9. ஓபம்மஸம்யுத்தம்

1. கூடஸுத்தவண்ணனா

223. கூடம் க³ச்ச²ந்தீதி கூடச்சி²த்³த³ஸ்ஸ அனுபவிஸனவஸேன கூடம் க³ச்ச²ந்தி. யா ச கோ³பானஸியோ கோ³பானஸந்தரக³தா, தாபி கூடம் ஆஹச்ச டா²னேன கூடங்க³மா. து³விதா⁴பி கூடே ஸமோஸரணா. கூடஸ்ஸ ஸமுக்³கா⁴தேன வினாஸேன பி⁴ஜ்ஜனேன. அவிஜ்ஜாய ஸமுக்³கா⁴தேனாதி அவிஜ்ஜாய அச்சந்தமேவ அப்பவத்தியா. தேன ச மோக்க²த⁴ம்மாதி⁴க³மேன தத³னுரூபத⁴ம்மாதி⁴க³மோ த³ஸ்ஸிதோ. அப்பமத்தாதி பன இமினா தஸ்ஸ உபாயோ த³ஸ்ஸிதோ.

கூடஸுத்தவண்ணனா நிட்டி²தா.

2. நக²ஸிக²ஸுத்தவண்ணனா

224. ஏவம் அப்பகா யதா² நக²ஸிகா²ய ஆரோபிதபம்ஸு, ஸுக³திஸம்வத்தனியஸ்ஸ கம்மஸ்ஸ அப்பகத்தா ஏவம் தே³வேஸுபீதி ஹீனூதா³ஹரணவஸேன வுத்தம். அப்பதரா ஹி ஸத்தா யே தே³வேஸு ஜாயந்தி, தஞ்ச கோ² காமதே³வேஸு. இதரேஸு பன வத்தப்³ப³மேவ நத்தி².

நக²ஸிக²ஸுத்தவண்ணனா நிட்டி²தா.

3. குலஸுத்தவண்ணனா

225. வித⁴ம்ஸயந்தி விஹேட²யந்தி. வட்³டி⁴தாதி பா⁴வனாபாரிபூரிவஸேன பரிப்³ரூஹிதா. புனப்புனம் கதாதி பா⁴வனாய ப³ஹுலீகரணேன அபராபரம் பவத்திதா யுத்தயானம் விய கதாதி யதா² யுத்தம் ஆஜஞ்ஞரத²ம் சே²கேன ஸாரதி²னா அதி⁴ட்டி²தம் யதா²ருசி பவத்ததி, ஏவம் யதா²ருசி பவத்தியா க³மிதா. பதிட்டா²னட்டே²னாதி அதி⁴ட்டா²னட்டே²ன. வத்து² விய கதா ஸப்³ப³ஸோ உபக்கிலேஸவிஸோத⁴னேன ஸுவிஸோதி⁴தமரியாத³ம் விய கதா. அதி⁴ட்டி²தாதி படிபக்க²தூ³ரீபா⁴வதோ ஸுபா⁴விதபா⁴வேன அவிகம்பனேய்யதாய ட²பிதா. ஸமந்ததோ சிதாதி ஸப்³ப³பா⁴கே³ன பா⁴வனூபசயம் க³மிதா. தேனாஹ ‘‘ஸுவட்³டி⁴தா’’தி. ஸுட்டு² ஸமாரத்³தா⁴தி மேத்தாபா⁴வனாய மத்த²கப்பத்தியா ஸம்மதே³வ ஸம்பாதி³தா.

குலஸுத்தவண்ணனா நிட்டி²தா.

4. ஓக்கா²ஸுத்தவண்ணனா

226. மஹாமுக²உக்க²லீனந்தி மஹாமுகா²னம் மஹந்தகோளும்பா³னம் ஸதம். பணீதபோ⁴ஜனப⁴ரிதானந்தி ஸப்பிமது⁴ஸக்கராதீ³ஹி உபனீதபணீதபோ⁴ஜனேஹி பரிபுண்ணானம். தஸ்ஸாதி பாட²ஸ்ஸ. கோ³து³ஹனமத்தந்தி கோ³தோ³ஹனவேலாமத்தம். தம் பன கித்தகம் அதி⁴ப்பேதந்தி ஆஹ ‘‘கா³வியா’’திஆதி³. ஸப்³ப³ஸத்தேஸு ஹிதப²ரணந்தி அனோதி⁴ஸோமேத்தாபா⁴வனமாஹ – மேத்தசித்தம் அப்பனாப்பத்தம் பா⁴வேதும் ஸக்கோதீதி அதி⁴ப்பாயோ. தம்பி ததோ யதா²வுத்ததா³னதோ மஹப்ப²லதரந்தி.

