3. சந்தூ³பமஸுத்தவண்ணனா

146. பியமனாபனிச்சனவகாதி³கு³ணேஹி சந்தோ³ உபமா ஏதேஸந்தி சந்தூ³பமா. ஸந்த²வாதீ³னி பதா³னி அஞ்ஞமஞ்ஞவேவசனானி. பரியுட்டா²னம் புன சித்தே கிலேஸாதி⁴க³மோ. ஸப்³பே³ஹிபி பதே³ஹி கத்த²சி ஸத்தே அனுரோத⁴ரோதா⁴பா⁴வமாஹ. அத்தனோ பன ஸோம்மபா⁴வேன மஹாஜனஸ்ஸ பியோ மனாபோ. யத³த்த²மேத்த² சந்தூ³பமா ஆஹடா, தம் த³ஸ்ஸேந்தோ ‘‘ஏவ’’ந்திஆதி³மாஹ. ந கேவலம் சந்தூ³பமதாய ஏத்தகோ ஏவ கு³ணோ, அத² கோ² அஞ்ஞேபி ஸந்தீதி தே த³ஸ்ஸேதும் ‘‘அபிசா’’திஆதி³ வுத்தம். ஏவமாதீ³ஹீதி ஆதி³-ஸத்³தே³ன யதா². சந்தோ³ லோகானுக்³க³ஹேன அஜவீதி²ஆதி³கா நானாவீதி²யோ படிபஜ்ஜதி, ஏவம் பி⁴க்கு² தம் தம் தி³ஸம் உபக³ச்ச²தி குலானுத்³த³யாய. யதா² சந்தோ³ கண்ஹபக்க²தோ ஸுக்கபக்க²ம் உபக³ச்ச²ந்தோ கலாஹி வட்³ட⁴மானோ ஹுத்வா நிச்சனவோ ஹோதி, ஏவம் பி⁴க்கு² கண்ஹபக்க²ம் பஹாய ஸுக்கபக்க²ம் உபக³ந்த்வா கு³ணேஹி வட்³ட⁴மானோ லோகஸ்ஸ வா பாமோஜ்ஜபாஸம்ஸத்தோ² நிச்சனவதாய சந்த³ஸமசித்தோ அது⁴னுபஸம்பன்னோ விய ச நிச்சனவோ ஹுத்வா சரதி.

அபகஸ்ஸித்வாதி கிலேஸகாமவத்து²காமேஹி விவேசேத்வா. தம் நேக்க²ம்மாபி⁴முக²ம் காயசித்தானம் ஆகட்³ட⁴னம் காயதோ அபனயனஞ்ச ஹோதீதி ஆஹ ‘‘ஆகட்³டி⁴த்வா அபனேத்வாதி அத்தோ²’’தி. சதுக்கஞ்சேத்த² ஸம்ப⁴வதீதி தம் த³ஸ்ஸேதும் ‘‘யோ ஹி பி⁴க்கூ²’’திஆதி³ வுத்தம்.

நிச்சனவயாதி ‘‘நிச்சனவகா’’இச்சேவ வுத்தம் ஹோதி. க-ஸத்³தே³ன ஹி பத³ம் வட்³டி⁴தம், க-காரஸ்ஸ ச ய-காராதே³ஸோ. ஏவம் விசரிம்ஸூதி கிஞ்ஜக்க²வஸேன பரிக்³க³ஹாபா⁴வேன யதா² இமே, ஏவம் விசரிம்ஸு அஞ்ஞேதி அனுகம்பமானா.

த்³வேபா⁴திகவத்தூ²தி த்³வேபா⁴திகத்தே²ரபடிப³த்³த⁴ம் வத்து²ம். அப்பதிரூபகரணந்தி பி⁴க்கூ²னம் அஸாருப்பகரணம். ஆதா⁴யித்வாதி ஆரோபனம் ட²பேத்வா. ததா²தி யதா² ஸங்க⁴மஜ்ஜே² க³ணமஜ்ஜே² ச, ததா² வுட்³ட⁴தரே புக்³க³லே அப்பதிரூபகரணம். ஏவமாதீ³தி ஆதி³-ஸத்³தே³ன அந்தரக⁴ரப்பவேஸனே அஞ்ஞத்த² ச யதா²வுத்ததோ அஞ்ஞம் அஸாருப்பகிரியம் ஸங்க³ண்ஹாதி. தத்தே²வாதி ஸங்க⁴மஜ்ஜே² க³ணமஜ்ஜே² புக்³க³லஸ்ஸ ச வுட்³ட⁴ஸ்ஸ ஸந்திகே.

