தி வேதி³தப்³ப³ம். ததோ பரம் ‘‘சீவராஸாய பக்கமதீ’’திஆதி³னா நயேன நிட்டா²னஸன்னிட்டா²னனாஸனஆஸாவச்சே²தி³கவஸேன ஏகோ வாரோதி இத³மேகம் சதுக்கம் ஜாதம், தஸ்மா புப்³பே³ வுத்தானி திகானி ஆஸாவச்சே²தி³கானி தீணி ச திகானீதி ஏதம் அனாஸாயத்³வாத³ஸகந்தி வேதி³தப்³ப³ம். தத³னந்தரே ஆஸாயத்³வாத³ஸகே கிஞ்சாபி பட²மம் த்³வாத³ஸகம் லப்³ப⁴தி, ததா²பி தம் நிப்³பி³ஸேஸந்தி தமேகம் த்³வாத³ஸகம் அவுத்தஸித்³த⁴ம் கத்வா விஸேஸதோ த³ஸ்ஸேதும் ஆதி³தோ பட்டா²ய ‘‘அந்தோஸீமாயம் பச்சேஸ்ஸ’’ந்தி வுத்தம். தம் து³தியசதுக்கே ‘‘ஸோ ப³ஹிஸீமக³தோ ஸுணாதீ’’திஆதி³வசனஸ்ஸ ததியசதுக்கே ஸவனந்திகாதீ³னஞ்ச ஓகாஸகரணத்த²ந்தி வேதி³தப்³ப³ம். இத³ம் பன த்³வாத³ஸகம் அனாஸாயவஸேனபி லப்³ப⁴மானம் இமினா அவுத்தஸித்³த⁴ம் கத்வா ந த³ஸ்ஸிதந்தி வேதி³தப்³ப³ம். ஏவமேத்த² த்³வே த்³வாத³ஸகானி உத்³த⁴ரிதப்³பா³னி. கரணீயத்³வாத³ஸகேபி யதா²த³ஸ்ஸிதம் அனாஸாயத்³வாத³ஸகம் அவுத்தஸித்³த⁴ம் ஆஸாயத்³வாத³ஸகஞ்சாதி த்³வே த்³வாத³ஸகானி உத்³த⁴ரிதப்³பா³னி.

321-322. யஸ்மா தி³ஸம்க³மிகனவகே ‘‘தி³ஸம்க³மிகோ பக்கமதீ’’தி வசனேனேவ ‘‘ந பச்சேஸ்ஸ’’ந்தி இத³ம் அவுத்தஸித்³த⁴மேவ, தஸ்மா தம் ந வுத்தம். ஏத்தாவதா ச ஆவாஸபலிபோ³தா⁴பா⁴வோ த³ஸ்ஸிதோ. சீவரபடிவீஸம் அபவிலாயமானோதி இமினா சீவரபலிபோ³த⁴ஸமங்கி³தமஸ்ஸ த³ஸ்ஸேதி. தத்த² சீவரபடிவீஸந்தி அத்தனோ பத்தப்³ப³சீவரபா⁴க³ம். அபவிலாயமானோதி ஆகங்க²மானோ. தஸ்ஸ சீவரலாபே⁴ ஸதி வஸ்ஸம்வுத்தா²வாஸே நிட்டா²னஸன்னிட்டா²னனாஸனந்திகானம் வஸேன ஏகம் திகம், தேஸம்யேவ வஸேன அந்தராமக்³கே³ ஏகம், க³தட்டா²னே ஏகந்தி திண்ணம் திகானம் வஸேன ஏகம் நவகம் வேதி³தப்³ப³ம்.

324. ததோ பரம் நிட்டா²னஸன்னிட்டா²னனாஸனந்திகஸீமாதிக்கந்திகஸஉப்³பா⁴ரானம் வஸேன பா²ஸுவிஹாரபஞ்சகம் வுத்தம். ஸேஸமேத்த² பாளிதோ அட்ட²கதா²தோ ச ஸுவிஞ்ஞேய்யமேவ.

ஆதா³யஸத்தகாதி³கதா²வண்ணனா நிட்டி²தா.

கதி²னக்க²ந்த⁴கவண்ணனா நிட்டி²தா.