ஓக்கா²ஸுத்தவண்ணனா நிட்டி²தா.

5. ஸத்திஸுத்தவண்ணனா

227. அக்³கே³ பஹரித்வாதி திண்ஹப²லஸத்தியா அக்³கே³ ஹத்தே²ன வா முட்டி²னா வா பஹாரம் த³த்வா. கப்பாஸவட்டிம் வியாதி பஹதகப்பாஸபிண்ட³ம் விய. நிய்யாஸவட்டிம் வியாதி ப²லஸண்டா²னம் நிய்யாஸபிண்ட³ம் விய. ஏகதோ கத்வாதி கலிகாதி³பா⁴வேன வீஸதிம்ஸபிண்டா³னி ஏகஜ்ஜ²ம் கத்வா. அல்லியாபேந்தோ பிண்ட³ம் கரோந்தோ. படிலேணேதீதி படிலீனயதி நாமேதி. அல்லியாபேந்தோ தே த்³வேபி தா⁴ரா ஏகதோ ஸம்பு²ஸாபேந்தோ. படிகோட்டேதீதி படிபஹரதி. தத்த² க²ண்ட³ம் விய நிய்யாஸோ. கப்பாஸவட்டனகரணீயந்தி விஹதஸ்ஸ கப்பாஸஸ்ஸ படிஸம்ஹரணவஸேன ப³ந்த⁴னத³ண்ட³ம். பவத்தேந்தோதி கப்பாஸஸ்ஸ ஸம்வேல்லனவஸேன பவத்தேந்தோ.

ஸத்திஸுத்தவண்ணனா நிட்டி²தா.

6. த⁴னுக்³க³ஹஸுத்தவண்ணனா

228. த³ள்ஹத⁴னுனோதி தி²ரதரத⁴னுனோ. இதா³னி தஸ்ஸ தி²ரதரபா⁴வம் பரிச்சே²த³தோ த³ஸ்ஸேதும் ‘‘த³ள்ஹத⁴னூ’’திஆதி³ வுத்தம். தத்த² த்³விஸஹஸ்ஸதா²மந்தி பலானம் த்³விஸஹஸ்ஸதா²மம். வுத்தமேவத்த²ம் பாகடதரம் கத்வா த³ஸ்ஸேதும் ‘‘யஸ்ஸா’’திஆதி³மாஹ. தத்த² யஸ்ஸாதி த⁴னுனோ. ஆரோபிதஸ்ஸாதி ஜியம் ஆரோபிதஸ்ஸ. ஜியாப³த்³தோ⁴தி ஜியாய ப³த்³தோ⁴. பத²விதோ முச்சதி, ஏதம் ‘‘த்³விஸஹஸ்ஸதா²ம’’ந்தி வேதி³தப்³ப³ம். லோஹஸீஸாதீ³னந்தி காளலோஹதம்ப³லோஹஸீஸாதீ³னம். பா⁴ரோதி புரிஸபா⁴ரோ, ஸோ பன மஜ்ஜி²மபுரிஸஸ்ஸ வஸேன ஏதி³ஸம் தஸ்ஸ ப³லம் த³ட்ட²ப்³ப³ம். உக்³க³ஹிதஸிப்பா த⁴னுவேத³ஸிக்கா²வஸேன. சிண்ணவஸீபா⁴வா லக்கே²ஸு அவிரஜ்ஜ²னஸரக்கே²பவஸேன. கதம் ராஜகுலாதீ³ஸு உபக³ந்த்வா அஸனம் ஸரக்கே²போ ஏதேஹீதி கதூபஸனாதி ஆஹ ‘‘ராஜகுலாதீ³ஸு த³ஸ்ஸிதஸிப்பா’’தி.

