4. மோக்³க³ல்லானஸுத்தவண்ணனா

826. உத்³த⁴ச்சபகதிகாதி விக்கி²த்தஸபா⁴வா, விப்³ப⁴ந்தசித்தாதி அத்தோ². அனவட்டி²ததாய விப்ப²ந்தி³தசித்ததாய விப்ப²ந்த³மானசித்தா. துச்ச²தாய நளோ வியாதி நளோ, மானோ, உக்³க³தோ நளோ ஏதேஸந்தி உன்னளாதி ஆஹ – ‘‘உன்னளாதி…பே… வுத்தம் ஹோதீ’’தி. சபலாதி சாபல்யதா நாம லோலபா⁴வோ. முராதி க²ரவசனா, ப²ருஸவசனாதி அத்தோ². விகிண்ணவாசா நாம ஸம்ப²ப்பலாபினோதி வுத்தம் ‘‘அஸம்யதவசனா’’திஆதி³. படிபத்தித⁴ம்மே பமுட்டா² வினட்டா² படிவினட்டா² ஸதி ஏதேஸந்தி முட்ட²ஸதீதி ஆஹ – ‘‘நட்ட²ஸ்ஸதினோ’’தி. உப்³ப⁴ந்தசித்தாதி ஸமாதி⁴னோ அபா⁴வேன உத்³த⁴ச்சேனேவ உபரூபரி ப⁴ந்தசித்தா. பாகதிந்த்³ரியா அபா⁴விதகாயதாய கா³மதா³ரகா விய பகதிபூ⁴தஇந்த்³ரியா. நேமோ வுச்சதி பூ⁴மியா ப³த்³த⁴பா⁴வனிமித்தபதே³ஸோ, க³ம்பீ⁴ரோ நேமோ ஏதஸ்ஸாதி க³ம்பீ⁴ரனேமோ. ஸுட்டு² நிகா²தோதிஆதி³ தஸ்ஸ பாத³ஸ்ஸ ஸுப்பதிட்டி²தபா⁴வத³ஸ்ஸனம்.