10. உபஸ்ஸயஸுத்தவண்ணனா

153. லாப⁴ஸக்காரஹேதுபி ஏகச்சே பி⁴க்கூ² பி⁴க்கு²னுபஸ்ஸயம் க³ந்த்வா பி⁴க்கு²னியோ ஓவத³ந்தி, ஏவமேவம் அயம் பன தே²ரோ ந லாப⁴ஸக்காரஹேது பி⁴க்கு²னுபஸ்ஸயக³மனம் யாசதி, அத² கஸ்மாதி ஆஹ ‘‘கம்மட்டா²னத்தி²கா’’திஆதி³. ஏஸோ ஹி ஆனந்த³த்தே²ரோ உஸ்ஸுக்காபேத்வா படிபத்திகு³ணம் த³ஸ்ஸேந்தோ யஸ்மா தா பி⁴க்கு²னியோ சதுஸச்சகம்மட்டா²னிகா, தஸ்மா பஞ்சன்னம் உபாதா³னக்க²ந்தா⁴னம் உத³யப்³ப³யாதி³பகாஸனியா த⁴ம்மகதா²ய விபஸ்ஸனாபடிபத்திஸம்பத³ம் த³ஸ்ஸேஸி. அனிச்சாதி³லக்க²ணானி சேவ உத³யப்³ப³யாதி³கே ச ஸம்மா த³ஸ்ஸேஸி. ஹத்தே²ன க³ஹேத்வா விய பச்சக்க²தோ த³ஸ்ஸேஸி. ஸமாத³பேஸீதி தத்த² லக்க²ணாரம்மணிகவிபஸ்ஸனம் ஸமாத³பேஸி. யதா² வீதி²படிபன்னோ ஹுத்வா பவத்ததி, ஏவம் க³ண்ஹாபேஸி. ஸமுத்தேஜேஸீதி விபஸ்ஸனாய ஆரத்³தா⁴ய ஸங்கா²ரானம் உத³யப்³ப³யாதீ³ஸு உபட்ட²ஹந்தேஸு யதா²காலம் பக்³க³ஹஸமுபேக்க²ணேஹி போ³ஜ்ஜ²ங்கா³னம் அனுபவத்தனேன பா⁴வனாமஜ்ஜி²மவீதி²ம் பாபேத்வா யதா² விபஸ்ஸனாஞாணம் ஸுப்பஸன்னம் ஹுத்வா வஹதி, ஏவம் இந்த்³ரியானம் விஸத³பா⁴வகரணேன விபஸ்ஸனாசித்தம் ஸம்மா உத்தேஜேஸி, நிப்³பா³னவஸேன வா ஸமாத³பேஸி. ஸம்பஹம்ஸேஸீதி ததா² பவத்தியமானாய விபஸ்ஸனாய ஸமப்பவத்தபா⁴வனாவஸேன உபரி லத்³த⁴ப்³ப³பா⁴வனாவஸேன சித்தம் ஸம்பஹம்ஸேஸி, லத்³த⁴ஸ்ஸாத³வஸேன ஸுட்டு² தோஸேஸி. ஏவமேத்த² அத்தோ² வேதி³தப்³போ³.

மனுதே பரிஞ்ஞாதி³வஸேன ஸச்சானி பு³ஜ்ஜ²தீதி முனி. தேதி தம். உபயோக³த்தே² ஹி இத³ம் ஸாமிவசனம். உத்தரீதி உபரி, தவ யதா²பூ⁴தஸபா⁴வதோ பரதோதி அத்தோ². பக்க²பதிதோ அக³திக³மனம் அதிரேகஓகாஸோ. உபபரிக்கீ²தி அனுவிச்ச நிவாரகோ ந ப³ஹுமதோ. பு³த்³த⁴படிபா⁴கோ³ தே²ரோ. ‘‘பா³லா பி⁴க்கு²னீ து³ப்³பா⁴ஸிதம் ஆஹா’’தி அவத்வா ‘‘க²மத², ப⁴ந்தே’’தி வத³ந்தேன பக்க²பாதேன விய வுத்தம் ஹோதீதி ஆஹ ‘‘ஏகா பி⁴க்கு²னீ ந வாரிதா’’திஆதி³.

சுதா ஸலிங்க³தோ நட்டா², தே³ஸந்தரபக்கமேன அத³ஸ்ஸனம் ந க³தா. கண்டகஸாகா² வியாதி குரண்டகஅபாமக்³க³கண்டகலஸிகாஹி ஸாகா² விய.

உபஸ்ஸயஸுத்தவண்ணனா நிட்டி²தா.