11. மஹாகப்பினஸுத்தவண்ணனா

245. மஹாகப்பினோதி பூஜாவசனமேதம் யதா² ‘‘மஹாமோக்³க³ல்லானோ’’தி. ததா²ரூபந்தி ‘‘பு³த்³தோ⁴ த⁴ம்மோ’’திஆதி³கம் கு³ணவிஸேஸவந்தபடிப³த்³த⁴ம். ஸாஸனந்தி தே³ஸந்தரதோ ஆக³தவசனம். ஜங்க⁴வாணிஜாதி ஜங்க⁴சாரினோ வாணிஜா. கிஞ்சி ஸாஸனந்தி அபுப்³ப³பவத்திதீ³பகம் கிஞ்சி வசனந்தி புச்சி². பீதி உப்பஜ்ஜி யதா² தம் ஸுசிரம் கதாபி⁴னீஹாரதாய பரிபக்கஞாணஸ்ஸ. அபரிமாணம் கு³ணஸ்ஸ அபரிமாணதோ ஸப்³ப³ஞ்ஞுகு³ணபரிதீ³பனதோ, ஸேஸரதனத்³வயே நிய்யானிகபா⁴வதீ³பனதோ தி³ட்டி²ஸீலஸாமஞ்ஞேன ஸம்ஹதபா⁴வதீ³பனதோதி வத்தப்³ப³ம். யதா²னுஸிட்ட²ம் படிபஜ்ஜமானே அபாயது³க்க²தோ ஸம்ஸாரது³க்க²தோ ச அபதந்தே தா⁴ரேதீதி த⁴ம்மோ. ஸுபரிஸுத்³த⁴தி³ட்டி²ஸீலஸாமஞ்ஞேன ஸம்ஹதோதி ஸங்கோ⁴தி. ரதனத்தோ² பன திண்ணம்பி ஸதி³ஸோ ஏவாதி.

நவஸதஸஹஸ்ஸானி அதா³ஸி தே³வீ. தும்ஹேதி ராஜினிம் கா³ரவேன ப³ஹுவசனேன வத³தி. ராகோ³தி அனுக³ச்ச²ந்தராகோ³.

ஜனிதேதி கம்மகிலேஸேஹி நிப்³ப³த்திதே. கம்மகிலேஸேஹி பஜாதத்தா பஜாதி பஜாஸத்³தோ³ ஜனிதஸத்³தே³ன ஸமானத்தோ²தி ஆஹ – ‘‘ஜனிதே, பஜாயாதி அத்தோ²’’தி. அட்ட²ஹி விஜ்ஜாஹீதி அம்ப³ட்ட²ஸுத்தே (தீ³. நி. 1.278) ஆக³தனயேன. தத்த² ஹி விபஸ்ஸனாஞாணமனோமயித்³தீ⁴ஹி ஸஹ ச² அபி⁴ஞ்ஞா ‘‘அட்ட² விஜ்ஜா’’தி ஆக³தா. தபதி படிபக்க²வித⁴மனேன விஜ்ஜோததி, தம் ஸூரியஸ்ஸ விரோசனந்தி ஆஹ – ‘‘தபதீதி விரோசதீ’’தி. ஜா²னம் ஸமாபஜ்ஜித்வா ஸமாஹிதேன சித்தேன விபஸ்ஸனம் வட்³டே⁴த்வா ப²லஸமாபத்திம் ஸமாபஜ்ஜித்வா நிஸின்னோதி ஆஹ – ‘‘து³விதே⁴ன ஜா²னேன ஜா²யமானோ’’தி. ஸப்³ப³மங்க³லகா³தா²தி ஸப்³ப³மங்க³லாவிரோதீ⁴ கா³தா²தி வத³ந்தி. ததா² ஹி வத³ந்தி –

‘‘மங்க³லம் ப⁴க³வா பு³த்³தோ⁴, த⁴ம்மோ ஸங்கோ⁴ ச மங்க³லம்;

ஸப்³பே³ஸம்பி ச ஸத்தானம், ஸ புஞ்ஞவிதமங்க³ல’’ந்தி.

பூஜம் காரேத்வா ஏகம் அகா³ரிகத⁴ம்மகதி²கம் உபாஸகம் ஆஹ. ஏத்த² ச ‘‘ஜா²யீ தபதீ’’தி இமினா ஆரம்மணூபனிஜ்ஜா²னானம் க³ஹிதத்தா த⁴ம்மரதனம் க³ஹிதமேவ. ‘‘ப்³ராஹ்மணோ’’தி இமினா ஸங்க⁴ரதனம் க³ஹிதமேவ. பு³த்³த⁴ரதனம் பன ஸரூபேனேவ க³ஹிதந்தி.

மஹாகப்பினஸுத்தவண்ணனா நிட்டி²தா.