யதா²வுத்தேஸு அஞ்ஞேஸு ச தேஸு டா²னேஸு. பாபிச்ச²தாபி மனோபாக³ப்³பி⁴யந்தி ஏதேனேவ கோதூ⁴பனாஹாதீ³னம் ஸமுதா³சாரோ மனோபாக³ப்³பி⁴யந்தி த³ஸ்ஸிதம் ஹோதி.

ஏகதோ பா⁴ரியந்தி பிட்டி²பஸ்ஸதோ ஓனதம். வாயுபத்த²ம்ப⁴ந்தி சித்தஸமுட்டா²னவாயுனா உபத்த²ம்ப⁴னம். அனுப்³பே³ஜேத்வா சித்தந்தி ஆனேத்வா ஸம்ப³ந்தோ⁴. சித்தஸ்ஸ ஹி ததோ அனுப்³பே³ஜனம் தத³னுனயனம். தேனாஹ ‘‘ஸம்பியாயமானோ ஓலோகேதீ’’தி. வாயுபத்த²ம்ப⁴கம் கா³ஹாபேத்வாதி காயம் ததா² உபத்த²ம்ப⁴கம் கத்வா.

ஓபம்மஸம்ஸந்த³னம் ஸுவிஞ்ஞேய்யமேவ. காமகி³த்³த⁴தாய ஹீனாதி⁴முத்திகோ, அவிஸுத்³த⁴ஸீலாசாரதாய மிச்சா²படிபன்னோ.

அங்கு³லீஹி நிக்க²ந்தபபா⁴ ஆகாஸஸஞ்சலனேன தி³கு³ணா ஹுத்வா ஆகாஸே விசரிம்ஸூதி ஆஹ ‘‘யமகவிஜ்ஜுதம் சாரயமானோ வியா’’தி. ‘‘ஆகாஸே பாணிம் சாலேஸீ’’தி பத³ஸ்ஸ அஞ்ஞத்த² அனாக³தத்தா ‘‘அஸம்பி⁴ன்னபத³’’ந்தி வுத்தம். அத்தமனோதி பீதிஸோமனஸ்ஸேஹி க³ஹிதமனோ. யஞ்ஹி சித்தம் அனவஜ்ஜம் பீதிஸோமனஸ்ஸஸஹிதம், தம் ஸஸந்தகம் ஹிதஸுகா²வஹத்தா. தேனாஹ ‘‘ஸகமனோ’’திஆதி³. ந தோ³மனஸ்ஸேன…பே… க³ஹிதமனோ ஸகசித்தஸ்ஸ தப்³பி³ருத்³த⁴த்தா. புரிமனயேனேவாதி ‘‘இதா³னி யோ ஹீனாதி⁴முத்திகோ’’திஆதி³னா புப்³பே³ வுத்தனயேனேவ.

பஸன்னாகாரந்தி பஸன்னேஹி காதப்³ப³கிரியம். தம் ஸரூபதோ த³ஸ்ஸேதி ‘‘சீவராத³யோ பச்சயே த³தே³ய்யு’’ந்தி. தத²பா⁴வாயாதி யத³த்த²ம் ப⁴க³வதா த⁴ம்மோ தே³ஸிதோ, யத³த்த²ஞ்ச ஸாஸனே பப்³ப³ஜ்ஜா, தத³த்தா²ய. ரக்க²ணபா⁴வந்தி அபாயப⁴யதோ ச ரக்க²ணஜ்ஜா²ஸயம். சந்தோ³பமாதி³வஸேனாதி ஆதி³-ஸத்³தே³ன ஆகாஸே சலிதபாணி விய கத்த²சி அலக்³க³தாய பரிஸுத்³த⁴ஜ்ஜா²ஸயதா ஸத்தேஸு காருஞ்ஞந்தி ஏவமாதீ³னம் ஸங்க³ஹோ.

சந்தூ³பமஸுத்தவண்ணனா நிட்டி²தா.