1-8. சக்கு²ஸுத்தாதி³வண்ணனா

188-195. ஏகவிஹாரீதி சதூஸுபி இரியாபதே²ஸு ஏகாகீ ஹுத்வா விஹரந்தோ. விவேகட்டோ²தி விவித்தட்டோ², தேனாஹ ‘‘நிஸ்ஸத்³தோ³’’தி. ஸதியா அவிப்பவஸந்தோதி ஸதியா அவிப்பவாஸேன டி²தோ, ஸப்³ப³தா³ அவிஜஹனவஸேன பவத்தோ. ஆதாபீதி வீரியஸம்பன்னோதி ஸப்³ப³ஸோ கிலேஸானம் ஆதாபனபரிதாபனவஸேன பவத்தவீரியஸமங்கீ³பூ⁴தோ. பஹிதத்தோதி தஸ்மிம் விஸேஸாதி⁴க³மே பேஸிதசித்தோ, தத்த² நின்னோ தப்பப்³பா⁴ரோதி அத்தோ². ஹுத்வா அபா⁴வாகாரேனாதி உப்பத்திதோ புப்³பே³ அவிஜ்ஜமானோ பச்சயஸமவாயேன ஹுத்வா உப்பஜ்ஜித்வா ப⁴ங்கு³பரமஸங்கா²தேன அபா⁴வாகாரேன. அனிச்சந்தி நிச்சது⁴வதாபா⁴வதோ. உப்பாத³வயவந்ததாயாதி க²ணே க²ணே உப்பஜ்ஜித்வா நிருஜ்ஜ²னதோ. தாவகாலிகதாயாதி தங்க²ணிகதாய. விபரிணாமகோடியாதி விபரிணாமவந்ததாய. சக்கு²ஞ்ஹி உபாதா³ய விகாராபஜ்ஜனேன விபரிணமந்தம் வினாஸம் படிபீளம் பாபுணாதி. நிச்சபடிக்கே²பதோதி நிச்சதாய படிக்கி²பிதப்³ப³தோ லேஸமத்தஸ்ஸபி அனுபலப்³ப⁴னதோ. து³க்க²மனட்டே²னாதி நிரந்தரது³க்க²தாய து³க்கே²ன க²மிதப்³ப³தோ. து³க்க²வத்து²கட்டே²னாதி நானப்பகாரது³க்கா²தி⁴ட்டா²னதோ. ஸததஸம்பீளனட்டே²னாதி அபி⁴ண்ஹதாபஸபா⁴வதோ. ஸுக²படிக்கே²பேனாதி ஸுக²பா⁴வஸ்ஸ படிக்கி²பிதப்³ப³தோ. தண்ஹாகா³ஹோ மமம்காரபா⁴வதோ. மானகா³ஹோ அஹம்காரபா⁴வதோ. தி³ட்டி²கா³ஹோ ‘‘அத்தா மே’’தி விபல்லாஸபா⁴வதோ. விராக³வஸேனாதி விராக³க்³க³ஹணேன. ததா² விமுத்திவஸேனாதி விமுத்திக்³க³ஹணேன.

பஸாதா³வ க³ஹிதா த்³வாரபா⁴வப்பத்தஸ்ஸ அதி⁴ப்பேதத்தா. ஸம்மஸனசாரசித்தம் த்³வாரபூ⁴தமனோதி அதி⁴ப்பாயோ.

ச²ட்டே² ஆரம்மணே தேபூ⁴மகத⁴ம்மா ஸம்மஸனசாரஸ்ஸ அதி⁴ப்பேதத்தா. யதா² பட²மஸுத்தே பஞ்ச பஸாதா³ க³ஹிதா, ந ஸஸம்பா⁴ரசக்கு²ஆத³யோ, ஏவம் ததியஸுத்தே ந பஸாத³வத்து²கசித்தமேவ க³ஹிதம். ந தம்ஸம்பயுத்தா த⁴ம்மா. ஏவஞ்ஹி அவதா⁴ரணம் ஸாத்த²கம் ஹோதி அஞ்ஞதா² தேன அபனேதப்³ப³ஸ்ஸ அபா⁴வதோ. ஸப்³ப³த்தா²தி ஸப்³பே³ஸு சதுத்த²ஸுத்தாதீ³ஸு. ஜவனப்பத்தாதி ஜவனசித்தஸம்யுத்தா.

சக்கு²ஸுத்தாதி³வண்ணனா நிட்டி²தா.