8. நாக³ஸம்யுத்தம்

1. ஸுத்³தி⁴கஸுத்தவண்ணனா

342. அண்ட³ஜாதி அண்டே³ ஜாதா. வத்தி²கோஸேதி வத்தி²கோஸஸஞ்ஞிதே ஜராயுபுடே ஜாதா. ஸம்ஸேதே³தி ஸம்ஸின்னே கிலின்னட்டா²னே உப்பன்னா. உபபதித்வா வியாதி குதோசிபி அவபதித்வா விய நிப்³ப³த்தா. புக்³க³லானந்தி ததா² வினேதப்³ப³புக்³க³லானம்.

ஸுத்³தி⁴கஸுத்தவண்ணனா நிட்டி²தா.

2-50. பணீததரஸுத்தாதி³வண்ணனா

343-391. விஸ்ஸட்ட²காயாதி ‘‘யே சம்மேன வா ருதி⁴ரேன வா அட்டி²னா வா அத்தி²கா, தே ஸப்³ப³ம் க³ண்ஹந்தூ’’தி தத்த² நிரபேக்க²சித்ததாய அதி⁴ட்டி²தஸீலதாய பரிச்சத்தஸரீரா. து³வித⁴காரினோதி ‘‘காலேன குஸலம், காலேன அகுஸல’’ந்தி ஏவம் குஸலாகுஸலகாரினோ. ஸஹ ப்³யயதி பவத்ததீதி ஸஹப்³யோ, ஸஹசாரோ. தஸ்ஸ பா⁴வோ ஸஹப்³யதா, தம் ஸஹப்³யதம். அத³னீயதோ அன்னம். கா²த³னீயதோ க²ஜ்ஜம். பாதப்³ப³தோ பானம். நிவஸனீயதோ வத்த²ம். நிவஸிதப்³ப³ம் நிவாஸனம். பரிவரிதப்³ப³ம் பாவுரணம். யாந்தி தேனாதி யானம், உபாஹனாதி³யானானி. ஆதி³ஸத்³தே³ன வய்ஹஸிவிகாதீ³னம் ஸங்க³ஹோ. ச²த்தம்பி பரிஸ்ஸயாதபது³க்க²பரிரக்க²ணேன மக்³க³க³மனஸாத⁴னந்தி கத்வா ‘‘ச²த்துபாஹன’’ந்திஆதி³ வுத்தம். தேன வுத்தம் ‘‘யம் கிஞ்சி க³மனபச்சய’’ந்தி. பத்த²னம் கத்வா…பே… தத்த² நிப்³ப³த்தந்தி சம்பேய்யனாக³ராஜா வியாதி த³ட்ட²ப்³ப³ம்.

பணீததரஸுத்தாதி³வண்ணனா நிட்டி²தா.

நாக³ஸம்யுத்தவண்ணனா நிட்டி²தா.