‘‘போ³தி⁴ஸத்தோ சத்தாரி கண்டா³னி ஆஹரீ’’தி வத்வா தமேவ அத்த²ம் வித்தா²ரதோ த³ஸ்ஸேந்தோ ‘‘ததா³ கிரா’’திஆதி³மாஹ. தத்த² ஜவிஸ்ஸாமாதி தா⁴விஸ்ஸாம. அக்³கி³ உட்ட²ஹீதி ஸீக⁴பதனஸந்தாபேன ச ஸூரியரஸ்மிஸந்தாபஸ்ஸ ஆஸன்னபா⁴வேன ச உஸுமா உட்ட²ஹி. பக்க²பஞ்ஜரேனாதி பக்க²ஜாலந்தரேன.

நிவத்தித்வாதி ‘‘நிப்பயோஜனமித³ம் ஜவன’’ந்தி நிவத்தித்வா. பத்தகடாஹேன ஓத்த²டபத்தோ வியாதி பிஹிதபத்தோ விய அஹோஸி, வேக³ஸா பதனேன நக³ரஸ்ஸ உபரி ஆகாஸஸ்ஸ நிரிக்க²ணம் அஹோஸி. ஸஞ்சாரிதத்தா அனேகஹம்ஸஸஹஸ்ஸஸதி³ஸோ பஞ்ஞாயி ஸேய்யதா²பி போ³தி⁴ஸத்தஸ்ஸ த⁴னுக்³க³ஹகாலே ஸரகூடாதி³த³ஸ்ஸனே.

து³க்கரந்தி தஸ்ஸ அத³ஸ்ஸனம் ஸந்தா⁴யாஹ, ந அத்தனோ பதனம். ஸூரியமண்ட³லஞ்ஹி அதிஸீகே⁴ன ஜவேன க³ச்ச²ந்தம்பி பஞ்ஞாஸயோஜனாயாமவித்த²தம் அத்தனோ விபுலதாய பப⁴ஸ்ஸரதாய ச ஸத்தானம் சக்கு²ஸ்ஸ கோ³சரபா⁴வம் க³ச்ச²தி, ஜவனஹம்ஸோ பன தாதி³ஸேன ஸூரியேன ஸத்³தி⁴ம் ஜவேன க³ச்ச²ந்தோ ந பஞ்ஞாயேய்ய. தஸ்மா வுத்தம் ‘‘ந ஸக்கா தயா பஸ்ஸிது’’ந்தி. சத்தாரோ அக்க²ணவேதி⁴னோ. க³ந்த்வா க³ஹிதே ஸோதும் க⁴ண்ட³ம் பிளந்தா⁴பேத்வா ஸயம் புரத்தா²பி⁴முகோ² நிஸின்னோ. புரத்தி²மதி³ஸாபி⁴முக²ம் க³தகண்ட³ம் ஸந்தா⁴யாஹ ‘‘பட²மகண்டே³னேவ ஸத்³தி⁴ம் உப்பதித்வா’’தி. தே சத்தாரி கண்டா³னி ஏகக்க²ணேயேவ கி²பிம்ஸு.

ஆயும் ஸங்க²ரோதி ஏதேனாதி ஆயுஸங்கா²ரோ. யதா² ஹி கம்மஜரூபானம் பவத்தி ஜீவிதிந்த்³ரியபடிப³த்³தா⁴, ஏவம் அத்தபா⁴வஸ்ஸ பவத்தி தப்படிப³த்³தா⁴தி. ப³ஹுவசனனித்³தே³ஸோ பன பாளியம் ஏகஸ்மிம் க²ணே அனேகஸதஸங்க²ஸ்ஸ ஜீவிதிந்த்³ரியஸ்ஸ உபலப்³ப⁴னதோ. தம் ஜீவிதிந்த்³ரியம். ததோ யதா²வுத்ததே³வதானம் ஜவதோ ஸீக⁴தரம் கீ²யதி இத்தரக²ணத்தா. வுத்தஞ்ஹேதம் –

‘‘ஜீவிதம் அத்தபா⁴வோ ச, ஸுக²து³க்கா² ச கேவலா;

ஏகசித்தஸமாயுத்தா, லஹுஸோ வத்ததே க²ணோ’’தி. (மஹானி. 10);

பே⁴தோ³தி ப⁴ங்கோ³. ந ஸக்கா பஞ்ஞாபேதும் ததோபி அதிவிய இத்தரக²ணத்தா.

