10. விப⁴ங்க³ஸுத்தவண்ணனா

832. ச²ந்த³ம் உப்பாதே³த்வாதி பா⁴வனாச²ந்த³ம் உப்பாதே³த்வா. லீனாகாரோதி பா⁴வனாசித்தஸ்ஸ லயாபத்தி. கோஸஜ்ஜேன வோகிண்ணாபஜ்ஜனம் வுத்தம்.

ஏவம் பஸாதா³பா⁴வேன சித்தஸ்ஸ விக்கே²பாபத்தி, தத்த² பஸாது³ப்பாத³னேன யம் ஸம்பஹம்ஸனம் இச்சி²தப்³ப³ம், தஸ்ஸ உப்பாத³னாகாரம் த³ஸ்ஸேதும் வுத்தம் ‘‘ஸோ பு³த்³த⁴த⁴ம்மஸங்க⁴கு³ணே ஆவஜ்ஜேத்வா’’திஆதி³. வத்து²காமே ஆரப்³ப⁴ விக்கி²த்தோ புனப்புனம் விக்கி²த்தோ ஹோதியேவாதி வுத்தம் ‘‘அனுவிக்கி²த்தோ’’தி. உப்பத²ம் படிபன்னஸ்ஸ சித்தஸ்ஸ த³ண்ட³னட்டே²ன நிக்³க³ண்ஹனட்டே²ன ஸுத்தானி ஏவ த³ண்டோ³தி ஸுத்தத³ண்டோ³, தேன ஸுத்தத³ண்டே³ன சித்தம் தஜ்ஜேத்வா. பஞ்சகாமகு³ணே ஆரப்³ப⁴ பவத்தோ சித்தவிக்கே²போ புனப்புனம் உப்பஜ்ஜதேவாதி வுத்தம் ‘‘அனுவிக்கி²த்தோ அனுவிஸடோ’’தி.

புரேபச்சா²பா⁴வோ கம்மட்டா²னஸ்ஸ மனஸிகாரவஸேன உக்³க³ஹவஸேன வாதி தது³ப⁴யம் த³ஸ்ஸேதும் ‘‘கத²’’ந்திஆதி³ வுத்தம். அதிலீனாதீ³ஸு சதூஸு டா²னேஸூதி அதிலீனாதிபக்³க³ஹிதஸம்கி²த்தஅனுவிக்கி²த்தஸஞ்ஞிதேஸு சதூஸு டா²னேஸு. தத்த² பா⁴வனம் அனஜ்ஜோ²கா³ஹேத்வாவ ஸங்கோசோ அதிலீனதா, அஜ்ஜோ²கா³ஹேத்வா அந்தோ ஸங்கோசோ ஸம்கி²த்ததா, அந்தோஸங்கே²போ அதிபக்³க³ஹிததா, அச்சாரத்³த⁴வீரியதா அனுவிக்கி²த்ததா. ப³ஹித்³தா⁴ விஸமவிதக்கானுபா⁴வனம் ஆபஜ்ஜந்தோ த்³வத்திம்ஸாகாரவஸேன அட்டி²கஸஞ்ஞாவஸேன வா க³ஹேதப்³ப³ந்தி ஆஹ – ‘‘ஸரீரவஸேன வேதி³தப்³ப³’’ந்தி. தேனாஹ ‘‘உத்³த⁴ம் பாத³தலா’’திஆதி³ (தீ³. நி. 2.377; ம. நி. 1.110).

அஞ்ஞமஞ்ஞம் அஸங்கரதோ ஆகிரீயந்தி பகாரதோ ட²பீயந்தீதி ஆகாரா, பா⁴கா³தி ஆஹ – ‘‘யேஹி ஆகாரேஹீதி யேஹி கோட்டா²ஸேஹீ’’தி. லிங்கீ³யதி ஸல்லக்கீ²யதீதி லிங்க³ம், ஸண்டா²னம். நிமீயதி நித்³தா⁴ரேத்வா பரிச்சி²ந்தீ³யதீதி நிமித்தம், உபட்டா²னம். யோ பி⁴க்கூ²திஆதி³ ஆலோகஸஞ்ஞம் யோ உக்³க³ண்ஹாதி, தம் த³ஸ்ஸனம். அங்க³ணேதி விவடங்க³ணே. ஆலோகஸஞ்ஞம் மனஸிகரோதி ரத்தியம். வீரியாதீ³ஸுபீதி யதா² ‘‘இத⁴ பி⁴க்கு² ச²ந்த³ம் உப்பாதே³த்வா’’தி ச²ந்தே³ வித்தா²ரனயோ வுத்தோ, வீரியாதீ³ஸுபி ஏஸோ ஏவ வித்தா²ரனயோ யோஜேதப்³போ³.

பாஸாத³கம்பனவக்³க³வண்ணனா நிட்டி²தா.