13. ஜா²னஸம்யுத்தம்

1. ஸமாதி⁴மூலகஸமாபத்திஸுத்தவண்ணனா

662. ஸமாதி⁴குஸலோதி ஸமாதி⁴ஸ்மிம் குஸலோ. தயித³ம் ஸமாதி⁴கோஸல்லத்தம் ஸஹ ஜா²னங்க³யோகே³ன சதுப்³பி³தோ⁴ ஜா²னஸமாதி⁴, தஸ்மா தம் தம் விபா⁴க³ம் ஜானந்தஸ்ஸ ஸித்³த⁴ம் ஹோதீதி ஆஹ – ‘‘பட²மம் ஜா²ன’’ந்திஆதி³. தத்த² விதக்கவிசாரபீதிஸுகே²கக்³க³தாவஸேன பட²மம் பஞ்சங்கி³கம், பீதிஸுகே²கக்³க³தாவஸேன து³தியம் திவங்கி³கம், ஸுகே²கக்³க³தாவஸேன ததியம் து³வங்கி³கம், உபேக்கே²கக்³க³தாவஸேன சதுத்த²ம் து³வங்கி³கமேவாதி ஏவம் தஸ்மிம் தஸ்மிம் ஜா²னே தம்தம்அங்கா³னம் வவத்தா²னே குஸலோ. ஸமாபத்திகுஸலோதி ஸமாபஜ்ஜனே குஸலோ. ஹாஸேத்வாதி தோஸேத்வா. கல்லம் கத்வாதி ஸமாதா⁴னஸ்ஸ படிபக்க²த⁴ம்மானம் தூ³ரீகரணேன ஸஹகாரீகாரணஞ்ச ஸமாதா⁴னேன ஸமாபஜ்ஜனே சித்தம் ஸமத்த²ம் கத்வா. ஸேஸபதா³னீதி ஸேஸா தயோ கோட்டா²ஸா. ததியாதீ³ஸு நயேஸு அகுஸலோபி ஜா²னத்தா²ய படிபன்னத்தா ‘‘ஜா²யீதேவா’’தி வுத்தோ.

ஸமாதி⁴மூலகஸமாபத்திஸுத்தவண்ணனா நிட்டி²தா.

2-55. ஸமாதி⁴மூலகடி²திஸுத்தாதி³வண்ணனா

663-716. து³தியாதி³ஸுத்தேஸு டி²திகுஸலோதி ஏத்த² அந்தோக³த⁴ஹேதுஅத்தோ² டி²தி-ஸத்³தோ³, தஸ்மிஞ்ச பன குஸலோதி அத்தோ²தி ஆஹ – ‘‘ஜா²னம் ட²பேதும் அகுஸலோ’’தி. ஸத்தட்ட²அச்ச²ராமத்தந்தி ஸத்தட்ட²அச்ச²ராமத்தம் க²ணம் ஜா²னம் ட²பேதும் ந ஸக்கோதி அதி⁴ட்டா²னவஸீபா⁴வஸ்ஸ அனிப்பா²தி³தத்தா. யதா²பரிச்சே²தே³ன காலேன வுட்டா²தும் ந ஸக்கோதி வுட்டா²னவஸீபா⁴வஸ்ஸ அனிப்பா²தி³தத்தா. கல்லம் ஜாதம் அஸ்ஸாதி கல்லிதம், தஸ்மிம் கல்லிதே கல்லிதபா⁴வேன கஸிணாரம்மணேஸு ‘‘இத³ம் நாம அஸுகஸ்ஸா’’தி விஸயவஸேன ஸமாபஜ்ஜிதும் அஸக்கோந்தோ ந ஸமாதி⁴ஸ்மிம் ஆரம்மணகுஸலோ. ந ஸமாதி⁴ஸ்மிம் கோ³சரகுஸலோதி ஸமாதி⁴ஸ்மிம் நிப்பா²தி³தப்³பே³ தஸ்ஸ கோ³சரே கம்மட்டா²னஸஞ்ஞிதே பவத்திட்டா²னே பி⁴க்கா²சாரகோ³சரே ச ஸதிஸம்பஜஞ்ஞவிரஹிதோ அகுஸலோ. கேசி பன ‘‘கம்மட்டா²னகோ³சரோ பட²மஜ்ஜா²னாதி³கம், ‘ஏவம் ஸமாபஜ்ஜிதப்³ப³ம், ஏவம் ப³ஹுலீகாதப்³ப³’ந்தி அஜானந்தோ தத்த² அகுஸலோ நாமா’’தி வத³ந்தி. கம்மட்டா²னம் அபி⁴னீஹரிதுந்தி கம்மட்டா²னம் விஸேஸபா⁴கி³யதாய அபி⁴னீஹரிதும் அகுஸலோ. ஸக்கச்சகாரீதி சித்தீகாரீ. ஸாதச்சகாரீதி நியதகாரீ. ஸமாதி⁴ஸ்ஸ உபகாரகத⁴ம்மாதி அப்பனாகோஸல்லா. ஸமாபத்திஆதீ³ஹீதி ஆதி³-ஸத்³தே³ன ஸக்கச்சகாரிபதா³தீ³னம்யேவ ஸங்க³ஹோ த³ட்ட²ப்³போ³ சதுக்கானம் வுத்தத்தா. தேனாஹ ‘‘யோஜேத்வா சதுக்கா வுத்தா’’தி. லோகியஜ்ஜா²னவஸேனேவ கதி²தம் ‘‘ஸமாதி⁴குஸலோ’’திஆதி³னா நயேன தே³ஸனாய பவத்தத்தா. ந ஹி லோகுத்தரத⁴ம்மேஸு அகோஸல்லம் நாம லப்³ப⁴தி. யதி³ அகோஸல்லம், ந குஸலஸத்³தே³ன விஸேஸிதப்³ப³தா ஸியாதி.

ஸமாதி⁴மூலகடி²திஸுத்தாதி³வண்ணனா நிட்டி²தா.

ஜா²னஸம்யுத்தவண்ணனா நிட்டி²தா.

நிட்டி²தா ச ஸாரத்த²ப்பகாஸினியா

ஸம்யுத்தனிகாய-அட்ட²கதா²ய க²ந்த⁴வக்³க³வண்ணனா.