த⁴னுக்³க³ஹஸுத்தவண்ணனா நிட்டி²தா.

7. ஆணிஸுத்தவண்ணனா

229. அஞ்ஞே ராஜானோ ச பா⁴க³ம் க³ண்ஹந்தா இமே விய த³ஸபா⁴க³ம் க³ண்ஹந்தீதி தேஸமயம் அனுக³தி பஞ்ஞாயதி. மஹாஜனஸ்ஸ ஆனயனதோ ஆனகோதி ஆஹ ‘‘ஏவம்லத்³த⁴னாமோ’’தி. இதா³னி தம் ஆதி³தோ பட்டா²ய ஆக³மனானுக்கமம் த³ஸ்ஸேதும் ‘‘ஹிமவந்தே கிரா’’திஆதி³மாஹ. கரேணுந்தி கரேணுகம், ஹத்தி²னிந்தி அத்தோ². ஸக்கரிம்ஸூதி அனத்த²பரிஹரணவஸேன பஸத்தூ²பஹாரவஸேன ச பூஜேஸும். ஓதரீதி குளீரத³ஹம் பாவிஸி. படிக்கமித்வா ட²பனவஸேன அபக்கமித்வா பதி.

ஸுவண்ணரஜதாதி³மயந்தி கிஸ்மிஞ்சி சி²த்³தே³ ஸுவண்ணமயம், கிஸ்மிஞ்சி ரஜதமயம், கிஸ்மிஞ்சி ப²லிகமயம் ஆணிம் க⁴டயிம்ஸு ப³ந்தி⁴ம்ஸு. புப்³பே³ ப²ரித்வா திட்ட²ந்தஸ்ஸ த்³வாத³ஸ யோஜனானி பமாணோ ஏதஸ்ஸாதி த்³வாத³ஸயோஜனப்பமாணோ, ஸத்³தோ³. அத²ஸ்ஸ அனேகஸதகாலே க³ச்ச²ந்தே அந்தோஸாலாயம்பி து³க்கே²ன ஸுய்யித்த² ஆணிஸங்கா⁴டமத்தத்தா.

க³ம்பீ⁴ராதி அகா³தா⁴ து³க்கோ²கா³ள்ஹா. ஸல்லஸுத்தஞ்ஹி ‘‘அனிமித்தமனஞ்ஞாத’’ந்திஆதி³னா பாளிவஸேன க³ம்பீ⁴ரம், ந அத்த²க³ம்பீ⁴ரம். ததா² ஹி தத்த² தா தா கா³தா² து³விஞ்ஞேய்யரூபா திட்ட²ந்தி, து³விஞ்ஞேய்யம் ஞாணேன து³க்கோ²கா³ஹந்தி கத்வா ‘‘க³ம்பீ⁴ர’’ந்தி வுச்சதி. புப்³பா³பரம்பேத்த² காஸஞ்சி கா³தா²னம் து³விஞ்ஞேய்யதாய து³க்கோ²கா³ஹமேவ, தஸ்மா தம் பாளிவஸேன ‘‘க³ம்பீ⁴ர’’ந்தி வுத்தம் ‘‘பாளிவஸேன க³ம்பீ⁴ரா ஸல்லஸுத்தஸதி³ஸா’’தி. இமினா நயேன ‘‘அத்த²வஸேன க³ம்பீ⁴ரா’’தி ஏத்த² அத்தோ² வேதி³தப்³போ³. மஹாவேத³ல்லஸுத்தஸ்ஸ அத்த²வஸேன க³ம்பீ⁴ரதா பாகடாயேவ. லோகம் உத்தரதீதி லோகுத்தரோ, நவவித⁴அப்பமாணத⁴ம்மோ, ஸோ அத்த²பூ⁴தோ ஏதேஸம் அத்தீ²தி லோகுத்தரா. தேனாஹ ‘‘லோகுத்தரஅத்த²தீ³பகா’’தி. ஸத்தஸுஞ்ஞதத⁴ம்மமத்தமேவாதி ஸத்தேன அத்தனா ஸுஞ்ஞதம் கேவலம் த⁴ம்மமத்தமேவ. உக்³க³ஹேதப்³ப³ம் பரியாபுணிதப்³ப³ந்தி ச லிங்க³வசனவிபல்லாஸேன வுத்தந்தி ஆஹ ‘‘உக்³க³ஹேதப்³பே³ ச பரியாபுணிதப்³பே³ சா’’தி. கவிதாதி கவினோ கம்மம் கவிகதா. யஸ்ஸ பன யம் கம்மம், தம் தேன கதந்தி வுச்சதீதி ஆஹ ‘‘கவிதாதி கவீஹி கதா’’தி. இதரம் ‘‘காவேய்யா’’தி பத³ம், கப்³ப³ந்தி வுத்தம் ஹோதி. ‘‘கப்³ப³’’ந்தி ச கவினா வுத்தந்தி அத்தோ². தேனாஹ ‘‘தஸ்ஸேவ வேவசன’’ந்தி. சித்தக்க²ராதி விசித்ராகாரஅக்க²ரா. ஸாஸனதோ ப³ஹிபூ⁴தாதி ந ஸாஸனாவசரா. தேஸம் ஸாவகேஹீதி ‘‘பு³த்³தா⁴னம் ஸாவகா’’தி அபஞ்ஞாதானம் யேஸம் கேஸஞ்சி ஸாவகேஹி. அனுக்³க³ய்ஹமானாதி ந உக்³க³ய்ஹமானா ஸவனதா⁴ரணபரிசயஅத்தூ²பபரிக்கா²தி³வஸேன அனுக்³க³ய்ஹமானா. அந்தரதா⁴யந்தி அத³ஸ்ஸனம் க³ச்ச²ந்தி.

