1. நக²ஸிகா²ஸுத்தவண்ணனா

74. ஸுகு²மாதி தருணா பரித்தா கேஸக்³க³மத்தபா⁴வதோ. யதா² கேஸா தீ³க⁴ஸோ த்³வங்கு³லமத்தாய ஸப்³ப³ஸ்மிம் காலே ஏதப்பமாணாவ, ந தச்சி²ந்த³னம், ஏவம் நக²க்³கா³பி கேஸக்³க³மத்தாவ, ந தேஸம் சி²ந்த³னம் அவட்³ட⁴னதோ. பரதோதி ‘‘ஸஹஸ்ஸிமம் ஸதஸஹஸ்ஸிம’’ந்தி வுத்தட்டா²னே. அபி⁴ஸமேத்வாதி படிவிஜ்ஜி²த்வா, தஸ்மா அபி⁴ஸமேதாவினோ படிவித்³த⁴ஸச்சஸ்ஸாதி அத்தோ². காமம் புரிமபத³ம் து³க்க²க்க²ந்த⁴ஸ்ஸ அதீதபா⁴வம் உபாதா³யபி வத்தும் யுத்தம். புரேதரம்யேவ பன வுத்தபா⁴வம் உபாதா³ய வுத்தந்தி த³ஸ்ஸேதும் ‘‘புரிமம் து³க்க²க்க²ந்த⁴’’ந்திஆதி³ வுத்தம். புரிமம் நாம பச்சி²மம் அபேக்கி²த்வா. புரிமபச்சி²மதா ஹி தம் தம் உபாதா³ய வுச்சதீதி இதா⁴தி⁴ப்பேதம் புரிமம் நீஹரித்வா த³ஸ்ஸேதும் ‘‘கதமம் பனா’’திஆதி³ வுத்தம். ‘‘அதீதம்பி பரிக்கீ²ண’’ந்தி இதா⁴தி⁴ப்பேதம் பரிக்கீ²ணமேவ விபா⁴வேதும் ‘‘கதமம் பன பரிக்கீ²ண’’ந்திஆதி³ வுத்தம். ஸோதாபன்னஸ்ஸ து³க்க²க்க²யோ இத⁴ சோதி³தோதி தம் த³ஸ்ஸேதும் ‘‘பட²மமக்³க³ஸ்ஸ அபா⁴விதத்தா உப்பஜ்ஜேய்யா’’தி வத்வா இதா³னி தம் ஸரூபதோ த³ஸ்ஸேதும் புன ‘‘கதம’’ந்திஆதி³ வுத்தம். ஸத்தஸு அத்தபா⁴வேஸு யம் அபாயே உப்பஜ்ஜேய்ய அட்ட²மம் படிஸந்தி⁴ம் ஆதி³ம் கத்வா யத்த² கத்த²சி அபாயேஸு சாதி யம் து³க்க²ம் உப்பஜ்ஜேய்ய, தம் ஸப்³ப³ம் பரிக்கீ²ணந்தி த³ட்ட²ப்³ப³ம். அஸ்ஸாதி ஸோதாபன்னஸ்ஸ, யம் பரிமாணம், ததோ உத்³த⁴ஞ்ச உபபாதம் அத்தீ²தி அதி⁴ப்பாயோ. மஹா அத்தோ² கு³ணோ மஹத்தோ², ஸோ ஏதஸ்ஸ அத்தீ²தி மஹத்தி²யோ க-காரஸ்ஸ ய-காரம் கத்வா. தேனாஹ ‘‘மஹதோ அத்த²ஸ்ஸ நிப்பா²த³கோ’’தி.

நக²ஸிகா²ஸுத்தவண்ணனா நிட்டி²தா.