2. அயோகு³ளஸுத்தவண்ணனா

834. இமினா சதுமஹாபூ⁴தமயேனாதி இமினா ஸப்³ப³லோகபச்சக்கே²ன சதூஹி மஹாபூ⁴தேஹி நிப்³ப³த்தேன சதுமஹாபூ⁴தமயேன. மனோமயோ பன நிம்மிதகாயோ ப⁴க³வதோ ருசிவஸேன பரேஸம் பச்சக்கோ² ஹோதி. ஓமாதீதி அவமாதி. அவ-புப்³போ³ ஹி மா-ஸத்³தோ³ ஸத்திஅத்தோ²பி ஹோதீதி ‘‘பஹோதி ஸக்கோதீ’’தி அத்தோ² வுத்தோ. அஸம்பி⁴ன்னபத³ந்தி அஸாதா⁴ரணபத³ம் அஞ்ஞத்த² அனாக³தத்தா. காயஸ்ஸ சித்தே ஸமோத³ஹனம் ஆரோபனம் தன்னிஸ்ஸிததாகரணஞ்ச அத்த²தோ சித்தக³தியா பவத்தனமேவாதி ஆஹ ‘‘சித்தக³தியா பேஸேதீ’’தி.

தத்த² சித்தக³திக³மனம் நாம சித்தவஸேன காயஸ்ஸ பரிணாமனேன ‘‘அயம் காயோ இமம் சித்தம் விய ஹோதூ’’தி காயஸ்ஸ சித்தேன ஸமானக³திகதாட²பனம். கத²ம் பன காயோ த³ந்த⁴பவத்திகோ லஹுபவத்தினா சித்தேன ஸமானக³திகோ ஹோதீதி? ந ஸப்³ப³தா² ஸமானக³திகோ. யதே²வ ஹி காயவஸேன சித்தபரிணாமனே சித்தம் ஸப்³ப³தா² காயேன ஸமானக³திகம் ந ஹோதி. ந ஹி கதா³சி தம் ஸபா⁴வஸித்³தே⁴ன அத்தனோ க²ணேன அவத்தித்வா த³ந்த⁴வுத்திகஸ்ஸ ரூபத⁴ம்மஸ்ஸ வஸேன பவத்திதும் ஸக்கோதி, ‘‘இத³ம் சித்தம் அயம் காயோ விய ஹோதூ’’தி பன அதி⁴ட்டா²னேன த³ந்த⁴க³திகஸ்ஸ காயஸ்ஸ அனுவத்தனதோ யாவ இச்சி²தட்டா²னப்பத்தி, தாவ காயக³திஅனுலோமேனேவ ஹுத்வா ஸந்தானவஸேன பவத்தமானம் சித்தம் காயக³தியா பரிணாமிதம் நாம ஹோதி. ஏவம் ‘‘அயம் காயோ இத³ம் சித்தம் விய ஹோதூ’’தி அதி⁴ட்டா²னேன பகே³வ ஸுக²லஹுஸஞ்ஞாய ஸம்பாதி³தத்தா அபா⁴விதித்³தி⁴பாதா³னம் விய த³ந்த⁴ம் அவத்தித்வா யதா² லஹுகம் கதிபயசித்தவாரேனேவ இச்சி²தட்டா²னப்பத்தி ஹோதி, ஏவம் பவத்தமானோ காயோ சித்தக³தியா பரிணாமிதோ நாம ஹோதி, ந ஏகசித்தக்க²ணேனேவ இச்சி²தட்டா²னப்பத்தியா, ஏவஞ்ச கத்வா பா³ஹாஸமிஞ்ஜனபஸாரணூபமாபி உபசாரேன வினா ஸுட்டு²தரம் யுத்தா ஹோதீதி. அஞ்ஞதா² த⁴ம்மதாவிலோமதா ஸியா, நாபி த⁴ம்மானம் லக்க²ணஞ்ஞத²த்தம் இத்³தி⁴ப³லேன காதும் ஸக்கா, பா⁴வஞ்ஞத²த்தமேவ பன காதும் ஸக்காதி.