ஆணிஸுத்தவண்ணனா நிட்டி²தா.

8. கலிங்க³ரஸுத்தவண்ணனா

230. கலிங்க³ரம் வுச்சதி கு²த்³த³கதா³ருக²ண்ட³ம், தம் உபதா⁴னம் ஏதேஸந்தி கலிங்க³ரூபதா⁴னா. லிச்ச²வீ பன க²தி³ரத³ண்ட³ம் உபதா⁴னம் கத்வா ததா³ விஹரிம்ஸு. தஸ்மா வுத்தம் ‘‘க²தி³ரக⁴டிகாஸூ’’திஆதி³. பகதிவிஜ்ஜுஸஞ்ஞிதோ நத்தி² ஏதேஸம் க²ணோ விஜ்ஜ²னேதி அக்க²ணவேதி⁴னோ ததோ ஸீக⁴தரம் விஜ்ஜ²னதோ. ‘‘அக்க²ண’’ந்தி விஜ்ஜு வுச்சதி இத்தரக²ணத்தா. அக்க²ணோபா⁴ஸேன லக்க²ணவேத⁴கா அக்க²ணவேதி⁴னோ. அனேகதா⁴ பி⁴ன்னஸ்ஸ வாலஸ்ஸ விஜ்ஜ²னேன வாலவேதி⁴னோ. வாலேகதே³ஸோ ஹி இத⁴ ‘‘வாலோ’’தி க³ஹிதோ.

ப³ஹுதே³வ தி³வஸபா⁴க³ம் பதா⁴னானுயோக³தோ உப்பன்னத³ரத²பரிஸ்ஸமவினோத³னத்த²ம் ந்ஹாயித்வா. தே ஸந்தா⁴யாதி தே ததா²ரூபே பதா⁴னகம்மிகபி⁴க்கூ² ஸந்தா⁴ய. இத³ம் இதா³னி வுச்சமானம் அத்த²ஜாதம் வுத்தம் போராணட்ட²கதா²யம். அயம்பி தீ³போதி தம்ப³பண்ணிதீ³பமாஹ. பதா⁴னானுயுஞ்ஜனவேலாய நிவேத³னவஸேன தத்த² தத்த² ஏகஜ்ஜ²ம் பஹதக⁴ண்டி³னிக்³கோ⁴ஸேனேவ ஏகக⁴ண்டி³னிக்³கோ⁴ஸோ, தத்த² தத்த² பண்ணஸாலாதீ³ஸு வஸந்தானம் பி⁴க்கூ²னம் வஸேன ஏகபதா⁴னபூ⁴தோ. நானாமுகோ²தி அனுராத⁴புரஸ்ஸ பச்சி²மதி³ஸாயம் ஏகோ விஹாரோ, பிலிச்சி²கோளிநக³ரஸ்ஸ புரத்தி²மதி³ஸாயம். உப⁴யத்த² பவத்தக⁴ண்டி³ஸத்³தா³ அந்தராபவத்தக⁴ண்டி³ஸத்³தே³ஹி மிஸ்ஸேத்வா ஓஸரந்தி. கல்யாணியம் பவத்தக⁴ண்டி³ஸத்³தோ³ ததா² நாக³தீ³பே.

கலிங்க³ரஸுத்தவண்ணனா நிட்டி²தா.

9. நாக³ஸுத்தவண்ணனா

231. அதிக்கந்தவேலந்தி ப⁴த்தானுமோத³னஉபனிஸின்னகதா²வேலதோ அதிக்கந்தவேலம். அஸம்பி⁴ன்னேனாதி ஸரஸம்பத்திதோ அஸம்பி⁴ன்னேன, ஸரஸ்ஸ உச்சாரணஸம்பத்திம் அபரிஹாபேத்வாதி அத்தோ². அபரிஸுத்³தா⁴ஸயதாய நேவ கு³ணவண்ணாய ந ஞாணப³லாய ஹோதி. தந்தி தம் ததா² பச்சயானம் பரிபு⁴ஞ்ஜனம், தம் ததா² மிச்சா²படிபஜ்ஜனம்.

நாக³ஸுத்தவண்ணனா நிட்டி²தா.

10. பி³ளாரஸுத்தவண்ணனா

232. க⁴ரானம் ஸந்தீ⁴தி க⁴ரேன க⁴ரஸ்ஸ ஸம்ப³ந்த⁴ட்டா²னம். ஸஹ மலேன வத்ததீதி ஸமலம். கே³ஹதோ கா³மதோ ச நிக்க²மனசந்த³னிகட்டா²னம். ஸங்காரட்டா²னந்தி ஸங்காரகூடம். கேசி ‘‘ஸந்தி⁴ஸங்காரகூடட்டா²ன’’ந்தி வத³ந்தி. வுட்டா²னந்தி ஆபன்னஆபத்திதோ, ந கிலேஸதோ வுட்டா²னம், ஸுத்³த⁴ந்தே அதி⁴ட்டா²னம். தம் பன யதா²ஆபன்னாய ஆபத்தியா ‘‘தே³ஸனா’’த்வேவ வுச்சதீதி ஆஹ ‘‘தே³ஸனா பஞ்ஞாயதீ’’தி.

பி³ளாரஸுத்தவண்ணனா நிட்டி²தா.

11. ஸிங்கா³லஸுத்தவண்ணனா

233. ஏத்தகம்பீதி இமினா ஜரஸிங்கா³லேன லத்³த⁴ப்³ப³ம் சித்தஸ்ஸாத³மத்தம்பி ந லபி⁴ஸ்ஸதி ஸகலமேவ கப்பம் ஸப்³ப³ஸோ அவீசிஜாலாஹி நிரந்தரம் ஜா²யமானதாய நிச்சது³க்கா²துரபா⁴வதோ.

ஸிங்கா³லஸுத்தவண்ணனா நிட்டி²தா.

12. து³தியஸிங்கா³லஸுத்தவண்ணனா

234. கதஜானனந்தி கதூபகாரஜானனம். கதவேதி³தாதி தஸ்ஸேவ பரேஸம் பாகடகரணவஸேன ஜானனமேவ. ஆசாரமேவாதி கதாபராத⁴மேவ.

து³தியஸிங்கா³லஸுத்தவண்ணனா நிட்டி²தா.

ஸாரத்த²ப்பகாஸினியா ஸம்யுத்தனிகாய-அட்ட²கதா²ய

ஓபம்மஸம்யுத்தவண்ணனாய லீனத்த²ப்பகாஸனா ஸமத்தா.